𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑁧. 𑀭𑀜𑁆𑀜𑁄 𑀢𑀲𑁆𑀲𑀘𑁆𑀘𑀬𑁂 𑀭𑀸𑀚𑀸, 𑀫𑀸𑀡𑀯𑀫𑁆𑀫𑁄 𑀅𑀳𑁄𑀲𑀺 𑀲𑁄;

𑀓𑀺𑀁 𑀕𑁄𑀢𑁆𑀢𑁄 𑀓𑀲𑁆𑀲 𑀧𑀼𑀢𑁆𑀢𑁄 𑀘, 𑀓𑀣𑀁 𑀭𑀚𑁆𑀚𑀫𑀧𑀸𑀧𑀼𑀡𑀺.

𑁨. 𑀫𑀳𑀸𑀲𑀫𑁆𑀫𑀢𑀯𑀁𑀲𑀫𑁆𑀳𑀺, 𑀚𑀸𑀢𑁄 𑀚𑀸𑀢𑀺𑀕𑀼𑀡𑀸𑀯𑀳𑁄;

𑀧𑀼𑀢𑁆𑀢𑁄 𑀓𑀲𑁆𑀲𑀧𑀦𑀸𑀫𑀲𑁆𑀲, 𑀣𑀽𑀧𑀸𑀭𑀸𑀫𑀲𑁆𑀲 𑀪𑁂𑀤𑀺𑀦𑁄.

𑁩. 𑀥𑀻𑀢𑀸 𑀫𑀮𑀬𑀭𑀸𑀚𑀲𑁆𑀲, 𑀲𑀗𑁆𑀖𑀦𑀸𑀫𑀲𑁆𑀲 𑀭𑀸𑀚𑀺𑀦𑁄;

𑀢𑀁 𑀮𑀪𑀺𑀢𑁆𑀯𑀸 𑀯𑀲𑀁 𑀤𑁂𑀲𑁂, 𑀉𑀢𑁆𑀢𑀭𑁂 𑀮𑀻𑀦𑀯𑀼𑀢𑁆𑀢𑀺𑀓𑁄.

𑁪. 𑀳𑀢𑁆𑀣𑀤𑀸𑀞𑀦𑀭𑀺𑀦𑁆𑀤𑁂𑀦, 𑀢𑀲𑁆𑀫𑀺𑀁 𑀅𑀢𑁆𑀣𑁂𑀯 𑀥𑀸𑀭𑀺𑀢𑁂;

𑀚𑀫𑁆𑀩𑀼𑀤𑀻𑀧𑀫𑀼𑀧𑀸𑀕𑀫𑁆𑀫, 𑀦𑀭𑀲𑀻𑀳𑀁 𑀫𑀳𑀻𑀧𑀢𑀺.

𑁫. 𑀕𑀦𑁆𑀢𑁆𑀯𑀸 𑀯𑀢𑁆𑀯𑀸 𑀲𑀓𑀁 𑀦𑀸𑀫𑀁, 𑀲𑁂𑀯𑀺𑀢𑀼𑀁 𑀢𑀫𑀼𑀧𑀓𑁆𑀓𑀫𑀺;

𑀆𑀭𑀸𑀥𑁂𑀲𑀺 𑀘 𑀲𑀩𑁆𑀩𑁂𑀳𑀺, 𑀧𑀬𑁄𑀕𑁂𑀳𑀺 𑀦𑀭𑀸𑀥𑀻𑀧𑀁.

𑁬. 𑀯𑀺𑀤𑀺𑀢𑁆𑀯𑀸 𑀢𑀲𑁆𑀲 𑀲𑁄𑀳𑀚𑁆𑀚𑀁, 𑀦𑁂𑀢𑁆𑀯𑀸 𑀪𑀭𑀺𑀬𑀫𑀢𑁆𑀢𑀦𑁄;

𑀯𑀸𑀲𑀁 𑀢𑀢𑁆𑀣𑁂𑀯 𑀓𑀧𑁆𑀧𑁂𑀲𑀺, 𑀲𑁂𑀯𑀫𑀸𑀦𑁄 𑀤𑀺𑀯𑀸𑀦𑀺𑀲𑀁.

𑁭. 𑀲𑁄𑀧𑀺 𑀆𑀭𑀸𑀥𑀺𑀢𑁄 𑀢𑁂𑀦, 𑀓𑀡𑁆𑀟𑀼𑀯𑁂𑀝𑁆𑀞𑀺 𑀦𑀭𑀼𑀢𑁆𑀢𑀫𑁄;

𑀲𑀩𑁆𑀩𑀁 𑀦𑁂𑀦𑁆𑀢𑁄𑀯 𑀢𑀁 𑀭𑀚𑁆𑀚𑀁, 𑀫𑀳𑀸𑀪𑁄𑀕𑀫𑀤𑀸𑀧𑀬𑀺.

𑁮. 𑀢𑁂𑀦 𑀲𑀁𑀯𑀸𑀲𑀫𑀦𑁆𑀯𑀸𑀬, 𑀪𑀭𑀺𑀬𑀸 𑀲𑀗𑁆𑀖𑀦𑀸𑀫𑀺𑀓𑀸;

𑀘𑀢𑀲𑁆𑀲𑁄 𑀥𑀻𑀢𑀭𑁄 𑀧𑀼𑀢𑁆𑀢𑁂, 𑀘𑀢𑁆𑀢𑀸𑀭𑁄𑀧𑀺 𑀯𑀺𑀚𑀸𑀬𑀣.

𑁯. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸, 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀁 𑀕𑀢𑁄;

𑀲𑀜𑁆𑀘𑀭𑀦𑁆𑀢𑁄 𑀬𑀣𑀸𑀓𑀸𑀫𑀁, 𑀫𑀸𑀡𑀯𑀫𑁆𑀫𑁂𑀦 𑀏𑀓𑀢𑁄.

