𑀲𑀢𑁆𑀢𑀯𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀮𑁄𑀳𑀧𑀸𑀲𑀸𑀤𑀫𑀳𑁄

𑁧. 𑀢𑀢𑁄 𑀭𑀸𑀚𑀸 𑀯𑀺𑀘𑀺𑀦𑁆𑀢𑁂𑀲𑀺, 𑀯𑀺𑀲𑁆𑀲𑀼𑀢𑀁 𑀲𑀼𑀲𑁆𑀲𑀼𑀢𑀁 𑀲𑀼𑀢𑀁;

𑀫𑀳𑀸𑀧𑀜𑁆𑀜𑁄 𑀲𑀤𑀸 𑀧𑀼𑀜𑁆𑀜𑁄, 𑀧𑀜𑁆𑀜𑀸𑀬 𑀓𑀢𑀦𑀺𑀘𑁆𑀙𑀬𑁄.

𑁨. ‘‘𑀤𑀻𑀧𑀧𑁆𑀧𑀲𑀸𑀤𑀓𑁄 𑀣𑁂𑀭𑁄, 𑀭𑀸𑀚𑀺𑀦𑁄 𑀅𑀬𑁆𑀬𑀓𑀲𑁆𑀲 𑀫𑁂;

𑀏𑀯𑀁 𑀓𑀺𑀭𑀸𑀳𑀦𑀢𑁆𑀢𑀸 𑀢𑁂, 𑀤𑀼𑀝𑁆𑀞𑀕𑀸𑀫𑀡𑀺𑀪𑀽𑀧𑀢𑀺.

𑁩. 𑀫𑀳𑀸𑀧𑀼𑀜𑁆𑀜𑁄 𑀫𑀳𑀸𑀣𑀽𑀧𑀁, 𑀲𑁄𑀡𑁆𑀡𑀫𑀸𑀮𑀺𑀁 𑀫𑀦𑁄𑀭𑀫𑀁;

𑀯𑀻𑀲𑀁𑀳𑀢𑁆𑀣𑀲𑀢𑀁 𑀉𑀘𑁆𑀘𑀁, 𑀓𑀸𑀭𑁂𑀲𑁆𑀲𑀢𑀺 𑀅𑀦𑀸𑀕𑀢𑁂.

𑁪. 𑀧𑀼𑀦𑁄 𑀉𑀧𑁄𑀲𑀣𑀸𑀕𑀸𑀭𑀁, 𑀦𑀸𑀦𑀸𑀭𑀢𑀦𑀫𑀡𑁆𑀟𑀺𑀢𑀁;

𑀦𑀯𑀪𑀽𑀫𑀁 𑀓𑀭𑀺𑀢𑁆𑀯𑀸𑀦, 𑀮𑁄𑀳𑀧𑀸𑀲𑀸𑀤 𑀫𑁂𑀯 𑀘.

𑁫. 𑀇𑀢𑀺 𑀘𑀺𑀦𑁆𑀢𑀺𑀬 𑀪𑀽𑀫𑀺𑀦𑁆𑀤𑁄, 𑀮𑀺𑀔𑀺𑀢𑁆𑀯𑁂𑀯𑀁 𑀞𑀧𑀸𑀧𑀺𑀢𑀁;

𑀧𑁂𑀓𑁆𑀔𑀸𑀧𑁂𑀦𑁆𑀢𑁄 𑀭𑀸𑀚𑀕𑁂𑀳𑁂, 𑀞𑀺𑀢𑀁 𑀏𑀯 𑀓𑀭𑀡𑁆𑀟𑀓𑁂.

𑁬. 𑀲𑁄𑀯𑀡𑁆𑀡𑀧𑀝𑁆𑀝𑀁 𑀮𑀤𑁆𑀥𑀸𑀦, 𑀮𑁂𑀔𑀁 𑀢𑀢𑁆𑀣 𑀅𑀯𑀸𑀘𑀬𑀺;

‘‘𑀘𑀢𑁆𑀢𑀸𑀮𑀻𑀲𑀲𑀢𑀁 𑀯𑀲𑁆𑀲𑀁, 𑀅𑀢𑀺𑀓𑁆𑀓𑀫𑁆𑀫 𑀅𑀦𑀸𑀕𑀢𑁂.

