𑁧𑁫. 𑀆𑀳𑀸𑀭𑀧𑀘𑁆𑀘𑀬𑁄

𑀤𑀼𑀯𑀺𑀥𑁄 𑀆𑀳𑀸𑀭𑀧𑀘𑁆𑀘𑀬𑁄 𑀭𑀽𑀧𑀸𑀳𑀸𑀭𑀧𑀘𑁆𑀘𑀬𑁄 𑀅𑀭𑀽𑀧𑀸𑀳𑀸𑀭 𑀧𑀘𑁆𑀘𑀬𑁄.

𑀢𑀢𑁆𑀣 𑀭𑀽𑀧𑀸𑀳𑀸𑀭𑀧𑀘𑁆𑀘𑀬𑁄 𑀦𑀸𑀫 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑀗𑁆𑀔𑀸𑀢𑀁 𑀑𑀚 𑀭𑀽𑀧𑀁 𑀯𑀼𑀘𑁆𑀘𑀢𑀺. 𑀲𑁄 𑀘 𑀅𑀚𑁆𑀛𑀢𑁆𑀢𑀸𑀳𑀸𑀭𑁄 𑀩𑀳𑀺𑀤𑁆𑀥𑀸𑀳𑀸𑀭𑁄𑀢𑀺 𑀤𑀼𑀯𑀺𑀥𑁄. 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑀸𑀦𑀁 𑀲𑀢𑁆𑀢𑀸𑀦𑀁 𑀲𑀩𑁆𑀩𑁂𑀧𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀥𑀫𑁆𑀫𑀸 𑀢𑀲𑁆𑀲 𑀤𑀼𑀯𑀺𑀥𑀲𑁆𑀲 𑀭𑀽𑀧𑀸𑀳𑀸𑀭𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀅𑀭𑀽𑀧𑀸𑀳𑀸𑀭𑁄 𑀧𑀦 𑀢𑀺𑀯𑀺𑀥𑁄 𑀨𑀲𑁆𑀲𑀸𑀳𑀸𑀭𑁄 𑀫𑀦𑁄𑀲𑀜𑁆𑀘𑁂𑀢𑀦𑀸 𑀳𑀸𑀭𑁄 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀘. 𑀢𑀬𑁄𑀧𑁂𑀢𑁂 𑀥𑀫𑁆𑀫𑀸 𑀲𑀳𑀚𑀸𑀢𑀸𑀦𑀁 𑀦𑀸𑀫𑀭𑀽𑀧𑀥𑀫𑁆𑀫𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁄 𑀳𑁄𑀦𑁆𑀢𑀺. 𑀲𑀳𑀚𑀸𑀢𑀸 𑀘 𑀦𑀸𑀫𑀭𑀽𑀧 𑀥𑀫𑁆𑀫𑀸 𑀢𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸.

𑀓𑁂𑀦𑀝𑁆𑀞𑁂𑀦 𑀆𑀳𑀸𑀭𑁄𑀢𑀺. 𑀪𑀼𑀲𑀁 𑀳𑀭𑀡𑀝𑁆𑀞𑁂𑀦 𑀆𑀳𑀸𑀭𑁄. 𑀪𑀼𑀲𑀁 𑀳𑀭𑀡𑀝𑁆𑀞𑁂𑀦𑀸𑀢𑀺𑀘 𑀤𑀴𑁆𑀳𑀁 𑀧𑀯𑀢𑁆𑀢𑀸𑀧𑀦𑀝𑁆𑀞𑁂𑀦, 𑀘𑀺𑀭𑀓𑀸𑀮𑀁 𑀞𑀺𑀢𑀺𑀬𑀸 𑀯𑀼𑀟𑁆𑀠𑀺𑀬𑀸 𑀯𑀺𑀭𑀼𑀴𑁆𑀳𑀺𑀬𑀸 𑀯𑁂𑀧𑀼𑀮𑁆𑀮𑀸𑀬 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀦𑀦𑀓𑀺𑀘𑁆𑀘𑀬𑀼𑀢𑁆𑀢𑁄𑀧𑀺 𑀆𑀳𑀸𑀭𑁄 𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀧𑁆𑀧𑀥𑀸𑀦𑁄 𑀳𑁄𑀢𑀻𑀢𑀺.

𑀢𑀢𑁆𑀣 𑀤𑀼𑀯𑀺𑀥𑁄 𑀭𑀽𑀧𑀸𑀳𑀸𑀭𑁄 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀁 𑀭𑀽𑀧𑀓𑀸𑀬𑀁 𑀉𑀧𑀩𑁆𑀭𑀽𑀳𑀬𑀦𑁆𑀢𑁄 𑀪𑀼𑀲𑀁 𑀳𑀭𑀢𑀺, 𑀤𑀴𑁆𑀳𑀁 𑀧𑀯𑀢𑁆𑀢𑁂𑀢𑀺, 𑀘𑀺𑀭𑀁 𑀅𑀤𑁆𑀥𑀸𑀦𑀁 𑀕𑀫𑁂𑀢𑀺, 𑀢𑀁 𑀢𑀁 𑀆𑀬𑀼𑀓𑀧𑁆𑀧𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑁂𑀢𑀻𑀢𑀺 𑀆𑀳𑀸𑀭𑁄.

