𑀘𑀢𑀼𑀯𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀤𑁆𑀯𑁂𑀪𑀸𑀢𑀺𑀓𑀬𑀼𑀤𑁆𑀥𑀁

𑁧. 𑀳𑀢𑁆𑀣𑀲𑁆𑀲 𑀣𑀭𑀼𑀓𑀫𑁆𑀫𑀲𑁆𑀲, 𑀓𑀼𑀲𑀮𑁄 𑀓𑀢𑀼𑀧𑀸𑀲𑀦𑁄;

𑀲𑁄 𑀕𑀸𑀫𑀡𑀺𑀭𑀸𑀚𑀲𑀼𑀢𑁄, 𑀫𑀳𑀸𑀕𑀸𑀫𑁂 𑀯𑀲𑀻 𑀢𑀤𑀸.

𑁨. 𑀭𑀸𑀚𑀸 𑀭𑀸𑀚𑀲𑀼𑀢𑀁 𑀢𑀺𑀲𑁆𑀲𑀁, 𑀤𑀻𑀖𑀯𑀸𑀧𑀺𑀫𑁆𑀳𑀺 𑀯𑀸𑀲𑀬𑀺;

𑀆𑀭𑀓𑁆𑀔𑀺𑀢𑀼𑀁 𑀚𑀦𑀧𑀤𑀁, 𑀲𑀫𑁆𑀧𑀦𑁆𑀦 𑀩𑀮𑀯𑀸𑀳𑀦𑀁.

𑁩. 𑀓𑀼𑀫𑀸𑀭𑁄 𑀕𑀸𑀫𑀡𑀺𑀓𑀸𑀮𑁂, 𑀲𑀫𑁆𑀧𑀲𑁆𑀲𑀦𑁆𑀢𑁄 𑀩𑀮𑀁 𑀲𑀓𑀁;

‘‘𑀬𑀼𑀚𑁆𑀛𑀺𑀲𑁆𑀲𑀁 𑀤𑀫𑀺𑀴𑁂𑀳𑀻’’𑀢𑀺, 𑀧𑀺𑀢𑀼𑀭𑀜𑁆𑀜𑁄 𑀓𑀣𑀸𑀧𑀬𑀻.

𑁪. 𑀭𑀸𑀚𑀸 𑀢𑀁 𑀅𑀦𑀼𑀭𑀓𑁆𑀔𑀦𑁆𑀢𑁄, ‘‘𑀑𑀭𑀕𑀗𑁆𑀕𑀁 𑀅𑀮𑀁’’ 𑀇𑀢𑀺;

𑀯𑀸𑀭𑁂𑀲𑀺 𑀬𑀸𑀯𑀢𑀢𑀺𑀬𑀁, 𑀲𑁄 𑀢𑀣𑁂𑀯 𑀓𑀣𑀸𑀧𑀬𑀻.

𑁫. 𑀧𑀺𑀢𑀸 𑀫𑁂 𑀧𑀼𑀭𑀺𑀲𑁄 𑀳𑁄𑀦𑁆𑀢𑁄, 𑀦𑁂’𑀯𑀁 𑀯𑀓𑁆𑀔𑀢𑀺 𑀢𑁂𑀦𑀺’𑀤𑀁;

𑀧𑀺𑀮𑀦𑁆𑀥𑀢𑀽𑀢𑀺 𑀧𑁂𑀲𑁂𑀲𑀺, 𑀇𑀢𑁆𑀣𑀸𑀮𑀗𑁆𑀓𑀸𑀭𑀫𑀲𑁆𑀲 𑀲𑁄.

𑁬. 𑀭𑀸𑀚𑀸’𑀳 𑀢𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸, ‘‘𑀓𑀭𑁄𑀣 𑀳𑁂𑀫𑀲𑀗𑁆𑀔𑀮𑀺𑀁;

𑀢𑀸𑀬 𑀢𑀁 𑀩𑀦𑁆𑀥𑀬𑀺𑀲𑁆𑀲𑀸𑀫𑀺, 𑀦𑀸’𑀜𑁆𑀜𑀣𑀸 𑀭𑀓𑁆𑀔𑀺𑀬𑁄 𑀳𑀺 𑀲𑁄.

𑁭. 𑀧𑀮𑀸𑀬𑀺𑀢𑁆𑀯𑀸𑀦 𑀫𑀮𑀬𑀁, 𑀓𑀼𑀚𑁆𑀛𑀺𑀢𑁆𑀯𑀸 𑀧𑀺𑀢𑀼𑀦𑁄 𑀅𑀕𑀸;

𑀤𑀼𑀝𑁆𑀞𑀢𑁆𑀢𑀸𑀬𑁂𑀯 𑀧𑀺𑀢𑀭𑀺, 𑀆𑀳𑀼 𑀢𑀁 𑀤𑀼𑀝𑁆𑀞𑀕𑀸𑀫𑀡𑀺.

