𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀧𑀜𑁆𑀘𑀭𑀸𑀚𑀓𑁄

𑁧. 𑀅𑀘𑁆𑀘𑀬𑁂 𑀧𑀺𑀢𑀼𑀦𑁄 𑀭𑀸𑀚𑀸, 𑀉𑀧𑀭𑀸𑀚𑀸 𑀅𑀳𑁄𑀲𑀺 𑀲𑁄;

𑀲𑀫𑀢𑁆𑀣𑁄 𑀲𑀓𑁆𑀓𑀼𑀫𑀺𑀢𑁆𑀢𑀸𑀦𑀁, 𑀓𑀸𑀢𑀼𑀁 𑀦𑀺𑀕𑁆𑀕𑀳 𑀲𑀁𑀕𑀳𑁂.

𑁨. 𑀲𑁂𑀦𑀸 𑀦𑀸𑀫𑀲𑀺 𑀲𑀧𑁆𑀧𑀜𑁆𑀜𑀸, 𑀫𑀳𑁂𑀲𑀻 𑀢𑀲𑁆𑀲 𑀭𑀸𑀚𑀺𑀦𑁄;

𑀔𑀼𑀤𑁆𑀤𑀧𑀼𑀢𑁆𑀢𑀸 𑀧𑀻𑀬𑀸’𑀢𑀻𑀯, 𑀭𑀜𑁆𑀜𑁄 𑀓𑀮𑁆𑀬𑀸𑀡𑀤𑀲𑁆𑀲𑀦𑀸.

𑁩. 𑀅𑀤𑀸𑀲𑀺 𑀬𑀼𑀯𑀭𑀸𑀚𑀢𑁆𑀢𑀁, 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄;

𑀆𑀤𑀺𑀧𑀸𑀤𑁂’𑀧𑀭𑁂𑀓𑀸𑀲𑀺, 𑀭𑀸𑀚𑀺𑀦𑀻𑀧𑀺 𑀘 𑀥𑀻𑀢𑀭𑁄.

𑁪. 𑀤𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀭𑀸𑀚𑀸, 𑀢𑁂𑀲𑀁 𑀢𑁂𑀲𑀁 𑀬𑀣𑀸𑀭𑀳𑀁;

𑀚𑀦𑀁 𑀲𑀗𑁆𑀕𑀳𑀯𑀢𑁆𑀣𑀽𑀳𑀺, 𑀲𑀗𑁆𑀕𑀳𑁂𑀲𑀺 𑀘𑀢𑀽𑀳𑀺𑀧𑀺.

𑁫. 𑀅𑀣 𑀓𑁂𑀦𑀸𑀧𑀺 𑀲𑁄 𑀕𑀦𑁆𑀢𑁆𑀯𑀸, 𑀳𑁂𑀢𑀼𑀦𑀸 𑀫𑀡𑀺𑀳𑀻𑀭𑀓𑀁;

𑀯𑀲𑀦𑁆𑀢𑁄 𑀓𑀺𑀭 𑀅𑀲𑁆𑀲𑁄𑀲𑀺, 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄 𑀇𑀢𑀺.

𑁬. 𑀢𑀢𑁄 𑀲𑁂𑀦𑀸𑀧𑀢𑀺𑀜𑁆𑀘𑁂𑀯, 𑀚𑁂𑀝𑁆𑀞𑀧𑀼𑀢𑁆𑀢𑀜𑁆𑀘 𑀅𑀢𑁆𑀢𑀦𑁄;

𑀕𑀦𑁆𑀢𑁆𑀯𑀸 𑀲𑀸𑀥𑁂𑀣 𑀢𑀁 𑀤𑁂𑀲-𑀫𑀻𑀢𑀺 𑀧𑁂𑀲𑁂𑀲𑀺 𑀲𑀚𑁆𑀚𑀼𑀓𑀁.

𑁭. 𑀢𑁂𑀲𑀼 𑀢𑀢𑁆𑀣𑁄𑀧𑀬𑀸𑀢𑁂𑀲𑀼, 𑀧𑀺𑀲𑀼𑀦𑀸 𑀪𑁂𑀤𑀘𑀺𑀦𑁆𑀢𑀓𑀸;

𑀯𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀪𑀺𑀦𑁆𑀤𑀺𑀁𑀲𑀼, 𑀢𑁂 𑀉𑀪𑁄𑀧𑀺 𑀦𑀭𑀸𑀥𑀺𑀧𑁂.

𑁮. 𑀢𑀢𑁄 𑀤𑁆𑀯𑁂 𑀯𑁂𑀭𑀺𑀦𑁄 𑀳𑀼𑀢𑁆𑀯𑀸, 𑀤𑁂𑀲𑀁 𑀕𑀡𑁆𑀳𑀺𑀢𑀼𑀫𑀸𑀭𑀪𑀼𑀁;

𑀭𑀸𑀚𑀸 𑀲𑀼𑀢𑁆𑀯𑀸 𑀔𑀡𑁂𑀦𑁂𑀯, 𑀤𑀼𑀭𑀢𑀺𑀲𑁆𑀲 𑀫𑀼𑀧𑀸𑀕𑀫𑀺.

𑁯. 𑀢𑁂 𑀉𑀪𑁄 𑀢𑀢𑁆𑀣 𑀖𑀸𑀢𑁂𑀢𑁆𑀯𑀸, 𑀢𑁂𑀲𑀁 𑀲𑀩𑁆𑀩𑀁 𑀲𑀫𑀸𑀤𑀺𑀬;

𑀳𑀦𑁆𑀢𑁆𑀯𑀸 𑀢𑀁 𑀧𑀓𑁆𑀔𑀺𑀬𑁂 𑀲𑀩𑁆𑀩𑁂, 𑀧𑀼𑀴𑀢𑁆𑀣𑀺𑀦𑀕𑀭𑀁 𑀕𑀫𑀺.