𑁧𑁦. 𑀦𑀸𑀴𑀺𑀓𑁂𑀭𑀁 𑀧𑀺𑀯𑀺𑀢𑁆𑀯𑀸𑀦, 𑀢𑀢𑁆𑀭𑀝𑁆𑀞𑁄𑀯 𑀧𑀺𑀧𑀸𑀲𑀺𑀢𑁄;

𑀫𑀸𑀡𑀯𑀫𑁆𑀫𑀲𑁆𑀲 𑀧𑀸𑀤𑀸𑀲𑀺, 𑀫𑀜𑁆𑀜𑀦𑁆𑀢𑁄 𑀅𑀜𑁆𑀜𑀫𑁂𑀯 𑀢𑀁.

𑁧𑁧. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺, 𑀲𑀔𑀁 𑀧𑁂𑀲 𑀦𑀭𑀸𑀥𑀺𑀧𑁄;

𑀉𑀘𑁆𑀙𑀺𑀝𑁆𑀞𑀁 𑀦𑀸𑀫 𑀓𑀺𑀁 𑀳𑁄𑀢𑀺, 𑀲𑀢𑁆𑀢𑀸𑀦𑀁 𑀧𑀭𑀫𑀢𑁆𑀣𑀢𑁄.

𑁧𑁨. 𑀢𑀲𑁆𑀫𑀸 𑀬𑀼𑀢𑁆𑀢𑀁 𑀫𑀬𑀸𑀧𑀸𑀢𑀼-𑀫𑀻𑀢𑀺 𑀘𑀺𑀦𑁆𑀢𑀺𑀬 𑀢𑀁 𑀧𑀺𑀯𑀺;

𑀏𑀯𑀁 𑀳𑁄𑀦𑁆𑀢𑀺 𑀫𑀳𑀼𑀲𑁆𑀲𑀸𑀳𑀸, 𑀤𑁂𑀢𑀼𑀓𑀸𑀫𑀸𑀳𑀺 𑀩𑀼𑀤𑁆𑀥𑀺𑀦𑁄.

𑁧𑁩. 𑀭𑀸𑀚𑀸𑀧𑀺 𑀤𑀺𑀲𑁆𑀯𑀸 𑀢𑀁 𑀪𑀻𑀢𑁄, 𑀢𑀲𑁆𑀲𑀧𑀻 𑀢𑀸𑀯 𑀲𑁂𑀲𑀓𑀁;

𑀲𑀬𑀁 𑀧𑀺𑀯𑀺 𑀢𑀣𑀸𑀳𑁄𑀢𑀺, 𑀓𑀫𑁆𑀫𑀁 𑀧𑀼𑀜𑁆𑀜𑀯𑀢𑀁 𑀲𑀤𑀸.

𑁧𑁪. 𑀞𑀧𑁂𑀲𑀺 𑀲𑀓𑀯𑁂𑀲𑁂𑀯, 𑀢𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄;

𑀪𑁄𑀚𑀦𑁂 𑀲𑀬𑀦𑁂 𑀘𑁂𑀯, 𑀧𑀭𑀺𑀳𑀸𑀭𑁂 𑀘 𑀯𑀸𑀳𑀦𑁂.

𑁧𑁫. 𑀏𑀯𑀁 𑀢𑁂𑀲𑀼 𑀯𑀲𑀦𑁆𑀢𑁂𑀲𑀼, 𑀬𑀼𑀤𑁆𑀥𑀢𑁆𑀣𑀸𑀬𑀫𑀼𑀧𑀓𑁆𑀓𑀫𑀺;

𑀯𑀮𑁆𑀮𑀪𑁄 𑀦𑀭𑀲𑀻𑀳𑁂𑀦, 𑀦𑀭𑀲𑀻𑀳𑁄 𑀯𑀺𑀘𑀺𑀦𑁆𑀢𑀬𑀺.

𑁧𑁬. 𑀅𑀬𑀁 𑀔𑁄 𑀫𑀫 𑀲𑁂𑀯𑀸𑀬, 𑀭𑀚𑁆𑀚𑀁 𑀯𑀁𑀲 𑀕𑀢𑀁 𑀲𑀓𑀁;

𑀮𑀪𑀺𑀲𑁆𑀲𑀸𑀫𑀻𑀢𑀺 𑀲𑁂𑀯𑁂𑀢𑀺, 𑀭𑀢𑁆𑀢𑀺𑀁 𑀤𑀺𑀯 𑀫𑀢𑀦𑁆𑀤𑀺𑀢𑁄.

𑁧𑁭. 𑀲𑀘𑁂 𑀲𑁄𑀧𑀺 𑀫𑀬𑀸 𑀕𑀦𑁆𑀢𑁆𑀯𑀸, 𑀬𑀼𑀚𑁆𑀛𑀦𑁆𑀢𑁄 𑀫𑀭𑀡𑀁 𑀕𑀢𑁄;

𑀢𑀓𑁆𑀓𑀺𑀢𑀁 𑀢𑀲𑁆𑀲 𑀫𑀬𑁆𑀳𑀜𑁆𑀘, 𑀲𑀩𑁆𑀩𑀁 𑀢𑀫𑀨𑀮𑀁 𑀪𑀯𑁂.

