𑁧. 𑀲𑀦𑁆𑀥𑀺𑀓𑀡𑁆𑀟

𑀲𑀜𑁆𑀜𑀸𑀭𑀸𑀲𑀺

𑀕𑀭𑀼𑀲𑀜𑁆𑀜𑀸𑀭𑀸𑀲𑀺

𑀯𑀡𑁆𑀡𑁄, 𑀲𑀭𑁄, 𑀲𑀯𑀡𑁆𑀡𑁄, 𑀤𑀻𑀖𑁄, 𑀭𑀲𑁆𑀲𑁄, 𑀩𑁆𑀬𑀜𑁆𑀚𑀦𑁄, 𑀯𑀕𑁆𑀕𑁄, 𑀦𑀺𑀕𑁆𑀕𑀳𑀻𑀢𑀁.

𑁧. 𑀅𑀆𑀤𑀬𑁄 𑀢𑀺𑀢𑀸𑀮𑀻𑀲𑀁 [𑀢𑀺𑀢𑀸𑀮𑀻𑀲 (𑀩𑀳𑀽𑀲𑀼)] 𑀯𑀡𑁆𑀡𑀸 [𑀓. 𑁨; 𑀭𑀽. 𑁨; 𑀦𑀻. 𑁧, 𑁨].

𑀅𑀆𑀤𑀬𑁄 𑀩𑀺𑀦𑁆𑀤𑀦𑁆𑀢𑀸 𑀢𑁂𑀘𑀢𑁆𑀢𑀸𑀮𑀻𑀲𑀓𑁆𑀔𑀭𑀸 𑀯𑀡𑁆𑀡𑀸 𑀦𑀸𑀫 𑀳𑁄𑀦𑁆𑀢𑀺.

𑀅, 𑀆, 𑀇, 𑀈, 𑀉, 𑀊, 𑀏𑀢, 𑀏, 𑀑𑀢, 𑀑. 𑀓, 𑀔, 𑀕, 𑀖, 𑀗, 𑀘, 𑀙, 𑀚, 𑀛, 𑀜, 𑀝, 𑀞, 𑀟, 𑀠, 𑀡, 𑀢, 𑀣, 𑀤, 𑀥, 𑀦, 𑀧, 𑀨, 𑀩, 𑀪, 𑀫, 𑀬, 𑀭, 𑀮,𑀯 𑀲, 𑀳, 𑀴, 𑀅𑀁. 𑀅𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀻𑀢𑀺 𑀯𑀡𑁆𑀡𑀸, 𑀅𑀓𑁆𑀔𑀭𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀦𑀸𑀫𑀧𑀜𑁆𑀜𑀢𑁆𑀢𑀺𑀭𑀽𑀧𑀢𑁆𑀢𑀸 𑀦𑀓𑁆𑀔𑀭𑀦𑁆𑀢𑀺 𑀔𑀬𑀯𑀬𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀅𑀓𑁆𑀔𑀭𑀸. ‘‘𑀦𑀸𑀫𑀕𑁄𑀢𑁆𑀢𑀁 𑀦 𑀚𑀻𑀭𑀢𑀻’’𑀢𑀺 [𑀲𑀁. 𑀦𑀺. 𑁧.𑁭𑁬] 𑀳𑀺 𑀯𑀼𑀢𑁆𑀢𑀁.

𑁨. 𑀤𑀲𑀸𑀤𑁄 𑀲𑀭𑀸 [𑀓. 𑁩; 𑀭𑀽. 𑁩; 𑀦𑀻. 𑁩].

𑀢𑁂𑀲𑀼 𑀯𑀡𑁆𑀡𑁂𑀲𑀼 𑀆𑀤𑀺𑀫𑁆𑀳𑀺 𑀤𑀲 𑀯𑀡𑁆𑀡𑀸 𑀲𑀭𑀸 𑀦𑀸𑀫 𑀳𑁄𑀦𑁆𑀢𑀺. 𑀲𑀬𑀫𑁂𑀯 𑀮𑀤𑁆𑀥𑀲𑀭𑀽𑀧𑀸 𑀳𑀼𑀢𑁆𑀯𑀸 𑀭𑀸𑀚𑀦𑁆𑀢𑀺 𑀯𑀺𑀭𑁄𑀘𑀦𑁆𑀢𑀻𑀢𑀺 𑀲𑀭𑀸.

𑁩. 𑀤𑁆𑀯𑁂 𑀤𑁆𑀯𑁂 𑀲𑀯𑀡𑁆𑀡𑀸.

𑀢𑁂𑀲𑀼 𑀲𑀭𑁂𑀲𑀼 𑀤𑁆𑀯𑁂 𑀤𑁆𑀯𑁂𑀲𑀭𑀸 𑀲𑀯𑀡𑁆𑀡𑀸 𑀦𑀸𑀫 𑀳𑁄𑀦𑁆𑀢𑀺.

𑀅, 𑀆 𑀅𑀯𑀡𑁆𑀡𑁄, 𑀇, 𑀈 𑀇𑀯𑀡𑁆𑀡𑁄, 𑀉, 𑀊 𑀉𑀯𑀡𑁆𑀡𑁄, 𑀏𑀢, 𑀏 𑀏𑀢𑀯𑀡𑁆𑀡𑁄, 𑀑𑀢, 𑀑 𑀑𑀢𑀯𑀡𑁆𑀡𑁄. 𑀲𑀫𑀸𑀦𑁄 𑀯𑀡𑁆𑀡𑁄 𑀲𑀼𑀢𑀺 𑀏𑀢𑁂𑀲𑀦𑁆𑀢𑀺 𑀲𑀯𑀡𑁆𑀡𑀸, 𑀲𑀭𑀽𑀧𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀲𑀫𑀸𑀦𑀁 𑀭𑀽𑀧𑀁 𑀲𑀼𑀢𑀺 𑀏𑀢𑁂𑀲𑀦𑁆𑀢𑀺 𑀲𑀭𑀽𑀧𑀸.

𑁪. 𑀧𑀼𑀩𑁆𑀩𑁄 𑀭𑀲𑁆𑀲𑁄 [𑀓. 𑁪; 𑀭𑀽. 𑁪; 𑀦𑀻. 𑁪.𑁨𑁨].

𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀲𑀯𑀡𑁆𑀡𑁂𑀲𑀼 𑀬𑁄 𑀬𑁄 𑀧𑀼𑀩𑁆𑀩𑁄 𑀳𑁄𑀢𑀺, 𑀲𑁄 𑀲𑁄 𑀭𑀲𑁆𑀲𑁄 𑀦𑀸𑀫 𑀳𑁄𑀢𑀺. 𑀭𑀲𑁆𑀲𑁂𑀦 𑀓𑀸𑀮𑁂𑀦 𑀯𑀢𑁆𑀢𑀩𑁆𑀩𑀸𑀢𑀺 𑀭𑀲𑁆𑀲𑀸, 𑀭𑀲𑁆𑀲𑀓𑀸𑀮𑁄 𑀦𑀸𑀫 𑀅𑀓𑁆𑀔𑀺𑀤𑀮𑀸𑀦𑀁 𑀉𑀫𑁆𑀫𑀺𑀲𑀦𑀦𑀺𑀫𑁆𑀫𑀺𑀲𑀦𑀲𑀫𑀓𑀸𑀮𑁄.

𑀢𑀢𑁆𑀣 𑀏𑀢, 𑀑𑀢 𑀇𑀢𑀺 𑀤𑁆𑀯𑁂 𑀏𑀓𑀧𑀤𑀲𑀁𑀬𑁄𑀕𑁂 𑀧𑀭𑁂 𑀓𑁆𑀯𑀘𑀺 𑀮𑀩𑁆𑀪𑀦𑁆𑀢𑀺. 𑀏𑀝𑁆𑀞𑀺, 𑀲𑁂𑀝𑁆𑀞𑁄, 𑀑𑀝𑁆𑀞𑁄, 𑀲𑁄𑀢𑁆𑀣𑀺.

𑀏𑀓𑀧𑀤𑀲𑀁𑀬𑁄𑀕𑁂𑀢𑀺 𑀓𑀺𑀁? 𑀧𑀤𑀦𑁆𑀢𑀭𑀲𑀁𑀬𑁄𑀕𑁂 𑀧𑀭𑁂 𑀭𑀲𑁆𑀲𑀸 𑀫𑀸 𑀳𑁄𑀦𑁆𑀢𑀽𑀢𑀺. 𑀫𑀁 𑀘𑁂 𑀢𑁆𑀯𑀁 𑀦𑀺𑀔𑀡𑀁 𑀯𑀦𑁂, [𑀚𑀸. 𑁨.𑁨𑁨.𑁫] 𑀧𑀼𑀢𑁆𑀢𑁄 𑀢𑁆𑀬𑀸𑀳𑀁 𑀫𑀳𑀸𑀭𑀸𑀚 [𑀚𑀸. 𑁧.𑁧.𑁭].

𑀓𑁆𑀯𑀘𑀻𑀢𑀺 𑀓𑀺𑀁? 𑀏𑀓𑀧𑀤𑀲𑀁𑀬𑁄𑀕𑁂𑀧𑀺 𑀯𑀕𑁆𑀕𑀦𑁆𑀢𑁂𑀲𑀼 𑀯𑀸 𑀬, 𑀭, 𑀮, 𑀯𑁂𑀲𑀼 𑀯𑀸 𑀧𑀭𑁂𑀲𑀼 𑀭𑀲𑁆𑀲𑀸 𑀫𑀸 𑀳𑁄𑀦𑁆𑀢𑀽𑀢𑀺. 𑀏𑀦𑁆𑀢𑀺, 𑀲𑁂𑀦𑁆𑀢𑀺, 𑀏𑀬𑁆𑀬, 𑀪𑀸𑀲𑁂𑀬𑁆𑀬, 𑀫𑁂𑀡𑁆𑀟𑁄, 𑀲𑁄𑀡𑁆𑀟𑁄.

𑁫. 𑀧𑀭𑁄 𑀤𑀻𑀖𑁄 [𑀓. 𑁫; 𑀭𑀽. 𑁫; 𑀦𑀻. 𑁫].

𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀲𑀯𑀡𑁆𑀡𑁂𑀲𑀼 𑀬𑁄 𑀬𑁄 𑀧𑀭𑁄 𑀳𑁄𑀢𑀺, 𑀲𑁄 𑀲𑁄 𑀤𑀻𑀖𑁄 𑀦𑀸𑀫 𑀳𑁄𑀢𑀺. 𑀤𑀻𑀖𑁂𑀦 𑀓𑀸𑀮𑁂𑀦 𑀯𑀢𑁆𑀢𑀩𑁆𑀩𑀸𑀢𑀺 𑀤𑀻𑀖𑀸, 𑀤𑀻𑀖𑀓𑀸𑀮𑁄 𑀦𑀸𑀫 𑀭𑀲𑁆𑀲𑁂𑀳𑀺 𑀤𑀺𑀕𑀼𑀡𑀓𑀸𑀮𑁄.

𑁬. 𑀓𑀸𑀤𑀬𑁄 𑀩𑁆𑀬𑀜𑁆𑀚𑀦𑀸 [𑀓. 𑁬; 𑀭𑀽. 𑁮; 𑀦𑀻. 𑁬].

