𑀲𑀢𑁆𑀢𑀢𑀺𑀁𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀧𑀜𑁆𑀘𑀭𑀸𑀚𑀓𑁄

𑁧. 𑀚𑁂𑀝𑁆𑀞𑀢𑀺𑀲𑁆𑀲𑀘𑁆𑀘𑀬𑁂 𑀢𑀲𑁆𑀲, 𑀫𑀳𑀸𑀲𑁂𑀦𑁄 𑀓𑀦𑀺𑀝𑁆𑀞𑀓𑁄;

𑀲𑀢𑁆𑀢𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀭𑀸𑀚𑀸 𑀭𑀚𑁆𑀚𑀫𑀓𑀸𑀭𑀬𑀺.

𑁨. 𑀢𑀲𑁆𑀲 𑀭𑀚𑁆𑀚𑀸𑀪𑀺𑀲𑁂𑀓𑀁 𑀢𑀁,

𑀓𑀸𑀭𑁂𑀢𑀼𑀁 𑀧𑀭𑀢𑀻𑀭𑀢𑁄;

𑀲𑁄 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑁄 𑀢𑀼,

𑀓𑀸𑀮𑀁 𑀜𑀢𑁆𑀯𑀸 𑀇𑀥𑀸𑀕𑀢𑁄.

𑁩. 𑀢𑀲𑁆𑀲𑀸𑀪𑀺𑀲𑁂𑀓𑀁 𑀓𑀸𑀭𑁂𑀢𑁆𑀯𑀸, 𑀅𑀜𑁆𑀜𑀁 𑀓𑀺𑀘𑁆𑀘𑀜𑁆𑀘𑀦𑁂𑀓𑀥𑀸;

𑀫𑀳𑀸𑀯𑀺𑀳𑀸𑀭 𑀯𑀺𑀤𑁆𑀥𑀁𑀲𑀁, 𑀓𑀸𑀢𑀼𑀓𑀸𑀫𑁄 𑀅𑀲𑀜𑁆𑀜𑀢𑁄.

𑁪. 𑀅𑀯𑀺𑀦𑀬𑀯𑀸𑀤𑀺𑀦𑁄 𑀏𑀢𑁂, 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄;

𑀯𑀺𑀦𑀬𑀯𑀸𑀤𑀻 𑀫𑀬𑀁 𑀭𑀸𑀚, 𑀇𑀢𑀺 𑀕𑀸𑀳𑀺𑀬 𑀪𑀽𑀧𑀪𑀺𑀁.

𑁫. 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀲𑁆𑀲, 𑀆𑀳𑀸𑀭𑀁 𑀤𑁂𑀢𑀺 𑀪𑀺𑀓𑁆𑀔𑀼𑀦𑁄;

𑀬𑁄 𑀲𑁄 𑀲𑀢𑀁 𑀤𑀡𑁆𑀟𑀺𑀬𑁄’𑀢𑀺, 𑀭𑀜𑁆𑀜𑀸 𑀤𑀡𑁆𑀟𑀁 𑀞𑀧𑀸𑀧𑀬𑀺.

𑁬. 𑀉𑀧𑀤𑁆𑀤𑀼𑀢𑀸 𑀢𑁂𑀳𑀺 𑀪𑀺𑀓𑁆𑀔𑀽, 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄;

𑀫𑀳𑀸𑀯𑀺𑀳𑀸𑀭𑀁 𑀙𑀟𑁆𑀟𑁂𑀢𑁆𑀯𑀸, 𑀫𑀮𑀬𑀁 𑀭𑁄𑀳𑀡𑀁 𑀅𑀕𑀼𑀁.

𑁭. 𑀢𑁂𑀦 𑀫𑀳𑀸𑀯𑀺𑀳𑀸𑀭𑁄’𑀬𑀁, 𑀦𑀯𑀯𑀲𑁆𑀲𑀸𑀦𑀺 𑀙𑀟𑁆𑀟𑀺𑀢𑁄;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀳𑀺, 𑀪𑀺𑀓𑁆𑀔𑀽𑀳𑀺 𑀆𑀲𑀺 𑀲𑀼𑀜𑁆𑀜𑀓𑁄.

𑁮. ‘‘𑀳𑁄𑀢𑀺 𑀅𑀲𑁆𑀲𑀸𑀫𑀺𑀓𑀁 𑀯𑀢𑁆𑀣𑀼, 𑀧𑀼𑀢𑀼𑀯𑀺𑀲𑀸𑀫𑀺𑀦𑁄’’𑀇𑀢𑀺;

𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀲𑁄, 𑀣𑁂𑀭𑁄 𑀤𑀼𑀫𑁆𑀫𑀢𑀺 𑀤𑀼𑀫𑁆𑀫𑀢𑀺𑀁.

𑁯. 𑀫𑀳𑀸𑀯𑀺𑀳𑀸𑀭𑀁 𑀦𑀸𑀲𑁂𑀢𑀼𑀁, 𑀮𑀤𑁆𑀥𑀸𑀦𑀼𑀫𑀢𑀺 𑀭𑀸𑀚𑀢𑁄;

𑀢𑀣𑀸 𑀓𑀸𑀢𑀼𑀁 𑀫𑀦𑀼𑀲𑁆𑀲𑁂 𑀲𑁄, 𑀬𑁄𑀚𑁂𑀲𑀺 𑀤𑀼𑀝𑁆𑀞𑀫𑀸𑀦𑀲𑁄.

𑁧𑁦. 𑀲𑀗𑁆𑀖𑀫𑀺𑀢𑁆𑀢𑀲𑁆𑀲 𑀣𑁂𑀭𑀲𑁆𑀲, 𑀲𑁂𑀯𑀓𑁄 𑀭𑀸𑀚𑀯𑀮𑁆𑀮𑀪𑁄;

𑀲𑁄𑀡𑀸𑀫𑀘𑁆𑀘𑁄 𑀤𑀸𑀭𑀡𑁄 𑀘, 𑀪𑀺𑀓𑁆𑀔𑀯𑁄 𑀘 𑀅𑀮𑀚𑁆𑀚𑀺𑀦𑁄.

