𑀲𑀝𑁆𑀞𑀺𑀫 𑀧𑀭𑀺𑀘𑁆𑀙𑁂𑀤

𑀓𑀼𑀫𑀸𑀭𑁄𑀤𑀬𑁄

𑁧. 𑀭𑁄𑀳𑀡𑁂 𑀦𑀺𑀯𑀲𑀺𑀢𑁆𑀣𑀸’𑀯, 𑀚𑀬𑀩𑀸𑀳𑀼𑀫𑀳𑀻𑀧𑀢𑀺;

𑀫𑀺𑀢𑁆𑀢𑀸𑀯𑁆𑀳𑀸 𑀭𑀸𑀚𑀺𑀦𑀻 𑀘𑁂𑀯, 𑀢𑀤𑀸 𑀓𑀸𑀮𑀫𑀓𑀁𑀲𑀼 𑀢𑁂.

𑁨. 𑀲𑀺𑀭𑀻𑀯𑀮𑁆𑀮𑀪𑀚𑀸𑀬𑀸’𑀣, 𑀚𑀦𑁂𑀲𑀺 𑀲𑀼𑀕𑀮𑀸 𑀤𑀼𑀯𑁂;

𑀫𑀸𑀡𑀪𑀭𑀡𑀓𑀁 𑀧𑀼𑀢𑁆𑀢𑀁, 𑀧𑀼𑀢𑁆𑀢𑀺𑀁 𑀮𑀻𑀮𑀸𑀯𑀢𑀺𑀫𑁆𑀧𑀺 𑀘.

𑁩. 𑀫𑀸𑀡𑀸𑀪𑀭𑀡𑀪𑀽𑀧𑀸𑀮-𑀤𑁂𑀯𑀻’𑀧𑀺 𑀭𑀢𑀦𑀸𑀯𑀮𑀻;

𑀫𑀺𑀢𑁆𑀢𑀁 𑀧𑀪𑀸𑀯𑀢𑀺𑀜𑁆𑀘𑀸𑀧𑀺, 𑀅𑀮𑀪𑀻 𑀥𑀻𑀢𑀭𑁄 𑀤𑀼𑀯𑁂.

𑁪. 𑀧𑀲𑁆𑀲𑀦𑁆𑀢𑀲𑁆𑀲 𑀉𑀪𑁄 𑀢𑀸𑀬𑁄, 𑀥𑀻𑀢𑀭𑁄 𑀯𑀻𑀭𑀩𑀸𑀳𑀼𑀦𑁄;

𑀢𑀤𑀸 𑀫𑀳𑀸𑀤𑀺𑀧𑀸𑀤𑀲𑁆𑀲, 𑀏𑀯𑀁 𑀆𑀲𑀺 𑀯𑀺𑀢𑀓𑁆𑀓𑀺𑀢𑀁.

𑁫. 𑀮𑁄𑀓𑀸𑀪𑀺𑀲𑀫𑁆𑀫𑀢𑁂 𑀲𑀩𑁆𑀩-𑀪𑀽𑀧𑀸𑀮𑀦𑁆𑀯𑀬𑀫𑀼𑀤𑁆𑀥𑀦𑀺;

𑀯𑀺𑀲𑀼𑀤𑁆𑀥𑁂 𑀲𑁄𑀫𑀯𑀁𑀲𑀫𑁆𑀳𑀺, 𑀅𑀪𑀺𑀚𑀸𑀢𑀸 𑀫𑀬𑀁 𑀧𑀦.

𑁬. 𑀧𑀺𑀳𑀦𑀻𑀬𑀢𑀭𑀸𑀓𑀸𑀭𑀸, 𑀲𑀩𑁆𑀩𑀲𑀢𑁆𑀢𑀺𑀲𑀫𑀼𑀦𑁆𑀦𑀢𑀸;

𑀦𑀸𑀦𑀸𑀯𑀺𑀚𑁆𑀚𑀸𑀲𑀼 𑀦𑀺𑀧𑀼𑀡𑀸, 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀲𑀼𑀓𑁆𑀔𑀫𑀸.

𑁭. 𑀢𑀣𑀸 𑀧𑁂𑀓𑀸𑀓𑀺𑀦𑀸 𑀯𑁂’𑀢𑁂, 𑀢𑀬𑁄 𑀯𑀺𑀓𑁆𑀓𑀫𑀩𑀸𑀳𑀼𑀦𑀸;

𑀧𑀭𑀸𑀚𑀬𑀁 𑀧𑀭𑀺𑀪𑀯𑀁, 𑀧𑀸𑀧𑀺𑀢𑀸 𑀩𑀳𑀼𑀲𑁄 𑀭𑀡𑁂.

𑁮. 𑀲𑀽𑀦𑀼𑀦𑁄 𑀲𑀼𑀲𑀫𑀢𑁆𑀣𑀲𑁆𑀲, 𑀯𑀺𑀲𑁄𑀥𑁂𑀢𑀼 𑀫𑀺𑀫𑀁 𑀫𑀮𑀁;

𑀦 𑀤𑀺𑀲𑁆𑀲𑀢𑁂 𑀧𑀸𑀢𑀼𑀪𑀸𑀯𑁄, 𑀅𑀳𑁄 𑀦𑁄 𑀅𑀧𑁆𑀧𑀧𑀼𑀜𑁆𑀜𑀢𑀸.

