𑁬. 𑀆𑀔𑁆𑀬𑀸𑀢𑀓𑀡𑁆𑀟

𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧

𑀅𑀣 𑀥𑀸𑀢𑀼𑀧𑀘𑁆𑀘𑀬𑀲𑀁𑀲𑀺𑀤𑁆𑀥𑀁 𑀓𑀸𑀮, 𑀓𑀸𑀭𑀓, 𑀧𑀼𑀭𑀺𑀲, 𑀲𑀗𑁆𑀔𑁆𑀬𑀸𑀪𑁂𑀤𑀤𑀻𑀧𑀓𑀁 𑀮𑀺𑀗𑁆𑀕𑀪𑁂𑀤𑀭𑀳𑀺𑀢𑀁 𑀓𑁆𑀭𑀺𑀬𑀸𑀧𑀥𑀸𑀦𑀯𑀸𑀘𑀓𑀁 𑀢𑁆𑀬𑀸𑀤𑁆𑀬𑀦𑁆𑀢𑀦𑀸𑀫𑀓𑀁 𑀆𑀔𑁆𑀬𑀸𑀢𑀧𑀤𑀁 𑀤𑀻𑀧𑀺𑀬𑀢𑁂.

𑀢𑀢𑁆𑀣 𑀓𑁆𑀭𑀺𑀬𑀁 𑀥𑀸𑀭𑁂𑀢𑀻𑀢𑀺 𑀥𑀸𑀢𑀼. 𑀲𑀸 𑀧𑀓𑀢𑀺𑀥𑀸𑀢𑀼, 𑀯𑀺𑀓𑀢𑀺𑀥𑀸𑀢𑀼, 𑀦𑀸𑀫𑀥𑀸𑀢𑀼𑀯𑀲𑁂𑀦 𑀢𑀺𑀯𑀺𑀥𑀸.

𑀢𑀢𑁆𑀣 𑀪𑀽, 𑀳𑀽, 𑀕𑀫𑀼, 𑀧𑀘 𑀇𑀘𑁆𑀘𑀸𑀤𑀺 𑀧𑀓𑀢𑀺𑀥𑀸𑀢𑀼 𑀦𑀸𑀫 𑀲𑀪𑀸𑀯𑁂𑀦 𑀲𑀺𑀤𑁆𑀥𑀢𑁆𑀢𑀸.

𑀢𑀺𑀢𑀺𑀓𑁆𑀔, 𑀢𑀺𑀓𑀺𑀘𑁆𑀙, 𑀩𑀼𑀪𑀼𑀓𑁆𑀔, 𑀚𑀺𑀖𑀘𑁆𑀙𑀇𑀘𑁆𑀘𑀸𑀤𑀺 𑀯𑀺𑀓𑀢𑀺𑀥𑀸𑀢𑀼 𑀦𑀸𑀫 𑀲𑀗𑁆𑀔𑀢𑀯𑀲𑁂𑀦 𑀲𑀺𑀤𑁆𑀥𑀢𑁆𑀢𑀸.

𑀧𑀼𑀢𑁆𑀢𑀻𑀬, 𑀧𑀩𑁆𑀩𑀢𑀸𑀬 𑀇𑀘𑁆𑀘𑀸𑀤𑀺 𑀦𑀸𑀫𑀥𑀸𑀢𑀼 𑀦𑀸𑀫 𑀦𑀸𑀫𑀪𑀽𑀢𑀲𑁆𑀲 𑀲𑀢𑁄 𑀓𑁆𑀭𑀺𑀬𑀯𑀸𑀘𑀻𑀧𑀘𑁆𑀘𑀬𑀬𑁄𑀕𑁂𑀦 𑀥𑀸𑀢𑀼𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸.

𑀧𑀓𑀢𑀺𑀥𑀸𑀢𑀼 𑀘 𑀲𑀓𑀫𑁆𑀫𑀺𑀓𑀸’𑀓𑀫𑁆𑀫𑀺𑀓𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀢𑁆𑀣𑀬𑀸 𑀥𑀸𑀢𑀼 𑀓𑀫𑁆𑀫𑀸𑀧𑁂𑀓𑁆𑀔𑀁 𑀓𑁆𑀭𑀺𑀬𑀁 𑀯𑀤𑀢𑀺, 𑀲𑀸 𑀲𑀓𑀫𑁆𑀫𑀺𑀓𑀸 𑀦𑀸𑀫. 𑀕𑀸𑀫𑀁 𑀕𑀘𑁆𑀙𑀢𑀺, 𑀑𑀤𑀦𑀁 𑀧𑀘𑀢𑀺 𑀇𑀘𑁆𑀘𑀸𑀤𑀺.

𑀬𑀸 𑀓𑀫𑁆𑀫𑀦𑀺𑀭𑀧𑁂𑀓𑁆𑀔𑀁 𑀓𑁆𑀭𑀺𑀬𑀁 𑀯𑀤𑀢𑀺, 𑀲𑀸 𑀅𑀓𑀫𑁆𑀫𑀺𑀓𑀸 𑀦𑀸𑀫. 𑀪𑀯𑀢𑀺, 𑀳𑁄𑀢𑀺, 𑀢𑀺𑀝𑁆𑀞𑀢𑀺, 𑀲𑁂𑀢𑀺 𑀇𑀘𑁆𑀘𑀸𑀤𑀺.

𑀲𑀓𑀫𑁆𑀫𑀺𑀓𑀸 𑀘 𑀏𑀓𑀓𑀫𑁆𑀫𑀺𑀓, 𑀤𑁆𑀯𑀺𑀓𑀫𑁆𑀫𑀺𑀓𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀢𑁆𑀣 𑀬𑀸 𑀏𑀓𑀓𑀫𑁆𑀫𑀸𑀧𑁂𑀓𑁆𑀔𑀁 𑀓𑁆𑀭𑀺𑀬𑀁 𑀯𑀤𑀢𑀺, 𑀲𑀸 𑀏𑀓𑀓𑀫𑁆𑀫𑀺𑀓𑀸 𑀦𑀸𑀫. 𑀕𑀸𑀫𑀁 𑀕𑀘𑁆𑀙𑀢𑀺, 𑀑𑀤𑀦𑀁 𑀧𑀘𑀢𑀺 𑀇𑀘𑁆𑀘𑀸𑀤𑀺.

𑀬𑀸 𑀧𑀥𑀸𑀦𑀸’𑀧𑀥𑀸𑀦𑀯𑀲𑁂𑀦 𑀓𑀫𑁆𑀫𑀤𑁆𑀯𑀬𑀸𑀧𑁂𑀓𑁆𑀔𑀁 𑀓𑁆𑀭𑀺𑀬𑀁 𑀯𑀤𑀢𑀺, 𑀲𑀸 𑀤𑁆𑀯𑀺𑀓𑀫𑁆𑀫𑀺𑀓𑀸 𑀦𑀸𑀫.

𑀲𑀸 𑀘 𑀦𑁆𑀬𑀸𑀤𑀺, 𑀤𑀼𑀳𑀸𑀤𑀺𑀯𑀲𑁂𑀦 𑀤𑀼𑀯𑀺𑀥𑀸.

𑀢𑀢𑁆𑀣 𑀬𑀸 𑀥𑀸𑀢𑀼 𑀧𑀸𑀧𑀦𑀢𑁆𑀣𑀸 𑀳𑁄𑀢𑀺, 𑀲𑀸 𑀦𑁆𑀬𑀸𑀤𑀺 𑀦𑀸𑀫. 𑀅𑀚𑀁 𑀕𑀸𑀫𑀁 𑀦𑁂𑀢𑀺, 𑀪𑀸𑀭𑀁 𑀕𑀸𑀫𑀁 𑀯𑀳𑀢𑀺, 𑀲𑀸𑀔𑀁 𑀕𑀸𑀫𑀁 𑀆𑀓𑀟𑁆𑀠𑀢𑀺.

𑀲𑁂𑀲𑀸 𑀤𑁆𑀯𑀺𑀓𑀫𑁆𑀫𑀺𑀓𑀸 𑀤𑀼𑀳𑀸𑀤𑀺 𑀦𑀸𑀫. 𑀕𑀸𑀯𑀺𑀁 𑀔𑀻𑀭𑀁 𑀤𑀼𑀳𑀢𑀺, 𑀩𑁆𑀭𑀸𑀳𑁆𑀫𑀡𑀁 𑀓𑀫𑁆𑀩𑀮𑀁 𑀬𑀸𑀘𑀢𑀺, 𑀤𑀸𑀬𑀓𑀁 𑀪𑀺𑀓𑁆𑀔𑀁 𑀪𑀺𑀓𑁆𑀔𑀢𑀺, 𑀕𑁄𑀡𑀁 𑀯𑀚𑀁 𑀭𑀼𑀦𑁆𑀥𑀢𑀺, 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀲𑀺𑀲𑁆𑀲𑀁 𑀥𑀫𑁆𑀫𑀁 𑀅𑀦𑀼𑀲𑀸𑀲𑀢𑀺, 𑀪𑀕𑀯𑀸 𑀪𑀺𑀓𑁆𑀔𑀽 𑀏𑀢𑀁 [𑀯𑀘𑀦𑀁] 𑀅𑀯𑁄𑀘, 𑀭𑀸𑀚𑀸 𑀅𑀫𑀘𑁆𑀘𑀁 𑀯𑀘𑀦𑀁 𑀩𑁆𑀭𑀯𑀻𑀢𑀺 𑀇𑀘𑁆𑀘𑀸𑀤𑀺.

𑀢𑀢𑁆𑀣 𑀬𑀤𑀸 𑀓𑀫𑁆𑀫𑀲𑁆𑀫𑀺𑀁 𑀭𑀽𑀧𑀁 𑀲𑀺𑀚𑁆𑀛𑀢𑀺, 𑀢𑀤𑀸 𑀯𑀺𑀪𑀢𑁆𑀢𑀺, 𑀧𑀘𑁆𑀘𑀬𑀸 𑀦𑁆𑀬𑀸𑀤𑀺𑀫𑁆𑀳𑀺 𑀧𑀥𑀸𑀦𑀓𑀫𑁆𑀫𑀁 𑀯𑀤𑀦𑁆𑀢𑀺, 𑀤𑀼𑀳𑀸𑀤𑀺𑀫𑁆𑀳𑀺 𑀅𑀧𑀥𑀸𑀦𑀓𑀫𑁆𑀫𑀁, 𑀲𑀩𑁆𑀩𑀥𑀸𑀢𑀽𑀲𑀼 𑀓𑀸𑀭𑀺𑀢𑀬𑁄𑀕𑁂 𑀓𑀸𑀭𑀺𑀢𑀓𑀫𑁆𑀫𑀦𑁆𑀢𑀺, 𑀲𑀩𑁆𑀩𑀜𑁆𑀘𑁂𑀢𑀁 𑀥𑀸𑀢𑀽𑀦𑀁 𑀧𑀓𑀢𑀺𑀅𑀢𑁆𑀣𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀧𑀦 𑀥𑀸𑀢𑀽𑀦𑀁 𑀅𑀢𑁆𑀣𑀦𑁆𑀢𑀭𑀯𑀘𑀦𑁂 𑀯𑀸 𑀦𑀸𑀦𑀼𑀧𑀲𑀕𑁆𑀕𑀬𑁄𑀕𑁂 𑀯𑀸 𑀅𑀓𑀫𑁆𑀫𑀺𑀓𑀸𑀧𑀺 𑀲𑀓𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀲𑀓𑀫𑁆𑀫𑀺𑀓𑀸𑀧𑀺 𑀅𑀓𑀫𑁆𑀫𑀺𑀓𑀸 𑀳𑁄𑀦𑁆𑀢𑀺.

𑀅𑀢𑁆𑀣𑀦𑁆𑀢𑀭𑀯𑀘𑀦𑁂 𑀢𑀸𑀯 𑁋

𑀯𑀺𑀤 𑁋 𑀲𑀢𑁆𑀢𑀸𑀬𑀁, 𑀥𑀫𑁆𑀫𑁄 𑀯𑀺𑀚𑁆𑀚𑀢𑀺, 𑀲𑀁𑀯𑀺𑀚𑁆𑀚𑀢𑀺.

𑀯𑀺𑀤 𑁋 𑀜𑀸𑀡𑁂, 𑀥𑀫𑁆𑀫𑀁 𑀯𑀺𑀤𑀢𑀺.

𑀯𑀺𑀤 𑁋 𑀮𑀸𑀪𑁂, 𑀥𑀦𑀁 𑀯𑀺𑀦𑁆𑀤𑀢𑀺.

𑀯𑀺𑀤 𑁋 𑀅𑀦𑀼𑀪𑀯𑀦𑁂, 𑀲𑀼𑀔𑀁 𑀯𑁂𑀤𑁂𑀢𑀺, 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 [𑀫. 𑀦𑀺. 𑁩.𑁩𑁦𑁩].

𑀯𑀺𑀤 𑁋 𑀆𑀭𑁄𑀘𑀦𑁂, 𑀯𑁂𑀤𑀬𑀸𑀫𑀳𑀁 𑀪𑀦𑁆𑀢𑁂 𑀯𑁂𑀤𑀬𑀢𑀻𑀢𑀺 𑀫𑀁 𑀥𑀸𑀭𑁂𑀢𑀼 [𑀘𑀽𑀴𑀯. 𑀅𑀝𑁆𑀞. 𑁧𑁦𑁨], 𑀓𑀸𑀭𑀡𑀁 𑀦𑀺𑀯𑁂𑀤𑁂𑀢𑀺, 𑀥𑀫𑁆𑀫𑀁 𑀧𑀝𑀺𑀯𑁂𑀤𑁂𑀢𑀺 𑀇𑀘𑁆𑀘𑀸𑀤𑀺.