𑁮. 𑀭𑀸𑀚𑀸’𑀣 𑀆𑀭𑀪𑀻 𑀓𑀸𑀢𑀼𑀁, 𑀫𑀳𑀸𑀫𑀗𑁆𑀕𑀮𑀘𑁂𑀢𑀺𑀬𑀁;

𑀦𑀺𑀝𑁆𑀞𑀺𑀢𑁂 𑀘𑁂𑀢𑀺𑀬𑁂 𑀲𑀗𑁆𑀖𑀁, 𑀲𑀦𑁆𑀦𑀺𑀧𑀸𑀢𑀬𑀺 𑀪𑀽𑀧𑀢𑀺.

𑁯. 𑀤𑁆𑀯𑀸𑀤𑀲𑀸’𑀲𑀼𑀁 𑀲𑀳𑀲𑁆𑀲𑀸𑀦𑀺, 𑀪𑀺𑀓𑁆𑀔𑀽 𑀘𑀺𑀢𑁆𑀢𑀮𑀧𑀩𑁆𑀩𑀢𑀸;

𑀢𑀢𑁄 𑀢𑀢𑁄 𑀤𑁆𑀯𑀸𑀤𑀲𑁂𑀯, 𑀲𑀳𑀲𑁆𑀲𑀸𑀦𑀺 𑀲𑀫𑀸𑀕𑀫𑀼𑀁.

𑁧𑁦. 𑀓𑀢𑁆𑀯𑀸𑀦 𑀘𑁂𑀢𑀺𑀬𑀫𑀳𑀁, 𑀭𑀸𑀚𑀸 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸;

𑀲𑀩𑁆𑀩𑁂 𑀬𑁄𑀥𑁂 𑀲𑀫𑀸𑀦𑁂𑀢𑁆𑀯𑀸, 𑀓𑀸𑀭𑁂𑀲𑀺 𑀲𑀧𑀣𑀁 𑀢𑀤𑀸.

𑁧𑁧. ‘‘𑀧𑀼𑀢𑁆𑀢𑀸𑀦𑀁 𑀓𑀮𑀳𑀝𑁆𑀞𑀸𑀦𑀁, 𑀦 𑀕𑀘𑁆𑀙𑀺𑀲𑁆𑀲𑀸𑀫 𑀦𑁄’’𑀇𑀢𑀺;

𑀅𑀓𑀁𑀲𑀼 𑀲𑀧𑀣𑀁 𑀲𑀩𑁆𑀩𑁂, 𑀢𑀁 𑀬𑀼𑀤𑁆𑀥𑀁 𑀢𑁂𑀦 𑀦𑀸𑀕𑀫𑀼𑀁.

𑁧𑁨. 𑀘𑀢𑀼𑀲𑀝𑁆𑀞𑀺 𑀯𑀺𑀳𑀸𑀭𑁂 𑀲𑁄, 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀻𑀧𑀢𑀺;

𑀢𑀢𑁆𑀢𑀓𑀸𑀦𑁂𑀯 𑀯𑀲𑁆𑀲𑀸𑀦𑀺, 𑀞𑀢𑁆𑀯𑀸 𑀫𑀭𑀺𑀢𑀳𑀺𑀁 𑀢𑀤𑀸.

𑁧𑁩. 𑀭𑀜𑁆𑀜𑁄 𑀲𑀭𑀻𑀭𑀁 𑀕𑀸𑀳𑁂𑀢𑁆𑀯𑀸, 𑀙𑀦𑁆𑀦𑀬𑀸𑀦𑁂𑀦 𑀭𑀸𑀚𑀺𑀦𑀺;

𑀦𑁂𑀢𑁆𑀯𑀸 𑀢𑀺𑀲𑁆𑀲 𑀫𑀳𑀸𑀭𑀸𑀫𑀁, 𑀢𑀁 𑀲𑀗𑁆𑀖𑀲𑁆𑀲 𑀦𑀺𑀯𑁂𑀤𑀬𑀺.

𑁧𑁪. 𑀲𑀼𑀢𑁆𑀯𑀸 𑀢𑀺𑀲𑁆𑀲𑀓𑀼𑀫𑀸𑀭𑁄 𑀢𑀁, 𑀆𑀕𑀦𑁆𑀢𑁆𑀯𑀸 𑀤𑀻𑀖𑀯𑀸𑀧𑀺𑀢𑁄;

𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸, 𑀲𑀓𑁆𑀓𑀘𑁆𑀘𑀁 𑀧𑀺𑀢𑀼𑀦𑁄 𑀲𑀬𑀁.