𑀢𑁂𑀲𑀼 𑀯𑀡𑁆𑀡𑁂𑀲𑀼 𑀓𑀸𑀤𑀬𑁄 𑀩𑀺𑀦𑁆𑀤𑀦𑁆𑀢𑀸 𑀯𑀡𑁆𑀡𑀸 𑀩𑁆𑀬𑀜𑁆𑀚𑀦𑀸 𑀦𑀸𑀫 𑀳𑁄𑀦𑁆𑀢𑀺. 𑀅𑀢𑁆𑀣𑀁 𑀩𑁆𑀬𑀜𑁆𑀚𑀬𑀦𑁆𑀢𑀻𑀢𑀺 𑀩𑁆𑀬𑀜𑁆𑀚𑀦𑀸. 𑀢𑁂 𑀧𑀦 𑀲𑀼𑀤𑁆𑀥𑀸 𑀅𑀤𑁆𑀥𑀫𑀢𑁆𑀢𑀺𑀓𑀸, 𑀭𑀲𑁆𑀲𑀬𑀼𑀢𑁆𑀢𑀸 𑀤𑀺𑀬𑀤𑁆𑀥𑀫𑀢𑁆𑀢𑀺𑀓𑀸, 𑀤𑀻𑀖𑀬𑀼𑀢𑁆𑀢𑀸 𑀢𑀺𑀬𑀤𑁆𑀥𑀫𑀢𑁆𑀢𑀺𑀓𑀸.

𑁭. 𑀧𑀜𑁆𑀘𑀧𑀜𑁆𑀘𑀓𑀸 𑀯𑀕𑁆𑀕𑀸 [𑀓. 𑁭; 𑀭𑀽 𑁯; 𑀦𑀻. 𑁭].

𑀢𑁂𑀲𑀼 𑀩𑁆𑀬𑀜𑁆𑀚𑀦𑁂𑀲𑀼 𑀓𑀸𑀤𑀺-𑀫𑀦𑁆𑀢𑀸 𑀧𑀜𑁆𑀘𑀩𑁆𑀬𑀜𑁆𑀚𑀦𑀧𑀜𑁆𑀘𑀓𑀸 𑀯𑀕𑁆𑀕𑀸 𑀦𑀸𑀫 𑀳𑁄𑀦𑁆𑀢𑀺.

𑀓𑀸𑀤𑀺 𑀧𑀜𑁆𑀘𑀓𑁄 𑀓𑀯𑀕𑁆𑀕𑁄, 𑀘𑀸𑀤𑀺 𑀘 𑀯𑀕𑁆𑀕𑁄, 𑀝𑀸𑀤𑀺 𑀝𑀯𑀕𑁆𑀕𑁄, 𑀢𑀸𑀤𑀺 𑀢𑀯𑀕𑁆𑀕𑁄, 𑀧𑀸𑀤𑀺 𑀧𑀯𑀕𑁆𑀕𑁄. 𑀲𑁂𑀲𑀸 𑀅𑀯𑀕𑁆𑀕𑀸𑀢𑀺 𑀲𑀺𑀤𑁆𑀥𑀁. 𑀯𑀡𑁆𑀡𑀼𑀤𑁆𑀤𑁂𑀲𑁂 𑀏𑀓𑀝𑁆𑀞𑀸𑀦𑀺𑀓𑀸𑀦𑀁 𑀩𑁆𑀬𑀜𑁆𑀚𑀦𑀸𑀦𑀁 𑀯𑀕𑁆𑀕𑁂 𑀲𑀫𑀽𑀳𑁂 𑀦𑀺𑀬𑀼𑀢𑁆𑀢𑀸𑀢𑀺 𑀯𑀕𑁆𑀕𑀸.

𑁮. 𑀩𑀺𑀦𑁆𑀤𑀼 𑀦𑀺𑀕𑁆𑀕𑀳𑀻𑀢𑀁 [𑀓. 𑁮; 𑀭𑀽. 𑁧𑁦; 𑀦𑀻. 𑁮].

𑀅𑀦𑁆𑀢𑁂 𑀩𑀺𑀦𑁆𑀤𑀼𑀫𑀢𑁆𑀢𑁄 𑀯𑀡𑁆𑀡𑁄 𑀦𑀺𑀕𑁆𑀕𑀳𑀻𑀢𑀁 𑀦𑀸𑀫. 𑀦𑀺𑀕𑁆𑀕𑀬𑁆𑀳 𑀕𑀬𑁆𑀳𑀢𑀺 𑀉𑀘𑁆𑀘𑀸𑀭𑀺𑀬𑀢𑀻𑀢𑀺 𑀦𑀺𑀕𑁆𑀕𑀳𑀻𑀢𑀁.

𑀕𑀭𑀼𑀲𑀜𑁆𑀜𑀸𑀭𑀸𑀲𑀺 𑀦𑀺𑀝𑁆𑀞𑀺𑀢𑁄.

𑀩𑁆𑀬𑀜𑁆𑀚𑀦𑀯𑀼𑀢𑁆𑀢𑀺𑀭𑀸𑀲𑀺

𑀞𑀸𑀦𑀁, 𑀓𑀭𑀡𑀁, 𑀧𑀬𑀢𑀦𑀁 [𑀭𑀽. 𑁨 (𑀧𑀺𑀝𑁆𑀞𑁂); 𑀦𑀻 𑁬 (𑀧𑀺𑀝𑁆𑀞𑁂); 𑁨𑁩 (𑀲𑀼𑀢𑁆𑀢𑀗𑁆𑀓𑁂)].

𑀙 𑀞𑀸𑀦𑀸𑀦𑀺 𑁋 𑀓𑀡𑁆𑀞𑀝𑁆𑀞𑀸𑀦𑀁, 𑀢𑀸𑀮𑀼𑀝𑁆𑀞𑀸𑀦𑀁, 𑀫𑀼𑀤𑁆𑀥𑀝𑁆𑀞𑀸𑀦𑀁, 𑀤𑀦𑁆𑀢𑀝𑁆𑀞𑀸𑀦𑀁, 𑀑𑀝𑁆𑀞𑀝𑁆𑀞𑀸𑀦𑀁, 𑀦𑀸𑀲𑀺𑀓𑀝𑁆𑀞𑀸𑀦𑀁. 𑀢𑁂𑀲𑀼 𑀩𑁆𑀬𑀢𑁆𑀢𑀁 𑀯𑀤𑀦𑁆𑀢𑁂𑀦 𑀬𑀢𑁆𑀣 ‘‘𑀅𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀓𑀡𑁆𑀞𑀝𑁆𑀞𑀸𑀦𑀁. 𑀬𑀢𑁆𑀣 ‘‘𑀇𑀘𑁆𑀙’’𑀦𑁆𑀢𑀺, 𑀢𑀁 𑀢𑀸𑀮𑀼𑀝𑁆𑀞𑀸𑀦𑀁. 𑀬𑀢𑁆𑀣 ‘‘𑀭𑀝𑁆𑀞’’𑀦𑁆𑀢𑀺, 𑀢𑀁 𑀫𑀼𑀤𑁆𑀥𑀝𑁆𑀞𑀸𑀦𑀁. 𑀬𑀢𑁆𑀣 ‘‘𑀲𑀢𑁆𑀣’’𑀦𑁆𑀢𑀺, 𑀢𑀁 𑀤𑀦𑁆𑀢𑀝𑁆𑀞𑀸𑀦𑀁. 𑀬𑀢𑁆𑀣 ‘‘𑀧𑀼𑀧𑁆𑀨’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀑𑀝𑁆𑀞𑀝𑁆𑀞𑀸𑀦𑀁. 𑀦𑀸𑀲𑀧𑀤𑁂𑀲𑁄 𑀦𑀸𑀲𑀺𑀓𑀝𑁆𑀞𑀸𑀦𑀁.

𑀓𑀢𑁆𑀣𑀘𑀺 𑀧𑀦 𑀉𑀭𑀝𑁆𑀞𑀸𑀦𑀁, 𑀲𑀺𑀭𑀝𑁆𑀞𑀸𑀦𑀁, 𑀚𑀺𑀯𑁆𑀳𑀸𑀫𑀽𑀮𑀝𑁆𑀞𑀸𑀦𑀦𑁆𑀢𑀺𑀧𑀺 𑀆𑀕𑀢𑀁. 𑀢𑀢𑁆𑀣 𑀲𑀺𑀭𑀝𑁆𑀞𑀸𑀦𑀁 𑀦𑀸𑀫 𑀫𑀼𑀤𑁆𑀥𑀝𑁆𑀞𑀸𑀦𑀫𑁂𑀯. 𑀚𑀺𑀯𑁆𑀳𑀸𑀫𑀽𑀮𑀝𑁆𑀞𑀸𑀦𑀁 𑀧𑀦 𑀲𑀩𑁆𑀩𑀯𑀡𑁆𑀡𑀸𑀦𑀁 𑀲𑀸𑀥𑀸𑀭𑀡𑀦𑁆𑀢𑀺 𑀯𑀤𑀦𑁆𑀢𑀺.

𑀓𑀭𑀡𑀁 𑀘𑀢𑀼𑀩𑁆𑀩𑀺𑀥𑀁 𑁋 𑀚𑀺𑀯𑁆𑀳𑀸𑀫𑀽𑀮𑀁, 𑀚𑀺𑀯𑁆𑀳𑁄𑀧𑀕𑁆𑀕𑀁, 𑀚𑀺𑀯𑁆𑀳𑀕𑁆𑀕𑀁, 𑀲𑀓𑀝𑁆𑀞𑀸𑀦𑀦𑁆𑀢𑀺.

𑀧𑀬𑀢𑀦𑀁 𑀘𑀢𑀼𑀩𑁆𑀩𑀺𑀥𑀁 𑁋 𑀲𑀁𑀯𑀼𑀝𑀁, 𑀯𑀺𑀯𑀝𑀁, 𑀨𑀼𑀝𑁆𑀞𑀁, 𑀈𑀲𑀁𑀨𑀼𑀝𑁆𑀞𑀦𑁆𑀢𑀺. 𑀢𑀢𑁆𑀣 𑀓𑀭𑀡𑀸𑀦𑀁 𑀲𑀓𑀲𑀓𑀝𑁆𑀞𑀸𑀦𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀭𑀡𑀸𑀤𑀺𑀓𑁄 𑀯𑀺𑀲𑁂𑀲𑀸𑀓𑀸𑀭𑁄 𑀲𑀁𑀯𑀼𑀝𑀸𑀤𑀺 𑀦𑀸𑀫.