𑀦𑀸𑀦𑀼𑀧𑀲𑀕𑁆𑀕𑀬𑁄𑀕𑁂 𑁋

𑀧𑀤-𑀕𑀢𑀺𑀬𑀁, 𑀫𑀕𑁆𑀕𑀁 𑀧𑀚𑁆𑀚𑀢𑀺, 𑀧𑀝𑀺𑀧𑀚𑁆𑀚𑀢𑀺, 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀦𑀺𑀧𑀚𑁆𑀚𑀢𑀺, 𑀲𑀫𑁆𑀧𑀚𑁆𑀚𑀢𑀺, 𑀪𑁄𑀕𑁄 𑀪𑀯𑀢𑀺, 𑀲𑀫𑁆𑀪𑀯𑀢𑀺, 𑀪𑁄𑀕𑀁 𑀅𑀦𑀼𑀪𑀯𑀢𑀺, 𑀢𑀡𑁆𑀳𑀁 𑀅𑀪𑀺𑀪𑀯𑀢𑀺, 𑀧𑀭𑀺𑀪𑀯𑀢𑀺, 𑀅𑀥𑀺𑀪𑀯𑀢𑀺, 𑀅𑀭𑀜𑁆𑀜𑀁 𑀅𑀪𑀺𑀲𑀫𑁆𑀪𑀯𑀢𑀺, 𑀅𑀚𑁆𑀛𑁄𑀕𑀸𑀳𑀢𑀻𑀢𑀺 𑀅𑀢𑁆𑀣𑁄. 𑀕𑀘𑁆𑀙𑀦𑁆𑀢𑀁 𑀫𑀕𑁆𑀕𑁂 𑀅𑀪𑀺𑀲𑀫𑁆𑀪𑀯𑀢𑀺, 𑀲𑀫𑁆𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄 𑀇𑀘𑁆𑀘𑀸𑀤𑀺.

𑀧𑀤𑀸𑀦𑀁 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀯𑀸 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀯𑀸 𑀉𑀧𑀓𑀸𑀭𑀓𑀸 𑀯𑀺𑀪𑀢𑁆𑀢𑀺, 𑀧𑀘𑁆𑀘𑀬𑀸 𑀧𑀘𑁆𑀘𑀬𑀸 𑀦𑀸𑀫.

𑀢𑀢𑁆𑀣 𑀯𑀺𑀪𑀢𑁆𑀢𑀺𑀬𑁄 𑀢𑁆𑀬𑀸𑀤𑀺, 𑀢𑁆𑀯𑀸𑀤𑀺𑀇𑀘𑁆𑀘𑀸𑀤𑀺𑀦𑀸 𑀅𑀝𑁆𑀞𑀯𑀺𑀥𑀸 𑀪𑀯𑀦𑁆𑀢𑀺, 𑀲𑀭𑀽𑀧𑀢𑁄 𑀙𑀦𑁆𑀦𑀯𑀼𑀢𑀺𑀯𑀺𑀥𑀸.

𑀢𑀢𑁆𑀣 𑀧𑀼𑀩𑁆𑀩𑀙𑀓𑁆𑀓𑀪𑀽𑀢𑀸𑀦𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀭𑀽𑀧𑀸𑀦𑀺 𑀧𑀭𑀲𑁆𑀲𑀧𑀤𑀸𑀦𑀺 𑀦𑀸𑀫. 𑀧𑀭𑀙𑀓𑁆𑀓𑀪𑀽𑀢𑀸𑀦𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀭𑀽𑀧𑀸𑀦𑀺 𑀅𑀢𑁆𑀢𑀦𑁄𑀧𑀤𑀸𑀦𑀺 𑀦𑀸𑀫.

𑀢𑀢𑁆𑀣 𑀧𑀭𑀳𑀺𑀢𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀞𑀸𑀦𑁂𑀲𑀼 𑀧𑀯𑀢𑁆𑀢𑀺𑀩𑀳𑀼𑀮𑀸𑀦𑀺 𑀧𑀤𑀸𑀦𑀺 𑀧𑀭𑀲𑁆𑀲𑀧𑀤𑀸𑀦𑀺 𑀦𑀸𑀫. 𑀅𑀢𑁆𑀢𑀳𑀺𑀢𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀧𑀯𑀢𑁆𑀢𑀺𑀩𑀳𑀼𑀮𑀸𑀦𑀺 𑀅𑀢𑁆𑀢𑀦𑁄𑀧𑀤𑀸𑀦𑀺 𑀦𑀸𑀫𑀸𑀢𑀺 𑀏𑀓𑁂.

𑀧𑀭𑁄 𑀯𑀼𑀘𑁆𑀘𑀢𑀺 𑀓𑀢𑁆𑀢𑀸 𑀲𑀩𑁆𑀩𑀓𑁆𑀭𑀺𑀬𑀸𑀲𑀸𑀥𑀸𑀭𑀡𑀢𑁆𑀢𑀸, 𑀅𑀢𑁆𑀢𑀸 𑀯𑀼𑀘𑁆𑀘𑀢𑀺 𑀓𑀫𑁆𑀫𑀁 𑀲𑀓𑀲𑀓𑀓𑁆𑀭𑀺𑀬𑀸𑀲𑀸𑀥𑀸𑀭𑀡𑀢𑁆𑀢𑀸, 𑀧𑀭𑀲𑁆𑀲 𑀅𑀪𑀺𑀥𑀸𑀬𑀓𑀸𑀦𑀺 𑀧𑀤𑀸𑀦𑀺 𑀧𑀭𑀲𑁆𑀲𑀧𑀤𑀸𑀦𑀺, 𑀅𑀢𑁆𑀢𑀦𑁄 𑀅𑀪𑀺𑀥𑀸𑀬𑀓𑀸𑀦𑀺 𑀧𑀤𑀸𑀦𑀺 𑀅𑀢𑁆𑀢𑀦𑁄𑀧𑀤𑀸𑀦𑀻𑀢𑀺 𑀅𑀜𑁆𑀜𑁂.

𑀅𑀢𑁆𑀢𑀸 𑀯𑀼𑀘𑁆𑀘𑀢𑀺 𑀧𑀤𑀢𑁆𑀣𑀸𑀦𑀁 𑀲𑀭𑀻𑀭𑀪𑀽𑀢𑀸 𑀓𑁆𑀭𑀺𑀬𑀸, 𑀓𑀢𑁆𑀢𑀼𑀦𑀸 𑀧𑀦 𑀲𑀸𑀥𑁆𑀬𑀝𑁆𑀞𑁂𑀦 𑀓𑁆𑀭𑀺𑀬𑀭𑀽𑀧𑀸𑀦𑀺 𑀪𑀸𑀯, 𑀓𑀫𑁆𑀫𑀸𑀦𑀺𑀧𑀺 𑀅𑀢𑁆𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀸𑀥𑀓𑀝𑁆𑀞𑁂𑀦 𑀢𑁂𑀳𑀺 𑀧𑀭𑀪𑀽𑀢𑁄 𑀓𑀢𑁆𑀢𑀸 𑀧𑀭𑁄 𑀦𑀸𑀫𑀸𑀢𑀺 𑀅𑀧𑀭𑁂.

𑀅𑀢𑁆𑀢𑀸 𑀯𑀼𑀘𑁆𑀘𑀢𑀺 𑀅𑀫𑁆𑀳𑀢𑁆𑀣𑁄, 𑀧𑀭𑁄 𑀯𑀼𑀘𑁆𑀘𑀢𑀺 𑀢𑀼𑀫𑁆𑀳, 𑀦𑀸𑀫𑀢𑁆𑀣𑁄, 𑀧𑀼𑀩𑁆𑀩𑀙𑀓𑁆𑀓𑀸𑀦𑀺 𑀧𑀭𑀩𑀳𑀼𑀮𑀢𑁆𑀢𑀸 𑀧𑀭𑀲𑁆𑀲𑀧𑀤𑀸𑀦𑀺 𑀦𑀸𑀫, 𑀧𑀭𑀙𑀓𑁆𑀓𑀸𑀦𑀺 𑀧𑀦 𑀭𑀽𑀴𑁆𑀳𑀻𑀯𑀲𑁂𑀦 𑀅𑀢𑁆𑀢𑀦𑁄𑀧𑀤𑀸𑀦𑀺 𑀦𑀸𑀫𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀇𑀤𑀁 𑀦 𑀬𑀼𑀚𑁆𑀚𑀢𑀺 𑀧𑀭𑀙𑀓𑁆𑀓𑁂𑀲𑀼 𑀢𑀩𑁆𑀩𑀳𑀼𑀮𑀫𑀢𑁆𑀢𑀲𑁆𑀲𑀸𑀧𑀺 𑀅𑀲𑀺𑀤𑁆𑀥𑀢𑁆𑀢𑀸. 𑀧𑀸𑀴𑀺𑀪𑀸𑀲𑀁 𑀧𑀦 𑀧𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀙𑀓𑁆𑀓𑀸𑀦𑀁 𑀅𑀢𑁆𑀢𑀳𑀺𑀢, 𑀧𑀭𑀳𑀺𑀢𑁂𑀲𑀼 𑀯𑀸 𑀢𑀻𑀲𑀼 𑀓𑀸𑀭𑀓𑁂𑀲𑀼 𑀯𑀸 𑀧𑀯𑀢𑁆𑀢𑀺𑀦𑀸𑀦𑀸𑀢𑁆𑀢𑀁 𑀦 𑀤𑀺𑀲𑁆𑀲𑀢𑀺𑀬𑁂𑀯, 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀕𑀦𑁆𑀣𑁂 𑀢𑀁 𑀦𑀸𑀫𑀤𑁆𑀯𑀬𑀁 𑀦 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀘𑁆𑀘𑀬𑀸 𑀧𑀦 𑀘𑀢𑀼𑀩𑁆𑀩𑀺𑀥𑀸 𑀯𑀺𑀓𑀭𑀡, 𑀓𑀺𑀘𑁆𑀘, 𑀓𑀸𑀭𑀺𑀢, 𑀥𑀸𑀢𑀼𑀧𑀘𑁆𑀘𑀬𑀯𑀲𑁂𑀦.

𑀢𑀢𑁆𑀣 𑀬𑁂 𑀥𑀸𑀢𑀼𑀲𑀺𑀤𑁆𑀥𑀸𑀦𑀺 𑀢𑁆𑀬𑀸𑀤𑀺𑀧𑀤𑀸𑀦𑀺 𑀢𑀩𑁆𑀩𑀸𑀤𑀺𑀧𑀤𑀸𑀦𑀺 𑀘 𑀕𑀡𑀯𑀺𑀪𑀸𑀕𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀭𑀽𑀧𑀸𑀦𑀺 𑀓𑀭𑁄𑀦𑁆𑀢𑀺, 𑀢𑁂 𑀯𑀺𑀓𑀭𑀡𑀧𑀘𑁆𑀘𑀬𑀸 𑀦𑀸𑀫, 𑀮, 𑀬, 𑀡𑁄𑀇𑀘𑁆𑀘𑀸𑀤𑀬𑁄.

𑀪𑀸𑀯, 𑀓𑀫𑁆𑀫𑀯𑀺𑀲𑀬𑁄 𑀓𑁆𑀬𑁄 𑀓𑀺𑀘𑁆𑀘𑀧𑀘𑁆𑀘𑀬𑁄 𑀦𑀸𑀫.

𑀧𑀭𑁂𑀲𑀁 𑀆𑀡𑀸𑀧𑀦𑀲𑀗𑁆𑀔𑀸𑀢𑁂 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂 𑀧𑀯𑀢𑁆𑀢𑀸 𑀡𑀺, 𑀡𑀸𑀧𑀺𑀧𑀘𑁆𑀘𑀬𑀸 𑀓𑀸𑀭𑀺𑀢𑀧𑀘𑁆𑀘𑀬𑀸 𑀦𑀸𑀫.

𑀯𑀺𑀲𑀼𑀁 𑀢𑀁𑀢𑀁𑀓𑁆𑀭𑀺𑀬𑀯𑀸𑀘𑀻𑀪𑀸𑀯𑁂𑀦 𑀥𑀸𑀢𑀼𑀭𑀽𑀧𑀸 𑀔, 𑀙, 𑀲𑀇𑀘𑁆𑀘𑀸𑀤𑀺𑀓𑀸 𑀧𑀘𑁆𑀘𑀬𑀸 𑀥𑀸𑀢𑀼𑀧𑀘𑁆𑀘𑀬𑀸 𑀦𑀸𑀫.

‘‘𑀓𑀸𑀮, 𑀓𑀸𑀭𑀓, 𑀧𑀼𑀭𑀺𑀲, 𑀲𑀗𑁆𑀔𑁆𑀬𑀸𑀪𑁂𑀤𑀤𑀻𑀧𑀓’’𑀦𑁆𑀢𑀺 𑀏𑀢𑁆𑀣 𑀅𑀢𑀻𑀢, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸’𑀦𑀸𑀕𑀢, 𑀓𑀸𑀮𑀯𑀺𑀫𑀼𑀢𑁆𑀢𑀯𑀲𑁂𑀦 𑀓𑀸𑀮𑀪𑁂𑀤𑁄 𑀘𑀢𑀼𑀩𑁆𑀩𑀺𑀥𑁄.

𑀢𑀢𑁆𑀣 𑀳𑀺𑀬𑁆𑀬𑀢𑁆𑀢𑀦𑀻, 𑀅𑀚𑁆𑀚𑀢𑁆𑀢𑀦𑀻 [𑀅𑀚𑁆𑀚𑀢𑀦𑀻 (𑀩𑀳𑀽𑀲𑀼)], 𑀧𑀭𑁄𑀓𑁆𑀔𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄 𑀅𑀢𑀻𑀢𑁂 𑀓𑀸𑀮𑁂 𑀯𑀢𑁆𑀢𑀦𑁆𑀢𑀺.

𑀯𑀢𑁆𑀢𑀫𑀸𑀦𑀸, 𑀧𑀜𑁆𑀘𑀫𑀻𑀢𑀺 𑀤𑁆𑀯𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂.

𑀏𑀓𑀸 𑀪𑀯𑀺𑀲𑁆𑀲𑀦𑁆𑀢𑀻 𑀅𑀦𑀸𑀕𑀢𑁂.

𑀲𑀢𑁆𑀢𑀫𑀻, 𑀓𑀸𑀮𑀸𑀢𑀺𑀧𑀢𑁆𑀢𑀻𑀢𑀺 𑀤𑁆𑀯𑁂 𑀓𑀸𑀮𑀯𑀺𑀫𑀼𑀢𑁆𑀢𑁂 𑀯𑀢𑁆𑀢𑀦𑁆𑀢𑀺, 𑀅𑀬𑀁 𑀓𑀺𑀭 𑀧𑁄𑀭𑀸𑀡𑀺𑀓𑁄 𑀯𑀺𑀪𑀢𑁆𑀢𑀻𑀦𑀁 𑀓𑀫𑁄, 𑀲𑁄 𑀘 𑀧𑀸𑀴𑀺𑀬𑀸 𑀲𑀫𑁂𑀢𑀺𑀬𑁂𑀯.

‘‘𑀲𑀩𑁆𑀩𑁂 𑀲𑀤𑁆𑀥𑀫𑁆𑀫𑀕𑀭𑀼𑀦𑁄, 𑀯𑀺𑀳𑀁𑀲𑀼 𑀯𑀺𑀳𑀭𑀦𑁆𑀢𑀺 𑀘.

𑀅𑀣𑁄𑀧𑀺 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀏𑀲𑀸 𑀩𑀼𑀤𑁆𑀥𑀸𑀦 𑀥𑀫𑁆𑀫𑀢𑀸’’𑀢𑀺 [𑀅. 𑀦𑀺. 𑁪.𑁨𑁧] 𑀘 𑁋

‘‘𑀅𑀩𑁆𑀪𑀢𑀻𑀢𑀸 𑀘 𑀬𑁂 𑀩𑀼𑀤𑁆𑀥𑀸, 𑀯𑀢𑁆𑀢𑀫𑀸𑀦𑀸 𑀅𑀦𑀸𑀕𑀢𑀸’’𑀢𑀺 𑀘 [𑀅𑀧. 𑀣𑁂𑀭 𑁧.𑁧.𑁫𑁮𑁮] 𑀧𑀸𑀴𑀻. 𑀇𑀫𑀲𑁆𑀫𑀺𑀁 𑀓𑀫𑁂 𑀧𑀜𑁆𑀘𑀫𑀻, 𑀲𑀢𑁆𑀢𑀫𑀻𑀢𑀺 𑀦𑀸𑀫𑀤𑁆𑀯𑀬𑀫𑁆𑀧𑀺 𑀅𑀦𑁆𑀯𑀢𑁆𑀣𑀯𑀲𑁂𑀦 𑀲𑀺𑀤𑁆𑀥𑀁 𑀪𑀯𑀢𑀺. 𑀧𑀘𑁆𑀙𑀸 𑀧𑀦 𑀕𑀭𑀼𑀦𑁄 𑀯𑀢𑁆𑀢𑀺𑀘𑁆𑀙𑀸𑀯𑀲𑁂𑀦 𑀯𑀺𑀪𑀢𑁆𑀢𑀻𑀦𑀁 𑀦𑀸𑀦𑀸𑀓𑀫𑀁 𑀓𑀭𑁄𑀦𑁆𑀢𑀺.

𑀓𑀢𑁆𑀢𑀼, 𑀓𑀫𑁆𑀫, 𑀪𑀸𑀯𑀸 𑀧𑀦 𑀓𑀸𑀭𑀓𑀪𑁂𑀤𑁄 𑀦𑀸𑀫. 𑀢𑀢𑁆𑀣 𑀪𑀸𑀯𑁄 𑀤𑀼𑀯𑀺𑀥𑁄 𑀲𑀸𑀥𑁆𑀬, 𑀲𑀸𑀥𑀦𑀯𑀲𑁂𑀦 𑀯𑀺𑀲𑁂𑀲𑀦, 𑀯𑀺𑀲𑁂𑀲𑁆𑀬𑀯𑀲𑁂𑀦 𑀘. 𑀢𑀢𑁆𑀣 𑀥𑀸𑀢𑁆𑀯𑀢𑁆𑀣𑀓𑁆𑀭𑀺𑀬𑀸 𑀲𑀸𑀥𑁆𑀬𑀪𑀸𑀯𑁄 𑀦𑀸𑀫. 𑀧𑀘𑁆𑀘𑀬𑀢𑁆𑀣𑀓𑁆𑀭𑀺𑀬𑀸 𑀲𑀸𑀥𑀦𑀪𑀸𑀯𑁄 𑀦𑀸𑀫.

𑀢𑁂𑀲𑀼 𑀲𑀸𑀥𑁆𑀬𑀪𑀸𑀯𑁄 𑀦𑀸𑀦𑀸𑀥𑀸𑀢𑀽𑀦𑀁 𑀯𑀲𑁂𑀦 𑀦𑀸𑀦𑀸𑀯𑀺𑀥𑁄 𑀳𑁄𑀢𑀺. 𑀲𑀸𑀥𑀦𑀪𑀸𑀯𑁄 𑀦𑀸𑀦𑀸𑀥𑀸𑀢𑁆𑀯𑀢𑁆𑀣𑀸𑀦𑀁 𑀧𑀯𑀢𑁆𑀢𑀸𑀓𑀸𑀭𑀲𑀗𑁆𑀔𑀸𑀢𑁂𑀦 𑀏𑀓𑀝𑁆𑀞𑁂𑀦 𑀏𑀓𑁄𑀯 𑀳𑁄𑀢𑀺. 𑀲𑁄 𑀧𑀦 𑀬𑀣𑀸 𑀚𑀸𑀢𑀺 𑀦𑀸𑀫 𑀅𑀦𑀼𑀧𑁆𑀧𑀦𑁆𑀦𑀧𑀓𑁆𑀔𑁂 𑀞𑀺𑀢𑁂 𑀲𑀗𑁆𑀔𑀢𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀦𑁆𑀢𑀻 𑀯𑀺𑀬 𑀔𑀸𑀬𑀢𑀺, 𑀢𑀣𑀸 𑀯𑁄𑀳𑀸𑀭𑀯𑀺𑀲𑀬𑀫𑀢𑁆𑀢𑁂 𑀞𑀺𑀢𑁂 𑀲𑀩𑁆𑀩𑀥𑀸𑀢𑁆𑀯𑀢𑁆𑀣𑁂 𑀧𑀸𑀢𑀼𑀪𑁄𑀦𑁆𑀢𑁂 𑀓𑀭𑁄𑀦𑁆𑀢𑁄 𑀯𑀺𑀬 𑀔𑀸𑀬𑀢𑀺, 𑀢𑀲𑁆𑀫𑀸 𑀲𑁄 𑀲𑀸𑀥𑀦𑀦𑁆𑀢𑀺 𑀘 𑀓𑀸𑀭𑀓𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀣𑀸 𑀘 𑀚𑀸𑀢𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀲𑀗𑁆𑀔𑀢𑀥𑀫𑁆𑀫𑀸 ‘‘𑀘𑀺𑀦𑁆𑀢𑀦𑀁 𑀚𑀸𑀢𑀁, 𑀨𑀼𑀲𑀦𑀁 𑀚𑀸𑀢’’ 𑀫𑀺𑀘𑁆𑀘𑀸𑀤𑀺𑀦𑀸 𑀏𑀓𑀦𑁆𑀢𑀫𑁂𑀯 𑀚𑀸𑀢𑀺𑀁 𑀯𑀺𑀲𑁂𑀲𑁂𑀦𑁆𑀢𑀺, 𑀢𑀣𑀸 𑀧𑀘𑁆𑀘𑀬𑀢𑁆𑀣𑀯𑀲𑁂𑀦 𑀧𑀸𑀢𑀼𑀪𑁄𑀦𑁆𑀢𑀸 𑀦𑀸𑀦𑀸𑀥𑀸𑀢𑁆𑀯𑀢𑁆𑀣𑀸𑀧𑀺 ‘‘𑀪𑀼𑀬𑁆𑀬𑀢𑁂, 𑀕𑀫𑁆𑀬𑀢𑁂, 𑀧𑀘𑁆𑀘𑀢𑁂, 𑀪𑀯𑀦𑀁, 𑀕𑀫𑀦𑀁, 𑀧𑀘𑀦’’ 𑀫𑀺𑀘𑁆𑀘𑀸𑀤𑀺𑀦𑀸 𑀏𑀓𑀦𑁆𑀢𑀫𑁂𑀯 𑀧𑀘𑁆𑀘𑀬𑀢𑁆𑀣𑀁 𑀯𑀺𑀲𑁂𑀲𑁂𑀦𑁆𑀢𑀺. 𑀯𑀢𑁆𑀢𑀺𑀘𑁆𑀙𑀸𑀯𑀲𑁂𑀦 𑀧𑀦 𑀪𑀸𑀯𑀲𑀸𑀥𑀦𑀧𑀤𑁂𑀲𑀼 𑀥𑀸𑀢𑁆𑀯𑀢𑁆𑀣, 𑀧𑀘𑁆𑀘𑀬𑀢𑁆𑀣𑀸𑀦𑀁 𑀅𑀪𑁂𑀤𑁄𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺𑀬𑁂𑀯. 𑀇𑀥 𑀧𑀦 𑀤𑁆𑀯𑀻𑀲𑀼 𑀪𑀸𑀯𑁂𑀲𑀼 𑀲𑀸𑀥𑀦𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄𑀢𑀺.

𑀧𑀞𑀫, 𑀫𑀚𑁆𑀛𑀺𑀫𑀼’𑀢𑁆𑀢𑀫𑀧𑀼𑀭𑀺𑀲𑀸 𑀧𑀼𑀭𑀺𑀲𑀪𑁂𑀤𑁄. ‘𑀧𑀼𑀭𑀺𑀲𑁄’𑀢𑀺 𑀘 ‘‘𑀬𑀁𑀓𑀺𑀜𑁆𑀘𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸’’𑀢𑀺 [𑀫. 𑀦𑀺. 𑁩.𑁧] 𑀏𑀢𑁆𑀣 𑀅𑀢𑁆𑀢𑀸 𑀏𑀯 𑀯𑀼𑀘𑁆𑀘𑀢𑀺, 𑀲𑁄 𑀘 𑀅𑀢𑁆𑀢𑀸 ‘‘𑀲𑁄 𑀓𑀭𑁄𑀢𑀺, 𑀲𑁄 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 [𑀅. 𑀦𑀺. 𑁬.𑁪𑁩; 𑀯𑀺𑀲𑀼𑀤𑁆𑀥𑀺. 𑁨.𑁫𑁮𑁦] 𑀏𑀢𑁆𑀣 𑀓𑀸𑀭𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 ‘𑀧𑀼𑀭𑀺𑀲𑁄’𑀢𑀺 𑀓𑀸𑀭𑀓𑁄 𑀏𑀯.

𑀲𑁄 𑀘 𑀢𑀺𑀯𑀺𑀥𑁄 𑀦𑀸𑀫𑀢𑁆𑀣𑁄, 𑀢𑀼𑀫𑁆𑀳𑀢𑁆𑀣𑁄, 𑀅𑀫𑁆𑀳𑀢𑁆𑀣𑁄 𑀘𑀸𑀢𑀺. 𑀢𑀢𑁆𑀣 𑀅𑀢𑁆𑀢𑀦𑁄 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀪𑀽𑀢𑀢𑁆𑀢𑀸 𑀅𑀫𑁆𑀳𑀢𑁆𑀣𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀦𑀸𑀫, 𑀲𑁂𑀲𑀸 𑀧𑀦 𑀓𑀫𑁂𑀦 𑀧𑀞𑀫𑀧𑀼𑀭𑀺𑀲𑁄, 𑀫𑀚𑁆𑀛𑀺𑀫𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀪𑀢𑁆𑀢𑀺𑀬𑁄 𑀧𑀦 𑀢𑀤𑁆𑀤𑀻𑀧𑀓𑀢𑁆𑀢𑀸 𑀧𑀞𑀫𑀧𑀼𑀭𑀺𑀲𑀸𑀤𑀺𑀦𑀸𑀫𑀁 𑀮𑀪𑀦𑁆𑀢𑀺. 𑀇𑀤𑀜𑁆𑀘 𑀦𑀸𑀫𑀁 𑀓𑀸𑀭𑀓𑀪𑁂𑀤𑁂 𑀅𑀦𑁆𑀢𑁄𑀕𑀥𑀫𑁂𑀯𑀸𑀢𑀺 𑀓𑀢𑁆𑀯𑀸 𑀇𑀫𑀲𑁆𑀫𑀺𑀁 𑀕𑀦𑁆𑀣𑁂 𑀦 𑀕𑀳𑀺𑀢𑀦𑁆𑀢𑀺.

𑀲𑀗𑁆𑀔𑁆𑀬𑀸𑀪𑁂𑀤𑁄 𑀤𑀼𑀯𑀺𑀥𑁄 𑀏𑀓𑀢𑁆𑀢, 𑀩𑀳𑀼𑀢𑁆𑀢𑀯𑀲𑁂𑀦.

‘𑀮𑀺𑀗𑁆𑀕𑀪𑁂𑀤𑀭𑀳𑀺𑀢’𑀦𑁆𑀢𑀺 ‘‘𑀧𑀼𑀭𑀺𑀲𑁄 𑀕𑀘𑁆𑀙𑀢𑀺, 𑀇𑀢𑁆𑀣𑀻 𑀕𑀘𑁆𑀙𑀢𑀺, 𑀓𑀼𑀮𑀁 𑀕𑀘𑁆𑀙𑀢𑀺’’ 𑀇𑀘𑁆𑀘𑀸𑀤𑀻𑀲𑀼 ‘𑀧𑀼𑀭𑀺𑀲𑁄’𑀇𑀘𑁆𑀘𑀸𑀤𑀻𑀦𑀁 𑀅𑀪𑀺𑀥𑁂𑀬𑁆𑀬𑀧𑀤𑀸𑀦𑀁 𑀮𑀺𑀗𑁆𑀕𑀸𑀦𑀼𑀕𑀢𑁄 𑀭𑀽𑀧𑀪𑁂𑀤𑁄 𑀆𑀔𑁆𑀬𑀸𑀢𑀧𑀤𑁂 𑀦𑀢𑁆𑀣𑀺.

‘𑀓𑁆𑀭𑀺𑀬𑀸𑀧𑀥𑀸𑀦𑀯𑀸𑀘𑀓’𑀦𑁆𑀢𑀺 𑀏𑀢𑁆𑀣 𑀓𑁆𑀭𑀺𑀬𑀁 𑀏𑀯 𑀧𑀥𑀸𑀦𑀢𑁄 𑀅𑀪𑀺𑀥𑀸𑀢𑀺, 𑀦 𑀦𑀸𑀫𑀧𑀤𑀁 𑀯𑀺𑀬 𑀤𑀩𑁆𑀩𑀁 𑀧𑀥𑀸𑀦𑀢𑁄 𑀅𑀪𑀺𑀥𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁆𑀣 𑀓𑁆𑀭𑀺𑀬𑀸 𑀦𑀸𑀫 𑀥𑀸𑀢𑁆𑀯𑀢𑁆𑀣𑀪𑀸𑀯𑁄 𑀯𑀼𑀘𑁆𑀘𑀢𑀺, 𑀲𑀸 𑀘 𑀓𑀸𑀮𑀯𑀲𑁂𑀦 𑀅𑀢𑀻𑀢𑀓𑁆𑀭𑀺𑀬𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀭𑀺𑀬𑀸, 𑀅𑀦𑀸𑀕𑀢𑀓𑁆𑀭𑀺𑀬𑀸, 𑀓𑀸𑀮𑀯𑀺𑀫𑀼𑀢𑁆𑀢𑀓𑁆𑀭𑀺𑀬𑀸𑀢𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺.