𑁭. 𑀓𑀸𑀓𑀯𑀡𑁆𑀡𑀲𑀼𑀢𑁄 𑀤𑀼𑀝𑁆𑀞-𑀕𑀸𑀫𑀡𑀺𑀫𑀦𑀼𑀚𑀸𑀥𑀺𑀧𑁄;

𑀇𑀤𑀜𑁆𑀘𑀺𑀤𑀜𑁆𑀘 𑀏𑀯𑀜𑁆𑀘, 𑀓𑀸𑀭𑁂𑀲𑁆𑀲𑀢𑀻’’𑀢𑀺 𑀯𑀸𑀘𑀺𑀢𑀁.

𑁮. 𑀲𑀼𑀢𑁆𑀯𑀸 𑀳𑀝𑁆𑀞𑁄 𑀉𑀤𑀸𑀦𑁂𑀢𑁆𑀯𑀸, 𑀅𑀧𑁆𑀧𑁄𑀝𑁆𑀞𑁂𑀲𑀺 𑀫𑀳𑀻𑀧𑀢𑀺;

𑀢𑀢𑁄 𑀧𑀸𑀢𑁄’𑀯 𑀕𑀦𑁆𑀢𑁆𑀯𑀸𑀦, 𑀫𑀳𑀸𑀫𑁂𑀖𑀯𑀦𑀁 𑀲𑀼𑀪𑀁.

𑁯. 𑀲𑀦𑁆𑀦𑀺𑀧𑀸𑀢𑀁 𑀓𑀸𑀭𑀬𑀺𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀩𑁆𑀭𑀯𑀺;

‘‘𑀯𑀺𑀫𑀸𑀦𑀢𑀼𑀮𑁆𑀬𑀁 𑀧𑀸𑀲𑀸𑀤𑀁, 𑀓𑀸𑀭𑀬𑀺𑀲𑁆𑀲𑀸𑀫𑀺 𑀯𑁄 𑀅𑀳𑀁.

𑁧𑁦. 𑀤𑀺𑀩𑁆𑀩𑀁 𑀯𑀺𑀫𑀸𑀦𑀁 𑀧𑁂𑀲𑁂𑀢𑁆𑀯𑀸, 𑀢𑀤𑀸 𑀮𑁂𑀔𑀁 𑀅𑀤𑀸𑀣 𑀫𑁂’’;

𑀪𑀺𑀓𑁆𑀔𑀼𑀲𑀗𑁆𑀖𑁄 𑀯𑀺𑀲𑀚𑁆𑀚𑁂𑀲𑀺, 𑀅𑀝𑁆𑀞 𑀔𑀻𑀡𑀸𑀲𑀯𑁂 𑀢𑀳𑀺𑀁.

𑁧𑁧. 𑀓𑀲𑁆𑀲𑀧𑀫𑀼𑀦𑀺𑀦𑁄 𑀓𑀸𑀮𑁂, 𑀅𑀲𑁄𑀓𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀅𑀝𑁆𑀞 𑀲𑀮𑀸𑀓𑀪𑀢𑁆𑀢𑀸𑀦𑀺, 𑀲𑀗𑁆𑀖𑀲𑁆𑀲 𑀧𑀭𑀺𑀡𑀸𑀫𑀺𑀬.

𑁧𑁨. 𑀪𑀭𑀡𑀺𑀁 𑀦𑀸𑀫 𑀤𑀸𑀲𑀺𑀁 𑀲𑁄, ‘‘𑀦𑀺𑀘𑁆𑀘𑀁 𑀤𑁂𑀳𑀻’’𑀢𑀺 𑀅𑀩𑁆𑀭𑀯𑀺;

𑀤𑀢𑁆𑀯𑀸 𑀲𑀸 𑀢𑀸𑀦𑀺 𑀲𑀓𑁆𑀓𑀘𑁆𑀘𑀁, 𑀬𑀸𑀯𑀚𑀻𑀯𑀁 𑀢𑀢𑁄 𑀘𑀼𑀢𑀸.