𑀢𑀢𑁆𑀣 𑀓𑀡𑁆𑀞𑀧𑀤𑁂𑀲𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑁆𑀝𑀦𑁂𑀦 𑀉𑀧𑁆𑀧𑀦𑁆𑀦𑀸 𑀅𑀯𑀡𑁆𑀡, 𑀓𑀯𑀕𑁆𑀕, 𑀳𑀓𑀸𑀭𑀸 𑀓𑀡𑁆𑀞𑀚𑀸 𑀦𑀸𑀫. 𑀢𑀸𑀮𑀼𑀫𑁆𑀳𑀺 𑀚𑀺𑀯𑁆𑀳𑀸𑀫𑀚𑁆𑀛𑀲𑀗𑁆𑀖𑀝𑁆𑀝𑀦𑁂𑀦 𑀉𑀧𑁆𑀧𑀦𑁆𑀦𑀸 𑀇𑀯𑀡𑁆𑀡, 𑀘𑀯𑀕𑁆𑀕, 𑀬𑀓𑀸𑀭𑀸 𑀢𑀸𑀮𑀼𑀚𑀸 𑀦𑀸𑀫. 𑀫𑀼𑀔𑀩𑁆𑀪𑀦𑁆𑀢𑀭𑀫𑀼𑀤𑁆𑀥𑀫𑁆𑀳𑀺 𑀚𑀺𑀯𑁆𑀳𑁄𑀧𑀕𑁆𑀕𑀲𑀗𑁆𑀖𑀝𑁆𑀝𑀦𑁂𑀦 𑀉𑀧𑁆𑀧𑀦𑁆𑀦𑀸 𑀝𑀯𑀕𑁆𑀕, 𑀭, 𑀴𑀓𑀸𑀭𑀸 𑀫𑀼𑀤𑁆𑀥𑀚𑀸 𑀦𑀸𑀫. 𑀉𑀧𑀭𑀺 𑀤𑀦𑁆𑀢𑀧𑀦𑁆𑀢𑀺𑀬𑀁 𑀚𑀺𑀯𑁆𑀳𑀕𑁆𑀕𑀲𑀗𑁆𑀖𑀝𑁆𑀝𑀦𑁂𑀦 𑀉𑀧𑁆𑀧𑀦𑁆𑀦𑀸 𑀢𑀯𑀕𑁆𑀕, 𑀮, 𑀲𑀓𑀸𑀭𑀸 𑀤𑀦𑁆𑀢𑀚𑀸 𑀦𑀸𑀫. 𑀑𑀝𑁆𑀞𑀤𑁆𑀯𑀬𑀲𑀗𑁆𑀖𑀝𑁆𑀝𑀦𑁂𑀦 𑀉𑀧𑁆𑀧𑀦𑁆𑀦𑀸 𑀉𑀯𑀡𑁆𑀡, 𑀧𑀯𑀕𑁆𑀕𑀸 𑀑𑀝𑁆𑀞𑀚𑀸 𑀦𑀸𑀫. 𑀦𑀺𑀕𑁆𑀕𑀳𑀻𑀢𑀁 𑀦𑀸𑀲𑀺𑀓𑀚𑀁 𑀦𑀸𑀫. 𑀧𑀜𑁆𑀘𑀯𑀕𑁆𑀕𑀦𑁆𑀢𑀸 𑀧𑀦 𑀦𑀸𑀲𑀺𑀓𑀝𑁆𑀞𑀸𑀦𑁂𑀧𑀺 𑀲𑀓𑀝𑁆𑀞𑀸𑀦𑁂𑀧𑀺 𑀚𑀸𑀬𑀦𑁆𑀢𑀺. 𑀏𑀓𑀸𑀭𑁄 𑀓𑀡𑁆𑀞𑀢𑀸𑀮𑀼𑀚𑁄. 𑀑𑀓𑀸𑀭𑁄 𑀓𑀡𑁆𑀞𑁄𑀝𑁆𑀞𑀚𑁄. 𑀯𑀓𑀸𑀭𑁄 𑀤𑀦𑁆𑀢𑁄𑀝𑁆𑀞𑀚𑁄. 𑀅𑀧𑀺𑀘 𑀇𑀯𑀡𑁆𑀡𑀼𑀯𑀡𑁆𑀡𑀸 𑀓𑀡𑁆𑀞𑁂𑀧𑀺 𑀚𑀸𑀬𑀦𑁆𑀢𑀺𑀬𑁂𑀯. 𑀬𑀤𑀸 𑀳𑀓𑀸𑀭𑁄 𑀯𑀕𑁆𑀕𑀦𑁆𑀢𑁂𑀳𑀺 𑀯𑀸 𑀬, 𑀭, 𑀮, 𑀯𑁂𑀳𑀺 𑀯𑀸 𑀬𑀼𑀢𑁆𑀢𑁄 𑀳𑁄𑀢𑀺, 𑀢𑀤𑀸 𑀉𑀭𑀚𑁄𑀢𑀺 𑀯𑀤𑀦𑁆𑀢𑀺. 𑀧𑀜𑁆𑀳𑁄, 𑀢𑀼𑀡𑁆𑀳𑀺, 𑀦𑁆𑀳𑀸𑀢𑁄, 𑀯𑀺𑀫𑁆𑀳𑀺𑀢𑁄, 𑀕𑀬𑁆𑀳𑀢𑁂, 𑀯𑀼𑀮𑁆𑀳𑀢𑁂, 𑀅𑀯𑁆𑀳𑀸𑀦𑀁.

𑀓𑀡𑁆𑀞𑀁 𑀲𑀁𑀯𑀭𑀺𑀢𑁆𑀯𑀸 𑀉𑀘𑁆𑀘𑀸𑀭𑀺𑀢𑁄 𑀅𑀓𑀸𑀭𑁄 𑀲𑀁𑀯𑀼𑀝𑁄 𑀦𑀸𑀫. 𑀲𑀓𑀲𑀓𑀝𑁆𑀞𑀸𑀦, 𑀓𑀭𑀡𑀸𑀦𑀺 𑀯𑀺𑀯𑀭𑀺𑀢𑁆𑀯𑀸 𑀉𑀘𑁆𑀘𑀸𑀭𑀺𑀢𑀸 𑀲𑁂𑀲𑀲𑀭𑀸 𑀘 𑀲, 𑀳𑀓𑀸𑀭𑀸 𑀘 𑀯𑀺𑀯𑀝𑀸 𑀦𑀸𑀫. 𑀢𑀸𑀦𑀺𑀬𑁂𑀯 𑀕𑀸𑀴𑁆𑀳𑀁 𑀨𑀼𑀲𑀸𑀧𑁂𑀢𑁆𑀯𑀸 𑀉𑀘𑁆𑀘𑀸𑀭𑀺𑀢𑀸 𑀧𑀜𑁆𑀘𑀯𑀕𑁆𑀕𑀸 𑀨𑀼𑀝𑁆𑀞𑀸 𑀦𑀸𑀫. 𑀣𑁄𑀓𑀁 𑀨𑀼𑀲𑀸𑀧𑁂𑀢𑁆𑀯𑀸 𑀉𑀘𑁆𑀘𑀸𑀭𑀺𑀢𑀸 𑀬, 𑀭, 𑀮, 𑀯𑀸 𑀈𑀲𑀁𑀨𑀼𑀝𑁆𑀞𑀸 𑀦𑀸𑀫. 𑀢𑀢𑁆𑀣 𑀑𑀝𑁆𑀞𑀚𑁂𑀲𑀼 𑀢𑀸𑀯 𑀧𑀯𑀕𑁆𑀕𑀁 𑀯𑀤𑀦𑁆𑀢𑀸𑀦𑀁 𑀑𑀝𑁆𑀞𑀤𑁆𑀯𑀬𑀲𑁆𑀲 𑀕𑀸𑀴𑁆𑀳𑀁 𑀨𑀼𑀲𑀦𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀨𑀼𑀝𑁆𑀞𑀧𑀬𑀢𑀦𑀺𑀓𑀢𑁆𑀢𑀸 𑀧𑀯𑀕𑁆𑀕𑀲𑁆𑀲. 𑀉𑀯𑀡𑁆𑀡𑀁 𑀯𑀤𑀦𑁆𑀢𑀸𑀦𑀁 𑀧𑀦 𑀑𑀝𑁆𑀞𑀤𑁆𑀯𑀬𑀲𑁆𑀲 𑀯𑀺𑀯𑀭𑀡𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀯𑀺𑀯𑀝𑀧𑀬𑀢𑀦𑀺𑀓𑀢𑁆𑀢𑀸 𑀉𑀯𑀡𑁆𑀡𑀲𑁆𑀲. 𑀏𑀲 𑀦𑀬𑁄 𑀲𑁂𑀲𑁂𑀲𑀼 𑀲𑀩𑁆𑀩𑁂𑀲𑀽𑀢𑀺.

𑀘𑀽𑀴𑀦𑀺𑀭𑀼𑀢𑁆𑀢𑀺𑀬𑀁 𑀧𑀦 𑀲𑀩𑁆𑀩𑁂 𑀭𑀲𑁆𑀲𑀲𑀭𑀸 𑀲𑀁𑀯𑀼𑀝𑀸 𑀦𑀸𑀫, 𑀲𑀩𑁆𑀩𑁂𑀤𑀻𑀖𑀲𑀭𑀸 𑀯𑀺𑀯𑀝𑀸 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀲𑀤𑁆𑀤𑀲𑀸𑀭𑀢𑁆𑀣𑀚𑀸𑀮𑀺𑀦𑀺𑀬𑀁, 𑀓𑀢𑁆𑀣𑀘𑀺 𑀲𑀓𑁆𑀓𑀝𑀕𑀦𑁆𑀣𑁂 𑀘. 𑀇𑀤𑀁 𑀬𑀼𑀢𑁆𑀢𑀢𑀭𑀁. 𑀅𑀜𑁆𑀜𑀝𑁆𑀞𑀸𑀦𑀺𑀓𑀩𑁆𑀬𑀜𑁆𑀚𑀦𑁂𑀳𑀺 𑀬𑀼𑀢𑁆𑀢𑀸 𑀲𑀭𑀸 𑀅𑀢𑁆𑀢𑀦𑁄 𑀞𑀸𑀦, 𑀓𑀭𑀡𑀸𑀦𑀺 𑀚𑀳𑀦𑁆𑀢𑀸𑀧𑀺 𑀧𑀬𑀢𑀦𑀁 𑀦 𑀚𑀳𑀦𑁆𑀢𑀺. 𑀢𑀲𑁆𑀫𑀸 𑀦𑀸𑀦𑀸𑀯𑀡𑁆𑀡𑀸𑀦𑀁 𑀲𑀁𑀲𑀕𑁆𑀕𑁂 𑀧𑀬𑀢𑀦𑀸𑀦𑀁 𑀲𑀁𑀲𑀕𑁆𑀕𑀪𑁂𑀤𑁄𑀧𑀺 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀢𑀢𑁆𑀣 ‘‘𑀲𑀼𑀡𑀸𑀢𑀼 𑀫𑁂’’𑀢𑀺 𑀯𑀤𑀦𑁆𑀢𑁄 𑀬𑀤𑀺 𑀡𑀸-𑀓𑀸𑀭𑀁 𑀚𑀺𑀯𑁆𑀳𑀕𑁆𑀕𑁂𑀦 𑀤𑀦𑁆𑀢𑀝𑁆𑀞𑀸𑀦𑁂 𑀓𑀢𑁆𑀯𑀸 𑀯𑀤𑁂𑀬𑁆𑀬, 𑀤𑀦𑁆𑀢𑀚𑁄 𑀦𑀸-𑀓𑀸𑀭𑁄 𑀏𑀯 𑀪𑀯𑁂𑀬𑁆𑀬. 𑀢𑀼-𑀓𑀸𑀭𑀜𑁆𑀘 𑀚𑀺𑀯𑁆𑀳𑁄𑀧𑀕𑁆𑀕𑁂𑀦 𑀫𑀼𑀤𑁆𑀥𑀝𑁆𑀞𑀸𑀦𑁂 𑀓𑀢𑁆𑀯𑀸 𑀯𑀤𑁂𑀬𑁆𑀬, 𑀫𑀼𑀤𑁆𑀥𑀚𑁄 𑀝𑀼-𑀓𑀸𑀭𑁄 𑀏𑀯 𑀪𑀯𑁂𑀬𑁆𑀬. 𑀏𑀯𑀜𑁆𑀘 𑀲𑀢𑀺 𑀅𑀓𑁆𑀔𑀭𑀯𑀺𑀧𑀢𑁆𑀢𑀺 𑀦𑀸𑀫 𑀲𑀺𑀬𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼 𑀫𑀼𑀤𑁆𑀥𑀚𑀤𑀦𑁆𑀢𑀚𑁂𑀲𑀼. 𑀢𑀲𑁆𑀫𑀸 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀦𑁆𑀢𑁂𑀳𑀺 𑀦𑀸𑀫 𑀞𑀸𑀦, 𑀓𑀭𑀡, 𑀧𑀬𑀢𑀦𑁂𑀲𑀼 𑀲𑀼𑀝𑁆𑀞𑀼 𑀓𑀼𑀲𑀮𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺.