𑁧𑁧. 𑀪𑀺𑀦𑁆𑀤𑀺𑀢𑁆𑀯𑀸 𑀮𑁄𑀳𑀧𑀸𑀲𑀸𑀤𑀁, 𑀲𑀢𑁆𑀢𑀪𑀽𑀫𑀓 𑀫𑀼𑀢𑁆𑀢𑀫𑀁;

𑀖𑀭𑁂 𑀦𑀸𑀦𑀧𑁆𑀧𑀓𑀸𑀭𑁂 𑀘, 𑀇𑀢𑁄’𑀪𑀬𑀕𑀺𑀭𑀺𑀁 𑀦𑀬𑀼𑀁.

𑁧𑁨. 𑀫𑀳𑀸𑀯𑀺𑀳𑀸𑀭𑀸 𑀦𑀻𑀢𑁂𑀳𑀺, 𑀧𑀸𑀲𑀸𑀤𑁂𑀳𑀺 𑀩𑀳𑀽𑀳𑀺 𑀘;

𑀅𑀪𑀬𑀕𑀺𑀭𑀺𑀯𑀺𑀳𑀸𑀭𑁄𑀬𑀁, 𑀩𑀳𑀼𑀧𑀸𑀲𑀸𑀤𑀓𑁄 𑀅𑀳𑀼.

𑁧𑁩. 𑀲𑀗𑁆𑀖𑀫𑀺𑀢𑁆𑀢𑀁 𑀧𑀸𑀧𑀫𑀺𑀢𑁆𑀢𑀁, 𑀣𑁂𑀭𑀁 𑀲𑁄𑀡𑀜𑁆𑀘 𑀲𑁂𑀯𑀓𑀁;

𑀆𑀕𑀫𑁆𑀫 𑀲𑀼𑀩𑀳𑀼𑀁 𑀧𑀸𑀧𑀁, 𑀅𑀓𑀸𑀲𑀺 𑀲𑁄 𑀫𑀳𑀻𑀧𑀢𑀺.

𑁧𑁪. 𑀫𑀳𑀸𑀲𑀺𑀮𑀸𑀧𑀝𑀺𑀫𑀁 𑀲𑁄, 𑀧𑀸𑀘𑀺𑀦𑀢𑀺𑀲𑁆𑀲𑀧𑀩𑁆𑀩𑀢𑀸;

𑀆𑀦𑁂𑀢𑁆𑀯𑀸’𑀪𑀬𑀕𑀺𑀭𑀺𑀫𑁆𑀳𑀺, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀪𑀽𑀧𑀢𑀺.

𑁧𑁫. 𑀧𑀝𑀺𑀫𑀸𑀖𑀭𑀁 𑀩𑁄𑀥𑀺𑀖𑀭𑀁, 𑀥𑀸𑀢𑀼𑀲𑀸𑀮𑀁 𑀫𑀦𑁄𑀭𑀫𑀁;

𑀘𑀢𑀼𑀲𑀸𑀮𑀜𑁆𑀘 𑀓𑀸𑀭𑁂𑀲𑀻, 𑀲𑀗𑁆𑀔𑀭𑀻 𑀓𑀼𑀓𑁆𑀓𑀼𑀝𑀯𑁆𑀳𑀬𑀁.

𑁧𑁬. 𑀲𑀗𑁆𑀖𑀫𑀺𑀢𑁆𑀢𑁂𑀦 𑀣𑁂𑀭𑁂𑀦, 𑀢𑁂𑀦 𑀤𑀸𑀭𑀼𑀡𑀓𑀫𑁆𑀫𑀼𑀦𑀸;

𑀯𑀺𑀳𑀸𑀭𑁄 𑀲𑁄’𑀪𑀬𑀕𑀺𑀭𑀺, 𑀤𑀲𑁆𑀲𑀦𑁂𑀬𑁆𑀬𑁄 𑀅𑀳𑀼 𑀢𑀤𑀸.

𑁧𑁭. 𑀫𑁂𑀖𑀯𑀡𑁆𑀡𑀸𑀪𑀬𑁄 𑀦𑀸𑀫, 𑀭𑀜𑁆𑀜𑁄 𑀲𑀩𑁆𑀩𑀢𑁆𑀣 𑀲𑀸𑀔𑀓𑁄;

𑀲𑀔𑀸 𑀅𑀫𑀘𑁆𑀘𑁄 𑀓𑀼𑀚𑁆𑀛𑀺𑀢𑁆𑀯𑀸, 𑀫𑀳𑀸𑀯𑀺𑀳𑀸𑀭𑀦𑀸𑀲𑀦𑁂.

𑁧𑁮. 𑀘𑁄𑀭𑁄 𑀳𑀼𑀢𑁆𑀯𑀸𑀦 𑀫𑀮𑀬𑀁, 𑀕𑀦𑁆𑀢𑁆𑀯𑀸 𑀮𑀤𑁆𑀥𑀫𑀳𑀩𑁆𑀩𑀮𑁄;

𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑁂𑀲𑀺, 𑀤𑀼𑀭𑀢𑀺𑀲𑁆𑀲𑀓𑀯𑀸𑀧𑀺𑀬𑀁.

𑁧𑁯. 𑀢𑀢𑁆𑀭𑀸’𑀕𑀢𑀁 𑀢𑀁 𑀲𑀼𑀢𑁆𑀯𑀸, 𑀲𑀳𑀸𑀬𑀁 𑀲𑁄 𑀫𑀳𑀻𑀧𑀢𑀺;

𑀬𑀼𑀤𑁆𑀥𑀸𑀳 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸𑀦, 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑀬𑀺.

