𑀏𑀓𑀘𑀢𑁆𑀢𑀸𑀮𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀤𑁆𑀯𑀺𑀭𑀸𑀚𑀓𑁄

𑁧. 𑀫𑀳𑀸𑀦𑀸𑀕𑀦𑀭𑀺𑀦𑁆𑀤𑀲𑁆𑀲, 𑀪𑀸𑀕𑀺𑀦𑁂𑀬𑁆𑀬𑁄 𑀲𑀼𑀪𑀸𑀕𑀺𑀬𑁄;

𑀲𑁄 𑀅𑀕𑁆𑀕𑀩𑁄𑀥𑀺𑀭𑀸𑀚𑀸𑀲𑀺, 𑀅𑀕𑁆𑀕𑀩𑁄𑀥𑀺𑀕𑀢𑀸𑀲𑀬𑁄.

𑁨. 𑀢𑁂𑀚𑁂𑀦 𑀩𑀸𑀳𑀼𑀁 𑀲𑁄𑀫𑁆𑀫𑁂𑀦, 𑀘𑀦𑁆𑀤𑀁 𑀲𑀫𑁆𑀧𑀼𑀡𑁆𑀡𑀫𑀡𑁆𑀟𑀮𑀁;

𑀲𑀼𑀫𑁂𑀭𑀼𑀫𑀘𑀮𑀦𑁆𑀢𑁂𑀦, 𑀕𑀫𑁆𑀪𑀺𑀭𑁂𑀦 𑀫𑀳𑁄𑀤𑀥𑀺𑀁.

𑁩. 𑀯𑀲𑀼𑀦𑁆𑀥𑀭𑀸 𑀧𑀓𑀫𑁆𑀧𑁂𑀦, 𑀫𑀸𑀭𑀼𑀢𑀁 𑀲𑀫𑁆𑀧𑀯𑀼𑀢𑁆𑀢𑀺𑀬𑀸;

𑀩𑀼𑀤𑁆𑀥𑀺𑀬𑀸𑀫𑀭𑀫𑀦𑁆𑀢𑀸𑀭𑀁, 𑀲𑀼𑀤𑁆𑀥𑀺𑀬𑀸 𑀲𑀭𑀤𑀫𑁆𑀩𑀭𑀁.

𑁪. 𑀓𑀸𑀫𑀪𑁄𑀕𑁂𑀦 𑀤𑁂𑀯𑀺𑀦𑁆𑀤, 𑀫𑀢𑁆𑀣𑁂𑀦 𑀘 𑀦𑀭𑀺𑀲𑁆𑀲𑀭𑀁;

𑀥𑀫𑁆𑀫𑁂𑀦 𑀲𑀼𑀤𑁆𑀥𑀯𑀸𑀲𑁂𑀝𑁆𑀞𑀁, 𑀯𑀺𑀓𑁆𑀓𑀫𑁂𑀦 𑀫𑀺𑀕𑀸𑀥𑀺𑀧𑀁.

𑁫. 𑀭𑀸𑀚𑀥𑀫𑁆𑀫𑁂𑀳𑀺 𑀭𑀚𑁆𑀚𑁂𑀳𑀺, 𑀘𑀓𑁆𑀓𑀯𑀢𑁆𑀢𑀺𑀦𑀭𑀺𑀲𑁆𑀲𑀭𑀁;

𑀯𑁂𑀲𑁆𑀲𑀦𑁆𑀢𑀭𑀜𑁆𑀘 𑀤𑀸𑀦𑁂𑀦, 𑀅𑀦𑀼𑀕𑀦𑁆𑀢𑁆𑀯𑀸 𑀚𑀦𑁂 𑀲𑀼𑀢𑁄.

𑁬. 𑀫𑀸𑀢𑀼𑀮𑀁 𑀉𑀧𑀭𑀸𑀚𑀯𑁆𑀳𑁂, 𑀪𑀸𑀢𑀭𑀁 𑀬𑀼𑀯𑀭𑀸𑀚𑀓𑁂;

𑀪𑀸𑀕𑀺𑀦𑁂𑀬𑁆𑀬𑀜𑁆𑀘 𑀫𑀮𑀬-𑀭𑀸𑀚𑀞𑀸𑀦𑁂 𑀞𑀧𑁂𑀲𑀺 𑀲𑁄.

𑁭. 𑀞𑀸𑀦𑀦𑁆𑀢𑀭𑁂 𑀬𑀣𑀸𑀬𑁄𑀕𑀁-𑀲𑁂𑀝𑁆𑀞𑀸𑀫𑀘𑁆𑀘𑁂 𑀞𑀧𑁂𑀲𑀺 𑀘;

𑀚𑀦𑀁 𑀲𑀗𑁆𑀕𑀳𑀯𑀢𑁆𑀣𑀽𑀳𑀻, 𑀭𑀸𑀚𑀥𑀫𑁆𑀫𑁂𑀳𑀺 𑀘𑀕𑁆𑀕𑀳𑀺.

𑁮. 𑀤𑁂𑀲𑀁 𑀲𑀬𑁄𑀕𑁆𑀕𑀁 𑀧𑀸𑀤𑀸𑀲𑀺, 𑀬𑀼𑀯𑀭𑀸𑀚𑀲𑁆𑀲 𑀤𑀓𑁆𑀔𑀺𑀡𑀁;

𑀯𑀲𑀁 𑀢𑀢𑁆𑀣 𑀲𑀺𑀭𑀻𑀯𑀟𑁆𑀠-𑀫𑀸𑀦𑀯𑀸𑀧𑀺𑀁 𑀲𑀕𑀸𑀳𑀬𑀺.