𑀲𑀺𑀣𑀺𑀮𑀜𑁆𑀘, 𑀥𑀦𑀺𑀢𑀜𑁆𑀘, 𑀤𑀻𑀖𑀁, 𑀭𑀲𑁆𑀲𑀁, 𑀕𑀭𑀼𑀁, 𑀮𑀳𑀼𑀁;

𑀦𑀺𑀕𑁆𑀕𑀳𑀻𑀢𑀁, 𑀯𑀺𑀫𑀼𑀢𑁆𑀢𑀜𑁆𑀘, 𑀲𑀫𑁆𑀩𑀦𑁆𑀥𑀜𑁆𑀘, 𑀯𑀯𑀢𑁆𑀣𑀺𑀢𑀁 [𑀦𑀻. 𑁯, 𑁧𑁦, 𑁧𑁧, 𑁧𑁨, 𑁧𑁩, 𑁧𑁪, 𑁧𑁫, 𑁧𑁬-𑁧𑁯, 𑁨𑁦, 𑁨𑁧 𑀲𑀼𑀢𑁆𑀢𑁂𑀲𑀼 𑀧𑀲𑁆𑀲𑀺𑀢𑀩𑁆𑀩𑀁].

𑀫𑀼𑀤𑀼𑀦𑀸 𑀯𑀘𑀻𑀧𑀬𑁄𑀕𑁂𑀦 𑀯𑀢𑁆𑀢𑀩𑁆𑀩𑀸 𑀯𑀕𑁆𑀕𑀧𑀞𑀫, 𑀢𑀢𑀺𑀬, 𑀧𑀜𑁆𑀘𑀫𑀸 𑀲𑀺𑀣𑀺𑀮𑀸 𑀦𑀸𑀫. 𑀣𑀤𑁆𑀥𑁂𑀦 𑀯𑀘𑀻𑀧𑀬𑁄𑀕𑁂𑀦 𑀯𑀢𑁆𑀢𑀩𑁆𑀩𑀸 𑀯𑀕𑁆𑀕𑀤𑀼𑀢𑀺𑀬, 𑀘𑀢𑀼𑀢𑁆𑀣𑀸 𑀥𑀦𑀺𑀢𑀸 𑀦𑀸𑀫. 𑀤𑀻𑀖, 𑀭𑀲𑁆𑀲𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸. 𑀤𑀻𑀖𑀸 𑀘𑁂𑀯 𑀲𑀁𑀬𑁄𑀕𑀧𑀼𑀩𑁆𑀩𑀸 𑀘 𑀦𑀺𑀕𑁆𑀕𑀳𑀻𑀢𑀦𑁆𑀢𑀸 𑀘 𑀕𑀭𑀼𑀓𑀸 𑀦𑀸𑀫. 𑀲𑁂𑀲𑀸 𑀮𑀳𑀼𑀓𑀸 𑀦𑀸𑀫. 𑀬𑀣𑀸 𑀲𑀤𑁆𑀤𑀲𑀳𑀺𑀢𑁄 𑀯𑀸𑀢𑁄 𑀫𑀼𑀔𑀙𑀺𑀤𑁆𑀤𑁂𑀦 𑀩𑀳𑀺 𑀅𑀦𑀺𑀓𑁆𑀔𑀫𑁆𑀫 𑀦𑀸𑀲𑀲𑁄𑀢𑀸𑀪𑀺𑀫𑀼𑀔𑁄 𑀳𑁄𑀢𑀺, 𑀢𑀣𑀸 𑀫𑀼𑀔𑀁 𑀅𑀯𑀺𑀯𑀝𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀩𑁆𑀬𑀜𑁆𑀚𑀦𑀁 𑀦𑀺𑀕𑁆𑀕𑀳𑀻𑀢𑀁 𑀦𑀸𑀫. 𑀢𑁂𑀦 𑀬𑀼𑀢𑁆𑀢𑀸𑀦𑀺 𑀲𑀩𑁆𑀩𑀩𑁆𑀬𑀜𑁆𑀚𑀦𑀸𑀦𑀺 𑀦𑀺𑀕𑁆𑀕𑀳𑀻𑀢𑀦𑁆𑀢𑀸𑀦𑀺 𑀦𑀸𑀫. 𑀲𑁂𑀲𑀸 𑀯𑀺𑀫𑀼𑀢𑁆𑀢𑀸 𑀦𑀸𑀫. 𑀧𑀤𑀲𑀦𑁆𑀥𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀁 𑀲𑀫𑁆𑀩𑀦𑁆𑀥𑀁 𑀦𑀸𑀫. 𑀧𑀤𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀯𑀯𑀢𑁆𑀣𑀺𑀢𑀁 𑀦𑀸𑀫.

𑀩𑁆𑀬𑀜𑁆𑀚𑀦𑀯𑀼𑀢𑁆𑀢𑀺𑀭𑀸𑀲𑀺 𑀦𑀺𑀝𑁆𑀞𑀺𑀢𑁄.

𑀮𑀳𑀼𑀲𑀜𑁆𑀜𑀸𑀭𑀸𑀲𑀺

𑀛𑁄, 𑀮𑁄, 𑀧𑁄, 𑀖𑁄, 𑀕𑁄.

𑁯. 𑀬𑀼𑀯𑀡𑁆𑀡𑀸 [𑀇𑀬𑀼𑀯𑀡𑁆𑀡𑀸 (𑀩𑀳𑀽𑀲𑀼)] 𑀛𑀮𑀸 𑀦𑀸𑀫𑀲𑁆𑀲𑀦𑁆𑀢𑁂 [𑀓. 𑁫𑁮; 𑀭𑀽. 𑁨𑁯; 𑀦𑀻. 𑁨𑁦𑁫].

𑀅𑀦𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀦𑀸𑀫𑀲𑁆𑀲 𑀅𑀦𑁆𑀢𑁂 𑀇𑀯𑀡𑁆𑀡𑀼𑀯𑀡𑁆𑀡𑀸 𑀓𑀫𑁂𑀦 𑀛𑀮𑀲𑀜𑁆𑀜𑀸 𑀳𑁄𑀦𑁆𑀢𑀺.

𑁧𑁦. 𑀧𑀺𑀢𑁆𑀣𑀺𑀬𑀁 [𑀓. 𑁫𑁯; 𑀭𑀽. 𑁧𑁮𑁨; 𑀦𑀻. 𑁨𑁦𑁬].

𑀇𑀢𑁆𑀣𑀺𑀮𑀺𑀗𑁆𑀕𑁂 𑀦𑀸𑀫𑀲𑁆𑀲𑀦𑁆𑀢𑁂 𑀇𑀯𑀡𑁆𑀡𑀼𑀯𑀡𑁆𑀡𑀸 𑀧𑀲𑀜𑁆𑀜𑀸 𑀳𑁄𑀦𑁆𑀢𑀺.

𑁧𑁧. 𑀖𑀸 [𑀓. 𑁬𑁦; 𑀭𑀽. 𑁧𑁭𑁭; 𑀦𑀻. 𑁨𑁦𑁭].

𑀖𑁄

, 𑀆 𑀇𑀢𑀺 𑀤𑁆𑀯𑀺𑀧𑀤𑀁. 𑀇𑀢𑁆𑀣𑀺𑀮𑀺𑀗𑁆𑀕𑁂 𑀆𑀓𑀸𑀭𑁄 𑀖𑀲𑀜𑁆𑀜𑁄 𑀳𑁄𑀢𑀺.

𑁧𑁨. 𑀕𑁄 𑀲𑁆𑀬𑀸𑀮𑀧𑀦𑁂 [𑀓. 𑁫𑁭; 𑀭𑀽. 𑁭𑁧; 𑀦𑀻. 𑁨𑁧𑁪].

𑀆𑀮𑀧𑀦𑁂 𑀲𑀺 𑀕𑀲𑀜𑁆𑀜𑁄 𑀳𑁄𑀢𑀺.

𑀮𑀳𑀼𑀲𑀜𑁆𑀜𑀸𑀭𑀸𑀲𑀺 𑀦𑀺𑀝𑁆𑀞𑀺𑀢𑁄.

𑀲𑀗𑁆𑀓𑁂𑀢𑀭𑀸𑀲𑀺

𑁧𑁩. 𑀯𑀺𑀥𑀺 𑀯𑀺𑀲𑁂𑀲𑀦𑀁 𑀬𑀁 𑀢𑀲𑁆𑀲 [𑀘𑀁. 𑁧.𑁧.𑁬; 𑀧𑀸. 𑁧.𑁧.𑁭𑁨; 𑀯𑀺𑀥𑀺𑀩𑁆𑀩𑀺𑀲𑁂𑀲𑀦𑀦𑁆𑀢𑀲𑁆𑀲 (𑀩𑀳𑀽𑀲𑀼)].

𑀲𑀼𑀢𑁆𑀢𑁂 𑀬𑀁 𑀯𑀺𑀲𑁂𑀲𑀦𑀁 𑀤𑀺𑀲𑁆𑀲𑀢𑀺, 𑀢𑀲𑁆𑀲 𑀯𑀺𑀥𑀺 𑀜𑀸𑀢𑀩𑁆𑀩𑁄.

‘𑀅𑀢𑁄 𑀬𑁄𑀦𑀁 𑀝𑀸𑀝𑁂’. 𑀦𑀭𑀸, 𑀦𑀭𑁂. 𑀬𑁄𑀦𑀦𑁆𑀢𑀺 𑀯𑀺𑀲𑁂𑀲𑀦𑀁. 𑀝𑀸𑀝𑁂𑀢𑀺 𑀯𑀺𑀥𑀺.

𑁧𑁪. 𑀲𑀢𑁆𑀢𑀫𑀺𑀬𑀁 𑀧𑀼𑀩𑁆𑀩𑀲𑁆𑀲 [𑀭𑀽. 𑁮 (𑀧𑀺𑀝𑁆𑀞𑁂); 𑀘𑀁. 𑁧.𑁧.𑁭; 𑀧𑀸. 𑁧.𑁧.𑁬𑁬].

𑀲𑀢𑁆𑀢𑀫𑀻𑀦𑀺𑀤𑁆𑀤𑁂𑀲𑁂 𑀧𑀼𑀩𑁆𑀩𑀯𑀡𑁆𑀡𑀲𑁆𑀲𑁂𑀯 𑀯𑀺𑀥𑀺 𑀜𑀸𑀢𑀩𑁆𑀩𑁄.

‘𑀲𑀭𑁄 𑀮𑁄𑀧𑁄 𑀲𑀭𑁂’. 𑀮𑁄𑀓𑀕𑁆𑀕𑁄 [𑀅𑀧. 𑀣𑁂𑀭 𑁧.𑁧𑁨.𑁫𑁭].

𑁧𑁫. 𑀧𑀜𑁆𑀘𑀫𑀺𑀬𑀁 𑀧𑀭𑀲𑁆𑀲 [𑀘𑀁. 𑁧.𑁧.𑁮; 𑀧𑀸. 𑁧.𑁧.𑁬𑁭].

𑀧𑀜𑁆𑀘𑀫𑀻𑀦𑀺𑀤𑁆𑀤𑁂𑀲𑁂 𑀧𑀭𑀲𑁆𑀲𑁂𑀯 𑀯𑀺𑀥𑀺 𑀜𑀸𑀢𑀩𑁆𑀩𑁄.

