𑀧𑀜𑁆𑀜𑀸𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀤𑁆𑀯𑀺𑀭𑀸𑀚𑀓𑁄𑀦𑀸𑀫

𑁧. 𑀢𑀢𑁄 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬, 𑀓𑀲𑁆𑀲𑀧𑁄 𑀤𑀓𑁆𑀔𑀺𑀡𑀁 𑀤𑀺𑀲𑀁;

𑀅𑀤𑀸 𑀓𑀲𑁆𑀲𑀧𑀦𑀸𑀫𑀲𑁆𑀲, 𑀬𑀼𑀯𑀭𑀸𑀚𑀲𑁆𑀲 𑀥𑀻𑀫𑀢𑁄.

𑁨. 𑀅𑀕𑁆𑀕𑀸𑀪𑀺𑀲𑁂𑀓𑀁 𑀤𑀸𑀧𑁂𑀲𑀺, 𑀬𑀼𑀯𑀭𑀸𑀚𑀲𑁆𑀲 𑀥𑀻𑀢𑀼𑀬𑀸;

𑀭𑀸𑀚𑀓𑀜𑁆𑀜𑀸𑀬 𑀢𑀺𑀲𑁆𑀲𑀸𑀬, 𑀪𑀭𑀺𑀬𑀸𑀬𑁂’𑀯 𑀅𑀢𑁆𑀢𑀦𑁄.

𑁩. 𑀬𑀸𑀘𑀓𑀸𑀦𑀜𑁆𑀘 𑀲𑀺𑀧𑁆𑀧𑀻𑀦𑀁, 𑀆𑀕𑀢𑀸𑀦𑀁 𑀢𑀢𑁄 𑀢𑀢𑁄;

𑀤𑀸𑀦𑀁 𑀤𑀡𑁆𑀟𑀺𑀲𑁆𑀲𑀭𑀁 𑀦𑀸𑀫, 𑀲𑀤𑀸 𑀤𑀸𑀧𑁂𑀲𑀺 𑀪𑀽𑀧𑀢𑀺.

𑁪. 𑀆𑀤𑀺𑀧𑀸𑀤𑁄 𑀫𑀳𑀺𑀦𑁆𑀤𑁄 𑀲𑁄,

𑀯𑀲𑀦𑁆𑀢𑁄 𑀭𑁄𑀳𑀡𑁂 𑀢𑀤𑀸;

𑀕𑀳𑁂𑀢𑀼𑀁 𑀭𑀸𑀚𑀺𑀦𑁄𑀭𑀝𑁆𑀞-

𑀫𑀸𑀤𑀸𑀬 𑀩𑀮𑀫𑀸𑀕𑀢𑁄.

𑁫. 𑀢𑀁 𑀲𑀼𑀢𑁆𑀯𑀸 𑀓𑀼𑀧𑀺𑀢𑁄 𑀭𑀸𑀚𑀸, 𑀩𑀮𑀁 𑀧𑁂𑀲𑁂𑀲𑀺 𑀅𑀢𑁆𑀢𑀦𑁄;

𑀬𑀼𑀚𑁆𑀛𑀺𑀢𑁆𑀯𑀸 𑀢𑀁 𑀧𑀭𑀸𑀚𑁂𑀲𑀺, 𑀫𑀳𑀺𑀦𑁆𑀤𑁄 𑀲𑁄 𑀫𑀳𑀸𑀪𑀝𑁄.

𑁬. 𑀢𑀢𑁄 𑀭𑀸𑀚𑀸 𑀦𑀺𑀯𑀢𑁆𑀢𑁂𑀢𑀼𑀁, 𑀧𑀺𑀢𑀭𑀁 𑀢𑀲𑁆𑀲 𑀧𑁂𑀲𑀬𑀺;

𑀓𑀲𑁆𑀲𑀧𑀁 𑀬𑀼𑀯𑀭𑀸𑀚𑀁 𑀢𑀁, 𑀲𑁄 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀲𑀦𑁆𑀢𑀺𑀓𑀁.

𑁭. 𑀦𑀸𑀦𑀸𑀥𑀫𑁆𑀫𑀓𑀣𑁄𑀧𑁂𑀢𑀁, 𑀯𑀢𑁆𑀯𑀸 𑀬𑀼𑀢𑁆𑀢𑀺𑀫𑀦𑁂𑀓𑀥𑀸;

𑀲𑀗𑁆𑀖𑀸𑀫𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸, 𑀧𑀼𑀢𑁆𑀢𑀁 𑀲𑁄 𑀧𑀼𑀦𑀭𑀸𑀕𑀫𑀺.

𑁮. 𑀆𑀤𑀺𑀧𑀸𑀤𑁄 𑀢𑀼 𑀲𑁄 𑀧𑀘𑁆𑀙𑀸, 𑀖𑀸𑀢𑁂𑀢𑁆𑀯𑀸 𑀫𑀡𑁆𑀟𑀮𑀸𑀥𑀺𑀧𑁂;

𑀓𑀼𑀤𑁆𑀥𑁂𑀚𑀦𑀧𑀤𑁂 𑀤𑀺𑀲𑁆𑀯𑀸, 𑀅𑀕𑀫𑀸𑀲𑀺 𑀧𑀼𑀭𑀦𑁆𑀢𑀺𑀓𑀁.

𑁯. 𑀪𑀺𑀓𑁆𑀔𑀼𑀲𑀗𑁆𑀖𑁄 𑀢𑀫𑀸𑀦𑁂𑀢𑁆𑀯𑀸, 𑀤𑀲𑁆𑀲𑁂𑀲𑀺 𑀯𑀲𑀼𑀥𑀸𑀥𑀺𑀧𑀁;

𑀤𑀢𑁆𑀯𑀸 𑀲𑁄 𑀥𑀻𑀢𑀭𑀁 𑀢𑀲𑁆𑀲𑀸, 𑀧𑁂𑀲𑁂𑀲𑀺 𑀧𑀼𑀦 𑀭𑁄𑀳𑀡𑀁.

