𑁧𑁯𑁭. 𑀇𑀫𑁂

𑀆𑀤𑁂𑀲𑁄 𑀓𑀣𑀦𑀁, 𑀅𑀦𑁆𑀯𑀸𑀤𑁂𑀲𑁄-𑀦𑀼𑀓𑀣𑀦𑀫𑀺𑀘𑁆𑀘𑀸𑀳-‘𑀅𑀦𑁆𑀯𑀸𑀤𑁂𑀲𑁄 𑀓𑀣𑀺𑀢𑀸𑀦𑀼𑀓𑀣𑀦’𑀫𑀻𑀢𑀺, 𑀓𑀣𑀺𑀢𑀲𑁆𑀲𑀸𑀦𑀼𑀓𑀣𑀦𑀁 𑀓𑀣𑀺𑀢𑀸𑀦𑀼𑀓𑀣𑀦𑀁, 𑀅𑀦𑁂𑀦 𑀘 𑀦𑁂𑀳 𑀧𑀘𑁆𑀙𑀸 𑀉𑀘𑁆𑀘𑀸𑀭𑀡𑀫𑀢𑁆𑀢𑀫𑀦𑁆𑀯𑀸𑀤𑁂𑀲𑁄, 𑀓𑀺𑀜𑁆𑀘𑀭𑀳𑀺 𑀏𑀓𑀲𑁆𑀲𑀸𑀪𑀺𑀥𑁂𑀬𑁆𑀬𑀲𑁆𑀲 𑀧𑀼𑀩𑁆𑀩𑀲𑀤𑁆𑀤𑁂𑀦 𑀧𑀝𑀺𑀧𑀸𑀤𑀺𑀢𑀲𑁆𑀲 𑀤𑀼𑀢𑀺𑀬𑀫𑁆𑀧𑀢𑀺𑀧𑀸𑀤𑀦𑀫𑀦𑁆𑀯𑀸𑀤𑁂𑀲𑁄𑀢𑀺 𑀯𑀤𑀢𑀺, 𑀢𑁂𑀦𑁂𑀳 𑀦 𑀪𑀯𑀢𑀺 ‘𑀤𑁂𑀯𑀤𑀢𑁆𑀢𑀁 𑀪𑁄𑀚𑀬, 𑀇𑀫𑀜𑁆𑀘 𑀬𑀜𑁆𑀜𑀤𑀢𑁆𑀢’𑀦𑁆𑀢𑀺, 𑀓𑁂𑀦𑀘𑀺 𑀯𑀺𑀲𑁂𑀲𑀦𑁆𑀢𑀭𑀬𑁄𑀕𑁂𑀦 𑀓𑀣𑀺𑀢𑀲𑁆𑀲𑀸𑀦𑀼𑀓𑀣𑀦𑀁 𑀅𑀦𑁆𑀯𑀸𑀤𑁂𑀲𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀫𑁆𑀧𑀦 𑀯𑀺𑀲𑁂𑀲𑀦𑁆𑀢𑀭𑀬𑁄𑀕𑁄 𑀕𑀫𑁆𑀬𑀢𑁂𑀘𑁆𑀘𑀸𑀳- ‘𑀲𑀸𑀫𑀢𑁆𑀣𑀺𑀬𑀸’𑀢𑀺, 𑀓𑁂𑀦𑀘𑀺 𑀯𑀺𑀲𑁂𑀲𑁂𑀦𑀸𑀬𑁄𑀕𑁂 𑀯𑀼𑀢𑁆𑀢𑀲𑁆𑀲𑁂𑀯 𑀧𑀼𑀦𑀩𑁆𑀩𑀘𑀦𑀸𑀦𑀼𑀧𑀧𑀚𑁆𑀚𑀦𑀁 𑀲𑀸𑀫𑀢𑁆𑀣𑀺𑀬𑀁, 𑀢𑁂𑀦𑁂𑀯𑀸𑀳- ‘𑀅𑀜𑁆𑀜𑀣𑁂’𑀘𑁆𑀘𑀸𑀤𑀺.