‘𑀅𑀢𑁄 𑀬𑁄𑀦𑀁 𑀝𑀸𑀝𑁂’. 𑀦𑀭𑀸, 𑀦𑀭𑁂.

𑁧𑁬. 𑀆𑀤𑀺𑀲𑁆𑀲 [𑀘𑀁. 𑁧.𑁧.𑁯; 𑀧𑀸. 𑁧.𑁧.𑁫𑁪].

𑀧𑀭𑀲𑁆𑀲 𑀲𑀺𑀲𑁆𑀲𑀫𑀸𑀦𑁄 [𑀤𑀺𑀲𑁆𑀲𑀫𑀸𑀦𑁄 (𑀫𑀽)] 𑀯𑀺𑀥𑀺 𑀆𑀤𑀺𑀯𑀡𑁆𑀡𑀲𑁆𑀲 𑀜𑀸𑀢𑀩𑁆𑀩𑁄.

‘𑀭 𑀲𑀗𑁆𑀔𑁆𑀬𑀸𑀢𑁄 𑀯𑀸’. 𑀢𑁂𑀭𑀲.

𑁧𑁭. 𑀙𑀝𑁆𑀞𑀺𑀬𑀦𑁆𑀢𑀲𑁆𑀲 [𑀘𑀁. 𑁧.𑁧.𑁧𑁦; 𑀧𑀸. 𑁧.𑁧.𑁫𑁨].

𑀙𑀝𑁆𑀞𑀻𑀦𑀺𑀤𑁆𑀤𑁂𑀲𑁂 𑀢𑀤𑀦𑁆𑀢𑀲𑁆𑀲 𑀯𑀺𑀥𑀺 𑀜𑀸𑀢𑀩𑁆𑀩𑁄.

‘𑀭𑀸𑀚𑀲𑁆𑀲𑀺 𑀦𑀸𑀫𑁆𑀳𑀺’. 𑀭𑀸𑀚𑀺𑀦𑀸.

𑁧𑁮. 𑀗𑀸𑀦𑀼𑀩𑀦𑁆𑀥𑁄 [𑀘𑀁. 𑁧.𑁧.𑁧𑁧; 𑀧𑀸. 𑁧.𑁧.𑁫𑁩].

𑀗𑀸𑀦𑀼𑀩𑀦𑁆𑀥𑁄 𑀆𑀤𑁂𑀲𑁄 𑀙𑀝𑁆𑀞𑀻𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀅𑀦𑁆𑀢𑀲𑁆𑀲 𑀜𑀸𑀢𑀩𑁆𑀩𑁄.

‘𑀕𑁄𑀲𑁆𑀲𑀸𑀯𑀗’. 𑀕𑀯𑀲𑁆𑀲𑀁.

𑁧𑁯. 𑀝𑀸𑀦𑀼𑀩𑀦𑁆𑀥𑁄𑀦𑁂𑀓𑀯𑀡𑁆𑀡𑁄 𑀲𑀩𑁆𑀩𑀲𑁆𑀲 [𑀘𑀁. 𑁧.𑁧.𑁧𑁨; 𑀧𑀸. 𑁧.𑁧.𑁫𑁫; 𑀝𑀸𑀦𑀼𑀩𑀦𑁆𑀥𑀸𑀦𑁂𑀓𑀯𑀡𑁆𑀡𑀸 𑀲𑀩𑁆𑀩𑀲𑁆𑀲 (𑀩𑀳𑀽𑀲𑀼)].

𑀬𑁄 𑀘 𑀝𑀸𑀦𑀼𑀩𑀦𑁆𑀥𑁄 𑀆𑀤𑁂𑀲𑁄, 𑀬𑁄 𑀘 𑀅𑀦𑁂𑀓𑀯𑀡𑁆𑀡𑁄 𑀆𑀤𑁂𑀲𑁄, 𑀢𑀤𑀼𑀪𑀬𑀁 𑀙𑀝𑁆𑀞𑀻𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 𑀯𑀡𑁆𑀡𑀲𑀫𑀼𑀤𑀸𑀬𑀲𑁆𑀲 𑀜𑀸𑀢𑀩𑁆𑀩𑀁.

𑀝𑀸𑀦𑀼𑀩𑀦𑁆𑀥𑁂 𑀢𑀸𑀯 𑁋

‘𑀇𑀫𑀲𑁆𑀲𑀸𑀦𑀺𑀢𑁆𑀣𑀺𑀬𑀁 𑀝𑁂’. 𑀏𑀲𑀼.

𑀅𑀦𑁂𑀓𑀯𑀡𑁆𑀡𑁂 𑁋

‘𑀅𑀦𑀺𑀫𑀺 𑀦𑀸𑀫𑁆𑀳𑀺’. 𑀅𑀦𑁂𑀦, 𑀇𑀫𑀺𑀦𑀸.

𑁨𑁦. 𑀜𑀓𑀸𑀦𑀼𑀩𑀦𑁆𑀥𑀸 𑀆𑀤𑁆𑀬𑀦𑁆𑀢𑀸 [𑀘𑀁. 𑁧.𑁧.𑁧𑁩; 𑀧𑀸. 𑁧.𑁧.𑁪𑁬].

𑀜𑀸𑀦𑀼𑀩𑀦𑁆𑀥𑁄 𑀆𑀕𑀫𑁄 𑀘 𑀓𑀸𑀦𑀼𑀩𑀦𑁆𑀥𑁄 𑀆𑀕𑀫𑁄 𑀘 𑀓𑀫𑁂𑀦 𑀙𑀝𑁆𑀞𑀻𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀆𑀤𑀺𑀫𑁆𑀳𑀺 𑀘 𑀅𑀦𑁆𑀢𑁂 𑀘 𑀜𑀸𑀢𑀩𑁆𑀩𑁄.

𑀜𑀸𑀦𑀼𑀩𑀦𑁆𑀥𑁂 𑁋

‘𑀩𑁆𑀭𑀽𑀢𑁄 𑀢𑀺𑀲𑁆𑀲𑀺𑀜’. 𑀩𑁆𑀭𑀯𑀺𑀢𑀺.

𑀓𑀸𑀦𑀼𑀩𑀦𑁆𑀥𑁂 𑁋

‘𑀪𑀽𑀲𑁆𑀲 𑀯𑀼𑀓’. 𑀩𑀪𑀼𑀯.

𑁨𑁧. 𑀫𑀸𑀦𑀼𑀩𑀦𑁆𑀥𑁄 𑀲𑀭𑀸𑀦𑀫𑀦𑁆𑀢𑀸 𑀧𑀭𑁄 [𑀘𑀁. 𑁧.𑁧.𑁧𑁪; 𑀧𑀸. 𑁧.𑁧.𑁪𑁭].

𑀫𑀸𑀦𑀼𑀩𑀦𑁆𑀥𑁄 𑀆𑀕𑀫𑁄 𑀲𑀭𑀸𑀦𑀁 𑀅𑀦𑁆𑀢𑀲𑀭𑀫𑁆𑀳𑀸 𑀧𑀭𑁄 𑀳𑁄𑀢𑀺.

‘𑀦𑀚𑁆𑀚𑀸𑀬𑁄 𑀲𑁆𑀯𑀸𑀫’. 𑀦𑀚𑁆𑀚𑀸𑀬𑁄 𑀲𑀦𑁆𑀤𑀦𑁆𑀢𑀺. ‘𑀫𑀁 𑀯𑀸 𑀭𑀼𑀥𑀸𑀤𑀻𑀦𑀁’. 𑀭𑀼𑀦𑁆𑀥𑀢𑀺. ‘𑀚𑀭 𑀲𑀤𑀸𑀦𑀫𑀻𑀫 𑀯𑀸’. 𑀚𑀻𑀭𑀢𑀺, 𑀲𑀻𑀤𑀢𑀺.

𑀇𑀫𑀲𑁆𑀫𑀺𑀁 𑀩𑁆𑀬𑀸𑀓𑀭𑀡𑁂 𑀅𑀦𑁂𑀓𑀲𑀭𑀢𑀸 𑀦𑀸𑀫 𑀦𑀤𑀻, 𑀧𑀼𑀭𑀺𑀲 𑀇𑀘𑁆𑀘𑀸𑀤𑀻𑀲𑀼 𑀮𑀺𑀗𑁆𑀕𑀧𑀤𑁂𑀲𑀼 𑀏𑀯 𑀅𑀢𑁆𑀣𑀺, 𑀕𑀫𑀼, 𑀧𑀘𑀇𑀘𑁆𑀘𑀸𑀤𑀻𑀲𑀼 𑀥𑀸𑀢𑀼𑀧𑀤𑁂𑀲𑀼 𑀦𑀢𑁆𑀣𑀺. 𑀲𑀩𑁆𑀩𑀥𑀸𑀢𑀼𑀬𑁄 𑀩𑁆𑀬𑀜𑁆𑀚𑀦𑀦𑁆𑀢𑀸 𑀏𑀯 𑀳𑁄𑀦𑁆𑀢𑀺, 𑀥𑀸𑀢𑁆𑀯𑀦𑁆𑀢𑀮𑁄𑀧𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀦𑀚𑁆𑀚𑀸𑀬𑁄𑀢𑀺 𑀏𑀢𑁆𑀣 𑀈-𑀓𑀸𑀭𑁄 𑀅𑀦𑁆𑀢𑀲𑀭𑁄 𑀦𑀸𑀫. 𑀢𑀢𑁄 ‘𑀦𑀚𑁆𑀚𑀸𑀬𑁄 𑀲𑁆𑀯𑀸𑀫’ 𑀇𑀢𑀺 𑀲𑀼𑀢𑁆𑀢𑁂𑀦 𑀆-𑀓𑀸𑀭𑀸𑀕𑀫𑁄. 𑀭𑀼𑀦𑁆𑀥𑀢𑀻𑀢𑀺 𑀏𑀢𑁆𑀣 𑀧𑀦 𑀉-𑀓𑀸𑀭𑁄 𑀅𑀦𑁆𑀢𑀲𑀭𑁄 𑀦𑀸𑀫, 𑀢𑀢𑁄 ‘‘𑀫𑀁 𑀯𑀸 𑀭𑀼𑀥𑀸𑀤𑀻𑀦’’𑀦𑁆𑀢𑀺 𑀲𑀼𑀢𑁆𑀢𑁂𑀦 𑀩𑀺𑀦𑁆𑀤𑀸𑀕𑀫𑁄. 𑀏𑀯𑀁 𑀚𑀻𑀭𑀢𑀺, 𑀲𑀻𑀤𑀢𑀺 𑀇𑀘𑁆𑀘𑀸𑀤𑀻𑀲𑀼. 𑀫𑁆𑀭𑀫𑁆𑀫𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀫𑀸𑀦𑀼𑀩𑀦𑁆𑀥𑁄 𑀧𑀤𑀸𑀦𑀫𑀦𑁆𑀢𑀸 𑀧𑀭𑁄’’𑀢𑀺 𑀧𑀸𑀞𑁄, 𑀲𑁄 𑀲𑀻𑀳𑀴𑀧𑁄𑀢𑁆𑀣𑀓𑁂𑀳𑀺 𑀦 𑀲𑀫𑁂𑀢𑀺.

𑁨𑁨. 𑀯𑀺𑀧𑁆𑀧𑀝𑀺𑀲𑁂𑀥𑁂 [𑀘𑀁. 𑁧.𑁧.𑁧𑁬; 𑀧𑀸. 𑁧.𑁪.𑁨].