𑁨𑁦. 𑀲𑀸𑀥𑀼𑀁 𑀧𑀸𑀦𑀜𑁆𑀘 𑀫𑀁𑀲𑀜𑁆𑀘, 𑀮𑀪𑀺𑀢𑁆𑀯𑀸 𑀫𑀮𑀬𑀸𑀕𑀢𑀁;

‘‘𑀦 𑀲𑁂𑀯𑀺𑀲𑁆𑀲𑀁 𑀲𑀳𑀸𑀬𑁂𑀦, 𑀯𑀺𑀦𑀸 𑀭𑀜𑁆𑀜𑀸’’𑀢𑀺 𑀘𑀺𑀦𑁆𑀢𑀺𑀬.

𑁨𑁧. 𑀆𑀤𑀸𑀬 𑀢𑀁 𑀲𑀬𑀁𑀬𑁂𑀯, 𑀭𑀢𑁆𑀢𑀺𑀁 𑀦𑀺𑀓𑁆𑀔𑀫𑁆𑀫 𑀏𑀓𑀓𑁄;

𑀭𑀜𑁆𑀜𑁄 𑀲𑀦𑁆𑀢𑀺𑀓𑀫𑀸𑀕𑀫𑁆𑀫, 𑀢𑀫𑀢𑁆𑀣𑀁 𑀧𑀝𑀺𑀯𑁂𑀤𑀬𑀺.

𑁨𑁨. 𑀢𑁂𑀦𑀸’𑀪𑀢𑀁 𑀢𑁂𑀦 𑀲𑀳, 𑀯𑀺𑀲𑁆𑀲𑀢𑁆𑀣𑁄 𑀧𑀭𑀺𑀪𑀼𑀜𑁆𑀚𑀺𑀬;

‘‘𑀓𑀲𑁆𑀫𑀸 𑀘𑁄𑀭𑁄 𑀅𑀳𑀼 𑀫𑁂 𑀢𑁆𑀯𑀁, ‘‘𑀇𑀢𑀺 𑀭𑀸𑀚𑀸 𑀅𑀧𑀼𑀘𑁆𑀙𑀺𑀢𑀁.

𑁨𑁩. ‘‘𑀢𑀬𑀸 𑀫𑀳𑀸𑀯𑀺𑀳𑀸𑀭𑀲𑁆𑀲, 𑀦𑀸𑀲𑀺𑀢𑀢𑁆𑀢𑀸’’𑀢𑀺 𑀅𑀩𑁆𑀭𑀼𑀯𑀺;

‘‘𑀯𑀺𑀳𑀸𑀭𑀁 𑀯𑀸𑀲𑀬𑀺𑀲𑁆𑀲𑀸𑀫𑀺, 𑀔𑁂𑀫𑀫𑁂𑀢𑀁 𑀫𑀫𑀘𑁆𑀘𑀬𑀁.

𑁨𑁪. 𑀇𑀘𑁆𑀙𑁂𑀯 𑀫𑀩𑁆𑀭𑀯𑀻 𑀭𑀸𑀚𑀸, 𑀭𑀸𑀚𑀸𑀦𑀁 𑀲𑁄 𑀔𑀫𑀸𑀧𑀬𑀺;

𑀢𑁂𑀦 𑀲𑀜𑁆𑀜𑀸𑀧𑀺𑀢𑁄 𑀭𑀸𑀚𑀸, 𑀦𑀕𑀭𑀁𑀬𑁂𑀯 𑀆𑀕𑀫𑀺.

𑁨𑁫. 𑀭𑀸𑀚𑀸𑀦𑀁 𑀲𑀜𑁆𑀜𑀧𑁂𑀢𑁆𑀯𑀸 𑀲𑁄, 𑀫𑁂𑀖𑀯𑀡𑁆𑀡𑀸𑀪𑀬𑁄 𑀧𑀦;

𑀭𑀜𑁆𑀜𑀸 𑀲𑀳 𑀦 𑀆𑀕𑀜𑁆𑀙𑀺, 𑀤𑀩𑁆𑀩𑀲𑀫𑁆𑀪𑀸𑀭𑀓𑀸𑀭𑀡𑀸.

𑁨𑁬. 𑀯𑀮𑀪𑀸 𑀪𑀭𑀺𑀬𑀸 𑀭𑀜𑁆𑀜𑁄, 𑀏𑀓𑀁 𑀮𑁂𑀔𑀓𑀥𑀻𑀢𑀺𑀓𑀸;

𑀫𑀳𑀸𑀯𑀺𑀳𑀸𑀭𑀦𑀸𑀲𑀫𑁆𑀳𑀺, 𑀤𑀼𑀓𑁆𑀔𑀺𑀢𑀁 𑀢𑀁 𑀯𑀺𑀦𑀸𑀲𑀓𑀁.

𑁨𑁭. 𑀣𑁂𑀭𑀁 𑀫𑀸𑀭𑀸𑀧𑀬𑀺 𑀓𑀼𑀤𑁆𑀥𑀸, 𑀲𑀁𑀕𑀳𑁂𑀢𑁆𑀯𑀸𑀦 𑀯𑀟𑁆𑀠𑀓𑀺𑀁;

𑀣𑀽𑀧𑀸𑀭𑀸𑀫𑀁 𑀯𑀺𑀦𑀸𑀲𑁂𑀢𑀼𑀁, 𑀆𑀕𑀢𑀁 𑀤𑀼𑀝𑁆𑀞𑀫𑀸𑀦𑀲𑀁.

𑁨𑁮. 𑀫𑀸𑀭𑀸𑀧𑁂𑀢𑁆𑀯𑀸 𑀲𑀗𑁆𑀖𑀫𑀺𑀢𑁆𑀢-𑀢𑁆𑀣𑁂𑀭𑀁 𑀤𑀸𑀭𑀼𑀡𑀓𑀸𑀭𑀓𑀁;

𑀲𑁄𑀡𑀸𑀫𑀘𑁆𑀘𑀤𑀸𑀭𑀡𑀜𑁆𑀘, 𑀖𑀸𑀢𑀬𑀺𑀁𑀲𑀼 𑀅𑀲𑀜𑁆𑀜𑀓𑀸.