𑀆𑀡𑀢𑁆𑀢𑀺𑀓𑁆𑀭𑀺𑀬𑀸, 𑀆𑀲𑀺𑀝𑁆𑀞𑀓𑁆𑀭𑀺𑀬𑀸, 𑀅𑀦𑀼𑀫𑀢𑀺𑀓𑁆𑀭𑀺𑀬𑀸, 𑀧𑀭𑀺𑀓𑀧𑁆𑀧𑀓𑁆𑀭𑀺𑀬𑀸, 𑀅𑀭𑀳, 𑀲𑀓𑁆𑀓, 𑀯𑀺𑀥𑀺, 𑀦𑀺𑀫𑀦𑁆𑀢𑀦𑀸’𑀫𑀦𑁆𑀢𑀦𑀸𑀤𑀺𑀓𑁆𑀭𑀺𑀬𑀸𑀢𑀺 𑀩𑀳𑀼𑀯𑀺𑀥𑁄 𑀓𑁆𑀭𑀺𑀬𑀸𑀪𑁂𑀤𑁄𑀢𑀺.

𑀪𑀽-𑀲𑀢𑁆𑀢𑀸𑀬𑀁, 𑀲𑀦𑁆𑀢𑀲𑁆𑀲 𑀪𑀸𑀯𑁄 𑀲𑀢𑁆𑀢𑀸, 𑀢𑀲𑁆𑀲𑀁 𑀲𑀢𑁆𑀢𑀸𑀬𑀁, 𑀪𑀽𑀥𑀸𑀢𑀼 𑀲𑀢𑁆𑀢𑀸𑀬𑀫𑀢𑁆𑀣𑁂 𑀯𑀢𑁆𑀢𑀢𑁂, 𑀲𑀩𑁆𑀩𑀧𑀤𑀢𑁆𑀣𑀸𑀦𑀁 𑀲𑀤𑁆𑀤, 𑀩𑀼𑀤𑁆𑀥𑀺𑀯𑀺𑀲𑀬𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀪𑀸𑀯𑁂 𑀯𑀢𑁆𑀢𑀢𑁂𑀢𑁆𑀬𑀢𑁆𑀣𑁄.

𑁫𑁬𑁧. 𑀓𑁆𑀭𑀺𑀬𑀢𑁆𑀣𑀸 [𑀓. 𑁪𑁩𑁨, 𑁪𑁫𑁫; 𑀭𑀽. 𑁩𑁬𑁨, 𑁫𑁩𑁦; 𑀦𑀻. 𑁯𑁦𑁫, 𑁯𑁩𑁬; 𑀧𑀸. 𑁩.𑁧.𑁯𑁧].

𑀅𑀥𑀺𑀓𑀸𑀭𑀲𑀼𑀢𑁆𑀢𑀫𑀺𑀤𑀁, 𑀓𑁆𑀭𑀺𑀬𑀢𑁆𑀣𑀸 𑀧𑀭𑀁 𑀯𑀺𑀪𑀢𑁆𑀢𑀺, 𑀧𑀘𑁆𑀘𑀬𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑁆𑀭𑀺𑀬𑀸 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀓𑁆𑀭𑀺𑀬𑀢𑁆𑀣𑁄. 𑀧𑀓𑀢𑀺𑀥𑀸𑀢𑀼, 𑀯𑀺𑀓𑀢𑀺𑀥𑀸𑀢𑀼, 𑀦𑀸𑀫𑀥𑀸𑀢𑀼𑀯𑀲𑁂𑀦 𑀢𑀺𑀯𑀺𑀥𑁄 𑀥𑀸𑀢𑀼, 𑀓𑀸𑀭𑀺𑀢𑀧𑀘𑁆𑀘𑀬𑀦𑁆𑀢𑀭𑀽𑀧𑀫𑁆𑀧𑀺 𑀯𑀺𑀓𑀢𑀺𑀥𑀸𑀢𑀼𑀫𑁆𑀳𑀺 𑀲𑀗𑁆𑀕𑀬𑁆𑀳𑀢𑀺.

𑁫𑁬𑁨. 𑀯𑀢𑁆𑀢𑀫𑀸𑀦𑁂𑀢𑀺 𑀅𑀦𑁆𑀢𑀺 𑀲𑀺 𑀣 𑀫𑀺 𑀫 𑀢𑁂 𑀅𑀦𑁆𑀢𑁂 𑀲𑁂 𑀯𑁆𑀳𑁂 𑀏 𑀫𑁆𑀳𑁂 [𑀓. 𑁪𑁧𑁪; 𑀭𑀽. 𑁪𑁨𑁮; 𑀦𑀻. 𑁮𑁭𑁨; 𑀘𑀁. 𑁧.𑁨.𑁮𑁨; 𑀧𑀸. 𑁩.𑁨.𑁧𑁨𑁩].

𑀆𑀭𑀪𑀺𑀢𑁆𑀯𑀸 𑀦𑀺𑀝𑁆𑀞𑀁 𑀅𑀦𑀼𑀧𑀕𑀢𑁄 𑀪𑀸𑀯𑁄 𑀯𑀢𑁆𑀢𑀫𑀸𑀦𑁄 𑀦𑀸𑀫, 𑀢𑀁𑀲𑀫𑁆𑀩𑀦𑁆𑀥𑀻𑀓𑀸𑀮𑁄𑀧𑀺 𑀢𑀤𑀽𑀧𑀘𑀸𑀭𑁂𑀦 𑀯𑀢𑁆𑀢𑀫𑀸𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀢𑁆𑀢𑀫𑀸𑀦𑁂 𑀓𑀸𑀮𑁂 𑀓𑁆𑀭𑀺𑀬𑀢𑁆𑀣𑀸 𑀧𑀭𑀁 𑀢𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀬𑁄 𑀪𑀯𑀦𑁆𑀢𑀺. 𑀅𑀬𑀜𑁆𑀘 𑀯𑀺𑀪𑀢𑁆𑀢𑀺 𑀢𑁆𑀬𑀸𑀤𑀻𑀢𑀺 𑀘 𑀯𑀢𑁆𑀢𑀫𑀸𑀦𑀓𑀸𑀮𑀯𑀺𑀲𑀬𑀢𑁆𑀢𑀸 𑀯𑀢𑁆𑀢𑀫𑀸𑀦𑀸𑀢𑀺 𑀘 𑀲𑀺𑀚𑁆𑀛𑀢𑀺.

𑁫𑁬𑁩. 𑀧𑀼𑀩𑁆𑀩𑀸𑀧𑀭𑀙𑀓𑁆𑀓𑀸𑀦𑀫𑁂𑀓𑀸𑀦𑁂𑀓𑁂𑀲𑀼 𑀢𑀼𑀫𑁆𑀳𑀫𑁆𑀳𑀲𑁂𑀲𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀞𑀫𑀸 [𑀓. 𑁪𑁦𑁮; 𑀭𑀽. 𑁪𑁩𑁧; 𑀦𑀻. 𑁮𑁬𑁭].

𑀢𑀼𑀫𑁆𑀳𑀦𑀸𑀫𑀁, 𑀅𑀫𑁆𑀳𑀦𑀸𑀫𑀁, 𑀢𑀤𑀼𑀪𑀬𑀢𑁄 𑀲𑁂𑀲𑀦𑀸𑀫𑀦𑁆𑀢𑀺 𑀢𑀻𑀲𑀼 𑀦𑀸𑀫𑁂𑀲𑀼 𑀧𑀬𑀼𑀚𑁆𑀚𑀫𑀸𑀦𑁂𑀲𑀼 𑀯𑀸 𑀕𑀫𑁆𑀬𑀫𑀸𑀦𑁂𑀲𑀼 𑀯𑀸 𑀏𑀓𑀲𑁆𑀫𑀺𑀁 𑀯𑀸 𑀅𑀦𑁂𑀓𑁂𑀲𑀼 𑀯𑀸 𑀅𑀢𑁆𑀣𑁂𑀲𑀼 𑀧𑀼𑀩𑁆𑀩𑀙𑀓𑁆𑀓, 𑀧𑀭𑀙𑀓𑁆𑀓𑀸𑀦𑀁 𑀤𑁆𑀯𑁂 𑀤𑁆𑀯𑁂 𑀫𑀚𑁆𑀛𑀺𑀫, 𑀉𑀢𑁆𑀢𑀫, 𑀧𑀞𑀫𑀸 𑀯𑀺𑀪𑀢𑁆𑀢𑀺𑀬𑁄 𑀪𑀯𑀦𑁆𑀢𑀺. ‘‘𑀉𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀭𑀁 𑀅𑀦𑁆𑀢𑀺𑀫’’𑀦𑁆𑀢𑀺 𑀘𑀽𑀴𑀫𑁄𑀕𑁆𑀕𑀮𑁆𑀮𑀸𑀦𑁂 𑀯𑀼𑀢𑁆𑀢𑀁.

𑀏𑀢𑁆𑀣 𑀘 𑀯𑀺𑀪𑀢𑁆𑀢𑀺𑀯𑀺𑀥𑀸𑀦𑀫𑀼𑀔𑁂𑀦 𑀢𑀁𑀢𑀁𑀲𑀜𑁆𑀜𑀸𑀯𑀺𑀥𑀸𑀦𑀫𑁆𑀧𑀺 𑀲𑀺𑀤𑁆𑀥𑀁 𑀳𑁄𑀢𑀺.

𑀓𑀣𑀁?𑀢𑀺, 𑀅𑀦𑁆𑀢𑀺, 𑀲𑀺, 𑀣, 𑀫𑀺, 𑀫 𑀇𑀢𑀺 𑀧𑀼𑀩𑁆𑀩𑀙𑀓𑁆𑀓𑀁 𑀦𑀸𑀫.

𑀢𑁂, 𑀅𑀦𑁆𑀢𑁂, 𑀲𑁂, 𑀯𑁆𑀳𑁂, 𑀏, 𑀫𑁆𑀳𑁂 𑀇𑀢𑀺 𑀧𑀭𑀙𑀓𑁆𑀓𑀁 𑀦𑀸𑀫.

𑀧𑀼𑀩𑁆𑀩𑀙𑀓𑁆𑀓𑁂 𑀘-𑀢𑀺, 𑀅𑀦𑁆𑀢𑀺𑀤𑁆𑀯𑀬𑀁 𑀧𑀞𑀫𑀤𑀼𑀓𑀁 𑀦𑀸𑀫, 𑀲𑀺, 𑀣𑀤𑁆𑀯𑀬𑀁 𑀫𑀚𑁆𑀛𑀺𑀫𑀤𑀼𑀓𑀁 𑀦𑀸𑀫, 𑀫𑀺, 𑀫𑀤𑁆𑀯𑀬𑀁 𑀉𑀢𑁆𑀢𑀫𑀤𑀼𑀓𑀁 𑀦𑀸𑀫. 𑀏𑀯𑀁 𑀧𑀭𑀙𑀓𑁆𑀓𑁂.

𑀢𑀢𑁆𑀣 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀽𑀢𑁂 𑀲𑁂𑀲𑀦𑀸𑀫𑁂 𑀧𑀬𑀼𑀚𑁆𑀚𑀫𑀸𑀦𑁂 𑀯𑀸 𑀕𑀫𑁆𑀬𑀫𑀸𑀦𑁂 𑀯𑀸 𑀧𑀞𑀫𑀤𑀼𑀓𑀁 𑀪𑀯𑀢𑀺. 𑀢𑀣𑀸 𑀢𑀼𑀫𑁆𑀳𑀦𑀸𑀫𑁂 𑀫𑀚𑁆𑀛𑀺𑀫𑀤𑀼𑀓𑀁, 𑀅𑀫𑁆𑀳𑀦𑀸𑀫𑁂 𑀉𑀢𑁆𑀢𑀫𑀤𑀼𑀓𑀁. 𑀤𑀼𑀓𑁂𑀲𑀼 𑀘 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀁, 𑀩𑀳𑀼𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁.

𑀏𑀢𑁆𑀣 𑀘 𑀦𑀸𑀫𑀸𑀦𑀁 𑀅𑀢𑁆𑀣𑀦𑀺𑀲𑁆𑀲𑀺𑀢𑀸 𑀓𑀢𑁆𑀯𑀢𑁆𑀣, 𑀓𑀫𑁆𑀫𑀢𑁆𑀣𑀸 𑀇𑀥 𑀦𑀸𑀫𑀢𑁆𑀣𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀢𑁆𑀢𑀼, 𑀓𑀫𑁆𑀫𑀲𑀗𑁆𑀔𑀸𑀢𑁂 𑀬𑀲𑁆𑀫𑀺𑀁 𑀦𑀸𑀫𑀢𑁆𑀣𑁂 𑀢𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀬𑁄 𑀪𑀯𑀦𑁆𑀢𑀺, 𑀲𑁄 𑀦𑀸𑀫𑀢𑁆𑀣𑁄 𑀢𑁆𑀬𑀸𑀤𑀺𑀯𑀸𑀘𑀓𑀸𑀦𑀁 𑀏𑀯 𑀯𑀸𑀘𑁆𑀘𑀪𑀽𑀢𑁄 𑀯𑀼𑀢𑁆𑀢𑀢𑁆𑀣𑁄 𑀦𑀸𑀫 𑀳𑁄𑀢𑀺, 𑀦 𑀲𑁆𑀬𑀸𑀤𑀺𑀯𑀺𑀪𑀢𑁆𑀢𑀻𑀦𑀁.

𑀯𑀼𑀢𑁆𑀢𑀓𑀢𑁆𑀢𑀼, 𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀲𑁆𑀲 𑀘 𑀮𑀺𑀗𑁆𑀕𑀢𑁆𑀣𑀲𑁆𑀲 𑀯𑀸𑀘𑀓𑀁 𑀦𑀸𑀫𑀧𑀤𑀁 𑀅𑀪𑀺𑀥𑁂𑀬𑁆𑀬𑀧𑀤𑀁 𑀦𑀸𑀫, 𑀏𑀢𑀤𑁂𑀯 𑀢𑀼𑀮𑁆𑀬𑀸𑀥𑀺𑀓𑀭𑀡𑀧𑀤𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺.