𑁧𑁩. 𑀆𑀓𑀸𑀲𑀝𑁆𑀞𑀯𑀺𑀫𑀸𑀦𑀫𑁆𑀳𑀺, 𑀦𑀺𑀩𑁆𑀩𑀢𑁆𑀢𑀺𑀭𑀼𑀘𑀺𑀭𑁂 𑀲𑀼𑀪𑁂;

𑀅𑀘𑁆𑀙𑀭𑀸𑀦𑀁 𑀲𑀳𑀲𑁆𑀲𑁂𑀦, 𑀲𑀤𑀸’𑀲𑀺 𑀧𑀭𑀺𑀯𑀸𑀭𑀺𑀢𑀸.

𑁧𑁪. 𑀢𑀲𑁆𑀲𑀸 𑀭𑀢𑀦𑀧𑀸𑀲𑀸𑀤𑁄, 𑀤𑁆𑀯𑀸𑀤𑀲𑀬𑁄𑀚𑀦𑀼𑀕𑁆𑀕𑀢𑁄;

𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑁂𑀧𑁄, 𑀘𑀢𑁆𑀢𑀸𑀮𑀻𑀲𑀜𑁆𑀘 𑀅𑀝𑁆𑀞 𑀘.

𑁧𑁫. 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑁂𑀦, 𑀫𑀡𑁆𑀟𑀺𑀢𑁄 𑀦𑀯𑀪𑀽𑀫𑀺𑀓𑁄;

𑀲𑀳𑀲𑁆𑀲𑀕𑀩𑁆𑀪𑀲𑀫𑁆𑀧𑀦𑁆𑀦𑁄, 𑀭𑀸𑀚𑀫𑀸𑀦𑁄 𑀘𑀢𑀼𑀫𑁆𑀫𑀼𑀔𑁄.

𑁧𑁬. 𑀲𑀳𑀲𑁆𑀲𑀲𑀗𑁆𑀔𑀲𑀁𑀯𑀼𑀢𑁆𑀢𑀺, 𑀲𑀻𑀳𑀧𑀜𑁆𑀚𑀭 𑀦𑁂𑀢𑁆𑀢𑀯𑀸;

𑀲𑀓𑀺𑀗𑁆𑀓𑀡𑀺𑀓𑀚𑀸𑀮𑀸𑀬, 𑀲𑀚𑁆𑀚𑀺𑀢𑁄 𑀯𑁂𑀤𑀺𑀓𑀸𑀬 𑀘.

𑁧𑁭. 𑀅𑀫𑁆𑀩𑀮𑀝𑁆𑀞𑀺𑀓𑀧𑀸𑀲𑀸𑀤𑁄, 𑀢𑀲𑁆𑀲 𑀫𑀚𑁆𑀛𑁂 𑀞𑀺𑀢𑁄 𑀅𑀳𑀼;

𑀲𑀦𑁆𑀢𑀫𑀢𑁄 𑀤𑀺𑀲𑁆𑀲𑀫𑀸𑀦𑁄, 𑀧𑀕𑁆𑀕𑀳𑀺𑀢𑀥𑀚𑀸𑀓𑀼𑀮𑁄.

𑁧𑁮. 𑀢𑀸𑀯𑀢𑀺𑀁𑀲𑀜𑁆𑀘 𑀕𑀘𑁆𑀙𑀦𑁆𑀢𑀸, 𑀤𑀺𑀲𑁆𑀯𑀸 𑀣𑁂𑀭𑀁 𑀢𑀫𑁂𑀯 𑀢𑁂;

𑀳𑀺𑀗𑁆𑀕𑀼𑀮𑁂𑀦 𑀢𑀤𑀸 𑀮𑁂𑀔𑀁, 𑀮𑁂𑀔𑀬𑀺𑀢𑁆𑀯𑀸 𑀧𑀝𑁂 𑀢𑀢𑁄.

