𑁪𑁧. 𑀓𑁆𑀯𑀘

𑀦𑀸𑀫𑀚𑀸𑀢𑀺𑀕𑀼𑀡𑀓𑀺𑀭𑀺𑀬𑀸 𑀤𑀩𑁆𑀩𑀲𑀫𑁆𑀩𑀦𑁆𑀥𑀢𑁄 𑀧𑀜𑁆𑀘𑀯𑀺𑀥𑀢𑁆𑀢𑁂𑀧𑀺 𑀓𑀫𑁆𑀫𑀲𑁆𑀲 𑀓𑁆𑀭𑀺𑀬𑀢𑁆𑀣𑀲𑁆𑀲𑀸𑀯𑀥𑀺𑀭𑀬𑀫𑀼𑀧𑀸𑀤𑀺𑀦𑁆𑀦𑁄𑀢𑀺 𑀓𑁆𑀭𑀺𑀬𑀢𑁆𑀣𑀲𑀫𑁆𑀩𑀦𑁆𑀥𑀸 𑀓𑀺𑀭𑀺𑀬𑀸𑀓𑀫𑁆𑀫𑀲𑁆𑀲𑁂𑀳 𑀕𑀳𑀡𑀁. 𑀢𑀜𑁆𑀘 𑀦𑀺𑀩𑁆𑀩𑀢𑁆𑀢𑀺𑀯𑀺𑀓𑀢𑀺𑀧𑀢𑁆𑀢𑀺𑀪𑁂𑀤𑁂𑀦 𑀢𑀺𑀯𑀺𑀥𑀁, 𑀢𑀺𑀯𑀺𑀥𑀲𑁆𑀲𑀸𑀧𑁆𑀬𑁂𑀢𑀲𑁆𑀲 𑀯𑀺𑀲𑁂𑀲𑀸𑀦𑀼𑀧𑀸𑀦𑀢𑁄 𑀕𑀳𑀡𑀦𑁆𑀢𑀺 𑀓𑀫𑁂𑀦𑀼𑀤𑀸𑀳𑀭𑀦𑁆𑀢𑁄 𑀆𑀳- ‘𑀓𑀭𑀓𑀭𑀡𑁂’𑀇𑀘𑁆𑀘𑀸𑀤𑀺.

𑀮𑁄𑀓𑀯𑀺𑀤𑀽𑀢𑀺𑀆𑀤𑀺𑀤𑀲𑁆𑀲𑀦𑀢𑁄 𑀓𑁆𑀯𑀘𑀺𑀕𑁆𑀕𑀳𑀡𑁂 𑀧𑀬𑁄𑀚𑀦𑀁 𑀯𑀢𑁆𑀢𑀼𑀫𑀸𑀳- ‘𑀓𑀫𑁆𑀫𑀢𑁄’𑀘𑁆𑀘𑀸𑀤𑀺. 𑀦𑀦𑀼 𑀘 𑀓𑁆𑀯𑀘𑀺𑀕𑁆𑀕𑀳𑀡𑁂𑀦𑁂𑀯 ‘𑀆𑀤𑀺𑀘𑁆𑀘𑀁 𑀧𑀲𑁆𑀲𑀢𑀺’𑀘𑁆𑀘𑀸𑀤𑁄𑀧𑀺 (𑀦𑀺𑀯𑀢𑁆𑀢𑀺) 𑀯𑀢𑁆𑀢𑀼𑀁 𑀲𑀓𑁆𑀓𑀸 𑀓𑀲𑁆𑀫𑀸 ‘𑀩𑀳𑀼𑀮𑀸𑀥𑀺𑀓𑀸𑀭𑀸’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘𑀢𑁂𑀦𑁂’𑀘𑁆𑀘𑀸𑀤𑀺. 𑀢𑁂𑀦𑀸𑀢𑀺 𑀬𑁂𑀦 𑀓𑁆𑀯𑀘𑀺𑀕𑁆𑀕𑀳𑀡𑀁 𑀓𑀼𑀢𑁄𑀘𑀺𑀬𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀢𑀁 𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀯𑀸 𑀓𑁆𑀯𑀘𑀺𑀕𑁆𑀕𑀳𑀡𑁂𑀦. 𑀅𑀣 𑀆𑀤𑀺𑀘𑁆𑀘𑀁 𑀧𑀲𑁆𑀲𑀢𑀺𑀘𑁆𑀘𑀸𑀤𑁄 𑀯𑀺𑀬 𑀓𑀫𑁆𑀫𑀓𑀭𑀸𑀤𑀻𑀲𑀼𑀧𑀺 𑀦𑀺𑀯𑀢𑁆𑀢𑀺𑀫𑀤𑀲𑁆𑀲𑁂𑀢𑁆𑀯𑀸 ‘𑀓𑁆𑀯𑀘𑀻𑀢𑀺 𑀓𑀺𑀁 𑀓𑀫𑁆𑀫𑀓𑀭𑁄’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳- ‘𑀬𑀚𑁆𑀚𑁂𑀯’𑀫𑀺𑀘𑁆𑀘𑀸𑀤𑀺.