𑁧𑁦. 𑀦𑀻𑀳𑀭𑀺𑀢𑁆𑀯𑀸𑀦 𑀤𑀼𑀲𑁆𑀲𑀻𑀮𑁂, 𑀦𑀺𑀓𑀸𑀬𑀢𑁆𑀢𑀬𑀯𑀸𑀲𑀻𑀲𑀼;

𑀕𑀸𑀳𑀸𑀧𑁂𑀲𑀺 𑀦𑀯𑁂 𑀪𑀺𑀓𑁆𑀔𑀽, 𑀆𑀯𑀸𑀲𑁂 𑀢𑀢𑁆𑀣 𑀢𑀢𑁆𑀣 𑀲𑁄.

𑁧𑁧. 𑀤𑁆𑀯𑀬𑀸𑀪𑀺𑀲𑁂𑀓𑀚𑀸𑀢𑁂𑀦, 𑀆𑀤𑀺𑀧𑀸𑀤𑁂𑀦 𑀲𑀼𑀦𑀼𑀦𑀸;

𑀫𑀳𑀸𑀯𑀺𑀳𑀸𑀭𑁂 𑀩𑁄𑀥𑀺𑀫𑁆𑀳𑀺, 𑀧𑀁𑀲𑀼𑀁 𑀯𑀟𑁆𑀠𑁂𑀲𑀺 𑀧𑀽𑀚𑀬𑀁.

𑁧𑁨. 𑀅𑀓𑀸𑀲𑀺 𑀘 𑀦𑀺𑀓𑀸𑀬𑁂𑀲𑀼, 𑀢𑀻𑀲𑀼 𑀩𑀺𑀫𑁆𑀩𑁂 𑀲𑀺𑀮𑀸𑀫𑀬𑁂;

𑀲𑁄𑀯𑀡𑁆𑀡𑀬𑁂 𑀭𑀁𑀲𑀺𑀚𑀸𑀮𑁂, 𑀙𑀢𑁆𑀢𑀁 𑀘𑀽𑀴𑀸𑀫𑀡𑀺𑀁 𑀢𑀣𑀸.

𑁧𑁩. 𑀅𑀪𑀬𑀕𑀺𑀭𑀺𑀯𑀺𑀳𑀸𑀭𑀫𑁆𑀳𑀺, 𑀧𑀸𑀲𑀸𑀤𑀁 𑀲𑀓𑀦𑀸𑀫𑀓𑀁;

𑀓𑀢𑁆𑀯𑀸 𑀢𑀢𑁆𑀣 𑀦𑀺𑀯𑀸𑀲𑁂𑀢𑁆𑀯𑀸, 𑀪𑀺𑀓𑁆𑀔𑀼 𑀕𑀸𑀫𑀫𑀤𑀸𑀧𑀬𑀺.

𑁧𑁪. 𑀫𑀳𑀺𑀬𑀗𑁆𑀕𑀡𑀯𑀺𑀳𑀸𑀭𑀲𑁆𑀫𑀺𑀁, 𑀕𑀸𑀫𑀁 𑀲𑁄 𑀘𑁂𑀢𑀺𑀬𑀲𑁆𑀲’𑀤𑀸;

𑀲𑀯𑀢𑁆𑀣𑀁 𑀧𑀝𑀺𑀫𑀸𑀪𑀢𑁆𑀢𑀁, 𑀲𑀩𑁆𑀩𑀪𑀺𑀓𑁆𑀔𑀽𑀦 𑀤𑀸𑀧𑀬𑀺.

𑁧𑁫. 𑀣𑀮𑁂 𑀚𑀮𑁂 𑀘 𑀲𑀢𑁆𑀢𑀸𑀦𑀁, 𑀅𑀤𑀸𑀲𑀺 𑀅𑀪𑀬𑀁 𑀢𑀤𑀸;

𑀘𑀸𑀭𑀺𑀢𑁆𑀢𑀧𑀼𑀩𑁆𑀩𑀭𑀸𑀚𑀽𑀦𑀁, 𑀧𑀭𑀺𑀧𑀸𑀮𑁂𑀲𑀺 𑀲𑀩𑁆𑀩𑀤𑀸.

𑁧𑁬. 𑀢𑀲𑁆𑀲 𑀲𑁂𑀦𑀸𑀧𑀢𑀺 𑀲𑁂𑀦𑁄, 𑀇𑀮𑀗𑁆𑀕𑁄𑀭𑀸𑀚𑀯𑀁𑀲𑀚𑁄;

𑀣𑁂𑀭𑀺𑀬𑀸𑀦𑀁 𑀅𑀓𑀸’𑀯𑀸𑀲𑀁; 𑀣𑀽𑀧𑀸𑀭𑀸𑀫𑀲𑁆𑀲 𑀧𑀘𑁆𑀙𑀢𑁄.

𑁧𑁭. 𑀥𑀫𑁆𑀫𑀸𑀭𑀼𑀘𑀺𑀓𑀪𑀺𑀓𑁆𑀔𑀽𑀦𑀁, 𑀥𑀫𑁆𑀫𑀸𑀭𑀸𑀫𑀫𑀓𑀸𑀭𑀬𑀺;

𑀢𑀣𑀸 𑀲𑀸𑀕𑀮𑀺𑀓𑀸𑀦𑀜𑁆𑀘, 𑀓𑀲𑁆𑀲𑀧𑀲𑁂𑀦𑀦𑀸𑀫𑀓𑀁.