𑁨𑁯. 𑀆𑀦𑁂𑀢𑁆𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑀁, 𑀫𑁂𑀖𑀯𑀡𑁆𑀡𑀸𑀪𑀬𑁄 𑀢𑀼 𑀲𑁄;

𑀫𑀳𑀸𑀯𑀺𑀳𑀸𑀭𑁂𑀦𑁂𑀓𑀸𑀦𑀺, 𑀧𑀭𑀺𑀯𑁂𑀡𑀸𑀦𑀺 𑀓𑀸𑀭𑀬𑀺.

𑁩𑁦. 𑀅𑀪𑀬𑁂𑀦𑀪𑀬𑁄 𑀢𑀲𑁆𑀫𑀺𑀁, 𑀯𑀽𑀧𑀲𑀦𑁆𑀢𑁂 𑀢𑀼 𑀪𑀺𑀓𑁆𑀔𑀯𑁄;

𑀫𑀳𑀸𑀯𑀺𑀳𑀸𑀭𑀁 𑀯𑀸𑀲𑁂𑀲𑀼𑀁, 𑀆𑀕𑀦𑁆𑀢𑁆𑀯𑀸𑀦 𑀢𑀢𑁄 𑀢𑀢𑁄.

𑁩𑁧. 𑀭𑀸𑀚𑀸 𑀫𑀳𑀸𑀩𑁄𑀥𑀺𑀖𑀭𑁂, 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀢𑀼;

𑀓𑀸𑀭𑁂𑀢𑁆𑀯𑀸 𑀮𑁄𑀳𑀭𑀽𑀧𑀸𑀦𑀺, 𑀞𑀧𑀸𑀧𑁂𑀲𑀺 𑀤𑀼𑀯𑁂 𑀢𑀼 𑀲𑁄.

𑁩𑁨. 𑀤𑀓𑁆𑀔𑀺𑀡𑀸𑀭𑀸𑀫𑀯𑀸𑀲𑀺𑀫𑁆𑀳𑀺, 𑀓𑀼𑀳𑀓𑁂 𑀚𑀺𑀫𑁆𑀳𑀫𑀸𑀦𑀲𑁂;

𑀧𑀲𑀻𑀤𑀺𑀢𑁆𑀯𑀸 𑀧𑀸𑀧𑀫𑀺𑀢𑁆𑀢𑁂, 𑀢𑀺𑀲𑁆𑀲𑀢𑁆𑀣𑁂𑀭𑁂 𑀅𑀲𑀜𑁆𑀜𑀢𑁂.

𑁩𑁩. 𑀫𑀳𑀸𑀯𑀺𑀳𑀸𑀭𑀲𑀻𑀫𑀦𑁆𑀢𑁂, 𑀉𑀬𑁆𑀬𑀸𑀦𑁂 𑀚𑁄𑀢𑀺𑀦𑀸𑀫𑀓𑁂;

𑀚𑁂𑀢𑀯𑀦𑀯𑀺𑀳𑀸𑀭𑀁 𑀲𑁄, 𑀯𑀸𑀭𑀬𑀦𑁆𑀢𑁄𑀧𑀺 𑀓𑀸𑀭𑀬𑀺.

𑁩𑁪. 𑀢𑀢𑁄 𑀲𑀻𑀫𑀁 𑀲𑀫𑀼𑀕𑁆𑀖𑀸𑀢𑀼𑀁, 𑀪𑀺𑀓𑁆𑀔𑀼𑀲𑀗𑁆𑀖𑀫𑀬𑀸𑀘𑀺𑀲𑁄;

𑀅𑀤𑀸𑀢𑀼𑀓𑀸𑀫𑀸 𑀢𑀁 𑀪𑀺𑀓𑁆𑀔𑀽, 𑀯𑀺𑀳𑀸𑀭𑀫𑁆𑀳𑀸 𑀅𑀧𑀓𑁆𑀓𑀫𑀼𑀁.

𑁩𑁫. 𑀇𑀥 𑀲𑀻𑀫𑀸𑀲𑀫𑀼𑀕𑁆𑀖𑀸𑀢𑀁, 𑀧𑀭𑁂𑀳𑀺 𑀓𑀭𑀺𑀬𑀫𑀸𑀦𑀓𑀁;

𑀓𑁄𑀧𑁂𑀢𑀼𑀁 𑀪𑀺𑀓𑁆𑀔𑀯𑁄 𑀓𑁂𑀘𑀺, 𑀦𑀺𑀮𑀻𑀬𑀺𑀁𑀲𑀼 𑀢𑀳𑀺𑀁 𑀢𑀳𑀺𑀁.

𑁩𑁬. 𑀫𑀳𑀸𑀯𑀺𑀳𑀸𑀭𑁄 𑀦𑀯𑀫𑀸𑀲𑁂, 𑀏𑀯𑀁 𑀪𑀺𑀓𑁆𑀔𑀽𑀳𑀺 𑀯𑀚𑁆𑀚𑀺𑀢𑁄;

‘‘𑀲𑀫𑀼𑀕𑁆𑀖𑀸𑀢𑀁 𑀓𑀭𑀺𑀫𑁆𑀳𑀸’’𑀢𑀺-𑀧𑀭𑁂 𑀪𑀺𑀓𑁆𑀔𑀽 𑀅𑀫𑀜𑁆𑀜𑀺𑀲𑀼𑀁.

𑁩𑁭. 𑀢𑀢𑁄 𑀲𑀻𑀫𑀸𑀲𑀫𑀼𑀕𑁆𑀖𑀸𑀢𑁂, 𑀩𑁆𑀬𑀸𑀧𑀸𑀭𑁂 𑀧𑀭𑀺𑀦𑀺𑀝𑁆𑀞𑀺𑀢𑁂;

𑀫𑀳𑀸𑀯𑀺𑀳𑀸𑀭𑀁 𑀯𑀸𑀲𑁂𑀲𑀼𑀁, 𑀇𑀥𑀸𑀕𑀦𑁆𑀢𑁆𑀯𑀸𑀦 𑀪𑀺𑀓𑁆𑀔𑀯𑁄.

