𑁬𑁭. 𑀇𑀢𑁆𑀣𑀺

𑀇𑀢𑁆𑀣𑀺𑀲𑀤𑁆𑀤𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀁 𑀕𑀳𑀺𑀢𑀁 𑀦 𑀇𑀢𑁆𑀣𑀻, 𑀢𑀕𑁆𑀕𑀳𑀡𑁂 𑀲𑀢𑀺 ‘𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑁂’𑀢𑀺 𑀯𑀼𑀢𑁆𑀢𑀺𑀕𑀦𑁆𑀣𑀲𑁆𑀲 𑀇𑀢𑁆𑀣𑀺𑀲𑀗𑁆𑀔𑀸𑀢𑁂 𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑁂𑀢𑀺 𑀅𑀢𑁆𑀣𑁄 𑀕𑀬𑁆𑀳𑁂𑀬𑁆𑀬, 𑀏𑀯𑀁 𑀲𑀢𑀺 ‘𑀓𑀮𑁆𑀬𑀸𑀡𑀺𑀧𑁆𑀧𑀥𑀸𑀦𑀸’𑀢𑀺 𑀏𑀢𑁆𑀣𑀸𑀧𑀺 𑀧𑀼𑀫𑁆𑀪𑀸𑀯𑁄 𑀧𑀲𑀚𑁆𑀚𑁂𑀬𑁆𑀬… 𑀧𑀥𑀸𑀦𑀲𑀤𑁆𑀤𑀲𑁆𑀲 𑀓𑀮𑁆𑀬𑀸𑀡𑀺𑀬𑀁 𑀯𑀢𑁆𑀢𑀫𑀸𑀦𑀢𑁆𑀢𑀸𑀢𑀺 𑀆𑀳- ‘𑀇𑀢𑁆𑀣𑀺𑀬𑀦𑁆𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑁂’𑀢𑀺. 𑀅𑀣 𑀇𑀢𑁆𑀣𑀺𑀬𑀦𑁆𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀓𑀣𑀁 𑀢𑀕𑁆𑀕𑀳𑀡𑀁 𑀲𑀺𑀬𑀸𑀢𑀺 𑀆𑀳-‘𑀯𑀺𑀲𑁂𑀲𑀦𑁂’𑀘𑁆𑀘𑀸𑀤𑀺, 𑀏𑀓𑀢𑁆𑀣𑁂𑀢𑀺 𑀯𑀼𑀢𑁆𑀢𑁂𑀧𑀺 𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑁂𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀇𑀢𑁆𑀣𑀺𑀬𑀦𑁆𑀢𑀺 𑀯𑀘𑀦𑀫𑀦𑀢𑁆𑀣𑀁 𑀲𑀺𑀬𑀸𑀢𑀺 𑀲𑀫𑀢𑁆𑀣𑀫𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀬𑀦𑁆𑀢𑀺 𑀇𑀢𑁆𑀣𑀺𑀬𑀦𑁆𑀢𑀺 𑀯𑀺𑀲𑁂𑀲𑀦𑀫𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲𑁂𑀯 𑀕𑀳𑀡𑁂𑀢𑀺 𑀆𑀳- ‘𑀯𑀺𑀲𑁂𑀲𑀦𑁂’𑀘𑁆𑀘𑀸𑀤𑀺, 𑀇𑀢𑁆𑀣𑀺𑀬𑀦𑁆𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲𑁂𑀯 𑀕𑀳𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀩𑁆𑀬𑀯𑀘𑁆𑀙𑁂𑀚𑁆𑀚𑀸𑀪𑀸𑀯𑀸 𑀯𑀺𑀲𑁂𑀲𑀦𑀫𑀦𑀢𑁆𑀣𑀓𑀁 𑀲𑀺𑀬𑀸𑀢𑀺 𑀏𑀓𑀢𑁆𑀣𑁂𑀇𑀘𑁆𑀘𑀦𑁂𑀦𑁂𑀯 𑀇𑀢𑁆𑀣𑀺𑀬𑀁 𑀯𑀼𑀢𑁆𑀢𑀺𑀬𑀸 (𑀕𑀫𑁆𑀫) 𑀪𑀸𑀯𑀢𑁄𑀢𑀺 𑀪𑀸𑀯𑁄. 𑀧𑀼𑀫𑁂 𑀧𑀼𑀮𑁆𑀮𑀺𑀗𑁆𑀕𑁂 𑀯𑀢𑁆𑀢𑀫𑀸𑀦𑁄 𑀲𑀤𑁆𑀤𑁄 𑀧𑀼𑀫𑀸𑀲𑀤𑁆𑀤𑁄, 𑀲𑀓𑀮𑁄𑀢𑀺 𑀧𑀤𑁂𑀲𑀲𑀓𑀮𑁄 𑀳𑀺 𑀕𑀬𑁆𑀳𑀢𑀺… 𑀓𑀲𑁆𑀲𑀘𑀺 𑀲𑀼𑀢𑁆𑀢𑀢𑁆𑀣𑀲𑁆𑀲 𑀧𑀼𑀣𑀪𑀽𑀢𑀢𑁆𑀢𑀸, 𑀢𑁂𑀦𑁂𑀯𑀘𑀸𑀳- ‘𑀇𑀢𑁆𑀣𑀺𑀬𑀦𑁆𑀢𑀼 𑀦 𑀯𑀢𑁆𑀢𑀢𑁆𑀢𑁂’𑀢𑀺.