𑁯. 𑀓𑀢𑁆𑀯𑀸 𑀕𑀺𑀭𑀺𑀯𑀺𑀳𑀸𑀭𑀜𑁆𑀘, 𑀲𑀗𑁆𑀖𑀺𑀓𑀁 𑀢𑀲𑁆𑀲 𑀤𑀸𑀧𑀬𑀺;

𑀔𑁂𑀢𑁆𑀢𑀸𑀦𑀁 𑀤𑁆𑀯𑀺𑀲𑀢𑀁 𑀲𑀗𑁆𑀖-𑀪𑁄𑀕𑀢𑁆𑀣𑀸𑀬 𑀫𑀳𑀸𑀫𑀢𑀺.

𑁧𑁦. 𑀅𑀤𑀸 𑀫𑀮𑀬𑀭𑀸𑀚𑀲𑁆𑀲, 𑀤𑀸𑀞𑀸𑀦𑀸𑀫𑀁 𑀲𑀥𑀻𑀢𑀭𑀁;

𑀧𑀭𑀺𑀯𑁂𑀡𑀁 𑀲𑀻𑀭𑀺𑀲𑀗𑁆𑀖-𑀩𑁄𑀥𑀺𑀦𑀸𑀫𑀜𑁆𑀘 𑀓𑀸𑀭𑀬𑀺.

𑁧𑁧. 𑀫𑀳𑀸𑀲𑀺𑀯𑀲𑁆𑀲 𑀓𑀸𑀭𑁂𑀲𑀺, 𑀧𑀭𑀺𑀯𑁂𑀡𑀁 𑀲𑀦𑀸𑀫𑀓𑀁;

𑀧𑀭𑀺𑀯𑀸𑀭𑁄’𑀧𑀺 𑀢𑀲𑁆𑀲𑀸𑀲𑀺, 𑀏𑀯𑀁 𑀧𑀼𑀜𑁆𑀜𑀧𑀭𑀸𑀬𑀦𑁄.

𑁧𑁨. 𑀓𑀢𑁆𑀯𑀸 𑀲𑀸𑀥𑀼𑀧𑀘𑀸𑀭𑁂𑀦, 𑀧𑁄𑀭𑀸𑀡𑀁 𑀲𑀗𑁆𑀕𑀳𑀁 𑀯𑀺𑀥𑀺𑀁;

𑀅𑀦𑁆𑀢𑀭𑀸𑀬𑀁 𑀯𑀺𑀲𑁄𑀥𑁂𑀢𑀼𑀁, 𑀚𑀺𑀡𑁆𑀡𑀜𑁆𑀘 𑀧𑀝𑀺𑀲𑀗𑁆𑀔𑀭𑀺.

𑁧𑁩. 𑀓𑀯𑀬𑁄 𑀢𑀲𑁆𑀲 𑀭𑀚𑁆𑀚𑀫𑁆𑀳𑀺, 𑀲𑀻𑀳𑀴𑀸𑀬 𑀦𑀺𑀭𑀼𑀢𑁆𑀢𑀺𑀬𑀸;

𑀓𑀸𑀯𑁂𑀬𑁆𑀬𑁂 𑀩𑀳𑀼𑀓𑁂’𑀓𑀸𑀲𑀼𑀁, 𑀯𑀺𑀘𑀺𑀢𑁆𑀭𑀦𑀬𑀸𑀲𑀸𑀮𑀺𑀦𑁄.

𑁧𑁪. 𑀯𑀺𑀳𑀸𑀭𑁂 𑀤𑀓𑁆𑀔𑀺𑀡𑁂 𑀓𑀸𑀲𑀺, 𑀧𑀸𑀲𑀸𑀤𑀁 𑀲𑀼𑀫𑀦𑁄𑀳𑀭𑀁;

𑀅𑀓𑀸 𑀦𑀯𑀳𑀺 𑀯𑀲𑁆𑀲𑁂𑀳𑀺, 𑀤𑀺𑀧𑁂 𑀓𑀡𑁆𑀝𑀓𑀲𑁄𑀥𑀦𑀁.

𑁧𑁫. 𑀓𑀼𑀭𑀼𑀦𑁆𑀤𑀦𑀸𑀫𑀁 𑀓𑀸𑀭𑁂𑀢𑁆𑀯𑀸, 𑀯𑀺𑀳𑀸𑀭𑀁 𑀲𑀩𑁆𑀩𑀲𑀗𑁆𑀖𑀺𑀓𑀁;

𑀯𑀸𑀧𑀺𑀁 𑀢𑀦𑁆𑀦𑀸𑀫𑀓𑀁 𑀦𑀸𑀴𑀺-𑀓𑁂𑀭𑀸𑀭𑀸𑀫𑀁 𑀢𑀺𑀬𑁄𑀚𑀦𑀁.

𑁧𑁬. 𑀫𑀳𑀸𑀲𑀺𑀯𑀯𑁆𑀳𑀬𑁂 𑀘𑁂𑀯, 𑀲𑀲𑁆𑀲𑀁 𑀓𑀸𑀭𑀬𑀺𑀢𑀼𑀁 𑀅𑀤𑀸;

𑀮𑀸𑀪𑀲𑀓𑁆𑀓𑀸𑀭𑀲𑀫𑁆𑀫𑀸𑀦-𑀫𑀸𑀭𑀸𑀫𑀺𑀓𑀲𑀢𑀁 𑀢𑀤𑀸.

𑁧𑁭. 𑀯𑀺𑀳𑀸𑀭𑀁 𑀢𑀁 𑀲𑀫𑀻𑀧𑀫𑁆𑀳𑀺, 𑀓𑀢𑁆𑀯𑀸 𑀅𑀫𑁆𑀩𑀺𑀮𑀧𑀲𑁆𑀲𑀯𑀁;

𑀕𑀸𑀫𑀁 𑀢𑀦𑁆𑀦𑀸𑀫𑀓𑀁 𑀘𑀸𑀤𑀸, 𑀣𑁂𑀭𑀺𑀬𑀸𑀦𑀁 𑀢𑀧𑀲𑁆𑀲𑀻𑀦𑀁.