𑁧𑁯. 𑀦𑀺𑀯𑀢𑁆𑀢𑀺𑀢𑁆𑀯𑀸𑀦 𑀆𑀕𑀦𑁆𑀢𑁆𑀯𑀸, 𑀧𑀝𑀁 𑀲𑀗𑁆𑀖𑀲𑁆𑀲 𑀤𑀲𑁆𑀲𑀬𑀼𑀁;

𑀲𑀗𑁆𑀖𑁄 𑀧𑀝𑀁 𑀕𑀳𑁂𑀢𑁆𑀯𑀸 𑀢𑀁, 𑀧𑀸𑀳𑁂𑀲𑀺 𑀭𑀸𑀚𑀲𑀦𑁆𑀢𑀺𑀓𑀁.

𑁨𑁦. 𑀢𑀁 𑀤𑀺𑀲𑁆𑀯𑀸 𑀲𑀼𑀫𑀦𑁄 𑀭𑀸𑀚𑀸, 𑀆𑀕𑀫𑁆𑀫𑀸𑀭𑀸𑀫 𑀫𑀼𑀢𑁆𑀢𑀫𑀁;

𑀆𑀮𑁂𑀔𑀢𑀼𑀮𑁆𑀬𑀁 𑀓𑀸𑀭𑁂𑀲𑀺, 𑀮𑁄𑀳𑀧𑀸𑀲𑀸𑀤 𑀫𑀼𑀢𑁆𑀢𑀫𑀁.

𑁨𑁧. 𑀓𑀫𑁆𑀫𑀸𑀭𑀫𑁆𑀪𑀦𑀓𑀸𑀮𑁂𑀯, 𑀘𑀢𑀼𑀤𑁆𑀯𑀸𑀭𑀫𑁆𑀳𑀺 𑀪𑁄𑀕𑀯𑀸;

𑀅𑀝𑁆𑀞𑀲𑀢𑀲𑀳𑀲𑁆𑀲𑀸𑀦𑀺, 𑀳𑀺𑀭𑀜𑁆𑀜𑀸𑀦𑀺 𑀞𑀧𑀸𑀧𑀬𑀺.

𑁨𑁨. 𑀧𑀼𑀝𑀲𑀳𑀲𑁆𑀲 𑀯𑀢𑁆𑀣𑀸𑀦𑀺, 𑀤𑁆𑀯𑀸𑀭𑁂 𑀤𑁆𑀯𑀸𑀭𑁂 𑀞𑀧𑀸𑀧𑀬𑀺;

𑀕𑀼𑀴 𑀢𑁂𑀮𑀲𑀓𑁆𑀔𑀭𑀫𑀥𑀼-𑀧𑀼𑀭𑀸 𑀘𑀸𑀦𑁂𑀓 𑀘𑀸𑀝𑀺𑀬𑁄.

𑁨𑁩. ‘‘𑀅𑀫𑀽𑀮𑀓𑀓𑀫𑁆𑀫 𑀫𑁂𑀢𑁆𑀣, 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀪𑀸𑀲𑀺𑀬;

𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀢𑀁 𑀓𑀫𑁆𑀫𑀁, 𑀢𑁂𑀲𑀁 𑀫𑀽𑀮𑀫𑀤𑀸𑀧𑀬𑀺.

𑁨𑁪. 𑀳𑀢𑁆𑀣𑀲𑀢𑀁 𑀳𑀢𑁆𑀣𑀲𑀢𑀁, 𑀆𑀲𑀺 𑀏𑀓𑁂𑀓 𑀧𑀲𑁆𑀲𑀢𑁄;

𑀉𑀘𑁆𑀘𑀢𑁄 𑀢𑀢𑁆𑀢𑀓𑁄𑀬𑁂𑀯, 𑀧𑀸𑀲𑀸𑀤𑁄 𑀳𑀺 𑀘𑀢𑀼𑀫𑁆𑀫𑀼𑀔𑁄.

