𑁪𑁭. 𑀢𑀕𑁆𑀖𑁄

‘‘𑀧𑀫𑀸𑀡𑀧𑀭𑀺𑀫𑀸𑀡𑁂𑀳𑀺 𑀲𑀗𑁆𑀔𑁆𑀬𑀸𑀬𑀘𑀸𑀧𑀺 𑀲𑀁𑀲𑀬𑁂 𑀫𑀢𑁆𑀢𑁄𑀯𑀢𑁆𑀢𑀩𑁆𑀩𑁄’’𑀢𑀺 (𑁫-𑁨-𑁩𑁭) 𑀧𑀸𑀡𑀺𑀦𑀺𑀬𑀯𑀢𑁆𑀢𑀩𑁆𑀩𑀓𑀸𑀭𑀯𑀘𑀦𑀁, 𑀢𑀢𑁆𑀣 𑀧𑀫𑀸𑀡 𑀫𑀸𑀬𑀸𑀫𑁄. 𑀲𑀗𑁆𑀔𑁆𑀬𑀸𑀬𑀸𑀢𑀺 𑀧𑀜𑁆𑀘𑀫𑀻. 𑀏𑀢𑁂𑀳𑀺 𑀲𑀁𑀲𑀬𑁂 𑀫𑀢𑁆𑀢𑁄 𑀯𑀢𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀯𑀺𑀤𑀢𑁆𑀣𑀺𑀫𑀢𑁆𑀢𑀁 𑀭𑀢𑀦𑀫𑀢𑁆𑀢𑀁 𑀯𑀸𑀢𑀺𑀆𑀤𑀻𑀦𑀺 𑀓𑀫𑁂𑀦 𑀢𑀢𑁆𑀣𑁄𑀤𑀸𑀳𑀭𑀡𑀸𑀦𑀺.

𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀯𑀢𑁆𑀢𑀩𑁆𑀩𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑀲𑁆𑀫𑀺𑀁 𑀯𑀺𑀤𑀢𑁆𑀣𑀺𑀫𑀢𑁆𑀢𑀁 𑀭𑀢𑀦𑀫𑀢𑁆𑀢𑀁 𑀯𑀸𑀢𑀺𑀆𑀤𑀺(𑀦𑀸) 𑀬𑀁𑀓𑀺𑀜𑁆𑀘𑀺 𑀤𑀡𑁆𑀟𑀧𑀼𑀩𑁆𑀩𑀡𑁆𑀡𑀸𑀤𑀺𑀓𑀁 [𑀧𑀡𑁆𑀡𑀸𑀤𑀺𑀓𑀁 (𑀧𑁄𑀢𑁆𑀣𑀓𑁂)] 𑀲𑀁𑀲𑀬𑀺𑀢𑀁, 𑀢𑁂𑀦 𑀫𑀸𑀦𑀲𑀗𑁆𑀔𑀸𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑀲𑁆𑀲𑀸𑀪𑀸𑀯𑀸 𑀓𑀣𑀫𑁂𑀢𑁂 𑀧𑀬𑁄𑀕𑀸 𑀲𑀺𑀬𑀼𑀦𑁆𑀢𑀺 𑀆𑀲𑀗𑁆𑀓𑀺𑀬 𑀢𑀢𑁆𑀣 𑀓𑀸𑀭𑀡𑀫𑀸𑀳- ‘𑀢𑀣𑀸𑀪𑁆𑀬𑀽𑀳𑀦𑀢𑁄 𑀲𑀺𑀤𑁆𑀥𑀢𑁆𑀢𑀸’𑀢𑀺. 𑀢𑀣𑀸𑀪𑁆𑀬𑀽𑀳𑀦𑀢𑁄𑀢𑀺 𑀯𑀺𑀤𑀢𑁆𑀣𑀺𑀫𑀸𑀦𑀫𑁆𑀧𑀫𑀸𑀡𑀫𑀲𑁆𑀲 𑀭𑀢𑀦𑀫𑁆𑀫𑀸𑀦 𑀫𑀲𑁆𑀲𑀸𑀢𑁆𑀬𑀸𑀤𑀺𑀦𑀸 𑀢𑁂𑀦𑀧𑁆𑀧𑀓𑀸𑀭𑁂𑀦 𑀅𑀪𑁆𑀬𑀽𑀳𑀦𑀢𑁄 𑀅𑀪𑁆𑀬𑀼𑀧𑀕𑀫𑀢𑁄𑀢𑀺 𑀅𑀢𑁆𑀣𑁄. 𑀲𑀁𑀲𑀬𑁄 𑀘 𑀦𑀸𑀫 𑀉𑀪𑀬𑀧𑀓𑁆𑀔𑀧𑀭𑀸𑀫𑀲𑀦𑁂 𑀲𑀢𑀺 𑀲𑀺𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑀩𑁆𑀪𑀽𑀳𑀦𑀁 𑀲𑀸𑀥𑁂𑀢𑀼𑀫𑀸𑀳-𑀦𑀸𑀦𑁆𑀢𑀭𑁂𑀦𑁂’𑀘𑁆𑀘𑀸𑀤𑀺. 𑀧𑀓𑁆𑀔𑀤𑁆𑀯𑀬𑁂𑀳𑀻𑀢𑀺 𑀯𑀺𑀤𑀢𑁆𑀣𑀺 𑀫𑀸𑀦𑀫𑀲𑁆𑀲 𑀭𑀢𑀦𑀫𑁆𑀫𑀸𑀦𑀫𑀲𑁆𑀲𑀸𑀢𑀺 𑀏𑀯𑀫𑀸𑀤𑀺𑀓𑁂𑀳𑀺 𑀧𑀓𑁆𑀔𑀤𑁆𑀯𑀬𑁂𑀳𑀺. 𑀅𑀪𑁆𑀬𑀽𑀳𑀦𑀁 𑀲𑀁𑀲𑀬𑀲𑁆𑀲𑀸𑀢𑀺 𑀕𑀫𑁆𑀬𑀢𑁂. 𑀚𑀡𑁆𑀡𑀼 𑀫𑀸𑀦𑀫𑀲𑁆𑀲 𑀚𑀡𑁆𑀡𑀼𑀢𑀕𑁆𑀖𑀁.