𑁧𑁮. 𑀉𑀢𑁆𑀢𑀭𑀯𑀮𑁆𑀮𑀺𑀯𑀺𑀳𑀸𑀭𑀲𑁆𑀲, 𑀭𑀢𑀦𑀁 𑀤𑀻𑀖𑀯𑀡𑁆𑀡𑀺𑀢𑀁;

𑀤𑀢𑁆𑀯𑀸 𑀕𑀸𑀫𑀁 𑀧𑀢𑀺𑀝𑁆𑀞𑁂𑀲𑀺, 𑀲𑀢𑁆𑀣𑀼𑀩𑀺𑀫𑁆𑀩𑀁 𑀲𑀺𑀮𑀸𑀫𑀬𑀁.

𑁧𑁯. 𑀓𑁂𑀴𑀺𑀯𑀸𑀢𑁂 𑀘 𑀓𑀸𑀭𑁂𑀲𑀺, 𑀲𑀼𑀫𑀦𑀁 𑀦𑀸𑀫 𑀧𑀩𑁆𑀩𑀢𑀁;

𑀫𑀳𑀸𑀢𑁂𑀮𑀯𑀝𑀁𑀩𑁄𑀥𑀺-𑀖𑀭𑁂 𑀧𑀸𑀲𑀸𑀡𑀯𑁂𑀤𑀺𑀓𑀁.

𑁨𑁦. 𑀓𑀸𑀭𑁂𑀢𑁆𑀯𑀸 𑀮𑁄𑀳𑀧𑀸𑀲𑀸𑀤𑀁, 𑀧𑀸𑀲𑀸𑀤𑀫𑀳𑀦𑁂 𑀅𑀤𑀸;

𑀙𑀢𑁆𑀢𑀺𑀁𑀲𑀸𑀦𑀁 𑀲𑀳𑀲𑁆𑀲𑀸𑀦𑀁, 𑀪𑀺𑀓𑁆𑀔𑀽𑀦𑀁 𑀲𑁄 𑀢𑀺𑀘𑀻𑀯𑀭𑀁.

𑁨𑁧. 𑀕𑀸𑀫𑀁 𑀤𑀢𑁆𑀯𑀸 𑀦𑀺𑀬𑁄𑀚𑁂𑀲𑀺, 𑀆𑀭𑀓𑁆𑀔𑀁 𑀥𑀻𑀢𑀼 𑀦𑀸𑀫𑀓𑀁;

𑀳𑀢𑁆𑀣𑀺𑀓𑀼𑀘𑁆𑀙𑀺𑀯𑀺𑀳𑀸𑀭𑁂𑀧𑀺, 𑀧𑀸𑀲𑀸𑀤𑀁 𑀓𑀸𑀲𑀺 𑀩𑀼𑀤𑁆𑀥𑀺𑀫𑀸.

𑁨𑁨. 𑀤𑀸𑀞𑀸 𑀲𑀺𑀯𑀲𑁆𑀲 𑀞𑀢𑁆𑀯𑀸𑀦, 𑀑𑀯𑀸𑀤𑁂 𑀲𑀸𑀥𑀼 𑀪𑀺𑀓𑁆𑀔𑀼𑀦𑁄;

𑀲𑀫𑀸𑀘𑀭𑀦𑁆𑀢𑁄 𑀥𑀫𑁆𑀫𑁂𑀦, 𑀲𑀓𑁆𑀓𑀘𑁆𑀘𑀁 𑀢𑀫𑀼𑀧𑀝𑁆𑀞𑀳𑀺.

𑁨𑁩. 𑀫𑀽𑀕𑀲𑁂𑀦𑀸𑀧𑀢𑀺𑀁 𑀘𑀸𑀓𑀸, 𑀯𑀺𑀳𑀸𑀭𑀁 𑀲𑁄 𑀯𑀺𑀲𑀸𑀮𑀓𑀁;

𑀕𑀸𑀫𑀁 𑀮𑀚𑁆𑀚𑀺𑀓𑀫𑁂𑀢𑀲𑁆𑀲, 𑀤𑀸𑀲 𑀪𑁄𑀕𑀸𑀬’𑀤𑀸𑀲𑀺 𑀘.

𑁨𑁪. 𑀫𑀳𑀸𑀦𑀸𑀕𑀲𑁆𑀲 𑀧𑀼𑀜𑁆𑀜𑀢𑁆𑀣𑀁, 𑀭𑀜𑁆𑀜𑁄 𑀢𑀁𑀦𑀸𑀫𑀓𑀁 𑀅𑀓𑀸;

𑀫𑀳𑀸𑀣𑁂𑀭𑀲𑁆𑀲 𑀢𑀜𑁆𑀘𑀸’𑀤𑀸, 𑀭𑀸𑀚𑀸 𑀢𑁂𑀧𑀺𑀝𑀓𑀲𑁆𑀲 𑀲𑁄.

𑁨𑁫. 𑀅𑀢𑁆𑀢𑀦𑁄 𑀲𑀤𑀺𑀲𑀸𑀦𑀜𑁆𑀘, 𑀬𑁄𑀕𑀻𑀦𑀁 𑀯𑀺𑀕𑀢𑀸𑀮𑀬𑁄;

𑀪𑀺𑀓𑁆𑀔𑀽𑀦𑀁 𑀘𑀢𑀼𑀲𑀝𑁆𑀞𑀻𑀦𑀁, 𑀯𑀺𑀳𑀸𑀭𑀁 𑀢𑀁 𑀢𑀤𑀸 𑀅𑀤𑀸.

𑁨𑁬. 𑀓𑀢𑁆𑀯𑀸 𑀢𑀲𑁆𑀲𑁂𑀯 𑀫𑀳𑀸-𑀧𑀭𑀺𑀯𑁂𑀡𑀦𑀺𑀯𑀸𑀲𑀺𑀦𑁄;

𑀪𑀺𑀦𑁆𑀦𑁄𑀭𑀼𑀤𑀻𑀧𑀁 𑀤𑀢𑁆𑀯𑀸𑀦, 𑀯𑀝𑁆𑀝𑀓𑀸𑀓𑀸𑀭𑀧𑀺𑀝𑁆𑀞𑀺𑀢𑁄.