𑁧𑁮. 𑀳𑀤𑀬𑀼𑀡𑁆𑀳𑀸𑀪𑀺𑀥𑀸𑀦𑀁 𑀲𑁄, 𑀓𑀢𑁆𑀯𑀸 𑀘𑁂𑀢𑀺𑀬𑀧𑀩𑁆𑀩𑀢𑁂;

𑀧𑀭𑀺𑀯𑁂𑀡𑀁 𑀅𑀤𑀸𑀥𑀫𑁆𑀫-𑀭𑀼𑀘𑀺𑀓𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀁.

𑁧𑁯. 𑀆𑀭𑀸𑀫𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀆𑀭𑀸𑀫𑁂𑀲𑀼 𑀢𑀳𑀺𑀁 𑀢𑀳𑀺𑀁;

𑀏𑀓𑀫𑁂𑀓𑀁 𑀓𑀼𑀝𑀺𑀁 𑀓𑀢𑁆𑀯𑀸, 𑀤𑀸𑀧𑁂𑀲𑀺 𑀘 𑀘𑀫𑀽𑀧𑀢𑀺.

𑁨𑁦. 𑀭𑀢𑁆𑀢𑀫𑀸𑀮𑀕𑀺𑀭𑀺𑀲𑁆𑀫𑀺𑀁 𑀲𑁄, 𑀓𑀢𑁆𑀯𑀸 𑀭𑀫𑁆𑀫𑀁 𑀢𑀭𑀁 𑀲𑀼𑀪𑀁;

𑀓𑀼𑀘𑀺𑀁 𑀅𑀤𑀸 𑀲𑀸𑀲𑀦𑀲𑁆𑀲, 𑀲𑀸𑀫𑀺𑀓𑀸𑀦𑀁 𑀢𑀧𑀲𑁆𑀲𑀺𑀦𑀁.

𑁨𑁧. 𑀫𑀳𑀸𑀯𑀺𑀳𑀸𑀭𑁂 𑀓𑀸𑀭𑁂𑀢𑁆𑀯𑀸, 𑀧𑀯𑀺𑀯𑁂𑀡𑀁 𑀯𑀭𑀁 𑀅𑀤𑀸;

𑀧𑀁𑀲𑀼𑀓𑀽𑀮𑀺𑀓𑀪𑀺𑀓𑁆𑀔𑀽𑀦𑀁, 𑀲𑀫𑀼𑀤𑁆𑀤𑀕𑀺𑀭𑀺𑀦𑀸𑀫𑀓𑀁.

𑁨𑁨. 𑀯𑀸𑀲𑀁 𑀅𑀭𑀜𑁆𑀜𑁂 𑀓𑀸𑀭𑁂𑀢𑁆𑀯𑀸, 𑀅𑀢𑁆𑀢𑀦𑁄 𑀯𑀁𑀲𑀦𑀸𑀫𑀓𑀁;

𑀫𑀳𑀸𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁, 𑀯𑀦𑁂 𑀦𑀺𑀯𑀸𑀲𑀢𑀁 𑀅𑀤𑀸.

𑁨𑁩. 𑀯𑀺𑀳𑀸𑀭𑁂𑀲𑀽 𑀘 𑀚𑀺𑀡𑁆𑀡𑁂𑀲𑀼, 𑀦𑀯𑀓𑀫𑁆𑀫𑀫𑀓𑀸𑀭𑀬𑀺;

𑀤𑀸𑀧𑁂𑀲𑀺 𑀅𑀕𑁆𑀕𑀮𑀁 𑀲𑀩𑁆𑀩-𑀪𑀺𑀓𑁆𑀔𑀽𑀦𑀁 𑀚𑀺𑀡𑁆𑀡𑀘𑀻𑀯𑀭𑁂.

𑁨𑁪. 𑀢𑀺𑀲𑁆𑀲𑀸𑀭𑀸𑀫𑀁 𑀓𑀭𑀺𑀢𑁆𑀯𑀸𑀦, 𑀪𑀺𑀓𑁆𑀔𑀽𑀦𑀻𑀦𑀫𑀼𑀧𑀲𑁆𑀲𑀬𑀁;

𑀫𑀭𑀺𑀘𑀯𑀝𑁆𑀝𑀺𑀫𑀳𑀸𑀩𑁄𑀥𑀺, 𑀧𑀭𑀺𑀳𑀸𑀭𑁂 𑀦𑀺𑀯𑁂𑀲𑀬𑀺.

𑁨𑁫. 𑀅𑀦𑀼𑀭𑀸𑀥𑀧𑀼𑀭𑁂 𑀘𑁂𑀯, 𑀧𑀼𑀮𑀢𑁆𑀣𑀺𑀦𑀕𑀭𑁂𑀧𑀺 𑀘;

𑀉𑀧𑀲𑀕𑁆𑀕𑀭𑁄𑀕𑀦𑀸𑀲𑀸𑀬, 𑀯𑁂𑀚𑁆𑀚𑀲𑀸𑀮𑀸𑀧𑀺 𑀓𑀸𑀭𑀬𑀺.

𑁨𑁬. 𑀅𑀢𑁆𑀢𑀦𑀸 𑀓𑀢𑀯𑀸𑀲𑀦𑀁, 𑀪𑁄𑀕𑀕𑀸𑀫𑁂 𑀘 𑀤𑀸𑀧𑀬𑀺;

𑀢𑀣𑀸𑀭𑀸𑀫𑀺𑀓𑀕𑀸𑀫𑁂 𑀘, 𑀧𑀝𑀺𑀫𑀸𑀪𑀭𑀡𑀜𑁆𑀘 𑀲𑁄.

𑁨𑁭. 𑀪𑁂𑀲𑀚𑁆𑀚𑀕𑁂𑀳𑀁 𑀓𑀸𑀭𑁂𑀲𑀺, 𑀦𑀕𑀭𑁂 𑀢𑀢𑁆𑀣 𑀢𑀢𑁆𑀣 𑀲𑁄;

𑀧𑀁𑀲𑀼𑀓𑀽𑀮𑀺𑀓𑀪𑀺𑀓𑁆𑀔𑀽𑀦𑀁, 𑀪𑀢𑁆𑀢𑀁 𑀯𑀢𑁆𑀣𑀜𑁆𑀘 𑀤𑀸𑀧𑀬𑀺.