𑁩𑁮. 𑀢𑀲𑁆𑀲 𑀯𑀺𑀳𑀸𑀭𑀕𑀸𑀳𑀺𑀲𑁆𑀲, 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀘𑁄𑀤𑀦𑀸;

𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀆𑀲𑀺, 𑀪𑀽𑀢𑀢𑁆𑀣𑀁 𑀲𑀗𑁆𑀖𑀫𑀚𑁆𑀛𑀕𑀸.

𑁩𑁯. 𑀯𑀺𑀦𑀺𑀘𑁆𑀙𑀺𑀬 𑀫𑀳𑀸𑀫𑀘𑁆𑀘𑁄, 𑀢𑀣𑀸 𑀥𑀫𑁆𑀫𑀺𑀓𑀲𑀫𑁆𑀫𑀢𑁄;

𑀉𑀧𑁆𑀧𑀩𑁆𑀩𑀸𑀚𑁂𑀲𑀺 𑀥𑀫𑁆𑀫𑁂𑀦, 𑀢𑀁 𑀅𑀦𑀺𑀘𑁆𑀙𑀸𑀬 𑀭𑀸𑀚𑀺𑀦𑁄.

𑁪𑁦. 𑀲𑁄𑀬𑁂𑀯 𑀭𑀸𑀚𑀸 𑀓𑀸𑀭𑁂𑀲𑀺, 𑀯𑀺𑀳𑀸𑀭𑀁 𑀫𑀡𑀺𑀳𑀻𑀭𑀓𑀁;

𑀢𑀬𑁄 𑀯𑀺𑀳𑀸𑀭𑁂 𑀓𑀸𑀭𑁂𑀲𑀺, 𑀤𑁂𑀯𑀸𑀮𑀬𑀁 𑀯𑀺𑀦𑀸𑀲𑀺𑀬.

𑁪𑁧. 𑀕𑁄𑀓𑀡𑁆𑀡𑀁 𑀏𑀭𑀓𑀸𑀧𑀺𑀮𑁆𑀮𑀁, 𑀓𑀮𑀦𑁆𑀤𑀩𑁆𑀭𑀸𑀳𑁆𑀫𑀡𑀕𑀸𑀫𑀓𑁂;

𑀫𑀺𑀕𑀕𑀸𑀫𑀯𑀺𑀳𑀸𑀭𑀜𑁆𑀘, 𑀕𑀗𑁆𑀕𑀲𑁂𑀦𑀓𑀧𑀩𑁆𑀩𑀢𑀁.

𑁪𑁨. 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬𑀸𑀣, 𑀥𑀸𑀢𑀼𑀲𑁂𑀦𑀜𑁆𑀘 𑀧𑀩𑁆𑀩𑀢𑀁;

𑀭𑀸𑀚𑀸 𑀫𑀳𑀸𑀯𑀺𑀳𑀸𑀭𑀜𑁆𑀘, 𑀓𑁄𑀓𑀯𑀸𑀢𑀫𑁆𑀳𑀺 𑀓𑀸𑀭𑀬𑀺.

𑁪𑁩. 𑀭𑀽𑀧𑀸𑀭𑀫𑁆𑀫𑀯𑀺𑀳𑀸𑀭𑀜𑁆𑀘, 𑀘𑀽𑀴𑀯𑀺𑀝𑁆𑀝𑀜𑁆𑀘 𑀓𑀸𑀭𑀬𑀺;

𑀉𑀢𑁆𑀢𑀭𑀸𑀪𑀬𑀲𑀯𑁆𑀳𑁂 𑀘, 𑀤𑀼𑀯𑁂 𑀪𑀺𑀓𑁆𑀔𑀽𑀦𑀼𑀧𑀲𑁆𑀲𑀬𑁂.

𑁪𑁪. 𑀓𑀸𑀮𑀯𑁂𑀴𑀓𑀬𑀓𑁆𑀔𑀲𑁆𑀲, 𑀞𑀸𑀦𑁂 𑀣𑀽𑀧𑀜𑁆𑀘 𑀓𑀸𑀭𑀬𑀺;

𑀤𑀻𑀧𑀫𑁆𑀳𑀺 𑀚𑀺𑀡𑁆𑀡𑀓𑀸𑀯𑀸𑀲𑁂, 𑀩𑀳𑀽 𑀘 𑀧𑀝𑀺𑀲𑀗𑁆𑀔𑀭𑀺.

𑁪𑁫. 𑀲𑀗𑁆𑀖𑀢𑁆𑀣𑁂𑀭𑀲𑀳𑀲𑁆𑀲𑀲𑁆𑀲, 𑀲𑀳𑀲𑁆𑀲𑀕𑁆𑀖𑀫𑀤𑀸𑀲𑀺 𑀲𑁄;

𑀣𑁂𑀭𑀤𑀸𑀦𑀜𑁆𑀘 𑀲𑀩𑁆𑀩𑁂𑀲𑀁, 𑀅𑀦𑀼𑀯𑀲𑁆𑀲𑀜𑁆𑀘 𑀘𑀻𑀯𑀭𑀁.

𑁪𑁬. 𑀅𑀦𑁆𑀦𑀧𑀸𑀦𑀸𑀤𑀺𑀤𑀸𑀦𑀲𑁆𑀲, 𑀧𑀭𑀺𑀘𑁆𑀙𑁂𑀤𑁄 𑀦 𑀯𑀺𑀚𑁆𑀚𑀢𑀺;

𑀲𑀼𑀪𑀺𑀓𑁆𑀔𑀢𑁆𑀣𑀸𑀬 𑀓𑀸𑀭𑁂𑀲𑀺, 𑀲𑁄’𑀯 𑀲𑁄𑀴𑀲 𑀯𑀸𑀧𑀺𑀬𑁄.