𑀅𑀫𑀸𑀤𑀬𑁄 𑀘 𑀅𑀢𑁆𑀣𑀯𑀸𑀘𑀓𑀯𑀺𑀪𑀢𑁆𑀢𑀺𑀬𑁄 𑀏𑀢𑀲𑁆𑀫𑀺𑀁 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺, 𑀮𑀺𑀗𑁆𑀕𑀢𑁆𑀣𑀫𑀢𑁆𑀢𑀚𑁄𑀢𑀺𑀓𑀸 𑀧𑀞𑀫𑀸𑀯𑀺𑀪𑀢𑁆𑀢𑀺 𑀏𑀯 𑀑𑀓𑀸𑀲𑀁 𑀮𑀪𑀢𑀺. 𑀏𑀯𑀭𑀽𑀧𑀸𑀦𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀽𑀢𑀸𑀦𑀺 𑀅𑀪𑀺𑀥𑁂𑀬𑁆𑀬𑀧𑀤𑀸𑀦𑀺 𑀲𑀦𑁆𑀥𑀸𑀬 𑀲𑀼𑀢𑁆𑀢𑁂 ‘𑀢𑀼𑀫𑁆𑀳𑀫𑁆𑀳𑀲𑁂𑀲𑁂𑀲𑀽’𑀢𑀺 𑀯𑀼𑀢𑁆𑀢𑀁.

𑀇𑀤𑀜𑁆𑀘 𑀲𑀼𑀢𑁆𑀢𑀁 𑀲𑀼𑀤𑁆𑀥𑁂𑀳𑀺 𑀢𑀼𑀫𑁆𑀳’𑀫𑁆𑀳, 𑀲𑁂𑀲𑀦𑀸𑀫𑁂𑀳𑀺 𑀬𑀼𑀢𑁆𑀢𑀯𑀸𑀓𑁆𑀬𑁂 𑀘 𑀫𑀺𑀲𑁆𑀲𑀓𑁂𑀳𑀺 𑀬𑀼𑀢𑁆𑀢𑀯𑀸𑀓𑁆𑀬𑁂 𑀘𑀸𑀢𑀺 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀯𑀸𑀓𑁆𑀬𑁂𑀲𑀼 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀲𑀼𑀤𑁆𑀥𑁂𑀳𑀺 𑀬𑀼𑀢𑁆𑀢𑁂 𑀧𑀘𑁆𑀘𑁂𑀓𑀁 𑀤𑀼𑀓𑀸𑀦𑀺 𑀯𑀢𑁆𑀢𑀦𑁆𑀢𑀺. 𑀬𑀣𑀸? 𑀲𑁄 𑀕𑀘𑁆𑀙𑀢𑀺, 𑀢𑁂 𑀕𑀘𑁆𑀙𑀦𑁆𑀢𑀺, 𑀢𑁆𑀯𑀁 𑀕𑀘𑁆𑀙𑀲𑀺, 𑀢𑀼𑀫𑁆𑀳𑁂 𑀕𑀘𑁆𑀙𑀣, 𑀅𑀳𑀁 𑀕𑀘𑁆𑀙𑀸𑀫𑀺, 𑀫𑀬𑀁 𑀕𑀘𑁆𑀙𑀸𑀫𑀸𑀢𑀺.

𑀢𑀣𑀸 𑀲𑀼𑀤𑁆𑀥𑀤𑁆𑀯𑀦𑁆𑀤𑁂𑀧𑀺. 𑀬𑀣𑀸? 𑀲𑁄 𑀘 𑀲𑁄 𑀘 𑀕𑀘𑁆𑀙𑀢𑀺, 𑀕𑀘𑁆𑀙𑀦𑁆𑀢𑀺 𑀯𑀸. 𑀢𑁂 𑀘 𑀢𑁂 𑀘 𑀕𑀘𑁆𑀙𑀦𑁆𑀢𑀺, 𑀲𑁄 𑀘 𑀢𑁂 𑀘 𑀕𑀘𑁆𑀙𑀦𑁆𑀢𑀺, 𑀢𑁆𑀯𑀜𑁆𑀘 𑀢𑁆𑀯𑀜𑁆𑀘 𑀕𑀘𑁆𑀙𑀲𑀺, 𑀕𑀘𑁆𑀙𑀣 𑀯𑀸. 𑀢𑀼𑀫𑁆𑀳𑁂 𑀘 𑀢𑀼𑀫𑁆𑀳𑁂 𑀘 𑀕𑀘𑁆𑀙𑀣, 𑀢𑁆𑀯𑀜𑁆𑀘 𑀢𑀼𑀫𑁆𑀳𑁂 𑀘 𑀕𑀘𑁆𑀙𑀣𑀸𑀢𑀺.

𑀫𑀺𑀲𑁆𑀲𑀓𑁂𑀳𑀺 𑀬𑀼𑀢𑁆𑀢𑁂 𑀤𑁆𑀯𑀦𑁆𑀤𑀯𑀸𑀓𑁆𑀬𑁂 𑀧𑀦 ‘𑀯𑀺𑀧𑁆𑀧𑀝𑀺𑀲𑁂𑀥𑁂’𑀢𑀺 𑀲𑀗𑁆𑀓𑁂𑀢𑀢𑁆𑀢𑀸 𑀧𑀭𑀤𑀼𑀓𑀸𑀦𑀺 𑀏𑀯 𑀑𑀓𑀸𑀲𑀁 𑀮𑀪𑀦𑁆𑀢𑀺, 𑀢𑁂𑀲𑀼 𑀘 𑀩𑀳𑀼𑀯𑀘𑀦𑀸𑀦𑀺 𑀏𑀯. 𑀬𑀣𑀸? 𑀲𑁄 𑀘 𑀢𑁆𑀯𑀜𑁆𑀘 𑀕𑀘𑁆𑀙𑀣, 𑀲𑁄 𑀘 𑀅𑀳𑀜𑁆𑀘 𑀕𑀘𑁆𑀙𑀸𑀫, 𑀢𑁆𑀯𑀜𑁆𑀘 𑀅𑀳𑀜𑁆𑀘 𑀕𑀘𑁆𑀙𑀸𑀫, 𑀲𑁄 𑀘 𑀢𑁆𑀯𑀜𑁆𑀘 𑀅𑀳𑀜𑁆𑀘 𑀕𑀘𑁆𑀙𑀸𑀫. 𑀏𑀓𑀯𑀘𑀦𑀘𑀢𑀼𑀓𑁆𑀓𑀁.

𑀢𑁂 𑀘 𑀢𑀼𑀫𑁆𑀳𑁂 𑀘 𑀕𑀘𑁆𑀙𑀣, 𑀢𑁂 𑀘 𑀫𑀬𑀜𑁆𑀘 𑀕𑀘𑁆𑀙𑀸𑀫, 𑀢𑀼𑀫𑁆𑀳𑁂 𑀘 𑀫𑀬𑀜𑁆𑀘 𑀕𑀘𑁆𑀙𑀸𑀫, 𑀢𑁂 𑀘 𑀢𑀼𑀫𑁆𑀳𑁂 𑀘 𑀫𑀬𑀜𑁆𑀘 𑀕𑀘𑁆𑀙𑀸𑀫. 𑀩𑀳𑀼𑀯𑀘𑀦𑀘𑀢𑀼𑀓𑁆𑀓𑀁.

𑀲𑁄 𑀘 𑀢𑀼𑀫𑁆𑀳𑁂 𑀘 𑀕𑀘𑁆𑀙𑀣, 𑀲𑁄 𑀘 𑀫𑀬𑀜𑁆𑀘 𑀕𑀘𑁆𑀙𑀸𑀫, 𑀢𑁆𑀯𑀜𑁆𑀘 𑀫𑀬𑀜𑁆𑀘 𑀕𑀘𑁆𑀙𑀸𑀫, 𑀲𑁄 𑀘 𑀢𑁆𑀯𑀜𑁆𑀘 𑀫𑀬𑀜𑁆𑀘 𑀕𑀘𑁆𑀙𑀸𑀫. 𑀏𑀓𑀯𑀘𑀦𑀫𑀽𑀮𑀘𑀢𑀼𑀓𑁆𑀓𑀁.

𑀢𑁂 𑀘 𑀢𑁆𑀯𑀜𑁆𑀘 𑀕𑀘𑁆𑀙𑀣, 𑀢𑁂 𑀘 𑀅𑀳𑀜𑁆𑀘 𑀕𑀘𑁆𑀙𑀸𑀫, 𑀢𑀼𑀫𑁆𑀳𑁂 𑀘 𑀅𑀳𑀜𑁆𑀘 𑀕𑀘𑁆𑀙𑀸𑀫, 𑀢𑁂 𑀘 𑀢𑀼𑀫𑁆𑀳𑁂 𑀘 𑀅𑀳𑀜𑁆𑀘 𑀕𑀘𑁆𑀙𑀸𑀫. 𑀩𑀳𑀼𑀯𑀘𑀦𑀫𑀽𑀮𑀘𑀢𑀼𑀓𑁆𑀓𑀁.

𑀅𑀧𑀺 𑀘 𑀢𑁆𑀯𑀜𑁆𑀘 𑀲𑁄 𑀘 𑀕𑀘𑁆𑀙𑀣, 𑀅𑀳𑀜𑁆𑀘 𑀲𑁄 𑀘 𑀕𑀘𑁆𑀙𑀸𑀫, 𑀢𑁆𑀯𑀜𑁆𑀘 𑀅𑀳𑀜𑁆𑀘 𑀲𑁄 𑀘 𑀕𑀘𑁆𑀙𑀸𑀫, 𑀢𑀼𑀫𑁆𑀳𑁂 𑀘 𑀲𑁄 𑀘 𑀕𑀘𑁆𑀙𑀣, 𑀫𑀬𑀜𑁆𑀘 𑀲𑁄 𑀘 𑀕𑀘𑁆𑀙𑀸𑀫, 𑀢𑁆𑀯𑀜𑁆𑀘 𑀢𑁂 𑀘 𑀕𑀘𑁆𑀙𑀣, 𑀅𑀳𑀜𑁆𑀘 𑀢𑁂 𑀘 𑀕𑀘𑁆𑀙𑀸𑀫𑀇𑀘𑁆𑀘𑀸𑀤𑀻𑀦𑀺𑀧𑀺 𑀘𑀢𑀼𑀓𑁆𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀢𑁆𑀭𑀺𑀫𑀸 𑀧𑀸𑀴𑀻 𑁋 𑀢𑀼𑀯𑀜𑁆𑀘 𑀧𑀼𑀢𑁆𑀢𑁄 𑀲𑀼𑀡𑀺𑀲𑀸 𑀘 𑀦𑀢𑁆𑀢𑀸, 𑀲𑀫𑁆𑀫𑁄𑀤𑀫𑀸𑀦𑀸 𑀖𑀭𑀫𑀸𑀯𑀲𑁂𑀣 [𑀚𑀸. 𑁧.𑁮.𑁭]. 𑀅𑀳𑀜𑁆𑀘 𑀧𑀼𑀢𑁆𑀢𑁄 𑀲𑀼𑀡𑀺𑀲𑀸 𑀘 𑀦𑀢𑁆𑀢𑀸, 𑀲𑀫𑁆𑀫𑁄𑀤𑀫𑀸𑀦𑀸 𑀖𑀭𑀫𑀸𑀯𑀲𑁂𑀫 [𑀚𑀸. 𑁧.𑁮.𑁭].

𑀅𑀳𑀜𑁆𑀘 𑀤𑀸𑀦𑀺 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫 [𑀫. 𑀦𑀺. 𑁨.𑁧𑁬𑁦].

𑀅𑀳𑀜𑁆𑀘 𑀇𑀫𑁂 𑀘 𑀪𑀺𑀓𑁆𑀔𑀽 𑀲𑀫𑀸𑀥𑀺𑀦𑀸 𑀦𑀺𑀲𑀻𑀤𑀺𑀫𑁆𑀳𑀸.

𑀅𑀳𑀜𑁆𑀘 𑀪𑀭𑀺𑀬𑀸 𑀘 𑀤𑀸𑀦𑀧𑀢𑀻 𑀅𑀳𑀼𑀫𑁆𑀳𑀸 [𑀚𑀸. 𑁨.𑁨𑁨.𑁧𑁫𑁯𑁩].

𑀅𑀳𑀜𑁆𑀘 𑀲𑀸𑀫𑀺𑀓𑁄 𑀘 𑀤𑀸𑀦𑀧𑀢𑀻 𑀅𑀳𑀼𑀫𑁆𑀳𑀸 [𑀚𑀸. 𑁨.𑁨𑁨.𑁧𑁬𑁧𑁭] 𑀇𑀘𑁆𑀘𑀸𑀤𑀺.

𑀬𑀁 𑀧𑀦 ‘‘𑀲𑁄 𑀘 𑀕𑀘𑁆𑀙𑀢𑀺, 𑀢𑁆𑀯𑀜𑁆𑀘 𑀕𑀘𑁆𑀙𑀲𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀢𑀼𑀫𑁆𑀳𑁂 𑀕𑀘𑁆𑀙𑀣𑀸’’𑀢𑀺 𑀯𑀸 ‘‘𑀲𑁄 𑀘 𑀕𑀘𑁆𑀙𑀢𑀺, 𑀅𑀳𑀜𑁆𑀘 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑀬𑀁 𑀕𑀘𑁆𑀙𑀸𑀫𑀸’’𑀢𑀺 𑀯𑀸 𑀯𑀘𑀦𑀁, 𑀢𑀁 𑀧𑀓𑀢𑀺𑀩𑀳𑀼𑀯𑀘𑀦𑀫𑁂𑀯, 𑀦 𑀧𑀭𑁄𑀧𑀼𑀭𑀺𑀲𑀩𑀳𑀼𑀯𑀘𑀦𑀁.

𑀬𑀜𑁆𑀘 𑀓𑀘𑁆𑀘𑀸𑀬𑀦𑁂 𑁋 ‘‘𑀲𑀩𑁆𑀩𑁂𑀲𑀫𑁂𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄’’𑀢𑀺 [𑀦𑀻. 𑁨𑁧𑁬 𑀧𑀺𑀝𑁆𑀞𑁂] 𑀲𑀼𑀢𑁆𑀢𑀁, 𑀢𑀢𑁆𑀣𑀧𑀺 𑀲𑀩𑁆𑀩𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀺𑀡𑁆𑀡𑀁 𑀯𑀸 𑀫𑀺𑀲𑁆𑀲𑀓𑀪𑀽𑀢𑀸𑀦𑀁 𑀦𑀸𑀫, 𑀢𑀼𑀫𑁆𑀳’𑀫𑁆𑀳𑀸𑀦𑀁 𑀏𑀓𑀢𑁄 𑀅𑀪𑀺𑀥𑀸𑀦𑁂 𑀫𑀺𑀲𑁆𑀲𑀓𑀤𑁆𑀯𑀦𑁆𑀤𑀯𑀸𑀓𑁆𑀬𑁂 𑀧𑀭𑁄 𑀧𑀼𑀭𑀺𑀲𑁄 𑀬𑁄𑀚𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄 𑀦 𑀦 𑀲𑀫𑁆𑀪𑀯𑀢𑀻𑀢𑀺.

