𑁨. 𑀦𑀸𑀫𑀓𑀡𑁆𑀟

𑀅𑀣 𑀦𑀸𑀫𑀺𑀓𑀯𑀺𑀪𑀢𑁆𑀬𑀸𑀯𑀢𑀸𑀭𑁄 𑀯𑀼𑀘𑁆𑀘𑀢𑁂.

𑀅𑀢𑁆𑀣𑀸𑀪𑀺𑀫𑀼𑀔𑀁 𑀦𑀫𑀦𑀢𑁄, 𑀅𑀢𑁆𑀢𑀦𑀺 𑀘𑀢𑁆𑀣𑀲𑁆𑀲 𑀦𑀸𑀫𑀦𑀢𑁄 𑀦𑀸𑀫𑀁, 𑀤𑀩𑁆𑀩𑀸𑀪𑀺𑀥𑀸𑀦𑀁.

𑀢𑀁 𑀧𑀦 𑀤𑀼𑀯𑀺𑀥𑀁 𑀅𑀦𑁆𑀯𑀢𑁆𑀣𑀭𑀼𑀴𑁆𑀳𑀻𑀯𑀲𑁂𑀦, 𑀢𑀺𑀯𑀺𑀥𑀁 𑀧𑀼𑀫𑀺𑀢𑁆𑀣𑀺𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦. 𑀬𑀣𑀸 𑁋 𑀭𑀼𑀓𑁆𑀔𑁄, 𑀫𑀸𑀮𑀸, 𑀥𑀦𑀁.

𑀘𑀢𑀼𑀩𑁆𑀩𑀺𑀥𑀁 𑀲𑀸𑀫𑀜𑁆𑀜𑀕𑀼𑀡𑀓𑁆𑀭𑀺𑀬𑀸𑀬𑀤𑀺𑀘𑁆𑀙𑀸𑀯𑀲𑁂𑀦, 𑀬𑀣𑀸 𑁋 𑀭𑀼𑀓𑁆𑀔𑁄, 𑀦𑀻𑀮𑁄, 𑀧𑀸𑀘𑀓𑁄, 𑀲𑀺𑀭𑀺𑀯𑀟𑁆𑀠𑁄𑀢𑀺𑀆𑀤𑀺.

𑀅𑀝𑁆𑀞𑀯𑀺𑀥𑀁 𑀅𑀯𑀡𑁆𑀡𑀺𑀯𑀡𑁆𑀡𑀼𑀯𑀡𑁆𑀡𑁄𑀓𑀸𑀭𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀓𑀢𑀺𑀪𑁂𑀤𑁂𑀦.

𑀧𑀼𑀮𑁆𑀮𑀺𑀗𑁆𑀕

𑀢𑀢𑁆𑀣 𑀧𑀞𑀫𑀁 𑀅𑀓𑀸𑀭𑀦𑁆𑀢𑀫𑁆𑀳𑀸 𑀧𑀼𑀮𑁆𑀮𑀺𑀗𑁆𑀕𑀸 𑀚𑀸𑀢𑀺𑀦𑀺𑀫𑀺𑀢𑁆𑀢𑀸 𑀧𑀼𑀭𑀺𑀲𑀲𑀤𑁆𑀤𑀸 𑀲𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀬𑁄 𑀧𑀭𑀸 𑀬𑁄𑀚𑀻𑀬𑀦𑁆𑀢𑁂.

𑁬𑁦. 𑀚𑀺𑀦𑀯𑀘𑀦𑀬𑀼𑀢𑁆𑀢𑀜𑁆𑀳𑀺.

𑀅𑀥𑀺𑀓𑀸𑀭𑁄𑀬𑀁. 𑀢𑀢𑁆𑀣 𑀧𑀜𑁆𑀘 𑀫𑀸𑀭𑁂 𑀚𑀺𑀢𑀯𑀸𑀢𑀺 𑀚𑀺𑀦𑁄, 𑀩𑀼𑀤𑁆𑀥𑁄. 𑀚𑀺𑀦𑀲𑁆𑀲 𑀯𑀘𑀦𑀁 𑀚𑀺𑀦𑀯𑀘𑀦𑀁, 𑀢𑀲𑁆𑀲 𑀚𑀺𑀦𑀯𑀘𑀦𑀲𑁆𑀲 𑀬𑀼𑀢𑁆𑀢𑀁 𑀚𑀺𑀦𑀯𑀘𑀦𑀬𑀼𑀢𑁆𑀢𑀁, 𑀢𑁂𑀧𑀺𑀝𑀓𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀫𑀸𑀕𑀥𑀺𑀓𑀸𑀬 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀬𑀼𑀢𑁆𑀢𑀁 𑀅𑀦𑀼𑀭𑀽𑀧𑀫𑁂𑀯𑀸𑀢𑀺 𑀇𑀤𑀁 𑀅𑀥𑀺𑀓𑀸𑀭𑀢𑁆𑀣𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀸 𑀫𑀸𑀕𑀥𑀻 𑀫𑀽𑀮𑀪𑀸𑀲𑀸, 𑀦𑀭𑀸 𑀬𑀸𑀬𑀸𑀤𑀺𑀓𑀧𑁆𑀧𑀺𑀓𑀸;

𑀩𑁆𑀭𑀳𑁆𑀫𑀸𑀦𑁄 𑀘’𑀲𑁆𑀲𑀼𑀢𑀸𑀮𑀸𑀧𑀸, 𑀲𑀫𑁆𑀩𑀼𑀤𑁆𑀥𑀸 𑀘𑀸𑀧𑀺 𑀪𑀸𑀲𑀭𑁂.

𑀅𑀥𑀺𑀓𑀸𑀭𑁄 𑀧𑀦 𑀢𑀺𑀯𑀺𑀥𑁄 𑀲𑀻𑀳𑀕𑀢𑀺𑀓𑀫𑀡𑁆𑀟𑀽𑀓𑀕𑀢𑀺𑀓𑀬𑀣𑀸𑀦𑀼𑀧𑀼𑀩𑁆𑀩𑀺𑀓𑀯𑀲𑁂𑀦, 𑀅𑀬𑀁 𑀧𑀦 𑀲𑀻𑀳𑀕𑀢𑀺𑀓𑁄 𑀧𑀼𑀩𑁆𑀩𑀸𑀧𑀭𑀯𑀺𑀮𑁄𑀓𑀦𑀢𑁄, 𑀬𑀣𑀸𑀦𑀼𑀧𑀼𑀩𑁆𑀩𑀺𑀓𑁄𑀬𑁂𑀯 𑀯𑀸.

𑀲𑀓𑁆𑀓𑀢𑀯𑀺𑀲𑀤𑀺𑀲𑀁 𑀓𑀢𑁆𑀯𑀸 𑀚𑀺𑀦𑀯𑀘𑀦𑀸𑀦𑀼𑀭𑀽𑀧𑀯𑀲𑁂𑀦 𑀧𑀓𑀢𑀺𑀝𑁆𑀞𑀧𑀦𑀢𑁆𑀣𑀁 𑀧𑀭𑀺𑀪𑀸𑀲𑀫𑀸𑀳.

𑁬𑁧. 𑀮𑀺𑀗𑁆𑀕𑀜𑁆𑀘 𑀦𑀺𑀧𑀘𑁆𑀘𑀢𑁂.

𑀮𑀺𑀗𑁆𑀕𑀁𑀧𑀸𑀝𑀺𑀧𑀤𑀺𑀓𑀁, 𑀬𑀣𑀸 𑀬𑀣𑀸 𑀚𑀺𑀦𑀯𑀘𑀦𑀬𑀼𑀢𑁆𑀢𑀜𑁆𑀳𑀺 𑀮𑀺𑀗𑁆𑀕𑀁, 𑀢𑀣𑀸 𑀢𑀣𑀸 𑀇𑀥 𑀮𑀺𑀗𑁆𑀕𑀁 𑀦𑀺𑀧𑀘𑁆𑀘𑀢𑁂 𑀞𑀧𑀻𑀬𑀢𑀺. 𑀘𑀲𑀤𑁆𑀤𑁂𑀦 𑀥𑀸𑀢𑀯𑁄 𑀘𑀸𑀢𑀺 𑀚𑀺𑀦𑀯𑀘𑀦𑀸𑀦𑀼𑀭𑀽𑀧𑀢𑁄 ‘‘𑀧𑀼𑀭𑀺𑀲’’𑀇𑀢𑀺 𑀮𑀺𑀗𑁆𑀕𑁂 𑀞𑀧𑀺𑀢𑁂 𑀢𑀢𑁄 𑀢𑀲𑁆𑀲 𑀥𑀸𑀢𑀼𑀧𑁆𑀧𑀘𑁆𑀘𑀬𑀯𑀺𑀪𑀢𑁆𑀢𑀺𑀯𑀚𑁆𑀚𑀺𑀢𑀲𑁆𑀲 𑀅𑀢𑁆𑀣𑀯𑀢𑁄 𑀲𑀤𑁆𑀤𑀲𑁆𑀲 ‘‘𑀧𑀭𑀲𑀫𑀜𑁆𑀜𑀸 𑀧𑀬𑁄𑀕𑁂’’𑀢𑀺 𑀧𑀭𑀺𑀪𑀸𑀲𑀢𑁄 𑀮𑀺𑀗𑁆𑀕𑀲𑀜𑁆𑀜𑀸𑀬𑀁 𑁋

𑀇𑀢𑁄 𑀧𑀭𑀁 𑀯𑀺𑀪𑀢𑁆𑀢𑀺𑀧𑁆𑀧𑀘𑁆𑀘𑀬𑀸𑀤𑀺𑀯𑀺𑀥𑀸𑀦𑁂 𑀲𑀩𑁆𑀩𑀢𑁆𑀣 𑀮𑀺𑀗𑁆𑀕𑀕𑁆𑀕𑀳𑀡𑀫𑀦𑀼𑀯𑀢𑁆𑀢𑀢𑁂.