𑁨𑁮. 𑀔𑀦𑁆𑀥𑀻𑀓𑀢𑁂 𑀅𑀫𑁄𑀘𑁂𑀲𑀺, 𑀢𑀺𑀭𑀘𑁆𑀙𑀸𑀦𑀕𑀢𑁂 𑀩𑀳𑀽;

𑀓𑀧𑀡𑀸𑀦𑀜𑁆𑀘 𑀤𑀸𑀧𑁂𑀲𑀺, 𑀫𑀳𑀸𑀤𑀸𑀦𑀁 𑀘𑀫𑀽𑀧𑀢𑀺.

𑁨𑁯. 𑀯𑀺𑀘𑀺𑀢𑁆𑀢𑀁 𑀩𑁆𑀬𑀜𑁆𑀚𑀦𑀁 𑀪𑀢𑁆𑀢𑀁, 𑀬𑀸𑀕𑀼𑀁 𑀯𑀺𑀯𑀺𑀥𑀔𑀚𑁆𑀚𑀓𑀁;

𑀓𑀢𑁆𑀯𑀸 𑀲𑀽𑀓𑀭𑀭𑀽𑀧𑀜𑁆𑀘, 𑀕𑀼𑀴𑀁 𑀪𑀺𑀓𑁆𑀔𑀽𑀦𑀁 𑀤𑀸𑀧𑀬𑀺.

𑁩𑁦. 𑀏𑀯𑀸𑀫𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺, 𑀓𑀢𑁆𑀯𑀸 𑀲𑁂𑀦𑀸𑀬 𑀦𑀸𑀬𑀓𑁄;

𑀲𑁂𑀦𑁄 𑀓𑀺𑀢𑁆𑀢𑀺𑀦𑁆𑀤𑀼𑀧𑀸𑀤𑁂𑀳𑀺, 𑀲𑀩𑁆𑀩𑀸 𑀑𑀪𑀸𑀲𑀬𑀻 𑀤𑀺𑀲𑀸.

𑁩𑁧. 𑀢𑀲𑁆𑀲𑁂𑀯 𑀜𑀸𑀢𑀓𑁄 𑀓𑀢𑁆𑀯𑀸, 𑀦𑀸𑀬𑀓𑁄 𑀭𑀓𑁆𑀔𑀲𑀯𑁆𑀳𑀬𑁄;

𑀲𑀯𑀸𑀭𑀓𑀫𑁆𑀳𑀺 𑀕𑀸𑀫𑀫𑁆𑀳𑀺, 𑀯𑀺𑀳𑀸𑀭𑀁 𑀲𑀼𑀫𑀦𑁄𑀳𑀭𑀁.

𑁩𑁨. 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀲𑀸𑀭𑀸𑀦𑀁 𑀧𑀝𑀺𑀧𑀢𑁆𑀢𑀺𑀬𑀸;

𑀪𑀺𑀓𑁆𑀔𑀽𑀦𑀁 𑀲𑁄 𑀅𑀤𑀸 𑀲𑀸𑀥𑀼, 𑀞𑀧𑁂𑀢𑁆𑀯𑀸 𑀯𑀢𑁆𑀢𑀫𑀼𑀢𑁆𑀢𑀫𑀁.

𑁩𑁩. 𑀲𑁂𑀦𑁄 𑀦𑀸𑀫 𑀫𑀳𑀸𑀮𑁂𑀔𑁄, 𑀫𑀳𑀸𑀮𑁂𑀔𑀓𑀧𑀩𑁆𑀩𑀢𑀁;

𑀫𑀳𑀸𑀯𑀺𑀳𑀸𑀭𑁂 𑀓𑀸𑀭𑁂𑀲𑀺, 𑀪𑀺𑀓𑁆𑀔𑀽𑀦𑀁 𑀯𑀸𑀲𑀫𑀼𑀢𑁆𑀢𑀫𑀁.

𑁩𑁪. 𑀘𑁄𑀴𑀭𑀸𑀚𑀸𑀪𑀺𑀥𑀸𑀦𑁄, 𑀘, 𑀅𑀫𑀘𑁆𑀘𑁄 𑀢𑀲𑁆𑀲 𑀭𑀸𑀚𑀺𑀦𑁄;

𑀧𑀭𑀺𑀯𑁂𑀡𑀁 𑀅𑀓𑀸𑀭𑀫𑁆𑀫𑀁, 𑀦𑀝𑁆𑀞𑀁 𑀢𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁.

𑁩𑁫. 𑀭𑀸𑀚𑀸 𑀢𑀻𑀲𑀼 𑀦𑀺𑀓𑀸𑀬𑁂𑀲𑀼, 𑀭𑀽𑀧𑀓𑀫𑁆𑀫𑀫𑀦𑁄𑀭𑀫𑀁;

𑀫𑀡𑁆𑀟𑀧𑀸𑀦𑀺 𑀯𑀺𑀘𑀺𑀢𑁆𑀢𑀸𑀦𑀺, 𑀯𑁂𑀚𑀬𑀦𑁆𑀢𑁄 𑀧𑀫𑀸𑀦𑀺 𑀘.

𑁩𑁬. 𑀓𑀸𑀭𑁂𑀢𑁆𑀯𑀸 𑀥𑀸𑀢𑀼𑀧𑀽𑀚𑀸𑀬𑁄, 𑀓𑀢𑁆𑀯𑀸 𑀚𑀦𑀫𑀦𑁄𑀳𑀭𑀸;

𑀬𑀣𑀸 𑀓𑀫𑁆𑀫𑀁 𑀕𑀢𑁄 𑀞𑀢𑁆𑀯𑀸, 𑀯𑀲𑁆𑀲𑀸𑀦𑀺 𑀤𑀲𑀲𑀢𑁆𑀢 𑀘.