𑁫𑁬𑁪. 𑀓𑀢𑁆𑀢𑀭𑀺 𑀮𑁄 [𑀓. 𑁪𑁫𑁫; 𑀭𑀽. 𑁪𑁩𑁩; 𑀦𑀻. 𑁯𑁨𑁫].

𑀅𑀧𑀭𑁄𑀓𑁆𑀔𑁂𑀲𑀼 𑀫𑀸𑀦, 𑀦𑁆𑀢, 𑀢𑁆𑀬𑀸𑀤𑀻𑀲𑀼 𑀧𑀭𑁂𑀲𑀼 𑀓𑁆𑀭𑀺𑀬𑀢𑁆𑀣𑀸 𑀧𑀭𑀁 𑀓𑀢𑁆𑀢𑀭𑀺 𑀮𑀸𑀦𑀼𑀩𑀦𑁆𑀥𑁄 𑀅𑀧𑀘𑁆𑀘𑀬𑁄 𑀳𑁄𑀢𑀺. 𑀮𑀸𑀦𑀼𑀩𑀦𑁆𑀥𑁄 ‘𑀊𑀮𑀲𑁆𑀲𑁂’𑀢𑀺 𑀲𑀼𑀢𑁆𑀢𑁂 𑀯𑀺𑀲𑁂𑀲𑀦𑀢𑁆𑀣𑁄.

𑀏𑀢𑁂𑀦 𑀬𑀢𑁆𑀣 𑀫𑀸𑀦, 𑀦𑁆𑀢, 𑀢𑁆𑀬𑀸𑀤𑀬𑁄 𑀓𑀢𑁆𑀢𑀭𑀺 𑀯𑀢𑁆𑀢𑀦𑁆𑀢𑀺, 𑀢𑀢𑁆𑀣 𑀅𑀬𑀁 𑀮𑀧𑀘𑁆𑀘𑀬𑁄𑀢𑀺 𑀮𑀧𑀘𑁆𑀘𑀬𑁂𑀦 𑀢𑁂𑀲𑀁 𑀓𑀢𑁆𑀢𑀼𑀯𑀸𑀘𑀓𑀪𑀸𑀯𑀁 𑀜𑀸𑀧𑁂𑀢𑀺, 𑀏𑀲 𑀦𑀬𑁄 ‘‘𑀓𑁆𑀬𑁄 𑀪𑀸𑀯𑀓𑀫𑁆𑀫𑁂𑀲𑀼…’’ 𑀇𑀘𑁆𑀘𑀸𑀤𑀻𑀲𑀼𑀧𑀺.

𑀏𑀢𑁆𑀣 𑀘 𑀯𑀺𑀓𑀭𑀡𑀧𑀘𑁆𑀘𑀬𑀸 𑀦𑀸𑀫 𑀩𑁆𑀬𑀜𑁆𑀚𑀦𑀧𑀽𑀭𑀡𑀸 𑀏𑀯 𑀳𑁄𑀦𑁆𑀢𑀺, 𑀦 𑀅𑀢𑁆𑀣𑀧𑀽𑀭𑀡𑀸, 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀧𑀬𑁄𑀕𑁂 𑀢𑁂𑀳𑀺 𑀯𑀺𑀦𑀸 𑀧𑀤𑀭𑀽𑀧𑀁 𑀦 𑀲𑀺𑀚𑁆𑀛𑀢𑀺, 𑀢𑀢𑁆𑀣𑁂𑀯 𑀢𑁂 𑀯𑀢𑁆𑀢𑀦𑁆𑀢𑀺. 𑀬𑀢𑁆𑀣 𑀲𑀺𑀚𑁆𑀛𑀢𑀺, 𑀢𑀢𑁆𑀣 𑀦 𑀯𑀢𑁆𑀢𑀦𑁆𑀢𑀺, 𑀅𑀬𑀫𑁆𑀧𑀺 𑀮𑀧𑀘𑁆𑀘𑀬𑁄 𑀥𑀸𑀢𑀼𑀢𑁄 𑀧𑀭𑀁 𑀯𑀺𑀪𑀢𑁆𑀢𑀺𑀲𑀭𑁂 𑀯𑀸 𑀆𑀕𑀫𑀲𑀭𑁂 𑀯𑀸 𑀅𑀲𑀦𑁆𑀢𑁂 𑀯𑀢𑁆𑀢𑀢𑀺, 𑀲𑀦𑁆𑀢𑁂 𑀧𑀦 ‘‘𑀧𑀘𑀸𑀫𑀺, 𑀧𑀘𑀸𑀫, 𑀧𑀘𑀸𑀳𑀺, 𑀕𑀫𑁂𑀢𑀺, 𑀕𑀫𑁂𑀦𑁆𑀢𑀺, 𑀯𑀚𑁆𑀚𑁂𑀢𑀺, 𑀯𑀚𑁆𑀚𑁂𑀦𑁆𑀢𑀺’’-𑀇𑀘𑁆𑀘𑀸𑀤𑀻𑀲𑀼 𑀓𑀸𑀭𑀺𑀬𑀦𑁆𑀢𑀭𑀢𑁆𑀣𑀸𑀬 𑀯𑀢𑁆𑀢𑀢𑀺. 𑀬𑀢𑁆𑀣 𑀘 𑀧𑀘𑁆𑀘𑀬𑀸𑀦𑀁 𑀮𑁄𑀧𑁄 𑀯𑀺𑀳𑀺𑀢𑁄, 𑀢𑀢𑁆𑀣 𑀕𑀡𑀦𑁆𑀢𑀭, 𑀭𑀽𑀧𑀦𑁆𑀢𑀭𑀧𑁆𑀧𑀲𑀗𑁆𑀕𑀧𑀝𑀺𑀲𑀺𑀤𑁆𑀥𑀸𑀬 𑀯𑀢𑁆𑀢𑀢𑀺, 𑀅𑀜𑁆𑀜𑀢𑁆𑀣 𑀦 𑀯𑀢𑁆𑀢𑀢𑀺.

𑁫𑁬𑁫. 𑀬𑀼𑀯𑀡𑁆𑀡𑀸𑀦𑀫𑁂𑀑 𑀧𑀘𑁆𑀘𑀬𑁂 [𑀓. 𑁪𑁮𑁫; 𑀭𑀽. 𑁪𑁩𑁪; 𑀦𑀻. 𑁯𑁭𑁫; 𑀘𑀁. 𑁧.𑁧.𑁮𑁨; 𑀧𑀸. 𑁩.𑁧.𑁬𑁦].

𑀯𑀺𑀪𑀢𑁆𑀢𑀺, 𑀧𑀘𑁆𑀘𑀬𑀸 𑀧𑀘𑁆𑀘𑀬𑁄 𑀦𑀸𑀫. 𑀇, 𑀓𑀻, 𑀔𑀺, 𑀘𑀺, 𑀚𑀺 𑀇𑀘𑁆𑀘𑀸𑀤𑀬𑁄 𑀇𑀯𑀡𑁆𑀡𑀸 𑀦𑀸𑀫. 𑀘𑀼, 𑀚𑀼, 𑀪𑀽, 𑀳𑀽 𑀇𑀘𑁆𑀘𑀸𑀤𑀬𑁄 𑀉𑀯𑀡𑁆𑀡𑀸 𑀦𑀸𑀫. 𑀧𑀘𑁆𑀘𑀬𑁂 𑀧𑀭𑁂 𑀏𑀓𑀓𑁆𑀔𑀭𑀥𑀸𑀢𑁆𑀯𑀦𑁆𑀢𑀸𑀦𑀁 𑀇𑀯𑀡𑁆𑀡𑀼’𑀯𑀡𑁆𑀡𑀸𑀦𑀁 𑀓𑀫𑁂𑀦 𑀏, 𑀑𑀯𑀼𑀤𑁆𑀥𑀺𑀬𑁄 𑀳𑁄𑀦𑁆𑀢𑀺. ‘𑀧𑀭𑁄 𑀓𑁆𑀯𑀘𑀻’𑀢𑀺 𑀧𑀭𑀲𑀭𑀮𑁄𑀧𑁄.

𑀲𑀁𑀧𑀼𑀩𑁆𑀩𑁄-𑀲𑀫𑁆𑀪𑁄𑀢𑀺, 𑀲𑀫𑁆𑀪𑁄𑀦𑁆𑀢𑀺, 𑀲𑀫𑁆𑀪𑁄𑀲𑀺, 𑀲𑀫𑁆𑀪𑁄𑀣, 𑀲𑀫𑁆𑀪𑁄𑀫𑀺, 𑀲𑀫𑁆𑀪𑁄𑀫.

𑀅𑀦𑀼𑀧𑀼𑀩𑁆𑀩𑁄-𑀅𑀦𑀼𑀪𑀯𑀦𑁂, 𑀲𑁄 𑀪𑁄𑀕𑀁 𑀅𑀦𑀼𑀪𑁄𑀢𑀺, 𑀢𑁂 𑀪𑁄𑀕𑀁 𑀅𑀦𑀼𑀪𑁄𑀦𑁆𑀢𑀺, 𑀢𑁆𑀯𑀁 𑀪𑁄𑀕𑀁 𑀅𑀦𑀼𑀪𑁄𑀲𑀺, 𑀢𑀼𑀫𑁆𑀳𑁂 𑀪𑁄𑀕𑀁 𑀅𑀦𑀼𑀪𑁄𑀣, 𑀅𑀳𑀁 𑀪𑁄𑀕𑀁 𑀅𑀦𑀼𑀪𑁄𑀫𑀺, 𑀫𑀬𑀁 𑀪𑁄𑀕𑀁 𑀅𑀦𑀼𑀪𑁄𑀫.

𑀢𑀢𑁆𑀣 𑀬𑀣𑀸 ‘‘𑀦𑀻𑀮𑁄 𑀧𑀝𑁄’’𑀢𑀺 𑀏𑀢𑁆𑀣 𑀦𑀻𑀮𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀤𑀼𑀯𑀺𑀥𑁄 𑀯𑀸𑀘𑁆𑀘𑀢𑁆𑀣𑁄, 𑀅𑀪𑀺𑀥𑁂𑀬𑁆𑀬𑀢𑁆𑀣𑁄𑀢𑀺.

𑀢𑀢𑁆𑀣 𑀕𑀼𑀡𑀲𑀗𑁆𑀔𑀸𑀢𑁄 𑀲𑀓𑀢𑁆𑀣𑁄 𑀯𑀸𑀘𑁆𑀘𑀢𑁆𑀣𑁄 𑀦𑀸𑀫.

𑀕𑀼𑀡𑀦𑀺𑀲𑁆𑀲𑀬𑁄 𑀤𑀩𑁆𑀩𑀢𑁆𑀣𑁄 𑀅𑀪𑀺𑀥𑁂𑀬𑁆𑀬𑀢𑁆𑀣𑁄 𑀦𑀸𑀫.

𑀦𑀻𑀮𑀲𑀤𑁆𑀤𑁄 𑀧𑀦 𑀯𑀘𑁆𑀘𑀸𑀢𑁆𑀣𑀫𑁂𑀯 𑀉𑀚𑀼𑀁 𑀯𑀤𑀢𑀺, 𑀦𑀻𑀮𑀲𑀤𑁆𑀤𑀫𑀢𑁆𑀢𑀁 𑀲𑀼𑀡𑀦𑁆𑀢𑁄 𑀦𑀻𑀮𑀕𑀼𑀡𑀫𑁂𑀯 𑀉𑀚𑀼𑀁 𑀚𑀸𑀦𑀸𑀢𑀺, 𑀢𑀲𑁆𑀫𑀸 ‘‘𑀧𑀝𑁄’’ 𑀇𑀢𑀺 𑀧𑀤𑀦𑁆𑀢𑀭𑁂𑀦 𑀦𑀻𑀮𑀲𑀤𑁆𑀤𑀲𑁆𑀲 𑀅𑀪𑀺𑀥𑁂𑀬𑁆𑀬𑀢𑁆𑀣𑁄 𑀆𑀘𑀺𑀓𑁆𑀔𑀻𑀬𑀢𑀺.

𑀢𑀣𑀸 ‘‘𑀅𑀦𑀼𑀪𑁄𑀢𑀻’’𑀢𑀺 𑀏𑀢𑁆𑀣 𑀢𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀤𑀼𑀯𑀺𑀥𑁄 𑀯𑀸𑀘𑁆𑀘𑀢𑁆𑀣𑁄, 𑀅𑀪𑀺𑀥𑁂𑀬𑁆𑀬𑀢𑁆𑀣𑁄𑀢𑀺.

𑀢𑀢𑁆𑀣 𑀓𑀢𑁆𑀢𑀼𑀲𑀢𑁆𑀢𑀺𑀲𑀗𑁆𑀔𑀸𑀢𑁄 𑀲𑀓𑀢𑁆𑀣𑁄 𑀯𑀸𑀘𑁆𑀘𑀢𑁆𑀣𑁄 𑀦𑀸𑀫.

𑀲𑀢𑁆𑀢𑀺𑀦𑀺𑀲𑁆𑀲𑀬𑁄 𑀮𑀺𑀗𑁆𑀕𑀢𑁆𑀣𑁄 𑀅𑀪𑀺𑀥𑁂𑀬𑁆𑀬𑀢𑁆𑀣𑁄 𑀦𑀸𑀫.