𑀲𑀫𑀸𑀦𑀯𑀺𑀲𑀬𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀺𑀥𑀻𑀦𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀲𑁂𑀥𑀭𑀳𑀺𑀢𑁂 𑀞𑀸𑀦𑁂 𑀬𑁂𑀪𑀼𑀬𑁆𑀬𑁂𑀦 𑀧𑀭𑁄 𑀯𑀺𑀥𑀺 𑀑𑀓𑀸𑀲𑀁 𑀮𑀪𑀢𑀺.

𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸 [𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂] -𑀏𑀢𑁆𑀣 𑀘𑀢𑁆𑀢𑀸𑀭𑀺𑀫𑁂𑀢𑀺 𑀧𑀼𑀩𑁆𑀩𑀮𑁄𑀧𑁂 𑀲𑀫𑁆𑀧𑀢𑁆𑀢𑁂 𑀧𑀭𑀮𑁄𑀧𑁄 𑀑𑀓𑀸𑀲𑀁 𑀮𑀪𑀢𑀺.

𑁨𑁩. 𑀲𑀗𑁆𑀓𑁂𑀢𑁄 𑀦𑀸𑀯𑀬𑀯𑁄𑀦𑀼𑀩𑀦𑁆𑀥𑁄 [𑀘𑀁. 𑁧.𑁧.𑁫].

𑀬𑁄 𑀯𑀡𑁆𑀡𑁄 𑀧𑀬𑁄𑀕𑀲𑁆𑀲 𑀅𑀯𑀬𑀯𑁄 𑀦 𑀳𑁄𑀢𑀺, 𑀲𑀼𑀢𑁆𑀢𑁂𑀲𑀼 𑀲𑀗𑁆𑀓𑁂𑀢𑀫𑀢𑁆𑀢𑁄 𑀳𑁄𑀢𑀺, 𑀲𑁄 𑀅𑀦𑀼𑀩𑀦𑁆𑀥𑁄 𑀦𑀸𑀫.

‘𑀕𑁄𑀲𑁆𑀲𑀸𑀯’. 𑀕𑀯𑀲𑁆𑀲𑀁-𑀏𑀢𑁂𑀦 𑀧𑀤𑀭𑀽𑀧𑀯𑀺𑀥𑀸𑀦𑁂 𑀅𑀦𑀼𑀩𑀦𑁆𑀥𑁄 𑀉𑀧𑀬𑁄𑀕𑀁 𑀦 𑀕𑀘𑁆𑀙𑀢𑀻𑀢𑀺 𑀜𑀸𑀧𑁂𑀢𑀺.

𑁨𑁪. 𑀯𑀡𑁆𑀡𑀧𑀭𑁂𑀦 𑀲𑀯𑀡𑁆𑀡𑁄𑀧𑀺.

𑀯𑀡𑁆𑀡𑀲𑀤𑁆𑀤𑁄 𑀧𑀭𑁄 𑀏𑀢𑀲𑁆𑀫𑀸𑀢𑀺 𑀯𑀡𑁆𑀡𑀧𑀭𑁄, 𑀯𑀡𑁆𑀡𑀧𑀭𑁂𑀦 𑀭𑀲𑁆𑀲𑀲𑀭𑁂𑀦 𑀲𑀯𑀡𑁆𑀡𑁄𑀧𑀺 𑀕𑀬𑁆𑀳𑀢𑀺 𑀲𑀬𑀜𑁆𑀘, 𑀅𑀯𑀡𑁆𑀡𑁄𑀢𑀺 𑀯𑀼𑀢𑁆𑀢𑁂 𑀆-𑀓𑀸𑀭𑁄𑀧𑀺 𑀕𑀬𑁆𑀳𑀢𑀺 𑀅-𑀓𑀸𑀭𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀇𑀯𑀡𑁆𑀡𑀼𑀯𑀡𑁆𑀡𑁂𑀲𑀼.

𑁨𑁫. 𑀦𑁆𑀢𑀼𑀯𑀦𑁆𑀢𑀼𑀫𑀦𑁆𑀢𑀸𑀯𑀦𑁆𑀢𑀼𑀢𑀯𑀦𑁆𑀢𑀼𑀲𑀫𑁆𑀩𑀦𑁆𑀥𑀻 [𑀦𑁆𑀢𑀼 𑀯𑀦𑁆𑀢𑀼𑀫𑀦𑁆𑀢𑁆𑀯𑀸𑀯𑀦𑁆𑀢𑀼𑀢𑀯𑀦𑁆𑀢𑀼 𑀲𑀫𑁆𑀩𑀦𑁆𑀥𑀻 (𑀩𑀳𑀽𑀲𑀼)].

𑀦𑁆𑀢𑀼𑀇𑀢𑀺 𑀯𑀼𑀢𑁆𑀢𑁂 𑀯𑀦𑁆𑀢𑀼, 𑀫𑀦𑁆𑀢𑀼, 𑀆𑀯𑀦𑁆𑀢𑀼, 𑀢𑀯𑀦𑁆𑀢𑀽𑀦𑀁 𑀲𑀫𑁆𑀩𑀦𑁆𑀥𑀻𑀪𑀽𑀢𑁄 𑀦𑁆𑀢𑀼𑀓𑀸𑀭𑁄 𑀕𑀬𑁆𑀳𑀢𑀺.

‘𑀦𑁆𑀢𑀦𑁆𑀢𑀽𑀦𑀁 𑀦𑁆𑀢𑁄 𑀬𑁄𑀫𑁆𑀳𑀺 𑀧𑀞𑀫𑁂’. 𑀕𑀼𑀡𑀯𑀦𑁆𑀢𑁄, 𑀲𑀢𑀺𑀫𑀦𑁆𑀢𑁄, 𑀬𑀸𑀯𑀦𑁆𑀢𑁄, 𑀪𑀼𑀢𑁆𑀢𑀯𑀦𑁆𑀢𑁄.

𑀲𑀗𑁆𑀓𑁂𑀢𑀭𑀸𑀲𑀺 𑀦𑀺𑀝𑁆𑀞𑀺𑀢𑁄.

𑀲𑀦𑁆𑀥𑀺𑀯𑀺𑀥𑀸𑀦

𑀅𑀣 𑀲𑀦𑁆𑀥𑀺𑀯𑀺𑀥𑀸𑀦𑀁 𑀤𑀻𑀧𑀺𑀬𑀢𑁂.

𑀮𑁄𑀧𑁄, 𑀤𑀻𑀖𑁄, 𑀭𑀲𑁆𑀲𑁄, 𑀯𑀼𑀤𑁆𑀥𑀺, 𑀆𑀤𑁂𑀲𑁄, 𑀆𑀕𑀫𑁄, 𑀤𑁆𑀯𑀺𑀪𑀸𑀯𑁄, 𑀯𑀺𑀧𑀮𑁆𑀮𑀸𑀲𑁄.

𑀮𑁄𑀧𑀭𑀸𑀲𑀺

𑁨𑁬. 𑀲𑀭𑁄 𑀮𑁄𑀧𑁄 𑀲𑀭𑁂 [𑀓. 𑁧𑁨; 𑀭𑀽. 𑁧𑁩; 𑀦𑀻. 𑁩𑁦].

𑀮𑀼𑀧𑁆𑀧𑀢𑀻𑀢𑀺 𑀮𑁄𑀧𑁄. 𑀲𑀭𑁂 𑀧𑀭𑁂 𑀲𑀭𑀽𑀧𑁄 𑀯𑀸 𑀅𑀲𑀭𑀽𑀧𑁄 𑀯𑀸 𑀧𑀼𑀩𑁆𑀩𑁄 𑀲𑀭𑁄 𑀮𑁄𑀧𑁄 𑀳𑁄𑀢𑀺.

𑀲𑀭𑀽𑀧𑁂 𑀢𑀸𑀯 𑁋

𑀅𑀯𑀡𑁆𑀡𑁂-𑀮𑁄𑀓𑀕𑁆𑀕𑁄 [𑀅𑀧. 𑀣𑁂𑀭 𑁧.𑁧𑁨.𑁫𑁭], 𑀪𑀯𑀸𑀲𑀯𑁄, [𑀥. 𑀲. 𑁧𑁧𑁦𑁨] 𑀅𑀯𑀺𑀚𑁆𑀚𑀸𑀲𑀯𑁄 [𑀥. 𑀲. 𑁧𑁧𑁦𑁨], 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 [𑀯𑀺𑀪. 𑁯𑁪𑁯].

𑀇𑀯𑀡𑁆𑀡𑁂-𑀫𑀼𑀦𑀺𑀦𑁆𑀤𑁄, 𑀫𑀼𑀦𑀻𑀭𑀺𑀢𑁄, 𑀯𑀭𑀯𑀸𑀤𑀻𑀭𑀺𑀢𑁄, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 [𑀯𑀺𑀪. 𑁨𑁧𑁯].

𑀉𑀯𑀡𑁆𑀡𑁂-𑀩𑀳𑀽𑀧𑀓𑀸𑀭𑁄 [𑀚𑀸. 𑁧.𑁨𑁨.𑁫𑁮𑁮], 𑀩𑀳𑀼𑀓𑀸 𑀊𑀫𑀺 𑀩𑀳𑀽𑀫𑀺, 𑀲𑀭𑀪𑀼𑀬𑀸 𑀊𑀫𑀺 𑀲𑀭𑀪𑀽𑀫𑀺, 𑀲𑀭𑀪𑀼𑀬𑀸 𑀉𑀤𑀓𑀁 𑀲𑀭𑀪𑀽𑀤𑀓𑀁.

𑀅𑀲𑀭𑀽𑀧𑁂 𑁋

𑀲𑁄𑀢𑀺𑀦𑁆𑀤𑁆𑀭𑀺𑀬𑀁 [𑀯𑀺𑀪. 𑁨𑁧𑁯], 𑀓𑀸𑀫𑀼𑀧𑀸𑀤𑀸𑀦𑀁, 𑀪𑀯𑁂𑀲𑀦𑀸 [𑀤𑀻. 𑀦𑀺. 𑁩.𑁩𑁦𑁫], 𑀪𑀯𑁄𑀖𑁄 [𑀥. 𑀲. 𑁧𑁧𑁫𑁬], 𑀲𑁄 𑀢𑀼𑀡𑁆𑀳𑀲𑁆𑀲 [𑀧𑀸𑀭𑀸. 𑁩𑁮𑁧], 𑀤𑀺𑀝𑁆𑀞𑀸𑀦𑀼𑀲𑀬𑁄 [𑀯𑀺𑀪. 𑁯𑁪𑁯], 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀤𑀺𑀝𑁆𑀞𑁂𑀓𑀝𑁆𑀞𑀁, 𑀤𑀺𑀝𑁆𑀞𑁄𑀖𑁄 [𑀥. 𑀲. 𑁧𑁧𑁫𑁬], 𑀫𑀼𑀤𑀺𑀦𑁆𑀤𑁆𑀭𑀺𑀬𑀁 [𑀫𑀳𑀸𑀯. 𑁯], 𑀧𑀼𑀢𑁆𑀢𑀸 𑀫𑀢𑁆𑀣𑀺 [𑀥. 𑀧. 𑁬𑁨], 𑀉𑀭𑀲𑁆𑀲 𑀤𑀼𑀓𑁆𑀔𑁄 [𑀧𑀸𑀘𑀺. 𑁪𑁦𑁨], 𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺 [𑀥. 𑀧. 𑁩𑁦𑁪] 𑀇𑀘𑁆𑀘𑀸𑀤𑀺.

𑀇𑀢𑀺 𑀧𑀼𑀩𑁆𑀩𑀮𑁄𑀧𑀭𑀸𑀲𑀺.