𑁪𑁭. 𑀫𑀡𑀺𑀳𑀻𑀭𑀫𑀳𑀸𑀯𑀸𑀧𑀺𑀁, 𑀚𑀮𑁆𑀮𑀼𑀭𑀁 𑀔𑀸𑀡𑀼𑀦𑀸𑀫𑀓𑀁;

𑀫𑀳𑀸𑀫𑀡𑀺𑀁 𑀓𑁄𑀓𑀯𑀸𑀢𑀁, 𑀫𑁄𑀭𑀓𑀧𑀭𑀓𑀯𑀸𑀧𑀺𑀓𑀁.

𑁪𑁮. 𑀓𑀼𑀩𑁆𑀩𑀸𑀳𑀓𑀁 𑀯𑀸𑀳𑀓𑀜𑁆𑀘, 𑀭𑀢𑁆𑀢𑀫𑀸𑀮𑀓𑀡𑁆𑀟𑀓𑀫𑁆𑀧𑀺 𑀘;

𑀢𑀺𑀲𑁆𑀲𑀯𑀟𑁆𑀠𑀫𑀸𑀦𑀓𑀜𑁆𑀘, 𑀯𑁂𑀴𑀗𑁆𑀕𑀯𑀺𑀝𑁆𑀞𑀺𑀓𑀫𑁆𑀧𑀺 𑀘.

𑁪𑁯. 𑀫𑀳𑀸𑀕𑀮𑁆𑀮𑀘𑀻𑀭𑀯𑀸𑀧𑀺𑀁, 𑀫𑀳𑀸𑀤𑀸𑀭𑀕𑀮𑁆𑀮𑀓𑀫𑁆𑀧𑀺 𑀘;

𑀓𑀸𑀴𑀧𑀸𑀲𑀸𑀡𑀯𑀸𑀧𑀺𑀜𑁆𑀘, 𑀇𑀫𑀸 𑀲𑁄𑀴𑀲 𑀯𑀸𑀧𑀺𑀬𑁄.

𑁫𑁦. 𑀕𑀗𑁆𑀕𑀸𑀬 𑀧𑀩𑁆𑀩𑀯𑀯𑁆𑀳𑀁𑀲𑁄, 𑀫𑀳𑀸𑀫𑀸𑀢𑀺𑀜𑁆𑀘 𑀓𑀸𑀭𑀬𑀺;

𑀏𑀯𑀁 𑀧𑀼𑀜𑁆𑀜𑀫𑀧𑀼𑀜𑁆𑀜𑀜𑁆𑀘, 𑀲𑀼𑀩𑀳𑀼𑀁 𑀲𑁄 𑀉𑀧𑀸𑀘𑀺𑀦𑀻𑀢𑀺.

𑁫𑁧. 𑀅𑀲𑀸𑀥𑀼𑀲𑀗𑁆𑀕𑀫𑁂𑀦𑁂𑀯𑀁, 𑀬𑀸𑀯𑀚𑀻𑀯𑀁 𑀲𑀼𑀪𑀸𑀲𑀼𑀪𑀁;

𑀓𑀢𑁆𑀯𑀸 𑀕𑀢𑁄 𑀬𑀣𑀸𑀓𑀫𑁆𑀫𑀁, 𑀲𑁄 𑀫𑀳𑀸𑀲𑁂𑀦𑀪𑀽𑀧𑀢𑀺.

𑁫𑁨. 𑀢𑀲𑁆𑀫𑀸 𑀅𑀲𑀸𑀥𑀼𑀲𑀁𑀲𑀕𑁆𑀕𑀁, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀺𑀬;

𑀅𑀳𑀺𑀁 𑀯𑀸’𑀲𑀺 𑀯𑀺𑀲𑀁 𑀔𑀺𑀧𑁆𑀧𑀁, 𑀓𑀭𑁂𑀬𑁆𑀬’𑀢𑁆𑀣𑀳𑀺𑀢𑀁 𑀩𑀼𑀥𑁄.

𑁫𑁩. 𑀅𑀳𑀼 𑀭𑀸𑀚𑀸 𑀲𑀺𑀭𑀺𑀫𑁂𑀖-𑀯𑀡𑁆𑀡𑁄 𑀢𑀲𑁆𑀲 𑀲𑀼𑀢𑁄 𑀢𑀢𑁄;

𑀯𑀦𑁆𑀥𑀸𑀢𑀸 𑀯𑀺𑀬 𑀮𑁄𑀓𑀲𑁆𑀲, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑁄.

𑁫𑁪. 𑀫𑀳𑀸𑀲𑁂𑀦𑁂𑀦 𑀧𑀸𑀧𑀸𑀦𑀁, 𑀯𑀲𑀕𑁂𑀦 𑀯𑀺𑀦𑀸𑀲𑀺𑀢𑁂;

𑀫𑀳𑀸𑀯𑀺𑀳𑀸𑀭𑁂 𑀲𑀩𑁆𑀩𑁂𑀧𑀺, 𑀲𑀦𑁆𑀦𑀺𑀧𑀸𑀢𑀺𑀬 𑀪𑀺𑀓𑁆𑀔𑀯𑁄.

𑁫𑁫. 𑀉𑀧𑀲𑀗𑁆𑀓𑀫𑁆𑀫 𑀯𑀦𑁆𑀤𑀺𑀢𑁆𑀯𑀸, 𑀦𑀺𑀲𑀺𑀦𑁆𑀦𑁄 𑀧𑀼𑀘𑁆𑀙𑀺 𑀲𑀸𑀤𑀭𑁄;

‘‘𑀧𑀺𑀢𑀭𑀸 𑀲𑀗𑁆𑀖𑀫𑀺𑀢𑁆𑀢𑀲𑁆𑀲, 𑀲𑀳𑀸𑀬𑁂𑀦 𑀯𑀺𑀦𑀸𑀲𑀺𑀢𑀁.