𑁧𑁦. 𑀢𑀤𑀸 𑀭𑁄𑀳𑀡𑀤𑁂𑀲𑀫𑁆𑀳𑀺, 𑀪𑁄𑀕𑀸𑀥𑀺𑀧𑀢𑀺𑀦𑁄 𑀲𑀼𑀢𑁄;

𑀤𑀸𑀞𑀸𑀲𑀺𑀯𑀸𑀤𑀺𑀧𑀸𑀤𑀲𑁆𑀲, 𑀫𑀳𑀺𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄.

𑁧𑁧. 𑀧𑀺𑀢𑀼𑀦𑁄 𑀲𑁄’𑀧𑀭𑀺𑀚𑁆𑀛𑀺𑀢𑁆𑀯𑀸, 𑀭𑀜𑁆𑀜𑁄 𑀲𑀦𑁆𑀢𑀺𑀓𑀫𑀸𑀕𑀫𑀸;

𑀤𑀺𑀲𑁆𑀯𑀸 𑀭𑀸𑀚𑀸𑀧𑀺 𑀲𑀦𑁆𑀢𑀼𑀝𑁆𑀞𑁄, 𑀢𑀁 𑀲𑀗𑁆𑀕𑀡𑁆𑀳𑀺 𑀬𑀣𑀸𑀭𑀳𑀁.

𑁧𑁨. 𑀢𑁂𑀦 𑀫𑁂𑀢𑁆𑀢𑀺𑀁 𑀣𑀺𑀭𑀁 𑀓𑀸𑀢𑀼𑀁, 𑀥𑀻𑀢𑀭𑀁 𑀤𑁂𑀯 𑀦𑀸𑀫𑀺𑀓𑀁;

𑀢𑀲𑁆𑀲 𑀤𑀢𑁆𑀯𑀸𑀦 𑀧𑀸𑀳𑁂𑀲𑀺, 𑀩𑀮𑀁 𑀭𑁄𑀳𑀡𑀫𑁂𑀯𑀲𑁄.

𑁧𑁩. 𑀲𑁄 𑀕𑀦𑁆𑀢𑁆𑀯𑀸 𑀭𑀸𑀚𑀲𑁂𑀦𑀸𑀬, 𑀫𑀤𑁆𑀤𑀸𑀧𑁂𑀢𑁆𑀯𑀸𑀦 𑀭𑁄𑀳𑀡𑀁;

𑀚𑀫𑁆𑀩𑀼𑀤𑀻𑀧𑀁 𑀧𑀮𑀸𑀧𑁂𑀢𑁆𑀯𑀸, 𑀧𑀺𑀢𑀭𑀁 𑀭𑁄𑀳𑀡𑀁 𑀮𑀪𑀺.

𑁧𑁪. 𑀫𑀳𑀸𑀯𑀺𑀳𑀸𑀭𑁂 𑀓𑀸𑀭𑁂𑀲𑀺, 𑀲𑀮𑀸𑀓𑀕𑁆𑀕𑀁 𑀣𑀺𑀭𑀁 𑀲𑀼𑀪𑀁;

𑀔𑁄𑀮𑀓𑁆𑀔𑀺𑀬𑀫𑀼𑀦𑀺𑀦𑁆𑀤𑀲𑁆𑀲, 𑀧𑀭𑀺𑀳𑀸𑀭𑀸𑀬 𑀤𑀸𑀧𑀬𑀺.

𑁧𑁫. 𑀫𑀳𑀸𑀦𑀸𑀫𑀯𑁆𑀳𑀬𑀁 𑀕𑀸𑀫𑀁, 𑀧𑀽𑀚𑀬𑀺𑀢𑁆𑀯𑀸 𑀬𑀣𑀸𑀩𑀮𑀁;

𑀯𑀟𑁆𑀠𑀫𑀸𑀦𑀤𑀼𑀫𑀺𑀦𑁆𑀤𑀲𑁆𑀲, 𑀚𑀺𑀡𑁆𑀡𑀁 𑀕𑁂𑀳𑀜𑁆𑀘 𑀓𑀸𑀭𑀺𑀬.

𑁧𑁬. 𑀭𑀼𑀓𑁆𑀔𑀡𑀢𑁆𑀣𑀸𑀬 𑀢𑀲𑁆𑀲𑀸;𑀤𑀸, 𑀓𑁄𑀝𑁆𑀞𑀸𑀕𑀸𑀫𑀁 𑀩𑀳𑀼𑀤𑀬𑀁;

𑀦𑀻𑀮𑀸𑀭𑀸𑀫𑀲𑁆𑀲 𑀧𑀸𑀤𑀸𑀲𑀺, 𑀓𑀸𑀴𑀼𑀲𑁆𑀲𑀁 𑀦𑀸𑀫 𑀕𑀸𑀫𑀓𑀁.

𑁧𑁭. 𑀮𑁄𑀳𑀭𑀽𑀧𑀲𑁆𑀲 𑀧𑀸𑀤𑀸𑀲𑀺, 𑀆𑀭𑀸𑀫𑀲𑁆𑀲 𑀘 𑀕𑀸𑀫𑀓𑀁;

𑀚𑀺𑀡𑁆𑀡𑀜𑁆𑀘 𑀧𑀝𑀺𑀲𑀗𑁆𑀔𑀸𑀲𑀺, 𑀧𑀝𑀺𑀫𑀸𑀬𑁄 𑀘 𑀓𑀸𑀭𑀬𑀺.

𑁧𑁮. 𑀧𑀸𑀲𑀸𑀤𑁂 𑀘𑁂𑀢𑀺𑀬𑁄 𑀘𑁂𑀯, 𑀯𑀺𑀳𑀸𑀭𑁂 𑀘 𑀅𑀦𑀧𑁆𑀧𑀓𑁂;

𑀧𑀼𑀴𑀢𑁆𑀣𑀺𑀦𑀕𑀭𑁂’𑀓𑀸𑀲𑀺, 𑀯𑁂𑀚𑁆𑀚𑀲𑀸𑀮𑀁 𑀫𑀳𑀸𑀤𑀬𑁄.