𑁩𑁭. 𑀤𑁆𑀯𑀬𑀸𑀪𑀺𑀲𑁂𑀓𑀲𑀜𑁆𑀚𑀸𑀢𑁄, 𑀬𑀼𑀯𑀭𑀸𑀚𑀸𑀣 𑀓𑀲𑁆𑀲𑀧𑁄;

𑀆𑀲𑀺 𑀮𑀤𑁆𑀥𑀸𑀪𑀺𑀲𑁂𑀓𑁄 𑀲𑁄, 𑀮𑀁𑀓𑀸𑀭𑀚𑁆𑀚𑁂𑀓𑀫𑀸𑀕𑀢𑁂.

𑁩𑁮. 𑀲𑀤𑁆𑀥𑁄 𑀆𑀕𑀢𑀫𑀕𑁆𑀕𑁄𑀯, 𑀲𑀸𑀪𑀺𑀜𑁆𑀜𑁄 𑀯𑀺𑀬 𑀧𑀜𑁆𑀜𑀯𑀸;

𑀯𑀢𑁆𑀢𑀸 𑀲𑁄 𑀫𑀭𑀫𑀦𑁆𑀢𑀺𑀯, 𑀘𑀸𑀕𑀯𑀸 𑀥𑀦𑀤𑁄 𑀯𑀺𑀬.

𑁩𑁯. 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀻, 𑀲𑀩𑁆𑀩𑀲𑀺𑀧𑁆𑀧𑀯𑀺𑀲𑀸𑀭𑀤𑁄;

𑀬𑀼𑀢𑁆𑀢𑀸𑀬𑀼𑀢𑁆𑀢𑀯𑀺𑀘𑀸𑀭𑀸𑀬, 𑀦𑀺𑀧𑀼𑀡𑁄 𑀦𑀬𑀓𑁄𑀯𑀺𑀤𑁄.

𑁪𑁦. 𑀅𑀘𑀮𑁄 𑀇𑀦𑁆𑀤𑀮𑀻𑀮𑁄’𑀯, 𑀞𑀺𑀢𑁄 𑀲𑀼𑀕𑀢𑀲𑀸𑀲𑀦𑁂;

𑀧𑀭𑀧𑁆𑀧𑀯𑀸𑀤𑀺𑀯𑀸𑀢𑁂𑀳𑀺, 𑀲𑀩𑁆𑀩𑁂𑀳𑀺’𑀧𑀺 𑀅𑀓𑀫𑁆𑀧𑀺𑀬𑁄.

𑁪𑁧. 𑀫𑀸𑀬𑀸𑀲𑀸𑀞𑁂𑀬𑁆𑀬𑀫𑀸𑀦𑀸𑀤𑀺, 𑀧𑀸𑀧𑀸𑀦𑀜𑁆𑀘 𑀅𑀕𑁄𑀘𑀭𑁄;

𑀕𑀼𑀡𑀸𑀦𑀁 𑀆𑀓𑀭𑁄 𑀲𑀩𑁆𑀩-𑀭𑀢𑀦𑀸𑀦𑀁 𑀯𑀲𑀸𑀕𑀭𑁄.

𑁪𑁨. 𑀪𑀽𑀫𑀺𑀘𑀦𑁆𑀤𑁄 𑀦𑀭𑀺𑀦𑁆𑀤𑁄 𑀲𑁄, 𑀯𑀁𑀲𑁂 𑀚𑀸𑀢𑀲𑁆𑀲 𑀅𑀢𑁆𑀢𑀦𑁄;

𑀤𑀧𑁆𑀧𑀼𑀴𑀲𑁆𑀲𑀸𑀤𑀻𑀧𑀸𑀤𑀲𑁆𑀲, 𑀬𑀼𑀯𑀭𑀸𑀚𑀧𑀤𑀁 𑀅𑀤𑀸.

𑁪𑁩. 𑀭𑀚𑁆𑀚𑀁 𑀤𑀲𑀳𑀺 𑀥𑀫𑁆𑀫𑁂𑀳𑀺, 𑀘𑀢𑀼𑀲𑀗𑁆𑀕𑀳𑀯𑀢𑁆𑀣𑀽𑀳𑀺;

𑀓𑀭𑁄𑀦𑁆𑀢𑁄 𑀧𑀭𑀺𑀧𑀸𑀮𑁂𑀲𑀺, 𑀮𑁄𑀓𑀁 𑀦𑁂𑀢𑁆𑀢𑀁𑀯 𑀅𑀢𑁆𑀢𑀦𑁄.

𑁪𑁪. 𑀲𑁄 𑀥𑁂𑀢𑁆𑀯𑀸 𑀲𑀸𑀲𑀦𑀁 𑀲𑀩𑁆𑀩𑀁, 𑀥𑀫𑁆𑀫𑀓𑀫𑁆𑀫𑁂𑀦 𑀲𑀢𑁆𑀣𑀼𑀦𑁄;

𑀕𑀳𑁂𑀢𑁆𑀯𑀸 𑀦𑀯𑀓𑁂 𑀪𑀺𑀓𑁆𑀔𑀽, 𑀅𑀓𑀸𑀲𑀸’𑀯𑀸𑀲𑀧𑀽𑀭𑀡𑀁.

𑁪𑁫. 𑀤𑀼𑀝𑁆𑀞𑀕𑀸𑀫𑀡𑀺𑀭𑀸𑀚𑁂𑀦, 𑀓𑀢𑀁 𑀫𑀭𑀺𑀘𑀯𑀝𑁆𑀝𑀺𑀓𑀁;

𑀦𑀝𑁆𑀞𑀁 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸, 𑀦𑀸𑀦𑀸𑀆𑀯𑀸𑀲 𑀪𑀽𑀲𑀺𑀢𑀁.