𑁯. 𑀚𑀦𑀯𑀸𑀤𑀓𑀺𑀮𑀺𑀝𑁆𑀞𑁂𑀦, 𑀭𑀸𑀚𑀢𑁆𑀢𑁂𑀦𑀸𑀧𑀺 𑀓𑀺𑀁 𑀫𑀫;

𑀇𑀤𑀸𑀦𑀺 𑀯𑀺𑀲𑀬𑀸𑀲𑀗𑁆𑀕𑀁, 𑀳𑀺𑀢𑁆𑀯𑀸 𑀓𑀮𑁆𑀬𑀸𑀡𑀓𑀫𑁆𑀫𑀲𑀼.

𑁧𑁦. 𑀅𑀧𑁆𑀧𑀫𑀢𑁆𑀢𑀲𑁆𑀲 𑀲𑀢𑀢𑀁, 𑀦𑁂𑀢𑀩𑁆𑀩𑀸 𑀯𑀸𑀲𑀭𑀸’𑀇𑀢𑀺;

𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀅𑀫𑀘𑁆𑀘𑀸𑀦𑀁, 𑀲𑀩𑁆𑀩𑀁 𑀭𑀚𑁆𑀚𑀯𑀺𑀘𑀸𑀭𑀡𑀁.

𑁧𑁧. 𑀢𑀳𑀺𑀁 𑀲𑀢𑁆𑀢’𑀝𑁆𑀞𑀫𑀸𑀲𑀜𑁆𑀳𑀺, 𑀯𑀲𑀁 𑀭𑀢𑁆𑀢𑀺𑀬𑀫𑁂𑀓𑀤𑀸;

𑀤𑁂𑀯𑀭𑀸𑀚𑀖𑀭𑁂𑀲𑁂𑀬𑁆𑀬𑀁, 𑀓𑀧𑁆𑀧𑁂𑀲𑀺 𑀲𑀻𑀮𑀲𑀁𑀬𑀢𑁄.

𑁧𑁨. 𑀢𑀢𑁄 𑀧𑀘𑁆𑀘𑀽𑀲𑀓𑀸𑀮𑀫𑁆𑀳𑀺, 𑀤𑁂𑀯𑀧𑀼𑀢𑁆𑀢𑀁 𑀫𑀳𑀺𑀤𑁆𑀥𑀺𑀓𑀁;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀁, 𑀕𑀦𑁆𑀥𑀫𑀸𑀮𑀸𑀯𑀺𑀪𑀽𑀲𑀺𑀢𑀁.

𑁧𑁩. 𑀉𑀴𑀸𑀭𑀢𑀭𑀭𑀽𑀧𑁂𑀦, 𑀤𑁂𑀳𑁄𑀪𑀸𑀲𑁂𑀦 𑀅𑀢𑁆𑀢𑀦𑁄;

𑀑𑀪𑀸𑀲𑁂𑀦𑁆𑀢𑀁 𑀅𑀲𑁂𑀲𑀸’𑀲𑀸, 𑀲𑀽𑀭𑀺𑀬𑀜𑁆𑀘 𑀦 𑀪𑀼𑀕𑁆𑀕𑀢𑀁.

𑁧𑁪. 𑀯𑀤𑀦𑁆𑀢𑀁 𑀲𑀼𑀧𑀺𑀦𑁂 𑀏𑀯𑀁, 𑀅𑀤𑀓𑁆𑀔𑀺 𑀤𑀭𑀡𑀻𑀧𑀢𑀺;

𑀧𑀲𑀻𑀤𑀲𑁆𑀲𑀼 𑀫𑀳𑀸𑀪𑀸𑀕, 𑀧𑀺𑀢𑁄𑀪𑀯 𑀫𑀳𑀺𑀧𑀢𑀺.

𑁧𑁫. 𑀥𑀜𑁆𑀜𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄, 𑀇𑀘𑁆𑀙𑀺𑀢𑀢𑁆𑀣𑀲𑁆𑀲𑀲𑀸𑀥𑀓𑁄;

𑀯𑀺𑀦𑀻𑀢𑁄 𑀮𑁄𑀓𑀓𑀼𑀳𑀭-𑀩𑁆𑀬𑀸𑀧𑀺𑀢𑁂𑀚𑁄 𑀧𑀭𑀓𑁆𑀓𑀫𑁄.

𑁧𑁬. 𑀆𑀡𑀩𑀮𑀬𑀲𑁄𑀓𑀺𑀢𑁆𑀢𑀺-𑀪𑀸𑀲𑀼𑀭𑁄 𑀲𑀕𑁆𑀕𑀼𑀡𑀸𑀓𑀭𑁄;

𑀮𑁄𑀓𑀲𑀸𑀲𑀦𑀲𑀁𑀯𑀼𑀤𑁆𑀥𑀺-𑀓𑀭𑁄 𑀧𑀼𑀢𑁆𑀢𑀯𑀭𑁄 𑀢𑀯.

𑁧𑁭. 𑀮𑀩𑁆𑀪𑀻𑀲𑁆𑀲𑀢𑁂 𑀫𑀳𑀸𑀭𑀸𑀚, 𑀦 𑀘𑀺𑀭𑀲𑁆𑀲𑁂𑀯 𑀲𑀫𑁆𑀧𑀢𑀺;

𑀧𑀼𑀢𑁆𑀢𑀤𑀸𑀭𑀸𑀥𑀺𑀯𑀼𑀢𑁆𑀣𑀁 𑀢𑀁, 𑀧𑀼𑀭𑀁 𑀔𑀺𑀧𑁆𑀧𑀁 𑀧𑀬𑀸𑀳𑀻𑀢𑀺.