𑁬𑁨. 𑀢𑀢𑁄 𑀘 𑀯𑀺𑀪𑀢𑁆𑀢𑀺𑀬𑁄.

𑀢𑀢𑁄 𑀚𑀺𑀦𑀯𑀘𑀦𑀬𑀼𑀢𑁆𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀧𑀭𑀸 𑀯𑀺𑀪𑀢𑁆𑀢𑀺𑀬𑁄 𑀳𑁄𑀦𑁆𑀢𑀺. 𑀘𑀲𑀤𑁆𑀤𑀕𑁆𑀕𑀳𑀡𑁂𑀦 𑀢𑀯𑁂𑀢𑀼𑀦𑀸𑀤𑀺𑀧𑀘𑁆𑀘𑀬𑀦𑁆𑀢𑀦𑀺𑀧𑀸𑀢𑀢𑁄𑀧𑀺. 𑀓𑀫𑁆𑀫𑀸𑀤𑀺𑀯𑀲𑁂𑀦, 𑀏𑀓𑀢𑁆𑀢𑀸𑀤𑀺𑀯𑀲𑁂𑀦 𑀘 𑀮𑀺𑀗𑁆𑀕𑀢𑁆𑀣𑀁 𑀯𑀺𑀪𑀚𑀦𑁆𑀢𑀻𑀢𑀺 𑀯𑀺𑀪𑀢𑁆𑀢𑀺𑀬𑁄.

𑀓𑀸 𑀘 𑀧𑀦 𑀢𑀸 𑀯𑀺𑀪𑀢𑁆𑀢𑀺𑀬𑁄? ‘‘𑀯𑀺𑀪𑀢𑁆𑀢𑀺𑀬𑁄’’𑀢𑀺 𑀅𑀥𑀺𑀓𑀸𑀭𑁄.

𑁬𑁩. 𑀲𑀺𑀬𑁄, 𑀅𑀁𑀬𑁄, 𑀦𑀸𑀳𑀺, 𑀲𑀦𑀁, 𑀲𑁆𑀫𑀸𑀳𑀺, 𑀲𑀦𑀁, 𑀲𑁆𑀫𑀺𑀁𑀲𑀼.

𑀲𑁆𑀬𑀸𑀤𑀬𑁄 𑀤𑁆𑀯𑀺𑀲𑀢𑁆𑀢 𑀯𑀺𑀪𑀢𑁆𑀢𑀺𑀬𑁄 𑀦𑀸𑀫 𑀳𑁄𑀦𑁆𑀢𑀺. 𑀢𑀢𑁆𑀣 𑀲𑀺, 𑀬𑁄 𑀇𑀢𑀺 𑀧𑀞𑀫𑀸, 𑀅𑀁, 𑀬𑁄 𑀇𑀢𑀺 𑀤𑀼𑀢𑀺𑀬𑀸, 𑀦𑀸, 𑀳𑀺 𑀇𑀢𑀺 𑀢𑀢𑀺𑀬𑀸, 𑀲, 𑀦𑀁 𑀇𑀢𑀺 𑀘𑀢𑀼𑀢𑁆𑀣𑀻, 𑀲𑁆𑀫𑀸, 𑀳𑀺 𑀇𑀢𑀺 𑀧𑀜𑁆𑀘𑀫𑀻, 𑀲, 𑀦𑀁 𑀇𑀢𑀺 𑀙𑀝𑁆𑀞𑀻, 𑀲𑁆𑀫𑀺𑀁, 𑀲𑀼 𑀇𑀢𑀺 𑀲𑀢𑁆𑀢𑀫𑀻.

𑀇𑀤𑀁 𑀧𑀦 𑀲𑀜𑁆𑀜𑀸𑀥𑀺𑀓𑀸𑀭𑀧𑀭𑀺𑀪𑀸𑀲𑀸𑀯𑀺𑀥𑀺𑀲𑀼𑀢𑁆𑀢𑁂𑀲𑀼 𑀲𑀜𑁆𑀜𑀸𑀲𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑀺𑀬𑀁 ‘‘𑀯𑀺𑀪𑀢𑁆𑀢𑀺𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄, 𑀅𑀫𑁆𑀳𑀲𑁆𑀲 𑀫𑀫𑀁 𑀲𑀯𑀺𑀪𑀢𑁆𑀢𑀺𑀲𑁆𑀲 𑀲𑁂’’𑀢𑀺, 𑀇𑀢𑀭𑀣𑀸 𑀧𑀼𑀭𑀺𑀫𑀲𑀼𑀢𑁆𑀢𑁂𑀦 𑀏𑀓𑀬𑁄𑀕𑁄 𑀓𑀢𑁆𑀢𑀩𑁆𑀩𑁄𑀢𑀺. 𑀏𑀢𑁆𑀣 𑀘 𑀧𑀞𑀫𑀸𑀤𑀺𑀯𑁄𑀳𑀸𑀭𑁄, 𑀏𑀓𑀯𑀘𑀦𑀸𑀤𑀺𑀯𑁄𑀳𑀸𑀭𑁄 𑀘 𑀅𑀦𑁆𑀯𑀢𑁆𑀣𑀯𑀲𑁂𑀦, 𑀧𑀭𑀲𑀫𑀜𑁆𑀜𑀸𑀯𑀲𑁂𑀦 𑀯𑀸 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀓𑀲𑁆𑀲 𑀯𑀘𑀦𑀁 𑀏𑀓𑀯𑀘𑀦𑀁, 𑀩𑀳𑀽𑀦𑀁 𑀯𑀘𑀦𑀁 𑀩𑀳𑀼𑀯𑀘𑀦𑀁, 𑀤𑁆𑀯𑀺𑀦𑁆𑀦𑀁 𑀧𑀽𑀭𑀡𑀻 𑀤𑀼𑀢𑀺𑀬𑀸𑀢𑀺𑀆𑀤𑀺, 𑀇𑀢𑀭𑀣𑀸 𑀧𑀼𑀭𑀺𑀫𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀲𑀜𑁆𑀜𑀸𑀓𑀭𑀡𑁂 𑀅𑀧𑁆𑀧𑀓𑀢𑀦𑀺𑀭𑀢𑁆𑀣𑀓𑀯𑀺𑀥𑀺𑀧𑁆𑀧𑀲𑀗𑁆𑀕𑁄 𑀲𑀺𑀬𑀸.

‘‘𑀚𑀺𑀦𑀯𑀘𑀦𑀬𑀼𑀢𑁆𑀢𑀜𑁆𑀳𑀺, 𑀮𑀺𑀗𑁆𑀕𑀜𑁆𑀘 𑀦𑀺𑀧𑀘𑁆𑀘𑀢𑁂’’𑀢𑀺 𑀘 𑀯𑀢𑁆𑀢𑀢𑁂. 𑀇𑀥 𑀧𑀦 𑀧𑀤𑀦𑀺𑀧𑁆𑀨𑀸𑀤𑀦𑀫𑁆𑀧𑀺 𑀚𑀺𑀦𑀯𑀘𑀦𑀲𑁆𑀲𑀸𑀯𑀺𑀭𑁄𑀥𑁂𑀦𑀸𑀢𑀺 𑀜𑀸𑀧𑁂𑀢𑀼𑀁 𑀧𑀭𑀺𑀪𑀸𑀲𑀦𑁆𑀢𑀭𑀫𑀸𑀳.

𑁬𑁪. 𑀢𑀤𑀦𑀼𑀧𑀭𑁄𑀥𑁂𑀦.