𑁪𑁬. 𑀣𑁂𑀭𑀯𑀁𑀲𑀚𑀪𑀺𑀓𑁆𑀔𑀽𑀦𑀁, 𑀅𑀤𑀸 𑀓𑀢𑁆𑀯𑀸 𑀫𑀳𑀸𑀫𑀳𑀁;

𑀢𑁂𑀲𑀁 𑀧𑀜𑁆𑀘𑀲𑀢𑀸𑀦𑀜𑁆𑀘, 𑀪𑁄𑀕𑀕𑀸𑀫𑁂 𑀘 𑀤𑀸𑀧𑀬𑀺.

𑁪𑁭. 𑀢𑀢𑁆𑀣 𑀲𑁄 𑀢𑀼𑀲𑀺𑀢𑁂 𑀭𑀫𑁆𑀫𑁂, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑀁;

𑀫𑁂𑀢𑁆𑀢𑁂𑀬𑁆𑀬𑀁 𑀮𑁄𑀓𑀦𑀸𑀣𑀁 𑀢𑀁, 𑀤𑁂𑀲𑁂𑀦𑁆𑀢𑀁 𑀥𑀫𑁆𑀫𑀫𑀼𑀢𑁆𑀢𑀫𑀁.

𑁪𑁮. 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀮𑁄𑀓𑀲𑁆𑀲, 𑀯𑀺𑀳𑀸𑀭𑁂 𑀲𑀩𑁆𑀩𑀲𑀚𑁆𑀚𑀺𑀢𑁂;

𑀦𑀺𑀲𑀺𑀦𑁆𑀦𑁄 𑀫𑀡𑁆𑀟𑀧𑁂 𑀭𑀫𑁆𑀫𑁂, 𑀦𑀸𑀦𑀸𑀭𑀢𑀦𑀪𑀽𑀲𑀺𑀢𑁂.

𑁪𑁯. 𑀦𑀕𑀭𑁂𑀳𑀺 𑀘 𑀲𑀩𑁆𑀩𑁂𑀳𑀺, 𑀪𑀺𑀓𑁆𑀔𑀽𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀩𑀼𑀤𑁆𑀥𑀮𑀺𑀮𑀸𑀬 𑀮𑀁𑀓𑀺𑀦𑁆𑀤𑁄, 𑀅𑀪𑀺𑀥𑀫𑁆𑀫 𑀫𑀪𑀸𑀲𑀬𑀺.

𑁫𑁦. 𑀲𑁄𑀡𑁆𑀡𑀧𑀝𑁆𑀝𑁂 𑀮𑀺𑀔𑀸𑀧𑁂𑀢𑁆𑀯𑀸-𑀪𑀺𑀥𑀫𑁆𑀫𑀧𑀺𑀝𑀓𑀁 𑀢𑀤𑀸;

𑀥𑀫𑁆𑀫𑀲𑀗𑁆𑀕𑀡𑀺𑀓𑀁 𑀧𑁄𑀢𑁆𑀣𑀁, 𑀦𑀸𑀦𑀸𑀭𑀢𑀦 𑀪𑀽𑀲𑀺𑀢𑀁.

𑁫𑁧. 𑀓𑀢𑁆𑀯𑀸 𑀦𑀕𑀭𑀫𑀚𑁆𑀛𑀫𑁆𑀳𑀺, 𑀓𑀸𑀭𑁂𑀢𑁆𑀯𑀸 𑀳𑁂𑀫𑀫𑀼𑀢𑁆𑀢𑀫𑀁;

𑀢𑀁 𑀢𑀢𑁆𑀣 𑀞𑀧𑀬𑀺𑀢𑁆𑀯𑀸𑀦, 𑀧𑀭𑀺𑀳𑀸𑀭𑀫𑀤𑀸𑀧𑀬𑀺.

𑁫𑁨. 𑀲𑀓𑁆𑀓𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁, 𑀤𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄;

𑀧𑀭𑀺𑀳𑀸𑀭𑁂 𑀦𑀺𑀬𑁄𑀚𑁂𑀲𑀺, 𑀢𑀢𑁆𑀣 𑀢𑀁 𑀥𑀫𑁆𑀫𑀧𑁄𑀢𑁆𑀣𑀓𑁂.

𑁫𑁩. 𑀅𑀦𑀼𑀲𑀁𑀯𑀘𑁆𑀙𑀭𑀁 𑀭𑀸𑀚𑀸, 𑀧𑀼𑀭𑀁 𑀤𑁂𑀯𑀧𑀼𑀭𑀻 𑀯𑀺𑀬;

𑀯𑀺𑀪𑀽𑀲𑀺𑀢𑀸𑀬 𑀲𑁂𑀦𑀸𑀬, 𑀲𑀚𑁆𑀚𑁂𑀢𑁆𑀯𑀸 𑀧𑀭𑀺𑀯𑀸𑀭𑀺𑀢𑁄.

𑁫𑁪. 𑀤𑁂𑀯𑀭𑀸𑀚𑀸𑀯 𑀲𑁄𑀪𑀦𑁆𑀢𑁄, 𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑁄;

𑀳𑀢𑁆𑀣𑀺𑀔𑀡𑁆𑀟𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀘𑀭𑀦𑁆𑀢𑁄 𑀧𑀼𑀭𑀯𑀻𑀣𑀺𑀬𑀁.

𑁫𑁫. 𑀫𑀳𑀢𑀸 𑀧𑀭𑀺𑀳𑀸𑀭𑁂𑀦, 𑀦𑁂𑀢𑁆𑀯𑀸 𑀢𑀁 𑀥𑀫𑁆𑀫𑀲𑀗𑁆𑀕𑀳𑀁;

𑀅𑀢𑁆𑀢𑀦𑀸 𑀓𑀸𑀭𑀺𑀢𑀁 𑀭𑀫𑁆𑀫𑀁, 𑀯𑀺𑀳𑀸𑀭𑀁 𑀲𑀩𑁆𑀩𑀲𑀚𑁆𑀚𑀺𑀢𑀁.

