𑀘𑀢𑀼𑀢𑁆𑀢𑀺𑀁𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀏𑀓𑀸𑀤𑀲𑀭𑀸𑀚𑀤𑀻𑀧𑀦𑁄

𑁧. 𑀢𑀤𑀘𑁆𑀘𑀬𑁂 𑀫𑀳𑀸𑀘𑀽𑀮𑀻-𑀫𑀳𑀸𑀢𑀺𑀲𑁆𑀲𑁄 𑀅𑀓𑀸𑀭𑀬𑀺;

𑀭𑀚𑁆𑀚𑀁 𑀘𑀼𑀤𑁆𑀤𑀲𑀯𑀲𑁆𑀲𑀸𑀦𑀺, 𑀥𑀫𑁆𑀫𑁂𑀦 𑀘 𑀲𑀫𑁂𑀦 𑀘.

𑁨. 𑀲𑀳𑀢𑁆𑀣𑁂𑀦 𑀓𑀢𑀁 𑀤𑀸𑀦𑀁, 𑀲𑁄 𑀲𑀼𑀢𑁆𑀯𑀸𑀦 𑀫𑀳𑀧𑁆𑀨𑀮𑀁;

𑀧𑀞𑀫𑁂𑀬𑁂𑀯 𑀯𑀲𑁆𑀲𑀫𑁆𑀳𑀺, 𑀕𑀦𑁆𑀢𑁆𑀯𑀸 𑀅𑀜𑁆𑀜𑀸𑀢𑀯𑁂𑀲𑀯𑀸.

𑁩. 𑀓𑀢𑁆𑀯𑀸𑀦 𑀲𑀸𑀮𑀺𑀮𑀯𑀦𑀁, 𑀮𑀤𑁆𑀥𑀸𑀬 𑀪𑀢𑀺𑀬𑀸 𑀢𑀢𑁄;

𑀧𑀺𑀡𑁆𑀟𑀧𑀸𑀢𑀁 𑀫𑀳𑀸𑀲𑀼𑀫𑁆𑀫-𑀣𑁂𑀭𑀲𑁆𑀲𑀸’𑀤𑀸 𑀫𑀳𑀻𑀧𑀢𑀺.

𑁪. 𑀲𑁄𑀡𑁆𑀡𑀕𑀺𑀭𑀺𑀫𑁆𑀳𑀺 𑀧𑀼𑀦 𑀲𑁄, 𑀢𑀻𑀡𑀺𑀯𑀲𑁆𑀲𑀸𑀦𑀺 𑀔𑀢𑁆𑀢𑀺𑀬𑁄;

𑀕𑀼𑀴𑀬𑀦𑁆𑀢𑀫𑁆𑀳𑀺 𑀓𑀢𑁆𑀯𑀸𑀦, 𑀪𑀢𑀺𑀁𑀮𑀤𑁆𑀥𑀸 𑀕𑀼𑀴𑁂 𑀢𑀢𑁄.

𑁫. 𑀢𑁂 𑀕𑀼𑀴𑁂 𑀆𑀳𑀭𑀸𑀧𑁂𑀢𑁆𑀯𑀸, 𑀧𑀼𑀭𑀁 𑀆𑀕𑀫𑁆𑀫 𑀪𑀽𑀧𑀢𑀺;

𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀤𑀸𑀲𑀺, 𑀫𑀳𑀸𑀤𑀸𑀦𑀁 𑀫𑀳𑀻𑀧𑀢𑀺.

𑁬. 𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲, 𑀅𑀤𑀸 𑀅𑀘𑁆𑀙𑀸𑀤𑀦𑀸𑀦𑀺 𑀘;

𑀤𑁆𑀯𑀸𑀤𑀲𑀦𑁆𑀦𑀁 𑀲𑀳𑀲𑁆𑀲𑀸𑀦𑀁, 𑀪𑀺𑀓𑁆𑀔𑀽𑀦𑀻𑀦𑀁 𑀢𑀣𑁂𑀯 𑀘.

𑁭. 𑀓𑀸𑀭𑀬𑀺𑀢𑁆𑀯𑀸 𑀫𑀳𑀻𑀧𑀸𑀮𑁄, 𑀯𑀺𑀳𑀸𑀭𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁;

𑀲𑀝𑁆𑀞𑀺𑀪𑀺𑀓𑁆𑀔𑀼 𑀲𑀳𑀲𑁆𑀲𑀲𑁆𑀲, 𑀢𑀺𑀘𑀻𑀯𑀭𑀫𑀤𑀸𑀧𑀬𑀺.

𑁮. 𑀢𑀺𑀁𑀲 𑀲𑀳𑀲𑁆𑀲 𑀲𑀗𑁆𑀔𑀸𑀦𑀁, 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀤𑀸𑀧𑀬𑀺;

𑀫𑀡𑁆𑀟𑀯𑀸𑀧𑀺 𑀯𑀺𑀳𑀸𑀭𑀁 𑀲𑁄, 𑀢𑀣𑀸 𑀅𑀪𑀬𑀕𑀮𑁆𑀮𑀓𑀁.

𑁯. 𑀯𑀗𑁆𑀕𑀼𑀧𑀝𑁆𑀝𑀗𑁆𑀕𑀕𑀮𑁆𑀮𑀜𑁆𑀘, 𑀤𑀻𑀖𑀩𑀸𑀳𑀼𑀓𑀕𑀮𑁆𑀮𑀓𑀁;

𑀯𑀸𑀮𑀕𑀸𑀫 𑀯𑀺𑀳𑀸𑀭𑀜𑁆𑀘, 𑀭𑀸𑀚𑀸 𑀲𑁄𑀬𑁂𑀯 𑀓𑀸𑀭𑀬𑀺.