𑁧𑁯. 𑀢𑀣𑀸 𑀧𑀡𑁆𑀟𑀸 𑀯𑀺𑀬𑀜𑁆𑀘𑁂𑀯, 𑀪𑁄𑀕𑀕𑀸𑀫𑀲𑀫𑀸𑀬𑀼𑀢𑀁;

𑀧𑀺𑀝𑁆𑀞𑀲𑀧𑁆𑀧𑀺𑀦𑀫𑀦𑁆𑀥𑀸𑀦𑀁, 𑀲𑀸𑀮𑀸𑀬𑁄 𑀘 𑀢𑀳𑀺𑀁 𑀢𑀳𑀺𑀁.

𑁨𑁦. 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀸𑀧𑁂𑀢𑁆𑀯𑀸, 𑀅𑀝𑁆𑀝𑁂 𑀲𑀫𑁆𑀫𑀸 𑀯𑀺𑀦𑀺𑀘𑁆𑀙𑀺𑀢𑁂;

𑀭𑀸𑀚𑀕𑁂𑀳𑁂 𑀞𑀧𑀸𑀧𑁂𑀲𑀺, 𑀉𑀓𑁆𑀓𑁄𑀝𑀦𑀪𑀬𑁂𑀦 𑀲𑁄.

𑁨𑁧. 𑀦𑀸𑀕𑀯𑀟𑁆𑀠𑀦𑀦𑀸𑀫𑀲𑁆𑀲, 𑀪𑁄𑀕𑀕𑀸𑀫𑁂 𑀩𑀳𑀽 𑀅𑀤𑀸;

𑀮𑁂𑀔𑁂’𑀧𑀼𑀩𑁆𑀩𑁂 𑀦 𑀯𑀸𑀭𑁂𑀢𑁆𑀯𑀸, 𑀧𑀸𑀮𑁂𑀢𑁆𑀯𑀸 𑀧𑀼𑀩𑁆𑀩𑀲𑀸𑀲𑀦𑀁.

𑁨𑁨. 𑀧𑀺𑀢𑀭𑀸 𑀘 𑀫𑀳𑀸𑀤𑀸𑀦𑀁, 𑀧𑀼𑀜𑁆𑀜𑀫𑀜𑁆𑀜𑀫𑁆𑀧𑀺 𑀯𑀸 𑀓𑀢𑀁;

𑀲𑀩𑁆𑀩𑀁 𑀢𑀫𑀯𑀺𑀦𑀸𑀲𑁂𑀢𑁆𑀯𑀸, 𑀦𑀺𑀘𑁆𑀘𑀁 𑀲𑁄 𑀭𑀓𑁆𑀔𑀺 𑀲𑀸𑀤𑀭𑁄.

𑁨𑁩. 𑀫𑀳𑁂𑀲𑀻 𑀘 𑀫𑀳𑀸𑀭𑀜𑁆𑀜𑁄, 𑀧𑀼𑀜𑁆𑀜𑀸𑀦𑀺 𑀩𑀳𑀼𑀓𑀸𑀭𑀬𑀺;

𑀓𑀡𑁆𑀝𑀓𑀁 𑀘𑁂𑀢𑀺𑀬𑀁 𑀓𑀸𑀲𑀺, 𑀤𑁂𑀯𑀻 𑀘𑁂𑀢𑀺𑀬𑀧𑀩𑁆𑀩𑀢𑁂.

𑁨𑁪. 𑀓𑀸𑀭𑁂𑀢𑁆𑀯𑀸 𑀚𑀬𑀲𑁂𑀦𑀜𑁆𑀘, 𑀧𑀩𑁆𑀩𑀢𑀁 𑀕𑀸𑀫𑀺𑀓𑀲𑁆𑀲𑀤𑀸;

𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀸 𑀕𑀸𑀫𑀁, 𑀫𑀳𑀼𑀫𑁆𑀫𑀸𑀭𑀜𑁆𑀘 𑀢𑀲𑁆𑀲 𑀤𑀸.

𑁨𑁫. 𑀲𑀺𑀮𑀸𑀫𑁂𑀖𑀯𑁆𑀳𑀬𑀁 𑀓𑀢𑁆𑀯𑀸, 𑀪𑀺𑀓𑁆𑀔𑀼𑀦𑀻𑀦𑀫𑀼𑀧𑀲𑁆𑀲𑀬𑀁;

𑀲𑀺𑀮𑀸𑀫𑁂𑀖𑀯𑁆𑀳𑀬𑁂 𑀤𑀸𑀲𑀺, 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀧𑀘𑁆𑀘𑀬𑁂.

𑁨𑁬. 𑀕𑀸𑀫𑀸𑀬𑁂’𑀲𑀼𑀁 𑀧𑀼𑀭𑀸𑀓𑀻𑀢𑀸, 𑀯𑀺𑀳𑀸𑀭𑁄 𑀢𑀢𑁆𑀣 𑀲𑀸𑀥𑀦𑀁;

𑀤𑀢𑁆𑀯𑀸 𑀢𑁂 𑀫𑁂 𑀘𑀬𑀺𑀢𑁆𑀯𑀸𑀦, 𑀯𑀺𑀳𑀸𑀭𑀲𑁆𑀲𑁂𑀯 𑀤𑀸𑀧𑀬𑀺.

𑁨𑁭. 𑀙𑀸𑀤𑀬𑀺𑀢𑁆𑀯𑀸 𑀫𑀳𑀸𑀭𑀼𑀓𑁆𑀔𑁂, 𑀲𑀩𑁆𑀩𑁂 𑀘𑁂𑀢𑀺𑀬𑀧𑀩𑁆𑀩𑀢𑁂;

𑀦𑀸𑀦𑀸𑀭𑀸𑀕𑁂 𑀥𑀚𑁂 𑀘𑁂𑀯, 𑀧𑀝𑀸𑀓𑀸𑀬𑁄 𑀘 𑀧𑀽𑀚𑀬𑀺.

𑁨𑁮. 𑀧𑀼𑀩𑁆𑀩𑀸𑀭𑀸𑀫𑀓𑀪𑀸𑀕𑀫𑁆𑀧𑀺, 𑀧𑀸𑀲𑀸𑀤𑀁 𑀧𑀝𑀺𑀲𑀗𑁆𑀔𑀭𑀺;

𑀉𑀲𑁆𑀲𑀸𑀦𑀯𑀺𑀝𑁆𑀞𑀺𑀁 𑀤𑀼𑀩𑁆𑀪𑁄𑀕𑀁, 𑀲𑀼𑀪𑁄𑀕𑀁 𑀢𑀲𑁆𑀲 𑀓𑀸𑀭𑀬𑀺.