𑁫𑁬. 𑀢𑀢𑁆𑀣 𑀥𑀸𑀢𑀼𑀕𑀢𑁂 𑀭𑀫𑁆𑀫𑁂, 𑀦𑀸𑀦𑀸𑀭𑀢𑀦𑀪𑀽𑀲𑀺𑀢𑁂;

𑀫𑀡𑁆𑀟𑀧𑁂 𑀥𑀸𑀢𑀼𑀧𑀺𑀞𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸𑀧𑀺𑀬 𑀧𑀽𑀚𑀬𑀺.

𑁫𑁭. 𑀕𑀦𑁆𑀣𑀸𑀓𑀭𑀧𑀭𑀺𑀯𑁂𑀡𑀁, 𑀫𑀳𑀸𑀫𑁂𑀖𑀯𑀦𑁂 𑀅𑀓𑀸;

𑀦𑀕𑀭𑁂 𑀯𑀚𑁆𑀚𑀲𑀸𑀮𑀸 𑀘, 𑀢𑁂𑀲𑀁 𑀕𑀸𑀫𑁂 𑀘 𑀤𑀸𑀧𑀬𑀺.

𑁫𑁮. 𑀪𑀡𑁆𑀟𑀺𑀓𑀧𑀭𑀺𑀯𑁂𑀡𑀜𑁆𑀘, 𑀲𑀺𑀮𑀸𑀫𑁂𑀖𑀜𑁆𑀘 𑀧𑀩𑁆𑀩𑀢𑀁;

𑀓𑀢𑁆𑀯𑀸’𑀪𑀬𑀕𑀺𑀭𑀺𑀲𑁆𑀫𑀺𑀁 𑀲𑁄, 𑀢𑁂𑀲𑀁 𑀕𑀸𑀫𑀫𑀤𑀸𑀧𑀬𑀺.

𑁫𑁯. 𑀚𑁄𑀢𑀺𑀯𑀦𑀯𑀺𑀳𑀸𑀭𑀲𑁆𑀫𑀺𑀁, 𑀭𑀸𑀚𑀸 𑀮𑀗𑁆𑀓𑀸𑀬 𑀦𑀸𑀬𑀓𑁄;

𑀪𑀢𑁆𑀢𑀕𑁆𑀕𑀲𑁆𑀲 𑀅𑀤𑀸 𑀕𑀸𑀫𑀁, 𑀢𑀣𑀸’𑀪𑀬𑀕𑀺𑀭𑀺𑀫𑁆𑀳𑀺 𑀘.

𑁬𑁦. 𑀤𑀓𑁆𑀔𑀺𑀡𑀕𑀺𑀭𑀺𑀦𑀸𑀫𑀲𑁆𑀲, 𑀯𑀺𑀳𑀸𑀭𑀲𑁆𑀲 𑀘 𑀤𑀸𑀧𑀬𑀺;

𑀕𑀸𑀫𑀁 𑀓𑀢𑀜𑁆𑀜𑀼𑀪𑀸𑀯𑁂𑀦, 𑀭𑀸𑀚𑀸 𑀧𑀭𑀫𑀥𑀫𑁆𑀫𑀺𑀓𑁄.

𑁬𑁧. 𑀲𑀓𑁆𑀓𑀲𑁂𑀦𑀸𑀧𑀢𑀺 𑀭𑀫𑁆𑀫𑀁, 𑀧𑀭𑀺𑀯𑁂𑀡𑀁 𑀲𑀼𑀫𑀸𑀧𑀺𑀬;

𑀅𑀤𑀸𑀲𑀺 𑀲𑀳𑀕𑀸𑀫𑁂𑀳𑀺, 𑀣𑁂𑀭𑀺𑀬𑀸𑀦𑀁 𑀲𑀦𑀸𑀫𑀺𑀓𑀁.

𑁬𑁨. 𑀪𑀭𑀺𑀬𑀸 𑀯𑀚𑀺𑀭𑀸 𑀢𑀲𑁆𑀲, 𑀢𑁂𑀲𑀁𑀬𑁂𑀯 𑀅𑀤𑀸𑀧𑀬𑀺;

𑀧𑀭𑀺𑀯𑁂𑀡𑀁 𑀓𑀭𑀺𑀢𑁆𑀯𑀸𑀦, 𑀲𑀕𑀸𑀫𑀁 𑀲𑀓𑀦𑀸𑀫𑀓𑀁.

𑁬𑁩. 𑀉𑀧𑀲𑁆𑀲𑀬𑀁 𑀓𑀭𑀺𑀢𑁆𑀯𑀸𑀦, 𑀲𑀸 𑀏𑀯 𑀧𑀤𑀮𑀜𑁆𑀙𑀦𑁂;

𑀪𑀺𑀓𑁆𑀔𑀽𑀦𑀻𑀦𑀁 𑀅𑀤𑀸 𑀣𑁂𑀭-𑀯𑀁𑀲𑁂 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁂.

𑁬𑁪. 𑀲𑀓𑁆𑀓𑀲𑁂𑀦𑀸𑀧𑀢𑀺 𑀫𑀸𑀢𑀸, 𑀤𑁂𑀯𑀸’𑀭𑀜𑁆𑀜𑀓 𑀪𑀺𑀓𑁆𑀔𑀽𑀦𑀁;

𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁, 𑀅𑀓𑀸’𑀯𑀸𑀲𑀁 𑀲𑀦𑀸𑀫𑀓𑀁.