𑁨𑁭. 𑀤𑀓𑁆𑀔𑀺𑀡𑀕𑀻𑀭𑀺𑀤𑀴𑁆𑀳𑀯𑁆𑀳𑁂, 𑀫𑀳𑀸𑀦𑀸𑀕𑁂 𑀘 𑀧𑀩𑁆𑀩𑀢𑁂;

𑀓𑀸𑀴𑀯𑀸𑀧𑀸𑀤𑀺𑀓𑁂 𑀘𑀸’𑀓𑀸, 𑀯𑀺𑀳𑀸𑀭𑁂 𑀧𑁄𑀲𑀣𑀸𑀮𑀬𑁂.

𑁨𑁮. 𑀯𑀺𑀳𑀸𑀭𑁂 𑀅𑀪𑀬𑁂’𑀓𑀸𑀲𑀺, 𑀫𑀳𑀸𑀧𑁄𑀓𑁆𑀔𑀭𑀡𑀺𑀁 𑀢𑀣𑀸;

𑀘𑁂𑀢𑀺𑀬𑀧𑀩𑁆𑀩𑀢𑁂 𑀘𑀸𑀓𑀸, 𑀦𑀸𑀕𑀲𑁄𑀡𑁆𑀟𑀺𑀁 𑀣𑀺𑀭𑁄𑀤𑀺𑀓𑀁.

𑁨𑁯. 𑀫𑀳𑀺𑀦𑁆𑀤𑀢𑀝𑀯𑀸𑀯𑀺𑀜𑁆𑀘, 𑀓𑀸𑀭𑀸𑀧𑁂𑀢𑁆𑀯𑀸𑀦 𑀲𑀸𑀥𑀼𑀓𑀁;

𑀏𑀢𑀺𑀲𑁆𑀲𑀸 𑀫𑀭𑀺𑀬𑀸𑀤𑀸𑀬, 𑀣𑁂𑀭𑀁 𑀦𑁂𑀢𑀼𑀁 𑀦𑀺𑀬𑁄𑀚𑀬𑀺.

𑁩𑁦. 𑀫𑀳𑀸𑀫𑀳𑀺𑀦𑁆𑀤 𑀣𑁂𑀭𑀫𑁆𑀳𑀺, 𑀢𑀁𑀞𑀸𑀦𑀲𑀫𑀼𑀧𑀸𑀕𑀢𑁄;

𑀢𑀭𑀘𑁆𑀙𑀸 𑀏𑀯 𑀦𑁂𑀢𑀼𑀦𑁆𑀢𑀺, 𑀓𑀢𑀺𑀓𑀜𑁆𑀘𑁂𑀯 𑀓𑀸𑀭𑀬𑀺.

𑁩𑁧. 𑀙𑀢𑁆𑀢𑀁 𑀲𑁄𑀡𑁆𑀡𑀜𑁆𑀘 𑀓𑀸𑀭𑁂𑀲𑀺, 𑀦𑀺𑀓𑀸𑀬𑁂𑀲𑀼𑀧𑀺 𑀢𑀻𑀲𑀼 𑀲𑁄;

𑀲𑀢𑁆𑀢𑀸𑀝𑁆𑀞𑀦𑀯 𑀯𑀸𑀭𑁂𑀲𑀼, 𑀫𑀳𑀕𑁆𑀖𑀭𑀢𑀦𑁂𑀳𑀺 𑀘.

𑁩𑁨. 𑀫𑀳𑀸𑀢𑀽𑀧𑁂 𑀘𑀢𑀼𑀩𑁆𑀩𑀻𑀲-𑀪𑀸𑀭𑀁 𑀙𑀢𑁆𑀢𑀁 𑀲𑀼𑀯𑀡𑁆𑀡𑀬𑀁;

𑀢𑀢𑁆𑀣 𑀢𑀢𑁆𑀣 𑀘 𑀧𑀽𑀚𑁂𑀲𑀺, 𑀫𑀳𑀕𑁆𑀖𑀁 𑀭𑀢𑀦𑀼𑀢𑁆𑀢𑀫𑀁.

𑁩𑁩. 𑀤𑀸𑀞𑀸𑀥𑀸𑀢𑀼𑀖𑀭𑀁 𑀓𑀢𑁆𑀯𑀸, 𑀯𑀺𑀘𑀺𑀢𑁆𑀭𑀭𑀢𑀦𑀼𑀚𑁆𑀚𑀮𑀁;

𑀓𑀸𑀲𑀺 𑀳𑁂𑀫𑀓𑀭𑀡𑁆𑀟𑀜𑁆𑀘, 𑀮𑁄𑀳𑀦𑀸𑀯𑀜𑁆𑀘 𑀧𑀸𑀴𑀺𑀬𑀁.

𑁩𑁪. 𑀫𑀡𑀺𑀫𑁂𑀔𑀮𑀦𑀸𑀫𑀜𑁆𑀘, 𑀩𑀦𑁆𑀥𑀸𑀧𑁂𑀲𑀺 𑀲𑀩𑀦𑁆𑀥𑀦𑀁;

𑀫𑀳𑀸𑀫𑀸𑀢𑀺𑀜𑁆𑀘 𑀕𑀡𑁆𑀳𑁂𑀲𑀺, 𑀫𑀡𑀺𑀳𑀻𑀭𑀓𑀯𑀸𑀧𑀺𑀬𑀁.

𑁩𑁫. 𑀢𑀤𑀸 𑀏𑀓𑁄 𑀫𑀳𑀸𑀣𑁂𑀭𑁄, 𑀚𑁄𑀢𑀺𑀧𑀸𑀮𑀓𑀦𑀸𑀫𑀓𑁄;

𑀧𑀭𑀸𑀚𑁂𑀲𑀺 𑀯𑀺𑀯𑀸𑀤𑁂𑀦, 𑀤𑀻𑀧𑁂 𑀯𑁂𑀢𑀼𑀮𑁆𑀮𑀯𑀸𑀤𑀺𑀦𑁄.