𑁨𑁭. 𑀧𑀭𑁄 𑀓𑁆𑀯𑀘𑀺 [𑀓. 𑁧𑁩; 𑀭𑀽. 𑁧𑁫; 𑀦𑀻. 𑁩𑁧].

𑀧𑀼𑀩𑁆𑀩𑀲𑀭𑀫𑁆𑀳𑀸 𑀲𑀭𑀽𑀧𑁄 𑀯𑀸 𑀅𑀲𑀭𑀽𑀧𑁄 𑀯𑀸 𑀧𑀭𑁄 𑀲𑀭𑁄 𑀓𑁆𑀯𑀘𑀺 𑀮𑁄𑀧𑁄 𑀳𑁄𑀢𑀺.

𑀲𑀭𑀽𑀧𑁂 𑀢𑀸𑀯 𑁋

𑀢𑀁 𑀓𑀤𑀸𑀲𑁆𑀲𑀼 𑀪𑀯𑀺𑀲𑁆𑀲𑀢𑀺 [𑀚𑀸. 𑁨.𑁨𑁨.𑁧𑁪𑁪 𑀆𑀤𑀬𑁄; 𑀢𑀁 𑀓𑀼𑀤𑀲𑁆𑀲𑀼], 𑀓𑀼𑀤𑀸𑀲𑁆𑀲𑀼 𑀦𑀸𑀫 𑀤𑀼𑀫𑁆𑀫𑁂𑀥𑁄, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀺 [𑀥. 𑀧. 𑁩𑁭𑁬], 𑀬𑀤𑀸𑀲𑁆𑀲 𑀲𑀻𑀮𑀁 𑀧𑀜𑁆𑀜𑀜𑁆𑀘 [𑀚𑀸. 𑁨.𑁨𑁨.𑁧𑁪𑁭𑁪], 𑀢𑀤𑀸𑀲𑁆𑀲𑀼 𑀓𑀡𑁆𑀳𑀁 𑀬𑀼𑀜𑁆𑀚𑀦𑁆𑀢𑀺 [𑀚𑀸. 𑁧.𑁧.𑁨𑁯] -𑀓𑀡𑁆𑀳𑀦𑁆𑀢𑀺 𑀫𑀳𑀸𑀓𑀡𑁆𑀳𑀕𑁄𑀡𑀁, 𑀢𑀡𑁆𑀳𑀸𑀲𑁆𑀲 𑀯𑀺𑀧𑁆𑀧𑀳𑀻𑀦𑀸, 𑀫𑀸𑀲𑁆𑀲𑀼 𑀓𑀼𑀚𑁆𑀛 𑀭𑀣𑁂𑀲𑀪, 𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬 [𑀧𑀸𑀭𑀸. 𑁧𑁬𑁭, 𑁧𑁭𑁧], 𑀆𑀕𑀢𑀸𑀢𑁆𑀣 𑀢𑀼𑀫𑁆𑀳𑁂, 𑀲𑁄𑀢𑀼𑀓𑀸𑀫𑀸𑀢𑁆𑀣 𑀢𑀼𑀫𑁆𑀳𑁂, 𑀫𑀸𑀬𑁆𑀬𑁄 𑀏𑀯𑀭𑀽𑀧𑀫𑀓𑀸𑀲𑀺, 𑀧𑀧𑀁 𑀅𑀯𑀺𑀦𑁆𑀤𑀼𑀁 [𑀚𑀸. 𑁧.𑁧.𑁨] -𑀧𑀯𑀟𑁆𑀠𑀁 𑀆𑀧𑀁 𑀮𑀪𑀺𑀁𑀲𑀽𑀢𑁆𑀬𑀢𑁆𑀣𑁄, 𑀦𑀸𑀮𑀁 𑀓𑀩𑀴𑀁 𑀧𑀤𑀸𑀢𑀯𑁂 [𑀚𑀸. 𑁧.𑁧.𑁨𑁭] -𑀧+𑀆𑀤𑀸𑀢𑀯𑁂𑀢𑀺 𑀙𑁂𑀤𑁄, 𑀕𑀡𑁆𑀳𑀺𑀢𑀼𑀦𑁆𑀢𑀢𑁆𑀣𑁄, 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀁, 𑀩𑀼𑀚𑁆𑀛𑀢𑀻𑀢𑀺 𑀩𑀼𑀤𑁆𑀥𑁄-𑀤𑀻𑀖𑁄, 𑀅𑀕𑁆𑀕𑀻𑀯 𑀢𑀧𑁆𑀧𑀢𑀺, 𑀇𑀢𑁆𑀣𑀻𑀯 𑀕𑀘𑁆𑀙𑀢𑀺, 𑀦𑀤𑀻𑀯 𑀲𑀦𑁆𑀤𑀢𑀺, 𑀫𑀸𑀢𑀼𑀧𑀝𑁆𑀞𑀸𑀦𑀁, 𑀧𑀺𑀢𑀼𑀧𑀝𑁆𑀞𑀸𑀦𑀁, 𑀬𑁂𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 [𑀘𑀽𑀴𑀯. 𑁩𑁯𑁯] 𑀇𑀘𑁆𑀘𑀸𑀤𑀺.

𑀅𑀲𑀭𑀽𑀧𑁂 𑁋

𑀇𑀢𑀺𑀲𑁆𑀲 [𑀧𑀸𑀘𑀺. 𑁪𑁬𑁫], 𑀇𑀢𑀺𑀧𑀺 [𑀧𑀸𑀭𑀸. 𑁧], 𑀅𑀲𑁆𑀲𑀫𑀡𑀻𑀲𑀺 [𑀧𑀸𑀭𑀸. 𑁧𑁩𑁫], 𑀅𑀓𑀢𑀜𑁆𑀜𑀽𑀲𑀺 [𑀥. 𑀧. 𑁩𑁮𑁩], 𑀯𑀦𑁆𑀤𑁂𑀳𑀁, 𑀲𑁄𑀳𑀁, 𑀬𑀲𑁆𑀲𑀤𑀸𑀦𑀺 [𑀫𑀳𑀸𑀯. 𑁨𑁪𑁨], 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻 [𑀥. 𑀧. 𑁨], 𑀫𑀸𑀤𑀺𑀲𑁂𑀲𑀼 𑀓𑀣𑀸𑀯 𑀓𑀸, 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄 𑀫𑀥𑀼𑀯𑀸 𑀫𑀜𑁆𑀜𑀢𑀺 𑀩𑀸𑀮𑁄 [𑀥. 𑀧. 𑁬𑁯], 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 [𑀯𑀺𑀪. 𑁨𑁧𑁯], 𑀤𑁆𑀯𑁂𑀫𑁂 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸 [𑀅. 𑀦𑀺. 𑁨.𑁩], 𑀢𑀬𑁄𑀫𑁂 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸 [𑀅. 𑀦𑀺. 𑁩.𑁧𑁭] 𑀇𑀘𑁆𑀘𑀸𑀤𑀺.

𑀓𑁆𑀯𑀘𑀻𑀢𑀺 𑀓𑀺𑀁? 𑀓𑀢𑀫𑀸 𑀘𑀸𑀦𑀦𑁆𑀤 𑀅𑀦𑀺𑀘𑁆𑀘𑀲𑀜𑁆𑀜𑀸 [𑀅. 𑀦𑀺. 𑁧𑁦.𑁬𑁦].

𑀇𑀢𑀺 𑀧𑀭𑀮𑁄𑀧𑀭𑀸𑀲𑀺.

𑁨𑁮. 𑀦 𑀤𑁆𑀯𑁂 𑀯𑀸.

𑀤𑁆𑀯𑁂 𑀧𑀼𑀩𑁆𑀩𑀧𑀭𑀲𑀭𑀸 𑀓𑁆𑀯𑀘𑀺 𑀮𑁄𑀧𑀸 𑀦 𑀳𑁄𑀦𑁆𑀢𑀺 𑀯𑀸.

𑀅𑀧𑁆𑀧𑀫𑀸𑀤𑁄 𑀅𑀫𑀢𑀁 𑀧𑀤𑀁 [𑀥. 𑀧. 𑁨𑁧], 𑀓𑁄 𑀇𑀫𑀁 𑀧𑀣𑀯𑀺𑀁𑀯𑀺𑀘𑁂𑀲𑁆𑀲𑀢𑀺 [𑀥. 𑀧. 𑁪𑁪].

𑀓𑁆𑀯𑀘𑀺𑀢𑁆𑀯𑁂𑀯? 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 [𑀯𑀺𑀪. 𑁨𑁧𑁯], 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 [𑀯𑀺𑀪. 𑁨𑁧𑁯],

𑀯𑀸𑀢𑀺 𑀓𑀺𑀁? 𑀓𑁄𑀫𑀁 𑀯𑀲𑀮𑀺𑀁 𑀧𑀭𑀸𑀫𑀲𑀺𑀲𑁆𑀲𑀢𑀺.

𑀇𑀢𑁄 𑀧𑀝𑁆𑀞𑀸𑀬 𑀬𑀸𑀯𑀲𑀦𑁆𑀥𑀺𑀓𑀡𑁆𑀟𑀸𑀯𑀲𑀸𑀦𑀸 𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀲𑀩𑁆𑀩𑀢𑁆𑀣 𑀓𑁆𑀯𑀘𑀺𑀲𑀤𑁆𑀤𑁄, 𑀯𑀸𑀲𑀤𑁆𑀤𑁄 𑀘 𑀯𑀢𑁆𑀢𑀦𑁆𑀢𑁂. 𑀢𑀢𑁆𑀣 𑀓𑁆𑀯𑀘𑀺𑀲𑀤𑁆𑀤𑁄 𑀦𑀸𑀦𑀸𑀧𑀬𑁄𑀕𑀁 𑀤𑀲𑁆𑀲𑁂𑀢𑀺. 𑀯𑀸𑀲𑀤𑁆𑀤𑁄 𑀏𑀓𑀧𑀬𑁄𑀕𑀲𑁆𑀲 𑀦𑀸𑀦𑀸𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀮𑁄𑀧𑀦𑀺𑀲𑁂𑀥𑁄.

𑁨𑁯. 𑀧𑀭𑀲𑀭𑀲𑁆𑀲.

𑀦𑀺𑀕𑁆𑀕𑀳𑀻𑀢𑀫𑁆𑀳𑀸 𑀧𑀭𑀲𑀭𑀲𑁆𑀲 𑀓𑁆𑀯𑀘𑀺 𑀮𑁄𑀧𑁄 𑀳𑁄𑀢𑀺 𑀯𑀸.

𑀢𑁆𑀯𑀁𑀲𑀺 [𑀧𑁂. 𑀯. 𑁪𑁭; 𑀚𑀸. 𑁨.𑁨𑁨.𑁭𑁬𑁪], 𑀘𑀦𑁆𑀤𑀁𑀯 𑀯𑀺𑀫𑀮𑀁 𑀲𑀼𑀤𑁆𑀥𑀁 [𑀥. 𑀧. 𑁪𑁧𑁩; 𑀲𑀼. 𑀦𑀺. 𑁬𑁪𑁨], 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤𑀁 [𑀥. 𑀧. 𑁧], 𑀳𑀮𑀁𑀤𑀸𑀦𑀺 𑀧𑀓𑀸𑀲𑀺𑀢𑀼𑀁 [𑀫𑀳𑀸𑀯. 𑁮], 𑀓𑀺𑀦𑁆𑀢𑀺 𑀯𑀤𑁂𑀬𑁆𑀬𑀁, 𑀘𑀻𑀯𑀭𑀦𑁆𑀢𑀺, 𑀧𑀢𑁆𑀢𑀦𑁆𑀢𑀺, 𑀪𑀺𑀓𑁆𑀔𑀼𑀦𑁆𑀢𑀺.