𑁧𑁫. 𑀫𑀸𑀢𑀭𑀁 𑀓𑀡𑁆𑀟𑀼𑀮𑀁 𑀳𑀢𑁆𑀣𑀺𑀁, 𑀆𑀤𑀺𑀬𑀺𑀢𑁆𑀯𑀸 𑀫𑀳𑀩𑁆𑀩𑀮𑁄;

𑀪𑀸𑀢𑀼𑀪𑀬𑀸 𑀤𑀻𑀖𑀯𑀸𑀧𑀺𑀁, 𑀅𑀕𑀫𑀸𑀲𑀺 𑀮𑀳𑀼𑀁 𑀢𑀢𑁄.

𑁧𑁬. 𑀢𑀁 𑀧𑀯𑀢𑁆𑀢𑀺𑀁 𑀦𑀺𑀯𑁂𑀤𑁂𑀢𑀼𑀁, 𑀤𑀼𑀝𑁆𑀞𑀕𑀸𑀫𑀡𑀺 𑀲𑀦𑁆𑀢𑀺𑀓𑀁;

𑀮𑁂𑀔𑀁 𑀤𑀢𑁆𑀯𑀸 𑀯𑀺𑀲𑀚𑁆𑀚𑁂𑀲𑀼𑀁, 𑀲𑀘𑁆𑀘𑁂𑀫𑀘𑁆𑀘𑀸 𑀲𑀫𑀸𑀕𑀢𑀸.

𑁧𑁭. 𑀲𑁄 𑀕𑀼𑀢𑁆𑀢𑀳𑀸𑀮𑀫𑀸𑀕𑀦𑁆𑀢𑁆𑀯𑀸, 𑀢𑀢𑁆𑀣 𑀘𑀸𑀭𑁂 𑀯𑀺𑀲𑀚𑁆𑀚𑀺𑀬;

𑀫𑀳𑀸𑀕𑀸𑀫𑀫𑀼𑀧𑀕𑀦𑁆𑀢𑁆𑀯𑀸, 𑀲𑀬𑀁 𑀭𑀚𑁆𑀚𑁂’𑀪𑀺𑀲𑁂𑀘𑀬𑀺.

𑁧𑁮. 𑀫𑀸𑀢𑀢𑁆𑀣𑀁 𑀓𑀡𑁆𑀟𑀽𑀮𑀢𑁆𑀣𑀜𑁆𑀘, 𑀪𑀸𑀢𑀼𑀮𑁂𑀔𑀁 𑀯𑀺𑀲𑀚𑁆𑀚𑀬𑀺;

𑀅𑀮𑀤𑁆𑀥𑀸 𑀬𑀸𑀯𑀢𑀢𑀺𑀬𑀁, 𑀬𑀼𑀤𑁆𑀥𑀸𑀬 𑀲𑀫𑀼𑀧𑀸𑀕𑀫𑀺.

𑁧𑁯. 𑀅𑀳𑀼 𑀤𑁆𑀯𑀺𑀦𑁆𑀦𑀁 𑀫𑀳𑀸𑀬𑀼𑀤𑁆𑀥𑀁, 𑀘𑀽𑀴𑀗𑁆𑀕𑀡𑀺𑀬𑀧𑀺𑀝𑁆𑀞𑀺𑀬𑀁;

𑀢𑀢𑁆𑀣 𑀦𑁂𑀓𑀲𑀳𑀲𑁆𑀲𑀸𑀦𑀺, 𑀧𑀢𑀺𑀁𑀲𑀼 𑀭𑀸𑀚𑀺𑀦𑁄 𑀦𑀭𑀸.

𑁨𑁦. 𑀭𑀸𑀚𑀸 𑀘 𑀢𑀺𑀲𑁆𑀲𑀸𑀫𑀘𑁆𑀘𑁄 𑀘, 𑀯𑀴𑀯𑀸𑀤𑀻𑀖𑀼𑀢𑀼𑀦𑀺𑀓𑀸;

𑀢𑀬𑁄𑀬𑁂𑀯 𑀧𑀮𑀸𑀬𑀺𑀁𑀲𑀼, 𑀓𑀼𑀫𑀸𑀭𑁄 𑀅𑀦𑀼𑀩𑀦𑁆𑀥𑀺𑀢𑁂.

𑁨𑁧. 𑀉𑀪𑀺𑀦𑁆𑀦𑀫𑀦𑁆𑀢𑀭𑁂 𑀪𑀺𑀓𑁆𑀔𑀽, 𑀫𑀦𑁆𑀢𑀬𑀺𑀁𑀲𑀼 𑀫𑀳𑀻𑀥𑀭𑀁;

𑀢𑀁 𑀤𑀺𑀲𑁆𑀯𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀓𑀫𑁆𑀫𑀁’’ 𑀇𑀢𑀺 𑀦𑀺𑀯𑀢𑁆𑀢𑀺 𑀲𑁄.