𑁫𑁬. 𑀓𑀺𑀁 𑀓𑀺𑀫𑁂𑀯𑀸’’𑀢𑀺 𑀆𑀳𑀁𑀲𑀼, 𑀪𑀺𑀓𑁆𑀔𑀯𑁄 𑀢𑀁 𑀦𑀭𑀺𑀲𑁆𑀲𑀭𑀁;

‘‘𑀲𑀻𑀫𑀸𑀬𑀼𑀕𑁆𑀖𑀸𑀝𑀦𑀁 𑀓𑀸𑀢𑀼𑀁, 𑀯𑀸𑀬𑀫𑀺𑀢𑁆𑀯𑀸𑀧𑀺 𑀢𑁂 𑀧𑀺𑀢𑀸.

𑁫𑁭. 𑀦𑀸𑀲𑀓𑁆𑀔𑀺 𑀅𑀦𑁆𑀢𑁄𑀲𑀻𑀫𑀸𑀬𑀁, 𑀪𑀺𑀓𑁆𑀔𑀽𑀦𑀁 𑀯𑀺𑀚𑁆𑀚𑀫𑀸𑀦𑀢𑁄;

𑀪𑀽𑀫𑀺𑀕𑀩𑁆𑀪𑀦𑀺𑀮𑀻𑀦𑀸𑀳𑀺, 𑀲𑀢𑁆𑀢𑀸𑀲𑀼𑀁 𑀏𑀢𑁆𑀣 𑀪𑀺𑀓𑁆𑀔𑀯𑁄.

𑁫𑁮. 𑀅𑀫𑀘𑁆𑀘𑁄 𑀲𑁄𑀡𑀸𑀫𑀘𑁆𑀘𑁄 𑀘, 𑀲𑀗𑁆𑀖𑀫𑀺𑀢𑁆𑀢𑁄 𑀘 𑀧𑀸𑀧𑀺𑀬𑁄;

𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸𑀦, 𑀅𑀧𑀼𑀜𑁆𑀜𑀁 𑀢𑁂𑀦 𑀓𑀸𑀭𑀬𑀼𑀁.

𑁫𑁯. 𑀪𑀺𑀦𑁆𑀤𑀺𑀢𑁆𑀯𑀸 𑀮𑁄𑀳𑀧𑀸𑀲𑀸𑀤𑀁, 𑀲𑀢𑁆𑀢𑀪𑀽𑀫𑀓𑀫𑀼𑀢𑁆𑀢𑀫𑀁;

𑀖𑀭𑁂 𑀦𑀸𑀦𑀧𑁆𑀧𑀓𑀸𑀭𑁂 𑀘, 𑀇𑀢𑁄’𑀪𑀬𑀕𑀺𑀭𑀺𑀁 𑀦𑀬𑀼𑀁.

𑁬𑁦. 𑀫𑀸𑀲𑀓𑁂 𑀘𑀢𑀼𑀩𑀼𑀤𑁆𑀥𑁂𑀳𑀺, 𑀦𑀺𑀯𑀼𑀢𑁆𑀣𑁂 𑀘𑁂𑀢𑀺𑀬𑀗𑁆𑀕𑀡𑁂;

𑀯𑀧𑀸𑀧𑁂𑀲𑀼𑀜𑁆𑀘 𑀤𑀼𑀧𑁆𑀧𑀜𑁆𑀜𑀸, 𑀧𑀲𑁆𑀲 𑀩𑀸𑀮𑀲𑀫𑀸𑀕𑀫𑀁’’.

𑁬𑁧. 𑀢𑀁 𑀲𑀼𑀢𑁆𑀯𑀸 𑀧𑀺𑀢𑀼𑀓𑀫𑁆𑀫𑀁 𑀲𑁄, 𑀦𑀺𑀩𑁆𑀩𑀺𑀦𑁆𑀦𑁄 𑀩𑀸𑀮𑀲𑀗𑁆𑀕𑀫𑁂;

𑀧𑀺𑀢𑀭𑀸 𑀦𑀸𑀲𑀺𑀢𑀁 𑀢𑀢𑁆𑀣, 𑀲𑀩𑁆𑀩𑀁 𑀧𑀸𑀓𑀢𑀺𑀓𑀁 𑀅𑀓𑀸.

𑁬𑁨. 𑀮𑁄𑀳𑀧𑀸𑀲𑀸𑀤𑀫𑀕𑀤𑁄’𑀯, 𑀓𑀸𑀲𑀺 𑀧𑀸𑀲𑀸𑀤𑀫𑀼𑀢𑁆𑀢𑀫𑀁;

𑀭𑀜𑁆𑀜𑁄 𑀫𑀳𑀸𑀧𑀦𑀸𑀤𑀲𑁆𑀲, 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀪𑀽𑀢𑀮𑁂.

𑁬𑁩. 𑀧𑀭𑀺𑀯𑁂𑀡𑀸𑀦𑀺 𑀲𑀩𑁆𑀩𑀸𑀦𑀺, 𑀦𑀸𑀲𑀺𑀢𑀸𑀦𑀺 𑀦𑀺𑀯𑁂𑀲𑀬𑀺;

𑀪𑁄𑀕𑁂 𑀆𑀭𑀸𑀫𑀺𑀓𑀸𑀦𑀜𑁆𑀘, 𑀬𑀣𑀸𑀞𑀸𑀦𑁂 𑀞𑀧𑁂𑀲𑀺 𑀲𑁄.

𑁬𑁪. 𑀧𑀺𑀢𑀭𑀸 𑀧𑀘𑁆𑀘𑀬𑀸𑀦𑀜𑁆𑀘, 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀺𑀩𑀼𑀤𑁆𑀥𑀺𑀦𑀸;

𑀙𑀺𑀤𑁆𑀤𑀸𑀯𑀸𑀲𑀁 𑀖𑀦𑀸𑀯𑀸𑀲𑀁, 𑀯𑀺𑀳𑀸𑀭𑀁’𑀓𑀸𑀲𑀺 𑀩𑀼𑀤𑁆𑀥𑀺𑀫𑀸.