𑁩𑁬. 𑀤𑀸𑀞𑀸𑀧𑀪𑀼𑀢𑀺𑀦𑀸𑀫𑁄’𑀣, 𑀆𑀤𑀺𑀧𑀸𑀤𑁄’𑀢𑀺𑀮𑀚𑁆𑀚𑀺𑀢𑁄;

𑀳𑀢𑁆𑀣𑀫𑀼𑀓𑁆𑀔𑀺𑀧𑁆𑀧𑀺 𑀢𑀁 𑀳𑀦𑁆𑀢𑀼𑀁, 𑀕𑀡𑁆𑀟𑁄 𑀲𑀜𑁆𑀚𑀸𑀬𑀺 𑀢𑀁𑀔𑀡𑁂.

𑁩𑁭. 𑀭𑀸𑀚𑀸 𑀢𑀲𑁆𑀫𑀺𑀁 𑀧𑀲𑀻𑀤𑀺𑀢𑁆𑀯𑀸, 𑀯𑀺𑀳𑀸𑀭𑁂𑀬𑁂𑀯 𑀯𑀸𑀲𑀬𑀺;

𑀫𑀸𑀦𑁂𑀦 𑀢𑀁 𑀅𑀦𑀸𑀕𑀫𑁆𑀫, 𑀤𑀸𑀞𑀸𑀧𑀪𑀽𑀫𑀢𑁄 𑀓𑀺𑀭.

𑁩𑁮. 𑀤𑀢𑁆𑀯𑀸 𑀫𑀳𑀸𑀤𑀺𑀧𑀸𑀤𑀢𑁆𑀢𑀁, 𑀪𑀸𑀕𑀺𑀦𑁂𑀬𑁆𑀬𑀕𑁆𑀕𑀩𑁄𑀥𑀺𑀦𑁄;

𑀭𑀓𑁆𑀔𑀺𑀢𑀼𑀁 𑀢𑀁 𑀦𑀺𑀬𑁄𑀚𑁂𑀲𑀺, 𑀣𑁂𑀭𑀁 𑀲𑁄𑀧𑀺 𑀢𑀫𑀸𑀘𑀭𑀺.

𑁩𑁯. 𑀦𑀻𑀮𑀕𑁂𑀳𑀧𑀭𑀺𑀘𑁆𑀙𑁂𑀤𑀁, 𑀓𑀢𑁆𑀯𑀸 𑀢𑀲𑁆𑀲𑁂𑀯 𑀲𑁄 𑀅𑀤𑀸;

𑀓𑀢𑁆𑀯𑁂𑀯𑀁 𑀩𑀳𑀼𑀥𑀸 𑀧𑀼𑀜𑁆𑀜𑀁, 𑀘𑀢𑀼𑀢𑁆𑀢𑀺𑀁𑀲𑁂 𑀲𑀫𑁂 𑀫𑀢𑁄.

𑁪𑁦. 𑀅𑀕𑁆𑀕𑀩𑁄𑀥𑀺 𑀢𑀢𑁄 𑀆𑀲𑀺, 𑀭𑀸𑀚𑀸 𑀧𑀼𑀩𑁆𑀩𑀲𑁆𑀲 𑀭𑀸𑀚𑀺𑀦𑁄;

𑀫𑀳𑀮𑁆𑀮𑀓𑀢𑁆𑀢𑀸𑀦𑀁 𑀔𑀼𑀤𑁆𑀤-𑀦𑀸𑀫𑁂𑀦 𑀧𑀭𑀺𑀤𑀻𑀧𑀬𑀼𑀁.

𑁪𑁧. 𑀲𑁄 𑀤𑀻𑀧𑀁 𑀧𑀭𑀺𑀧𑀸𑀮𑁂𑀲𑀺, 𑀧𑀼𑀩𑁆𑀩𑀘𑀸𑀭𑀺𑀢𑁆𑀢𑀓𑁄𑀯𑀺𑀤𑁄;

𑀅𑀓𑀸𑀲𑀺 𑀘 𑀫𑀳𑁂𑀲𑀺𑀁 𑀲𑁄, 𑀫𑀸𑀢𑀼𑀮𑀥𑀻𑀢𑀼𑀫𑀢𑁆𑀢𑀦𑁄.

𑁪𑁨. 𑀲𑀗𑁆𑀖𑀪𑀤𑁆𑀤𑀁 𑀅𑀲𑀺𑀕𑁆𑀕𑀸𑀳𑀁, 𑀓𑀸𑀲𑀺 𑀩𑀦𑁆𑀥𑀼𑀁 𑀫𑀳𑁂𑀲𑀺𑀬𑀸;

𑀬𑀣𑀸𑀭𑀳𑀫𑀤𑀸 𑀘𑁂𑀯, 𑀞𑀸𑀦𑀦𑁆𑀢𑀭𑀫𑀦𑀸𑀮𑀬𑁄.

𑁪𑁩. 𑀓𑀢𑁆𑀯𑀸 𑀯𑁂𑀴𑀼𑀯𑀦𑀁 𑀭𑀸𑀚𑀸, 𑀲𑀸𑀕𑀮𑀻𑀦𑀁 𑀦𑀺𑀬𑁄𑀚𑀬𑀻;

𑀚𑀫𑁆𑀩𑀼𑀭𑀦𑁆𑀢𑀭𑀕𑀮𑁆𑀮𑀜𑁆𑀘, 𑀓𑀸𑀲𑀺 𑀫𑀸𑀢𑀺𑀓𑀧𑀺𑀝𑁆𑀞𑀺𑀓𑀁.

𑁪𑁪. 𑀭𑀜𑁆𑀜𑁄 𑀢𑀲𑁆𑀲𑁂’𑀯 𑀭𑀚𑁆𑀚𑀫𑁆𑀳𑀺, 𑀓𑀸𑀮𑀺𑀗𑁆𑀕𑁂𑀲𑀼 𑀫𑀳𑀻𑀧𑀢𑀺;

𑀲𑀢𑁆𑀢𑀸𑀦𑀁 𑀫𑀭𑀡𑀁 𑀬𑀼𑀤𑁆𑀥𑁂, 𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑁄.

𑁪𑁫. 𑀇𑀫𑀁 𑀤𑀻𑀧𑀫𑀼𑀧𑀸𑀕𑀫𑁆𑀫, 𑀧𑀩𑁆𑀩𑀚𑁆𑀚𑀸 𑀓𑀢𑀦𑀺𑀘𑁆𑀙𑀬𑁄;

𑀚𑁄𑀢𑀺𑀧𑀸𑀮𑀫𑁆𑀳𑀺 𑀧𑀩𑁆𑀩𑀚𑀺, 𑀭𑀸𑀚𑀸 𑀲𑀓𑁆𑀓𑀸𑀲𑀺 𑀢𑀁 𑀘𑀺𑀭𑀁.

𑁪𑁬. 𑀧𑀥𑀸𑀦𑀞𑀸𑀦𑀁 𑀢𑀲𑁆𑀲’𑀓𑀸, 𑀯𑀺𑀳𑀸𑀭𑁂 𑀫𑀢𑁆𑀢𑀧𑀩𑁆𑀩𑀢𑁂;

𑀢𑀲𑁆𑀲𑀸𑀫𑀘𑁆𑀘𑁄 𑀫𑀳𑁂𑀲𑀻 𑀘, 𑀢𑀣𑁂𑀯𑀸’𑀕𑀫𑁆𑀫 𑀧𑀩𑁆𑀩𑀚𑀼𑀁.

𑁪𑁭. 𑀭𑀜𑁆𑀜𑁄 𑀫𑀳𑁂𑀲𑀻 𑀲𑀼𑀢𑁆𑀯𑀸𑀦, 𑀢𑀲𑁆𑀲 𑀧𑀩𑁆𑀩𑀚𑁆𑀚𑀫𑀼𑀢𑁆𑀢𑀫𑀁;

𑀲𑀓𑁆𑀓𑀘𑁆𑀘𑀁 𑀢𑀫𑀼𑀧𑀝𑁆𑀞𑀸𑀲𑀺, 𑀭𑀢𑀦𑀯𑁆𑀳𑀜𑁆𑀘 𑀓𑀸𑀭𑀬𑀺.

𑁪𑁮. 𑀅𑀤𑀸 𑀭𑀸𑀚𑀸 𑀅𑀫𑀘𑁆𑀘𑀲𑁆𑀲, 𑀧𑀸𑀘𑀻𑀦𑀓𑀡𑁆𑀟𑀭𑀸𑀚𑀺𑀬𑀁;

𑀯𑁂𑀢𑁆𑀢𑀯𑀸𑀲𑀯𑀺𑀳𑀸𑀭𑀜𑁆𑀘, 𑀲𑁄’𑀤𑀸 𑀲𑀗𑁆𑀖𑀲𑁆𑀲 𑀢𑀁 𑀬𑀢𑀺.

𑁪𑁯. 𑀭𑀸𑀚𑀢𑁆𑀣𑁂𑀭𑁂𑀫𑀢𑁂 𑀭𑀸𑀚𑀸, 𑀲𑁄𑀘𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀬;

𑀧𑀥𑀸𑀦𑀞𑀸𑀦𑀁 𑀓𑀸𑀭𑁂𑀲𑀺, 𑀘𑀽𑀴𑀕𑀮𑁆𑀮𑀯𑀺𑀳𑀸𑀭𑀓𑁂.

𑁫𑁦. 𑀧𑀮𑀁𑀦𑀕𑀭𑀕𑀜𑁆𑀘𑁂𑀯, 𑀢𑀲𑁆𑀲 𑀞𑀸𑀦𑀜𑁆𑀳𑀺 𑀓𑀸𑀭𑀬𑀺;

𑀏𑀯𑀁 𑀢𑀤𑀢𑁆𑀣𑀁 𑀧𑀼𑀜𑁆𑀜𑀸𑀦𑀺, 𑀩𑀳𑀽𑀦𑀺’𑀧𑀺 𑀫𑀳𑀻𑀧𑀢𑀺.

𑁫𑁧. 𑀚𑁄𑀢𑀺𑀧𑀸𑀮𑀺𑀢 𑀣𑁂𑀭𑀫𑁆𑀳𑀺, 𑀢𑀽𑀧𑀸𑀭𑀸𑀫𑀫𑁆𑀳𑀺 𑀘𑁂𑀢𑀺𑀬𑀁;

𑀯𑀦𑁆𑀤𑀫𑀸𑀦𑁂 𑀧𑀪𑀺𑀚𑁆𑀚𑀺𑀢𑁆𑀯𑀸, 𑀪𑀸𑀕𑁄 𑀢𑀁 𑀧𑀼𑀭𑀢𑁄 𑀧𑀢𑀺.

𑁫𑁨. 𑀧𑀓𑁆𑀓𑁄𑀲𑀺𑀢𑁆𑀯𑀸𑀦 𑀭𑀸𑀚𑀸𑀦𑀁, 𑀣𑁂𑀭𑁄 𑀤𑀲𑁆𑀲𑁂𑀲𑀺 𑀤𑀼𑀓𑁆𑀔𑀺𑀢𑁄;

𑀭𑀸𑀚𑀸 𑀤𑀺𑀲𑁆𑀯𑀸𑀯 𑀲𑀁𑀯𑀺𑀕𑁆𑀕𑁄, 𑀓𑀫𑁆𑀫𑀁 𑀧𑀝𑁆𑀞𑀧𑀺 𑀢𑀁𑀔𑀡𑁂.