𑁨𑁨. 𑀓𑀧𑁆𑀧𑀓𑀦𑁆𑀤𑀭𑀦𑀚𑁆𑀚𑀸𑀲𑁄, 𑀚𑀯𑀫𑀸𑀮𑀺𑀢𑀺𑀢𑁆𑀣𑀫𑀸𑀕𑀢𑁄;

𑀭𑀸𑀚𑀸’𑀳 𑀢𑀺𑀲𑁆𑀲𑀫𑀘𑁆𑀘𑀁 𑀢𑀁, ‘‘𑀙𑀸𑀢𑀚𑁆𑀛𑀢𑁆𑀢𑀸 𑀫𑀬𑀁’’𑀇𑀢𑀺.

𑁨𑁩. 𑀲𑀼𑀯𑀡𑁆𑀡𑀲𑀭𑀓𑁂 𑀔𑀺𑀢𑁆𑀢-𑀪𑀢𑁆𑀢𑀁 𑀦𑀻𑀳𑀭𑀺𑀢𑀲𑁆𑀲 𑀲𑁄;

𑀲𑀗𑁆𑀖𑁂 𑀤𑀢𑁆𑀯𑀸 𑀪𑀼𑀜𑁆𑀚𑀦𑀢𑁄, 𑀓𑀸𑀭𑁂𑀢𑁆𑀯𑀸 𑀘𑀢𑀼𑀪𑀸𑀕𑀓𑀁.

𑁨𑁪. ‘‘𑀖𑁄𑀲𑁂𑀳𑀺 𑀓𑀸𑀮’’𑀫𑀺𑀘𑁆𑀘𑀸’𑀳,

𑀢𑀺𑀲𑁆𑀲𑁄 𑀓𑀸𑀮𑀫𑀖𑁄𑀲𑀬𑀺;

𑀲𑀼𑀡𑀺𑀢𑁆𑀯𑀸 𑀤𑀺𑀩𑁆𑀩𑀲𑁄𑀢𑁂𑀦,

𑀭𑀜𑁆𑀜𑁄 𑀲𑀓𑁆𑀔𑀸𑀬 𑀤𑀸𑀬𑀓𑁄.

𑁨𑁫. 𑀣𑁂𑀭𑁄 𑀧𑀺𑀬𑀗𑁆𑀕𑀼 𑀤𑀻𑀧𑀝𑁆𑀞𑁄, 𑀣𑁂𑀭𑀁 𑀢𑀢𑁆𑀣 𑀦𑀺𑀬𑁄𑀚𑀬𑀺;

𑀢𑀺𑀲𑁆𑀲𑀁 𑀓𑀼𑀝𑀼𑀫𑁆𑀩𑀺𑀓𑀲𑀼𑀢𑀁, 𑀲𑁄 𑀢𑀢𑁆𑀣 𑀦𑀪𑀲𑀸’𑀕𑀫𑀸.

𑁨𑁬. 𑀢𑀲𑁆𑀲 𑀢𑀺𑀲𑁆𑀲𑁄 𑀓𑀭𑀸𑀧𑀢𑁆𑀢-𑀆𑀤𑀸𑀬𑀸’𑀤𑀸𑀲𑀺 𑀭𑀸𑀚𑀺𑀦𑁄;

𑀲𑀗𑁆𑀖𑀲𑁆𑀲 𑀪𑀸𑀕𑀁 𑀲𑀫𑁆𑀪𑀸𑀕𑀁, 𑀭𑀸𑀚𑀸 𑀧𑀢𑁆𑀢𑁂 𑀔𑀺𑀧𑀸𑀧𑀬𑀺.

𑁨𑁭. 𑀲𑀫𑁆𑀪𑀸𑀕𑀁 𑀔𑀺𑀧𑀺 𑀢𑀺𑀲𑁆𑀲𑁄 𑀘, 𑀲𑀫𑁆𑀪𑀸𑀕𑀁 𑀯𑀴𑀯𑀸𑀧𑀺 𑀘;

𑀦 𑀇𑀘𑁆𑀙𑀺𑀢𑀲𑁆𑀲𑀸𑀪𑀸𑀕𑀜𑁆𑀘, 𑀢𑀺𑀲𑁆𑀲𑁄 𑀧𑀢𑁆𑀢𑀫𑁆𑀳𑀺 𑀧𑀓𑁆𑀔𑀺𑀧𑀺.

𑁨𑁮. 𑀪𑀢𑁆𑀢𑀲𑁆𑀲 𑀧𑀼𑀡𑁆𑀡𑀧𑀢𑁆𑀢𑀁 𑀢𑀁, 𑀅𑀤𑀸𑀣𑁂𑀭𑀲𑁆𑀲 𑀪𑀽𑀧𑀢𑀺;

𑀅𑀤𑀸 𑀕𑁄𑀢𑀫𑀣𑁂𑀭𑀲𑁆𑀲, 𑀲𑁄 𑀕𑀦𑁆𑀢𑁆𑀯𑀸 𑀦𑀪𑀲𑀸 𑀮𑀳𑀼𑀁.