𑁧𑁮. 𑀧𑀩𑀼𑀚𑁆𑀛𑀺𑀢𑁆𑀯𑀸𑀦 𑀲𑀜𑁆𑀚𑀸𑀢-𑀧𑀻𑀢𑀺𑀯𑁂𑀕𑁄𑀣 𑀭𑀢𑁆𑀢𑀺𑀬𑀸;

𑀯𑀺𑀪𑀸𑀢𑀸𑀬 𑀢𑀢𑁄𑀧𑁄𑀗𑁆𑀔-𑀕𑀸𑀫𑀁 𑀕𑀜𑁆𑀙𑀺𑀦𑀭𑀼𑀢𑁆𑀢𑀫𑁄.

𑁧𑁯. 𑀬𑀣𑀸 𑀤𑀺𑀝𑁆𑀞𑀧𑁆𑀧𑀓𑀸𑀭𑀦𑁆𑀢𑀁, 𑀓𑀣𑁂𑀲𑀺 𑀲𑀼𑀧𑀺𑀦𑀁 𑀲𑀼𑀪𑀁;

𑀫𑀳𑁂𑀲𑀻 𑀧𑀫𑀼𑀔𑀸𑀦𑀁 𑀲𑁄, 𑀅𑀫𑀘𑁆𑀘𑀸𑀦𑀁 𑀫𑀳𑀻𑀧𑀢𑀺.

𑁨𑁦. 𑀲𑀤𑁆𑀥𑀺𑀁 𑀫𑀳𑁂𑀲𑀺𑀬𑀸 𑀢𑀢𑁆𑀣, 𑀧𑀢𑁆𑀣𑁂𑀦𑁆𑀢𑁄 𑀧𑀼𑀢𑁆𑀢𑀫𑀼𑀢𑁆𑀢𑀫𑀁;

𑀘𑀺𑀦𑁆𑀢𑁄𑀦𑁆𑀢𑁄 𑀤𑀸𑀦𑀲𑀻𑀮𑀸𑀤𑀺𑀁, 𑀲𑀼𑀪𑀁 𑀦𑀸𑀦𑀧𑁆𑀧𑀓𑀸𑀭𑀓𑀁.

𑁨𑁧. 𑀅𑀣𑁂𑀓𑀤𑀺𑀯𑀲𑀁𑀓𑀸𑀮𑁂, 𑀧𑀘𑁆𑀘𑀽𑀲𑁂 𑀲𑀼𑀧𑀺𑀦𑁂 𑀧𑀦;

𑀲𑀩𑁆𑀩𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁, 𑀲𑀩𑁆𑀩𑀲𑁂𑀢𑀁 𑀫𑀦𑁄𑀳𑀭𑀁.

𑁨𑁨. 𑀤𑀦𑁆𑀢𑀻𑀧𑁄𑀢𑀯𑀭𑀁 𑀤𑀦𑁆𑀢𑀁, 𑀓𑀡𑁆𑀡𑁂 𑀕𑀡𑀺𑀬𑀧𑁂𑀫𑀢𑁄;

𑀧𑀯𑀺𑀲𑀦𑁆𑀢𑀫𑀺𑀯𑀢𑁆𑀢𑀸𑀦𑀁, 𑀲𑁂𑀬𑁆𑀬𑀸𑀕𑀩𑁆𑀪𑀁 𑀫𑀳𑁂𑀲𑀺𑀬𑀸.

𑁨𑁩. 𑀲𑀫𑁆𑀧𑀲𑁆𑀲𑀺𑀬 𑀧𑀩𑀼𑀚𑁆𑀛𑀺𑀢𑁆𑀯𑀸, 𑀉𑀝𑁆𑀞𑀸𑀬 𑀲𑀬𑀦𑀸𑀯𑀭𑀸;

𑀲𑀜𑁆𑀚𑀸𑀢𑀧𑀻𑀢𑀺𑀧𑀸𑀫𑁄𑀚𑁆𑀚-𑀯𑁂𑀕𑀧𑀻𑀡𑀺𑀢𑀫𑀸𑀦𑀲𑁄.

𑁨𑁪. 𑀢𑀸𑀬𑀁 𑀯𑁂𑀮𑀸𑀬𑀫𑁂𑀤𑀸𑀲𑀼-𑀲𑁂𑀬𑁆𑀬𑀸𑀕𑀩𑁆𑀪𑀁 𑀫𑀳𑁂𑀲𑀺𑀬𑀸;

𑀧𑀯𑀺𑀲𑁆𑀲𑀲𑀼𑀧𑀺𑀦𑀁 𑀢𑀲𑁆𑀲𑀸, 𑀬𑀣𑀸𑀤𑀺𑀝𑁆𑀞𑀁 𑀧𑀓𑀸𑀲𑀬𑀻.

𑁨𑁫. 𑀅𑀳𑀫𑁆𑀧𑀺 𑀢𑀸𑀤𑀺𑀲𑀁 𑀳𑀢𑁆𑀣𑀺-𑀧𑁄𑀢𑀓𑀁 𑀲𑀬𑀦𑀁 𑀫𑀫;

𑀧𑀤𑀓𑁆𑀔𑀺𑀡𑀁 𑀓𑀭𑀺𑀢𑁆𑀯𑀸𑀦, 𑀞𑀺𑀢𑀁 𑀲𑁄𑀡𑁆𑀟𑁂 𑀲𑀫𑀸𑀤𑀺𑀬.

𑁨𑁬. 𑀆𑀓𑀟𑁆𑀠𑀺𑀢𑁆𑀯𑀸𑀦 𑀲𑀬𑀦𑀁, 𑀲𑀫𑀸𑀭𑁄𑀧𑀺𑀬 𑀧𑁂𑀫𑀢𑁄;

𑀆𑀮𑀺𑀗𑁆𑀕𑀺𑀁 𑀲𑀼𑀧𑀺𑀦𑀫𑁆𑀳𑀻𑀢𑀺, 𑀤𑁂𑀯𑀻 𑀘𑀸𑀧𑀺 𑀢𑀫𑀩𑁆𑀭𑀯𑀻.

