𑀤𑁆𑀯𑀺𑀲𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤

𑀧𑀭𑀫𑀡𑁆𑀟𑀮𑀸𑀪𑀺𑀕𑀫𑀦𑁄

𑁧. 𑀅𑀢𑁆𑀢𑀦𑀸𑀪𑀺𑀫𑀢𑀲𑁆𑀲𑀸’𑀲𑀼, 𑀚𑀸𑀢𑀤𑁂𑀲𑀲𑁆𑀲 𑀧𑀢𑁆𑀢𑀺𑀬𑀸;

𑀲𑀫𑁆𑀧𑀼𑀡𑁆𑀡𑀫𑀦𑀲𑀗𑁆𑀓𑀧𑁆𑀧𑁄, 𑀤𑀼𑀲𑁆𑀲𑀗𑁆𑀓𑀧𑀯𑀺𑀯𑀚𑁆𑀚𑀺𑀢𑁄.

𑁨. 𑀯𑀚𑀺𑀭𑀽𑀧𑀫𑁄𑀭𑀼𑀧𑀜𑁆𑀜𑀸, 𑀩𑀮𑁂𑀦 𑀕𑀼𑀭𑀼𑀲𑀦𑁆𑀢𑀺𑀓𑁂;

𑀮𑀳𑀼𑀁 𑀩𑀳𑀼𑀜𑁆𑀘 𑀕𑀡𑁆𑀳𑀦𑁆𑀢𑁄, 𑀲𑀺𑀧𑁆𑀧𑀚𑀸𑀢𑀫𑀦𑁂𑀓 𑀓𑀁.

𑁩. 𑀚𑀺𑀦𑀸𑀕𑀫𑁂𑀲𑀼 𑀦𑁂𑀓𑁂𑀲𑀼, 𑀓𑁄𑀝𑀺𑀮𑁆𑀮𑀸 𑀤𑀻𑀲𑀼 𑀦𑀻𑀢𑀺𑀲𑀼;

𑀲𑀤𑁆𑀤𑀲𑀢𑁆𑀣𑁂 𑀘 𑀓𑀸𑀯𑁂𑀬𑁆𑀬𑁂, 𑀲𑀦𑀺𑀖𑀡𑁆𑀟𑀼𑀓 𑀓𑁂𑀝𑀼𑀪𑁂.

𑁪. 𑀦𑀘𑁆𑀘𑀕𑀻𑀢𑁂𑀲𑀼 𑀲𑀢𑁆𑀣𑁂𑀲𑀼, 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀺𑀓𑁂𑀲𑀼 𑀘;

𑀥𑀦𑀼 𑀔𑀕𑁆𑀕𑀸𑀤𑀺𑀦𑁂𑀓𑁂𑀲𑀼, 𑀲𑀢𑁆𑀣𑁂𑀲𑀼 𑀘 𑀯𑀺𑀲𑁂𑀲𑀢𑁄.

𑁫. 𑀧𑀸𑀭𑀧𑁆𑀧𑀢𑁆𑀢𑁄 𑀯𑀺𑀦𑀻𑀢𑀢𑁆𑀢𑁄, 𑀧𑀺𑀢𑀼 𑀭𑀜𑁆𑀜𑁄 𑀲𑀫𑀸𑀘𑀭𑀺;

𑀅𑀥𑀺𑀧𑁆𑀧𑀸𑀬𑀸𑀦𑀼𑀓𑀼𑀮𑀁’𑀯, 𑀲𑀤𑀸 𑀪𑀢𑁆𑀢𑀺𑀧𑀼𑀭𑀲𑁆𑀲𑀭𑁄.

𑁬. 𑀢𑀤𑀸 𑀲𑀤𑀸 𑀤𑀭𑀸𑀘𑀸𑀭-𑀕𑀼𑀡𑀸𑀭𑀸𑀥𑀺𑀢𑀫𑀸𑀦𑀲𑁄;

𑀧𑀺𑀬𑁂𑀦 𑀯𑀺𑀬 𑀫𑀺𑀢𑁆𑀢𑁂𑀦, 𑀢𑁂𑀦 𑀲𑀤𑁆𑀥𑀺𑀁 𑀫𑀳𑀻𑀧𑀢𑀺.

𑁭. 𑀉𑀬𑁆𑀬𑀸𑀦𑀚𑀮𑀓𑀻𑀴𑀸𑀤𑀺-𑀲𑀼𑀔𑀁 𑀦𑀸𑀦𑀧𑁆𑀧𑀓𑀸𑀭𑀓𑀁;

𑀅𑀦𑀼𑀪𑁄𑀢𑁆𑀯𑀸 𑀲𑀤𑁂𑀲𑀲𑁆𑀫𑀺𑀁, 𑀲𑀜𑁆𑀘𑀭𑀦𑁆𑀢𑁄 𑀢𑀳𑀺𑀁 𑀢𑀳𑀺𑀁.

𑁮. 𑀏𑀓𑀤𑀸𑀲𑀗𑁆𑀔𑀲𑁂𑀦𑀸𑀥𑀺-𑀧𑀢𑀺𑀦𑀸 𑀤𑀴𑁆𑀳𑀪𑀢𑁆𑀢𑀺𑀦𑀸;

𑀲𑀭𑀝𑁆𑀞𑀲𑀻𑀫𑀸 𑀭𑀓𑁆𑀔𑀸𑀬, 𑀬𑁄 𑀚𑀺𑀢𑁂𑀦 𑀩𑀮𑀻𑀬𑀲𑀸.