𑀢𑀺𑀲𑀤𑁆𑀤𑁄 𑀧𑀦 𑀯𑀸𑀘𑁆𑀘𑀢𑁆𑀣𑀫𑁂𑀯 𑀉𑀚𑀼𑀁 𑀯𑀤𑀢𑀺, 𑀦 𑀅𑀪𑀺𑀥𑁂𑀬𑁆𑀬𑀢𑁆𑀣𑀁. ‘‘𑀅𑀦𑀼𑀪𑁄𑀢𑀻’’𑀢𑀺 𑀲𑀼𑀡𑀦𑁆𑀢𑁄𑀲𑀸𑀥𑁆𑀬𑀓𑁆𑀭𑀺𑀬𑀸𑀲𑀳𑀺𑀢𑀁 𑀓𑀢𑁆𑀢𑀸𑀭𑀫𑁂𑀯 𑀉𑀚𑀼𑀁 𑀚𑀸𑀦𑀸𑀢𑀺, 𑀦 𑀓𑀺𑀜𑁆𑀘𑀺 𑀤𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 ‘‘𑀲𑁄’’ 𑀇𑀢𑀺 𑀧𑀤𑀦𑁆𑀢𑀭𑁂𑀦 𑀢𑀺𑀲𑀤𑁆𑀤𑀲𑁆𑀲 𑀅𑀪𑀺𑀥𑁂𑀬𑁆𑀬𑀢𑁆𑀣𑁄 𑀆𑀘𑀺𑀓𑁆𑀔𑀻𑀬𑀢𑀺, 𑀯𑀸𑀘𑁆𑀘𑀢𑁆𑀣𑀲𑁆𑀲 𑀧𑀦 𑀢𑀺𑀲𑀤𑁆𑀤𑁂𑀦𑁂𑀯 𑀉𑀚𑀼𑀁 𑀯𑀼𑀢𑁆𑀢𑀢𑁆𑀢𑀸 𑀢𑀢𑀺𑀬𑀸𑀯𑀺𑀪𑀢𑁆𑀢𑀺𑀬𑀸 𑀧𑀼𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀮𑀺𑀗𑁆𑀕𑀢𑁆𑀣𑀚𑁄𑀢𑀦𑀢𑁆𑀣𑀁 𑀅𑀪𑀺𑀥𑁂𑀬𑁆𑀬𑀧𑀤𑁂 𑀧𑀞𑀫𑀸𑀯𑀺𑀪𑀢𑁆𑀢𑀺 𑀏𑀯 𑀧𑀯𑀢𑁆𑀢𑀢𑀻𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁫𑁬𑁬. 𑀏𑀑𑀦𑀫𑀬𑀯𑀸 𑀲𑀭𑁂 [𑀓. 𑁫𑁧𑁩, 𑁫𑁧𑁪; 𑀭𑀽. 𑁪𑁩𑁫, 𑁪𑁯𑁧; 𑀦𑀻. 𑁧𑁦𑁨𑁭, 𑁧𑁦𑁨𑁮].

𑀲𑀭𑁂 𑀧𑀭𑁂 𑀏, 𑀑𑀦𑀁 𑀓𑀫𑁂𑀦 𑀅𑀬, 𑀅𑀯𑀸 𑀳𑁄𑀦𑁆𑀢𑀺. 𑀬, 𑀯𑁂𑀲𑀼 𑀅-𑀓𑀸𑀭𑁄 𑀉𑀘𑁆𑀘𑀸𑀭𑀡𑀢𑁆𑀣𑁄.

𑀪𑀯𑀢𑀺, 𑀪𑀯𑀦𑁆𑀢𑀺, 𑀪𑀯𑀲𑀺, 𑀪𑀯𑀣.

𑁫𑁬𑁭. 𑀳𑀺𑀫𑀺𑀫𑁂𑀲𑁆𑀯𑀲𑁆𑀲 [𑀓. 𑁪𑁭𑁮; 𑀭𑀽. 𑁪𑁩𑁮; 𑀦𑀻. 𑁯𑁫𑁯].

𑀳𑀺, 𑀫𑀺, 𑀫𑁂𑀲𑀼 𑀧𑀭𑁂𑀲𑀼 𑀅-𑀓𑀸𑀭𑀲𑁆𑀲 𑀤𑀻𑀖𑁄 𑀳𑁄𑀢𑀺.

𑀪𑀯𑀸𑀫𑀺, 𑀪𑀯𑀸𑀫.

𑀧𑀭𑀙𑀓𑁆𑀓𑁂 𑁋 𑀪𑀯𑀢𑁂, 𑀪𑀯𑀦𑁆𑀢𑁂, 𑀪𑀯𑀲𑁂, 𑀪𑀯𑀯𑁆𑀳𑁂, 𑀪𑀯𑁂, 𑀪𑀯𑀫𑁆𑀳𑁂.

𑀧𑀧𑀼𑀩𑁆𑀩𑁄 𑀪𑀽-𑀧𑀯𑀢𑁆𑀢𑀺𑀬𑀁, 𑀦𑀤𑀻 𑀧𑀪𑀯𑀢𑀺.

𑀅𑀥𑁆𑀬𑀸’𑀪𑀺, 𑀧𑀭𑀺𑀧𑀼𑀩𑁆𑀩𑁄 𑀳𑀺𑀁𑀲𑀸𑀬𑀁, 𑀅𑀥𑀺𑀪𑀯𑀢𑀺, 𑀅𑀪𑀺𑀪𑀯𑀢𑀺, 𑀧𑀭𑀺𑀪𑀯𑀢𑀺.

𑀯𑀺𑀧𑀼𑀩𑁆𑀩𑁄 𑀯𑀺𑀦𑀸𑀲𑁂, 𑀧𑀸𑀓𑀝𑁂, 𑀲𑁄𑀪𑀡𑁂 𑀘, 𑀯𑀺𑀪𑀯𑀢𑀺.

𑀧𑀭𑀸𑀧𑀼𑀩𑁆𑀩𑁄 𑀧𑀭𑀸𑀚𑀬𑁂, 𑀧𑀭𑀸𑀪𑀯𑀢𑀺.

𑀅𑀪𑀺, 𑀲𑀁𑀧𑀼𑀩𑁆𑀩𑁄 𑀧𑀢𑁆𑀢𑀺𑀬𑀁, 𑀅𑀚𑁆𑀛𑁄𑀕𑀸𑀳𑁂 𑀘, 𑀅𑀪𑀺𑀲𑀫𑁆𑀪𑀯𑀢𑀺, 𑀢𑀣𑀸 𑀧𑀸𑀢𑀼𑀩𑁆𑀪𑀯𑀢𑀺, 𑀆𑀯𑀺𑀪𑀯𑀢𑀺 𑀇𑀘𑁆𑀘𑀸𑀤𑀺.

𑀇𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧𑀁.

𑀲𑀼𑀤𑁆𑀥𑀪𑀸𑀯𑀓𑀫𑁆𑀫𑀭𑀽𑀧

𑁫𑁬𑁮. 𑀓𑁆𑀬𑁄 𑀪𑀸𑀯𑀓𑀫𑁆𑀫𑁂𑀲𑁆𑀯𑀧𑀭𑁄𑀓𑁆𑀔𑁂𑀲𑀼 𑀫𑀸𑀦 𑀦𑁆𑀢 𑀢𑁆𑀬𑀸𑀤𑀻𑀲𑀼 [𑀓. 𑁪𑁪𑁦; 𑀭𑀽. 𑁪𑁪𑁫; 𑀦𑀻. 𑁯𑁨𑁦; 𑀘𑀁. 𑁧.𑁧.𑁮𑁦; 𑀧𑀸. 𑁩.𑁧.𑁬𑁭].

𑀧𑀭𑁄𑀓𑁆𑀔𑀸𑀯𑀚𑁆𑀚𑀺𑀢𑁂𑀲𑀼 𑀫𑀸𑀦, 𑀦𑁆𑀢𑀧𑀘𑁆𑀘𑀬𑁂𑀲𑀼 𑀢𑁆𑀬𑀸𑀤𑀻𑀲𑀼 𑀘 𑀧𑀭𑁂𑀲𑀼 𑀓𑁆𑀭𑀺𑀬𑀢𑁆𑀣𑀸 𑀪𑀸𑀯𑀲𑁆𑀫𑀺𑀁 𑀓𑀫𑁆𑀫𑀦𑀺 𑀘 𑀓𑀸𑀦𑀼𑀩𑀦𑁆𑀥𑁄 𑀬𑀧𑀘𑁆𑀘𑀬𑁄 𑀳𑁄𑀢𑀺, 𑀩𑀳𑀼𑀮𑀸𑀥𑀺𑀓𑀸𑀭𑀸 𑀓𑁆𑀯𑀘𑀺 𑀓𑀢𑁆𑀢𑀭𑀺 𑀘.

𑀭𑀽𑀧𑀁 𑀯𑀺𑀪𑀼𑀬𑁆𑀬𑀢𑀺, 𑀲𑁄 𑀧𑀳𑀻𑀬𑀺𑀲𑁆𑀲𑀢𑀺 [𑀲𑀁. 𑀦𑀺. 𑁧.𑁨𑁪𑁯], 𑀪𑀢𑁆𑀢𑀁 𑀧𑀘𑁆𑀘𑀢𑀺, 𑀕𑀺𑀫𑁆𑀳𑁂 𑀉𑀤𑀓𑀁 𑀙𑀺𑀚𑁆𑀚𑀢𑀺, 𑀓𑀼𑀲𑀽𑀮𑁄 𑀪𑀺𑀚𑁆𑀚𑀢𑀺.

𑁫𑁬𑁯. 𑀦 𑀢𑁂 𑀓𑀸𑀦𑀼𑀩𑀦𑁆𑀥𑀦𑀸𑀕𑀫𑁂𑀲𑀼.

𑀓𑀸𑀦𑀼𑀩𑀦𑁆𑀥𑁂 𑀦𑀸𑀕𑀫𑁂 𑀘 𑀇𑀯𑀡𑁆𑀡𑀼’𑀯𑀡𑁆𑀡𑀸𑀦𑀁 𑀅𑀲𑁆𑀲 𑀘 𑀢𑁂 𑀏, 𑀑,-𑀆 𑀦 𑀳𑁄𑀦𑁆𑀢𑀻𑀢𑀺 𑀓𑁆𑀬𑀫𑁆𑀳𑀺 𑀯𑀼𑀤𑁆𑀥𑀺 𑀦𑀢𑁆𑀣𑀺.

𑀓𑀫𑁆𑀫𑁂-𑀢𑁂𑀦 𑀧𑀼𑀭𑀺𑀲𑁂𑀦 𑀪𑁄𑀕𑁄 𑀅𑀦𑀼𑀪𑀽𑀬𑀢𑀺, 𑀢𑁂𑀦 𑀪𑁄𑀕𑀸 𑀅𑀦𑀼𑀪𑀽𑀬𑀦𑁆𑀢𑀺, 𑀢𑁂𑀦 𑀢𑁆𑀯𑀁 𑀅𑀦𑀼𑀪𑀽𑀬𑀲𑀺, 𑀢𑁂𑀦 𑀢𑀼𑀫𑁆𑀳𑁂 𑀅𑀦𑀼𑀪𑀽𑀬𑀣, 𑀢𑁂𑀦 𑀅𑀳𑀁 𑀅𑀦𑀼𑀪𑀽𑀬𑀸𑀫𑀺, 𑀢𑁂𑀦 𑀫𑀬𑀁 𑀅𑀦𑀼𑀪𑀽𑀬𑀸𑀫. 𑀬𑀲𑁆𑀲 𑀤𑁆𑀯𑀺𑀢𑁆𑀢𑀁 𑀭𑀲𑁆𑀲𑀢𑁆𑀢𑀜𑁆𑀘, 𑀅𑀦𑀼𑀪𑀼𑀬𑁆𑀬𑀢𑀺, 𑀅𑀦𑀼𑀪𑀼𑀬𑁆𑀬𑀦𑁆𑀢𑀺.

𑀢𑀢𑁆𑀣 ‘‘𑀅𑀦𑀼𑀪𑀽𑀬𑀢𑀻’’𑀢𑀺 𑀏𑀢𑁆𑀣 𑀓𑁆𑀬𑀧𑀘𑁆𑀘𑀬𑀲𑀳𑀺𑀢𑀲𑁆𑀲 𑀢𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀤𑀼𑀯𑀺𑀥𑁄 𑀯𑀸𑀘𑁆𑀘𑀢𑁆𑀣𑁄, 𑀅𑀪𑀺𑀥𑁂𑀬𑁆𑀬𑀢𑁆𑀣𑁄𑀢𑀺.

𑀢𑀢𑁆𑀣 𑀓𑀫𑁆𑀫𑀲𑀢𑁆𑀢𑀺𑀲𑀗𑁆𑀔𑀸𑀢𑁄 𑀲𑀓𑀢𑁆𑀣𑁄 𑀯𑀸𑀘𑁆𑀘𑀢𑁆𑀣𑁄 𑀦𑀸𑀫.

𑀲𑀢𑁆𑀢𑀺𑀦𑀺𑀲𑁆𑀲𑀬𑁄 𑀮𑀺𑀗𑁆𑀕𑀢𑁆𑀣𑁄 𑀅𑀪𑀺𑀥𑁂𑀬𑁆𑀬𑀢𑁆𑀣𑁄 𑀦𑀸𑀫.

𑀢𑀺𑀲𑀤𑁆𑀤𑁄 𑀧𑀦 𑀓𑁆𑀬𑀧𑀘𑁆𑀘𑀬𑀲𑀳𑀺𑀢𑁄 𑀯𑀸𑀘𑁆𑀘𑀢𑁆𑀣𑀫𑁂𑀯 𑀉𑀚𑀼𑀁 𑀯𑀤𑀢𑀺, 𑀦 𑀅𑀪𑀺𑀥𑁂𑀬𑁆𑀬𑀢𑁆𑀣𑀁. ‘‘𑀅𑀦𑀼𑀪𑀽𑀬𑀢𑀻’’𑀢𑀺 𑀲𑀼𑀡𑀦𑁆𑀢𑁄 𑀲𑀸𑀥𑁆𑀬𑀓𑁆𑀭𑀺𑀬𑀸𑀲𑀳𑀺𑀢𑀁 𑀓𑀫𑁆𑀫𑀲𑀢𑁆𑀢𑀺𑀁 𑀏𑀯 𑀉𑀚𑀼𑀁 𑀚𑀸𑀦𑀸𑀢𑀺, 𑀦 𑀓𑀺𑀜𑁆𑀘𑀺 𑀤𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀦𑀼𑀪𑀽𑀬𑀢𑁂, 𑀅𑀦𑀼𑀪𑀼𑀬𑁆𑀬𑀢𑁂, 𑀅𑀦𑀼𑀪𑀽𑀬𑀦𑁆𑀢𑁂, 𑀅𑀦𑀼𑀪𑀼𑀬𑁆𑀬𑀦𑁆𑀢𑁂, 𑀅𑀦𑀼𑀪𑀽𑀬𑀲𑁂, 𑀅𑀦𑀼𑀪𑀽𑀬𑀯𑁆𑀳𑁂, 𑀅𑀦𑀼𑀪𑀽𑀬𑁂, 𑀅𑀦𑀼𑀪𑀼𑀬𑁆𑀬𑁂, 𑀅𑀦𑀼𑀪𑀽𑀬𑀫𑁆𑀳𑁂, 𑀅𑀦𑀼𑀪𑀼𑀬𑁆𑀬𑀫𑁆𑀳𑁂.