𑁧𑁮. 𑀏𑀯𑀁 𑀘𑀺𑀦𑁆𑀢𑀺𑀬𑀢𑀁 𑀭𑀸𑀚𑀸, 𑀦𑀺𑀯𑀢𑁆𑀢𑁂𑀢𑁆𑀯𑀸 𑀲𑀓𑁂 𑀧𑀼𑀭𑁂;

𑀲𑀬𑀁 𑀯𑀮𑁆𑀮𑀪𑀭𑀸𑀚𑁂𑀦, 𑀓𑀸𑀢𑀼𑀁 𑀲𑀗𑁆𑀕𑀸𑀫𑀫𑀸𑀭𑀲𑀺.

𑁧𑁯. 𑀫𑀸𑀡𑀯𑀫𑁆𑀫𑁄𑀧𑀺 𑀘𑀺𑀦𑁆𑀢𑁂𑀲𑀺, 𑀲𑀘𑁂’𑀬𑀁 𑀫𑀬𑀺 𑀚𑀻𑀯𑀺𑀢𑀺;

𑀭𑀸𑀚𑀸 𑀫𑀻𑀬𑀢𑀺 𑀬𑀼𑀤𑁆𑀥𑀫𑁆𑀳𑀺, 𑀓𑀺𑀁 𑀨𑀮𑀁 𑀫𑀫 𑀚𑀻𑀯𑀺𑀢𑁂.

𑁨𑁦. 𑀯𑀺𑀲𑁆𑀲𑀸𑀲𑁄 𑀤𑀼𑀓𑁆𑀓𑀢𑁄 𑀢𑁂𑀦, 𑀪𑀯𑀺𑀲𑁆𑀲𑀢𑀺 𑀢𑀣𑀸𑀲𑀢𑀺;

𑀲𑀗𑁆𑀕𑀳𑁂𑀲𑀺 𑀓𑀺𑀫𑀢𑁆𑀣𑀁 𑀫𑀁, 𑀲𑀫𑀸𑀦𑀢𑁆𑀢𑁂𑀦 𑀅𑀢𑁆𑀢𑀦𑁄.

𑁨𑁧. 𑀢𑀲𑁆𑀫𑀸 𑀬𑀼𑀢𑁆𑀢𑀁 𑀫𑀬𑀸 𑀕𑀦𑁆𑀢𑀼𑀁, 𑀲𑀳𑀲𑀗𑁆𑀕𑀸𑀫 𑀫𑀡𑁆𑀟𑀮𑀁;

𑀲𑀼𑀔𑀜𑁆𑀳𑀺 𑀲𑀤𑁆𑀥𑀺𑀁 𑀢𑁂𑀦𑁂𑀢𑁆𑀣, 𑀚𑀻𑀯𑀺𑀢𑀁 𑀫𑀭𑀡𑀁𑀧𑀺 𑀯𑀸.

𑁨𑁨. 𑀏𑀯𑀁 𑀘𑀺𑀦𑁆𑀢𑀺𑀬 𑀲𑀦𑁆𑀦𑀤𑁆𑀥-𑀩𑀮𑁄 𑀳𑀢𑁆𑀣𑀺𑀯𑀭𑀁 𑀕𑀢𑁄;

𑀕𑀦𑁆𑀢𑁆𑀯𑀸 𑀤𑀲𑁆𑀲𑁂𑀲𑀺 𑀅𑀢𑁆𑀢𑀸𑀦𑀁, 𑀲𑁄 𑀢𑀁 𑀲𑀗𑁆𑀕𑀸𑀫 𑀫𑀡𑁆𑀟𑀮𑁂.

𑁨𑁩. 𑀦𑀭𑀲𑀻𑀳𑁄𑀯 𑀢𑀁 𑀤𑀺𑀲𑁆𑀯𑀸, 𑀳𑀝𑁆𑀞𑀢𑀼𑀝𑁆𑀞𑁄 𑀲𑀫𑀼𑀕𑁆𑀕𑀺𑀭𑀺;

𑀲𑀳𑁄 𑀲𑀦𑁆𑀣𑀯𑀫𑁂𑀢𑀲𑁆𑀫𑀺𑀁, 𑀓𑀢𑁆𑀢𑀩𑁆𑀩𑀁 𑀫𑁂 𑀓𑀢𑀁 𑀇𑀢𑀺.

𑁨𑁪. 𑀢𑀢𑁄 𑀫𑀸𑀦𑀲𑁆𑀲 𑀲𑁂𑀦𑀸 𑀘, 𑀲𑁂𑀦𑀸 𑀘𑁂𑀯𑀲𑁆𑀲𑀭𑀸𑀚𑀺𑀦𑁄;

𑀲𑁂𑀦𑀁 𑀯𑀮𑁆𑀮𑀪𑀭𑀸𑀚𑀲𑁆𑀲, 𑀯𑀺𑀤𑁆𑀥𑀁𑀲𑁂𑀲𑀺 𑀲𑀫𑀸𑀕𑀢𑀸.

𑁨𑁫. 𑀫𑀸𑀡𑀯𑀫𑁆𑀫𑁄𑀧𑀺 𑀤𑀲𑁆𑀲𑁂𑀲𑀺, 𑀢𑀳𑀺𑀁 𑀲𑀼𑀭𑀢𑁆𑀢𑀫𑀢𑁆𑀢𑀦𑁄;

𑀧𑀭𑀓𑁆𑀓𑀫𑀦𑁆𑀢𑁄 𑀤𑁂𑀯𑀸𑀦𑀁, 𑀭𑀡𑁂 𑀦𑀸𑀭𑀸𑀬𑀡𑁄 𑀯𑀺𑀬.

𑁨𑁬. 𑀦𑀭𑀲𑀻𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄, 𑀫𑀸𑀡𑀯𑀫𑁆𑀫𑀲𑁆𑀲 𑀯𑀺𑀓𑁆𑀓𑀫𑁂;

𑀆𑀮𑀺𑀗𑁆𑀕𑀢𑁆𑀯𑀸 𑀲𑀺𑀦𑁂𑀳𑁂𑀦, 𑀢𑁆𑀯𑀁 𑀔𑁄 𑀫𑁂 𑀚𑀬𑀤𑁄 𑀇𑀢𑀺.