𑁨𑁫. 𑀢𑀲𑁆𑀫𑀺𑀁 𑀧𑀸𑀲𑀸𑀤 𑀲𑁂𑀝𑁆𑀞𑀲𑁆𑀫𑀺𑀁, 𑀅𑀳𑁂𑀲𑀼𑀁 𑀦𑀯𑀪𑀽𑀫𑀺𑀬𑁄;

𑀏𑀓𑁂𑀓𑀺𑀲𑁆𑀲𑀸 𑀪𑀽𑀫𑀺𑀬𑀸 𑀘, 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀘.

𑁨𑁬. 𑀓𑀽𑀝𑀸𑀕𑀸𑀭𑀸𑀦𑀺 𑀲𑀩𑁆𑀩𑀸𑀦𑀺, 𑀲𑀚𑁆𑀛𑀼𑀦𑀸 𑀔𑀘𑀺𑀢𑀸 𑀦’𑀬𑀼𑀁;

𑀧𑀯𑀸𑀮𑀯𑁂𑀤𑀺𑀓𑀸 𑀢𑁂𑀲𑀁, 𑀦𑀸𑀦𑀸𑀭𑀢𑀦 𑀪𑀽𑀲𑀺𑀢𑀸.

𑁨𑁭. 𑀦𑀸𑀦𑀸𑀭𑀢𑀦 𑀘𑀺𑀢𑁆𑀢𑀸𑀦𑀺, 𑀢𑀸𑀲𑀁 𑀧𑀤𑀼𑀫𑀓𑀸𑀦𑀺 𑀘;

𑀲𑀚𑁆𑀛𑀓𑀺𑀁𑀓𑀺𑀡𑀺𑀓𑀸𑀧𑀦𑁆𑀢𑀺-𑀧𑀭𑀺𑀓𑁆𑀔𑀺𑀢𑁆𑀢𑀸𑀯 𑀢𑀸 𑀅𑀳𑀼.

𑁨𑁮. 𑀲𑀳𑀲𑁆𑀲𑀁 𑀢𑀢𑁆𑀣 𑀧𑀸𑀲𑀸𑀤𑁄, 𑀕𑀩𑁆𑀪𑀸 𑀆𑀲𑀼𑀁 𑀲𑀼𑀲𑀗𑁆𑀔𑀢𑀸;

𑀦𑀸𑀦𑀸𑀭𑀢𑀦 𑀔𑀘𑀺𑀢𑀸, 𑀲𑀻𑀳𑀧𑀜𑁆𑀚𑀭𑀦𑁂𑀢𑁆𑀢𑀯𑀸.

𑁨𑁯. 𑀦𑀸𑀭𑀺𑀯𑀸𑀳𑀦𑀬𑀸𑀦𑀦𑁆𑀢𑀼, 𑀲𑀼𑀢𑁆𑀯𑀸 𑀯𑁂𑀲𑁆𑀲𑀯𑀡𑀲𑁆𑀲 𑀲𑁄;

𑀢𑀤𑀸 𑀓𑀸𑀭𑀫𑀓𑀸𑀭𑁂𑀲𑀺, 𑀫𑀚𑁆𑀛𑁂 𑀭𑀢𑀦𑀫𑀡𑁆𑀟𑀧𑀁.

𑁩𑁦. 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀭𑀽𑀧𑁂𑀳𑀺, 𑀤𑁂𑀯𑀢𑀸 𑀭𑀽𑀧𑀓𑁂𑀳𑀺 𑀘;

𑀅𑀳𑀼 𑀭𑀢𑀦𑀫𑀬𑁄𑀳𑁂’𑀲, 𑀣𑀫𑁆𑀪𑁂𑀳𑀺 𑀘 𑀯𑀺𑀪𑀽𑀲𑀺𑀢𑁄.