𑀢𑀲𑁆𑀲𑀸𑀢𑀺 𑀩𑀳𑀼𑀮𑀯𑀘𑀦𑀲𑁆𑀲, 𑀫𑀳𑀸𑀥𑀺𑀓𑀸𑀭𑀢𑁆𑀢𑀸𑀢𑀺 𑀫𑀳𑀸𑀯𑀺𑀲𑀬𑀢𑁆𑀢𑀸. 𑀓𑀼𑀢𑁄𑀘𑀺𑀬𑁂𑀯𑀸𑀢𑀺 𑀓𑀼𑀢𑁄𑀘𑀺 𑀥𑀸𑀢𑀼𑀢𑁄𑀬𑁂𑀯. 𑀅𑀣𑁂𑀳 𑀓𑀲𑁆𑀫𑀸 𑀦 𑀳𑁄𑀢𑀺 𑀤𑁂𑀯𑀤𑀢𑁆𑀢𑁄 𑀲𑀬𑀢𑀺 𑀤𑀸𑀢𑁆𑀢𑁂𑀦 𑀮𑀼𑀦𑀸𑀢𑀺 𑀲𑀼𑀦𑀔𑀸𑀦𑀁 𑀤𑀤𑀸𑀢𑀺 𑀦𑀕𑀭𑀸 𑀅𑀧𑁂𑀢𑀺 𑀣𑀸𑀮𑀺𑀬𑀁 𑀧𑀘𑀢𑀺 𑀫𑀸𑀢𑀼 𑀲𑀭𑀢𑀻’’𑀢𑀺, 𑀲𑀩𑁆𑀩𑀫𑁂𑀯𑁂𑀤𑀁 𑀓𑀺𑀭𑀺𑀬𑀸 (𑀬𑀸) 𑀪𑀺𑀲𑀫𑁆𑀩𑀦𑁆𑀥𑀻𑀬𑀢𑀻𑀢𑀺 𑀬𑀤𑀺𑀧𑁂𑀯𑀁, 𑀢𑀣𑀸𑀧𑀺 𑀓𑀫𑁆𑀫𑀢𑁆𑀢𑁂𑀦𑁂𑀯 𑀬𑀁 𑀯𑀢𑁆𑀢𑀼 𑀫𑀺𑀘𑁆𑀙𑀺𑀢𑀁 𑀦 𑀓𑀸𑀭𑀓𑀦𑁆𑀢𑀭𑀢𑁆𑀢𑁂𑀦 𑀦𑀸𑀧𑀺 𑀲𑀫𑁆𑀩𑀦𑁆𑀥𑀪𑀸𑀯𑁂𑀦, 𑀢𑀲𑁆𑀲𑁂𑀯 𑀓𑀫𑁆𑀫𑀲𑀤𑁆𑀤𑁂𑀦 𑀕𑀳𑀡𑀁 𑀓𑀫𑁆𑀫𑀯𑀘𑀦𑀲𑀸𑀫𑀢𑁆𑀣𑀺𑀬𑀸, 𑀅𑀜𑁆𑀜𑀣𑀸 𑀲𑁆𑀬𑀸𑀤𑀺𑀢𑁄𑀘𑁆𑀘𑁂𑀯 𑀯𑀤𑁂𑀬𑁆𑀬 𑀓𑀺𑀁 𑀓𑀫𑁆𑀫𑀸𑀢𑀺 𑀯𑀘𑀦𑁂𑀦𑀸𑀢𑀺.