𑁨𑁭. 𑀉𑀪𑁄 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲, 𑀤𑀺𑀝𑁆𑀞𑀫𑁂𑀯𑀁 𑀧𑀓𑀸𑀲𑀺𑀬;

𑀉𑀝𑁆𑀞𑀸𑀧𑁂𑀲𑀼𑀁 𑀧𑀳𑀝𑁆𑀞𑀸𑀯, 𑀯𑀻𑀢𑀦𑀺𑀤𑁆𑀤𑀸𑀭𑀼𑀡𑀁 𑀢𑀤𑀸.

𑁨𑁮. 𑀢𑀢𑁄 𑀧𑀸𑀢𑁄 𑀉𑀧𑀝𑁆𑀞𑀸𑀢𑀼, 𑀫𑀼𑀧𑀬𑀸𑀢𑀁 𑀧𑀼𑀭𑁄𑀳𑀺𑀢𑀁;

𑀦𑁂𑀫𑀺𑀢𑁆𑀢𑀓𑁂 𑀘 𑀧𑀼𑀘𑁆𑀙𑀺𑀁𑀲𑀼, 𑀲𑀼𑀦𑀺𑀢𑁆𑀯𑀸 𑀢𑁂 𑀧𑀫𑁄𑀤𑀺𑀢𑀸.

𑁨𑁯. 𑀦 𑀘𑀺𑀭𑀲𑁆𑀲𑁂𑀯 𑀧𑀼𑀢𑁆𑀢𑀲𑁆𑀲, 𑀥𑀜𑁆𑀜𑀮𑀓𑁆𑀔𑀡𑀲𑀸𑀮𑀺𑀦𑁄;

𑀉𑀧𑁆𑀧𑀢𑁆𑀢𑀺𑀬𑀸 𑀅𑀯𑀲𑁆𑀲𑀁’𑀯, 𑀪𑀯𑀁𑀢𑀩𑁆𑀩𑀦𑁆𑀢𑀺 𑀓𑀺𑀢𑁆𑀢𑀬𑀼𑀁.

𑁩𑁦. 𑀢𑀁 𑀲𑀼𑀡𑀺𑀢𑁆𑀯𑀸 𑀅𑀫𑀘𑁆𑀘𑀸 𑀘, 𑀢𑀣𑀸 𑀦𑀕𑀭𑀯𑀸𑀲𑀺𑀦𑁄;

𑀅𑀯𑀺𑀦𑁆𑀤𑀺𑀁𑀲𑀼 𑀚𑀦𑀺𑀦𑁆𑀤𑁄 𑀘, 𑀲𑀩𑁆𑀩𑁂𑀧𑀻𑀢𑀺 𑀫𑀳𑀼𑀲𑁆𑀲𑀯𑀁.

𑁩𑁧. 𑀢𑀢𑁄 𑀧𑀝𑁆𑀞𑀸𑀬 𑀲𑁄𑀢𑁆𑀣𑀸𑀦𑀁, 𑀧𑀢𑁆𑀣𑀬𑀁 𑀧𑀢𑁆𑀣𑀺𑀯𑁄𑀪𑀼𑀲𑀁;

𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀩𑀳𑀼𑀲𑁄, 𑀪𑀡𑀸𑀧𑁂𑀲𑀺 𑀧𑀭𑀺𑀢𑁆𑀢𑀓𑀁.

𑁩𑁨. 𑀫𑀡𑀺𑀫𑀼𑀢𑁆𑀢𑀸𑀤𑀺𑀓𑀁 𑀘𑀺𑀢𑁆𑀢𑀁, 𑀫𑀳𑀕𑁆𑀖𑀫𑀦𑀼𑀯𑀸𑀲𑀭𑀁;

𑀧𑀭𑀺𑀘𑁆𑀘𑀚𑀺 𑀤𑀸𑀦𑀫𑀼𑀔𑁂, 𑀬𑀸𑀘𑀓𑀸𑀦𑀫𑀦𑁂𑀓𑀲𑁄.

𑁩𑁩. 𑀧𑀼𑀭𑁄𑀳𑀺𑀢𑀸𑀤𑀺𑀯𑀺𑀧𑁆𑀧𑁂𑀳𑀺, 𑀯𑁂𑀤𑀯𑁂𑀤𑀗𑁆𑀕𑀯𑀺𑀜𑁆𑀜𑀽𑀳𑀺;

𑀯𑀢𑁆𑀢𑀸𑀧𑁂𑀲𑀺 𑀘 𑀳𑁄𑀫𑀸𑀤𑀺-𑀯𑀺𑀥𑀸𑀦𑀁 𑀲𑁄𑀢𑁆𑀣𑀺 𑀲𑀫𑁆𑀫𑀢𑀁.

𑁩𑁪. 𑀲𑀼𑀯𑀺𑀦𑀝𑁆𑀞𑁂 𑀯𑀺𑀳𑀸𑀭𑁂 𑀘, 𑀥𑀸𑀢𑀼𑀕𑀩𑁆𑀪𑁂 𑀘 𑀯𑀸𑀧𑀺𑀬𑁄;

𑀚𑀺𑀡𑁆𑀡𑀸 𑀘 𑀧𑀝𑀺𑀲𑀗𑁆𑀔𑀢𑁆𑀢𑀼𑀁, 𑀬𑁄𑀚𑀬𑀻 𑀭𑀸𑀚𑀓𑀧𑁆𑀧𑀺𑀓𑁂.