𑁨𑁯. 𑀪𑀺𑀓𑁆𑀔𑀽𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀤𑀢𑁆𑀯𑀸 𑀆𑀮𑁄𑀧𑀪𑀸𑀕𑀲𑁄;

𑀧𑀜𑁆𑀘𑀲𑀢𑀸𑀦𑀁 𑀲𑁄 𑀣𑁂𑀭𑁄, 𑀮𑀤𑁆𑀥𑁂𑀳𑀺 𑀢𑀼 𑀢𑀤𑀦𑁆𑀢𑀺𑀓𑀸.

𑁩𑁦. 𑀪𑀸𑀕𑁂𑀳𑀺 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸, 𑀆𑀓𑀸𑀲𑁂 𑀔𑀺𑀧𑀺 𑀭𑀸𑀚𑀺𑀦𑁄;

𑀤𑀺𑀲𑁆𑀯𑀸’ 𑀕𑀢𑀁 𑀕𑀳𑁂𑀢𑁆𑀯𑀸 𑀢𑀁, 𑀢𑀺𑀲𑁆𑀲𑁄 𑀪𑁄𑀚𑀺𑀲𑀺 𑀪𑀽𑀧𑀢𑀺𑀁.

𑁩𑁧. 𑀪𑀼𑀜𑁆𑀚𑀺𑀢𑁆𑀯𑀸𑀦 𑀲𑀬𑀜𑁆𑀚𑀸𑀧𑀺, 𑀯𑀴𑀯𑀜𑁆𑀘 𑀅𑀪𑁄𑀚𑀬𑀺;

𑀲𑀢𑁆𑀢𑀸𑀳𑀁 𑀘𑀼𑀫𑁆𑀩𑀝𑀁 𑀓𑀢𑁆𑀯𑀸, 𑀭𑀸𑀚𑀸 𑀧𑀢𑁆𑀢𑀁 𑀯𑀺𑀲𑀚𑁆𑀚𑀬𑀺.

𑁩𑁨. 𑀕𑀦𑁆𑀢𑁆𑀯𑀸𑀦 𑀲𑁄 𑀫𑀳𑀸𑀕𑀸𑀫𑀁, 𑀲𑀫𑀸𑀤𑀸𑀬 𑀩𑀮𑀁 𑀧𑀼𑀦;

𑀲𑀝𑁆𑀞𑀺𑀲𑀳𑀲𑁆𑀲𑀁 𑀬𑀼𑀤𑁆𑀥𑀸𑀬, 𑀕𑀦𑁆𑀢𑁆𑀯𑀸 𑀬𑀼𑀚𑁆𑀛𑀺 𑀲𑀪𑀸𑀢𑀭𑀸.

𑁩𑁩. 𑀭𑀸𑀚𑀸 𑀯𑀴𑀯𑀫𑀸𑀭𑀼𑀬𑁆𑀳, 𑀢𑀺𑀲𑁆𑀲𑁄 𑀓𑀡𑁆𑀟𑀽𑀮 𑀳𑀢𑁆𑀣𑀺𑀦𑀁;

𑀤𑁆𑀯𑁂 𑀪𑀸𑀢𑀭𑁄 𑀲𑀫𑀸𑀕𑀜𑁆𑀙𑀼𑀁, 𑀬𑀼𑀚𑁆𑀛𑀫𑀸𑀦𑀸 𑀭𑀡𑁂 𑀢𑀤𑀸.

𑁩𑁪. 𑀭𑀸𑀚𑀸 𑀓𑀭𑀺𑀁 𑀓𑀭𑀺𑀢𑁆𑀯’𑀦𑁆𑀢𑁄, 𑀯𑀴𑀯𑀸𑀫𑀡𑁆𑀟𑀮𑀁 𑀅𑀓𑀸;

𑀢𑀣𑀸𑀧𑀺 𑀙𑀺𑀤𑁆𑀤𑀁 𑀦𑁄 𑀤𑀺𑀲𑁆𑀯𑀸, 𑀮𑀗𑁆𑀖𑀸 𑀧𑁂𑀢𑀼𑀁 𑀫𑀢𑀺𑀁𑀅𑀓𑀸.

𑁩𑁫. 𑀯𑀴𑀯𑀁 𑀮𑀗𑁆𑀖𑀬𑀺𑀢𑁆𑀯𑀸𑀦, 𑀳𑀢𑁆𑀣𑀺𑀦𑀁 𑀪𑀸𑀢𑀺𑀓𑁄’𑀧𑀭𑀺;

𑀢𑁄𑀫𑀭𑀁 𑀔𑀺𑀧𑀺 𑀘𑀫𑁆𑀫𑀁𑀯, 𑀬𑀣𑀸 𑀙𑀺𑀚𑁆𑀚𑀢𑀺 𑀧𑀺𑀝𑁆𑀞𑀺𑀬𑀁.