𑀇𑀢𑀺 𑀲𑀭𑀮𑁄𑀧𑀭𑀸𑀲𑀺.

𑁩𑁦. 𑀲𑀁𑀬𑁄𑀕𑀸𑀤𑀺 𑀮𑁄𑀧𑁄.

𑀲𑀁𑀬𑁄𑀕𑀲𑁆𑀲 𑀆𑀤𑀺𑀪𑀽𑀢𑁄 𑀩𑁆𑀬𑀜𑁆𑀚𑀦𑁄 𑀓𑁆𑀯𑀘𑀺 𑀮𑁄𑀧𑁄 𑀳𑁄𑀢𑀺 𑀯𑀸.

𑀧𑀼𑀧𑁆𑀨𑀁𑀲𑀸 𑀉𑀧𑁆𑀧𑀚𑁆𑀚𑀢𑀺 [𑀧𑀸𑀭𑀸. 𑁩𑁬] 𑁋 𑀇𑀥 𑀧𑀼𑀩𑁆𑀩𑀲𑀼𑀢𑁆𑀢𑁂𑀦 𑀲𑀭𑀮𑁄𑀧𑁄, 𑀏𑀯𑀁𑀲 𑀢𑁂 𑀆𑀲𑀯𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺 [𑀫. 𑀦𑀺. 𑁧.𑁨𑁪], 𑀲𑀘𑁂 𑀪𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀳𑀁, 𑀲𑀸𑀚𑀻𑀯𑁄 𑀕𑀭𑀳𑀺𑀢𑁄 𑀫𑀫 [𑀫𑀺. 𑀧. 𑁬.𑁧.𑁫] - 𑀅𑀲𑁆𑀲+𑀆𑀚𑀻𑀯𑁄𑀢𑀺 𑀙𑁂𑀤𑁄, 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀢𑀻𑀲𑀼 𑀩𑁆𑀬𑀜𑁆𑀚𑀦𑁂𑀲𑀼 𑀲𑀭𑀽𑀧𑀸𑀦𑀁 𑀤𑁆𑀯𑀺𑀦𑁆𑀦𑀁 𑀆𑀤𑀺𑀩𑁆𑀬𑀜𑁆𑀚𑀦𑀲𑁆𑀲 𑀮𑁄𑀧𑁄 𑁋 𑀅𑀕𑁆𑀬𑀸𑀕𑀸𑀭𑀁 [𑀧𑀸𑀘𑀺. 𑁩𑁨𑁬], 𑀅𑀕𑁆𑀬𑀸𑀳𑀺𑀢𑁄, 𑀯𑀼𑀢𑁆𑀬𑀲𑁆𑀲, 𑀯𑀺𑀢𑁆𑀬𑀸𑀦𑀼𑀪𑀽𑀬𑀢𑁂, 𑀏𑀓𑀲𑀢𑀁 𑀔𑀢𑁆𑀬𑀸 [𑀚𑀸. 𑁨.𑁨𑁨.𑁫𑁯𑁪], 𑀭𑀢𑁆𑀬𑁄, 𑀭𑀢𑁆𑀬𑀸, 𑀭𑀢𑁆𑀬𑀁, 𑀲𑀓𑁆𑀯𑀸𑀳𑀁 𑀫𑀸𑀭𑀺𑀲 𑀤𑁂𑀯𑀸𑀦𑀫𑀺𑀦𑁆𑀤𑁄 [𑀲𑀁. 𑀦𑀺. 𑁧.𑁨𑁬𑁮], 𑀇𑀘𑁆𑀘𑀸𑀤𑀺.

𑀲𑀭𑀽𑀧𑀸𑀦𑀦𑁆𑀢𑀺 𑀓𑀺𑀁? 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀯𑀤𑀦𑁆𑀢𑀺 [𑀲𑀼. 𑀦𑀺. 𑁮𑁯𑁭], 𑀘𑀢𑀼𑀢𑁆𑀣𑁆𑀬𑀦𑁆𑀢𑀁, 𑀙𑀝𑁆𑀞𑀼𑀦𑁆𑀢𑀁, 𑀘𑀓𑁆𑀔𑁆𑀯𑀸𑀩𑀸𑀥𑀁, 𑀯𑀢𑁆𑀣𑁆𑀯𑁂𑀢𑁆𑀣.

𑀇𑀢𑀺 𑀩𑁆𑀬𑀜𑁆𑀚𑀦𑀮𑁄𑀧𑀭𑀸𑀲𑀺.

𑁩𑁧. 𑀮𑁄𑀧𑁄.

𑀦𑀺𑀕𑁆𑀕𑀳𑀻𑀢𑀲𑁆𑀲 𑀓𑁆𑀯𑀘𑀺 𑀮𑁄𑀧𑁄 𑀳𑁄𑀢𑀺 𑀯𑀸.

𑀲𑀭𑁂 𑀧𑀭𑁂 𑀢𑀸𑀯 𑁋

𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦 [𑀩𑀼. 𑀯𑀁. 𑁨.𑁨𑁭], 𑀧𑀼𑀧𑁆𑀨𑀤𑀸𑀦𑀁 𑀅𑀤𑀸𑀲𑀳𑀁-𑀅𑀤𑀸𑀲𑀺𑀁+𑀅𑀳𑀦𑁆𑀢𑀺 𑀙𑁂𑀤𑁄, 𑀩𑀺𑀦𑁆𑀤𑀼𑀮𑁄𑀧𑁄, 𑀧𑀼𑀦 𑀧𑀼𑀩𑁆𑀩𑀲𑀭𑀮𑁄𑀧𑁄, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑀺, 𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀁 [𑀤𑀻. 𑀦𑀺. 𑁨.𑁧𑁭𑁮], 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂 [𑀧𑀸𑀘𑀺. 𑁭𑁦𑁯], 𑀢𑁂𑀲𑀸𑀳𑀁 𑀏𑀯𑀁 𑀯𑀤𑀸𑀫𑀺, 𑀧𑀜𑁆𑀘𑀦𑁆𑀦𑁂𑀢𑀁 𑀥𑀫𑁆𑀫𑀸𑀦𑀁 𑀅𑀥𑀺𑀯𑀘𑀦𑀁, 𑀙𑀦𑁆𑀦𑁂𑀢𑀁 𑀥𑀫𑁆𑀫𑀸𑀦𑀁 𑀅𑀥𑀺𑀯𑀘𑀦𑀁, 𑀲𑀫𑀡 𑀢𑁆𑀯𑁂𑀯 𑀧𑀼𑀘𑁆𑀙𑀸𑀫𑀺 [𑀚𑀸. 𑁨.𑁨𑁨.𑁨𑁫𑁩 𑀲𑀫𑀡 𑀢𑁂𑀯], 𑀩𑁆𑀭𑀸𑀳𑁆𑀫𑀡 𑀢𑁆𑀯𑁂𑀯 𑀧𑀼𑀘𑁆𑀙𑀸𑀫𑀺 [𑀚𑀸. 𑁨.𑁨𑁨.𑁨𑁫𑁮 𑀩𑁆𑀭𑀸𑀳𑁆𑀫𑀡 𑀢𑁂𑀯] -𑀢𑁆𑀯𑀁+𑀏𑀯𑀸𑀢𑀺 𑀙𑁂𑀤𑁄, 𑀯𑀺𑀤𑀽𑀦𑀕𑁆𑀕𑀫𑀺𑀢𑀺.

𑀩𑁆𑀬𑀜𑁆𑀚𑀦𑁂 𑀧𑀭𑁂 𑁋

𑀢𑀁 𑀢𑀼𑀬𑁆𑀳𑀫𑀽𑀮𑁂 𑀧𑀝𑀺𑀤𑁂𑀲𑁂𑀫𑀺.

𑀕𑀸𑀣𑀸𑀬𑀁 𑁋

𑀅𑀭𑀺𑀬𑀲𑀘𑁆𑀘𑀸𑀦𑀤𑀲𑁆𑀲𑀦𑀁 [𑀔𑀼. 𑀧𑀸. 𑁫.𑁧𑁧], 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁 [𑀥. 𑀧. 𑁧𑁮𑁩], 𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘 [𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸].

𑀫𑀸𑀕𑀫𑁂 𑀧𑀭𑁂 𑁋

𑀕𑀭𑀼𑀴𑁄 𑀉𑀭𑀕𑀸𑀫𑀺𑀯 [𑀚𑀸. 𑁧.𑁪.𑁧𑁨𑁪 𑀲𑀼𑀧𑀡𑁆𑀡𑁄], 𑀥𑀫𑁆𑀫𑁄 𑀅𑀭𑀳𑀢𑀸𑀫𑀺𑀯 [𑀤𑀻. 𑀦𑀺. 𑁨.𑁩𑁪𑁮], 𑀆𑀮𑁄𑀓𑁄 𑀧𑀲𑁆𑀲𑀢𑀸𑀫𑀺𑀯 [𑀲𑀼. 𑀦𑀺. 𑁭𑁬𑁯], 𑀩𑀓𑁄 𑀓𑀓𑁆𑀓𑀝𑀓𑀸𑀫𑀺𑀯 [𑀚𑀸. 𑁧.𑁧.𑁩𑁮], 𑀦𑀪𑀁 𑀢𑀸𑀭𑀓𑀺𑀢𑀸𑀫𑀺𑀯 [𑀚𑀸. 𑁨.𑁨𑁨.𑁧𑁯𑁮𑁯 𑀢𑀸𑀭𑀸𑀘𑀺𑀢𑀸𑀫𑀺𑀯], 𑀧𑀤𑀼𑀫𑀁 𑀳𑀢𑁆𑀣𑀕𑀢𑀸𑀫𑀺𑀯 [𑀚𑀸. 𑁨.𑁨𑁨.𑁨𑁩𑁩𑁬] -𑀏𑀢𑁂𑀲𑀼 𑀫𑀸𑀕𑀫𑁂 𑀩𑀺𑀦𑁆𑀤𑀼𑀮𑁄𑀧𑁄, 𑀩𑁆𑀬𑀜𑁆𑀚𑀦𑁂 𑀧𑀼𑀩𑁆𑀩𑀲𑀭𑀤𑀻𑀖𑁄 𑀘.

𑀢𑀣𑀸 𑀲𑀁𑀉𑀧𑀲𑀕𑁆𑀕𑀲𑁆𑀲 𑀩𑀺𑀦𑁆𑀤𑀼𑀮𑁄𑀧𑁂 𑀅𑀦𑁆𑀢𑀲𑀭𑀤𑀻𑀖𑁄 𑁋

𑀲𑀸𑀭𑀸𑀕𑁄, 𑀲𑀸𑀭𑀢𑁆𑀢𑁄, 𑀅𑀯𑀺𑀲𑀸𑀳𑀸𑀭𑁄, 𑀲𑀸𑀭𑀫𑁆𑀪𑁄, 𑀲𑀸𑀭𑀤𑁆𑀥𑁄, 𑀲𑀸𑀓𑁂𑀢𑀁 𑀦𑀕𑀭𑀁, 𑀲𑀸𑀥𑀸𑀭𑀡𑀁, 𑀲𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀸𑀫𑀻.

𑀲𑀫𑀸𑀲𑁂 𑀢𑀼𑀫𑀦𑁆𑀢𑀫𑁆𑀳𑀺 𑀦𑀺𑀘𑁆𑀘𑀁 𑁋

𑀓𑀢𑁆𑀢𑀼𑀓𑀸𑀫𑁄, 𑀕𑀦𑁆𑀢𑀼𑀓𑀸𑀫𑁄 𑀇𑀘𑁆𑀘𑀸𑀤𑀺.