𑁨𑁭. 𑀅𑀢𑁆𑀢𑀦𑁄 𑀧𑀼𑀭𑀫𑀸𑀕𑀫𑁆𑀫, 𑀓𑀢𑁆𑀯𑀸 𑀯𑀺𑀚𑀬𑀫𑀗𑁆𑀕𑀮𑀁;

𑀫𑀸𑀡𑀯𑀫𑁆𑀫𑀲𑁆𑀲 𑀲𑁂𑀦𑀸𑀬, 𑀓𑀢𑁆𑀢𑀩𑁆𑀩𑀁 𑀲𑀩𑁆𑀩𑀫𑀸𑀘𑀭𑀺.

𑁨𑁮. 𑀅𑀣𑁂𑀯𑀁 𑀘𑀺𑀦𑁆𑀢𑀬𑀺 𑀭𑀸𑀚𑀸, 𑀓𑀢𑁆𑀢𑀩𑁆𑀩𑀁 𑀫𑁂 𑀲𑀳𑀸𑀬𑀓𑁄;

𑀅𑀢𑁆𑀢𑀦𑀸’𑀓𑀸𑀲𑀺 𑀲𑀩𑁆𑀩𑀜𑁆𑀘, 𑀅𑀦𑀡𑁄 𑀲𑁄 𑀫𑀫𑀚𑁆𑀚𑀢𑁄.

𑁨𑁯. 𑀇𑀡𑀁 𑀫𑀫𑀸𑀧𑀺 𑀲𑁄𑀥𑁂𑀫𑀺, 𑀓𑀢𑁆𑀯𑀸 𑀓𑀢𑁆𑀢𑀩𑁆𑀩𑀫𑀢𑁆𑀢𑀦𑀸;

𑀓𑀢𑁆𑀢𑀜𑁆𑀜𑀽 𑀓𑀢𑀯𑁂𑀤𑀻𑀳𑀺, 𑀧𑀼𑀭𑀺𑀲𑀸’𑀢𑀻𑀯𑀤𑀼𑀮𑁆𑀮𑀪𑀸.

𑁩𑁦. 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺;

𑀲𑀳𑀸𑀬𑀲𑁆𑀲 𑀫𑀫𑁂𑀢𑀲𑁆𑀲, 𑀓𑀫𑁆𑀫𑁂 𑀢𑀼𑀫𑁆𑀳𑁂𑀧𑀺 𑀲𑀓𑁆𑀔𑀺𑀦𑁄.

𑁩𑁧. 𑀫𑀬𑀸𑀧𑀺 𑀢𑀲𑁆𑀲 𑀓𑀢𑁆𑀢𑀩𑁆𑀩𑀁, 𑀓𑀫𑁆𑀫𑀁 𑀲𑀸𑀥𑀼 𑀲𑀼𑀔𑀸𑀯𑀳𑀁;

𑀉𑀧𑀓𑀸𑀭𑁄 𑀳𑀺 𑀲𑀸𑀥𑀽𑀦𑀁, 𑀥𑀫𑁆𑀫𑁄 𑀧𑀼𑀩𑁆𑀩𑁄𑀧𑀓𑀸𑀭𑀺𑀦𑁄.

𑁩𑁨. 𑀏𑀯𑀁 𑀯𑀼𑀢𑁆𑀢𑁂 𑀅𑀫𑀘𑁆𑀘𑀸 𑀢𑁂, 𑀧𑀘𑁆𑀘𑀸𑀳𑀁𑀲𑀼 𑀫𑀳𑀻𑀧𑀢𑀺;

𑀬𑀁 𑀬𑀫𑀺𑀘𑁆𑀙𑀢𑀺 𑀤𑁂𑀯𑁄𑀳𑀺, 𑀢𑀁 𑀢𑀁 𑀭𑀼𑀘𑁆𑀘𑀢𑀺 𑀦𑁄 𑀇𑀢𑀺.

𑁩𑁩. 𑀅𑀣 𑀲𑁄 𑀫𑀸𑀡𑀯𑀫𑁆𑀫𑀲𑁆𑀲, 𑀲𑁂𑀦𑀁 𑀤𑀢𑁆𑀯𑀸 𑀲𑀯𑀸𑀳𑀦𑀁;

𑀲𑀩𑁆𑀩𑁄𑀧𑀓𑀭𑀡𑀜𑁆𑀘𑁂𑀯, 𑀲𑀩𑁆𑀩𑀓𑀫𑁆𑀫𑀓𑀭𑁂𑀧𑀺 𑀘.

𑁩𑁪. 𑀕𑀘𑁆𑀙𑀸𑀢𑀺 𑀯𑀢𑁆𑀯𑀸 𑀢𑀁 𑀬𑀦𑁆𑀢𑀁, 𑀲𑀳𑀲𑁂𑀦𑀸𑀬𑀧𑁂𑀓𑁆𑀔𑀺𑀬;

𑀧𑀭𑀺𑀤𑁂𑀯𑀺𑀢𑁆𑀣 𑀪𑀽𑀫𑀺𑀦𑁆𑀤𑁄, 𑀯𑀺𑀧𑁆𑀧𑀯𑀼𑀢𑁆𑀣𑀁’𑀯 𑀧𑀼𑀢𑁆𑀢𑀓𑀁.