𑁫𑁩. 𑀤𑀓𑁆𑀔𑀺𑀡𑀓𑁆𑀔𑀓𑀥𑀸𑀢𑀼𑀁 𑀲𑁄, 𑀮𑁄𑀳𑀧𑀸𑀲𑀸𑀤𑀓𑀼𑀘𑁆𑀙𑀺𑀬𑀁;

𑀲𑀸𑀭𑀓𑁆𑀔𑀁 𑀞𑀧𑀬𑀺𑀢𑁆𑀯𑀸𑀦, 𑀭𑀢𑁆𑀢𑀺𑀦𑁆𑀤𑀺𑀯𑀫𑀧𑀽𑀚𑀬𑀺.

𑁫𑁪. 𑀦𑀯𑀓𑀫𑁆𑀫𑁂 𑀘𑀺𑀭𑀸𑀬𑀦𑁆𑀢𑁂, 𑀣𑀽𑀧𑀸𑀭𑀸𑀫𑀫𑁆𑀳𑀺 𑀤𑁂𑀯𑀢𑀸;

𑀲𑀼𑀧𑀺𑀦𑀁 𑀢𑀲𑁆𑀲 𑀤𑀲𑁆𑀲𑁂𑀲𑀼𑀁, 𑀭𑀢𑁆𑀢𑀺𑀫𑀸𑀭𑀸𑀫𑀺𑀓𑀸 𑀯𑀺𑀬.

𑁫𑁫. 𑀲𑀘𑁂 𑀭𑀸𑀚𑀸 𑀧𑀧𑀜𑁆𑀘𑁂𑀢𑀺, 𑀓𑀸𑀢𑀼𑀁 𑀥𑀸𑀢𑀼𑀖𑀭𑀁 𑀫𑀬𑀁;

𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀫, 𑀬𑀢𑁆𑀣𑀢𑀢𑁆𑀣𑀸’𑀢𑀺 𑀢𑀁𑀔𑀡𑁂.

𑁫𑁬. 𑀭𑀸𑀚𑀸 𑀧𑀩𑀼𑀤𑁆𑀥𑁄 𑀲𑀁𑀯𑀺𑀕𑁆𑀕𑁄, 𑀦 𑀘𑀺𑀭𑁂𑀦𑁂𑀯 𑀓𑀸𑀭𑀬𑀺;

𑀓𑀫𑁆𑀫𑀁 𑀥𑀸𑀢𑀼𑀖𑀭𑁂𑀲𑀩𑁆𑀩𑀁, 𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀲𑀜𑁆𑀜𑀼𑀢𑁆𑀢𑀁.

𑁫𑁭. 𑀘𑀢𑀲𑁆𑀲𑁄 𑀧𑀝𑀺𑀫𑀸𑀬𑁄 𑀘, 𑀧𑀮𑁆𑀮𑀗𑁆𑀓𑁂 𑀘 𑀲𑀺𑀮𑀸𑀫𑀬𑁂;

𑀳𑁂𑀫𑀘𑁆𑀙𑀢𑁆𑀢𑀁 𑀲𑀺𑀮𑀸𑀤𑀦𑁆𑀢-𑀓𑀫𑁆𑀫𑀁 𑀕𑁂𑀳𑀫𑁆𑀳𑀺 𑀲𑀩𑁆𑀩𑀲𑁄.

𑁫𑁮. 𑀫𑀳𑀸𑀫𑀘𑁆𑀘𑀸𑀤𑀬𑁄’𑀓𑀁𑀲𑀼, 𑀓𑀭𑀡𑁆𑀟𑀸𑀦𑀁 𑀲𑀢𑀁 𑀦𑀯;

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀲𑁆𑀲, 𑀓𑀫𑁆𑀫𑀜𑁆𑀘 𑀦𑀺𑀔𑀺𑀮𑀁 𑀦𑀯𑀁.

𑁫𑁯. 𑀲𑀩𑁆𑀩𑀼𑀲𑁆𑀲𑀸𑀳𑁂𑀦 𑀓𑀸𑀭𑁂𑀢𑁆𑀯𑀸, 𑀫𑀳𑀸𑀧𑀽𑀚𑀁 𑀬𑀣𑀸𑀭𑀳𑀁;

𑀆𑀦𑁂𑀢𑁆𑀯𑀸 𑀮𑁄𑀳𑀧𑀸𑀲𑀸𑀤𑀸, 𑀥𑀸𑀢𑀼𑀁 𑀲𑀩𑁆𑀩𑀸𑀤𑀭𑁂𑀦 𑀲𑁄.

𑁬𑁦. 𑀚𑁄𑀢𑀺𑀧𑀸𑀮𑀁 𑀫𑀳𑀸𑀣𑁂𑀭𑀁, 𑀲𑀲𑀗𑁆𑀖𑀁 𑀧𑀭𑀺𑀯𑀸𑀭𑀺𑀬;

𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑁂𑀲𑀺, 𑀥𑀸𑀢𑀼𑀁 𑀥𑀸𑀢𑀼𑀓𑀭𑀡𑁆𑀟𑀓𑁂.

𑁬𑁧. 𑀥𑀸𑀢𑀼𑀕𑁂𑀳𑀲𑁆𑀲 𑀧𑀸𑀤𑀸𑀲𑀺, 𑀮𑀗𑁆𑀓𑀸𑀤𑀻𑀧𑀁 𑀲𑀳𑀢𑁆𑀢𑀦𑀸;

𑀮𑀸𑀪𑀕𑁆𑀕𑀸𑀫-𑀫𑀤𑀸 𑀢𑀲𑁆𑀲𑀸, 𑀭𑀓𑁆𑀔𑀓𑀸𑀦𑀁 𑀫𑀳𑁂𑀲𑀺𑀬𑀸.