𑁯. 𑀅𑀚𑁆𑀛𑀸𑀯𑀼𑀢𑁆𑀣𑀲𑁆𑀲 𑀘 𑀩𑀮𑀢𑁆𑀣-𑀮𑀺𑀦𑀫𑀲𑁆𑀲 𑀘 𑀲𑀦𑁆𑀢𑀺𑀓𑀁;

𑀕𑀸𑀫𑀲𑀸’𑀕𑀜𑁆𑀙𑀺 𑀲𑀼𑀢𑁆𑀯𑀸𑀦, 𑀢𑀫𑀢𑁆𑀣𑀁 𑀥𑀚𑀺𑀦𑀻𑀧𑀢𑀺.

𑁧𑁦. 𑀕𑀸𑀫𑀁 𑀢𑀁 𑀲𑀸𑀥𑀼𑀓𑀁 𑀲𑀚𑁆𑀚𑀼, 𑀲𑀚𑁆𑀚𑀸𑀧𑁂𑀢𑁆𑀯𑀸 𑀲𑀧𑀼𑀢𑁆𑀢𑀓𑀁;

𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀫𑀳𑀻𑀧𑀸𑀮𑀁, 𑀧𑀡𑀫𑀺𑀢𑁆𑀯𑀸 𑀞𑀺𑀢𑁄 𑀢𑀤𑀸.

𑁧𑁧. 𑀧𑀺𑀢𑀸 𑀧𑀼𑀢𑁆𑀢𑁄 𑀉𑀪𑁄 𑀢𑀲𑁆𑀲, 𑀲𑀫𑁆𑀪𑀸𑀲𑀺𑀬 𑀧𑀺𑀬𑀁 𑀯𑀘𑁄;

𑀦𑁂𑀓𑀥𑀸’𑀭𑀸𑀥𑀺𑀢𑀸 𑀢𑁂𑀦, 𑀢𑀁 𑀕𑀸𑀫𑀁 𑀲𑀫𑀼𑀧𑀸𑀕𑀕𑀼𑀁.

𑁧𑁨. 𑀢𑀳𑀺𑀁 𑀓𑀢𑀺𑀘𑀺 𑀪𑀽𑀧𑀸𑀮𑁄, 𑀯𑀸𑀲𑀭𑁂 𑀯𑀻𑀢𑀺𑀦𑀸𑀫𑀺𑀬;

𑀲𑁂𑀦𑀸𑀧𑀢𑀺𑀁 𑀲𑀫𑀸𑀳𑀽𑀬, 𑀇𑀤𑀁 𑀯𑀘𑀦𑀁 𑀫𑀩𑁆𑀭𑀯𑀺.

𑁧𑁩. 𑀧𑀼𑀢𑁆𑀢𑁄 𑀫𑁂 𑀤𑀸𑀦𑀺𑀯𑀬𑀲𑀺, 𑀞𑀺𑀢𑁄’ 𑀧𑀦𑀬𑀦𑀸𑀭𑀳𑁂;

𑀢𑀲𑁆𑀲𑁄𑀧𑀦𑀬𑀦𑀁 𑀓𑀸𑀢𑀼𑀁, 𑀫𑀳𑁄𑀧𑀓𑀭𑀡𑀁 𑀮𑀳𑀼𑀁.

𑁧𑁪. 𑀲𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀢𑀁 𑀲𑀼𑀢𑁆𑀯𑀸, 𑀲𑁄𑀧𑀺 𑀲𑁂𑀦𑀸𑀥𑀺𑀦𑀸𑀬𑀓𑁄;

𑀲𑀩𑁆𑀩𑀼𑀧𑀓𑀭𑀡𑀁 𑀔𑀺𑀧𑁆𑀧𑀁, 𑀫𑀗𑁆𑀕𑀮𑀢𑁆𑀣𑀁 𑀲𑀼𑀲𑀚𑁆𑀚𑀬𑀺.

𑁧𑁫. 𑀲𑀼𑀕𑀦𑁆𑀥 𑀤𑀻𑀧𑀧𑀼𑀧𑁆𑀨𑀸𑀤𑀺-𑀯𑀢𑁆𑀣𑀽𑀳𑀺 𑀤𑀺𑀯𑀲𑀢𑁆𑀢𑀬𑀁;

𑀧𑀼𑀩𑁆𑀩𑀓𑀸𑀭𑀁 𑀓𑀭𑀺𑀢𑁆𑀯𑀸𑀦, 𑀫𑀳𑀦𑁆𑀢𑀁 𑀭𑀢𑀦𑀢𑁆𑀢𑀬𑁂.

𑁧𑁬. 𑀯𑁂𑀤𑀺𑀓𑀸𑀘𑀸𑀭𑀤𑀓𑁆𑀔𑁂𑀳𑀺, 𑀤𑁆𑀯𑀺𑀚𑁂𑀳𑀺 𑀧𑀼𑀣𑀼𑀯𑀻𑀧𑀢𑀺;

𑀲𑀫𑁆𑀧𑀪𑀸𑀯𑀸𑀦𑀼 𑀭𑀽𑀧𑀁𑀯, 𑀫𑀗𑁆𑀕𑀮𑀁 𑀢𑀁 𑀲𑀫𑀸𑀧𑀺𑀬.