𑀬𑀣𑀸 𑀬𑀣𑀸 𑀢𑁂𑀲𑀁 𑀚𑀺𑀦𑀯𑀘𑀦𑀸𑀦𑀁 𑀉𑀧𑀭𑁄𑀥𑁄 𑀦 𑀳𑁄𑀢𑀺, 𑀢𑀣𑀸 𑀢𑀣𑀸 𑀇𑀥 𑀮𑀺𑀗𑁆𑀕𑀁, 𑀘𑀲𑀤𑁆𑀤𑁂𑀦𑀸𑀔𑁆𑀬𑀸𑀢𑀜𑁆𑀘 𑀦𑀺𑀧𑀘𑁆𑀘𑀢𑁂, 𑀦𑀺𑀧𑁆𑀨𑀸𑀤𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀇𑀥 𑀘 𑀆𑀔𑁆𑀬𑀸𑀢𑁂 𑀘 𑀤𑁆𑀯𑀺𑀯𑀘𑀦𑀸𑀕𑁆𑀕𑀳𑀡𑀁, 𑀲𑀓𑁆𑀓𑀢𑀯𑀺𑀲𑀤𑀺𑀲𑀢𑁄 𑀯𑀺𑀪𑀢𑁆𑀢𑀺𑀧𑁆𑀧𑀘𑁆𑀘𑀬𑀸𑀤𑀺𑀯𑀺𑀥𑀸𑀦𑀜𑁆𑀘 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀣 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀲𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀧𑁆𑀧𑀲𑀗𑁆𑀕𑁂 ‘‘𑀯𑀢𑁆𑀢𑀺𑀘𑁆𑀙𑀸𑀦𑀼𑀧𑀼𑀩𑁆𑀩𑀺𑀓𑀸 𑀲𑀤𑁆𑀤𑀧𑁆𑀧𑀯𑀢𑁆𑀢𑀻’’𑀢𑀺 𑀯𑀢𑁆𑀢𑀺𑀘𑁆𑀙𑀸𑀯𑀲𑀸 𑁋

𑁬𑁫. 𑀮𑀺𑀗𑁆𑀕𑀢𑁆𑀣𑁂 𑀧𑀞𑀫𑀸.

𑀮𑀺𑀗𑁆𑀕𑀢𑁆𑀣𑀸𑀪𑀺𑀥𑀸𑀦𑀫𑀢𑁆𑀢𑁂 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀧𑀞𑀫𑀸. 𑀢𑀢𑁆𑀣𑀸𑀧𑀺 𑀅𑀦𑀺𑀬𑀫𑁂𑀦𑁂𑀓𑀯𑀘𑀦𑀩𑀳𑀼𑀯𑀘𑀦𑀧𑁆𑀧𑀲𑀗𑁆𑀕𑁂 ‘‘𑀏𑀓𑀫𑁆𑀳𑀻 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦’’𑀦𑁆𑀢𑀺 𑀧𑀭𑀺𑀪𑀸𑀲𑀢𑁄 𑀮𑀺𑀗𑁆𑀕𑀢𑁆𑀣𑀲𑁆𑀲𑁂𑀓𑀢𑁆𑀢𑀯𑀘𑀦𑀺𑀘𑁆𑀙𑀸𑀬𑀁 𑀧𑀞𑀫𑁂𑀓𑀯𑀘𑀦𑀁 𑀲𑀺.

‘‘𑀅𑀢𑁄 𑀦𑁂𑀦𑀸’’𑀢𑀺 𑀇𑀢𑁄 ‘‘𑀅𑀢𑁄’’𑀢𑀺 𑀯𑀢𑁆𑀢𑀢𑁂, 𑀮𑀺𑀗𑁆𑀕𑀕𑁆𑀕𑀳𑀡𑀜𑁆𑀘.

𑁬𑁬. 𑀲𑁄.

𑀲𑀺, 𑀑𑀇𑀢𑀺 𑀤𑁆𑀯𑀺𑀧𑀤𑀫𑀺𑀤𑀁. 𑀮𑀺𑀗𑁆𑀕𑀲𑁆𑀲 𑀅𑀓𑀸𑀭𑀢𑁄 𑀧𑀭𑀲𑁆𑀲 𑀲𑀺𑀯𑀘𑀦𑀲𑁆𑀲 𑀑𑀓𑀸𑀭𑁄 𑀳𑁄𑀢𑀺.

𑀲𑀼𑀢𑁆𑀢𑁂𑀲𑀼 𑀳𑀺 𑀧𑀞𑀫𑀸𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀓𑀸𑀭𑀺𑀬𑀺𑀦𑁄 𑀙𑀝𑁆𑀞𑀻𑀯𑀺𑀧𑀭𑀺𑀡𑀸𑀫𑁂𑀦 𑀯𑀺𑀯𑀭𑀡𑀁 𑀆𑀤𑁂𑀲𑀸𑀧𑁂𑀓𑁆𑀔𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀘 𑀲𑀻𑀢𑀺 𑀯𑀺𑀪𑀢𑁆𑀢𑀺 𑀕𑀬𑁆𑀳𑀢𑁂 𑀯𑀺𑀪𑀢𑁆𑀢𑀺𑀓𑀸𑀭𑀺𑀬𑀯𑀺𑀥𑀺𑀧𑁆𑀧𑀓𑀭𑀡𑀢𑁄, ‘‘𑀢𑀢𑁄 𑀘 𑀯𑀺𑀪𑀢𑁆𑀢𑀺𑀬𑁄’’𑀢𑀺 𑀇𑀢𑁄 𑀯𑀺𑀪𑀢𑁆𑀢𑀺𑀕𑁆𑀕𑀳𑀡𑀸𑀦𑀼𑀯𑀢𑁆𑀢𑀦𑀢𑁄 𑀯𑀸, 𑀏𑀯𑀁 𑀲𑀩𑁆𑀩𑀢𑁆𑀣 𑀲𑁆𑀬𑀸𑀤𑀻𑀦𑀁 𑀓𑀸𑀭𑀺𑀬𑀯𑀺𑀥𑀸𑀦𑁂 𑀯𑀺𑀪𑀢𑁆𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀯𑀸 𑀧𑀭𑁄 𑀅𑀲𑀭𑀽𑀧𑀸’’𑀢𑀺 𑀧𑀭𑀮𑁄𑀧𑁂 𑀲𑀫𑁆𑀧𑀢𑁆𑀢𑁂 𑀢𑀤𑀧𑀯𑀸𑀤𑁂𑀦 𑀧𑀼𑀩𑁆𑀩𑀮𑁄𑀧𑀫𑀸𑀳.

𑁬𑁭. 𑀲𑀭𑀮𑁄𑀧𑁄’𑀫𑀸𑀤𑁂𑀲𑀧𑁆𑀧𑀘𑁆𑀘𑀬𑀸𑀤𑀺𑀫𑁆𑀳𑀺 𑀲𑀭𑀮𑁄𑀧𑁂 𑀢𑀼 𑀧𑀓𑀢𑀺.

𑀧𑀼𑀩𑁆𑀩𑀲𑁆𑀲𑀭𑀲𑁆𑀲 𑀮𑁄𑀧𑁄 𑀳𑁄𑀢𑀺 𑀅𑀁𑀯𑀘𑀦𑁂, 𑀆𑀤𑁂𑀲𑀧𑁆𑀧𑀘𑁆𑀘𑀬𑀸𑀤𑀺𑀪𑀽𑀢𑁂 𑀘 𑀲𑀭𑁂 𑀧𑀭𑁂, 𑀲𑀭𑀮𑁄𑀧𑁂 𑀓𑀢𑁂 𑀢𑀼 𑀧𑀭𑀲𑀭𑀲𑁆𑀲 𑀧𑀓𑀢𑀺𑀪𑀸𑀯𑁄 𑀳𑁄𑀢𑀺. 𑀏𑀢𑁆𑀣 𑀘 ‘‘𑀲𑀭𑀮𑁄𑀧𑁂’’𑀢𑀺 𑀧𑀼𑀦𑀕𑁆𑀕𑀳𑀡𑀁 𑀇𑀫𑀺𑀦𑀸𑀯 𑀓𑀢𑀲𑀭𑀮𑁄𑀧𑀦𑀺𑀫𑀺𑀢𑁆𑀢𑁂𑀬𑁂𑀯 𑀧𑀭𑀲𑁆𑀲 𑀯𑀺𑀓𑀸𑀭𑁂 𑀲𑀫𑁆𑀧𑀢𑁆𑀢𑁂 𑀧𑀓𑀢𑀺𑀪𑀸𑀯𑀢𑁆𑀣𑀁. 𑀧𑀭𑀲𑀭𑀲𑁆𑀲 𑀧𑀓𑀢𑀺𑀪𑀸𑀯𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀢𑁄 𑀅𑀫𑀸𑀤𑁂𑀲𑀧𑁆𑀧𑀘𑁆𑀘𑀬𑀸𑀤𑀺𑀪𑀽𑀢𑁂 𑀲𑀭𑁂 𑀧𑀭𑁂𑀢𑀺𑀧𑀺 𑀲𑀺𑀤𑁆𑀥𑀁.

𑀢𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀬𑁄 𑀘𑁂𑀢𑁆𑀣, 𑀧𑀘𑁆𑀘𑀬𑀢𑁆𑀢𑁂𑀦 𑀕𑀬𑁆𑀳𑀭𑁂;

𑀆𑀤𑀺𑀕𑁆𑀕𑀳𑀡𑀫𑀸𑀔𑁆𑀬𑀸𑀢-𑀓𑀺𑀢𑀓𑁂𑀲𑁆𑀯𑀸𑀕𑀫𑀢𑁆𑀣𑀺𑀤𑀁.