𑁧𑁦. 𑀏𑀯𑀁 𑀲𑀤𑁆𑀥𑀸𑀬 𑀲𑁄 𑀭𑀸𑀚𑀸, 𑀓𑀢𑁆𑀯𑀸 𑀧𑀼𑀜𑁆𑀜𑀸𑀦𑀺𑀦𑁂𑀓𑀥𑀸;

𑀘𑀢𑀼𑀤𑁆𑀤𑀲𑀦𑁆𑀦𑀁 𑀯𑀲𑁆𑀲𑀸𑀦𑀁, 𑀅𑀘𑁆𑀘𑀬𑁂𑀦 𑀤𑀺𑀯𑀁 𑀅𑀕𑀸.

𑁧𑁧. 𑀯𑀝𑁆𑀝𑀕𑀸𑀫𑀡𑀺𑀦𑁄 𑀧𑀼𑀢𑁆𑀢𑁄, 𑀘𑁄𑀭𑀦𑀸𑀕𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀫𑀳𑀸𑀘𑀽𑀴𑀺𑀲𑁆𑀲𑀭𑀚𑁆𑀚𑀫𑁆𑀳𑀺, 𑀘𑁄𑀭𑁄 𑀳𑀼𑀢𑁆𑀯𑀸 𑀘𑀭𑀺𑀢𑀤𑀸.

𑁧𑁨. 𑀫𑀳𑀸𑀘𑀽𑀴𑁂 𑀉𑀧𑀭𑀢𑁂, 𑀭𑀚𑁆𑀚𑀁 𑀓𑀸𑀭𑀬𑀺 𑀆𑀕𑀢𑁄;

𑀅𑀢𑁆𑀢𑀦𑁄 𑀘𑁄𑀭𑀓𑀸𑀮𑁂 𑀲𑁄, 𑀦𑀺𑀯𑀸𑀲𑀁 𑀬𑁂𑀲𑀼𑀦𑀸𑀮𑀪𑀺.

𑁧𑁩. 𑀅𑀝𑁆𑀞𑀭𑀲𑀯𑀺𑀳𑀸𑀭𑁂 𑀢𑁂, 𑀯𑀺𑀤𑁆𑀥𑀁𑀲𑀸𑀧𑁂𑀲𑀺 𑀤𑀼𑀫𑁆𑀫𑀢𑀺;

𑀭𑀚𑁆𑀚𑀁 𑀤𑁆𑀯𑀸𑀤𑀲𑀯𑀲𑁆𑀲𑀸𑀦𑀺, 𑀘𑁄𑀭𑀦𑀸𑀕𑁄 𑀅𑀓𑀸𑀭𑀬𑀺.

𑁧𑁪. 𑀮𑁄𑀓𑀦𑁆𑀢𑀭𑀺𑀓 𑀦𑀺𑀭𑀬𑀁, 𑀧𑀸𑀧𑁄𑀲𑁄𑀉𑀧𑀧𑀚𑁆𑀚𑀣;

𑀢𑀤𑀘𑁆𑀘𑀬𑁂 𑀫𑀳𑀸𑀘𑀽𑀴𑁆𑀳𑀺-𑀭𑀜𑁆𑀜𑁄 𑀧𑀼𑀢𑁆𑀢𑁄 𑀅𑀓𑀸𑀭𑀬𑀺.

𑁧𑁫. 𑀭𑀚𑁆𑀚𑀁 𑀢𑀻𑀡𑁂𑀯 𑀯𑀲𑁆𑀲𑀸𑀦𑀺, 𑀭𑀸𑀚𑀸𑀢𑀺𑀲𑁆𑀲𑁄’𑀢𑀺 𑀯𑀺𑀲𑁆𑀲𑀼𑀢𑁄;

𑀘𑁄𑀭𑀦𑀸𑀕𑀲𑁆𑀲 𑀤𑁂𑀯𑀻𑀢𑀼, 𑀯𑀻𑀲𑀫𑀁 𑀯𑀻𑀲𑀫𑀸𑀦𑀼𑀮𑀸.

𑁧𑁬. 𑀯𑀻𑀲𑀁 𑀤𑀢𑁆𑀯𑀸𑀦 𑀫𑀸𑀭𑁂𑀲𑀺, 𑀩𑀮𑀢𑁆𑀣𑁂𑀭𑀢𑁆𑀢𑀫𑀸𑀦𑀲𑀸;

𑀢𑀲𑁆𑀫𑀺𑀁𑀬𑁂𑀯𑀩𑀮𑀢𑁆𑀣𑁂𑀲𑀸, 𑀅𑀦𑀼𑀮𑀸𑀭𑀢𑁆𑀢𑀫𑀸𑀦𑀲𑀸.

𑁧𑁭. 𑀢𑀺𑀲𑁆𑀲𑀁 𑀯𑀻𑀲𑁂𑀦𑀖𑀸𑀢𑁂𑀢𑁆𑀯𑀸, 𑀢𑀲𑁆𑀲 𑀭𑀚𑁆𑀚𑀫𑀤𑀸𑀲𑀺𑀲𑀸;

𑀲𑀻𑀯𑁄 𑀦𑀸𑀫 𑀩𑀮𑀢𑁆𑀣𑁄𑀲𑁄, 𑀚𑁂𑀝𑁆𑀞𑀤𑁄𑀯𑀸𑀭𑀺𑀓𑁄 𑀢𑀳𑀺𑀁.

𑁧𑁮. 𑀓𑀢𑁆𑀯𑀸 𑀫𑀳𑁂𑀲𑀺𑀁 𑀅𑀦𑀼𑀮𑀁, 𑀯𑀲𑁆𑀲𑀁 𑀫𑀸𑀲𑀤𑁆𑀯𑀬𑀸’𑀘𑀺𑀓𑀁;

𑀭𑀚𑁆𑀚𑀁 𑀓𑀸𑀭𑁂𑀲𑀺 𑀦𑀕𑀭𑁂, 𑀯𑀝𑀼𑀓𑁂 𑀤𑀫𑀺𑀴𑁂’𑀦𑀼𑀮𑀸.

𑁧𑁯. 𑀭𑀢𑁆𑀢𑀸 𑀯𑀻𑀲𑁂𑀦 𑀢𑀁 𑀳𑀦𑁆𑀢𑁆𑀯𑀸, 𑀯𑀝𑀼𑀓𑁂 𑀭𑀚𑁆𑀚𑀫𑀧𑁆𑀧𑀬𑀺;

𑀯𑀝𑀼𑀓𑁄 𑀤𑀫𑀺𑀴𑁄 𑀲𑁄 𑀳𑀺, 𑀧𑀼𑀭𑁂 𑀦𑀕𑀭𑀯𑀟𑁆𑀠𑀓𑀻.

𑁨𑁦. 𑀫𑀳𑁂𑀲𑀺𑀁 𑀅𑀦𑀼𑀮𑀁 𑀓𑀢𑁆𑀯𑀸, 𑀯𑀲𑁆𑀲𑀁 𑀫𑀸𑀲𑀤𑁆𑀯𑀬𑀸𑀥𑀺𑀓𑀁;

𑀭𑀚𑁆𑀚𑀁 𑀓𑀸𑀭𑁂𑀲𑀺 𑀦𑀕𑀭𑁂, 𑀅𑀦𑀼𑀮𑀸 𑀢𑀢𑁆𑀣 𑀆𑀕𑀢𑀁.

𑁨𑁧. 𑀧𑀲𑁆𑀲𑀺𑀢𑁆𑀯𑀸 𑀤𑀸𑀭𑀼𑀪𑀢𑀺𑀓𑀁, 𑀢𑀲𑁆𑀫𑀺𑀁 𑀲𑀸𑀭𑀢𑁆𑀢𑀫𑀸𑀦𑀲𑀸;

𑀳𑀦𑁆𑀢𑁆𑀯𑀸 𑀯𑀺𑀲𑁂𑀦 𑀯𑀝𑀼𑀓𑀁, 𑀢𑀲𑁆𑀲 𑀭𑀚𑁆𑀚𑀁 𑀲𑀫𑀧𑁆𑀧𑀬𑀺.

𑁨𑁨. 𑀤𑀸𑀭𑀼𑀪𑀢𑀺𑀓𑀢𑀺𑀲𑁆𑀲𑁄 𑀲𑁄, 𑀫𑀳𑁂𑀲𑀺𑀁 𑀓𑀭𑀺𑀬𑀸𑀦𑀼𑀮𑀁;

𑀏𑀓𑀫𑀸𑀲𑀸𑀥𑀺𑀓𑀁 𑀯𑀲𑁆𑀲𑀁, 𑀧𑀼𑀭𑁂 𑀭𑀚𑁆𑀚𑀫𑀓𑀸𑀭𑀬𑀺.

𑁨𑁩. 𑀓𑀸𑀭𑁂𑀲𑀺 𑀲𑁄 𑀧𑁄𑀓𑁆𑀔𑀭𑀡𑀺𑀁, 𑀫𑀳𑀸𑀫𑁂𑀖𑀯𑀦𑁂 𑀮𑀳𑀼𑀁;

𑀦𑀺𑀮𑀻𑀬𑁂 𑀦𑀸𑀫 𑀤𑀫𑀺𑀴𑁂, 𑀲𑀸 𑀧𑀼𑀭𑁄𑀳𑀺𑀢𑀩𑁆𑀭𑀸𑀳𑁆𑀫𑀡𑁂.

𑁨𑁪. 𑀭𑀸𑀕𑁂𑀦 𑀭𑀢𑁆𑀢𑀸 𑀅𑀦𑀼𑀮𑀸, 𑀢𑁂𑀦 𑀲𑀁𑀯𑀸𑀲𑀓𑀸𑀫𑀺𑀦𑀻;

𑀤𑀸𑀭𑀼𑀪𑀢𑀺𑀓𑀢𑀺𑀲𑁆𑀲𑀁𑀢𑀁, 𑀯𑀻𑀲𑀁 𑀤𑀢𑁆𑀯𑀸𑀦 𑀖𑀸𑀢𑀺𑀬.

𑁨𑁫. 𑀦𑀺𑀮𑀻𑀬𑀲𑁆𑀲 𑀅𑀤𑀸 𑀭𑀚𑁆𑀚𑀁, 𑀲𑁄𑀧𑀺 𑀦𑀺𑀮𑀻𑀬𑀩𑁆𑀭𑀸𑀳𑁆𑀫𑀡𑁄;

𑀢𑀁 𑀫𑀳𑁂𑀲𑀺𑀁 𑀓𑀭𑀺𑀢𑁆𑀯𑀸𑀦, 𑀦𑀺𑀘𑁆𑀘𑀁 𑀢𑀸𑀬 𑀉𑀧𑀝𑁆𑀞𑀺𑀢𑁄.

𑁨𑁬. 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀙𑀫𑁆𑀫𑀸𑀲𑀁, 𑀅𑀦𑀼𑀭𑀸𑀥𑀧𑀼𑀭𑁂 𑀇𑀥;

𑀤𑁆𑀯𑀢𑁆𑀢𑀺𑀁𑀲𑀸𑀬 𑀩𑀮𑀢𑁆𑀣𑁂𑀳𑀺, 𑀯𑀢𑁆𑀣𑀼𑀓𑀸𑀫𑀸 𑀬𑀣𑀸𑀭𑀼𑀘𑀺𑀁.

𑁨𑁭. 𑀯𑀻𑀲𑁂𑀦 𑀢𑀁 𑀖𑀸𑀢𑀬𑀺𑀢𑁆𑀯𑀸, 𑀦𑀺𑀮𑀻𑀬𑀁 𑀔𑀢𑁆𑀢𑀺𑀬𑀸𑀦𑀼𑀮𑀸;

𑀭𑀚𑁆𑀚𑀁 𑀲𑀸 𑀅𑀦𑀼𑀮𑀸𑀤𑁂𑀯𑀻, 𑀘𑀢𑀼𑀫𑀸𑀲𑀫𑀓𑀸𑀭𑀬𑀺.

𑁨𑁮. 𑀫𑀳𑀸𑀘𑀽𑀴𑀺𑀓𑀭𑀸𑀚𑀲𑁆𑀲, 𑀧𑀼𑀢𑁆𑀢𑁄 𑀤𑀼𑀢𑀺𑀬𑀓𑁄 𑀧𑀦;

𑀓𑀽𑀝𑀓𑀡𑁆𑀡𑀢𑀺𑀲𑁆𑀲𑁄 𑀦𑀸𑀫, 𑀪𑀻𑀢𑁄 𑀲𑁄’𑀦𑀼𑀮𑀤𑁂𑀯𑀺𑀬𑀸.

𑁨𑁯. 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸, 𑀓𑀸𑀮𑁂 𑀧𑀢𑁆𑀢𑀩𑀮𑁄 𑀇𑀥;

𑀆𑀕𑀦𑁆𑀢𑁆𑀯𑀸 𑀖𑀸𑀢𑀬𑀺𑀢𑁆𑀯𑀸, 𑀢𑀁 𑀅𑀦𑀼𑀮𑀁 𑀤𑀼𑀝𑁆𑀞𑀫𑀸𑀦𑀲𑀁.

𑁩𑁦. 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀤𑁆𑀯𑀸𑀯𑀻𑀲𑀁, 𑀯𑀲𑁆𑀲𑀸𑀦𑀺 𑀫𑀦𑀼𑀚𑀸𑀥𑀺𑀧𑁄;

𑀫𑀳𑀸𑀉𑀧𑁄𑀲𑀣𑀸𑀕𑀸𑀭𑀁, 𑀅𑀓𑀸 𑀘𑁂𑀢𑀺𑀬𑀧𑀩𑁆𑀩𑀢𑁂.

𑁩𑁧. 𑀖𑀭𑀲𑁆𑀲 𑀢𑀲𑁆𑀲 𑀧𑀼𑀭𑀢𑁄, 𑀲𑀺𑀮𑀸𑀣𑀽𑀧𑀫𑀓𑀸𑀭𑀬𑀺;

𑀩𑁄𑀥𑀺𑀁 𑀭𑁄𑀧𑁂𑀲𑀺 𑀢𑀢𑁆𑀣𑁂𑀯, 𑀲𑁄𑀯 𑀘𑁂𑀢𑀺𑀬𑁂𑀧𑀩𑁆𑀩𑀢𑁂.

𑁩𑁨. 𑀧𑁂𑀮𑀕𑀸𑀫𑀯𑀺𑀳𑀸𑀭𑀜𑁆𑀘, 𑀅𑀦𑁆𑀢𑀭𑀕𑀗𑁆𑀕𑀸𑀬 𑀓𑀸𑀭𑀬𑀺;

𑀢𑀢𑁆𑀣𑁂𑀯 𑀯𑀡𑁆𑀡𑀓𑀁 𑀦𑀸𑀫, 𑀫𑀳𑀸𑀫𑀸𑀢𑀺𑀓𑀫𑁂𑀯 𑀘.

𑁩𑁩. 𑀅𑀫𑁆𑀩𑀤𑀼𑀕𑁆𑀕𑀫𑀳𑀸𑀯𑀸𑀧𑀺𑀁, 𑀪𑀬𑁄𑀮𑀼𑀧𑁆𑀧𑀮𑀫𑁂𑀯 𑀘;

𑀲𑀢𑁆𑀢𑀳𑀢𑁆𑀣𑀼𑀘𑁆𑀘𑀧𑀸𑀓𑀸𑀭𑀁, 𑀧𑀼𑀭𑀲𑁆𑀲 𑀧𑀭𑀺𑀔𑀁 𑀢𑀣𑀸.

𑁩𑁪. 𑀫𑀳𑀸𑀯𑀢𑁆𑀣𑀼𑀫𑁆𑀳𑀺 𑀅𑀦𑀼𑀮𑀁, 𑀛𑀸𑀧𑀬𑀺𑀢𑁆𑀯𑀸 𑀅𑀲𑀜𑁆𑀜𑀢𑀁;

𑀅𑀧𑀦𑀻𑀬 𑀢𑀢𑁄 𑀣𑁄𑀓𑀁, 𑀫𑀳𑀸𑀯𑀢𑁆𑀣𑀼𑀫𑀓𑀸𑀭𑀬𑀺.

𑁩𑁫. 𑀧𑀤𑀼𑀫𑀲𑁆𑀲𑀭𑀯𑀦𑀼𑀬𑁆𑀬𑀸𑀦𑀁, 𑀦𑀕𑀭𑁂𑀬𑁂𑀯 𑀓𑀸𑀭𑀬𑀺;

𑀫𑀢𑀸’𑀲𑁆𑀲 𑀤𑀦𑁆𑀢𑁂 𑀥𑁄𑀯𑀺𑀢𑁆𑀯𑀸, 𑀧𑀩𑁆𑀩𑀚𑀺 𑀚𑀺𑀦𑀲𑀸𑀲𑀦𑁂.

𑁩𑁬. 𑀓𑀼𑀮𑀲𑀦𑁆𑀢𑀓𑁂 𑀖𑀭𑀝𑁆𑀞𑀸𑀦𑁂, 𑀫𑀸𑀢𑀼𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁;

𑀓𑀸𑀭𑁂𑀲𑀺 𑀤𑀦𑁆𑀢𑀕𑁂𑀳𑀦𑁆𑀢𑀺, 𑀯𑀺𑀲𑁆𑀲𑀢𑁄 𑀆𑀲𑀺 𑀢𑁂𑀦 𑀲𑁄.

𑁩𑁭. 𑀢𑀤𑀘𑁆𑀘𑀬𑁂 𑀢𑀲𑁆𑀲 𑀧𑀼𑀢𑁆𑀢𑁄, 𑀦𑀸𑀫𑀓𑁄 𑀪𑀸𑀢𑀺𑀓𑀸𑀪𑀬𑁄;

𑀅𑀝𑁆𑀞𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀔𑀢𑁆𑀢𑀺𑀬𑁄.

𑁩𑁮. 𑀫𑀳𑀸𑀤𑀸𑀝𑁆𑀞𑀺𑀓𑀭𑀸𑀚𑀲𑁆𑀲, 𑀪𑀸𑀢𑀺𑀓𑀢𑁆𑀢𑀸𑀫𑀳𑀻𑀧𑀢𑀺;

𑀤𑀻𑀧𑁂 ‘‘𑀪𑀸𑀢𑀺𑀓𑀭𑀸𑀚𑀸’’𑀢𑀺, 𑀧𑀸𑀓𑀝𑁄 𑀆𑀲𑀺 𑀥𑀫𑁆𑀫𑀺𑀓𑁄.

𑁩𑁯. 𑀓𑀸𑀭𑁂𑀲𑀺 𑀮𑁄𑀳𑀧𑀸𑀲𑀸𑀤𑁂, 𑀧𑀝𑀺𑀲𑀗𑁆𑀔𑀸𑀭𑀫𑁂𑀢𑁆𑀣𑀲𑁄;

𑀫𑀳𑀸𑀣𑀽𑀧𑁂 𑀯𑁂𑀤𑀺𑀓𑀸 𑀤𑁆𑀯𑁂, 𑀣𑀽𑀧𑀯𑁆𑀳𑁂’𑀧𑁄𑀲𑀣𑀯𑁆𑀳𑀬𑀁.

𑁪𑁦. 𑀅𑀢𑁆𑀢𑀦𑁄 𑀩𑀮𑀺𑀫𑀼𑀚𑁆𑀛𑀺𑀢𑁆𑀯𑀸, 𑀦𑀕𑀭𑀲𑁆𑀲 𑀲𑀫𑀦𑁆𑀢𑀢𑁄;

𑀭𑁄𑀧𑀸𑀧𑁂𑀢𑁆𑀯𑀸 𑀬𑁄𑀚𑀦𑀫𑁆𑀳𑀺, 𑀲𑀼𑀫𑀦𑀸𑀦’𑀚𑁆𑀚𑀼𑀓𑀸𑀦𑀺 𑀘.

𑁪𑁧. 𑀧𑀸𑀤𑀯𑁂𑀘𑀺𑀓𑀢𑁄 𑀬𑀸𑀯, 𑀥𑀼𑀭𑀘𑁆𑀙𑀢𑁆𑀢𑀸𑀦𑀭𑀸𑀥𑀺𑀧𑁄;

𑀘𑀢𑀼𑀭𑀗𑁆𑀕𑀮𑀩𑀳𑀮𑁂𑀦, 𑀕𑀦𑁆𑀥𑁂𑀦 𑀉𑀭𑀼𑀘𑁂𑀢𑀺𑀬𑀁.

𑁪𑁨. 𑀮𑀺𑀫𑁆𑀧𑀸𑀧𑁂𑀢𑁆𑀯𑀸𑀦 𑀧𑀼𑀧𑁆𑀨𑀸𑀦𑀺, 𑀯𑀡𑁆𑀝𑁂𑀳𑀺 𑀢𑀢𑁆𑀣 𑀲𑀸𑀥𑀼𑀓𑀁;

𑀦𑀺𑀯𑁂𑀲𑀺𑀢𑁆𑀯𑀸𑀦 𑀓𑁄𑀭𑁂𑀲𑀺, 𑀣𑀽𑀧𑀁 𑀫𑀸𑀮𑀸𑀕𑀼𑀮𑁄𑀧𑀫𑀁.

𑁪𑁩. 𑀧𑀼𑀦𑀤𑁆𑀯𑀗𑁆𑀕𑀼𑀮𑀩𑀳𑀮𑀸𑀬, 𑀫𑀦𑁄𑀲𑀺𑀮𑀸𑀬 𑀘𑁂𑀢𑀺𑀬𑀁;

𑀮𑀺𑀫𑁆𑀧𑀸𑀧𑁂𑀢𑁆𑀯𑀸𑀦 𑀓𑀸𑀭𑁂𑀲𑀺, 𑀢𑀣𑁂𑀯 𑀓𑀼𑀲𑀼𑀫𑀸𑀘𑀺𑀢𑀁.

𑁪𑁪. 𑀧𑀼𑀦 𑀲𑁄𑀧𑀸𑀦𑀢𑁄 𑀬𑀸𑀯, 𑀥𑀼𑀭𑀘𑁆𑀙𑀢𑁆𑀢𑀸𑀯 𑀘𑁂𑀢𑀺𑀬𑀁;

𑀧𑀼𑀧𑁆𑀨𑁂𑀳𑀺 𑀑𑀓𑀺𑀭𑀸𑀧𑁂𑀢𑁆𑀯𑀸, 𑀙𑀸𑀤𑁂𑀲𑀺 𑀧𑀼𑀧𑁆𑀨𑀭𑀸𑀲𑀺𑀦𑁄.

𑁪𑁫. 𑀉𑀝𑁆𑀞𑀸𑀧𑁂𑀢𑁆𑀯𑀸𑀦 𑀬𑀦𑁆𑀢𑁂𑀳𑀺, 𑀚𑀮𑀁 𑀅𑀪𑀬𑀯𑀸𑀧𑀺𑀢𑁄;

𑀚𑀮𑁂𑀳𑀺 𑀣𑀽𑀧𑀁 𑀲𑁂𑀯𑀦𑁆𑀢𑁄, 𑀩𑀮𑀧𑀽𑀚𑀫𑀓𑀸𑀭𑀬𑀺.

𑁪𑁬. 𑀲𑀓𑀝𑀲𑀢𑁂𑀦 𑀫𑀼𑀢𑁆𑀢𑀸𑀦𑀁, 𑀲𑀤𑁆𑀥𑀺𑀁 𑀢𑁂𑀮𑁂𑀦 𑀲𑀸𑀥𑀼𑀓𑀁;

𑀫𑀤𑁆𑀤𑀸𑀧𑁂𑀢𑁆𑀯𑀸 𑀲𑀼𑀥𑀸𑀧𑀺𑀡𑁆𑀟𑀁, 𑀲𑀼𑀥𑀸𑀓𑀫𑁆𑀫𑀫𑀓𑀸𑀭𑀬𑀺.

𑁪𑁭. 𑀧𑀯𑀸𑀮𑀚𑀸𑀮𑀁 𑀓𑀸𑀭𑁂𑀢𑁆𑀯𑀸, 𑀢𑀁 𑀔𑀺𑀧𑀸𑀧𑀺𑀬 𑀘𑁂𑀢𑀺𑀬𑁂;

𑀲𑁄𑀯𑀡𑁆𑀡𑀸𑀦𑀺 𑀧𑀤𑀼𑀫𑀸𑀦𑀺, 𑀘𑀓𑁆𑀓𑀫𑀢𑁆𑀢𑀸𑀦𑀺 𑀲𑀦𑁆𑀥𑀺𑀲𑀼.

𑁪𑁮. 𑀮𑀕𑁆𑀕𑀸𑀧𑁂𑀢𑁆𑀯𑀸 𑀢𑀢𑁄 𑀫𑀼𑀢𑁆𑀢𑀸-𑀓𑀮𑀸𑀧𑁂 𑀬𑀸𑀯 𑀳𑁂𑀝𑁆𑀞𑀺𑀫𑀸;

𑀧𑀤𑀼𑀫𑀸’𑀮𑀫𑁆𑀩𑀬𑀺𑀢𑁆𑀯𑀸𑀦, 𑀫𑀳𑀸𑀣𑀽𑀧𑀫𑀧𑀽𑀚𑀬𑀺.

𑁪𑁯. 𑀕𑀡𑀲𑀚𑁆𑀛𑀸𑀬𑀲𑀤𑁆𑀤𑀁 𑀲𑁄, 𑀥𑀸𑀢𑀼𑀕𑀩𑁆𑀪𑀫𑁆𑀳𑀺𑀢𑀸𑀤𑀺𑀦𑀺;

𑀲𑀼𑀢𑁆𑀯𑀸 ‘‘𑀅𑀤𑀺𑀲𑁆𑀯𑀸 𑀢𑀁𑀦𑀸’𑀳𑀁, 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺 𑀦𑀺𑀘𑁆𑀙𑀺𑀢𑁄.

𑁫𑁦. 𑀧𑀸𑀘𑀺𑀦𑀸𑀤𑀺𑀓𑀫𑀽𑀮𑀫𑁆𑀳𑀺, 𑀅𑀦𑀸𑀳𑀸𑀭𑁄 𑀦𑀺𑀧𑀚𑁆𑀚𑀣;

𑀣𑁂𑀭𑀸 𑀤𑁆𑀯𑀸𑀭𑀁 𑀫𑀸𑀧𑀬𑀺𑀢𑁆𑀯𑀸, 𑀥𑀸𑀢𑀼𑀕𑀩𑁆𑀪𑀁 𑀦𑀬𑀺𑀁𑀲𑀼 𑀢𑀁.

𑁫𑁧. 𑀥𑀸𑀢𑀼𑀕𑀩𑁆𑀪𑀯𑀺𑀪𑀽𑀢𑀺𑀁𑀲𑁄, 𑀲𑀩𑁆𑀩𑀁 𑀤𑀺𑀲𑁆𑀯𑀸 𑀫𑀳𑀻𑀧𑀢𑀺;

𑀦𑀺𑀓𑁆𑀔𑀦𑁆𑀢𑁄 𑀢𑀸𑀤𑀺𑀲𑁂𑀳𑁂𑀯, 𑀧𑁄𑀢𑁆𑀣𑀭𑀽𑀧𑁂𑀳𑀺 𑀧𑀽𑀚𑀬𑀺.

𑁫𑁨. 𑀫𑀥𑀼𑀕𑀦𑁆𑀥𑁂𑀳𑀺 𑀕𑀦𑁆𑀥𑁂𑀳𑀺, 𑀖𑀝𑁂𑀳𑀺 𑀲𑀭𑀲𑁂𑀳𑀺 𑀘;

𑀅𑀜𑁆𑀚𑀦𑀳𑀭𑀺𑀢𑀸𑀮𑁂𑀳𑀺, 𑀢𑀣𑀸𑀫𑀦𑁄𑀲𑀺𑀮𑀸𑀳𑀺 𑀘.

𑁫𑁩. 𑀫𑀦𑁄𑀲𑀺𑀮𑀸𑀲𑀼 𑀯𑀲𑁆𑀲𑁂𑀦, 𑀪𑀲𑁆𑀲𑀺𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑁂;

𑀞𑀺𑀢𑀸𑀲𑀼 𑀕𑁄𑀧𑁆𑀨𑀫𑀢𑁆𑀢𑀸𑀲𑀼, 𑀭𑀘𑀺𑀢𑁂 𑀧𑀼’𑀧𑁆𑀧𑀮𑁂𑀳𑀺 𑀘.

𑁫𑁪. 𑀣𑀽𑀧𑀗𑁆𑀕𑀡𑀫𑁆𑀳𑀺 𑀲𑀓𑀮𑁂, 𑀧𑀼𑀭𑀺𑀢𑁂 𑀕𑀦𑁆𑀥𑀓𑀤𑁆𑀤𑀫𑁂;

𑀘𑀺𑀢𑁆𑀢𑀓𑀺𑀮𑀜𑁆𑀚𑀙𑀺𑀤𑁆𑀤𑁂𑀲𑀼, 𑀭𑀘𑀺𑀢𑁂 𑀧𑀼’𑀧𑁆𑀧𑀮𑁂𑀳𑀺 𑀘.

𑁫𑁫. 𑀯𑀸𑀭𑀬𑀺𑀢𑁆𑀯𑀸 𑀯𑀸𑀭𑀺𑀫𑀕𑁆𑀕𑀁, 𑀢𑀣𑁂𑀯 𑀧𑀼𑀭𑀺𑀢𑁂 𑀖𑀝𑁂;

𑀤𑀻𑀧𑀯𑀝𑁆𑀝𑀺𑀳𑀺 𑀦𑁂𑀓𑀸𑀦𑀺, 𑀓𑀢𑀯𑀝𑁆𑀝𑀺𑀲𑀺𑀔𑀸𑀳𑀺 𑀘.

𑁫𑁬. 𑀫𑀥𑀼𑀓𑀢𑁂𑀮𑀫𑁆𑀳𑀺 𑀢𑀣𑀸, 𑀢𑀺𑀮𑀢𑁂𑀮𑁂 𑀢𑀣𑁂𑀯 𑀘;

𑀢𑀣𑁂𑀯 𑀧𑀝𑁆𑀝𑀯𑀝𑁆𑀝𑀻𑀦𑀁, 𑀲𑀼 𑀩𑀳𑀽𑀳𑀺 𑀲𑀺𑀔𑀸𑀳𑀺 𑀘.

𑁫𑁭. 𑀬𑀣𑀸𑀯𑀼𑀢𑁆𑀢𑁂𑀳𑀺 𑀏𑀢𑁂𑀳𑀺, 𑀫𑀳𑀸𑀣𑀽𑀧𑀲𑁆𑀲 𑀔𑀢𑁆𑀢𑀺𑀬𑁄;

𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁, 𑀧𑀽𑀚𑀸’𑀓𑀸𑀲𑀺 𑀯𑀺𑀲𑀼𑀁 𑀯𑀺𑀲𑀼𑀁.

𑁫𑁮. 𑀅𑀦𑀼𑀯𑀲𑁆𑀲𑀜𑁆𑀘 𑀦𑀺𑀬𑀢𑀁, 𑀲𑀼𑀥𑀸𑀫𑀗𑁆𑀕𑀮𑀫𑀼𑀢𑁆𑀢𑀫𑀁;

𑀩𑁄𑀥𑀺𑀲𑀺𑀦𑀸𑀦𑀧𑀽𑀚𑀸 𑀘, 𑀢𑀣𑁂𑀯 𑀉𑀭𑀼𑀩𑁄𑀥𑀺𑀬𑀸.

𑁫𑁯. 𑀫𑀳𑀸𑀯𑁂𑀲𑀸𑀔 𑀧𑀽𑀚𑀸 𑀘, 𑀉𑀴𑀸𑀭𑀸 𑀅𑀝𑁆𑀞𑀯𑀻𑀲𑀢𑀺;

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀧𑀽𑀚𑀸 𑀘 𑀅𑀦𑀼𑀴𑀸𑀭𑀺𑀓𑀸.

𑁬𑁦. 𑀯𑀺𑀯𑀺𑀥𑀁 𑀦𑀝𑀦𑀘𑁆𑀘𑀜𑁆𑀘, 𑀦𑀸𑀦𑀸𑀢𑀽𑀭𑀺𑀬𑀯𑀸𑀤𑀺𑀢𑀁;

𑀫𑀳𑀸𑀣𑀽𑀧𑁂 𑀫𑀳𑀸𑀧𑀽𑀚𑀁, 𑀲𑀤𑁆𑀥𑀸𑀦𑀼𑀦𑁆𑀦𑁄 𑀅𑀓𑀸𑀭𑀬𑀺.

𑁬𑁧. 𑀤𑀺𑀯𑀲𑀲𑁆𑀲 𑀘 𑀢𑀺𑀓𑁆𑀔𑀢𑁆𑀢𑀼𑀁, 𑀩𑀼𑀤𑁆𑀥𑀼𑀧𑁆𑀧𑀝𑁆𑀞𑀸𑀦𑀫𑀸𑀕𑀫𑀸;

𑀤𑁆𑀯𑀺𑀓𑁆𑀔𑀢𑁆𑀢𑀼𑀁, 𑀧𑀼𑀧𑁆𑀨𑀪𑁂𑀭𑀺𑀜𑁆𑀘, 𑀦𑀺𑀬𑀢𑀁 𑀲𑁄 𑀅𑀓𑀸𑀭𑀬𑀺.

𑁬𑁨. 𑀦𑀺𑀬𑀢𑀜𑁆𑀘𑀦𑀤𑀸𑀦𑀜𑁆𑀘, 𑀧𑀯𑀸𑀭𑀡𑀸𑀤𑀸𑀦𑀫𑁂𑀯 𑀘;

𑀢𑁂𑀮𑀨𑀸𑀡𑀺𑀢𑀯𑀢𑁆𑀣𑀸𑀤𑀺-𑀧𑀭𑀺𑀓𑁆𑀔𑀸𑀭𑀁 𑀲𑀫𑀡𑀸𑀭𑀳𑀁.

𑁬𑁩. 𑀩𑀳𑀼𑀁 𑀧𑀸𑀤𑀸𑀲𑀺 𑀲𑀗𑁆𑀖𑀲𑁆𑀲, 𑀘𑁂𑀢𑀺𑀬𑀔𑁂𑀢𑁆𑀢𑀫𑁂𑀯 𑀘;

𑀘𑁂𑀢𑀺𑀬𑁂 𑀧𑀭𑀺𑀓𑀫𑁆𑀫𑀢𑁆𑀣𑀁, 𑀅𑀤𑀸𑀲𑀺 𑀢𑀢𑁆𑀣 𑀔𑀢𑁆𑀢𑀺𑀬𑁄.

𑁬𑁪. 𑀲𑀤𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲, 𑀯𑀺𑀳𑀸𑀭𑁂 𑀘𑁂𑀢𑀺𑀬𑀧𑀩𑁆𑀩𑀢𑁂;

𑀲𑀮𑀸𑀓𑀯𑀢𑁆𑀢𑀪𑀢𑁆𑀢𑀜𑁆𑀘, 𑀲𑁄 𑀤𑀸𑀧𑁂𑀲𑀺 𑀘 𑀪𑀽𑀧𑀢𑀺.

𑁬𑁫. 𑀘𑀺𑀦𑁆𑀢𑀸𑀫𑀡𑀺𑀫𑀼𑀘𑁂𑀮𑀯𑁆𑀳𑁂, 𑀉𑀧𑀝𑁆𑀞𑀸𑀦𑀢𑁆𑀢𑀬𑁂 𑀘 𑀲𑁄;

𑀢𑀣𑀸 𑀧𑀤𑀼𑀫𑀖𑀭𑁂 𑀙𑀢𑁆𑀢-𑀧𑀸𑀲𑀸𑀤𑁂 𑀘 𑀫𑀦𑁄𑀭𑀫𑁂.

𑁬𑁬. 𑀪𑁄𑀚𑁂𑀦𑁆𑀢𑁄 𑀧𑀜𑁆𑀘𑀞𑀸𑀦𑀫𑁆𑀳𑀺, 𑀪𑀺𑀓𑁆𑀔𑀽𑀕𑀦𑁆𑀣𑀥𑀼𑀭𑁂 𑀬𑀼𑀢𑁂;

𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀲𑀺, 𑀲𑀤𑀸 𑀥𑀫𑁆𑀫𑁂 𑀲𑀕𑀸𑀭𑀯𑁄.

𑁬𑁭. 𑀧𑁄𑀭𑀸𑀡𑀭𑀸𑀚𑀦𑀺𑀬𑀸𑀢𑀁, 𑀬𑀁𑀓𑀺𑀜𑁆𑀘𑀺 𑀲𑀸𑀲𑀦𑀲𑁆𑀲𑀺𑀢𑀁;

𑀅𑀓𑀸𑀲𑀺 𑀧𑀼𑀜𑁆𑀜𑀓𑀫𑁆𑀫𑀁𑀲𑁄, 𑀲𑀩𑁆𑀩𑀁 𑀪𑀸𑀢𑀺𑀓𑀪𑀽𑀧𑀢𑀺.

𑁬𑁮. 𑀢𑀲𑁆𑀲 𑀪𑀸𑀪𑀓𑀭𑀸𑀚𑀲𑁆𑀲, 𑀅𑀘𑁆𑀘𑀬𑁂 𑀢𑀁 𑀓𑀦𑀺𑀝𑁆𑀞𑀓𑁄;

𑀫𑀳𑀸𑀤𑀸𑀞𑀺𑀫𑀳𑀸𑀦𑀸𑀕-𑀦𑀸𑀫𑁄 𑀭𑀚𑁆𑀚𑀫𑀓𑀸𑀭𑀬𑀺.

𑁬𑁯. 𑀤𑁆𑀯𑀸𑀤𑀲𑀁𑀬𑁂𑀯 𑀯𑀲𑁆𑀲𑀸𑀦𑀺, 𑀦𑀸𑀦𑀸𑀧𑀼𑀜𑁆𑀜𑀧𑀭𑀸𑀬𑀦𑁄;

𑀫𑀳𑀸𑀣𑀽𑀧𑀫𑁆𑀳𑀺 𑀓𑀺𑀜𑁆𑀚𑀓𑁆𑀔- 𑀧𑀸𑀲𑀸𑀡𑁂 𑀅𑀢𑁆𑀣𑀭𑀸𑀧𑀬𑀺.

𑁭𑁦. 𑀯𑀸𑀮𑀺𑀓𑀸𑀫𑀭𑀺𑀬𑀸𑀤𑀜𑁆𑀘, 𑀓𑀸𑀭𑁂𑀲𑀺 𑀯𑀺𑀢𑁆𑀣𑀢𑀗𑁆𑀕𑀡𑀁;

𑀤𑀻𑀧𑁂 𑀲𑀩𑁆𑀩𑀯𑀺𑀳𑀸𑀭𑁂𑀲𑀼, 𑀥𑀫𑁆𑀫𑀸𑀲𑀦𑀫𑀤𑀸𑀧𑀬𑀺.

𑁭𑁧. 𑀅𑀫𑁆𑀩𑀢𑁆𑀣𑀮 𑀫𑀳𑀸𑀣𑀽𑀧𑀁, 𑀓𑀸𑀭𑀸𑀧𑁂𑀲𑀺 𑀫𑀳𑀻𑀧𑀢𑀺;

𑀘 𑀬𑁂𑀅𑀦𑀺𑀝𑁆𑀞𑀫𑀸𑀦𑀫𑁆𑀳𑀺, 𑀲𑀭𑀺𑀢𑁆𑀯𑀸 𑀫𑀼𑀦𑀺𑀦𑁄 𑀕𑀼𑀡𑀁.

𑁭𑁨. 𑀘𑀚𑀺𑀢𑁆𑀯𑀸𑀦 𑀲𑀓𑀁 𑀧𑀸𑀡𑀁, 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀬𑀁 𑀢𑀳𑀺𑀁;

𑀞𑀧𑀬𑀺𑀢𑁆𑀯𑀸 𑀘𑀬𑀁 𑀢𑀲𑁆𑀲, 𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀦 𑀘𑁂𑀢𑀺𑀬𑀁.

𑁭𑁩. 𑀘𑀢𑀼𑀤𑁆𑀯𑀸𑀭𑁂 𑀞𑀧𑀸𑀧𑁂𑀲𑀺, 𑀘𑀢𑀼𑀭𑁄 𑀭𑀢𑀦𑀕𑁆𑀖𑀺𑀓𑁂;

𑀲𑀼𑀲𑀺𑀧𑁆𑀧𑀺𑀓𑁂𑀳𑀺 𑀲𑀼𑀯𑀺𑀪𑀢𑁆𑀢𑁂, 𑀦𑀸𑀦𑀸𑀭𑀢𑀦𑀚𑁄𑀢𑀺𑀢𑁂.

𑁭𑁪. 𑀘𑁂𑀢𑀺𑀬𑁂 𑀧𑀝𑀺𑀫𑁄𑀘𑁂𑀢𑁆𑀯𑀸, 𑀦𑀸𑀦𑀸𑀭𑀢𑀦𑀓𑀜𑁆𑀘𑀼𑀓𑀁;

𑀓𑀜𑁆𑀘𑀦 𑀩𑀼𑀩𑁆𑀩𑀼𑀮𑀜𑁆𑀘𑁂𑀢𑁆𑀣, 𑀫𑀼𑀢𑁆𑀢𑁄𑀮𑀫𑁆𑀩𑀜𑁆𑀘 𑀤𑀸𑀧𑀬𑀺.