𑁩𑁫. 𑀫𑀸𑀡𑀯𑀫𑁆𑀫𑁄𑀧𑀺 𑀆𑀭𑀼𑀬𑁆𑀳, 𑀦𑀸𑀯𑀸𑀬𑁄 𑀚𑀮𑀥𑀻𑀢𑀝𑁂;

𑀦 𑀘𑀺𑀭𑁂𑀦𑁂𑀯 𑀆𑀕𑀫𑁆𑀫, 𑀲𑀫𑀢𑁆𑀢𑀺𑀓𑁆𑀓𑀫𑁆𑀫 𑀯𑁂𑀕𑀲𑀸.

𑁩𑁬. 𑀲𑀳 𑀲𑁂𑀦𑀸𑀬 𑀫𑀤𑁆𑀤𑀦𑁆𑀣𑁄, 𑀮𑀗𑁆𑀓𑀸𑀤𑀻𑀧𑀫𑀼𑀧𑀯𑀺𑀲𑀻;

𑀢𑀁 𑀲𑀼𑀢𑁆𑀯𑀸𑀦 𑀧𑀮𑀸𑀬𑀺𑀢𑁆𑀣, 𑀭𑀸𑀚𑀸 𑀤𑀸𑀞𑁄𑀧𑀢𑀺𑀲𑁆𑀲𑀓𑁄.

𑁩𑁭. 𑀫𑀸𑀡𑀯𑀫𑁆𑀫𑁄 𑀧𑀼𑀭𑀁 𑀕𑀦𑁆𑀢𑁆𑀯𑀸, 𑀅𑀳𑀼𑀢𑁆𑀯𑀸𑀯 𑀦𑀭𑀸𑀥𑀺𑀧𑁄;

𑀧𑀮𑀸𑀢𑀫𑀦𑀼𑀩𑀦𑁆𑀥𑀺𑀢𑁆𑀣, 𑀧𑀤𑀸𑀦𑀼𑀧𑀤𑀫𑀼𑀕𑀢𑁄.

𑁩𑁮. 𑀢𑀤𑀸 𑀲𑀸 𑀤𑀫𑀺𑀴𑀺 𑀲𑁂𑀦𑀸, 𑀅𑀲𑁆𑀲𑁄𑀲𑀺 𑀓𑀺𑀭 𑀲𑀸𑀫𑀺𑀓𑁄;

𑀫𑀳𑀸𑀭𑁄𑀕𑀸’𑀪𑀺𑀪𑀽𑀢𑁄𑀢𑀺, 𑀲𑀼𑀢𑁆𑀯𑀸 𑀢𑀁 𑀲𑀸 𑀅𑀧𑀓𑁆𑀓𑀫𑀺.

𑁩𑁯. 𑀲𑀼𑀢𑁆𑀯𑀸 𑀤𑀸𑀞𑁄𑀧𑀢𑀺𑀲𑁆𑀲𑁄 𑀢𑀁, 𑀲𑀫𑀸𑀤𑀸𑀬 𑀫𑀳𑀸𑀩𑀮𑀁;

𑀫𑀸𑀡𑀯𑀫𑁆𑀫𑀁 𑀉𑀧𑀸𑀕𑀫𑁆𑀫, 𑀓𑀸𑀢𑀼𑀫𑀸𑀭𑀪𑀺 𑀲𑀁𑀬𑀼𑀥𑀁.

𑁪𑁦. 𑀫𑀸𑀡𑀯𑀫𑁆𑀫𑁄 𑀘 𑀘𑀺𑀦𑁆𑀢𑁂𑀲𑀺, 𑀲𑀩𑁆𑀩𑀸 𑀲𑁂𑀦𑀸 𑀕𑀢𑀸 𑀫𑀫;

𑀫𑀢𑁂 𑀫𑀬𑀺 𑀲𑀫𑀺𑀚𑁆𑀛𑁂𑀬𑁆𑀬, 𑀯𑁂𑀭𑀺𑀦𑁄 𑀫𑁂 𑀫𑀦𑁄𑀭𑀣𑀁.

𑁪𑁧. 𑀚𑀫𑁆𑀩𑀼𑀤𑀻𑀧𑀁𑀯 𑀢𑀲𑁆𑀫𑀸’𑀳𑀁, 𑀕𑀦𑁆𑀢𑁆𑀯𑀸’𑀤𑀸𑀲 𑀩𑀮𑀁 𑀢𑀢𑁄;

𑀧𑀼𑀦 𑀭𑀚𑁆𑀚𑀁 𑀕𑀳𑁂𑀲𑁆𑀲𑀁𑀢𑀺, 𑀢𑀲𑁆𑀫𑀸 𑀏𑀯𑀫𑀓𑀸𑀲𑀺 𑀲𑁄.

𑁪𑁨. 𑀕𑀦𑁆𑀢𑁆𑀯𑀸 𑀧𑀼𑀦’𑀧𑀺 𑀤𑀺𑀲𑁆𑀯𑀸𑀦, 𑀲𑀳𑀸𑀬𑀁 𑀦𑀭𑀲𑀻𑀳𑀓𑀁;

𑀆𑀭𑀸𑀥𑀳𑀦𑁆𑀢𑁄 𑀦𑀺𑀧𑀼𑀡𑀁, 𑀲𑀓𑁆𑀓𑀘𑁆𑀘𑀁 𑀢𑀫𑀼𑀧𑀝𑁆𑀞𑀳𑀺.

𑁪𑁩. 𑀬𑀸𑀯 𑀭𑀸𑀚𑀘𑀢𑀼𑀓𑁆𑀓𑀁𑀲𑁄, 𑀫𑀸𑀡𑀸𑀫𑁆𑀫𑁄 𑀢𑀳𑀺𑀁 𑀯𑀲𑀺;

𑀦𑀭𑀲𑀻𑀳𑁄’𑀣 𑀘𑀺𑀦𑁆𑀢𑁂𑀲𑀺, 𑀫𑀸𑀦𑀢𑁆𑀣𑀤𑁆𑀥𑁄 𑀬𑀲𑁄𑀥𑀦𑁄.