𑀧𑀘𑁆𑀘𑀬𑀲𑀸𑀳𑀘𑀭𑀺𑀬𑀸, 𑀘𑀸𑀤𑁂𑀲𑁄 𑀧𑀓𑀢𑀻𑀧𑀭𑁄;

𑀧𑀤𑀦𑁆𑀢𑀲𑁆𑀲𑀭𑀮𑁄𑀧𑁄 𑀦, 𑀢𑁂𑀦’𑀩𑁆𑀪𑀸𑀳𑀸𑀤𑀺𑀓𑁂 𑀧𑀭𑁂.

𑀢𑀼𑀕𑁆𑀕𑀳𑀡𑀁 𑀪𑀺𑀓𑁆𑀔𑀼𑀦𑀻𑀆𑀤𑀻𑀲𑀼 𑀲𑀭𑀮𑁄𑀧𑀦𑀺𑀯𑀢𑁆𑀢𑀦𑀢𑁆𑀣𑀁, ‘‘𑀦𑀬𑁂 𑀧𑀭𑀁 𑀬𑀼𑀢𑁆𑀢𑁂’’𑀢𑀺 𑀧𑀭𑀁 𑀦𑁂𑀢𑀩𑁆𑀩𑀁. 𑀧𑀼𑀭𑀺𑀲𑁄 𑀢𑀺𑀝𑁆𑀞𑀢𑀺.

𑀧𑀼𑀭𑀺𑀲𑁄 𑀘 𑀧𑀼𑀭𑀺𑀲𑁄 𑀘𑀸𑀢𑀺 𑀧𑀼𑀭𑀺𑀲 𑀧𑀼𑀭𑀺𑀲𑀇𑀢𑀺 𑀯𑀢𑁆𑀢𑀩𑁆𑀩𑁂 𑁋

𑁬𑁮. 𑀲𑀭𑀽𑀧𑀸𑀦𑀫𑁂𑀓𑀲𑁂𑀲𑁆𑀯𑀲𑀓𑀺𑀁.

𑀲𑀭𑀽𑀧𑀸𑀦𑀁 𑀲𑀫𑀸𑀦𑀭𑀽𑀧𑀸𑀦𑀁 𑀧𑀤𑀩𑁆𑀬𑀜𑁆𑀚𑀦𑀸𑀦𑀁 𑀫𑀚𑁆𑀛𑁂 𑀏𑀓𑁄𑀯 𑀲𑀺𑀲𑁆𑀲𑀢𑁂, 𑀅𑀜𑁆𑀜𑁂 𑀮𑁄𑀧𑀫𑀸𑀧𑀚𑁆𑀚𑀦𑁆𑀢𑁂 𑀅𑀲𑀓𑀺𑀦𑁆𑀢𑀺 𑀏𑀓𑀲𑁂𑀲𑁄. 𑀏𑀢𑁆𑀣 𑀘 ‘‘𑀲𑀭𑀽𑀧𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸𑀯 𑀲𑀺𑀤𑁆𑀥𑁂 𑀅𑀲𑀓𑀺𑀫𑁆𑀧𑀬𑁄𑀕𑁂 𑀧𑀼𑀦𑀸𑀲𑀓𑀺𑀁𑀕𑀳𑀡𑀁 𑀏𑀓𑀯𑀺𑀪𑀢𑁆𑀢𑀺𑀯𑀺𑀲𑀬𑀸𑀦𑀫𑁂𑀯𑀸𑀲𑀓𑀺𑀫𑁆𑀧𑀬𑁄𑀕𑁂 𑀏𑀯𑀸𑀬𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁, 𑀦 𑀘 𑀯𑀺𑀘𑁆𑀙𑀸𑀧𑀬𑁄𑀕𑁂’𑀢𑀺𑀧𑁆𑀧𑀲𑀗𑁆𑀕𑁄. ‘‘𑀯𑀕𑁆𑀕𑀸 𑀧𑀜𑁆𑀘𑀧𑀜𑁆𑀘𑀲𑁄 𑀫𑀦𑁆𑀢𑀸’’𑀢𑀺 𑀏𑀢𑁆𑀣 ‘‘𑀧𑀜𑁆𑀘𑀧𑀜𑁆𑀘𑀲𑁄’’𑀢𑀺 𑀦𑀺𑀤𑁆𑀤𑁂𑀲𑁂𑀦𑁂𑀯 𑀯𑀺𑀘𑁆𑀙𑀸𑀧𑀬𑁄𑀕𑀲𑀺𑀤𑁆𑀥𑀺𑀬𑀸 𑀜𑀸𑀧𑀺𑀢𑀢𑁆𑀢𑀸, 𑀅𑀣 𑀯𑀸 𑀲𑀳𑀯𑀘𑀦𑀺𑀘𑁆𑀙𑀸𑀬’𑀫𑀬’𑀫𑁂𑀓𑀲𑁂𑀲𑁄.

𑀬𑁄𑀕𑀯𑀺𑀪𑀸𑀕𑀢𑁄 𑀘𑁂𑀢𑁆𑀣, 𑀏𑀓𑀲𑁂𑀲𑁆𑀯𑀲𑀓𑀺𑀁 𑀇𑀢𑀺;

𑀯𑀺𑀭𑀽𑀧𑁂𑀓𑀲𑁂𑀲𑁄 𑀳𑁄𑀢𑀺, 𑀯𑀸 ‘‘𑀧𑀺𑀢𑀽𑀦’’𑀦𑁆𑀢𑀺𑀆𑀤𑀺𑀲𑀼.

𑀢𑀢𑁆𑀣𑁂𑀯 𑀮𑀺𑀗𑁆𑀕𑀢𑁆𑀣𑀲𑁆𑀲 𑀩𑀳𑀼𑀢𑁆𑀢𑀯𑀘𑀦𑀺𑀘𑁆𑀙𑀸𑀬𑀁 ‘‘𑀩𑀳𑀼𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦’’𑀦𑁆𑀢𑀺 𑀧𑀞𑀫𑀸𑀩𑀳𑀼𑀯𑀘𑀦𑀁 𑀬𑁄, 𑀧𑀼𑀭𑀺𑀲 𑀬𑁄 𑀇𑀢𑀻𑀥 ‘‘𑀅𑀢𑁄, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁬𑁯. 𑀲𑀩𑁆𑀩𑀬𑁄𑀦𑀻𑀦𑀫𑀸𑀏.

𑀅𑀓𑀸𑀭𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀧𑀭𑁂𑀲𑀁 𑀲𑀩𑁆𑀩𑁂𑀲𑀁 𑀧𑀞𑀫𑀸𑀬𑁄𑀦𑀻𑀦𑀁, 𑀤𑀼𑀢𑀺𑀬𑀸𑀬𑁄𑀦𑀻𑀦𑀜𑁆𑀘 𑀬𑀬𑀸𑀓𑁆𑀓𑀫𑀁 𑀆𑀓𑀸𑀭𑁂𑀓𑀸𑀭𑀸𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸𑀢𑀺 𑀆𑀓𑀸𑀭𑁄, 𑀲𑀩𑁆𑀩𑀕𑁆𑀕𑀳𑀡𑀁 𑀲𑀩𑁆𑀩𑀸𑀤𑁂𑀲𑀢𑁆𑀣𑀁, 𑀲𑀭𑀮𑁄𑀧𑀸𑀤𑀺 𑀧𑀼𑀭𑀺𑀫𑀲𑀤𑀺𑀲𑀫𑁂𑀯, 𑀧𑀼𑀭𑀺𑀲𑀸 𑀢𑀺𑀝𑁆𑀞𑀦𑁆𑀢𑀺.

𑀯𑀸 𑀇𑀘𑁆𑀘𑁂𑀯 𑀭𑀽𑀧𑀸 𑀭𑀽𑀧𑀸𑀦𑀺, 𑀅𑀕𑁆𑀕𑀬𑁄, 𑀫𑀼𑀦𑀬𑁄.

𑀯𑀸𑀲𑀤𑁆𑀤𑁄𑀬𑀁 𑀯𑀯𑀢𑁆𑀣𑀺𑀢𑀧𑀺𑀪𑀸𑀲𑀢𑁆𑀣𑁄, 𑀢𑁂𑀦 𑀘𑁂𑀢𑁆𑀣 𑁋

𑀦𑀺𑀘𑁆𑀘𑀫𑁂𑀯 𑀘 𑀧𑀼𑀮𑁆𑀮𑀺𑀗𑁆𑀕𑁂, 𑀅𑀦𑀺𑀘𑁆𑀘𑀜𑁆𑀘 𑀦𑀧𑀼𑀁𑀲𑀓𑁂;

𑀅𑀲𑀦𑁆𑀢𑀁 𑀛𑁂 𑀓𑀢𑀢𑁆𑀢𑁂 𑀢𑀼, 𑀯𑀺𑀥𑀺𑀁 𑀤𑀻𑀧𑁂𑀢𑀺 𑀯𑀸𑀲𑀼𑀢𑀺.

𑀢𑀢𑁆𑀣𑁂𑀯𑀸𑀮𑀧𑀦𑀯𑀘𑀦𑀺𑀘𑁆𑀙𑀸𑀬𑀁 ‘‘𑀮𑀺𑀗𑁆𑀕𑀢𑁆𑀣𑁂 𑀧𑀞𑀫𑀸’’𑀢𑀺 𑀯𑀢𑁆𑀢𑀢𑁂.