𑁨𑁯. 𑀯𑀺𑀳𑀸𑀭𑀁 𑀕𑀺𑀭𑀺𑀪𑀡𑁆𑀟𑀜𑁆𑀘, 𑀦𑀝𑁆𑀞𑀁 𑀧𑀸𑀓𑀢𑀺𑀓𑀁 𑀓𑀭𑀺;

𑀪𑁄𑀕𑀕𑀸𑀫𑁂 𑀘 𑀤𑀸𑀧𑁂𑀲𑀺, 𑀪𑀺𑀓𑁆𑀔𑀽𑀦𑀁 𑀢𑀦𑁆𑀦𑀺𑀯𑀸𑀲𑀺𑀦𑀁.

𑁩𑁦. 𑀅𑀫𑁆𑀩𑀼𑀬𑁆𑀬𑀸𑀦𑀫𑁆𑀳𑀺 𑀆𑀯𑀸𑀲𑀁, 𑀓𑀢𑁆𑀯𑀸 𑀤𑀧𑁆𑀧𑀼𑀴𑀧𑀩𑁆𑀩𑀢𑀁;

𑀪𑀺𑀓𑁆𑀔𑀽𑀦𑀁 𑀢𑀺𑀲𑀢𑀲𑁆𑀲𑀸’𑀤𑀸, 𑀲𑀫𑁆𑀧𑀦𑁆𑀦𑀘𑀢𑀼𑀧𑀘𑁆𑀘𑀬𑀁.

𑁩𑁧. 𑀓𑀸𑀭𑁂𑀢𑁆𑀯𑀸 𑀦𑀻𑀮𑀕𑀮𑁆𑀮𑀜𑁆𑀘, 𑀆𑀭𑀸𑀫𑀁 𑀲𑁄 𑀫𑀦𑁄𑀭𑀫𑀁;

𑀤𑀓𑀯𑀸𑀭𑀁 𑀩𑀳𑀼𑀧𑁆𑀧𑀸𑀤𑀁, 𑀢𑀲𑁆𑀲 𑀤𑀸𑀧𑁂𑀲𑀺 𑀓𑀸𑀭𑀺𑀬.

𑁩𑁨. 𑀅𑀭𑀺𑀓𑀸𑀭𑀺 𑀯𑀺𑀳𑀸𑀭𑁂 𑀘, 𑀧𑀝𑀺𑀲𑀗𑁆𑀔𑀸𑀲𑀺 𑀚𑀺𑀡𑁆𑀡𑀓𑀁;

𑀲𑀮𑀸𑀓𑀕𑁆𑀕𑀜𑁆𑀘 𑀧𑀸𑀲𑀸𑀤𑀁, 𑀅𑀧𑀼𑀩𑁆𑀩𑀁𑀬𑁂𑀯 𑀓𑀸𑀭𑀬𑀺.

𑁩𑁩. 𑀯𑀸𑀳𑀤𑀻𑀧𑁂 𑀲𑀓𑀸𑀭𑁂𑀲𑀺, 𑀲𑁂𑀦𑀕𑁆𑀕𑀩𑁄𑀥𑀺𑀧𑀩𑁆𑀩𑀢𑀁;

𑀥𑀫𑁆𑀫𑀁 𑀢𑀻𑀲𑀼 𑀦𑀺𑀓𑀸𑀬𑁂𑀲𑀼, 𑀯𑀸𑀘𑀬𑀺𑀢𑁆𑀣 𑀩𑀳𑀼𑀲𑁆𑀲𑀼𑀢𑁂.

𑁩𑁪. 𑀕𑀡𑁆𑀳𑀸𑀧𑁂𑀲𑀺 𑀘 𑀪𑀺𑀓𑁆𑀔𑀽𑀦𑀁, 𑀅𑀬𑁄𑀧𑀢𑁆𑀢𑁂𑀲𑀼 𑀕𑀡𑁆𑀞𑀺𑀓𑁂;

𑀧𑀼𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀲𑁄, 𑀦 𑀓𑀺𑀜𑁆𑀘𑀺 𑀧𑀭𑀺𑀯𑀚𑁆𑀚𑀬𑀺.

𑁩𑁫. 𑀓𑀼𑀮𑀻𑀦𑀸𑀦𑀫𑀦𑀸𑀣𑀸𑀦𑀁, 𑀇𑀢𑁆𑀣𑀻𑀦𑀁’𑀤𑀸 𑀧𑀺𑀴𑀦𑁆𑀥𑀦𑀁;

𑀪𑁄𑀚𑀦𑀁 𑀪𑁄𑀚𑀦𑀢𑁆𑀣𑀻𑀦𑀁, 𑀩𑀳𑀼 𑀲𑁄 𑀤𑀸𑀲𑀺 𑀭𑀢𑁆𑀢𑀺𑀬𑀁.

𑁩𑁬. 𑀕𑀼𑀦𑁆𑀦𑀁 𑀲𑀲𑁆𑀲𑀸𑀦𑀺 𑀧𑀸𑀤𑀸𑀲𑀺, 𑀓𑀸𑀓𑀸𑀤𑀻𑀦𑀜𑁆𑀘 𑀪𑀢𑁆𑀢𑀓𑀁;

𑀢𑀡𑁆𑀟𑀼𑀮𑀜𑁆𑀘 𑀓𑀼𑀫𑀸𑀭𑀸𑀦𑀁, 𑀫𑀥𑀼𑀨𑀸𑀡𑀺𑀢𑀲𑀁𑀬𑀼𑀢𑁆𑀢𑀁.

𑁩𑁭. 𑀏𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸𑀦, 𑀦𑀭𑀺𑀦𑁆𑀤𑁄 𑀲𑁄 𑀲𑀧𑀸𑀭𑀺𑀲𑁄;

𑀪𑀼𑀢𑁆𑀯𑀸 𑀧𑀜𑁆𑀘𑀲𑀼 𑀯𑀲𑁆𑀲𑁂𑀲𑀼, 𑀫𑁂𑀤𑀺𑀦𑀺𑀁 𑀲𑀫𑁆𑀧𑀭𑀺𑀘𑁆𑀘𑀚𑀺.