𑁪𑁪. 𑀭𑀚𑁆𑀚𑀢𑁆𑀣𑀁 𑀫𑁂 𑀲𑀳𑀸 𑀬𑁄 𑀫𑀁, 𑀲𑁂𑀯𑀦𑁆𑀢𑁄𑀬𑁂𑀯 𑀅𑀤𑁆𑀥𑀕𑁄;

𑀯𑀼𑀤𑁆𑀥𑁄 𑀳𑁂𑀲𑁆𑀲𑀢𑀺 𑀢𑀁 𑀧𑀲𑁆𑀲𑀁, 𑀓𑀣𑀁 𑀭𑀚𑁆𑀚𑀁 𑀓𑀭𑁄𑀫𑀳𑀁.

𑁪𑁫. 𑀇𑀫𑀲𑁆𑀫𑀺𑀁 𑀧𑀦 𑀯𑀸𑀭𑀲𑁆𑀫𑀺𑀁, 𑀧𑁂𑀲𑀬𑀺𑀢𑁆𑀯𑀸 𑀩𑀮𑀁 𑀫𑀫;

𑀭𑀚𑁆𑀚𑀁 𑀢𑀁 𑀦 𑀕𑀳𑁂𑀲𑁆𑀲𑀸𑀫𑀺, 𑀓𑁄 𑀅𑀢𑁆𑀣𑁄 𑀚𑀻𑀯𑀺𑀢𑁂𑀦 𑀫𑁂.

𑁪𑁬. 𑀏𑀯𑀁 𑀘𑀺𑀦𑁆𑀢𑀺𑀬 𑀲𑁄 𑀲𑁂𑀦𑀁, 𑀲𑀦𑁆𑀦𑀺𑀧𑀸𑀢𑀺𑀬 𑀅𑀢𑁆𑀢𑀦𑁄;

𑀲𑀦𑁆𑀦𑀸𑀳𑁂𑀢𑁆𑀯𑀸 𑀬𑀣𑀸 𑀬𑁄𑀕𑀁, 𑀤𑀸𑀧𑁂𑀢𑁆𑀯𑀸𑀦 𑀬𑀣𑀸𑀭𑀼𑀘𑀺𑀁.

𑁪𑁭. 𑀲𑀬𑀫𑁂𑀯 𑀢𑀫𑀸𑀤𑀸𑀬, 𑀲𑀫𑀼𑀤𑁆𑀤𑀢𑀝𑀫𑀸𑀕𑀢𑁄;

𑀦𑀸𑀯𑀸𑀬𑁄 𑀘𑀺𑀢𑁆𑀢𑀭𑀽𑀧𑀸𑀬𑁄, 𑀓𑀸𑀭𑀬𑀺𑀢𑁆𑀯𑀸 𑀣𑀺𑀭𑀸 𑀩𑀳𑀽.

𑁪𑁮. 𑀅𑀫𑀘𑁆𑀘𑁂 𑀆𑀳 ‘‘𑀏𑀢𑁂𑀦, 𑀲𑀤𑁆𑀥𑀺𑀁 𑀕𑀘𑁆𑀙𑀣 𑀪𑁄’’𑀇𑀢𑀺;

𑀦𑀸𑀯𑀁 𑀆𑀭𑁄𑀳𑀺𑀢𑀼𑀁 𑀲𑀩𑁆𑀩𑁂, 𑀦 𑀇𑀘𑁆𑀙𑀺𑀁𑀲𑀼 𑀢𑀤𑀸 𑀚𑀦𑀸.

𑁪𑁯. 𑀢𑀤𑀸 𑀲𑀻𑀳𑁄 𑀯𑀺𑀘𑀺𑀦𑁆𑀢𑁂𑀢𑁆𑀯𑀸, 𑀲𑀬𑀁 𑀳𑀼𑀢𑁆𑀯𑀸 𑀢𑀺𑀭𑁄𑀳𑀺𑀢𑁄;

𑀅𑀢𑁆𑀢𑀦𑁄 𑀧𑀭𑀺𑀳𑀸𑀭𑀁 𑀲𑁄, 𑀭𑀸𑀚𑀮𑀓𑁆𑀔𑀡𑀲𑀫𑁆𑀫𑀢𑀁.

𑁫𑁦. 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸𑀦, 𑀅𑀮𑀗𑁆𑀓𑀸𑀭𑀫𑁆𑀧𑀺 𑀅𑀢𑁆𑀢𑀦𑁄;

𑀆𑀭𑁄𑀧𑁂𑀢𑁆𑀯𑀸𑀦 𑀢𑀁 𑀦𑀸𑀯𑀁, 𑀕𑀘𑁆𑀙 𑀞𑀢𑁆𑀯𑀸𑀦 𑀲𑀸𑀕𑀭𑁂.

𑁫𑁧. 𑀇𑀫𑀁 𑀪𑁂𑀭𑀺𑀁𑀘 𑀯𑀸𑀤𑁂𑀳𑀺, 𑀓𑁄𑀝𑁆𑀞𑀦𑀸𑀫𑀦𑁆𑀢𑀺 𑀬𑁄𑀚𑀬𑀻;

𑀲𑁄’𑀧𑀺 𑀲𑀩𑁆𑀩𑀁 𑀢𑀣𑀸𑀓𑀸𑀲𑀺, 𑀭𑀸𑀚𑀸𑀦𑁄 𑀅𑀕𑀫𑀸 𑀇𑀢𑀺.