𑁭𑁦. 𑀆𑀮𑀧𑀦𑁂 𑀘.

𑀅𑀪𑀺𑀫𑀼𑀔𑀁 𑀓𑀢𑁆𑀯𑀸 𑀮𑀧𑀦𑀁 𑀆𑀮𑀧𑀦𑀁, 𑀲𑀫𑁆𑀩𑁄𑀥𑀦𑀁. 𑀢𑀲𑁆𑀫𑀺𑀁 𑀆𑀮𑀧𑀦𑀢𑁆𑀣𑀸𑀥𑀺𑀓𑁂 𑀮𑀺𑀗𑁆𑀕𑀢𑁆𑀣𑀸𑀪𑀺𑀥𑀸𑀦𑀫𑀢𑁆𑀢𑁂 𑀘 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀧𑀼𑀭𑁂 𑀯𑀺𑀬 𑀏𑀓𑀯𑀘𑀦𑀸𑀤𑀺.

𑀧𑀼𑀭𑀺𑀲 𑀲𑀺 𑀇𑀘𑁆𑀘𑀢𑁆𑀭 𑁋

𑁭𑁧. 𑀆𑀮𑀧𑀦𑁂 𑀲𑀺 𑀕𑀲𑀜𑁆𑀜𑁄.

𑀆𑀮𑀧𑀦𑀢𑁆𑀣𑁂 𑀯𑀺𑀳𑀺𑀢𑁄 𑀲𑀺 𑀕𑀲𑀜𑁆𑀜𑁄 𑀳𑁄𑀢𑀻𑀢𑀺 𑀕𑀲𑀜𑁆𑀜𑀸𑀬𑀁 ‘‘𑀪𑁄 𑀕𑁂 𑀢𑀽’’𑀢𑀺 𑀇𑀢𑁄 ‘‘𑀕𑁂’’𑀢𑀺 𑀯𑀢𑁆𑀢𑀢𑁂.

𑁭𑁨. 𑀅𑀓𑀸𑀭𑀧𑀺𑀢𑀸𑀤𑁆𑀬𑀦𑁆𑀢𑀸𑀦𑀫𑀸.

𑀮𑀺𑀗𑁆𑀕𑀲𑁆𑀲 𑀲𑀫𑁆𑀩𑀦𑁆𑀥𑀻 𑀅𑀓𑀸𑀭𑁄 𑀘 𑀧𑀺𑀢𑀼𑀲𑀢𑁆𑀣𑀼𑀇𑀘𑁆𑀘𑁂𑀯𑀫𑀸𑀤𑀻𑀦𑀫𑀦𑁆𑀢𑁄 𑀘 𑀆𑀓𑀸𑀭𑀢𑁆𑀢𑀫𑀸𑀧𑀚𑁆𑀚𑀢𑁂 𑀕𑁂 𑀧𑀭𑁂.

‘‘𑀕𑁂, 𑀭𑀲𑁆𑀲’’𑀫𑀺𑀢𑀺 𑀘 𑀯𑀢𑁆𑀢𑀢𑁂.

𑁭𑁩. 𑀆𑀓𑀸𑀭𑁄 𑀯𑀸.

𑀮𑀺𑀗𑁆𑀕𑀲𑁆𑀲 𑀲𑀫𑁆𑀩𑀦𑁆𑀥𑀻 𑀆𑀓𑀸𑀭𑁄 𑀭𑀲𑁆𑀲𑀫𑀸𑀧𑀚𑁆𑀚𑀢𑁂 𑀕𑁂 𑀧𑀭𑁂 𑀯𑀺𑀓𑀧𑁆𑀧𑁂𑀦, 𑀅𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑁂𑀯𑀸𑀬𑀁.

𑁭𑁪. 𑀲𑁂𑀲𑀢𑁄 𑀮𑁄𑀧𑀁 𑀕𑀲𑀺𑀧𑀺.

‘‘𑀲𑀺𑀁, 𑀲𑁄, 𑀲𑁆𑀬𑀸 𑀘, 𑀲𑀔𑀢𑁄 𑀕𑀲𑁆𑀲𑁂 𑀯𑀸, 𑀖𑀢𑁂 𑀘𑀸’’𑀢𑀺 𑀏𑀯𑀫𑀸𑀤𑀻𑀳𑀺 𑀦𑀺𑀤𑁆𑀤𑀺𑀝𑁆𑀞𑁂𑀳𑀺 𑀅𑀜𑁆𑀜𑁄 𑀲𑁂𑀲𑁄 𑀦𑀸𑀫, 𑀢𑀢𑁄 𑀲𑁂𑀲𑀢𑁄 𑀮𑀺𑀗𑁆𑀕𑀫𑁆𑀳𑀸 𑀕𑀲𑀺𑀇𑀘𑁆𑀘𑁂𑀢𑁂 𑀮𑁄𑀧𑀫𑀸𑀧𑀚𑁆𑀚𑀦𑁆𑀢𑁂. 𑀅𑀧𑀺𑀕𑁆𑀕𑀳𑀡𑀁 𑀤𑀼𑀢𑀺𑀬𑀢𑁆𑀣𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀁, 𑀏𑀢𑁆𑀣 𑀘 𑀲𑀢𑀺𑀧𑀺 𑀲𑀺𑀕𑁆𑀕𑀳𑀡𑁂 𑀯𑀇𑀢𑀺 𑀯𑀘𑀦𑀫𑁂𑀯 𑀜𑀸𑀧𑀓𑀫𑀜𑁆𑀜𑀢𑁆𑀣𑀸𑀧𑀺 𑀲𑀺𑀕𑁆𑀕𑀳𑀡𑁂 𑀆𑀮𑀧𑀦𑀸𑀕𑁆𑀕𑀳𑀡𑀲𑁆𑀲. 𑀓𑁂𑀘𑀺 𑀆𑀮𑀧𑀦𑀸𑀪𑀺𑀩𑁆𑀬𑀢𑁆𑀢𑀺𑀬𑀸 𑀪𑀯𑀦𑁆𑀢𑀲𑀤𑁆𑀤𑀁 𑀯𑀸 𑀳𑁂𑀲𑀤𑁆𑀤𑀁 𑀯𑀸 𑀧𑀬𑀼𑀚𑁆𑀚𑀦𑁆𑀢𑁂. 𑀪𑁄 𑀧𑀼𑀭𑀺𑀲 𑀢𑀺𑀝𑁆𑀞, 𑀳𑁂 𑀧𑀼𑀭𑀺𑀲𑀸 𑀯𑀸.

𑀩𑀳𑀼𑀯𑀘𑀦𑁂 𑀦 𑀯𑀺𑀲𑁂𑀲𑁄, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸 𑀢𑀺𑀝𑁆𑀞𑀣.

𑀢𑀢𑁆𑀣𑁂𑀯 𑀓𑀫𑁆𑀫𑀢𑁆𑀣𑀯𑀘𑀦𑀺𑀘𑁆𑀙𑀸𑀬𑀁 ‘‘𑀯,’’𑀢𑀺 𑀯𑀢𑁆𑀢𑀢𑁂.

𑁭𑁫. 𑀬𑀁 𑀓𑀭𑁄𑀢𑀺 𑀢𑀁 𑀓𑀫𑁆𑀫𑀁.

𑀬𑀁 𑀯𑀸 𑀓𑀭𑁄𑀢𑀺, 𑀬𑀁 𑀯𑀸 𑀯𑀺𑀓𑀭𑁄𑀢𑀺, 𑀬𑀁 𑀯𑀸 𑀧𑀸𑀧𑀼𑀡𑀸𑀢𑀺, 𑀢𑀁 𑀓𑀸𑀭𑀓𑀁 𑀓𑁆𑀭𑀺𑀬𑀸𑀦𑀺𑀫𑀺𑀢𑁆𑀢𑀁 𑀓𑀫𑁆𑀫𑀲𑀜𑁆𑀜𑀁 𑀳𑁄𑀢𑀺.

𑁭𑁬. 𑀓𑀫𑁆𑀫𑀢𑁆𑀣𑁂 𑀤𑀼𑀢𑀺𑀬𑀸.

𑀓𑀫𑁆𑀫𑀢𑁆𑀣𑁂 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀧𑀼𑀭𑁂 𑀯𑀺𑀬 𑀤𑀼𑀢𑀺𑀬𑁂𑀓𑀯𑀘𑀦𑀁 𑀅𑀁, ‘‘𑀲𑀭𑀮𑁄𑀧𑁄’’𑀢𑀺𑀆𑀤𑀺𑀦𑀸 𑀲𑀭𑁂 𑀮𑀼𑀢𑁆𑀢𑁂 ‘‘𑀤𑀻𑀖’’𑀦𑁆𑀢𑀺 𑀤𑀻𑀖𑁂 𑀲𑀫𑁆𑀧𑀢𑁆𑀢𑁂 𑀧𑀓𑀢𑀺𑀪𑀸𑀯𑁄 𑀘, 𑀧𑀼𑀭𑀺𑀲𑀁 𑀧𑀲𑁆𑀲.