𑁧𑁭. 𑀧𑀭𑀓𑁆𑀓𑀫𑀓𑀼𑀫𑀸𑀭𑁂𑀦, 𑀢𑁂𑀦 𑀲𑀤𑁆𑀥𑀺𑀁 𑀲𑀫𑀸𑀭𑀪𑀺;

𑀯𑀲𑀦𑁆𑀢𑀓𑀻𑀴𑀁 𑀫𑀳𑀢𑀺𑀁, 𑀲𑀸𑀫𑀘𑁆𑀘𑁄 𑀓𑀻𑀴𑀺𑀢𑀼𑀁 𑀢𑀤𑀸.

𑁧𑁮. 𑀭𑀸𑀚𑀸 𑀓𑀺𑀢𑁆𑀢𑀺 𑀲𑀺𑀭𑀻𑀫𑁂𑀖𑁄-𑀭𑁄𑀳𑀡𑁂 𑀯𑀲𑀢𑁄 𑀢𑀤𑀸;

𑀲𑀺𑀭𑀻𑀯𑀮𑁆𑀮𑀪𑀦𑀸𑀫𑀲𑁆𑀲, 𑀲𑀪𑀸𑀢𑀼 𑀫𑀭𑀡𑀫𑁆𑀧𑀺 𑀘.

𑁧𑁯. 𑀫𑀸𑀡𑀪𑀭𑀡𑀦𑀸𑀫𑀲𑁆𑀲, 𑀭𑀚𑁆𑀚𑀮𑀸𑀪𑀜𑁆𑀘 𑀤𑁂𑀯𑀺𑀬𑀸;

𑀫𑀺𑀢𑁆𑀢𑀸𑀬 𑀧𑀝𑀺𑀮𑀸𑀪𑀜𑁆𑀘, 𑀲𑀺𑀭𑀻𑀯𑀮𑁆𑀮𑀪𑀲𑀽𑀦𑀼 𑀦𑁄.

𑁨𑁦. 𑀭𑁄𑀳𑀡𑀸𑀕𑀢𑀤𑀽𑀢𑁂𑀳𑀺, 𑀲𑀼𑀡𑀺𑀢𑁆𑀯𑀸 𑀲𑀓𑀪𑀸𑀢𑀼𑀦𑁄;

𑀓𑀸𑀮𑀓𑁆𑀭𑀺𑀬𑀸𑀬 𑀲𑀜𑁆𑀚𑀸𑀢-𑀲𑁄𑀓𑀯𑁂𑀕𑀁 𑀲𑀼𑀤𑀼𑀲𑁆𑀲𑀳𑀁.

𑁨𑁧. 𑀫𑀺𑀢𑁆𑀢𑀸𑀬𑀢𑀦𑀬𑀼𑀧𑁆𑀧𑀢𑁆𑀢𑀺 𑀧𑀯𑀢𑁆𑀢𑀺𑀁 𑀲𑀯𑀡𑁂𑀦 𑀢𑀁;

𑀯𑀺𑀦𑁂𑀬𑁆𑀬 𑀯𑀺𑀭𑀢𑁄 𑀢𑀫𑁆𑀳𑀸, 𑀯𑀲𑀦𑁆𑀢𑀲𑀫𑀬𑀼𑀲𑁆𑀲𑀯𑀸.

𑁨𑁨. 𑀦𑀺𑀯𑀢𑁆𑀢𑁂𑀢𑁆𑀯𑀸𑀦 𑀢𑀢𑁆𑀣𑁂𑀯, 𑀲𑁂𑀦𑀸𑀦𑀺𑀁 𑀲𑀗𑁆𑀔𑀦𑀸𑀫𑀓𑀁;

𑀧𑀼𑀢𑁆𑀢𑁂𑀦 𑀲𑀳 𑀲𑁄 𑀲𑀗𑁆𑀔-𑀢𑁆𑀣𑀮𑀺 𑀦𑀸𑀫𑀁 𑀧𑀼𑀭𑀁 𑀕𑀫𑀺.

𑁨𑁩. 𑀧𑀭𑀓𑁆𑀓𑀫𑀓𑀼𑀫𑀸𑀭𑁂𑀦, 𑀢𑁂𑀦 𑀲𑀤𑁆𑀥𑀺𑀁 𑀢𑀳𑀺𑀁 𑀲𑀼𑀔𑀁;

𑀯𑀲𑀢𑁄 𑀢𑀲𑁆𑀲 𑀪𑀽𑀧𑀲𑁆𑀲, 𑀯𑀲𑁆𑀲𑀫𑁂𑀓𑀫𑀢𑀺𑀓𑁆𑀓𑀫𑀺.

𑁨𑁪. 𑀫𑀸𑀡𑀸𑀪𑀭𑀡𑀪𑀽𑀧𑀲𑁆𑀲, 𑀤𑁂𑀯𑀻 𑀘𑀸𑀧𑀺 𑀧𑀪𑀸𑀯𑀢𑀻;

𑀮𑀪𑀺𑀢𑁆𑀣 𑀤𑀼𑀢𑀺𑀬𑀸 𑀓𑀺𑀢𑁆𑀢𑀺-𑀲𑀺𑀭𑀻 𑀫𑁂𑀖𑀯𑁆𑀳𑀬𑀁 𑀲𑀼𑀢𑀁.