𑁩𑁧. 𑀫𑀼𑀢𑁆𑀢𑀸𑀚𑀸𑀮𑀧𑀭𑀺𑀓𑁆𑀔𑁂𑀧𑁄, 𑀫𑀡𑁆𑀟𑀧𑀦𑁆𑀢𑁂 𑀲𑀫𑀦𑁆𑀢𑀢𑁄;

𑀧𑀯𑀸𑀮𑀯𑁂𑀤𑀺𑀓𑀸 𑀘𑁂𑀢𑁆𑀣, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀺𑀥𑀸 𑀅𑀳𑀼.

𑁩𑁨. 𑀲𑀢𑁆𑀢𑀭𑀢𑀦 𑀘𑀺𑀢𑁆𑀢𑀲𑁆𑀲, 𑀯𑁂𑀫𑀚𑁆𑀛𑁂 𑀫𑀡𑁆𑀟𑀧𑀲𑁆𑀲 𑀢𑀼;

𑀭𑀼𑀘𑀺𑀭𑁄 𑀤𑀦𑁆𑀢𑀧𑀮𑁆𑀮𑀗𑁆𑀓𑁄, 𑀭𑀫𑁆𑀫𑁄 𑀨𑀮𑀺𑀓𑀲𑀦𑁆𑀣𑀭𑁄.

𑁩𑁩. 𑀤𑀦𑁆𑀢𑀫𑀬𑀸𑀧𑀲𑁆𑀲𑀬𑁂’𑀢𑁆𑀣, 𑀲𑀼𑀯𑀡𑁆𑀡𑀫𑀬 𑀲𑀽𑀭𑀺𑀬𑁄;

𑀲𑀚𑁆𑀛𑀼𑀫𑀬𑁂 𑀘𑀦𑁆𑀤𑀺𑀫𑀸 𑀘, 𑀢𑀸𑀭𑀸 𑀘 𑀫𑀼𑀢𑁆𑀢𑀓𑀸 𑀫𑀬𑀸.

𑁩𑁪. 𑀦𑀸𑀦𑀸𑀭𑀢𑀦 𑀧𑀤𑀼𑀫𑀸𑀦𑀺, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;

𑀚𑀸𑀢𑀓𑀸𑀦𑀺 𑀘 𑀢𑀢𑁆𑀣𑁂𑀯, 𑀆𑀲𑀼𑀁 𑀲𑁄𑀡𑁆𑀡𑀮𑀢𑀦𑁆𑀢𑀭𑁂.

𑁩𑁫. 𑀫𑀳𑀕𑁆𑀖𑀧𑀘𑁆𑀘𑀢𑁆𑀣𑀭𑀡𑁂, 𑀧𑀮𑁆𑀮𑀗𑁆𑀓𑁂’𑀢𑀺 𑀫𑀦𑁄𑀭𑀫𑁂;

𑀫𑀦𑁄𑀳𑀭𑀸’𑀲𑀺𑀝𑁆𑀞𑀧𑀺𑀢𑀸, 𑀭𑀼𑀘𑀺𑀭𑀁 𑀤𑀦𑁆𑀢𑀩𑀻𑀚𑀦𑀻.

𑁩𑁬. 𑀧𑀯𑀸𑀮𑀧𑀸𑀤𑀼𑀓𑀸 𑀢𑀢𑁆𑀣, 𑀨𑀮𑀺𑀓𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀸;

𑀲𑁂𑀢𑀘𑁆𑀙𑀢𑁆𑀢𑀁 𑀲𑀚𑁆𑀛𑀼𑀤𑀡𑁆𑀟𑀁, 𑀧𑀮𑁆𑀮𑀗𑁆𑀓𑁄’𑀧𑀭𑀺𑀲𑁄𑀪𑀣.

𑁩𑁭. 𑀲𑀢𑁆𑀢𑀭𑀢𑀦 𑀫𑀬𑀸𑀦𑁂𑀢𑁆𑀣, 𑀅𑀝𑁆𑀞𑀫𑀗𑁆𑀕𑀮𑀺𑀓𑀸𑀦𑀺 𑀘;

𑀘𑀢𑀼𑀧𑁆𑀧𑀤𑀸𑀦𑀁 𑀧𑀦𑁆𑀢𑀻 𑀘, 𑀫𑀡𑀺𑀫𑀼𑀢𑁆𑀢𑀦𑁆𑀢𑀭𑀸 𑀅𑀳𑀼𑀁.