𑁫𑁨. 𑀆𑀭𑀼𑀳𑀺𑀁𑀲𑀼 𑀚𑀦𑀸 𑀦𑀸𑀯𑀁, 𑀏𑀓𑀁 𑀓𑀢𑁆𑀯𑀸 𑀦𑀭𑀸𑀥𑀺𑀧𑀁;

𑀲𑁄 𑀢𑀁 𑀲𑁂𑀦𑀗𑁆𑀕𑀫𑀸𑀤𑀸𑀬, 𑀫𑀸𑀡𑁄 𑀕𑀦𑁆𑀢𑀼𑀁 𑀲𑀫𑀸𑀭𑀪𑀺.

𑁫𑁩. 𑀓𑁂𑀯𑀮𑁄’𑀧𑀺 𑀲𑀫𑀼𑀤𑁆𑀤𑁄 𑀲𑁄, 𑀅𑀳𑁄𑀪𑀺 𑀦𑀕𑀭𑀽𑀧𑀫𑁄;

𑀅𑀣 𑀲𑁄 𑀧𑀝𑁆𑀝𑀦𑀁 𑀧𑀢𑁆𑀯𑀸, 𑀑𑀢𑀭𑀺𑀢𑁆𑀯𑀸 𑀲𑀯𑀸𑀳𑀦𑁄.

𑁫𑁪. 𑀯𑀺𑀲𑁆𑀲𑀸𑀫𑁂𑀢𑁆𑀯𑀸 𑀩𑀮𑀁 𑀢𑀢𑁆𑀣, 𑀯𑀲𑀁 𑀓𑀢𑀺𑀧𑀬𑁂 𑀤𑀺𑀦𑁂;

𑀉𑀢𑁆𑀢𑀭𑀁 𑀤𑁂𑀲𑀫𑀸𑀤𑀸𑀬, 𑀓𑀢𑁆𑀯𑀸 𑀳𑀢𑁆𑀣𑀕𑀢𑀁 𑀚𑀦𑀁.

𑁫𑁫. 𑀅𑀓𑁆𑀔𑁄𑀩𑁆𑀪𑀺𑀬 𑀫𑀳𑀸𑀲𑁂𑀦𑁄, 𑀦𑀕𑀭𑀁 𑀕𑀦𑁆𑀢𑀼𑀫𑀸𑀭𑀪𑀺;

𑀧𑁄𑀢𑁆𑀣𑀓𑀼𑀝𑁆𑀞𑁄𑀧𑀺 𑀢𑀁 𑀲𑀼𑀢𑁆𑀯𑀸, 𑀧𑀘𑁆𑀘𑀼𑀕𑁆𑀕𑀜𑁆𑀙𑀺 𑀫𑀳𑀸𑀩𑀮𑁄.

𑁫𑁬. 𑀲𑀁𑀕𑀘𑁆𑀙𑀺𑀁𑀲𑀼 𑀉𑀪𑁄 𑀲𑁂𑀦𑀸, 𑀪𑀺𑀦𑁆𑀦𑀯𑁂𑀮𑀸’𑀯 𑀲𑀸𑀕𑀭𑀸;

𑀫𑀸𑀡𑀯𑀫𑁆𑀫𑁄 𑀢𑀢𑁄 𑀳𑀢𑁆𑀣𑀺-𑀫𑀸𑀭𑀼𑀬𑁆𑀳 𑀕𑀳𑀺𑀢𑀸𑀬𑀼𑀥𑁄.

𑁫𑁭. 𑀧𑁄𑀢𑁆𑀣𑀓𑀼𑀝𑁆𑀞𑀜𑁆𑀘 𑀭𑀸𑀚𑀸𑀦𑀁, 𑀤𑁆𑀯𑁂𑀥𑀸 𑀓𑀢𑁆𑀯𑀸 𑀧𑀮𑀸𑀧𑀬𑀺;

𑀳𑀢𑁆𑀣𑀤𑀸𑀞𑀁 𑀧𑀮𑀸𑀬𑀦𑁆𑀢𑀁, 𑀤𑀺𑀲𑁆𑀯𑀸 𑀚𑀦𑀧𑀤𑀸 𑀦𑀭𑀸.

𑁫𑁮. 𑀲𑀻𑀲𑀫𑀲𑁆𑀲 𑀕𑀳𑁂𑀢𑁆𑀯𑀸𑀦, 𑀫𑀸𑀡𑀯𑀫𑁆𑀫𑀲𑁆𑀲 𑀤𑀲𑁆𑀲𑀬𑀼𑀁;

𑀧𑁄𑀢𑁆𑀣𑀓𑀼𑀝𑁆𑀞𑁄𑀧𑀮𑀸𑀬𑀺𑀢𑁆𑀯𑀸, 𑀫𑁂𑀭𑀼𑀓𑀦𑁆𑀤𑀭𑀫𑀸𑀕𑀫𑀺.

𑁫𑁯. 𑀢𑀢𑁄 𑀢𑀁 𑀲𑀸𑀫𑀺𑀓𑁄 𑀤𑀺𑀲𑁆𑀯𑀸, 𑀲𑀳𑀸𑀬𑁄 𑀫𑁂 𑀅𑀬𑀁𑀘𑀺𑀭𑀁;

𑀢𑀲𑁆𑀫𑀸 𑀦 𑀲𑀓𑁆𑀓𑀸 𑀘𑀟𑁆𑀟𑁂𑀢𑀼𑀁, 𑀆𑀧𑀤𑁂 𑀲𑀭𑀡𑀸𑀕𑀢𑀁.