𑁨𑁫. 𑀲𑀼𑀡𑀺𑀢𑁆𑀯𑀸 𑀢𑀜𑁆𑀘 𑀲𑁄 𑀅𑀫𑁆𑀳𑀁, 𑀯𑀁𑀲𑁄 𑀚𑀸𑀢𑁄 𑀫𑀳𑀸’’𑀇𑀢𑀺;

𑀅𑀳𑀼 𑀓𑀺𑀢𑁆𑀢𑀺𑀲𑀺𑀭𑀻𑀫𑁂𑀖𑁄, 𑀢𑀤𑀸 𑀅𑀢𑁆𑀢𑀫𑀦𑁄 𑀪𑀼𑀲𑀁.

𑁨𑁬. 𑀮𑀁𑀓𑀸𑀤𑀻𑀧𑁄𑀧𑀪𑁄𑀕𑁂𑀓-𑀳𑁂𑀢𑀼𑀦𑀸 𑀫𑀳𑀢𑀸 𑀲𑀢𑀸;

𑀅𑀲𑀸𑀥𑀸𑀭𑀡𑀪𑀽𑀪𑁂𑀦, 𑀘𑁄𑀤𑀺𑀢𑁄 𑀧𑀼𑀜𑁆𑀜𑀓𑀫𑁆𑀫𑀼𑀦𑀸.

𑁨𑁭. 𑀓𑀼𑀫𑀸𑀭𑁄 𑀲𑁄’𑀣 𑀧𑀺𑀢𑀭𑀸, 𑀧𑀺𑀬𑀫𑀺𑀢𑁆𑀢𑁂 𑀯𑀺𑀬𑀢𑁆𑀢𑀦𑀺;

𑀓𑀭𑀺𑀬𑀫𑀸𑀦𑀁 𑀲𑀲𑁆𑀦𑁂𑀳𑀁, 𑀫𑀳𑀦𑁆𑀢𑀁 𑀘𑁄’𑀧𑀮𑀸𑀮𑀦𑀁.

𑁨𑁮. 𑀲𑀘𑀺𑀯𑀸𑀦𑀫𑀦𑁂𑀓𑁂𑀲𑀁, 𑀪𑀬𑀪𑀢𑁆𑀢𑀻 𑀧𑀼𑀭𑀲𑁆𑀲𑀭𑀁;

𑀓𑁆𑀭𑀺𑀬𑀫𑀸𑀦𑀫𑀼𑀧𑀝𑁆𑀞𑀸𑀦𑀁, 𑀦 𑀫𑀜𑁆𑀜𑀦𑁆𑀢𑁄 𑀢𑀺𑀡𑀸𑀬𑀧𑀺.

𑁨𑁯. 𑀮𑀁𑀓𑀸𑀤𑀻𑀧𑀫𑀺𑀫𑀁 𑀲𑀩𑁆𑀩 𑀫𑁂𑀓𑀘𑁆𑀙𑀢𑁆𑀢𑁄 𑀧𑀲𑁄𑀪𑀺𑀢𑀁;

𑀔𑀺𑀧𑁆𑀧𑀁 𑀓𑀸𑀭𑁂𑀢𑀼𑀓𑀸𑀫𑁄 𑀲𑁄, 𑀲𑀬𑀁 𑀇𑀢𑀺 𑀯𑀺𑀘𑀺𑀦𑁆𑀢𑀬𑀺.

𑁩𑁦. 𑀓𑁂𑀲 𑀅𑀓𑁆𑀔𑀓 𑀕𑀻𑀯𑀝𑁆𑀞𑀺-𑀤𑀸𑀞𑀸 𑀧𑀢𑁆𑀢𑀸𑀦 𑀫𑁂𑀯 𑀘;

𑀧𑀤𑀘𑁂𑀢𑁆𑀬 𑀫𑀳𑀸𑀩𑁄𑀥𑀺-𑀲𑀸𑀔𑀸𑀦𑀜𑁆𑀘𑀸𑀧𑀺 𑀲𑀢𑁆𑀣𑀼𑀦𑁄.

𑁩𑁧. 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀓𑁆𑀔𑀦𑁆𑀥𑀸𑀦 𑀫𑁂𑀯 𑀘;

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀧𑁆𑀧𑀸𑀦𑀁, 𑀆𑀥𑀸𑀭𑀢𑁆𑀢𑀸 𑀘 𑀦𑀺𑀘𑁆𑀘𑀲𑁄.

𑁩𑁨. 𑀆𑀓𑀭𑀢𑁆𑀢𑀸 𑀘 𑀦𑁂𑀓𑁂𑀲𑀁, 𑀫𑀡𑀺𑀫𑀼𑀢𑁆𑀢𑀸𑀤𑀺𑀯𑀢𑁆𑀣𑀽𑀦𑀁;

𑀲𑀫𑁆𑀫𑀢𑁄𑀧𑀺 𑀯𑀺𑀲𑀺𑀝𑁆𑀞𑁄𑀢𑀺, 𑀤𑀻𑀧𑁄𑀦𑀸𑀢𑀺 𑀫𑀳𑀸 𑀅𑀬𑀁.

𑁩𑁩. 𑀢𑀬𑁄 𑀫𑁂 𑀧𑀺𑀢𑀭𑁄 𑀪𑀽𑀧𑀸, 𑀫𑀸𑀢𑀼𑀮𑁄𑀧𑀺 𑀘 𑀲𑀩𑁆𑀩𑀣𑀸;

𑀏𑀓𑀘𑁆𑀙𑀢𑁆𑀢𑁂𑀦 𑀯𑀢𑁆𑀢𑁂𑀢𑀼, 𑀫𑀲𑀫𑀢𑁆𑀣𑀸 𑀯𑀺𑀪𑀚𑁆𑀚𑀺’𑀫𑀁.