𑁩𑁫. 𑀤𑀺𑀦𑀁 𑀦𑀬𑀦𑁆𑀢𑁂 𑀓𑀮𑁆𑀬𑀸𑀡-𑀓𑀫𑁆𑀫𑁂𑀦𑁂’𑀯𑀁 𑀦𑀭𑀺𑀲𑁆𑀲𑀭𑁂;

𑀦 𑀘𑀺𑀭𑀁 𑀲𑀡𑁆𑀞𑀳𑀺 𑀕𑀩𑁆𑀪-𑀯𑀭𑁄 𑀓𑀼𑀘𑁆𑀙𑀺𑀫𑁆𑀳𑀺 𑀤𑁂𑀯𑀺𑀬𑀸.

𑁩𑁬. 𑀢𑀢𑁄𑀯𑀕𑀫𑁆𑀫 𑀢𑀁 𑀳𑀝𑁆𑀞-𑀧𑀳𑀝𑁆𑀞𑁄 𑀲𑁄 𑀦𑀭𑀺𑀲𑁆𑀲𑀭𑁄;

𑀫𑀳𑀦𑁆𑀢𑀁 𑀤𑁂𑀯𑀺𑀬𑀸 𑀕𑀩𑁆𑀪-𑀧𑀭𑀺𑀳𑀸𑀭𑀫𑀤𑀸𑀧𑀬𑀺.

𑁩𑁭. 𑀧𑀭𑀺𑀧𑀓𑁆𑀓𑀕𑀩𑁆𑀪𑀸 𑀤𑁂𑀯𑀻, 𑀓𑀫𑁂𑀦 𑀚𑀦𑀬𑀻𑀲𑀼𑀓𑀁;

𑀲𑀫𑀬𑁂 𑀪𑀤𑁆𑀤𑀦𑀓𑁆𑀔𑀢𑁆𑀢-𑀫𑀼𑀳𑀼𑀢𑁆𑀢𑁂𑀦𑀪𑀺𑀮𑀓𑁆𑀔𑀺𑀢𑁂.

𑁩𑁮. 𑀲𑀼𑀧𑁆𑀧𑀲𑀦𑁆𑀦𑀸 𑀅𑀲𑁂𑀲𑀸 𑀘, 𑀤𑀺𑀲𑀸𑀬𑁄 𑀢𑀁𑀔𑀡𑁂 𑀅𑀳𑀼;

𑀲𑀫𑀻𑀭𑀡𑁂 𑀘 𑀯𑀸𑀲𑀺𑀁𑀲𑀼, 𑀲𑀼𑀕𑀦𑁆𑀥𑀺𑀫𑀼𑀤𑀼𑀲𑀻𑀢𑀮𑀸.

𑁩𑁯. 𑀤𑀦𑁆𑀢𑀻𑀦𑀁 𑀓𑁄𑀜𑁆𑀘𑀦𑀸𑀤𑁂𑀦, 𑀳𑀬𑀸𑀦𑀁 𑀳𑁂𑀲𑀺𑀢𑁂𑀦 𑀘;

𑀭𑀸𑀚𑀗𑁆𑀕𑀡𑀁 𑀢𑀤𑀸𑀚𑀸𑀢𑀁, 𑀫𑀳𑀸𑀓𑁄𑀮𑀸𑀳𑀮𑀸 𑀓𑀽𑀮𑀁.

𑁪𑁦. 𑀅𑀘𑁆𑀙𑁂𑀭𑀸𑀢𑀺𑀲𑀬𑁂 𑀏𑀯𑀁, 𑀧𑀸𑀢𑀼𑀪𑀽𑀢𑁂 𑀅𑀦𑁂𑀓𑀥𑀸;

𑀤𑀺𑀲𑁆𑀯𑀸 𑀢𑀁 𑀯𑀺𑀫𑁆𑀳𑀬𑀧𑁆𑀧𑀢𑁆𑀢𑁄, 𑀫𑀸𑀡𑀪𑀭𑀡𑀪𑀽𑀧𑀢𑀺.

𑁪𑁧. 𑀲𑀼𑀢𑁆𑀯𑀸 𑀦𑀺𑀚𑀲𑁆𑀲 𑀧𑀼𑀢𑁆𑀢𑀲𑁆𑀲, 𑀢𑀤𑀸 𑀲𑀜𑁆𑀚𑀸𑀢𑀲𑀸𑀲𑀦𑀁;

𑀅𑀫𑀢𑁂𑀦𑀸𑀪𑀺𑀲𑀺𑀢𑁆𑀢𑁄𑀯, 𑀧𑀻𑀢𑀺𑀧𑀼𑀡𑁆𑀡𑀫𑀦𑁄𑀭𑀣𑁄.

𑁪𑁨. 𑀫𑁄𑀘𑀸𑀧𑁂𑀢𑁆𑀯𑀸 𑀢𑀤𑀸 𑀓𑀸𑀭𑀸-𑀖𑀭𑁂 𑀩𑀤𑁆𑀥𑁂 𑀩𑀳𑀽𑀚𑀦𑁂;

𑀤𑀸𑀦𑀁 𑀉𑀴𑀸𑀭𑀁 𑀲𑀫𑀡-𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀤𑀸𑀧𑀬𑀺.