𑁩𑁬. 𑀅𑀦𑁂𑀓𑀸𑀦𑀺 𑀲𑀳𑀲𑁆𑀲𑀸𑀦𑀺, 𑀓𑀼𑀫𑀸𑀭𑀲𑁆𑀲 𑀦𑀭𑀸𑀢𑀳𑀺𑀁;

𑀧𑀢𑀺𑀁𑀲𑀼 𑀬𑀼𑀤𑁆𑀥𑁂 𑀬𑀼𑀚𑁆𑀛𑀦𑁆𑀢𑀸, 𑀪𑀺𑀚𑁆𑀚 𑀘𑁂𑀯 𑀫𑀳𑀩𑁆𑀩𑀮𑀁.

𑁩𑁭. ‘‘𑀆𑀭𑁄𑀳𑀓𑀲𑁆𑀲 𑀯𑁂𑀓𑀮𑁆𑀮𑀸, 𑀇𑀢𑁆𑀣𑀻 𑀫𑀁 𑀮𑀗𑁆𑀖𑀬𑀻’’𑀇𑀢𑀺;

𑀓𑀼𑀤𑁆𑀥𑁄𑀓𑀭𑀻 𑀢𑀁 𑀘𑀸𑀮𑁂𑀦𑁆𑀢𑁄, 𑀭𑀼𑀓𑁆𑀔𑀫𑁂𑀓 𑀫𑀼𑀧𑀸𑀕𑀫𑀺.

𑁩𑁮. 𑀓𑀼𑀫𑀸𑀭𑁄 𑀆𑀭𑀼𑀳𑀻 𑀭𑀼𑀓𑁆𑀔𑀁, 𑀳𑀢𑁆𑀣𑀻 𑀲𑀸𑀫𑀺𑀫𑀼𑀧𑀸𑀕𑀫𑀺;

𑀢𑀫𑀸𑀭𑀼𑀬𑁆𑀳 𑀧𑀮𑀸𑀬𑀦𑁆𑀢𑀁, 𑀓𑀼𑀫𑀸𑀭𑁄 𑀫𑀦𑀼𑀩𑀦𑁆𑀥𑀺 𑀲𑁄.

𑁩𑁯. 𑀧𑀯𑀺𑀲𑀺𑀢𑁆𑀯𑀸 𑀯𑀺𑀳𑀸𑀭𑀁 𑀲𑁄, 𑀫𑀳𑀸𑀣𑁂𑀭 𑀖𑀭𑀁𑀕𑀢𑁄;

𑀦𑀺𑀧𑀚𑁆𑀚𑀳𑁂𑀝𑁆𑀞𑀸 𑀫𑀜𑁆𑀘𑀲𑁆𑀲, 𑀓𑀼𑀫𑀸𑀭𑁄 𑀪𑀸𑀢𑀼𑀦𑁄𑀪𑀬𑀸.

𑁪𑁦. 𑀧𑀲𑀸𑀭𑀬𑀺 𑀫𑀳𑀸𑀣𑁂𑀭𑁄, 𑀘𑀻𑀯𑀭𑀁 𑀢𑀢𑁆𑀣 𑀫𑀜𑁆𑀘𑀓𑁂;

𑀭𑀸𑀚𑀸 𑀅𑀦𑀼𑀧𑀤𑀁 𑀕𑀦𑁆𑀢𑁆𑀯𑀸, ‘‘𑀓𑀼𑀳𑀺𑀁 𑀢𑀺𑀲𑁆𑀲𑁄’’𑀢𑀺 𑀧𑀼𑀘𑁆𑀙𑀣.

𑁪𑁧. ‘‘𑀫𑀜𑁆𑀘𑁂 𑀢𑀢𑁆𑀣 𑀫𑀳𑀸𑀭𑀸𑀚’’, 𑀇𑀢𑀺 𑀣𑁂𑀭𑁄 𑀅𑀯𑁄𑀘 𑀢𑀁;

𑀳𑁂𑀝𑁆𑀞𑀸 𑀫𑀜𑁆𑀘𑁂𑀢𑀺 𑀚𑀸𑀦𑀺𑀢𑁆𑀯𑀸, 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀪𑀽𑀧𑀢𑀺.

𑁪𑁨. 𑀲𑀫𑀦𑁆𑀢𑀢𑁄 𑀯𑀺𑀳𑀸𑀭𑀲𑁆𑀲, 𑀭𑀓𑁆𑀔𑀁 𑀓𑀸𑀭𑀬𑀺 𑀢𑀁 𑀧𑀦;

𑀧𑀜𑁆𑀘𑀓𑀫𑁆𑀳𑀺 𑀦𑀺𑀧𑀚𑁆𑀚𑁂𑀢𑁆𑀯𑀸, 𑀤𑀢𑁆𑀯𑀸 𑀉𑀧𑀭𑀺 𑀘𑀻𑀯𑀭𑀁.