𑁩𑁪. 𑀪𑀼𑀜𑁆𑀚𑀦𑁆𑀢𑀸 𑀏𑀢𑁆𑀢𑀓𑁂𑀦𑁂𑀯, 𑀓𑀢𑀓𑀺𑀘𑁆𑀘𑀸 𑀫𑀬𑀁 𑀇𑀢𑀺;

𑀫𑀜𑁆𑀜𑀦𑁆𑀢𑀸 𑀯𑀺𑀕𑀢𑀘𑁆𑀙𑀦𑁆𑀤𑀸’𑀪𑀺𑀲𑁂𑀓𑀫𑁆𑀳𑀺 𑀓𑀼𑀮𑁄𑀘𑀺𑀢𑁂.

𑁩𑁫. 𑀭𑀝𑁆𑀞𑁂𑀲𑀓𑁂 𑀲𑀓𑁂𑀬𑁂𑀯, 𑀇𑀲𑁆𑀲𑁂𑀭𑀁 𑀲𑀫𑁆𑀧𑀯𑀢𑁆𑀢𑀬𑀼𑀁;

𑀓𑀲𑀺𑀓𑀫𑁆𑀫𑀸𑀤𑀺𑀓𑀁 𑀕𑀸𑀫-𑀪𑁄𑀚𑀓𑀸 𑀯𑀺𑀬 𑀦𑀺𑀲𑁆𑀲𑀺𑀢𑀸.

𑁩𑁬. 𑀢𑁂𑀲𑀼 𑀓𑀺𑀢𑁆𑀢𑀺𑀲𑀺𑀭𑀺 𑀫𑁂𑀖𑀁, 𑀧𑁂𑀢𑁆𑀢𑁂𑀬𑁆𑀬𑀁 𑀫𑁂 𑀞𑀧𑁂𑀢𑁆𑀯 𑀢𑁂;

𑀅𑀕𑀫𑀁𑀲𑀼 𑀬𑀣𑀸𑀓𑀫𑁆𑀫𑀁, 𑀲𑁂𑀲𑀸 𑀪𑀽𑀧𑀢𑀬𑁄 𑀢𑀬𑁄.

𑁩𑁭. 𑀫𑀘𑁆𑀘𑀸𑀦𑀁 𑀧𑀭𑀫𑀁 𑀆𑀬𑀼, 𑀯𑀢𑁂’𑀤𑀸𑀦𑀺 𑀧𑀭𑀺𑀢𑁆𑀢𑀓𑀁;

𑀩𑀸𑀮𑀸𑀬𑀼𑀯𑀸𑀦𑁄 𑀯𑀼𑀤𑁆𑀥𑀸 𑀘, 𑀇𑀫𑁂 𑀲𑀢𑁆𑀢𑀸’𑀦𑀼𑀧𑀼𑀩𑁆𑀩𑀲𑁄.

𑁩𑁮. 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀫𑀭𑀡-𑀫𑀻𑀢𑀺’𑀬𑀁 𑀦𑀺𑀬𑀫𑁄𑀧𑀺 𑀘;

𑀦 𑀳𑁂𑀯 𑀅𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀲𑀁𑀯𑀺𑀚𑁆𑀚𑀢𑀺 𑀓𑀤𑀸𑀘𑀺𑀧𑀺.

𑁩𑁯. 𑀢𑀲𑁆𑀫𑀸 𑀲𑀭𑀻𑀭𑀓𑁂 𑀅𑀲𑁆𑀫𑀺𑀁, 𑀪𑀗𑁆𑀕𑀼𑀭𑁂 𑀲𑀸𑀭𑀯𑀚𑁆𑀚𑀺𑀢𑁂;

𑀳𑀻𑀴𑀺𑀢𑁂 𑀲𑀸𑀭𑀤𑀲𑁆𑀲𑀻𑀳𑀺, 𑀅𑀧𑁂𑀓𑁆𑀔𑀁 𑀳𑀺𑀢𑁆𑀯𑀸 𑀲𑀩𑁆𑀩𑀣𑀸.

𑁪𑁦. 𑀧𑀺𑀳𑀦𑀺𑀬𑁂 𑀬𑀲𑁄𑀤𑁂𑀳𑁂, 𑀘𑀺𑀭𑀝𑁆𑀞𑀸𑀬𑀺𑀫𑁆𑀳𑀺 𑀲𑀩𑁆𑀩𑀤𑀸;

𑀅𑀫𑁆𑀳𑀸𑀤𑀺𑀲𑁂𑀳𑀺 𑀓𑀢𑁆𑀢𑀩𑁆𑀩𑁄, 𑀭𑀸𑀚𑀧𑀼𑀢𑁆𑀢𑁂𑀳𑀺 𑀆𑀤𑀭𑁄.

𑁪𑁧. 𑀉𑀫𑁆𑀫𑀕𑁆𑀕𑀚𑀸𑀢𑀓𑀸𑀤𑀻𑀲𑀼, 𑀘𑀸𑀭𑀺𑀢𑁆𑀢𑀜𑁆𑀘𑀸𑀧𑀺 𑀪𑀽𑀫𑀺𑀲𑀼;

𑀯𑀺𑀳𑀺𑀢𑀁 𑀩𑁄𑀥𑀺𑀲𑀢𑁆𑀢𑁂𑀦, 𑀯𑀻𑀭𑀪𑀸𑀯𑀸𑀤𑀺𑀦𑀺𑀲𑁆𑀲𑀺𑀢𑀁.

