𑁨. 𑀆𑀭𑀫𑁆𑀫𑀡𑀧𑀘𑁆𑀘𑀬𑁄

𑀓𑀢𑀫𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄. 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀩𑁆𑀩𑁂𑀧𑀺 𑀭𑀽𑀧𑀥𑀫𑁆𑀫𑀸 𑀲𑀩𑁆𑀩𑀁𑀧𑀺 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀸𑀧𑀺 𑀧𑀜𑁆𑀜𑀢𑁆𑀢𑀺𑀬𑁄 𑀆𑀭𑀫𑁆𑀫𑀡 𑀧𑀘𑁆𑀘𑀬𑁄. 𑀦 𑀳𑀺 𑀲𑁄 𑀦𑀸𑀫 𑀏𑀓𑁄𑀧𑀺 𑀥𑀫𑁆𑀫𑁄 𑀅𑀢𑁆𑀣𑀺, 𑀬𑁄 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸𑀦𑀁 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺. 𑀲𑀗𑁆𑀔𑁂𑀧𑀢𑁄 𑀧𑀦 𑀆𑀭𑀫𑁆𑀫𑀡𑀁 𑀙𑀩𑁆𑀩𑀺𑀥𑀁 𑀳𑁄𑀢𑀺 𑀭𑀽𑀧𑀸𑀭𑀫𑁆𑀫𑀡𑀁 𑀲𑀤𑁆𑀤𑀸𑀭𑀫𑁆𑀫𑀡𑀁 𑀕𑀦𑁆𑀥𑀸𑀭𑀫𑁆𑀫𑀡𑀁 𑀭𑀲𑀸𑀭𑀫𑁆𑀫𑀡𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺.

𑀓𑀢𑀫𑁂 𑀥𑀫𑁆𑀫𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸. 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸𑀥𑀫𑁆𑀫𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸. 𑀦 𑀳𑀺 𑀓𑀺𑀜𑁆𑀘𑀺 𑀘𑀺𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀬𑀁 𑀘𑀺𑀢𑁆𑀢𑀁 𑀪𑀽𑀢𑁂𑀦 𑀯𑀸 𑀅𑀪𑀽𑀢𑁂𑀦 𑀯𑀸 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀧𑀯𑀢𑁆𑀢𑀢𑀺.

𑀢𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀸𑀭𑀫𑁆𑀫𑀡𑀁 𑀤𑀼𑀯𑀺𑀥𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀤𑁆𑀤𑀸𑀭𑀫𑁆𑀫𑀡𑀁 𑀤𑀼𑀯𑀺𑀥𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡 𑀘𑀺𑀢𑁆𑀢𑀲𑁆𑀲. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀕𑀦𑁆𑀥𑀸𑀭𑀫𑁆𑀫𑀡𑀁 𑀤𑀼𑀯𑀺𑀥𑀲𑁆𑀲 𑀖𑀸𑀦𑀯𑀺𑀜𑁆𑀜𑀸𑀡𑀘𑀺𑀢𑁆𑀢𑀲𑁆𑀲. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀲𑀸𑀭𑀫𑁆𑀫𑀡𑀁 𑀤𑀼𑀯𑀺𑀥𑀲𑁆𑀲 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀘𑀺𑀢𑁆𑀢𑀲𑁆𑀲. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀺𑀯𑀺𑀥𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀤𑀼𑀯𑀺𑀥𑀲𑁆𑀲 𑀓𑀸𑀬𑀯𑀺𑀜𑁆𑀜𑀸𑀡𑀘𑀺𑀢𑁆𑀢𑀲𑁆𑀲. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀢𑀸𑀦𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀢𑀺𑀯𑀺𑀥𑀲𑁆𑀲 𑀫𑀦𑁄𑀥𑀸𑀢𑀼𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄. 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀯𑀸 𑀲𑀩𑁆𑀩𑀸𑀦𑀺 𑀢𑁂𑀓𑀸𑀮𑀺𑀓𑀸𑀦𑀺 𑀓𑀸𑀮𑀯𑀺𑀫𑀼𑀢𑁆𑀢𑀸𑀦𑀺 𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀺 𑀯𑀸 𑀙 𑀲𑀢𑁆𑀢𑀢𑀺𑀯𑀺𑀥𑀸𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀘𑀺𑀢𑁆𑀢𑀸𑀦𑀁 𑀬𑀣𑀸𑀭𑀳𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄.

𑀓𑁂𑀦𑀝𑁆𑀞𑁂𑀦 𑀆𑀭𑀫𑁆𑀫𑀡𑀁, 𑀓𑁂𑀦𑀝𑁆𑀞𑁂𑀦 𑀧𑀘𑁆𑀘𑀬𑁄𑀢𑀺. 𑀘𑀺𑀢𑁆𑀢 𑀘𑁂𑀢𑀲𑀺𑀓𑁂𑀳𑀺 𑀆𑀮𑀫𑁆𑀩𑀺𑀢𑀩𑁆𑀩𑀝𑁆𑀞𑁂𑀦 𑀆𑀭𑀫𑁆𑀫𑀡𑀁, 𑀉𑀧𑀓𑀸𑀭𑀓𑀝𑁆𑀞𑁂𑀦 𑀧𑀘𑁆𑀘𑀬𑁄𑀢𑀺.