𑁩𑁮. 𑀢𑀢𑁄 𑀢𑀲𑁆𑀲 𑀲𑀼𑀢𑁄 𑀆𑀲𑀺, 𑀲𑀻𑀳𑀴𑀸𑀦𑀁 𑀭𑀣𑁂𑀲𑀢𑁄;

𑀲𑀩𑁆𑀩𑀭𑀽𑀧𑀕𑀼𑀡𑁄𑀧𑁂𑀢𑁄, 𑀫𑀳𑀺𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄.

𑁩𑁯. 𑀲𑁄 𑀥𑀫𑁆𑀫𑀺𑀓𑀲𑀻𑀮𑀸𑀫𑁂𑀖𑁄, 𑀇𑀘𑁆𑀘𑀸𑀲𑀺 𑀥𑀭𑀡𑀻𑀢𑀮𑁂;

𑀥𑀫𑁆𑀫𑀤𑀻𑀧𑁄 𑀥𑀫𑁆𑀫𑀥𑀚𑁄, 𑀲𑀼𑀤𑁆𑀥𑀥𑀫𑁆𑀫𑀧𑀭𑀸𑀬𑀦𑁄.

𑁪𑁦. 𑀧𑀼𑀩𑁆𑀩𑀓𑁂𑀳𑀺 𑀦𑀭𑀺𑀦𑁆𑀤𑁂𑀳𑀺, 𑀓𑀢𑀁 𑀥𑀫𑁆𑀫𑀧𑀣𑀸𑀦𑀼𑀕𑀁;

𑀲𑀩𑁆𑀩𑀁 𑀓𑀸𑀲𑀺 𑀅𑀳𑀸𑀧𑁂𑀢𑁆𑀯𑀸, 𑀅𑀥𑀫𑁆𑀫𑀁 𑀢𑀼 𑀯𑀺𑀯𑀚𑁆𑀚𑀬𑀺.

𑁪𑁧. 𑀭𑀸𑀚𑀸𑀭𑀢𑀦𑀧𑀸𑀲𑀸𑀤𑁂, 𑀓𑀸𑀢𑀼𑀁 𑀲𑁄 𑀦𑀯𑀓𑀫𑁆𑀫𑀓𑀁;

𑀲𑀩𑁆𑀩𑀓𑀸𑀮𑁂𑀲𑀼 𑀤𑀸𑀧𑁂𑀲𑀺, 𑀕𑁂𑀝𑁆𑀞𑀼𑀫𑁆𑀩𑀤𑀓𑀯𑀸𑀭𑀓𑀁.

𑁪𑁨. 𑀚𑀺𑀡𑁆𑀡𑀜𑁆𑀘 𑀧𑀝𑀺𑀲𑀗𑁆𑀔𑀸𑀲𑀺, 𑀧𑀼𑀜𑁆𑀜𑀓𑀫𑁆𑀫𑀫𑀓𑀸𑀲𑀺 𑀘;

𑀭𑀚𑁆𑀚𑀁 𑀓𑀢𑁆𑀯𑀸𑀦 𑀘𑀢𑀽𑀲𑀼, 𑀯𑀲𑁆𑀲𑁂𑀲𑀼 𑀦𑀺𑀥𑀦𑀁 𑀕𑀢𑁄.

𑁪𑁩. 𑀅𑀕𑁆𑀕𑀩𑁄𑀥𑀺 𑀢𑀢𑁄 𑀭𑀸𑀚𑀸, 𑀙𑀢𑁆𑀢𑀁 𑀉𑀲𑁆𑀲𑀸𑀧𑀬𑀺 𑀧𑀼𑀭𑁂;

𑀓𑀸𑀭𑁂𑀦𑁆𑀢𑁄 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀳𑀺𑀢𑀁 𑀲𑀼𑀔𑀫𑀲𑁂𑀲𑀢𑁄.

𑁪𑁪. 𑀥𑀸𑀢𑀼𑀧𑀽𑀚𑀁 𑀲𑀓𑀸𑀭𑁂𑀲𑀺, 𑀲𑀢𑁆𑀣𑀼𑀲𑀩𑁆𑀩𑀕𑀼𑀡𑀸𑀭𑀳𑀁;

𑀧𑀺𑀢𑀸𑀫𑀳𑀓𑀢𑀲𑁆𑀲𑀸’𑀧𑀺, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀳𑀸𑀫𑀳𑀁.

𑁪𑁫. 𑀉𑀤𑀬𑀕𑁆𑀕𑀸𑀤𑀺𑀩𑁄𑀥𑀺𑀜𑁆𑀘, 𑀧𑀭𑀺𑀯𑁂𑀡𑀁 𑀲𑀓𑀸𑀭𑀬𑀺;

𑀦𑀸𑀫𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼𑀦𑁄, 𑀅𑀢𑁆𑀢𑀦𑁄 𑀘 𑀦𑀭𑀸𑀥𑀺𑀧𑁄.

𑁪𑁬. 𑀲𑀪𑁄𑀕𑀁 𑀧𑀭𑀺𑀯𑁂𑀡𑀜𑁆𑀘, 𑀓𑀢𑁆𑀯𑀸 𑀢𑀁 𑀪𑀽𑀢𑀦𑀸𑀫𑀓𑀁;

𑀲𑀓𑀸𑀘𑀭𑀺𑀬𑀓𑀲𑁆𑀲𑀸’𑀤𑀸, 𑀪𑀺𑀓𑁆𑀔𑀽𑀦𑀁 𑀢𑀺𑀲𑀢𑀲𑁆𑀲 𑀘.