𑁬𑁦. 𑀲𑀸𑀫𑀺𑀦𑁄 𑀘 𑀲𑀳𑀸𑀬𑀲𑁆𑀲, 𑀦𑀺𑀤𑁆𑀤𑁄𑀲𑁄𑀳𑀁 𑀓𑀣𑀁 𑀪𑀯𑁂;

𑀇𑀢𑀺 𑀘𑀺𑀦𑁆𑀢𑀺𑀬 𑀧𑀽𑀯𑀁 𑀲𑁄, 𑀲𑀯𑀺𑀲𑀁 𑀔𑀸𑀤𑀺𑀬𑀸’𑀫𑀭𑀺.

𑁬𑁧. 𑀓𑀼𑀝𑁆𑀞𑀓𑁄𑀧𑀺 𑀘 𑀢𑁂𑀦𑁂𑀯, 𑀔𑀸𑀤𑀺𑀢𑁆𑀯𑀸 𑀧𑀽𑀯𑀓𑀁 𑀫𑀢𑁄;

𑀫𑀸𑀡𑀯𑀫𑁆𑀫𑀲𑁆𑀲 𑀢𑀲𑁆𑀲𑁂𑀯𑀁, 𑀤𑀻𑀧𑁄 𑀆𑀲𑀺 𑀅𑀓𑀡𑁆𑀝𑀓𑁄.

𑁬𑁨. 𑀫𑀸𑀡𑀯𑀫𑁆𑀫𑁄 𑀢𑀢𑁄 𑀤𑀻𑀧𑁂, 𑀙𑀢𑁆𑀢𑀁 𑀉𑀲𑁆𑀲𑀸𑀧𑀬𑀺 𑀢𑀤𑀸;

𑀯𑀸𑀭𑁂𑀦𑁆𑀢𑁄 𑀯𑀺𑀬 𑀢𑁂𑀦𑁂𑀯, 𑀤𑀼𑀓𑁆𑀔𑀁 𑀤𑀻𑀧𑁂 𑀚𑀦𑀲𑁆𑀲 𑀲𑁄.

𑁬𑁩. 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀲𑁄’𑀓𑀸𑀲𑀺, 𑀅𑀦𑀕𑁆𑀖𑀸𑀦𑀺 𑀩𑀳𑀽𑀦𑀺 𑀘;

𑀲𑀫𑀢𑁆𑀣𑁄 𑀓𑁄𑀳𑀺 𑀢𑀁 𑀲𑀩𑁆𑀩𑀁, 𑀯𑀢𑁆𑀢𑀼𑀁 𑀧𑀝𑀺𑀧𑀤𑀁 𑀦𑀭𑁄.

𑁬𑁪. 𑀓𑀧𑁆𑀧𑀕𑀸𑀫𑀯𑁆𑀳𑀬𑀜𑁆𑀘𑁂𑀯, 𑀢𑀣𑀸 𑀲𑁂𑀧𑀡𑁆𑀡𑀺𑀦𑀸𑀫𑀓𑀁;

𑀧𑀥𑀸𑀦𑀭𑀓𑁆𑀔𑁂 𑀘 𑀲𑀺𑀭𑀺𑀁, 𑀲𑀺𑀭𑀻𑀲𑀗𑁆𑀖𑀸𑀤𑀺 𑀩𑁄𑀥𑀺𑀓𑁂.

𑁬𑁫. 𑀧𑀸𑀲𑀸𑀤𑀁 𑀲𑁄𑀯 𑀓𑀸𑀭𑁂𑀲𑀺, 𑀧𑀲𑀸𑀤𑀸𑀯𑀳𑀫𑀼𑀢𑁆𑀢𑀫𑁄;

𑀙𑀸𑀤𑁂𑀲𑀺 𑀮𑁄𑀳𑀧𑀸𑀲𑀸𑀤𑀁, 𑀣𑀽𑀧𑀸𑀭𑀸𑀫𑀖𑀭𑀁 𑀢𑀣𑀸.

𑁬𑁬. 𑀣𑀽𑀧𑀸𑀭𑀸𑀫𑁂 𑀘 𑀧𑀸𑀲𑀸𑀤𑀁 𑀓𑀢𑁆𑀯𑀸’𑀤𑀸 𑀧𑀁𑀲𑀼𑀓𑀽𑀮𑀺𑀦𑀁;

𑀚𑀺𑀡𑁆𑀡𑀓𑀁 𑀧𑀝𑀺𑀲𑀗𑁆𑀔𑀸𑀲𑀺 𑀙𑀢𑁆𑀢𑀁 𑀘𑁂𑀢𑀺𑀬𑀫𑀼𑀤𑁆𑀥𑀦𑀺;

𑀩𑀳𑀯𑁄 𑀚𑀺𑀡𑁆𑀡𑀓𑀸𑀯𑀸𑀲𑁂 𑀢𑀢𑁆𑀣𑁂𑀯 𑀧𑀝𑀺𑀲𑀗𑁆𑀔𑀭𑀺.

[𑀏𑀢𑁆𑀣 𑀫𑀸𑀡𑀯𑀫𑁆𑀫𑀲𑁆𑀲 𑀭𑀚𑁆𑀚𑀓𑀣𑀸𑀬 𑀊𑀦𑀢𑀸 𑀤𑀺𑀲𑁆𑀲𑀢𑀺. 𑀇𑀢𑁄 𑀧𑀝𑁆𑀞𑀸𑀬 𑀅𑀕𑁆𑀕𑀩𑁄𑀥𑀺𑀲𑁆𑀲 𑀭𑀚𑁆𑀚𑀧𑀝𑀺𑀩𑀤𑁆𑀥𑀸 𑀓𑀣𑀸 𑀯𑀺𑀭 𑀔𑀸𑀬𑀢𑀺.]