𑁪𑁩. 𑀅𑀫𑀘𑁆𑀘𑀧𑀫𑀼𑀔𑀸 𑀘𑀸𑀧𑀺, 𑀚𑀦𑀸𑀧𑀼𑀭𑀦𑀺𑀯𑀸𑀲𑀺𑀦𑁄;

𑀓𑀤𑀮𑀻𑀢𑁄𑀭𑀡𑀸𑀤𑀻𑀳𑀺, 𑀭𑀸𑀚𑀥𑀸𑀦𑀻 𑀫𑀦𑁂𑀓𑀥𑀸.

𑁪𑁪. 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀓𑀮𑀁, 𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀸;

𑀙𑀡𑀁 𑀫𑀳𑀦𑁆𑀢𑀁 𑀯𑀢𑁆𑀢𑁂𑀲𑀼𑀁, 𑀓𑀢𑀺𑀧𑀸𑀳𑀁 𑀫𑀦𑁄𑀭𑀫𑀁.

𑁪𑁫. 𑀯𑁂𑀤𑁂 𑀯𑀼𑀢𑁆𑀢𑀯𑀺𑀥𑀸𑀦𑁂𑀦, 𑀚𑀸𑀢𑀓𑀫𑁆𑀫𑀸𑀤𑀺𑀓𑀁 𑀯𑀺𑀥𑀺𑀁;

𑀲𑀩𑁆𑀩𑀁 𑀲𑀫𑀸𑀧𑀬𑀺𑀢𑁆𑀯𑀸𑀦, 𑀓𑀼𑀫𑀸𑀭𑀲𑁆𑀲𑀸’𑀯𑀦𑀻𑀧𑀢𑀺.

𑁪𑁬. 𑀧𑀼𑀭𑁄𑀳𑀺𑀢𑀸𑀤𑀬𑁄 𑀯𑀺𑀧𑁆𑀧𑁂, 𑀢𑀢𑁄 𑀮𑀓𑁆𑀔𑀡𑀧𑀸𑀞𑀓𑁂;

𑀆𑀡𑀸𑀧𑁂𑀢𑁆𑀯𑀸𑀦 𑀲𑀓𑁆𑀓𑀸𑀭-𑀲𑀫𑁆𑀫𑀸𑀦𑀯𑀺𑀥𑀺𑀧𑀼𑀩𑁆𑀩𑀓𑀁.

𑁪𑁭. 𑀦𑀺𑀬𑁄𑀚𑁂𑀲𑀺 𑀓𑀼𑀫𑀸𑀭𑀲𑁆𑀲, 𑀮𑀓𑁆𑀔𑀡𑀸𑀦𑀁 𑀧𑀝𑀺𑀕𑁆𑀕𑀳𑁂;

𑀲𑀸𑀥𑀓𑀁 𑀲𑀓𑀮𑀁 𑀢𑀲𑁆𑀲, 𑀬𑀢𑁆𑀣𑀧𑀸𑀤𑀸𑀤𑀺𑀮𑀓𑁆𑀔𑀡𑀁.

𑁪𑁮. 𑀉𑀧𑀥𑀸𑀭𑀺𑀬 𑀫𑀳𑀸𑀫𑀘𑁆𑀘-𑀕𑀡𑀫𑀚𑁆𑀛𑀕𑀢𑀲𑁆𑀲 𑀢𑁂;

𑀭𑀸𑀚𑀺𑀦𑁄 𑀤𑁂𑀯𑀺𑀬𑀸 𑀘𑀸𑀧𑀺, 𑀧𑀓𑀸𑀲𑁂𑀲𑀼𑀁 𑀧𑀫𑁄𑀤𑀺𑀢𑀸.

𑁪𑁯. 𑀮𑀗𑁆𑀓𑀸𑀤𑀻𑀧𑀁 𑀞𑀧𑁂𑀢𑁆𑀯𑀸𑀦, 𑀚𑀫𑁆𑀩𑀼𑀤𑀻𑀧𑀢𑀮𑀫𑁆𑀧𑀺 𑀘;

𑀏𑀓𑀘𑁆𑀙𑀢𑁆𑀢𑀗𑁆𑀓𑀺𑀢𑀁 𑀓𑀢𑁆𑀯𑀸-𑀦𑀼𑀪𑁄𑀢𑁆𑀢𑀼𑀁 𑀦𑀺𑀧𑀼𑀡𑁄 𑀇𑀢𑀺.

𑁫𑁦. 𑀢𑁂 𑀲𑀦𑁆𑀢𑀧𑁆𑀧𑀺𑀬 𑀪𑁄𑀕𑁂𑀳𑀺, 𑀪𑀺𑀬𑁆𑀬𑁄 𑀧𑀼𑀘𑁆𑀙𑀺𑀢𑁆𑀣 𑀲𑀸𑀤𑀭𑀁;

𑀲𑀦𑁆𑀤𑀺𑀲𑁆𑀲𑀫𑀸𑀦𑀁 𑀬𑀁𑀓𑀺𑀜𑁆𑀘𑀺, 𑀅𑀭𑀺𑀝𑁆𑀞𑀁 𑀅𑀢𑁆𑀣𑀺 𑀦𑀢𑁆𑀣𑀻’𑀢𑀺.

𑁫𑁧. 𑀤𑀻𑀖𑀸𑀬𑀼𑀓𑁄 𑀓𑀼𑀫𑀸𑀭𑁄’𑀬𑀁, 𑀓𑀺𑀜𑁆𑀘𑀺 𑀧𑀜𑁆𑀜𑀸𑀬𑀢𑁂 𑀯𑀢;

𑀚𑀦𑀓𑀸𑀭𑀺𑀝𑁆𑀞𑀬𑁄𑀕𑁄’𑀢𑀺, 𑀢𑁂 𑀫𑀳𑀻𑀧𑀢𑀺𑀦𑁄’𑀩𑁆𑀭𑀯𑀼𑀁.