𑁪𑁭. 𑀭𑀸𑀚𑀲𑀸𑀮𑀸𑀬 𑀤𑀸𑀧𑁂𑀲𑀺, 𑀘𑀽𑀴𑀯𑀸𑀧𑀺𑀬𑀕𑀸𑀫𑀓𑀁;

𑀕𑀸𑀫𑀤𑁆𑀯𑀬𑀜𑁆𑀘 𑀤𑀸𑀧𑁂𑀲𑀺, 𑀓𑀸𑀴𑀽𑀮𑀫𑀮𑁆𑀮𑀯𑀸𑀢𑀓𑁂.

𑁪𑁮. 𑀧𑀯𑁂𑀲𑀁 𑀯𑀺𑀦𑀺𑀯𑀸𑀭𑁂𑀲𑀺, 𑀉𑀧𑁄𑀲𑀣𑀤𑀺𑀦𑁂𑀲𑀼 𑀲𑁄;

𑀫𑀘𑁆𑀙𑀫𑀁𑀲𑀲𑀼𑀭𑀸𑀤𑀻𑀦𑀁, 𑀅𑀦𑁆𑀢𑁄𑀦𑀕𑀭𑀫𑀢𑁆𑀢𑀦𑁄.

𑁪𑁯. 𑀪𑀺𑀓𑁆𑀔𑀽 𑀯𑀸 𑀘𑁂𑀢𑀺𑀬𑁂 𑀯𑀸 𑀲𑁄, 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀁 𑀢𑀢𑁄;

𑀯𑀸𑀮𑀼𑀓𑀸 𑀳𑀸 𑀯𑀺𑀦𑀲𑁆𑀲𑀦𑁆𑀢𑀼, 𑀇𑀢𑀺 𑀧𑀸𑀤𑁂𑀲𑀼 𑀯𑁄𑀥𑀬𑀻.

𑁫𑁦. 𑀬𑀁 𑀬𑀁 𑀲𑁄𑀯𑀕𑁆𑀕𑀺𑀬𑀁 𑀓𑀫𑁆𑀫𑀁, 𑀓𑀫𑁆𑀫𑀁 𑀦𑀺𑀲𑁆𑀲𑀭𑀡𑀯𑀳𑀁;

𑀯𑀢𑁆𑀣𑀼𑀢𑁆𑀢𑀬𑁂 𑀧𑀲𑀦𑁆𑀦𑁄 𑀲𑁄, 𑀓𑀫𑁆𑀫𑀁 𑀢𑀁 𑀲𑀩𑁆𑀩𑀫𑀸𑀘𑀭𑀺.

𑁫𑁧. 𑀫𑀸𑀢𑀼𑀧𑀝𑁆𑀞𑀸𑀦𑀦𑀺𑀭𑀢𑁄, 𑀭𑀢𑁆𑀢𑀺𑀦𑁆𑀤𑀺𑀯𑀫𑀳𑁄𑀲𑀺𑀲𑁄;

𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀉𑀧𑀝𑁆𑀞𑀸𑀦𑀁, 𑀧𑀸𑀢𑁄𑀯 𑀓𑀺𑀭 𑀪𑀽𑀧𑀢𑀺.

𑁫𑁨. 𑀲𑀻𑀲𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸, 𑀉𑀩𑁆𑀩𑀝𑁆𑀝𑁂𑀢𑁆𑀯𑀸𑀦 𑀚𑀮𑁆𑀮𑀺𑀓𑀁;

𑀦𑀔𑁂 𑀯𑀺𑀲𑀼𑀤𑁆𑀥𑁂 𑀓𑀢𑁆𑀯𑀸𑀦, 𑀦𑀳𑀸𑀧𑁂𑀢𑁆𑀯𑀸𑀦 𑀲𑀸𑀤𑀭𑀁.

𑁫𑁩. 𑀅𑀘𑁆𑀙𑀸𑀤𑁂𑀢𑁆𑀯𑀸 𑀦𑀯𑀁 𑀯𑀢𑁆𑀣𑀁, 𑀲𑀼𑀔𑀲𑀫𑁆𑀨𑀲𑁆𑀲𑀫𑀢𑁆𑀢𑀦𑁄;

𑀯𑀢𑁆𑀣𑀁 𑀙𑀟𑁆𑀟𑀺𑀢𑀫𑀸𑀤𑀸𑀬, 𑀧𑁂𑀮𑁆𑀮𑁂𑀢𑁆𑀯𑀸 𑀲𑀬𑀫𑁂𑀯 𑀢𑀁.

𑁫𑁪. 𑀢𑀲𑁆𑀲 𑀢𑁄𑀬𑁂𑀦 𑀲𑀺𑀜𑁆𑀘𑀺𑀢𑁆𑀯𑀸, 𑀲𑀻𑀲𑀁 𑀲𑀫𑀓𑀼𑀝𑀁 𑀲𑀓𑀁;

𑀕𑀦𑁆𑀥𑀫𑀸𑀮𑀸𑀳𑀺 𑀢𑀁 𑀲𑀫𑁆𑀫𑀸, 𑀘𑁂𑀢𑀺𑀬𑀁 𑀯𑀺𑀳 𑀧𑀽𑀚𑀺𑀬.

𑁫𑁫. 𑀦𑀫𑀲𑁆𑀲𑀺𑀢𑁆𑀯𑀸𑀦 𑀢𑀺𑀓𑁆𑀔𑀢𑁆𑀢𑀼𑀁, 𑀓𑀢𑁆𑀯𑀸 𑀢𑀁 𑀲𑁄 𑀧𑀤𑀓𑁆𑀔𑀺𑀡𑀁;

𑀤𑀸𑀧𑁂𑀢𑁆𑀯𑀸 𑀧𑀭𑀺𑀲𑀸𑀬’𑀲𑁆𑀲𑀸, 𑀯𑀢𑁆𑀣𑀸𑀤𑀻𑀦𑀺 𑀬𑀣𑀸𑀭𑀼𑀘𑀺𑀁.

𑁫𑁬. 𑀲𑀳𑀢𑁆𑀣𑁂𑀦𑁂𑀯 𑀪𑁄𑀚𑁂𑀢𑁆𑀯𑀸, 𑀪𑁄𑀚𑀦𑀁 𑀢𑀁 𑀫𑀳𑀸𑀭𑀳𑀁;

𑀪𑀼𑀢𑁆𑀣𑀸𑀯𑀲𑁂𑀲𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀲𑀫𑀸𑀓𑀺𑀭𑀺𑀬𑀫𑀢𑁆𑀣𑀓𑁂.