𑀨𑀲𑁆𑀲𑀸𑀳𑀸𑀭𑁄 𑀆𑀭𑀫𑁆𑀫𑀡𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑀭𑀲𑀁 𑀦𑀻𑀳𑀭𑀦𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀪𑀼𑀲𑀁 𑀳𑀭𑀢𑀺. 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀓𑀸𑀬𑀯𑀘𑀻 𑀫𑀦𑁄𑀓𑀫𑁆𑀫𑁂𑀲𑀼 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀪𑀼𑀲𑀁 𑀳𑀭𑀢𑀺. 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀆𑀭𑀫𑁆𑀫𑀡𑀯𑀺𑀚𑀸𑀦𑀦𑀝𑁆𑀞𑁂𑀦 𑀧𑀼𑀩𑁆𑀩𑀗𑁆𑀕𑀫𑀓𑀺𑀘𑁆𑀘𑀁 𑀯𑀳𑀦𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀪𑀼𑀲𑀁 𑀳𑀭𑀢𑀺, 𑀤𑀴𑁆𑀳𑀁 𑀧𑀯𑀢𑁆𑀢𑁂𑀢𑀺, 𑀘𑀺𑀭𑀁 𑀅𑀤𑁆𑀥𑀸𑀦𑀁 𑀕𑀫𑁂𑀢𑀻𑀢𑀺 𑀆𑀳𑀸𑀭𑁄. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀪𑀼𑀲𑀁 𑀳𑀭𑀦𑁆𑀢𑁄 𑀲𑀳𑀚𑀸𑀢𑀭𑀽𑀧𑀥𑀫𑁆𑀫𑁂𑀧𑀺 𑀪𑀼𑀲𑀁 𑀳𑀭𑀢𑀺𑀬𑁂𑀯.

𑀇𑀥 𑀲𑀼𑀢𑁆𑀢𑀦𑁆𑀢𑀦𑀬𑁄𑀧𑀺 𑀯𑀢𑁆𑀢𑀩𑁆𑀩𑁄. 𑀬𑀣𑀸 𑀲𑀓𑀼𑀡𑀸 𑀦𑀸𑀫 𑀘𑀓𑁆𑀔𑀽𑀳𑀺 𑀤𑀺𑀲𑀸𑀯𑀺𑀤𑀺𑀲𑀁 𑀯𑀺𑀪𑀸𑀯𑁂𑀢𑁆𑀯𑀸 𑀧𑀢𑁆𑀢𑁂𑀳𑀺 𑀭𑀼𑀓𑁆𑀔𑀢𑁄 𑀭𑀼𑀓𑁆𑀔𑀁 𑀯𑀦𑀢𑁄 𑀯𑀦𑀁 𑀆𑀓𑀸𑀲𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀢𑀼𑀡𑁆𑀟𑀓𑁂𑀳𑀺 𑀨𑀮𑀸𑀨𑀮𑀸𑀦𑀺 𑀢𑀼𑀤𑀺𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀢𑁆𑀢𑀸𑀦𑀁 𑀬𑀸𑀧𑁂𑀦𑁆𑀢𑀺. 𑀢𑀣𑀸 𑀇𑀫𑁂 𑀲𑀢𑁆𑀢𑀸 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀆𑀭𑀫𑁆𑀫𑀡𑀸𑀦𑀺 𑀯𑀺𑀪𑀸𑀯𑁂𑀢𑁆𑀯𑀸 𑀙𑀳𑀺 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁂𑀳𑀺 𑀆𑀭𑀫𑁆𑀫𑀡𑀯𑀢𑁆𑀣𑀼𑀧𑁆𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀲𑁆𑀲𑀼𑀓𑁆𑀓𑀦𑀁 𑀓𑀢𑁆𑀯𑀸 𑀙𑀳𑀺 𑀨𑀲𑁆𑀲𑀸𑀳𑀸𑀭𑁂𑀳𑀺 𑀆𑀭𑀫𑁆𑀫𑀡𑁂𑀲𑀼 𑀭𑀲𑀁 𑀧𑀸𑀢𑀼𑀪𑀯𑀦𑁆𑀢𑀁 𑀓𑀢𑁆𑀯𑀸 𑀲𑀼𑀔𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀺. 𑀯𑀺𑀜𑁆𑀜𑀸𑀡𑁂𑀳𑀺 𑀯𑀸 𑀆𑀭𑀫𑁆𑀫𑀡𑀸𑀦𑀺 𑀯𑀺𑀪𑀸𑀯𑁂𑀢𑁆𑀯𑀸 𑀦𑀸𑀫𑀭𑀽𑀧 𑀲𑀫𑁆𑀧𑀢𑁆𑀢𑀺𑀁 𑀲𑀸𑀥𑁂𑀦𑁆𑀢𑀺. 𑀨𑀲𑁆𑀲𑁂𑀳𑀺 𑀆𑀭𑀫𑁆𑀫𑀡𑁂𑀲𑀼 𑀭𑀲𑀁 𑀧𑀸𑀢𑀼𑀪𑀯𑀦𑁆𑀢𑀁 𑀓𑀢𑁆𑀯𑀸 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀁 𑀯𑁂𑀤𑀦𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀡𑁆𑀳𑀸𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺. 𑀘𑁂𑀢𑀦𑀸𑀳𑀺 𑀢𑀡𑁆𑀳𑀸𑀫𑀽𑀮𑀓𑀸𑀦𑀺 𑀦𑀸𑀦𑀸𑀓𑀫𑁆𑀫𑀸𑀦𑀺 𑀧𑀲𑀯𑁂𑀢𑁆𑀯𑀸 𑀪𑀯𑀢𑁄 𑀪𑀯𑀁 𑀲𑀁𑀲𑀭𑀦𑁆𑀢𑀺. 𑀏𑀯𑀁 𑀆𑀳𑀸𑀭𑀥𑀫𑁆𑀫𑀸𑀦𑀁 𑀫𑀳𑀦𑁆𑀢𑀁 𑀆𑀳𑀸𑀭𑀓𑀺𑀘𑁆𑀘𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀆𑀳𑀸𑀭𑀧𑀘𑁆𑀘𑀬𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.