𑁩𑁮. 𑀭𑀚𑀢𑀸𑀦𑀜𑁆𑀘 𑀖𑀡𑁆𑀝𑀸𑀦𑀁, 𑀧𑀦𑁆𑀢𑀻 𑀪𑀢𑁆𑀢𑀦𑁆𑀢𑀮𑀫𑁆𑀩𑀺𑀢𑀸;

𑀧𑀸𑀲𑀸𑀤𑀙𑀢𑁆𑀢𑀧𑀮𑁆𑀮𑀗𑁆𑀓-𑀫𑀡𑁆𑀟𑀧𑀸’𑀲𑀼𑀁 𑀅𑀦𑀕𑁆𑀖𑀺𑀓𑀸.

𑁩𑁯. 𑀫𑀳𑀕𑁆𑀖 𑀧𑀜𑁆𑀜𑀧𑀸𑀧𑁂𑀲𑀺, 𑀫𑀜𑁆𑀘𑀧𑀻𑀞𑀁 𑀬𑀣𑀸𑀭𑀳𑀁;

𑀢𑀣𑁂𑀯 𑀪𑀽𑀫𑀢𑁆𑀣𑀭𑀡𑀁, 𑀓𑀫𑁆𑀩𑀮𑀜𑁆𑀘 𑀫𑀳𑀸𑀭𑀳𑀁.

𑁪𑁦. 𑀆𑀘𑀸𑀫 𑀓𑀼𑀫𑁆𑀪𑀺𑀲𑁄𑀯𑀡𑁆𑀡𑀸, 𑀉𑀮𑀼𑀗𑁆𑀓𑁄 𑀘 𑀅𑀳𑀼 𑀢𑀳𑀺𑀁;

𑀧𑀸𑀲𑀸𑀤 𑀧𑀭𑀺𑀪𑁄𑀕𑁂𑀲𑀼, 𑀲𑁂𑀲𑁂𑀲𑀼 𑀘 𑀓𑀣𑀸’ 𑀯𑀓𑀸.

𑁪𑁧. 𑀘𑀸𑀭𑀼𑀧𑀸𑀓𑀸𑀭 𑀧𑀭𑀺𑀯𑀸𑀭𑁄,

𑀲𑁄 𑀘𑀢𑀼𑀤𑁆𑀯𑀸𑀭𑀓𑁄𑀝𑁆𑀞𑀓𑁄;

𑀧𑀸𑀲𑀸𑀤𑁄’𑀮𑀗𑁆𑀓𑀢𑁄 𑀲𑁄𑀪𑀺,

𑀢𑀸𑀯𑀢𑀺𑀁𑀲 𑀲𑀪𑀸 𑀯𑀺𑀬.

𑁪𑁨. 𑀢𑀫𑁆𑀩 𑀮𑁄𑀳𑀺𑀝𑁆𑀞𑀓𑀸𑀳𑁂’𑀲𑁄,

𑀧𑀸𑀲𑀸𑀤𑁄 𑀙𑀸𑀤𑀺𑀢𑁄 𑀅𑀳𑀼;

𑀮𑁄𑀳 𑀧𑀸𑀲𑀸𑀤 𑀯𑁄𑀳𑀸𑀭𑁄,

𑀢𑁂𑀦 𑀢𑀲𑁆𑀲 𑀅𑀚𑀸𑀬𑀣.

𑁪𑁩. 𑀦𑀝𑁆𑀞𑀺𑀢𑁂 𑀮𑁄𑀳𑀧𑀸𑀲𑀸𑀤𑁂, 𑀲𑁄 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀬𑀺;

𑀭𑀸𑀚𑀸 𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺, 𑀫𑀭𑀺𑀘𑀯𑀝𑁆𑀝𑀺𑀫𑀳𑁂 𑀯𑀺𑀬.