𑁫𑁭. 𑀪𑁄𑀚𑁂𑀢𑁆𑀯𑀸 𑀧𑀭𑀺𑀲𑀁 𑀢𑀲𑁆𑀲𑀸, 𑀭𑀸𑀚𑀪𑁄𑀚𑀦𑀫𑀼𑀢𑁆𑀢𑀫𑀁;

𑀲𑀚𑁆𑀚𑁂𑀢𑁆𑀯𑀸 𑀯𑀸𑀲𑀕𑁂𑀳𑀜𑁆𑀘, 𑀲𑀼𑀕𑀦𑁆𑀥𑀧𑀭𑀺𑀯𑀸𑀲𑀺𑀢𑀁.

𑁫𑁮. 𑀲𑀳𑀢𑁆𑀣𑀸 𑀧𑀜𑁆𑀜𑀧𑁂𑀢𑁆𑀯𑀸𑀦, 𑀲𑀬𑀦𑀁 𑀢𑀢𑁆𑀣 𑀲𑀸𑀥𑀼𑀓𑀁;

𑀧𑀸𑀤𑁂 𑀥𑁄𑀯𑀺𑀬 𑀫𑀓𑁆𑀔𑁂𑀢𑁆𑀯𑀸, 𑀕𑀦𑁆𑀥𑀢𑁂𑀮𑁂𑀦 𑀲𑀡𑁆𑀳𑀓𑀁.

𑁫𑁯. 𑀲𑀫𑁆𑀩𑀸𑀳𑁂𑀦𑁆𑀢𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀓𑀢𑁆𑀯𑀸 𑀦𑀺𑀤𑁆𑀤𑀫𑀼𑀧𑁂𑀢𑀓𑀁;

𑀓𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀫𑀜𑁆𑀘𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀥𑀼𑀯𑀦𑁆𑀤𑀺𑀬.

𑁬𑁦. 𑀆𑀭𑀓𑁆𑀔𑀓𑁂 𑀦𑀺𑀬𑁄𑀚𑁂𑀢𑁆𑀯𑀸, 𑀤𑀸𑀲𑁂𑀓𑀫𑁆𑀫𑀓𑀭𑁂𑀧𑀺 𑀘;

𑀢𑀲𑁆𑀲𑀸 𑀧𑀺𑀝𑁆𑀞𑀺𑀫𑀓𑀢𑁆𑀯𑀸𑀦, 𑀅𑀧𑀓𑁆𑀓𑀫𑁂𑀯 𑀧𑀺𑀝𑁆𑀞𑀺𑀢𑁄.

𑁬𑁧. 𑀞𑀢𑁆𑀯𑀸 𑀅𑀤𑀲𑁆𑀲𑀦𑁂 𑀞𑀸𑀦𑁂, 𑀢𑀺𑀓𑁆𑀔𑀢𑁆𑀢𑀼𑀁 𑀧𑀼𑀦 𑀯𑀦𑁆𑀤𑀺𑀬;

𑀲𑀦𑁆𑀢𑀼𑀝𑁆𑀞𑁄 𑀢𑁂𑀦 𑀓𑀫𑁆𑀫𑁂𑀦, 𑀲𑀭𑀦𑁆𑀢𑁄 𑀢𑀁 𑀧𑀼𑀦𑀧𑁆𑀧𑀼𑀦𑀁.

𑁬𑁨. 𑀕𑁂𑀳𑀁 𑀬𑀸𑀢𑀺 𑀲𑀚𑀻𑀯𑀦𑁆𑀢𑀁, 𑀏𑀯𑀫𑁂𑀯 𑀉𑀧𑀝𑁆𑀞𑀳𑀺;

𑀏𑀓𑀤𑀸 𑀤𑀸𑀲𑀯𑀸𑀤𑁂𑀦, 𑀯𑀦𑁆𑀤𑀺𑀢𑁆𑀯𑀸 𑀤𑀸𑀲𑀫𑀢𑁆𑀢𑀦𑁄.

𑁬𑁩. 𑀢𑁂𑀦𑀢𑁆𑀢𑀦𑁄 𑀓𑀣𑀸𑀧𑁂𑀲𑀺, 𑀔𑀫𑀸𑀧𑁂𑀢𑀼𑀁 𑀲𑀬𑀁 𑀯𑀘𑁄;

𑀅𑀢𑁆𑀢𑀸𑀦𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀤𑀸𑀧𑀬𑀺𑀢𑁆𑀯𑀸𑀦 𑀫𑀸𑀢𑀭𑀸.

𑁬𑁪. 𑀥𑀦𑀫𑀢𑁆𑀣𑀕𑁆𑀖𑀦𑀁 𑀜𑀢𑁆𑀯𑀸, 𑀪𑀼𑀚𑀺𑀲𑁆𑀲𑁄 𑀆𑀲𑀺 𑀩𑀼𑀤𑁆𑀥𑀺𑀫𑀸;

𑀏𑀯𑀁 𑀧𑀼𑀜𑁆𑀜𑀧𑀭𑁄 𑀳𑀼𑀢𑁆𑀯𑀸, 𑀓𑀢𑁆𑀯𑀸 𑀤𑀻𑀧𑀲𑁆𑀲 𑀲𑀗𑁆𑀕𑀳𑀁.

𑁬𑁫. 𑀏𑀓𑀸𑀤𑀲𑀳𑀺 𑀯𑀲𑁆𑀲𑁂𑀳𑀺, 𑀤𑁂𑀯𑀮𑁄𑀓𑀫𑀼𑀧𑀸𑀕𑀫𑀺;

𑀢𑀲𑁆𑀲𑀸𑀦𑀼𑀚𑁄 𑀤𑀧𑁆𑀧𑀼𑀴𑁄’𑀣, 𑀭𑀸𑀚𑀸 𑀳𑁄𑀲𑀺 𑀢𑀤𑀘𑁆𑀘𑀬𑁂.