𑁫𑁭𑁦. 𑀕𑀭𑀼𑀧𑀼𑀩𑁆𑀩𑀸 𑀭𑀲𑁆𑀲𑀸 𑀭𑁂 𑀦𑁆𑀢𑁂𑀦𑁆𑀢𑀻𑀦𑀁 [𑀓. 𑁫𑁧𑁭; 𑀭𑀽. 𑁪𑁮𑁮; 𑀦𑀻. 𑁧𑁧𑁦𑁫; ‘𑀕𑀼𑀭𑀼…’ (𑀩𑀳𑀽𑀲𑀼)].

𑀕𑀭𑀼𑀧𑀼𑀩𑁆𑀩𑀫𑁆𑀳𑀸 𑀭𑀲𑁆𑀲𑀢𑁄 𑀦𑁆𑀢𑁂, 𑀦𑁆𑀢𑀻𑀦𑀁 𑀭𑁂𑀆𑀤𑁂𑀲𑁄 𑀳𑁄𑀢𑀺.

𑀚𑀸𑀬𑀭𑁂, 𑀚𑀸𑀬𑀦𑁆𑀢𑀺, 𑀚𑀸𑀬𑀭𑁂, 𑀚𑀸𑀬𑀦𑁆𑀢𑁂, 𑀕𑀘𑁆𑀙𑀭𑁂, 𑀕𑀘𑁆𑀙𑀦𑁆𑀢𑀺, 𑀕𑀘𑁆𑀙𑀭𑁂, 𑀕𑀘𑁆𑀙𑀦𑁆𑀢𑁂, 𑀕𑀫𑀺𑀲𑁆𑀲𑀭𑁂, 𑀕𑀫𑀺𑀲𑁆𑀲𑀦𑁆𑀢𑀺, 𑀕𑀫𑀺𑀲𑁆𑀲𑀭𑁂, 𑀕𑀫𑀺𑀲𑁆𑀲𑀦𑁆𑀢𑁂.

𑀕𑀭𑀼𑀧𑀼𑀩𑁆𑀩𑀸𑀢𑀺 𑀓𑀺𑀁? 𑀧𑀘𑀦𑁆𑀢𑀺, 𑀧𑀘𑀦𑁆𑀢𑁂.

𑀭𑀲𑁆𑀲𑀸𑀢𑀺 𑀓𑀺𑀁? 𑀧𑀸𑀘𑁂𑀦𑁆𑀢𑀺, 𑀧𑀸𑀘𑀦𑁆𑀢𑁂.

𑀏𑀢𑁆𑀣 𑀘 𑀲𑀼𑀢𑁆𑀢𑀯𑀺𑀪𑀸𑀕𑁂𑀦 ‘‘𑀲𑀩𑁆𑀩𑀁 𑀳𑀺𑀤𑀁 𑀪𑀜𑁆𑀚𑀭𑁂 𑀓𑀸𑀮𑀧𑀭𑀺𑀬𑀸𑀬𑀁 [𑀚𑀸. 𑁧.𑁧𑁫.𑁩𑁭𑁦], 𑀫𑀼𑀜𑁆𑀘𑀭𑁂 𑀩𑀦𑁆𑀥𑀦𑀲𑁆𑀫𑀸 [𑀚𑀸. 𑁨.𑁨𑁨.𑁧𑁬𑁪𑁮], 𑀚𑀻𑀯𑀭𑁂’ 𑀯𑀸𑀧𑀺 𑀲𑀼𑀲𑁆𑀲𑀢𑀻’’𑀢𑀺 [𑀚𑀸. 𑁨.𑁨𑁨.𑁮𑁪𑁦] 𑀏𑀢𑀸𑀦𑀺 𑀧𑀸𑀴𑀺𑀧𑀤𑀸𑀦𑀺 𑀲𑀺𑀚𑁆𑀛𑀦𑁆𑀢𑀺.

𑀢𑀢𑁆𑀣 ‘𑀪𑀜𑁆𑀚𑀭𑁂’𑀢𑀺 𑀪𑀺𑀚𑁆𑀚𑀢𑀺, ‘𑀫𑀼𑀜𑁆𑀘𑀭𑁂’𑀢𑀺 𑀫𑀼𑀜𑁆𑀘𑀦𑁆𑀢𑀼, ‘𑀚𑀻𑀯𑀭𑁂’ 𑀯𑀸𑀧𑀻’𑀢𑀺 𑀚𑀻𑀯𑀦𑁆𑀢𑁄’𑀯𑀸𑀧𑀺. 𑀅𑀦𑀼𑀪𑀽𑀬𑀭𑁂, 𑀅𑀦𑀼𑀪𑀽𑀬𑀦𑁆𑀢𑀺, 𑀅𑀦𑀼𑀪𑀽𑀬𑀭𑁂, 𑀅𑀦𑀼𑀪𑀽𑀬𑀦𑁆𑀢𑁂.

𑀪𑀸𑀯𑁄 𑀦𑀸𑀫 𑀪𑀯𑀦, 𑀕𑀫𑀦𑀸𑀤𑀺𑀓𑁄 𑀓𑁆𑀭𑀺𑀬𑀸𑀓𑀸𑀭𑁄, 𑀲𑁄 𑀥𑀸𑀢𑀼𑀦𑀸 𑀏𑀯 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀺𑀲𑁂𑀲𑀻𑀬𑀢𑀺, 𑀦 𑀦𑀸𑀫𑀧𑀤𑁂𑀦, 𑀢𑀲𑁆𑀫𑀸 𑀢𑀢𑁆𑀣 𑀢𑀼𑀫𑁆𑀳’𑀫𑁆𑀳, 𑀲𑁂𑀲𑀦𑀸𑀫𑀯𑀲𑁂𑀦 𑀢𑁆𑀬𑀸𑀤𑀺𑀤𑀼𑀓𑀯𑀺𑀲𑁂𑀲𑀬𑁄𑀕𑁄 𑀦𑀸𑀫 𑀦𑀢𑁆𑀣𑀺, 𑀧𑀞𑀫𑀤𑀼𑀓𑀫𑁂𑀯 𑀢𑀢𑁆𑀣 𑀪𑀯𑀢𑀺, 𑀤𑀩𑁆𑀩𑀲𑁆𑀲𑁂𑀯 𑀘 𑀢𑀲𑁆𑀲 𑀅𑀩𑁆𑀬𑀢𑁆𑀢𑀲𑀭𑀽𑀧𑀢𑁆𑀢𑀸 𑀲𑀗𑁆𑀔𑁆𑀬𑀸𑀪𑁂𑀤𑁄𑀧𑀺 𑀦𑀢𑁆𑀣𑀺, 𑀏𑀓𑀯𑀘𑀦𑀫𑁂𑀯 𑀪𑀯𑀢𑀺.

𑀢𑁂𑀦 𑀪𑁄𑀕𑀁 𑀅𑀦𑀼𑀪𑀽𑀬𑀢𑀺, 𑀅𑀦𑀼𑀪𑀼𑀬𑁆𑀬𑀢𑀺, 𑀅𑀦𑀼𑀪𑀽𑀬𑀢𑁂, 𑀅𑀦𑀼𑀪𑀼𑀬𑁆𑀬𑀢𑁂, 𑀅𑀦𑀼𑀪𑀯𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀲𑀼𑀤𑁆𑀥𑀪𑀸𑀯𑀓𑀫𑁆𑀫𑀭𑀽𑀧𑀸𑀦𑀺.

𑀳𑁂𑀢𑀼𑀓𑀢𑁆𑀢𑀼𑀭𑀽𑀧

𑁫𑁭𑁧. 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂 𑀡𑀸𑀧𑀺 𑀘 [𑀓. 𑁪𑁩𑁮; 𑀭𑀽. 𑁫𑁪𑁦; 𑀦𑀻. 𑁯𑁧𑁪].

𑀬𑁄 𑀲𑀼𑀤𑁆𑀥𑀓𑀢𑁆𑀢𑀸𑀭𑀁 𑀧𑀬𑁄𑀚𑁂𑀢𑀺, 𑀢𑀲𑁆𑀲 𑀧𑀬𑁄𑀚𑀓𑀲𑁆𑀲 𑀓𑀢𑁆𑀢𑀼𑀦𑁄 𑀩𑁆𑀬𑀸𑀧𑀸𑀭𑁂 𑀓𑁆𑀭𑀺𑀬𑀢𑁆𑀣𑀸 𑀡𑀺 𑀘 𑀡𑀸𑀧𑀺 𑀘 𑀳𑁄𑀦𑁆𑀢𑀺. 𑀡𑀸𑀦𑀼𑀩𑀦𑁆𑀥𑀸 𑀯𑀼𑀤𑁆𑀥𑀼𑀢𑁆𑀣𑀸.

𑀢𑁂𑀲𑀼 𑀘 𑀆𑀓𑀸𑀭𑀦𑁆𑀢𑀢𑁄 [‘𑀅𑀢𑁄’ (𑀫𑁄𑀕.)] 𑀡𑀸𑀧𑀺𑀬𑁂𑀯 𑀳𑁄𑀢𑀺, 𑀤𑀸𑀧𑁂𑀢𑀺, 𑀤𑀸𑀧𑀬𑀢𑀺.

𑀉𑀯𑀡𑁆𑀡𑀦𑁆𑀢𑀢𑁄 𑀡𑀺𑀬𑁂𑀯, 𑀲𑀸𑀯𑁂𑀢𑀺, 𑀲𑀸𑀯𑀬𑀢𑀺.

𑀲𑁂𑀲𑀢𑁄 𑀤𑁆𑀯𑁂𑀧𑀺, 𑀧𑀸𑀘𑁂𑀢𑀺, 𑀧𑀸𑀘𑀬𑀢𑀺, 𑀧𑀸𑀘𑀸𑀧𑁂𑀢𑀺, 𑀧𑀸𑀘𑀸𑀧𑀬𑀢𑀺.

𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁄𑀧𑀺 𑀓𑁆𑀭𑀺𑀬𑀸 𑀏𑀯𑀸𑀢𑀺 𑀢𑀤𑀢𑁆𑀣𑀯𑀸𑀘𑀻𑀳𑀺 𑀡𑀺,-𑀡𑀸𑀧𑀻𑀳𑀺 𑀧𑀭𑀁 𑀯𑀺𑀪𑀢𑁆𑀢𑀺, 𑀧𑀘𑁆𑀘𑀬𑀸 𑀪𑀯𑀦𑁆𑀢𑀺, 𑀥𑀸𑀢𑁆𑀯𑀦𑁆𑀢𑀲𑁆𑀲 𑀘 𑀡𑀺, 𑀡𑀸𑀧𑀻𑀦𑀜𑁆𑀘 𑀯𑀼𑀤𑁆𑀥𑀺.

𑀲𑁄 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀢𑁂 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀺, 𑀢𑁆𑀯𑀁 𑀫𑀕𑁆𑀕𑀁 𑀪𑀸𑀯𑁂𑀲𑀺, 𑀢𑀼𑀫𑁆𑀳𑁂 𑀫𑀕𑁆𑀕𑀁 𑀪𑀸𑀯𑁂𑀣, 𑀅𑀳𑀁 𑀫𑀕𑁆𑀕𑀁 𑀪𑀸𑀯𑁂𑀫𑀺, 𑀫𑀬𑀁 𑀫𑀕𑁆𑀕𑀁 𑀪𑀸𑀯𑁂𑀫.

𑁫𑁭𑁨. 𑀆𑀬𑀸𑀯𑀸 𑀡𑀸𑀦𑀼𑀩𑀦𑁆𑀥𑁂 [𑀓. 𑁫𑁧𑁫; 𑀭𑀽. 𑁫𑁪𑁧; 𑀦𑀻. 𑁧𑁦𑁨𑁯].

𑀏, 𑀑𑀦𑀁 𑀓𑀫𑁂𑀦 𑀆𑀬, 𑀆𑀯𑀸 𑀳𑁄𑀦𑁆𑀢𑀺 𑀲𑀭𑀸𑀤𑁄 𑀡𑀸𑀦𑀼𑀩𑀦𑁆𑀥𑁂 𑀧𑀘𑁆𑀘𑀬𑁂 𑀧𑀭𑁂, 𑀲𑀼𑀢𑁆𑀢𑀯𑀺𑀪𑀢𑁆𑀢𑀺𑀬𑀸 𑀅𑀡𑀸𑀦𑀼𑀩𑀦𑁆𑀥𑁂𑀧𑀺 𑀆𑀬𑀸’𑀯𑀸 𑀳𑁄𑀦𑁆𑀢𑀺.

𑀕𑁂-𑀲𑀤𑁆𑀤𑁂, 𑀕𑀸𑀬𑀢𑀺, 𑀕𑀸𑀬𑀦𑁆𑀢𑀺.

𑀅𑀧𑀧𑀼𑀩𑁆𑀩𑁄 𑀘𑁂-𑀧𑀽𑀚𑀸𑀬𑀁, 𑀅𑀧𑀘𑀸𑀬𑀢𑀺, 𑀅𑀧𑀘𑀸𑀬𑀦𑁆𑀢𑀺.

𑀛𑁂-𑀘𑀺𑀦𑁆𑀢𑀸𑀬𑀁, 𑀛𑀸𑀬𑀢𑀺, 𑀛𑀸𑀬𑀦𑁆𑀢𑀺, 𑀉𑀚𑁆𑀛𑀸𑀬𑀢𑀺, 𑀦𑀺𑀚𑁆𑀛𑀸𑀬𑀢𑀺 𑀇𑀘𑁆𑀘𑀸𑀤𑀺.

𑁫𑁭𑁩. 𑀡𑀺𑀡𑀸𑀧𑁆𑀬𑀸𑀧𑀻𑀳𑀺 𑀘 [‘‘…𑀯𑀸’’ (𑀩𑀳𑀽𑀲𑀼)].

𑀡𑀺, 𑀡𑀸𑀧𑀺, 𑀆𑀧𑀻𑀳𑀺 𑀘 𑀓𑀢𑁆𑀢𑀭𑀺 𑀮𑁄 𑀳𑁄𑀢𑀺 𑀯𑀸.