𑁪𑁨. 𑀭𑀸𑀫𑀸𑀬𑀡𑀪𑀸𑀭𑀢𑀸𑀤𑀺-𑀮𑁄𑀓𑀺𑀬𑀸𑀲𑀼 𑀓𑀣𑀸𑀲𑀼𑀧𑀺;

𑀭𑀸𑀫𑀲𑁆𑀲 𑀯𑀺𑀓𑁆𑀓𑀫𑀜𑁆𑀘𑁂𑀯, 𑀢𑀲𑁆𑀲 𑀭𑀸𑀯𑀡𑀖𑀸𑀢𑀺𑀦𑁄.

𑁪𑁩. 𑀤𑀼𑀬𑁄𑀥𑀦𑀸𑀤𑀺𑀭𑀸𑀚𑀸𑀦𑁄, 𑀳𑀦𑁆𑀢𑁆𑀯𑀸𑀬𑀼𑀤𑁆𑀥𑁂 𑀧𑀯𑀢𑁆𑀢𑀺𑀢𑀁;

𑀯𑀺𑀓𑁆𑀓𑀫𑀸𑀢𑀺 𑀲𑀬𑀜𑁆𑀘𑁂𑀯, 𑀧𑀜𑁆𑀘𑀦𑁆𑀦𑀁 𑀧𑀡𑁆𑀟𑀼𑀲𑀽𑀦𑀽𑀦𑀁.

𑁪𑁪. 𑀇𑀢𑀺𑀳𑀸𑀲𑀓𑀣𑀸𑀬𑀜𑁆𑀘, 𑀤𑁂𑀯𑀸𑀲𑀼𑀭𑀭𑀡𑁂 𑀧𑀼𑀭𑀸;

𑀤𑀼𑀲𑁆𑀲𑀦𑁆𑀢𑀸𑀤𑀺𑀫𑀳𑀻𑀧𑁂𑀳𑀺, 𑀓𑀢𑀜𑁆𑀘 𑀘𑀭𑀺𑀢𑀩𑁆𑀪𑀽𑀢𑀁.

𑁪𑁫. 𑀉𑀫𑁆𑀫𑀽𑀮𑀺𑀢𑀯𑀢𑁄 𑀢𑀲𑁆𑀲, 𑀦𑀦𑁆𑀤𑀯𑀁𑀲𑀦𑀭𑀺𑀲𑁆𑀲𑀭𑁂;

𑀘𑀸𑀭𑀓𑁆𑀓𑀤𑁆𑀯𑀺𑀚𑀲𑁂𑀝𑁆𑀞𑀲𑁆𑀲, 𑀲𑀼𑀢𑁆𑀯𑀸 𑀩𑀼𑀤𑁆𑀥𑀺𑀩𑀮𑀫𑁆𑀧𑀺 𑀘.

𑁪𑁬. 𑀲𑀩𑁆𑀩𑀸 𑀦𑁂𑀢𑀸𑀦𑀺 𑀮𑁄𑀓𑀫𑁆𑀳𑀺, 𑀬𑀸𑀯𑀚𑁆𑀚𑀤𑀺𑀯𑀲𑀸 𑀪𑀼𑀯𑀺;

𑀢𑁂𑀲𑀁 𑀅𑀲𑀦𑁆𑀦𑀺𑀥𑀸𑀦𑁂𑀧𑀺, 𑀲𑀼𑀧𑁆𑀧𑀲𑀺𑀤𑁆𑀥𑀺𑀁 𑀕𑀢𑀸𑀦𑀺 𑀳𑀺.

𑁪𑁭. 𑀲𑀼𑀮𑀤𑁆𑀥𑀁 𑀚𑀻𑀯𑀺𑀢𑀁 𑀢𑁂𑀲𑀁, 𑀅𑀲𑀸𑀥𑀸𑀭𑀡𑀫𑀻𑀤𑀺𑀲𑀁;

𑀘𑀭𑀺𑀢𑀸𑀢𑀺𑀲𑀬𑀁 𑀓𑀢𑁆𑀢𑀼𑀁, 𑀲𑀫𑀢𑁆𑀣𑀸 𑀳𑁄𑀦𑁆𑀢𑀺 𑀬𑁂 𑀪𑀼𑀯𑀺.

𑁪𑁮. 𑀚𑀸𑀬𑀺𑀢𑁆𑀯𑀸 𑀔𑀢𑁆𑀢𑀯𑀁𑀲𑀫𑁆𑀳𑀺, 𑀔𑀢𑁆𑀢𑀯𑀻𑀭𑀯𑀭𑁄𑀥𑀺𑀢𑀁;

𑀬𑀤𑀺𑀳𑀁 𑀦 𑀓𑀭𑀺𑀲𑁆𑀲𑀸𑀫𑀺, 𑀫𑁄𑀖𑀸 𑀫𑁂 𑀚𑀸𑀢𑀺 𑀳𑁂𑀲𑁆𑀲𑀢𑀺.

𑁪𑁯. 𑀢𑁂𑀲𑀫𑀩𑁆𑀪𑀥𑀺𑀓𑀸 𑀓𑀸𑀮-𑀲𑀫𑁆𑀧𑀤𑀸𑀬𑁂𑀯 𑀓𑁂𑀯𑀮𑀁;

𑀫𑀬𑀸 𑀢𑁂 𑀅𑀥𑀺𑀓𑀸 𑀓𑀺𑀦𑁆𑀢𑀼, 𑀧𑀜𑁆𑀜𑀸𑀤𑀻𑀳𑀻𑀢𑀺 𑀘𑀺𑀦𑁆𑀢𑀺𑀬.