𑁬𑁨. 𑀦𑀸𑀕𑀤𑀻𑀧𑀫𑁆𑀳𑀺 𑀕𑁂𑀳𑀜𑁆𑀘, 𑀭𑀸𑀚𑀸𑀬𑀢𑀦𑀥𑀸𑀢𑀼𑀬𑀸;

𑀉𑀡𑁆𑀡𑀮𑁄𑀫𑀖𑀭𑀜𑁆𑀘𑁂𑀯, 𑀙𑀢𑁆𑀢𑀫𑀸𑀫𑀮𑀘𑁂𑀢𑀺𑀬𑁂.

𑁬𑁩. 𑀢𑀢𑁆𑀣 𑀕𑀸𑀫𑀁 𑀯𑀺𑀳𑀸𑀭𑀲𑁆𑀲, 𑀬𑀸𑀕𑀼𑀤𑀸𑀦𑀸𑀬’𑀤𑀸𑀲𑀺 𑀘;

𑀯𑀺𑀳𑀸𑀭𑀲𑁆𑀲’𑀪𑀬𑀲𑁆𑀲𑀸’𑀤𑀸, 𑀕𑀸𑀫𑀫𑀗𑁆𑀕𑀡𑀲𑀸𑀮𑀓𑀁.

𑁬𑁪. 𑀦𑀸𑀫𑀁 𑀓𑀢𑁆𑀯𑀸𑀦 𑀲𑁄’𑀓𑀸𑀲𑀺, 𑀅𑀢𑁆𑀢𑀦𑁄 𑀘 𑀫𑀳𑁂𑀲𑀺𑀬𑀸;

𑀤𑀸𑀞𑀕𑁆𑀕𑀩𑁄𑀥𑀺𑀫𑀸𑀯𑀸𑀲𑀁, 𑀯𑀺𑀳𑀸𑀭𑁂 𑀅𑀢𑀬𑀼𑀢𑁆𑀢𑀭𑁂.

𑁬𑁫. 𑀤𑁂𑀯𑀻 𑀓𑀧𑀸𑀮𑀦𑀸𑀕𑀁 𑀲𑀸, 𑀯𑀺𑀳𑀸𑀭𑀁 𑀲𑀸𑀥𑀼𑀓𑀸𑀭𑀺𑀬;

𑀢𑀲𑁆𑀲𑁂’𑀯𑀸𑀤𑀸 𑀯𑀺𑀳𑀸𑀭𑀲𑁆𑀲, 𑀲𑀫𑁆𑀧𑀦𑁆𑀦𑀘𑀢𑀼𑀧𑀘𑁆𑀘𑀬𑀁.

𑁬𑁬. 𑀕𑁂𑀳𑀁 𑀚𑁂𑀢𑀯𑀦𑁂 𑀓𑀸𑀲𑀺, 𑀭𑀸𑀚𑀸 𑀭𑀸𑀚𑀢𑀘𑀼𑀫𑁆𑀩𑀝𑀁;

𑀉𑀤𑀧𑀸𑀦𑀁 𑀫𑀡𑀸𑀧𑁂𑀲𑀺, 𑀲𑁄𑀯 𑀩𑁄𑀥𑀺𑀖𑀭𑀦𑁆𑀢𑀺𑀓𑁂.

𑁬𑁭. 𑀕𑀗𑁆𑀕𑀸𑀢𑀝𑀁 𑀯𑀮𑀸𑀳𑀲𑁆𑀲𑀁, 𑀯𑀸𑀧𑀺𑀁 𑀕𑀺𑀭𑀺𑀢𑀝𑀜𑁆𑀘𑀓𑀸;

𑀫𑀳𑀸𑀧𑀸𑀴𑀺𑀁𑀧𑀺 𑀯𑀟𑁆𑀠𑁂𑀲𑀺, 𑀪𑀢𑀦𑀸𑀯𑀜𑁆𑀘 𑀓𑀸𑀭𑀬𑀺.

𑁬𑁮. 𑀪𑀺𑀓𑁆𑀔𑀽𑀦𑀻𑀦𑀁 𑀫𑀳𑁂𑀲𑀻 𑀘, 𑀪𑀢𑁆𑀢𑀯𑀁𑀲𑀁 𑀲𑀫𑀸𑀤𑀺𑀲𑀺;

𑀏𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑁄, 𑀤𑀺𑀯𑀁’𑀕𑀸 𑀤𑀲𑀫𑁂 𑀲𑀫𑁂.

𑁬𑁯. 𑀏𑀯𑀁 𑀧𑀼𑀜𑁆𑀜𑀭𑀢𑀸 𑀦𑀭𑀸𑀥𑀺𑀧𑀢𑀬𑁄 𑀲𑀫𑁆𑀧𑀦𑁆𑀦𑀪𑁄𑀕𑀸 𑀕𑀫𑀼𑀁;

𑀫𑀘𑁆𑀘𑀼𑀲𑁆𑀲𑁂𑀯 𑀯𑀲𑀁 𑀢𑀢𑁄𑀳𑀺 𑀫𑀢𑀺𑀫𑀸 𑀲𑀫𑁆𑀫𑀸 𑀪𑀯𑀲𑁆𑀲𑀻𑀤𑀺𑀲𑀁;

𑀧𑀲𑁆𑀲𑀦𑁆𑀢𑁄 𑀦𑀺𑀬𑀫𑀁 𑀯𑀺𑀳𑀸𑀬 𑀯𑀺𑀥𑀺𑀦𑀸 𑀲𑀩𑁆𑀩𑀁 𑀪𑀯𑁂 𑀲𑀗𑁆𑀕𑀢𑀺𑀁;

𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑁄 𑀘𑀭𑁂𑀬𑁆𑀬 𑀥𑀺𑀢𑀺𑀫𑀸 𑀧𑀩𑁆𑀩𑀚𑁆𑀚𑀫𑀚𑁆𑀛𑀽𑀧𑀕𑁄.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀤𑁆𑀯𑀺𑀭𑀸𑀚𑀓𑁄 𑀦𑀸𑀫

𑀏𑀓𑀘𑀢𑁆𑀢𑀸𑀮𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.