𑁫𑁨. 𑀢𑀲𑁆𑀲𑀸𑀭𑀺𑀚𑀦𑀲𑀫𑁆𑀫𑀤𑁆𑀤𑀺-𑀧𑀢𑀸𑀧𑀪𑀼𑀚𑀬𑁄 𑀕𑀢𑁄;

𑀲𑁄 𑀧𑀭𑀓𑁆𑀓𑀫𑀩𑀸𑀳𑀽’𑀢𑀺, 𑀅𑀦𑁆𑀯𑀢𑁆𑀣𑀦𑀸𑀫𑀫𑀕𑁆𑀕𑀳𑀻.

𑁫𑁩. 𑀓𑀡𑁆𑀡𑀯𑁂 𑀥𑀫𑀳𑀜𑁆𑀘𑁂𑀯, 𑀅𑀦𑁆𑀦𑀼𑀧𑀸𑀲𑀦𑀫𑀗𑁆𑀕𑀮𑀁;

𑀓𑀸𑀭𑀸𑀧𑀺𑀬 𑀯𑀺𑀥𑀸𑀦𑀜𑁆𑀜𑀽, 𑀬𑀣𑀸𑀯𑀺𑀥𑀺𑀫𑀲𑁂𑀲𑀢𑁄.

𑁫𑁪. 𑀭𑀜𑁆𑀜𑁄 𑀯𑀺𑀓𑁆𑀓𑀫𑀩𑀸𑀳𑀼𑀲𑁆𑀲, 𑀲𑀧𑀼𑀢𑁆𑀢𑀼𑀧𑁆𑀧𑀢𑁆𑀢𑀺𑀲𑀸𑀲𑀦𑀁;

𑀯𑀢𑁆𑀢𑀼𑀁 𑀲𑀤𑀽𑀢𑁂 𑀧𑁂𑀲𑁂𑀲𑀺, 𑀧𑀼𑀮𑀢𑁆𑀣𑀺𑀦𑀕𑀭𑀁 𑀢𑀤𑀸.

𑁫𑁫. 𑀢𑁂𑀳𑀺𑀲𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲, 𑀫𑀳𑀸𑀪𑀸𑀕𑀢𑁆𑀢𑀦𑀫𑁆𑀧𑀺 𑀘;

𑀚𑀦𑀓𑀸𑀭𑀺𑀝𑁆𑀞𑀬𑁄𑀕𑀜𑁆𑀘, 𑀲𑀼𑀢𑁆𑀯𑀸 𑀯𑀺𑀓𑁆𑀓𑀫𑀩𑀸𑀳𑀼𑀲𑁄.

𑁫𑁬. 𑀥𑀜𑁆𑀜𑀁 𑀯𑀺𑀚𑀬𑀭𑀸𑀚𑀸𑀤𑀺-𑀭𑀸𑀚𑀫𑀸𑀮𑀸𑀬 𑀦𑀸𑀬𑀓𑀁;

𑀫𑀡𑀺𑀁𑀯 𑀪𑀸𑀲𑀼𑀭𑀁 𑀫𑀬𑁆𑀳𑀁, 𑀪𑀸𑀕𑀺𑀦𑁂𑀬𑁆𑀬𑀁 𑀚𑀦𑁂𑀲𑀺𑀲𑁄.

𑁫𑁭. 𑀳𑀸𑀦𑀺 𑀬𑀸𑀓𑀸𑀘𑀺𑀲𑀢𑀢𑀁, 𑀬𑀣𑀸 𑀢𑀲𑁆𑀲 𑀦 𑀳𑁂𑀲𑁆𑀲𑀢𑀺;

𑀢𑀣𑀸 𑀫𑀫𑀦𑁆𑀢𑀺𑀓𑁂𑀬𑁂𑀯, 𑀓𑀼𑀫𑀸𑀭𑁄 𑀏𑀢𑁆𑀣 𑀯𑀟𑁆𑀠𑀢𑀁.

𑁫𑁮. 𑀅𑀮𑀤𑁆𑀥𑀁 𑀮𑀪𑀺𑀢𑀼𑀁 𑀮𑀸𑀪𑀁, 𑀮𑀤𑁆𑀥𑀜𑁆𑀘 𑀧𑀭𑀺𑀭𑀓𑁆𑀔𑀺𑀢𑀼𑀁;

𑀲𑀩𑁆𑀩𑀣𑀸 𑀦 𑀲𑀫𑀢𑁆𑀣𑁄𑀬𑀁, 𑀧𑀼𑀢𑁆𑀢𑁄 𑀕𑀚𑀩𑀸𑀳𑀼 𑀫𑀫.

𑁫𑁯. 𑀲𑀽𑀭𑀪𑀸𑀯𑀸𑀤𑀺𑀬𑀼𑀢𑁆𑀢𑁄’𑀧𑀺, 𑀫𑀳𑀺𑀦𑁆𑀤𑀯𑁆𑀳𑀧𑀭𑁄𑀲𑀼𑀢𑁄;

𑀦𑀺𑀳𑀻𑀦𑁄 𑀫𑀸𑀢𑀼𑀕𑁄𑀢𑁆𑀢𑁂𑀦, 𑀦 𑀭𑀚𑁆𑀚𑀲𑁆𑀲 𑀭𑀳𑁄 𑀫𑀫.