𑁫𑁦. 𑀧𑀺𑀢𑀼𑀭𑀸𑀚𑀸 𑀘 𑀫𑁂’𑀤𑀸𑀦𑀺, 𑀧𑀘𑁆𑀙𑀺𑀫𑁂 𑀯𑀬𑀲𑀺𑀝𑁆𑀞𑀺𑀢𑁄;

𑀬𑀤𑀺𑀤𑀁 𑀧𑁂𑀢𑁆𑀢𑀺𑀓𑀁 𑀭𑀚𑁆𑀚𑀁, 𑀫𑀫 𑀳𑀢𑁆𑀣𑀕𑀢𑀩𑁆𑀪𑀯𑁂.

𑁫𑁧. 𑀭𑀸𑀚𑀮𑀓𑁆𑀔𑀺𑀯 𑀲𑁄 𑀧𑁂𑀢-𑀘𑁂𑀢𑀲𑁄 𑀫𑁂 𑀧𑀫𑀸𑀤𑀢𑁄;

𑀬𑀣𑀺𑀘𑁆𑀙𑀺𑀢𑀜𑁆𑀘𑁂 𑀦 𑀪𑀯𑁂, 𑀫𑀳𑀢𑀻 𑀚𑀸𑀦𑀺 𑀫𑁂 𑀪𑀼𑀲𑀁.

𑁫𑁨. 𑀏𑀢𑁆𑀣𑁂𑀯 𑀦𑀺𑀯𑀲𑀦𑁆𑀢𑁄’𑀳𑀁, 𑀘𑀭𑀸𑀧𑀺𑀬 𑀲𑀓𑁂 𑀯𑀭𑁂;

𑀧𑀭𑀫𑀡𑁆𑀟𑀮𑀯𑀼𑀢𑁆𑀢𑀦𑁆𑀢𑀁, 𑀚𑀸𑀦𑁂𑀬𑁆𑀬𑀁 𑀬𑀤𑀺 𑀢𑀢𑁆𑀢𑀦𑁄.

𑁫𑁩. 𑀭𑀦𑁆𑀥𑀁 𑀧𑀘𑁆𑀘𑀢𑁆𑀣𑀺𑀓𑀸𑀦𑀦𑁆𑀢𑀼, 𑀧𑀓𑀸𑀲𑁂𑀢𑀼𑀁 𑀭𑀣𑀸𑀢𑀣𑀁;

𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑀽𑀧𑀁 𑀫𑁂, 𑀲𑀫𑀢𑁆𑀣𑀸 𑀯𑀸 𑀦 𑀯𑀸𑀘𑀭𑀸.

𑁫𑁪. 𑀬𑁂 𑀓𑁂𑀘𑀺’𑀥 𑀚𑀦𑀸 𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀫𑀫 𑀲𑀫𑁆𑀫𑀼𑀔𑀸;

𑀩𑀮𑀻𑀬𑀢𑁆𑀢𑀁’𑀯 𑀲𑀢𑁆𑀢𑀽𑀦𑀁, 𑀓𑀣𑀬𑀦𑁆𑀢𑀺 𑀅𑀦𑁂𑀓𑀲𑁄.

𑁫𑁫. 𑀧𑀘𑁆𑀘𑁂𑀓𑀭𑀝𑁆𑀞𑀲𑀸𑀫𑀻𑀳𑀺, 𑀧𑀺𑀢𑀼𑀪𑀽𑀧𑁂𑀳𑀺 𑀢𑀺𑀳𑀺𑀧𑀺;

𑀏𑀓𑀻𑀪𑀽𑀬 𑀓𑀭𑀺𑀢𑁆𑀯𑀸𑀦, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀳𑀸𑀳𑀯𑀁.

𑁫𑁬. 𑀲𑀸𑀥𑁂𑀢𑀼𑀁 𑀤𑀼𑀓𑁆𑀓𑀭𑀁 𑀭𑀝𑁆𑀞𑀁, 𑀪𑀯𑀢𑁂 𑀓𑀸𑀓𑀺𑀦𑀸 𑀓𑀣𑀁;

𑀲𑀺𑀲𑀼𑀦𑀸 𑀕𑀡𑁆𑀳𑀺𑀢𑀼𑀁 𑀲𑀓𑁆𑀓𑀸, 𑀔𑀼𑀤𑁆𑀤𑀭𑀚𑁆𑀚𑁄 𑀧𑀪𑁄𑀕𑀺𑀦𑀸.

𑁫𑁭. 𑀲𑀼𑀓𑀭𑀁 𑀫𑀽𑀮𑀪𑀽𑀢𑀲𑁆𑀲, 𑀢𑀲𑁆𑀲 𑀭𑀚𑁆𑀚𑀲𑁆𑀲 𑀲𑀸𑀥𑀦𑀁;

𑀇𑀢𑀺 𑀤𑀼𑀘𑁆𑀘𑀺𑀦𑁆𑀢𑀁𑀢𑀁 𑀢𑀼𑀬𑁆𑀳𑀁, 𑀤𑀽𑀭𑁂 𑀢𑀩𑁆𑀩𑀫𑀺𑀤𑀁’’𑀇𑀢𑀺.