𑀩𑀳𑀼𑀯𑀘𑀦𑁂 ‘‘𑀲𑀩𑁆𑀩𑀬𑁄𑀦𑀻𑀦𑀫𑀸𑀏’’𑀢𑀺 𑀬𑁄𑀯𑀘𑀦𑀲𑁆𑀲𑁂𑀓𑀸𑀭𑁄, 𑀧𑀼𑀭𑀺𑀲𑁂 𑀧𑀲𑁆𑀲.

𑀢𑀢𑁆𑀣𑁂𑀯 𑀓𑀢𑁆𑀢𑀼𑀯𑀘𑀦𑀺𑀘𑁆𑀙𑀸𑀬𑀁 𑁋

𑁭𑁭. 𑀬𑁄 𑀓𑀭𑁄𑀢𑀺 𑀲 𑀓𑀢𑁆𑀢𑀸.

𑀬𑁄 𑀅𑀢𑁆𑀢𑀧𑁆𑀧𑀥𑀸𑀦𑁄 𑀓𑁆𑀭𑀺𑀬𑀁 𑀓𑀭𑁄𑀢𑀺, 𑀲𑁄 𑀓𑀢𑁆𑀢𑀼𑀲𑀜𑁆𑀜𑁄 𑀳𑁄𑀢𑀺.

‘‘𑀢𑀢𑀺𑀬𑀸’’𑀢𑀺 𑀯𑀢𑁆𑀢𑀢𑁂.

𑁭𑁮. 𑀓𑀢𑁆𑀢𑀭𑀺 𑀘.

𑀓𑀢𑁆𑀢𑀭𑀺 𑀘 𑀓𑀸𑀭𑀓𑁂 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀢𑀢𑀺𑀬𑁂𑀓𑀯𑀘𑀦𑀁 𑀦𑀸.

𑁭𑁯. 𑀅𑀢𑁄 𑀦𑁂𑀦.

𑀏𑀦𑀸𑀢𑀺 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄. 𑀅𑀓𑀸𑀭𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀧𑀭𑀲𑁆𑀲 𑀦𑀸𑀯𑀘𑀦𑀲𑁆𑀲 𑀏𑀦𑀸𑀤𑁂𑀲𑁄 𑀳𑁄𑀢𑀺, 𑀲𑀭𑀮𑁄𑀧𑀸𑀤𑀺, 𑀧𑀼𑀭𑀺𑀲𑁂𑀦 𑀓𑀢𑀁.

𑀩𑀳𑀼𑀯𑀘𑀦𑀫𑁆𑀳𑀺 𑁋

𑁮𑁦. 𑀲𑀼𑀳𑀺𑀲𑁆𑀯𑀓𑀸𑀭𑁄 𑀏.

𑀲𑀼, 𑀳𑀺𑀇𑀘𑁆𑀘𑁂𑀢𑁂𑀲𑀼 𑀯𑀺𑀪𑀢𑁆𑀢𑀺𑀭𑀽𑀧𑁂𑀲𑀼 𑀧𑀭𑁂𑀲𑀼 𑀮𑀺𑀗𑁆𑀕𑀲𑁆𑀲 𑀲𑀫𑁆𑀩𑀦𑁆𑀥𑀻 𑀅𑀓𑀸𑀭𑁄 𑀏𑀢𑁆𑀢𑀫𑀸𑀧𑀚𑁆𑀚𑀢𑁂.

𑁮𑁧. 𑀲𑁆𑀫𑀸𑀳𑀺𑀲𑁆𑀫𑀺𑀁𑀦𑀁 𑀫𑁆𑀳𑀸𑀪𑀺𑀫𑁆𑀳𑀺 𑀯𑀸.

𑀲𑀩𑁆𑀩𑀢𑁄 𑀮𑀺𑀗𑁆𑀕𑀫𑁆𑀳𑀸 𑀲𑁆𑀫𑀸 𑀳𑀺 𑀲𑁆𑀫𑀺𑀁𑀇𑀘𑁆𑀘𑁂𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀫𑁆𑀳𑀸, 𑀪𑀺, 𑀫𑁆𑀳𑀺𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸, 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀺 𑀓𑀢𑀁.

𑀢𑀢𑁆𑀣𑁂𑀯 𑀓𑀭𑀡𑀯𑀘𑀦𑀺𑀘𑁆𑀙𑀸𑀬𑀁 𑁋

𑁮𑁨. 𑀬𑁂𑀦 𑀯𑀸 𑀓𑀬𑀺𑀭𑀢𑁂 𑀢𑀁 𑀓𑀭𑀡𑀁.

𑀬𑁂𑀦 𑀯𑀸 𑀓𑀬𑀺𑀭𑀢𑁂, 𑀬𑁂𑀦 𑀯𑀸 𑀧𑀲𑁆𑀲𑀢𑀺, 𑀬𑁂𑀦 𑀯𑀸 𑀲𑀼𑀡𑀸𑀢𑀺, 𑀢𑀁 𑀓𑀸𑀭𑀓𑀁 𑀓𑀭𑀡𑀲𑀜𑁆𑀜𑀁 𑀳𑁄𑀢𑀺.

𑁮𑁩. 𑀓𑀭𑀡𑁂 𑀢𑀢𑀺𑀬𑀸.

𑀓𑀭𑀡𑀓𑀸𑀭𑀓𑁂 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺, 𑀲𑁂𑀲𑀁 𑀓𑀢𑁆𑀢𑀼𑀲𑀫𑀁, 𑀆𑀯𑀺𑀝𑁆𑀞𑁂𑀦 𑀧𑀼𑀭𑀺𑀲𑁂𑀦 𑀲𑁄 𑀧𑀼𑀜𑁆𑀜𑀁 𑀓𑀭𑁄𑀢𑀺, 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀺.

𑀢𑀢𑁆𑀣𑁂𑀯 𑀲𑀫𑁆𑀧𑀤𑀸𑀦𑀯𑀘𑀦𑀺𑀘𑁆𑀙𑀸𑀬𑀁 𑁋

𑁮𑁪. 𑀬𑀲𑁆𑀲 𑀤𑀸𑀢𑀼𑀓𑀸𑀫𑁄 𑀭𑁄𑀘𑀢𑁂 𑀥𑀸𑀭𑀬𑀢𑁂 𑀯𑀸 𑀢𑀁 𑀲𑀫𑁆𑀧𑀤𑀸𑀦𑀁.

𑀬𑀲𑁆𑀲 𑀯𑀸 𑀤𑀸𑀢𑀼𑀓𑀸𑀫𑁄, 𑀬𑀲𑁆𑀲 𑀯𑀸 𑀭𑁄𑀘𑀢𑁂, 𑀬𑀲𑁆𑀲 𑀯𑀸 𑀥𑀸𑀭𑀬𑀢𑁂, 𑀢𑀁 𑀓𑀸𑀭𑀓𑀁 𑀲𑀫𑁆𑀧𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑁮𑁫. 𑀲𑀫𑁆𑀧𑀤𑀸𑀦𑁂 𑀘𑀢𑀼𑀢𑁆𑀣𑀻.

𑀲𑀫𑁆𑀧𑀤𑀸𑀦𑀓𑀸𑀭𑀓𑁂 𑀘𑀢𑀼𑀢𑁆𑀣𑀻𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀘𑀢𑀼𑀢𑁆𑀣𑀺𑀬𑀸 𑀏𑀓𑀯𑀘𑀦𑀁 𑀲.

𑁮𑁬. 𑀲𑀸𑀕𑀫𑁄 𑀲𑁂.

𑀲𑀩𑁆𑀩𑀢𑁄 𑀮𑀺𑀗𑁆𑀕𑀫𑁆𑀳𑀸 𑀲𑀓𑀸𑀭𑀸𑀕𑀫𑁄 𑀳𑁄𑀢𑀺 𑀲𑁂 𑀯𑀺𑀪𑀢𑁆𑀢𑀺𑀫𑁆𑀳𑀺 𑀧𑀭𑁂. 𑀧𑀼𑀭𑀺𑀲𑀲𑁆𑀲 𑀥𑀦𑀁 𑀤𑀤𑀸𑀢𑀺.

𑀩𑀳𑀼𑀯𑀘𑀦𑀫𑁆𑀳𑀺 ‘‘𑀤𑀻𑀖’’𑀦𑁆𑀢𑀺 𑀯𑀢𑁆𑀢𑀢𑁂.

𑁮𑁭. 𑀲𑀼𑀦𑀁𑀳𑀺𑀲𑀼 𑀘.

𑀲𑀼 𑀦𑀁 𑀳𑀺𑀇𑀘𑁆𑀘𑁂𑀢𑁂𑀲𑀼 𑀧𑀭𑁂𑀲𑀼 𑀮𑀺𑀗𑁆𑀕𑀲𑁆𑀲 𑀅𑀦𑁆𑀢𑀪𑀽𑀢𑀸 𑀲𑀩𑁆𑀩𑁂 𑀭𑀲𑁆𑀲𑀲𑀭𑀸 𑀤𑀻𑀖𑀫𑀸𑀧𑀚𑁆𑀚𑀦𑁆𑀢𑁂, 𑀘𑀕𑁆𑀕𑀳𑀡𑀫𑀺𑀓𑀸𑀭𑀼𑀓𑀸𑀭𑀸𑀦𑀁 𑀓𑁆𑀯𑀘𑀺 𑀦𑀺𑀯𑀢𑁆𑀢𑀦𑀢𑁆𑀣𑀁. 𑀧𑀼𑀭𑀺𑀲𑀸𑀦𑀁.