𑁪𑁩. 𑀫𑀜𑁆𑀘𑀧𑀸𑀤𑁂𑀲𑀼 𑀕𑀡𑁆𑀳𑀺𑀢𑁆𑀯𑀸, 𑀘𑀢𑁆𑀢𑀸𑀭𑁄 𑀤𑀳𑀭𑀸 𑀬𑀢𑀻;

𑀫𑀢𑀪𑀺𑀓𑁆𑀔𑀼𑀦𑀺𑀬𑀸𑀫𑁂𑀦, 𑀓𑀼𑀫𑀸𑀭𑀁 𑀩𑀳𑀺 𑀦𑀻𑀳𑀭𑀼𑀁.

𑁪𑁪. 𑀦𑀻𑀬𑀫𑀸𑀦𑀦𑁆𑀢𑀼 𑀢𑀁 𑀜𑀢𑁆𑀯𑀸, 𑀇𑀥 𑀫𑀸𑀳 𑀫𑀳𑀻𑀧𑀢𑀺;

‘‘𑀢𑀺𑀲𑁆𑀲 𑀢𑁆𑀯𑀁 𑀓𑀼𑀮𑀤𑁂𑀯𑀢𑀸𑀦𑀁, 𑀲𑀻𑀲𑁂 𑀳𑀼𑀢𑁆𑀯𑀸𑀦 𑀦𑀺𑀬𑁆𑀬𑀸𑀲𑀺.

𑁪𑁫. 𑀩𑀮𑀓𑁆𑀓𑀸𑀭𑁂𑀦 𑀕𑀳𑀡𑀁, 𑀓𑀼𑀮𑀤𑁂𑀯𑁂𑀳𑀺 𑀦𑀢𑁆𑀣𑀺 𑀫𑁂;

𑀕𑀼𑀡𑀁 𑀢𑁆𑀯𑀁 𑀓𑀼𑀮𑀤𑁂𑀯𑀸𑀦𑀁, 𑀲𑀭𑁂𑀬𑁆𑀬𑀸𑀲𑀺 𑀓𑀤𑀸𑀘𑀺𑀧𑀺’’.

𑁪𑁬. 𑀢𑀢𑁄𑀬𑁂𑀯 𑀫𑀳𑀸𑀕𑀸𑀫𑀁, 𑀅𑀕𑀫𑀸𑀲𑀺 𑀫𑀳𑀻𑀧𑀢𑀺;

𑀆𑀡𑀸𑀧𑁂𑀲𑀺 𑀘 𑀢𑀢𑁆𑀣𑁂𑀯, 𑀫𑀸𑀢𑀭𑀁 𑀫𑀸𑀢𑀼𑀕𑀸𑀭𑀯𑁄.

𑁪𑁭. [𑀯𑀲𑁆𑀲𑀸𑀦𑀺 𑀅𑀝𑁆𑀞𑀲𑀝𑁆𑀞𑀺𑀁𑀲𑁄, 𑀅𑀝𑁆𑀞𑀸 𑀥𑀫𑁆𑀫𑀝𑁆𑀞𑀫𑀸𑀦𑀲𑁄;

𑀅𑀝𑁆𑀞𑀲𑀝𑁆𑀞𑀺𑀯𑀺𑀳𑀸𑀭𑁂 𑀘, 𑀓𑀸𑀭𑀸𑀧𑁂𑀲𑀺 𑀫𑀳𑀻𑀧𑀢𑀺.]

𑁪𑁮. 𑀦𑀺𑀓𑁆𑀔𑀸𑀫𑀺𑀢𑁄 𑀲𑁄 𑀪𑀺𑀓𑁆𑀔𑀽𑀳𑀺, 𑀢𑀺𑀲𑁆𑀲𑁄𑀭𑀸𑀚 𑀲𑀼𑀢𑁄 𑀧𑀦;

𑀤𑀻𑀖𑀯𑀸𑀧𑀺𑀁 𑀢𑀢𑁄𑀬𑁂𑀯, 𑀅𑀕𑀫’𑀜𑁆𑀜𑀢𑀭𑁄 𑀯𑀺𑀬.

𑁪𑁯. 𑀓𑀼𑀫𑀸𑀭𑁄 𑀕𑁄𑀥𑀕𑀢𑁆𑀢𑀲𑁆𑀲, 𑀢𑀺𑀲𑁆𑀲𑀣𑁂𑀭𑀲𑁆𑀲 𑀆𑀳 𑀲𑁄;

‘‘𑀲𑀸𑀧𑀭𑀸𑀥𑁄 𑀅𑀳𑀁 𑀪𑀦𑁆𑀢𑁂, 𑀔𑀫𑀸𑀧𑁂𑀲𑁆𑀲𑀸𑀫𑀺 𑀪𑀸𑀢𑀭𑀁.