𑁫𑁮. 𑀓𑀡𑁆𑀡𑁂 𑀢𑀢𑁆𑀣𑀲𑀮𑀸𑀓𑀸𑀬𑁄, 𑀧𑀯𑁂𑀲𑁂𑀦𑁆𑀢𑀸’𑀯 𑀦𑁂𑀓𑀲𑁄;

𑀫𑀳𑀦𑁆𑀢𑀢𑁆𑀢𑀁 𑀓𑀣𑁂𑀦𑁆𑀢𑁂’𑀯𑀁, 𑀩𑀳𑀼𑀥𑀸 𑀧𑀭𑀫𑀡𑁆𑀟𑀮𑁂.

𑁫𑁯. 𑀅𑀚𑀸𑀦𑀦𑀁 𑀬𑀣𑀸𑀪𑀽𑀢𑀁, 𑀯𑀤𑀦𑁆𑀢𑀸𑀦𑀁 𑀓𑀼𑀩𑀼𑀤𑁆𑀥𑀺𑀦𑀁;

𑀲𑀩𑁆𑀩𑀫𑁂𑀢𑀁 𑀯𑀘𑁄 𑀚𑀸𑀢𑀼, 𑀲𑀤𑁆𑀥𑀸𑀢𑀩𑁆𑀩𑀁 𑀲𑀺𑀬𑀸 𑀦 𑀳𑀺.

𑁬𑁦. 𑀮𑁂𑀲𑁂𑀦𑁂𑀓𑁂𑀦 𑀕𑀦𑁆𑀢𑁆𑀯𑀸𑀦, 𑀔𑀺𑀧𑁆𑀧𑀁’𑀯 𑀧𑀭𑀫𑀡𑁆𑀟𑀮𑀁;

𑀲𑀭𑀽𑀧𑀁 𑀢𑀢𑁆𑀣 𑀉𑀲𑁆𑀲𑀸𑀫𑀺, 𑀅𑀳𑀫𑁂𑀯𑁂𑀢𑀺 𑀘𑀺𑀦𑁆𑀢𑀬𑀺.

𑁬𑁧. 𑀬𑀤𑀺 𑀫𑁂 𑀧𑀻𑀢𑀼𑀪𑀽𑀧𑀸𑀮𑁄, 𑀯𑀺𑀜𑁆𑀜𑀸𑀬𑁂𑀢𑀁 𑀯𑀺𑀢𑀓𑁆𑀓𑀺𑀢𑀁;

𑀅𑀪𑀺𑀚𑀸𑀢𑀲𑁆𑀲 𑀧𑀼𑀢𑁆𑀢𑀲𑁆𑀲, 𑀯𑀁𑀲𑀚𑁄𑀢𑀺𑀓𑀭𑀲𑁆𑀲 𑀫𑁂.

𑁬𑁨. 𑀕𑀢𑀲𑁆𑀲 𑀲𑀢𑁆𑀣𑀼 𑀯𑀺𑀲𑀬-𑀫𑀦𑀢𑁆𑀣𑁄𑀧𑀺 𑀲𑀺𑀬𑀸 𑀇𑀢𑀺;

𑀅𑀦𑀼𑀓𑀫𑁆𑀧𑀸𑀥𑀺𑀬𑀸 𑀫𑀬𑁆𑀳𑀁, 𑀕𑀫𑀦𑀁 𑀯𑀸𑀭𑀬𑀺𑀲𑁆𑀲𑀢𑀺.

𑁬𑁩. 𑀫𑀦𑁄𑀭𑀣𑀲𑁆𑀲 𑀲𑀁𑀲𑀺𑀤𑁆𑀥𑀺, 𑀲𑀩𑁆𑀩𑀣𑀸 𑀫𑁂𑀦 𑀳𑁂𑀲𑁆𑀲𑀢𑀺;

𑀢𑀲𑁆𑀫𑀸 𑀦𑀺𑀕𑀼𑀴𑀭𑀽𑀧𑁂𑀦, 𑀕𑀫𑀦𑀁 𑀪𑀤𑁆𑀤𑀓𑀁 𑀇𑀢𑀺.

𑁬𑁪. 𑀮𑀤𑁆𑀥𑀸𑀦 𑀭𑀢𑁆𑀢𑀺𑀬𑀫 𑀣𑁂𑀓𑀤𑀺𑀦𑀁 𑀔𑀡𑀜𑁆𑀜𑀽,

𑀲𑁄 𑀢𑀸𑀤𑀺𑀲𑀁 𑀔𑀡𑀫𑀔𑀻𑀡𑀢𑀭𑁄𑀭𑀽𑀧𑀸𑀬𑁄;

𑀚𑀸𑀦𑀸𑀢𑀺 𑀦𑁄 𑀲𑀓𑀧𑀺𑀢𑀸𑀕𑀫𑀦𑀁 𑀢𑀣𑀸𑀢𑀁,

𑀕𑁂𑀳𑀸’𑀪𑀺𑀦𑀺𑀓𑁆𑀔𑀫𑀺𑀢𑀣𑀸 𑀘𑀢𑀼𑀭𑁄 𑀓𑀼𑀫𑀸𑀭𑁄.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀧𑀭𑀫𑀡𑁆𑀟𑀮𑀸𑀪𑀺𑀕𑀫𑀦𑁄 𑀦𑀸𑀫

𑀤𑁆𑀯𑀺𑀲𑀝𑁆𑀞𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.