𑁬𑁯. 𑀚𑀦𑀸

‘‘𑀢𑀤𑀲𑁆𑀲𑀝𑁆𑀞𑀸𑀦𑀫𑀻𑀬𑁄 𑀘𑀸’’𑀢𑀺 (𑁨-𑁮-𑁧𑁩) 𑀓𑀘𑁆𑀘𑀸𑀬𑀦𑀲𑀼𑀢𑁆𑀢𑀲𑁆𑀲𑀸𑀬 𑀫𑀢𑁆𑀣𑁄 ‘‘𑀢𑀤𑀲𑁆𑀲𑀝𑁆𑀞𑀸𑀦𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀙𑀝𑁆𑀞𑀺𑀬𑀦𑁆𑀢𑀢𑁄 𑀈𑀬𑀧𑁆𑀧𑀘𑁆𑀘𑀬𑁄 𑀳𑁄𑀢𑀻’𑀢𑀺. 𑀢𑁂𑀦 𑀫𑀤𑀦𑀲𑁆𑀲 𑀞𑀸𑀦𑀁 𑀫𑀤𑀦𑀻𑀬𑀁 𑀩𑀦𑁆𑀥𑀦𑀲𑁆𑀲 𑀞𑀸𑀦𑀁 𑀩𑀦𑁆𑀥𑀦𑀻𑀬𑀁𑀢𑁆𑀬𑀸𑀤𑀺𑀓𑀁 𑀲𑀸𑀥𑁂𑀦𑁆𑀢𑀺. 𑀇𑀥 𑀧𑀦 𑀢𑀣𑀸𑀯𑀺𑀥𑀲𑁆𑀲𑀸𑀪𑀸𑀯𑀸 𑀓𑀣𑀁 𑀢𑀁 𑀲𑀺𑀚𑁆𑀛𑀢𑀻𑀢𑁆𑀬𑀸𑀲𑀗𑁆𑀓𑀺𑀬 ‘𑀫𑀤𑀦𑀻𑀬’𑀦𑁆𑀢𑀺𑀆𑀤𑀺𑀓𑀁 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀫𑀤𑀦𑀻𑀬𑀸𑀤𑀺𑀧𑁆𑀧𑀲𑀺𑀤𑁆𑀥𑀺𑀬𑀸’𑀘𑁆𑀘𑀸𑀤𑀺. 𑀲𑀸𑀥𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀏𑀯𑀫𑀜𑁆𑀜𑀢𑁂’𑀘𑁆𑀘𑀸𑀤𑀺.

𑀞𑀸𑀦𑀦𑁆𑀢𑀺 𑀓𑀸𑀭𑀡𑀁. ‘‘𑀉𑀧𑀫𑀢𑁆𑀣𑀸𑀬𑀺𑀢𑀢𑁆𑀢’’𑀦𑁆𑀢𑀺 (𑁨-𑁮-𑁧𑁪) 𑀓𑀘𑁆𑀘𑀸𑀬𑀦𑀲𑀼𑀢𑁆𑀢𑀲𑁆𑀲𑀸𑀬𑀫𑀢𑁆𑀣𑁄 ‘‘𑀉𑀧𑀫𑀢𑁆𑀣𑁂 𑀆𑀬𑀺𑀢𑀢𑁆𑀢𑀧𑁆𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀢𑁂𑀦 𑀥𑀽𑀫𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀥𑀽𑀫𑀸𑀬𑀺𑀢𑀢𑁆𑀢𑀁 𑀢𑀺𑀫𑀺𑀭𑀫𑀺𑀯 𑀤𑀺𑀲𑁆𑀲𑀢𑀻𑀢𑀺 𑀢𑀺𑀫𑀺𑀭𑀸𑀬𑀺𑀢𑀢𑁆𑀢𑀁𑀢𑁆𑀬𑀸𑀤𑀺𑀓𑀁 𑀲𑀸𑀥𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀫𑁆𑀧𑀺𑀳𑀘𑁆𑀘𑀸𑀤𑀺𑀓𑀁 𑀤𑁆𑀯𑀻𑀲𑀼 𑀲𑀸𑀥𑀦𑀓𑁆𑀓𑀫𑀤𑀲𑁆𑀲𑀦𑀁, 𑀥𑀽𑀫𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑀺𑀢𑁄 𑀬𑁄 𑀓𑀫𑁆𑀫𑀢𑁆𑀣𑁄 𑀲𑁄𑀧𑀺 𑀥𑀽𑀫𑀸𑀬𑀻𑀢𑀺 𑀓𑀢𑁆𑀢𑀼𑀯𑀲𑁂𑀦 𑀲𑀓𑁆𑀓𑀸 𑀧𑀭𑀺𑀓𑀧𑁆𑀧𑁂𑀢𑀼𑀦𑁆𑀢𑀺 𑀓𑀢𑁆𑀢𑀼𑀲𑀸𑀥𑀦𑀢𑁄 𑀥𑀽𑀫𑀸𑀬𑀺𑀢𑀲𑀤𑁆𑀤𑀸 𑀲𑀓𑀢𑁆𑀣𑁂𑀢𑁆𑀢𑀧𑁆𑀧𑀘𑁆𑀘𑀬𑁂𑀧𑀺 𑀥𑀽𑀫𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁂 𑀆𑀬𑀺𑀢𑀢𑁆𑀣𑀧𑁆𑀧𑀘𑁆𑀘𑀬𑁂𑀧𑀺 𑀦𑀸𑀢𑁆𑀣𑀪𑁂𑀤𑁄-𑀜𑁆𑀜𑀢𑁆𑀭𑀯𑀘𑀦𑀺𑀘𑁆𑀙𑀸𑀪𑁂𑀤𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀪𑀸𑀯𑀢𑁆𑀣𑁄 𑀧𑀦 𑀢𑁂𑀲𑀁 𑀪𑀸𑀯𑀧𑁆𑀧𑀥𑀸𑀦𑀯𑀲𑁂𑀦 𑀮𑀩𑁆𑀪𑀢𑀺, 𑀥𑀽𑀫𑀲𑁆𑀲𑁂𑀯 𑀤𑀲𑁆𑀲𑀦𑀦𑁆𑀢𑀺 𑀯𑀺𑀕𑁆𑀕𑀳𑁂 𑀆𑀬𑀺𑀢𑀢𑁆𑀢𑁂𑀦 𑀯𑀸.