𑀆𑀮𑀫𑁆𑀩𑀺𑀢𑀩𑁆𑀩𑀝𑁆𑀞𑁂𑀦𑀸𑀢𑀺 𑀘𑁂𑀢𑁆𑀣 𑀆𑀮𑀫𑁆𑀩𑀡𑀓𑀺𑀭𑀺𑀬𑀸 𑀦𑀸𑀫 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸𑀦𑀁 𑀆𑀭𑀫𑁆𑀫𑀡𑀕𑁆𑀕𑀳𑀡𑀓𑀺𑀭𑀺𑀬𑀸, 𑀆𑀭𑀫𑁆𑀫𑀡𑀼𑀧𑀸𑀤𑀸𑀦 𑀓𑀺𑀭𑀺𑀬𑀸.

𑀬𑀣𑀸 𑀳𑀺 𑀮𑁄𑀓𑁂 𑀅𑀬𑁄𑀥𑀸𑀢𑀼𑀁 𑀓𑀸𑀫𑁂𑀢𑀺 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁂𑀦 𑀅𑀬𑁄𑀓𑀦𑁆𑀢𑀓𑁄 𑀦𑀸𑀫 𑀮𑁄𑀳𑀥𑀸𑀢𑀼𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀲𑁄 𑀅𑀬𑁄𑀔𑀦𑁆𑀥𑀲𑀫𑀻𑀧𑀁 𑀲𑀫𑁆𑀧𑀢𑁆𑀢𑁄 𑀢𑀁 𑀅𑀬𑁄𑀔𑀦𑁆𑀥𑀁 𑀓𑀸𑀫𑁂𑀦𑁆𑀢𑁄 𑀯𑀺𑀬 𑀇𑀘𑁆𑀙𑀦𑁆𑀢𑁄 𑀯𑀺𑀬 𑀅𑀬𑁄𑀔𑀦𑁆𑀥𑀸𑀪𑀺𑀫𑀼𑀔𑁄 𑀘𑀜𑁆𑀘𑀮𑀢𑀺. 𑀲𑀬𑀁 𑀯𑀸 𑀢𑀁 𑀅𑀬𑁄𑀔𑀦𑁆𑀥𑀁 𑀉𑀧𑀕𑀘𑁆𑀙𑀢𑀺. 𑀅𑀬𑁄𑀔𑀦𑁆𑀥𑀁 𑀯𑀸 𑀅𑀢𑁆𑀢𑀸𑀪𑀺𑀫𑀼𑀔𑀁 𑀆𑀓𑀟𑁆𑀠𑀢𑀺, 𑀅𑀬𑁄𑀔𑀦𑁆𑀥𑁄 𑀢𑀤𑀪𑀺𑀫𑀼𑀔𑁄 𑀘𑀜𑁆𑀘𑀮𑀢𑀺, 𑀢𑀁 𑀯𑀸 𑀉𑀧𑀕𑀘𑁆𑀙𑀢𑀺. 𑀅𑀬𑀁 𑀅𑀬𑁄𑀓𑀦𑁆𑀢𑀓𑀲𑁆𑀲 𑀆𑀮𑀫𑁆𑀩𑀡𑀓𑀺𑀭𑀺𑀬𑀸 𑀦𑀸𑀫. 𑀏𑀯𑀫𑁂𑀯 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀆𑀭𑀫𑁆𑀫𑀡𑁂𑀲𑀼 𑀆𑀮𑀫𑁆𑀩𑀡𑀓𑀺𑀭𑀺𑀬𑀸 𑀤𑀝𑁆𑀞𑀩𑁆𑀩𑀸. 𑀦 𑀓𑁂𑀯𑀮𑀁 𑀆𑀭𑀫𑁆𑀫𑀡𑁂𑀲𑀼 𑀆𑀮𑀫𑁆𑀩𑀡 𑀫𑀢𑁆𑀢𑀁 𑀳𑁄𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀢𑁆𑀢𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀫𑀸𑀦𑀸 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀆𑀭𑀫𑁆𑀫𑀡𑀸𑀦𑀁 𑀆𑀧𑀸𑀢𑀸𑀕𑀫𑀦𑁂 𑀏𑀯 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘 𑀔𑀡𑁂 𑀔𑀡𑁂 𑀦𑀺𑀭𑀼𑀚𑁆𑀛𑀦𑁆𑀢𑀺.

𑀬𑀣𑀸 𑀢𑀁 𑀪𑁂𑀭𑀺𑀢𑀮𑁂 𑀪𑁂𑀭𑀺𑀲𑀤𑁆𑀤𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀢𑀢𑁆𑀣 𑀢𑀢𑁆𑀣 𑀳𑀢𑁆𑀣𑁂𑀦 𑀧𑀳𑀭𑀡𑀓𑀸𑀮𑁂 𑀏𑀯 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘 𑀔𑀡𑁂 𑀔𑀡𑁂 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀯𑀻𑀡𑀸𑀲𑀤𑁆𑀤𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑀻𑀡𑀸𑀢𑀦𑁆𑀢𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀯𑀻𑀡𑀸𑀤𑀦𑁆𑀢𑀓𑁂𑀦 𑀧𑀳𑀭𑀡𑀓𑀸𑀮𑁂 𑀏𑀯 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘 𑀔𑀡𑁂 𑀔𑀡𑁂 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺. 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀪𑀯𑀗𑁆𑀕𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀓𑀸𑀮𑁂𑀧𑀺 𑀧𑀼𑀩𑁆𑀩𑀪𑀯𑁂 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀆𑀧𑀸𑀢 𑀫𑀸𑀕𑀢𑀸𑀦𑀺 𑀓𑀫𑁆𑀫 𑀓𑀫𑁆𑀫𑀦𑀺𑀫𑀺𑀢𑁆𑀢 𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀏𑀯 𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀢𑀺. 𑀆𑀭𑀫𑁆𑀫𑀡𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.