𑁪𑁪. 𑀧𑀼𑀣𑀼𑀚𑁆𑀚𑀦𑀸’𑀯 𑀅𑀝𑁆𑀞𑀁𑀲𑀼, 𑀪𑀺𑀓𑁆𑀔𑀽 𑀧𑀞𑀫𑀪𑀽𑀫𑀺𑀬𑀁;

𑀢𑁂𑀧𑀺𑀝𑀓𑀸 𑀤𑀼𑀢𑀺𑀬𑀸𑀬, 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀧𑀦.

𑁪𑁫. 𑀏𑀓𑁂 𑀓𑁂𑀬𑁂𑀯 𑀅𑀝𑁆𑀞𑀁𑀲𑀼, 𑀢𑀢𑀺𑀬𑀸𑀤𑀻𑀲𑀼 𑀪𑀽𑀫𑀺𑀲𑀼;

𑀅𑀭𑀳𑀦𑁆𑀢𑁄 𑀘 𑀅𑀝𑁆𑀞𑀁𑀲𑀼, 𑀉𑀤𑁆𑀥𑀁 𑀘𑀢𑀽𑀲𑀼 𑀪𑀽𑀫𑀺𑀲𑀼.

𑁪𑁬. 𑀲𑀗𑁆𑀖𑀲𑁆𑀲 𑀤𑀢𑁆𑀯𑀸 𑀧𑀸𑀲𑀸𑀤𑀁, 𑀤𑀓𑁆𑀔𑀺𑀡𑀫𑁆𑀩𑀼𑀧𑀼𑀭𑀲𑁆𑀲𑀭𑀁;

𑀭𑀸𑀚𑀸’𑀤𑀢𑁆𑀣 𑀫𑀳𑀸𑀤𑀸𑀦𑀁, 𑀲𑀢𑁆𑀢𑀸𑀳𑀁 𑀧𑀼𑀩𑁆𑀩𑀓𑀁 𑀧𑀺𑀬.

𑁪𑁭. 𑀧𑀸𑀲𑀸𑀤 𑀫𑀳𑀘𑀢𑁆𑀢𑀸𑀦𑀺, 𑀫𑀳𑀸𑀘𑀸𑀕𑁂𑀦 𑀭𑀸𑀚𑀺𑀦𑀸;

𑀅𑀦𑀕𑁆𑀖𑀸𑀦𑀺 𑀞𑀧𑁂𑀢𑁆𑀯𑀸𑀦, 𑀅𑀳𑁂𑀲𑀼𑀁 𑀢𑀺𑀁𑀲𑀓𑁄𑀝𑀺𑀬𑁄.

𑁪𑁮. 𑀦𑀺𑀲𑁆𑀲𑀸𑀭𑁂 𑀥𑀦𑀦𑀺𑀘𑀬𑁂 𑀯𑀺𑀲𑁂𑀲𑀲𑀸𑀭𑀁,

𑀬𑁂 𑀤𑀸𑀦𑀁 𑀧𑀭𑀺𑀕𑀡𑀬𑀦𑁆𑀢𑀺 𑀲𑀸𑀥𑀼𑀧𑀜𑁆𑀜𑀸;

𑀢𑁂 𑀤𑀸𑀦𑀁 𑀯𑀺𑀧𑀼𑀮𑀫𑀧𑁂𑀢 𑀘𑀺𑀢𑁆𑀢𑀲𑀗𑁆𑀕𑀸,

𑀲𑀢𑁆𑀢𑀸𑀦𑀁 𑀳𑀺𑀢𑀧𑀭𑀫𑀸 𑀤𑀤𑀦𑁆𑀢𑀺 𑀏𑀯𑀁𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀮𑁄𑀓𑀳𑀧𑀸𑀲𑀸𑀤𑀫𑀳𑁄 𑀦𑀸𑀫

𑀲𑀢𑁆𑀢𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.