𑁨𑁮. 𑀦𑀤𑁆𑀯𑁂

𑀢𑀢𑁆𑀣𑀘𑀸𑀢𑀺 𑀘𑀲𑀤𑁆𑀤𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀘 𑀲𑀢𑀺 𑀅𑀜𑁆𑀜𑁄𑀜𑁆𑀜𑀸𑀦𑀚𑁆𑀛𑀸𑀲𑀺 𑀢𑀁 𑀬𑀣𑁄𑀤𑀓𑀁 𑀬𑀣𑀸𑀉𑀤𑀓𑀁𑀢𑁆𑀬𑀸𑀤𑀺 𑀇𑀢𑀺𑀧𑀺 𑀇𑀘𑁆𑀘𑀧𑀺𑀘𑁆𑀘𑀸𑀤𑀺𑀘 𑀲𑀗𑁆𑀕𑀳𑀺𑀢𑀁 𑀪𑀯𑀢𑀻𑀢𑀺, 𑀧𑀼𑀩𑁆𑀩𑀮𑁄𑀧𑁂 𑀧𑀭𑀮𑁄𑀧𑁂 𑀘 𑀧𑀭𑀺𑀬𑀸𑀬𑁂𑀦 𑀲𑀫𑁆𑀧𑀢𑁆𑀢𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀓𑁆𑀔𑁂 𑀅𑀪𑀸𑀯𑁂 𑀲𑀢𑀺 𑀓𑀣𑀫𑀺𑀤𑀁 𑀬𑀼𑀚𑁆𑀚𑀢𑀻𑀢𑀺 𑀘𑁄𑀤𑁂𑀢𑀺‘𑀬𑀚𑁆𑀚𑁂𑀯’𑀫𑀺𑀘𑁆𑀘𑀸𑀤𑀺𑀦𑀸, 𑀬𑀚𑁆𑀚𑁂𑀯𑀦𑁆𑀢𑀺 𑀳𑀺 𑀅𑀬𑀁 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀅𑀦𑀺𑀝𑁆𑀞𑀸𑀧𑀸𑀤𑀦𑀸𑀭𑀫𑁆𑀪 𑀯𑀢𑁆𑀢𑀢𑁂, 𑀏𑀯𑀜𑁆𑀘𑁂 𑀕𑀬𑁆𑀳𑀢𑀻𑀢𑀺 𑀅𑀢𑁆𑀣𑁄, 𑀢𑀤𑁂𑀢𑀺 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀬𑀢𑀺, 𑀦𑀺𑀘𑁆𑀘𑀁 𑀲𑀦𑁆𑀥𑀺𑀓𑀸𑀭𑀺𑀬𑀸𑀪𑀸𑀯𑁂 𑀓𑀸𑀭𑀡𑀫𑀸𑀳-‘𑀉𑀧𑀲𑀺𑀮𑁂𑀲𑀸 𑀪𑀸𑀯𑀢𑁄’𑀢𑀺, 𑀢𑀤𑁂𑀯 𑀲𑀫𑀢𑁆𑀣𑁂𑀢𑀺 𑀈𑀤𑀺𑀲𑁂𑀲𑀼 𑀳𑀺’𑀘𑁆𑀘𑀸𑀤𑀺𑀦𑀸, 𑀯𑀢𑁆𑀢𑀼𑀫𑀺𑀝𑁆𑀞𑀢𑁆𑀢𑀸𑀢𑀺 𑀇𑀫𑀺𑀦𑀸 𑀲𑀦𑁆𑀦𑀺𑀓𑀁𑀲𑁄 𑀯𑀡𑁆𑀡𑀸𑀦 𑀫𑀤𑁆𑀥𑀫𑀢𑁆𑀢𑀓𑀸𑀮𑀩𑁆𑀬𑀯𑀥𑀸𑀦𑀸 𑀧𑀘𑁆𑀘𑀸𑀲𑀢𑁆𑀢𑀺, 𑀲𑀦𑁆𑀦𑀺𑀓𑀁𑀲𑀲𑁆𑀲𑁂𑀢𑀲𑁆𑀲 𑀯𑀘𑀦𑀺𑀘𑁆𑀙𑀸𑀬𑀁 𑀲𑀢𑀺𑀬𑁂𑀯 𑀲𑀦𑁆𑀥𑀺𑀓𑀸𑀭𑀺𑀬𑀁 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺, 𑀉𑀧𑀲𑀺𑀮𑁂𑀲𑀸𑀪𑀸𑀯𑁄 𑀯𑀸𑀢𑀺 𑀉𑀧𑀲𑀺𑀮𑁂𑀲𑀸𑀪𑀸𑀯𑁄 𑀏𑀯 𑀪𑀯𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀤𑀪𑀸𑀯𑁂𑀘𑀸𑀢𑀺 𑀢𑀲𑁆𑀲 𑀉𑀧𑀲𑀺𑀮𑁂𑀲𑀲𑁆𑀲 𑀅𑀪𑀸𑀯𑁂 𑀘, 𑀲𑀦𑁆𑀥𑀺𑀓𑀸𑀭𑀺𑀬𑀸𑀪𑀸𑀯𑁂 𑀓𑀸𑀭𑀡𑀫𑀸𑀳-‘𑀓𑀸𑀮𑀦𑁆𑀢𑀭𑁂𑀦 𑀩𑁆𑀬𑀯𑀥𑀸𑀦𑀸’𑀢𑀺, 𑀓𑀸𑀮𑀦𑁆𑀢𑀭𑁂𑀦𑀸𑀢𑀺 𑀉𑀪𑀬𑀢𑁆𑀣 𑀞𑀺𑀢𑀯𑀡𑁆𑀡𑀸𑀦 𑀫𑀼𑀘𑁆𑀘𑀸𑀭𑀡𑀓𑀸𑀮𑀢𑁄 𑀅𑀜𑁆𑀜𑁂𑀦 𑀫𑀚𑁆𑀛𑀧𑁆𑀧𑀢𑀺𑀢𑀓𑀸𑀮𑁂𑀦, 𑀲𑀦𑁆𑀥𑀺 𑀳𑁄𑀢𑁂𑀯… 𑀲𑀦𑁆𑀦𑀺𑀓𑀁𑀲𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀉𑀧𑀲𑀺𑀮𑁂𑀲𑀪𑀸𑀯𑀢𑁄, 𑀩𑀼𑀤𑁆𑀥 𑀯𑀻𑀭 𑀅𑀢𑁆𑀣𑀼𑀭𑀸𑀚𑀧𑀼𑀢𑁆𑀢𑀁 𑀅𑀚𑀭𑀸𑀫𑀭𑁄𑀢𑀺 𑀙𑁂𑀤𑁄, 𑀬𑀤𑀺𑀧𑀺 𑀲𑀩𑁆𑀩𑀫𑁆𑀧𑁂𑀢𑀁 𑀬𑀚𑁆𑀚𑁂𑀯𑀁𑀢𑁆𑀬𑀸𑀤𑀺𑀦𑀸 𑀯𑀼𑀢𑁆𑀢𑀁 𑀓𑁆𑀯𑀘𑀺 𑀲𑀤𑁆𑀤𑀧𑁆𑀧𑀪𑀸𑀯𑁂𑀦𑁂𑀯 𑀲𑀺𑀚𑁆𑀛𑀢𑀺, 𑀢𑀣𑀸𑀧𑀺 𑀧𑀓𑀸𑀭𑁄-𑀬𑀫𑁆𑀧𑀺 𑀲𑀢𑁆𑀣𑁂 𑀬𑁄𑀚𑁂𑀢𑀩𑁆𑀩𑁄 𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑁄.