𑀢𑀢𑀺𑀬 𑀧𑀭𑀺𑀘𑁆𑀙𑁂𑀤

𑀧𑀞𑀫𑀥𑀫𑁆𑀫𑀲𑀁𑀕𑀻𑀢𑀺

𑁧. 𑀧𑀜𑁆𑀘𑀦𑁂𑀢𑁆𑀢𑁄 𑀚𑀺𑀦𑁄 𑀧𑀜𑁆𑀘-𑀘𑀢𑁆𑀢𑀸𑀮𑀻𑀲𑀲𑀫𑀸’𑀲𑀫𑁄;

𑀞𑀢𑁆𑀯𑀸 𑀲𑀩𑁆𑀩𑀸𑀦𑀺 𑀓𑀺𑀘𑁆𑀘𑀸𑀦𑀺, 𑀓𑀢𑁆𑀯𑀸 𑀮𑁄𑀓𑀲𑁆𑀲 𑀲𑀩𑁆𑀩𑀣𑀸.

𑁨. 𑀓𑀼𑀲𑀺𑀦𑀸𑀭𑀸𑀬𑀬𑀫𑀓-𑀲𑀸𑀮𑀸𑀦𑀫𑀦𑁆𑀢𑀭𑁂 𑀯𑀭𑁂;

𑀯𑁂𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀲𑁄, 𑀤𑀻𑀧𑁄 𑀮𑁄𑀓𑀲𑁆𑀲 𑀦𑀺𑀩𑁆𑀩𑀼𑀢𑁄.

𑁩. 𑀲𑀗𑁆𑀔𑁆𑀬𑀸𑀧𑀣𑀫𑀢𑀺𑀓𑁆𑀓𑀦𑁆𑀢𑀸, 𑀪𑀺𑀓𑁆𑀔𑀽 𑀢𑀢𑁆𑀣 𑀲𑀫𑀸𑀕𑀢𑀸;

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑀲𑁆𑀲𑀸, 𑀲𑀼𑀤𑁆𑀥𑀸 𑀤𑁂𑀯𑀸 𑀢𑀣𑁂𑀯 𑀘.

𑁪. 𑀲𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀺, 𑀢𑁂𑀲𑀼 𑀧𑀸𑀫𑁄𑀓𑁆𑀔𑀪𑀺𑀓𑁆𑀔𑀯𑁄;

𑀣𑁂𑀭𑁄 𑀫𑀳𑀸𑀓𑀲𑁆𑀲𑀧𑁄𑀯, 𑀲𑀗𑁆𑀖𑀢𑁆𑀣𑁂𑀭𑁄 𑀢𑀤𑀸 𑀅𑀳𑀼.

𑁫. 𑀲𑀢𑁆𑀣𑀼𑀲𑀭𑀻𑀭𑀲𑀸𑀭𑀻𑀭-𑀥𑀸𑀢𑀼𑀓𑀺𑀘𑁆𑀘𑀸𑀦𑀺 𑀓𑀸𑀭𑀺𑀬;

𑀇𑀘𑁆𑀙𑀦𑁆𑀢𑁄 𑀲𑁄 𑀫𑀳𑀸𑀣𑁂𑀭𑁄, 𑀲𑀢𑁆𑀣𑀼 𑀥𑀫𑁆𑀫𑀘𑀺𑀭𑀝𑁆𑀞𑀺𑀢𑀺𑀁.

𑁬. 𑀮𑁄𑀓𑀦𑀸𑀣𑁂 𑀤𑀲𑀩𑀮𑁂, 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂;

𑀤𑀼𑀩𑁆𑀪𑀸𑀲𑀺𑀢𑀁 𑀲𑀼𑀪𑀤𑁆𑀤𑀲𑁆𑀲, 𑀩𑀼𑀤𑁆𑀥𑀲𑁆𑀲 𑀯𑀘𑀦𑀁 𑀲𑀭𑀁.

𑁭. 𑀲𑀭𑀁 𑀘𑀻𑀯𑀭𑀤𑀸𑀦𑀜𑁆𑀘, 𑀲𑀫𑀢𑁆𑀢𑁂 𑀞𑀧𑀦𑀁 𑀢𑀣𑀸;

𑀲𑀤𑁆𑀥𑀫𑁆𑀫𑀞𑀧𑀦𑀢𑁆𑀣𑀸𑀬, 𑀫𑀼𑀦𑀺𑀦𑀸’𑀦𑀼𑀕𑁆𑀕𑀳𑀁 𑀓𑀢𑀁.

𑁮. 𑀓𑀸𑀢𑀼𑀁 𑀲𑀤𑁆𑀥𑀫𑁆𑀫𑀲𑀁𑀕𑀻𑀢𑀺𑀁, 𑀲𑀫𑁆𑀩𑀼𑀤𑁆𑀥𑀸𑀦𑀫𑀢𑁂 𑀬𑀢𑀺;

𑀦𑀯𑀗𑁆𑀕𑀲𑀸𑀲𑀦𑀥𑀭𑁂, 𑀲𑀩𑁆𑀩𑀗𑁆𑀕𑀲𑀫𑀼𑀧𑀸𑀕𑀢𑁂.

𑁯. 𑀪𑀺𑀓𑁆𑀔𑀽 𑀧𑀜𑁆𑀘𑀲𑀢𑁂𑀬𑁂𑀯, 𑀫𑀳𑀸𑀔𑀻𑀡𑀸𑀲𑀯𑁂 𑀯𑀭𑁂;

𑀲𑀫𑁆𑀫𑀦𑁆𑀦𑀺 𑀏𑀓𑁂𑀦𑀽𑀦𑁂 𑀢𑀼, 𑀆𑀦𑀦𑁆𑀤𑀢𑁆𑀣𑁂𑀭𑀓𑀸𑀭𑀡𑀸.

𑁧𑁦. 𑀧𑀼𑀦 𑀆𑀦𑀦𑁆𑀤𑀢𑁆𑀣𑁂𑀭𑀸’𑀧𑀺, 𑀪𑀺𑀓𑁆𑀔𑀽𑀳𑀺 𑀅𑀪𑀺𑀬𑀸𑀘𑀺𑀢𑁄;

𑀲𑀫𑁆𑀫𑀦𑁆𑀦𑀺 𑀓𑀸𑀢𑀼𑀁 𑀲𑀁𑀕𑀻𑀢𑀺𑀁, 𑀲𑀸 𑀦 𑀲𑀓𑁆𑀓𑀸 𑀳𑀺 𑀢𑀁 𑀯𑀺𑀦𑀸.

𑁧𑁧. 𑀲𑀸𑀥𑀼𑀓𑀻𑀴𑀦𑀲𑀢𑁆𑀢𑀸𑀳𑀁, 𑀲𑀢𑁆𑀢𑀸𑀳𑀁 𑀥𑀸𑀢𑀼𑀪𑀸𑀚𑀦𑀁;

𑀇𑀘𑁆𑀘𑀤𑁆𑀥𑀫𑀸𑀲𑀁 𑀔𑁂𑀧𑁂𑀢𑁆𑀯𑀸, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑀸.

𑁧𑁨. 𑀯𑀲𑁆𑀲𑀁 𑀯𑀲𑀁 𑀭𑀸𑀚𑀕𑀳𑁂, 𑀓𑀲𑁆𑀲𑀸𑀫 𑀥𑀫𑁆𑀫𑀲𑀗𑁆𑀕𑀳𑀁;

𑀦𑀸𑀜𑁆𑀜𑁂𑀳𑀺 𑀢𑀢𑁆𑀢 𑀯𑀢𑁆𑀣𑀩𑁆𑀩-𑀫𑀺𑀢𑀺 𑀓𑀢𑁆𑀯𑀸𑀦 𑀦𑀺𑀘𑁆𑀙𑀬𑀁.

𑁧𑁩. 𑀲𑁄𑀓𑀸𑀢𑀼𑀭𑀁 𑀢𑀢𑁆𑀣 𑀢𑀢𑁆𑀣, 𑀅𑀲𑁆𑀲𑀸𑀲𑁂𑀦𑁆𑀢𑁄 𑀫𑀳𑀸𑀚𑀦𑀁;

𑀚𑀫𑁆𑀩𑀼𑀤𑀻𑀧𑀫𑁆𑀳𑀺 𑀢𑁂 𑀣𑁂𑀭𑀸, 𑀯𑀺𑀘𑀭𑀺𑀢𑁆𑀯𑀸𑀦 𑀘𑀸𑀭𑀺𑀓𑀁.

𑁧𑁪. 𑀆𑀲𑀴𑁆𑀳𑀺𑀲𑀼𑀓𑁆𑀓𑀧𑀓𑁆𑀔𑀫𑁆𑀳𑀺, 𑀲𑀼𑀓𑁆𑀓𑀧𑀓𑁆𑀔𑀞𑀺𑀢𑀢𑁆𑀣𑀺𑀓𑀸;

𑀉𑀧𑀸𑀕𑀫𑀼𑀁 𑀭𑀸𑀚𑀕𑀳𑀁, 𑀲𑀫𑁆𑀧𑀦𑁆𑀦𑀘𑀢𑀼𑀧𑀘𑁆𑀘𑀬𑀁.

𑁧𑁫. 𑀢𑀢𑁆𑀣𑁂𑀯 𑀯𑀲𑁆𑀲𑀽𑀧𑀕𑀢𑀸, 𑀢𑁂 𑀫𑀳𑀸𑀓𑀲𑁆𑀲𑀧𑀸𑀤𑀬𑁄;

𑀣𑁂𑀭𑀸 𑀣𑀺𑀭𑀕𑀼𑀡𑀽𑀧𑁂𑀢𑀸, 𑀲𑀫𑁆𑀩𑀼𑀤𑁆𑀥𑀫𑀢𑀓𑁄𑀯𑀺𑀤𑀸.

𑁧𑁬. 𑀯𑀲𑁆𑀲𑀸𑀦𑀁 𑀧𑀞𑀫𑀁 𑀫𑀸𑀲𑀁, 𑀲𑀩𑁆𑀩𑀲𑁂𑀦𑀸𑀲𑀦𑁂𑀲𑀼’𑀧𑀺;

𑀓𑀸𑀭𑁂𑀲𑀼𑀁 𑀧𑀝𑀺𑀲𑀗𑁆𑀔𑀸𑀭𑀁, 𑀯𑀢𑁆𑀯𑀸𑀦𑀸’𑀚𑀸𑀢𑀲𑀢𑁆𑀢𑀼𑀦𑁄.

𑁧𑁭. 𑀯𑀺𑀳𑀸𑀭𑀧𑀝𑀺𑀲𑀗𑁆𑀔𑀸𑀭𑁂, 𑀦𑀺𑀝𑁆𑀞𑀺𑀢𑁂 𑀅𑀳𑀼 𑀪𑀽𑀧𑀢𑀺;

𑀇𑀤𑀸𑀦𑀺 𑀥𑀫𑁆𑀫𑀲𑀁𑀕𑀻𑀢𑀺𑀁, 𑀓𑀭𑀺𑀲𑁆𑀲𑀸𑀫𑀺 𑀫𑀬𑀁 𑀇𑀢𑀺.

𑁧𑁮. 𑀓𑀢𑁆𑀢𑀩𑁆𑀩𑀁 𑀓𑀺𑀦𑁆𑀢𑀺𑀧𑀼𑀝𑁆𑀞𑀲𑁆𑀲, 𑀦𑀺𑀲𑀚𑁆𑀚𑀞𑀸𑀦𑀫𑀸𑀤𑀺𑀲𑀼𑀁;

𑀭𑀸𑀚𑀸 𑀓𑀢𑁆𑀣𑀸𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, 𑀯𑀼𑀢𑁆𑀢𑀞𑀸𑀦𑀫𑁆𑀳𑀺 𑀢𑁂𑀳𑀺 𑀲𑁄.

𑁧𑁯. 𑀲𑀻𑀖𑀁 𑀯𑁂𑀪𑀸𑀭𑀲𑁂𑀮𑀲𑁆𑀲, 𑀧𑀲𑁆𑀲𑁂 𑀓𑀸𑀭𑁂𑀲𑀺 𑀫𑀡𑁆𑀟𑀧𑀁;

𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀤𑁆𑀯𑀸𑀭𑁂, 𑀭𑀫𑁆𑀫𑀁 𑀤𑁂𑀯𑀲𑀪𑁄𑀧𑀫𑀁.

𑁨𑁦. 𑀲𑀩𑁆𑀩𑀣𑀸 𑀫𑀡𑁆𑀟𑀬𑀺𑀢𑁆𑀯𑀸 𑀢𑀁, 𑀅𑀢𑁆𑀣𑀭𑀸𑀧𑁂𑀲𑀺 𑀢𑀢𑁆𑀣 𑀲𑁄;

𑀪𑀺𑀓𑁆𑀔𑀽𑀦𑀁 𑀕𑀡𑀦𑀸𑀬𑁂𑀯, 𑀅𑀦𑀕𑁆𑀖𑀢𑁆𑀣𑀭𑀡𑀸𑀦𑀺 𑀘.

𑁨𑁧. 𑀦𑀺𑀲𑁆𑀲𑀸𑀬 𑀤𑀓𑁆𑀔𑀺𑀡𑀁 𑀪𑀸𑀕𑀁, 𑀉𑀢𑁆𑀢𑀭𑀸𑀫𑀼𑀔𑀫𑀼𑀢𑁆𑀢𑀫𑀁;

𑀣𑁂𑀭𑀸𑀲𑀦𑀁 𑀲𑀼𑀧𑀜𑁆𑀜𑀢𑁆𑀢𑀁, 𑀆𑀲𑀺 𑀢𑀢𑁆𑀣 𑀫𑀳𑀸𑀭𑀳𑀁.

𑁨𑁨. 𑀢𑀲𑁆𑀫𑀺𑀁 𑀫𑀡𑁆𑀟𑀧𑀫𑀚𑁆𑀛𑀲𑁆𑀫𑀺𑀁, 𑀧𑀼𑀭𑀢𑁆𑀣𑀫𑀼𑀔𑀫𑀼𑀢𑁆𑀢𑀫𑀁;

𑀥𑀫𑁆𑀫𑀸𑀲𑀦𑀁 𑀲𑀼𑀧𑀜𑁆𑀜𑀢𑁆𑀢𑀁, 𑀅𑀳𑁄𑀲𑀺 𑀲𑀼𑀕𑀢𑀸𑀭𑀳𑀁.

𑁨𑁩. 𑀭𑀸𑀚𑀸’𑀭𑁄𑀘𑀬𑀺 𑀣𑁂𑀭𑀸𑀦𑀁, 𑀓𑀫𑁆𑀫𑀁 𑀦𑁄 𑀦𑀺𑀝𑁆𑀞𑀺𑀢𑀁 𑀇𑀢𑀺;

𑀢𑁂 𑀣𑁂𑀭𑀸 𑀣𑁂𑀭𑀫𑀸𑀦𑀦𑁆𑀤-𑀫𑀸𑀦𑀦𑁆𑀤𑀓𑀭𑀫𑀩𑁆𑀭𑀯𑀼𑀁.

𑁨𑁪. 𑀲𑁆𑀯𑁂 𑀲𑀦𑁆𑀦𑀺𑀧𑀸𑀢𑁄 𑀆𑀦𑀦𑁆𑀤, 𑀲𑁂𑀔𑁂𑀦 𑀕𑀫𑀦𑀁 𑀢𑀳𑀺𑀁;

𑀦 𑀬𑀼𑀢𑁆𑀢𑀦𑁆𑀢𑁂 𑀲𑀤𑀢𑁆𑀣𑁂 𑀢𑁆𑀯𑀁, 𑀅𑀧𑁆𑀧𑀫𑀢𑁆𑀢𑁄 𑀢𑀢𑁄 𑀪𑀯.

𑁨𑁫. 𑀇𑀘𑁆𑀘𑁂𑀯𑀁 𑀘𑁄𑀤𑀺𑀢𑁄 𑀣𑁂𑀭𑁄, 𑀓𑀢𑁆𑀯𑀸𑀦 𑀯𑀻𑀭𑀺𑀬𑀁 𑀲𑀫𑀁;

𑀇𑀭𑀺𑀬𑀸𑀧𑀣𑀢𑁄 𑀫𑀼𑀢𑁆𑀢𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺.

𑁨𑁬. 𑀯𑀲𑁆𑀲𑀸𑀦𑀁 𑀤𑀼𑀢𑀺𑀬𑁂 𑀫𑀸𑀲𑁂, 𑀤𑀼𑀢𑀺𑀬𑁂 𑀤𑀺𑀯𑀲𑁂 𑀧𑀦;

𑀭𑀼𑀘𑀺𑀭𑁂 𑀫𑀡𑁆𑀟𑀧𑁂 𑀢𑀲𑁆𑀫𑀺𑀁, 𑀣𑁂𑀭𑀸 𑀲𑀦𑁆𑀦𑀺𑀧𑀢𑀺𑀁𑀲𑀼 𑀢𑁂.

𑁨𑁭. 𑀞𑀧𑁂𑀢𑁆𑀯𑀸’𑀦𑀦𑁆𑀤𑀢𑁆𑀣𑁂𑀭𑀲𑁆𑀲, 𑀅𑀦𑀼𑀘𑁆𑀙𑀯𑀺𑀓𑀫𑀸𑀲𑀦𑀁;

𑀆𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼, 𑀅𑀭𑀳𑀦𑁆𑀢𑁄 𑀬𑀣𑀸𑀭𑀳𑀁.

𑁨𑁮. 𑀣𑁂𑀭𑁄’𑀭𑀳𑀢𑁆𑀢𑀧𑀢𑁆𑀢𑀺𑀁 𑀲𑁄, 𑀜𑀸𑀧𑁂𑀢𑀼𑀁 𑀢𑁂𑀳𑀺 𑀦𑀸𑀕𑀫𑀸;

𑀓𑀼𑀳𑀺𑀁 𑀆𑀦𑀦𑁆𑀤𑀢𑁆𑀣𑁂𑀭𑁄’𑀢𑀺, 𑀯𑀼𑀘𑁆𑀘𑀫𑀸𑀦𑁂 𑀢𑀼 𑀓𑁂𑀳𑀺𑀘𑀺.

𑁨𑁯. 𑀦𑀺𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀣𑀯𑀺𑀬𑀸, 𑀕𑀦𑁆𑀢𑁆𑀯𑀸 𑀚𑁄𑀢𑀺𑀧𑀣𑁂𑀦 𑀯𑀸;

𑀦𑀺𑀲𑀻𑀤𑀺 𑀣𑁂𑀭𑁄 𑀆𑀦𑀦𑁆𑀤𑁄, 𑀅𑀢𑁆𑀢𑀦𑁄 𑀞𑀧𑀺𑀢𑀸𑀲𑀦𑁂.

𑁩𑁦. 𑀉𑀧𑀸𑀮𑀺𑀣𑁂𑀭𑁄 𑀯𑀺𑀦𑀬𑁂, 𑀲𑁂𑀲𑀥𑀫𑁆𑀫𑁂 𑀅𑀲𑁂𑀲𑀓𑁂;

𑀆𑀦𑀦𑁆𑀤𑀢𑁆𑀣𑁂𑀭𑀫𑀓𑀭𑀼𑀁, 𑀲𑀩𑁆𑀩𑁂 𑀣𑁂𑀭𑀸 𑀥𑀼𑀭𑀦𑁆𑀥𑀭𑁂.

𑁩𑁧. 𑀫𑀳𑀸𑀣𑁂𑀭𑁄 𑀲𑀓𑀢𑁆𑀢𑀸𑀦𑀁, 𑀯𑀺𑀦𑀬𑀁 𑀧𑀼𑀘𑁆𑀙𑀺𑀢𑀼𑀁 𑀲𑀬𑀁;

𑀲𑀫𑁆𑀫𑀦𑁆𑀦𑀼’𑀧𑀸𑀮𑀺𑀣𑁂𑀭𑁄 𑀘, 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀢𑀫𑁂𑀯 𑀢𑀼.

𑁩𑁨. 𑀣𑁂𑀭𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀯𑀺𑀦𑀬𑀁 𑀢𑀫𑀧𑀼𑀘𑁆𑀙𑀺 𑀲𑁄;

𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀯𑀺𑀲𑁆𑀲𑀚𑁆𑀚𑁂𑀲𑀺 𑀢𑀫𑁂𑀯 𑀲𑁄.

𑁩𑁩. 𑀯𑀺𑀦𑀬𑀜𑁆𑀜𑀽𑀦𑀫𑀕𑁆𑀕𑁂𑀦, 𑀯𑀺𑀲𑁆𑀲𑀚𑁆𑀚𑀺𑀢𑀓𑀫𑁂𑀦 𑀢𑁂;

𑀲𑀩𑁆𑀩𑁂 𑀲𑀚𑁆𑀛𑀸𑀬𑀫𑀓𑀭𑀼𑀁, 𑀯𑀺𑀦𑀬𑀁 𑀦𑀬𑀓𑁄𑀯𑀺𑀤𑀸.

𑁩𑁪. 𑀅𑀕𑁆𑀕𑀁 𑀩𑀳𑀼𑀲𑁆𑀲𑀼𑀢𑀸𑀤𑀻𑀦𑀁, 𑀓𑁄𑀲𑀸𑀭𑀓𑁆𑀔𑀁 𑀫𑀳𑁂𑀲𑀺𑀦𑁄;

𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀦 𑀅𑀢𑁆𑀢𑀸𑀦𑀁, 𑀣𑁂𑀭𑁄 𑀥𑀫𑁆𑀫𑀫𑀧𑀼𑀘𑁆𑀙𑀺 𑀲𑁄.

𑁩𑁫. 𑀢𑀣𑀸 𑀲𑀫𑁆𑀫𑀦𑁆𑀦𑀺𑀬’𑀢𑁆𑀢𑀸𑀦𑀁, 𑀥𑀫𑁆𑀫𑀸𑀲𑀦𑀸𑀕𑀢𑁄 𑀲𑀬𑀁;

𑀯𑀺𑀲𑁆𑀲𑀚𑁆𑀚𑁂𑀲𑀺 𑀢𑀫𑀸𑀦𑀦𑁆𑀤-𑀢𑁆𑀣𑁂𑀭𑁄 𑀥𑀫𑁆𑀫𑀫𑀲𑁂𑀲𑀢𑁄.

𑁩𑁬. 𑀯𑁂𑀤𑁂𑀳𑀫𑀼𑀦𑀺𑀦𑀸 𑀢𑁂𑀦, 𑀯𑀺𑀲𑁆𑀲𑀚𑁆𑀚𑀺𑀢𑀓𑀫𑁂𑀦 𑀢𑁂;

𑀲𑀩𑁆𑀩𑁂 𑀲𑀚𑁆𑀛𑀸𑀬𑀫𑀓𑀭𑀼𑀁, 𑀥𑀫𑁆𑀫𑀁 𑀥𑀫𑁆𑀫𑀢𑁆𑀣𑀓𑁄𑀯𑀺𑀤𑀸.

𑁩𑁭. 𑀏𑀯𑀁 𑀲𑀢𑁆𑀢𑀳𑀺 𑀫𑀸𑀲𑁂𑀳𑀺, 𑀥𑀫𑁆𑀫𑀲𑀁𑀕𑀻𑀢𑀺 𑀦𑀺𑀝𑁆𑀞𑀺𑀢𑀸;

𑀲𑀩𑁆𑀩𑀮𑁄𑀓𑀳𑀺𑀢𑀢𑁆𑀣𑀸𑀬, 𑀲𑀩𑁆𑀩𑀮𑁄𑀓𑀳𑀺 𑀢𑁂𑀳𑀺 𑀲𑀸.

𑁩𑁮. 𑀫𑀳𑀸𑀓𑀲𑁆𑀲𑀧𑀣𑁂𑀭𑁂𑀦, 𑀇𑀤𑀁 𑀲𑀼𑀕𑀢𑀲𑀸𑀲𑀦𑀁;

𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀲𑀫𑀢𑁆𑀣𑀁 𑀯𑀢𑁆𑀢𑀦𑁂 𑀓𑀢𑀁.

𑁩𑁯. 𑀅𑀢𑀻𑀯 𑀚𑀸𑀢𑀧𑀸𑀫𑁄𑀚𑁆𑀚𑀸, 𑀲𑀦𑁆𑀥𑀸𑀭𑀓𑀚𑀮𑀦𑁆𑀢𑀺𑀓𑀸;

𑀲𑀁𑀕𑀻𑀢𑀺𑀧𑀭𑀺𑀬𑁄𑀲𑀸𑀦𑁂, 𑀙𑀤𑁆𑀥𑀸𑀓𑀫𑁆𑀧𑀺 𑀫𑀳𑀸𑀫𑀳𑀻.

𑁪𑁦. 𑀅𑀘𑁆𑀙𑀭𑀺𑀬𑀸𑀦𑀺 𑀘𑀸’𑀳𑁂𑀲𑀼𑀁, 𑀮𑁄𑀓𑁂𑀦𑁂𑀓𑀸𑀦𑀺𑀦𑁂𑀓𑀥𑀸;

𑀣𑁂𑀭𑁂𑀳𑁂𑀯 𑀓𑀢𑀢𑁆𑀢𑀸 𑀘, 𑀣𑁂𑀭𑀺𑀬𑀸𑀬𑀁 𑀧𑀭𑀫𑁆𑀧𑀭𑀸.

𑁪𑁧. 𑀧𑀞𑀫𑀁 𑀲𑀗𑁆𑀕𑀳𑀁 𑀓𑀢𑁆𑀯𑀸, 𑀲𑀩𑁆𑀩𑀮𑁄𑀓𑀳𑀺𑀢𑀁 𑀩𑀳𑀼𑀁;

𑀢𑁂 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸, 𑀣𑁂𑀭𑀸 𑀲𑀩𑁆𑀩𑁂𑀧𑀺 𑀦𑀺𑀩𑁆𑀩𑀼𑀢𑀸.

𑁪𑁨. 𑀣𑁂𑀭𑀸’𑀧𑀺 𑀢𑁂 𑀫𑀢𑀺𑀧𑀤𑀻𑀧𑀳𑀢𑀦𑁆𑀥𑀓𑀸𑀭𑀸,

𑀮𑁄𑀓𑀦𑁆𑀥𑀓𑀸𑀭𑀳𑀦𑀦𑀫𑁆𑀳𑀺 𑀫𑀳𑀸𑀧𑀤𑀻𑀧𑀸;

𑀦𑀺𑀩𑁆𑀩𑀸𑀧𑀺𑀢𑀸 𑀫𑀭𑀡𑀖𑁄𑀭𑀫𑀳𑀸𑀦𑀺𑀮𑁂𑀦,

𑀢𑁂𑀦𑀸𑀧𑀺 𑀚𑀻𑀯𑀺𑀢𑀫𑀤𑀁 𑀫𑀢𑀺𑀫𑀸 𑀚𑀳𑁂𑀬𑁆𑀬𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀁𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀧𑀞𑀫𑀥𑀫𑁆𑀫𑀲𑀁𑀕𑀻𑀢𑀺𑀦𑀸𑀫

𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.