𑀢𑀢𑁆𑀣𑁂𑀯𑀸𑀧𑀸𑀤𑀸𑀦𑀯𑀘𑀦𑀺𑀘𑁆𑀙𑀸𑀬𑀁 𑁋

𑁮𑁮. 𑀬𑀲𑁆𑀫𑀸 𑀤𑀧𑁂𑀢𑀺 𑀪𑀬𑀫𑀸𑀤𑀢𑁆𑀢𑁂 𑀯𑀸 𑀢𑀤𑀧𑀸𑀤𑀸𑀦𑀁.

𑀬𑀲𑁆𑀫𑀸 𑀯𑀸 𑀅𑀯𑀥𑀺𑀪𑀽𑀢𑀸 𑀅𑀧𑁂𑀢𑀺, 𑀬𑀲𑁆𑀫𑀸 𑀯𑀸 𑀪𑀬𑀁, 𑀬𑀲𑁆𑀫𑀸 𑀯𑀸 𑀆𑀤𑀢𑁆𑀢𑁂, 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑁮𑁯. 𑀅𑀧𑀸𑀤𑀸𑀦𑁂 𑀧𑀜𑁆𑀘𑀫𑀻.

𑀅𑀧𑀸𑀤𑀸𑀦𑀓𑀸𑀭𑀓𑁂 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀧𑀜𑁆𑀘𑀫𑀺𑀬𑀸 𑀏𑀓𑀯𑀘𑀦𑀁 𑀲𑁆𑀫𑀸.

‘‘𑀅𑀢𑁄, 𑀲𑀩𑁆𑀩𑁂𑀲𑀁, 𑀆 𑀏’’𑀢𑀺 𑀘 𑀯𑀢𑁆𑀢𑀢𑁂.

𑁯𑁦. 𑀲𑁆𑀫𑀸𑀲𑁆𑀫𑀺𑀁𑀦 𑀯𑀸.

𑀅𑀓𑀸𑀭𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀲𑀩𑁆𑀩𑁂𑀲𑀁 𑀲𑁆𑀫𑀸 𑀲𑁆𑀫𑀺𑀁𑀇𑀘𑁆𑀘𑁂𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀆𑀓𑀸𑀭𑁂𑀓𑀸𑀭𑀸𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸, 𑀅𑀜𑁆𑀜𑀢𑁆𑀣 𑀫𑁆𑀳𑀸𑀤𑁂𑀲𑁄. 𑀧𑀼𑀭𑀺𑀲𑀸 𑀅𑀧𑁂𑀢𑀺, 𑀧𑀼𑀭𑀺𑀲𑀫𑁆𑀳𑀸, 𑀧𑀼𑀭𑀺𑀲𑀲𑁆𑀫𑀸.

𑀩𑀳𑀼𑀯𑀘𑀦𑁂 𑀲𑀩𑁆𑀩𑀢𑁆𑀣 𑀢𑀢𑀺𑀬𑀸𑀲𑀫𑀁, 𑀳𑀺𑀲𑁆𑀲 𑀪𑀺𑀆𑀤𑁂𑀲𑁄 𑀳𑁄𑀢𑀺. 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀺 𑀅𑀧𑁂𑀢𑀺.

𑀢𑀢𑁆𑀣𑁂𑀯 𑀲𑀸𑀫𑀺𑀯𑀘𑀦𑀺𑀘𑁆𑀙𑀸𑀬𑀁 𑁋

𑁯𑁧. 𑀬𑀲𑁆𑀲 𑀯𑀸 𑀧𑀭𑀺𑀕𑁆𑀕𑀳𑁄 𑀢𑀁 𑀲𑀸𑀫𑀺.

𑀬𑀲𑁆𑀲 𑀯𑀸 𑀧𑀭𑀺𑀕𑁆𑀕𑀳𑁄, 𑀢𑀁 𑀲𑀸𑀫𑀺𑀲𑀜𑁆𑀜𑀁 𑀳𑁄𑀢𑀺.

𑁯𑁨. 𑀲𑀸𑀫𑀺𑀲𑁆𑀫𑀺𑀁 𑀙𑀝𑁆𑀞𑀻.

𑀲𑀸𑀫𑀺𑀲𑁆𑀫𑀺𑀁 𑀙𑀝𑁆𑀞𑀻𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀞𑀧𑁂𑀢𑁆𑀯𑀸 𑀆𑀬𑀸𑀤𑁂𑀲𑀁 𑀲𑀩𑁆𑀩𑀢𑁆𑀣 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀁 𑀲𑀫𑀸𑀦𑀁 𑀭𑀽𑀧𑀁. 𑀧𑀼𑀭𑀺𑀲𑀲𑁆𑀲 𑀏𑀢𑀁 𑀥𑀦𑀁, 𑀧𑀼𑀭𑀺𑀲𑀸𑀦𑀁.

𑀢𑀢𑁆𑀣𑁂𑀯 𑀑𑀓𑀸𑀲𑀯𑀘𑀦𑀺𑀘𑁆𑀙𑀸𑀬𑀁 𑁋

𑁯𑁩. 𑀬𑁄𑀥𑀸𑀭𑁄 𑀢𑀫𑁄𑀓𑀸𑀲𑀁.

𑀬𑁄 𑀓𑀢𑁆𑀢𑀼𑀓𑀫𑁆𑀫𑀸𑀦𑀁 𑀓𑁆𑀭𑀺𑀬𑀸𑀬 𑀆𑀥𑀸𑀭𑁄, 𑀢𑀁 𑀓𑀸𑀭𑀓𑀁 𑀑𑀓𑀸𑀲𑀲𑀜𑁆𑀜𑀁 𑀳𑁄𑀢𑀺.

𑁯𑁪. 𑀑𑀓𑀸𑀲𑁂 𑀲𑀢𑁆𑀢𑀫𑀻.

𑀑𑀓𑀸𑀲𑀓𑀸𑀭𑀓𑁂 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀲𑀢𑁆𑀢𑀫𑀺𑀬𑀸 𑀏𑀓𑀯𑀘𑀦𑀁 𑀲𑁆𑀫𑀺𑀁, 𑀢𑀲𑁆𑀲 ‘‘𑀲𑁆𑀫𑀸𑀲𑁆𑀫𑀺𑀁𑀦𑀁 𑀯𑀸’’𑀢𑀺 𑀏𑀓𑀸𑀭𑁄, 𑀫𑁆𑀳𑀺𑀆𑀤𑁂𑀲𑁄 𑀘, 𑀧𑀼𑀭𑀺𑀲𑁂 𑀧𑀢𑀺𑀝𑁆𑀞𑀺𑀢𑀁, 𑀧𑀼𑀭𑀺𑀲𑀫𑁆𑀳𑀺, 𑀧𑀼𑀭𑀺𑀲𑀲𑁆𑀫𑀺𑀁.

𑀩𑀳𑀼𑀯𑀘𑀦𑁂 ‘‘𑀲𑀼𑀳𑀺𑀲𑁆𑀯𑀓𑀸𑀭𑁄 𑀏’’𑀢𑀺 𑀏𑀓𑀸𑀭𑁄, 𑀧𑀼𑀭𑀺𑀲𑁂𑀲𑀼.

𑀧𑀼𑀭𑀺𑀲𑁄, 𑀧𑀼𑀭𑀺𑀲𑀸, 𑀪𑁄 𑀧𑀼𑀭𑀺𑀲 𑀪𑁄 𑀧𑀼𑀭𑀺𑀲𑀸 𑀯𑀸, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸, 𑀧𑀼𑀭𑀺𑀲𑀁, 𑀧𑀼𑀭𑀺𑀲𑁂, 𑀧𑀼𑀭𑀺𑀲𑁂𑀦, 𑀧𑀼𑀭𑀺𑀲𑁂𑀳𑀺 𑀧𑀼𑀭𑀺𑀲𑁂𑀪𑀺, 𑀧𑀼𑀭𑀺𑀲𑀲𑁆𑀲, 𑀧𑀼𑀭𑀺𑀲𑀸𑀦𑀁, 𑀧𑀼𑀭𑀺𑀲𑀸 𑀧𑀼𑀭𑀺𑀲𑀲𑁆𑀫𑀸 𑀧𑀼𑀭𑀺𑀲𑀫𑁆𑀳𑀸, 𑀧𑀼𑀭𑀺𑀲𑁂𑀳𑀺 𑀧𑀼𑀭𑀺𑀲𑁂𑀪𑀺, 𑀧𑀼𑀭𑀺𑀲𑀲𑁆𑀲, 𑀧𑀼𑀭𑀺𑀲𑀸𑀦𑀁, 𑀧𑀼𑀭𑀺𑀲𑁂 𑀧𑀼𑀭𑀺𑀲𑀲𑁆𑀫𑀺𑀁 𑀧𑀼𑀭𑀺𑀲𑀫𑁆𑀳𑀺, 𑀧𑀼𑀭𑀺𑀲𑁂𑀲𑀼.