𑁬𑁫. 𑀓𑀸𑀭𑀺𑀢𑁂 𑀧𑀺𑀢𑀭𑀸 𑀚𑁄𑀢𑀺 𑀯𑀦𑁂𑀘𑁂’𑀲𑁄 𑀯𑀺𑀳𑀸𑀭𑀓𑁂;

𑀓𑀫𑁆𑀫𑀁 𑀯𑀺𑀧𑁆𑀧𑀓𑀢𑀁 𑀲𑀩𑁆𑀩𑀁, 𑀦𑀺𑀝𑁆𑀞𑀸𑀧𑁂𑀲𑀺 𑀦𑀭𑀺𑀲𑁆𑀲𑀭𑁄.

𑁬𑁬. 𑀣𑁂𑀭𑀲𑁆𑀲𑀸’𑀣 𑀫𑀳𑀺𑀦𑁆𑀤𑀲𑁆𑀲, 𑀲𑀫𑀡𑀺𑀦𑁆𑀤𑀲𑁆𑀲 𑀲𑀼𑀦𑀼𑀦𑁄;

𑀲𑀼𑀢𑁆𑀯𑀸𑀦 𑀫𑀦𑀼𑀚𑀺𑀦𑁆𑀤𑁄 𑀲𑁄, 𑀧𑀯𑀢𑁆𑀢𑀺𑀁 𑀲𑀩𑁆𑀩𑀫𑀸𑀤𑀺𑀢𑁄.

𑁬𑁭. 𑀧𑀲𑀻𑀤𑀺𑀢𑁆𑀯𑀸 𑀕𑀼𑀡𑁂 𑀢𑀲𑁆𑀲, 𑀭𑀸𑀚𑀸 𑀤𑀺𑀧𑁆𑀧𑀧𑀲𑀸𑀤𑀓𑁂;

‘‘𑀇𑀲𑁆𑀲𑀭𑁄 𑀯𑀢 𑀤𑀻𑀧𑀲𑁆𑀲, 𑀣𑁂𑀭𑁄’’ 𑀇𑀢𑀺 𑀯𑀺𑀘𑀺𑀦𑁆𑀢𑀺𑀬.

𑁬𑁮. 𑀧𑀝𑀺𑀩𑀺𑀫𑁆𑀩𑀁 𑀲𑀼𑀯𑀡𑁆𑀡𑀲𑁆𑀲, 𑀓𑀢𑁆𑀯𑀸 𑀢𑀫𑁆𑀫𑀸𑀡 𑀦𑀺𑀲𑁆𑀲𑀺𑀢𑀁;

𑀧𑀼𑀩𑁆𑀩𑀓𑀢𑁆𑀢𑀺𑀓𑀫𑀸𑀲𑀲𑁆𑀲, 𑀧𑀩𑁆𑀩𑀧𑀓𑁆𑀔𑁂 𑀢𑀼 𑀲𑀢𑁆𑀢𑀫𑁂.

𑁬𑁯. 𑀤𑀺𑀦𑁂 𑀦𑁂𑀢𑁆𑀯𑀸 𑀘𑁂𑀢𑀺𑀬𑀫𑁆𑀩-𑀣𑀮𑁂 𑀣𑁂𑀭𑀫𑁆𑀩𑀲𑀜𑁆𑀜𑀺𑀢𑁂;

𑀢𑀢𑁆𑀭𑀝𑁆𑀞𑀫𑁂 𑀦𑀺𑀯𑀸𑀲𑁂𑀢𑁆𑀯𑀸, 𑀢𑀢𑁄 𑀢𑀼 𑀦𑀯𑀫𑁂 𑀧𑀦.

𑁭𑁦. 𑀫𑀳𑀸𑀲𑁂𑀦𑀁 𑀕𑀳𑁂𑀢𑁆𑀯𑀸 𑀲𑁄, 𑀤𑁂𑀯𑀲𑁂𑀦𑀸 𑀲𑀫𑀽𑀧𑀫𑀁;

𑀑𑀭𑁄𑀥𑁂 𑀦𑀕𑀭𑁂 𑀘𑁂𑀯, 𑀕𑁂𑀳𑀭𑀓𑁆𑀔𑀡𑀓𑁂 𑀯𑀺𑀦𑀸.

𑁭𑁧. 𑀮𑀁𑀓𑀸𑀤𑀻𑀧𑁂 𑀘 𑀲𑀓𑀮𑁂, 𑀲𑀩𑁆𑀩𑁂 𑀆𑀤𑀸𑀬 𑀪𑀺𑀓𑁆𑀔𑀯𑁄;

𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀘, 𑀦𑀕𑀭𑁂 𑀘𑀸𑀭𑀓𑀝𑁆𑀞𑀺𑀢𑁂.

𑁭𑁨. 𑀧𑀝𑁆𑀞𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁, 𑀅𑀬𑀜𑁆𑀘𑀸𑀔𑀺𑀮𑀧𑀸𑀡𑀺𑀦𑀁;

𑀧𑀽𑀚𑀁 𑀲𑀩𑁆𑀩𑁄𑀧𑀳𑀸𑀭𑁂𑀳𑀺, 𑀓𑀭𑁄𑀦𑁆𑀢𑁄 𑀘 𑀅𑀦𑀽𑀧𑀫𑀁.

𑁭𑁩. 𑀧𑀘𑁆𑀘𑀼𑀕𑁆𑀕𑀫𑀦𑀫𑁂𑀢𑀲𑁆𑀲, 𑀤𑀻𑀧𑀲𑀢𑁆𑀣𑀼𑀲𑁆𑀲 𑀲𑀢𑁆𑀣𑀼𑀦𑁄;

𑀯𑀭𑀧𑀼𑀢𑁆𑀢𑀲𑁆𑀲 𑀲𑁄 𑀓𑀢𑁆𑀯𑀸, 𑀤𑁂𑀯𑀭𑀸𑀚𑀸’𑀯 𑀲𑀢𑁆𑀣𑀼𑀦𑁄.