𑁬𑁦. 𑀞𑀺𑀢𑀲𑁆𑀲 𑀯𑀺𑀓𑁆𑀓𑀚𑀸𑀢𑁂𑀦, 𑀦𑁂𑀓𑀲𑁄 𑀲𑀜𑁆𑀘𑀺𑀢𑁂𑀦 𑀫𑁂;

𑀭𑀚𑁆𑀚𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄’𑀯, 𑀓𑀸𑀫𑀁 𑀪𑀸𑀕𑀻 𑀪𑀯𑀺𑀲𑁆𑀲𑀢𑀺.

𑁬𑁧. 𑀇𑀢𑀺𑀧𑁂𑀲𑁂𑀲𑀺 𑀤𑀽𑀢𑁂 𑀲𑁄, 𑀆𑀦𑁂𑀢𑀼𑀁 𑀢𑀁 𑀓𑀼𑀫𑀸𑀭𑀓𑀁;

𑀓𑀼𑀫𑀸𑀭𑀸 𑀪𑀭𑀡𑀁 𑀤𑀢𑁆𑀯𑀸, 𑀲𑁂𑀲𑀁 𑀲𑀸𑀭𑀜𑁆𑀘𑀼𑀧𑀸𑀬𑀦𑀁.

𑁬𑁨. 𑀲𑀩𑁆𑀩𑀁 𑀤𑀽𑀢𑀫𑀼𑀔𑀸 𑀲𑀼𑀢𑁆𑀯𑀸, 𑀯𑀻𑀭𑀩𑀸𑀳𑀼 𑀫𑀳𑀻𑀧𑀢𑀺;

𑀢𑀲𑁆𑀲𑁂𑀢𑀁 𑀯𑀘𑀦𑀁 𑀬𑀼𑀢𑁆𑀢𑀁, 𑀯𑀼𑀢𑁆𑀢𑀁 𑀫𑁂𑀳𑀺𑀢 𑀩𑀼𑀤𑁆𑀥𑀺𑀬𑀸.

𑁬𑁩. 𑀢𑀣𑀸𑀧𑀺 𑀘 𑀦𑀺𑀚𑀸𑀭𑀺𑀝𑁆𑀞-𑀧𑀝𑀺𑀓𑀸𑀭𑀢𑁆𑀣𑀫𑀻𑀤𑀺𑀲𑀁;

𑀑𑀭𑀲𑀁 𑀧𑀼𑀢𑁆𑀢𑀭𑀢𑀦𑀁, 𑀧𑁂𑀲𑁂𑀢𑀼𑀁 𑀦𑀸’𑀦𑀼𑀭𑀽𑀧𑀓𑀁.

𑁬𑁪. 𑀓𑀺𑀜𑁆𑀘 𑀢𑀢𑁆𑀣 𑀓𑀼𑀫𑀸𑀭𑀫𑁆𑀳𑀺, 𑀦𑀻𑀢𑁂 𑀯𑀺𑀓𑁆𑀓𑀫 𑀩𑀸𑀳𑀼𑀦𑁄;

𑀧𑀓𑁆𑀔𑁄 𑀮𑀤𑁆𑀥𑀫𑀳𑀸𑀯𑀸𑀳-𑀩𑀮𑁄 𑀯𑀺𑀬 𑀳𑀼𑀢𑀸𑀲𑀦𑁄.

𑁬𑁫. 𑀅𑀘𑁆𑀘𑀼𑀦𑁆𑀦𑀢𑁂𑀦 𑀫𑀳𑀢𑀸, 𑀢𑁂𑀚𑀲𑀸 𑀲𑀜𑁆𑀚𑀮𑀺𑀲𑁆𑀲𑀢𑀺;

𑀳𑀸𑀦𑀺𑀭𑁂𑀯 𑀯𑀢𑀫𑁆𑀳𑀸𑀓𑀁, 𑀫𑀳𑀢𑀻 𑀳𑁂𑀲𑁆𑀲𑀢𑁂 𑀪𑀼𑀲𑀁.

𑁬𑁬. 𑀇𑀢𑀺 𑀳𑀢𑁆𑀣𑁂 𑀕𑀢𑀸𑀦𑀁 𑀲𑁄, 𑀤𑀽𑀢𑀸𑀦𑀁 𑀣𑀦𑀬𑀁 𑀲𑀓𑀁;

𑀅𑀧𑁂𑀲𑁂𑀢𑁆𑀯𑀸 𑀯𑀺𑀲𑀚𑁆𑀚𑁂𑀲𑀺, 𑀧𑀲𑀸𑀤𑀺𑀬 𑀫𑀦𑁂𑀦 𑀲𑁄.

𑁬𑁭. 𑀲𑀧𑀼𑀢𑁆𑀢𑀤𑀸𑀭𑁂𑀳𑀺 𑀲𑀫𑀕𑁆𑀕𑀯𑀸𑀲𑀁,

𑀦𑀭𑀸𑀤𑀺𑀦𑀸𑀣𑁄 𑀦𑀺𑀯𑀲𑀁 𑀢𑀳𑀺𑀁𑀲𑁄;

𑀢𑀺𑀩𑁆𑀩𑁂𑀦 𑀨𑀼𑀝𑁆𑀞𑁄 𑀫𑀳𑀢𑀸𑀕𑀤𑁂𑀦,

𑀭𑀚𑁆𑀚𑁂𑀦 𑀲𑀤𑁆𑀥𑀺𑀁 𑀯𑀺𑀚𑀳𑀺𑀢𑁆𑀣 𑀤𑁂𑀲𑀁.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂 𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀓𑀼𑀫𑀸𑀭𑁄𑀤𑀬𑁄 𑀦𑀸𑀫

𑀲𑀝𑁆𑀞𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.