𑁬𑁬. 𑀲𑀩𑁆𑀩𑀁 𑀧𑀼𑀩𑁆𑀩𑀓𑀭𑀸𑀚𑀽𑀦𑀁, 𑀘𑀭𑀺𑀬𑀁 𑀲𑁄 𑀲𑀫𑀸𑀘𑀭𑀺;

𑀢𑀤𑀸 𑀫𑀳𑀺𑀦𑁆𑀤𑀦𑀸𑀫𑀲𑁆𑀲, 𑀧𑀼𑀢𑁆𑀢𑀸𑀭𑁄𑀳𑀡𑀲𑀸𑀫𑀺𑀦𑁄.

𑁬𑁭. 𑀧𑀺𑀢𑀭𑀸 𑀦𑀺𑀳𑀝𑀸’𑀕𑀜𑁆𑀙𑀼𑀁, 𑀭𑀸𑀚𑀸𑀦𑀁 𑀫𑀸𑀢𑀼𑀮𑀁 𑀲𑀓𑀁;

𑀲𑁄 𑀢𑁂 𑀤𑀺𑀲𑁆𑀯𑀸 𑀧𑀯𑀢𑁆𑀢𑀺𑀁 𑀢𑀁, 𑀲𑀼𑀢𑁆𑀯𑀸 𑀤𑀢𑁆𑀯𑀸 𑀫𑀳𑀸𑀩𑀮𑀁.

𑁬𑁮. 𑀧𑀸𑀳𑁂𑀲𑀺 𑀧𑀺𑀢𑀭𑀸 𑀬𑀼𑀤𑁆𑀥𑀁, 𑀓𑀸𑀢𑀼𑀁 𑀩𑀦𑁆𑀥𑀼 𑀳𑀺𑀢𑁂 𑀭𑀢𑁂;

𑀫𑀳𑀺𑀦𑁆𑀤𑁄𑀧𑀺 𑀢𑀣𑀸𑀪𑀸𑀯𑀁, 𑀯𑀺𑀤𑀺𑀢𑁆𑀯𑀸 𑀭𑁄𑀳𑀡𑀸𑀥𑀺𑀧𑁄.

𑁬𑁯. 𑀬𑀼𑀤𑁆𑀥𑀁 𑀧𑀝𑀺𑀧𑀤𑁂𑀬𑁂𑀯, 𑀢𑁂𑀲𑀁’𑀓𑀸𑀲𑀺 𑀫𑀳𑀸𑀩𑀮𑁄;

𑀢𑁂 𑀉𑀪𑁄𑀧𑀺 𑀧𑀮𑀸𑀬𑀺𑀁𑀲𑀼, 𑀤𑀢𑁆𑀯𑀸 𑀲𑁂𑀦𑀸𑀬 𑀦𑀸𑀬𑀓𑀁.

𑁭𑁦. 𑀧𑀼𑀦𑀸𑀕𑀦𑁆𑀢𑁆𑀯𑀸 𑀫𑀳𑀻𑀧𑀸𑀮𑀁, 𑀲𑁂𑀯𑀫𑀸𑀦𑀸 𑀇𑀥𑀸’𑀯𑀲𑀼𑀁;

𑀧𑀺𑀢𑀸𑀧𑀺 𑀢𑁂𑀦 𑀲𑀦𑁆𑀢𑀼𑀝𑁆𑀞𑁄, 𑀅𑀜𑁆𑀜𑁂𑀦 𑀲𑀓𑀩𑀦𑁆𑀥𑀼𑀦𑀸.

𑁭𑁧. 𑀬𑀼𑀚𑁆𑀛𑀦𑁆𑀢𑁄 𑀫𑀭𑀡𑀁 𑀕𑀜𑁆𑀙𑀺, 𑀜𑀸𑀢𑀺𑀲𑁄𑀧𑀺 𑀫𑀢𑁄 𑀓𑀺𑀭;

𑀢𑀤𑀸’𑀤𑀸 𑀪𑀸𑀕𑀺𑀦𑁂𑀬𑁆𑀬𑀲𑁆𑀲, 𑀭𑀸𑀚𑀸 𑀓𑀺𑀢𑁆𑀢𑀕𑁆𑀕𑀩𑁄𑀥𑀺𑀦𑁄.

𑁭𑁨. 𑀲𑀩𑁆𑀩𑀭𑀽𑀧𑀕𑀼𑀡𑁄𑀧𑁂𑀢𑀁, 𑀥𑀺𑀢𑀭𑀁 𑀤𑁂𑀯 𑀦𑀸𑀫𑀺𑀓𑀁;

𑀲𑁄 𑀤𑀧𑁆𑀧𑀼𑀴𑀁 𑀞𑀧𑁂𑀢𑁆𑀯𑀸𑀦, 𑀲𑁂𑀯𑀢𑁆𑀣𑀁 𑀢𑀲𑁆𑀲 𑀭𑀸𑀚𑀺𑀦𑁄.

𑁭𑁩. 𑀲𑀬𑀁 𑀲𑁂𑀦𑀗𑁆𑀕𑀫𑀸𑀤𑀸𑀬, 𑀭𑁄𑀳𑀡𑀁 𑀲𑀫𑀼𑀧𑀸𑀕𑀫𑀺;

𑀭𑁄𑀳𑀡𑀸𑀥𑀺𑀧𑀢𑀺 𑀳𑀼𑀢𑁆𑀯𑀸, 𑀲𑀩𑁆𑀩𑀸𑀓𑀸𑀭𑀲𑀫𑀧𑁆𑀧𑀺𑀢𑁄.

𑁭𑁪. 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑁂𑀦𑁆𑀢𑁄, 𑀯𑀸𑀲𑀁 𑀢𑀢𑁆𑀣𑁂𑀯 𑀓𑀧𑁆𑀧𑀬𑀺;

𑀭𑀸𑀚𑀸𑀓𑀸𑀲𑀺 𑀤𑀼𑀫𑀺𑀦𑁆𑀤𑀲𑁆𑀲, 𑀖𑀭𑀁 𑀚𑀺𑀡𑁆𑀡𑀁 𑀦𑀯𑀁 𑀣𑀺𑀭𑀁.