𑁬𑁫. 𑀲𑀸 𑀏𑀯 𑀧𑀝𑀺𑀩𑀺𑀫𑁆𑀩𑀲𑁆𑀲, 𑀲𑀢𑁆𑀣𑀼 𑀫𑀭𑀺𑀘𑀯𑀝𑁆𑀝𑀺𑀬𑀁;

𑀘𑀽𑀴𑀸𑀫𑀡𑀺𑀁 𑀧𑀸𑀤𑀚𑀮𑀁, 𑀅𑀓𑀸 𑀙𑀢𑁆𑀢𑀜𑁆𑀘 𑀘𑀻𑀯𑀭𑀁.

𑁬𑁬. 𑀭𑀸𑀚𑀸 𑀭𑀸𑀚𑀸𑀮𑀬𑁂𑀬𑁂𑀯, 𑀭𑀸𑀚𑀯𑀁𑀲𑀁 𑀲𑀦𑀸𑀫𑀓𑀁;

𑀅𑀓𑀸𑀲𑀺 𑀧𑀸𑀴𑀺𑀓𑀁 𑀦𑀸𑀫, 𑀧𑀸𑀲𑀸𑀤𑀁 𑀲𑀼𑀫𑀦𑁄 𑀳𑀭𑀁.

𑁬𑁭. 𑀧𑀽𑀚𑁂𑀲𑀺 𑀭𑀸𑀚𑀺𑀦𑀻 𑀦𑀸𑀫, 𑀭𑀸𑀚𑀺𑀦𑁄 𑀪𑀭𑀺𑀬𑀸’𑀧𑀭𑀸;

𑀧𑀝𑁆𑀝𑀓𑀜𑁆𑀘𑀼𑀓𑀧𑀽𑀚𑀸𑀬, 𑀳𑁂𑀫𑀫𑀸𑀮𑀺𑀓 𑀘𑁂𑀢𑀺𑀬𑀁.

𑁬𑁮. 𑀢𑀲𑁆𑀲𑀸 𑀧𑀼𑀢𑁆𑀢𑁄𑀲𑀺 𑀲𑀺𑀤𑁆𑀥𑀢𑁆𑀣𑁄, 𑀦𑀸𑀫 𑀇𑀲𑁆𑀲𑀭𑀺𑀬𑁂 𑀞𑀺𑀢𑁄;

𑀲𑀼𑀢𑁄 𑀫𑀮𑀬𑀭𑀸𑀚𑀸𑀢𑀺, 𑀭𑀽𑀧𑁂𑀦 𑀫𑀓𑀭𑀤𑁆𑀥𑀚𑁄.

𑁬𑁯. 𑀭𑀸𑀚𑀸 𑀢𑀲𑁆𑀫𑀺𑀁 𑀫𑀢𑁂 𑀓𑀢𑁆𑀯𑀸, 𑀲𑀸𑀮𑀁 𑀪𑀺𑀓𑁆𑀔𑀼𑀦𑀫𑀼𑀢𑁆𑀢𑀫𑀁;

𑀤𑀸𑀦𑀯𑀝𑁆𑀝𑀁 𑀧𑀝𑁆𑀞𑀧𑁂𑀢𑁆𑀯𑀸, 𑀢𑀲𑁆𑀲 𑀧𑀢𑁆𑀢𑀺𑀫𑀤𑀸 𑀢𑀤𑀸.

𑁭𑁦. 𑀏𑀯𑀁 𑀥𑀫𑁆𑀫𑁂𑀦 𑀓𑀸𑀭𑁂𑀦𑁆𑀢𑁂, 𑀭𑀚𑁆𑀚𑀁 𑀮𑀗𑁆𑀓𑀸𑀤𑀻𑀧𑁂 𑀢𑀤𑀸;

𑀘𑁄𑀴𑀭𑀸𑀚𑁂𑀦 𑀬𑀼𑀚𑁆𑀛𑀺𑀢𑁆𑀯𑀸, 𑀧𑀡𑁆𑀟𑀼𑀭𑀸𑀚𑀸 𑀧𑀭𑀸𑀚𑀺𑀢𑁄.

𑁭𑁧. 𑀧𑀡𑁆𑀡𑀸𑀓𑀸𑀭𑀸𑀦𑀺 𑀦𑁂𑀓𑀸𑀦𑀺, 𑀩𑀮𑀁 𑀲𑀦𑁆𑀥𑀸𑀬 𑀧𑁂𑀲𑀬𑀺;

𑀭𑀸𑀚𑀸𑀮𑀁𑀓𑀺𑀲𑁆𑀲𑀭𑁄 𑀲𑀤𑁆𑀥𑀺𑀁, 𑀫𑀦𑁆𑀢𑁂𑀢𑁆𑀯𑀸 𑀲𑀘𑀺𑀯𑁂𑀳𑀺 𑀲𑁄.

𑁭𑁨. 𑀲𑀦𑁆𑀦𑀬𑁆𑀳 𑀩𑀮𑀓𑀸𑀬𑀁 𑀲𑁄, 𑀲𑀓𑁆𑀓𑀲𑁂𑀦𑀸𑀧𑀢𑀺𑀁 𑀲𑀓𑀁;

𑀩𑀮𑀲𑁆𑀲 𑀦𑀸𑀬𑀓𑀁 𑀓𑀢𑁆𑀯𑀸, 𑀫𑀳𑀸𑀬𑀺𑀢𑁆𑀣𑀫𑀼𑀧𑀸𑀕𑀫𑀺.

𑁭𑁩. 𑀯𑀺𑀚𑀬𑀁 𑀧𑀼𑀩𑁆𑀩𑀭𑀸𑀚𑀽𑀦𑀁, 𑀯𑀢𑁆𑀯𑀸 𑀯𑁂𑀮𑀸𑀢𑀝𑁂 𑀞𑀺𑀢𑁄;

𑀉𑀲𑁆𑀲𑀸𑀳𑀁 𑀚𑀦𑀬𑀺𑀢𑁆𑀯𑀸𑀦, 𑀦𑀸𑀯𑀁 𑀆𑀭𑁄𑀧𑀬𑀻 𑀩𑀮𑀁.