𑀢𑀣𑀸 𑀲𑀼𑀕𑀢𑁄, 𑀲𑀼𑀕𑀢𑀸, 𑀪𑁄 𑀲𑀼𑀕𑀢 𑀪𑁄 𑀲𑀼𑀕𑀢𑀸 𑀯𑀸, 𑀪𑀯𑀦𑁆𑀢𑁄 𑀲𑀼𑀕𑀢𑀸, 𑀲𑀼𑀕𑀢𑀁, 𑀲𑀼𑀕𑀢𑁂, 𑀲𑀼𑀕𑀢𑁂𑀦, 𑀲𑀼𑀕𑀢𑁂𑀳𑀺 𑀲𑀼𑀕𑀢𑁂𑀪𑀺, 𑀲𑀼𑀕𑀢𑀲𑁆𑀲, 𑀲𑀼𑀕𑀢𑀸𑀦𑀁, 𑀲𑀼𑀕𑀢𑀸 𑀲𑀼𑀕𑀢𑀲𑁆𑀫𑀸 𑀲𑀼𑀕𑀢𑀫𑁆𑀳𑀸, 𑀲𑀼𑀕𑀢𑁂𑀳𑀺 𑀲𑀼𑀕𑀢𑁂𑀪𑀺, 𑀲𑀼𑀕𑀢𑀲𑁆𑀲, 𑀲𑀼𑀕𑀢𑀸𑀦𑀁, 𑀲𑀼𑀕𑀢𑁂 𑀲𑀼𑀕𑀢𑀲𑁆𑀫𑀺𑀁 𑀲𑀼𑀕𑀢𑀫𑁆𑀳𑀺, 𑀲𑀼𑀕𑀢𑁂𑀲𑀼.

𑀏𑀯𑀁 𑀲𑀼𑀭𑀸’𑀲𑀼𑀭 𑀦𑀭𑁄’𑀭𑀕 𑀦𑀸𑀕 𑀬𑀓𑁆𑀔𑀸,

𑀕𑀦𑁆𑀥𑀩𑁆𑀩 𑀓𑀺𑀦𑁆𑀦𑀭 𑀫𑀦𑀼𑀲𑁆𑀲 𑀧𑀺𑀲𑀸𑀘 𑀧𑁂𑀢𑀸;

𑀫𑀸𑀢𑀗𑁆𑀕 𑀚𑀗𑁆𑀕𑀫 𑀢𑀼𑀭𑀗𑁆𑀕 𑀯𑀭𑀸𑀳 𑀲𑀻𑀳𑀸,

𑀩𑁆𑀬𑀕𑁆𑀖’𑀘𑁆𑀙 𑀓𑀘𑁆𑀙𑀧 𑀢𑀭𑀘𑁆𑀙 𑀫𑀺𑀕’𑀲𑁆𑀲 𑀲𑁄𑀡𑀸.

𑀆𑀮𑁄𑀓 𑀮𑁄𑀓 𑀦𑀺𑀮𑀬𑀸’𑀦𑀺𑀮 𑀘𑀸𑀕 𑀬𑁄𑀕𑀸, 𑀯𑀸𑀬𑀸𑀫 𑀕𑀸𑀫

𑀦𑀺𑀕𑀫𑀸’𑀕𑀫 𑀥𑀫𑁆𑀫 𑀓𑀸𑀫𑀸;

𑀲𑀗𑁆𑀖𑁄’𑀖 𑀖𑁄𑀲 𑀧𑀝𑀺𑀖𑀸’𑀲𑀯 𑀓𑁄𑀥 𑀮𑁄𑀪𑀸,

𑀲𑀸𑀭𑀫𑁆𑀪 𑀣𑀫𑁆𑀪 𑀫𑀤 𑀫𑀸𑀦 𑀧𑀫𑀸𑀤 𑀫𑀓𑁆𑀔𑀸.

𑀧𑀼𑀦𑁆𑀦𑀸𑀕 𑀧𑀽𑀕 𑀧𑀦𑀲𑀸’𑀲𑀦 𑀘𑀫𑁆𑀧𑀓’𑀫𑁆𑀩𑀸,

𑀳𑀺𑀦𑁆𑀢𑀸𑀮 𑀢𑀸𑀮 𑀩𑀓𑀼𑀮’𑀚𑁆𑀚𑀼𑀦 𑀓𑀺𑀁𑀲𑀼𑀓𑀸 𑀘;

𑀫𑀦𑁆𑀤𑀸𑀭 𑀓𑀼𑀦𑁆𑀤 𑀧𑀼𑀘𑀺𑀫𑀦𑁆𑀤 𑀓𑀭𑀜𑁆𑀚 𑀭𑀼𑀓𑁆𑀔𑀸,

𑀜𑁂𑀬𑁆𑀬𑀸 𑀫𑀬𑀽𑀭 𑀲𑀓𑀼𑀦𑀡𑁆𑀟𑀚 𑀓𑁄𑀜𑁆𑀘 𑀳𑀁𑀲𑀸 𑁋

𑀇𑀘𑁆𑀘𑀸𑀤𑀬𑁄𑀧𑀺.

𑀫𑀦𑁄𑀕𑀡𑀸𑀤𑀺𑀲𑁆𑀲 𑀢𑀼 𑀦𑀸𑀲𑀲𑁆𑀫𑀸𑀲𑁆𑀫𑀺𑀁𑀲𑀼 𑀯𑀺𑀲𑁂𑀲𑁄. 𑀅𑀜𑁆𑀜𑀢𑁆𑀣 𑀧𑀼𑀭𑀺𑀲𑀲𑀫𑀁.

𑀫𑀦𑁄, 𑀫𑀦𑀸, 𑀳𑁂 𑀫𑀦 𑀳𑁂 𑀫𑀦𑀸 𑀯𑀸, 𑀪𑀯𑀦𑁆𑀢𑁄 𑀫𑀦𑀸, 𑀫𑀦𑀁, 𑀫𑀦𑁂.

‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁯𑁫. 𑀫𑀦𑁄𑀕𑀡𑀸𑀤𑀺𑀢𑁄 𑀲𑁆𑀫𑀺𑀁𑀦𑀸𑀦𑀫𑀺𑀆.

𑀫𑀦𑁄𑀧𑀪𑀼𑀢𑀺 𑀕𑀡𑁄 𑀫𑀦𑁄𑀕𑀡𑁄, 𑀫𑀦𑁄𑀕𑀡𑀸𑀤𑀺𑀢𑁄 𑀲𑁆𑀫𑀺𑀁, 𑀦𑀸𑀇𑀘𑁆𑀘𑁂𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀇𑀓𑀸𑀭𑀸𑀓𑀸𑀭𑀸𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸. 𑀆𑀤𑀺𑀕𑁆𑀕𑀳𑀡𑁂𑀦 𑀩𑀺𑀮𑀧𑀤𑀸𑀤𑀺𑀢𑁄𑀧𑀺.

‘‘𑀫𑀦𑁄𑀕𑀡𑀸𑀤𑀺𑀢𑁄’’𑀢𑀺 𑀯𑀢𑁆𑀢𑀢𑁂.

𑁯𑁬. 𑀲 𑀲𑀭𑁂 𑀯𑀸𑀕𑀫𑁄.

𑀏𑀢𑁂𑀳𑁂𑀯 𑀫𑀦𑁄𑀕𑀡𑀸𑀤𑀻𑀳𑀺 𑀲𑀭𑁂 𑀧𑀭𑁂 𑀲𑀸𑀕𑀫𑁄 𑀳𑁄𑀢𑀺 𑀯𑀸. 𑀫𑀦𑀲𑀸, 𑀫𑀦𑁂𑀦.

𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄, 𑀢𑁂𑀦 ‘‘𑀫𑀦𑁄 𑀫𑀦𑀸 𑀫𑀦𑀁 𑀫𑀦𑁂 𑀫𑀦𑀆𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀦 𑀳𑁄𑀢𑀺. ‘‘𑀫𑀸𑀦𑀲𑀺𑀓𑀁, 𑀘𑁂𑀢𑀲𑀺𑀓’’𑀦𑁆𑀢𑀺𑀆𑀤𑀻𑀲𑀼 𑀦𑀺𑀘𑁆𑀘𑀁. 𑀫𑀦𑁂𑀳𑀺, 𑀫𑀦𑁂𑀪𑀺.

‘‘𑀫𑀦𑁄𑀕𑀡𑀸𑀤𑀺𑀢𑁄, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁯𑁭. 𑀲𑀲𑁆𑀲 𑀘𑁄.

𑀫𑀦𑁄𑀕𑀡𑀸𑀤𑀺𑀢𑁄 𑀧𑀭𑀲𑁆𑀲 𑀲𑀲𑁆𑀲 𑀯𑀺𑀪𑀢𑁆𑀢𑀺𑀲𑁆𑀲 𑀑𑀓𑀸𑀭𑁄 𑀳𑁄𑀢𑀺 𑀯𑀸. 𑀲𑀸𑀕𑀫𑁄.