𑁫𑁦. 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀓𑀸𑀭𑀁, 𑀢𑀺𑀲𑁆𑀲𑀁 𑀧𑀜𑁆𑀘𑀲𑀢𑀸𑀦𑀺 𑀘;

𑀪𑀺𑀓𑁆𑀔𑀼𑀦𑀫𑀸𑀤𑀺𑀬𑀺𑀢𑁆𑀯𑀸 𑀲𑁄, 𑀣𑁂𑀭𑁄 𑀭𑀸𑀚 𑀫𑀼𑀧𑀸𑀕𑀫𑀺.

𑁫𑁧. 𑀭𑀸𑀚𑀧𑀼𑀢𑁆𑀢𑀁 𑀞𑀧𑁂𑀢𑁆𑀯𑀸𑀦, 𑀣𑁂𑀭𑁄 𑀲𑁄𑀧𑀸𑀦 𑀫𑀢𑁆𑀣𑀓𑁂;

𑀲𑀲𑀗𑁆𑀖𑁄 𑀧𑀸𑀯𑀺𑀲𑀺 𑀲𑀤𑁆𑀥𑁄, 𑀦𑀺𑀲𑀻𑀤𑀸𑀯𑀺𑀬 𑀪𑀽𑀫𑀺𑀧𑁄.

𑁫𑁨. 𑀉𑀧𑀸𑀦𑀬𑀻 𑀬𑀸𑀕𑀼𑀆𑀤𑀺𑀁, 𑀣𑁂𑀭𑁄 𑀧𑀢𑁆𑀢𑀁 𑀯𑀺𑀥𑁂𑀲𑀺𑀲𑁄;

‘‘𑀓𑀺𑀦𑁆𑀢𑀺 𑀯𑀼𑀢𑁆𑀢𑁄’𑀩𑁆𑀭𑀯𑀺 𑀢𑀺𑀲𑁆𑀲𑀁, 𑀆𑀤𑀸𑀬 𑀅𑀕𑀢𑀸’’𑀇𑀢𑀺.

𑁫𑁩. ‘‘𑀓𑀼𑀳𑀺𑀁 𑀘𑁄𑀭𑁄’’𑀢𑀺 𑀯𑀼𑀢𑁆𑀢𑁄 𑀘, 𑀞𑀺𑀢𑀞𑀸𑀦𑀁 𑀦𑀺𑀯𑁂𑀤𑀬𑀺;

𑀯𑀺𑀳𑀸𑀭𑀤𑁂𑀯𑀻 𑀕𑀦𑁆𑀢𑁆𑀯𑀸𑀦, 𑀙𑀸𑀤𑀺𑀬𑀞𑀸𑀲𑀺 𑀧𑀼𑀢𑁆𑀢𑀓.

𑁫𑁪. 𑀭𑀸𑀚𑀸’𑀳 𑀣𑁂𑀭𑀁 ‘‘𑀜𑀸𑀢𑁄 𑀯𑁄,

𑀤𑀸𑀲𑀪𑀸𑀯𑁄 𑀇𑀤𑀸𑀦𑀺 𑀦𑁄;

𑀲𑀸𑀫𑀡𑁂𑀭𑀁 𑀧𑁂𑀲𑀬𑁂𑀣,

𑀢𑀼𑀫𑁆𑀳𑁂 𑀫𑁂 𑀲𑀢𑁆𑀢𑀯𑀲𑁆𑀲𑀺𑀓𑀁.

𑁫𑁫. 𑀚𑀦𑀓𑁆𑀔𑀬𑀁 𑀯𑀺𑀦𑀸𑀬𑁂𑀯, 𑀓𑀮𑀳𑁄 𑀦 𑀪𑀯𑁂𑀬𑁆𑀬 𑀦𑁄;

𑀭𑀸𑀚𑀸 𑀲𑀗𑁆𑀖𑀲𑁆𑀲 𑀤𑁄𑀲𑁂𑀲𑁄, 𑀪𑀁𑀖𑁂 𑀤𑀡𑁆𑀟𑀁 𑀓𑀭𑀺𑀲𑁆𑀲𑀢𑀺.

𑁫𑁬. 𑀳𑁂𑀲𑁆𑀲𑀢𑀸’𑀕𑀢𑀓𑀺𑀘𑁆𑀘𑀸 𑀯𑁄,

𑀬𑀸𑀕𑀸𑀤𑀺𑀁 𑀕𑀡𑁆𑀳𑀸𑀣𑀸𑀢𑀺 𑀲𑁄;

𑀤𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲,

𑀧𑀓𑁆𑀓𑁄𑀲𑀺𑀢𑁆𑀯𑀸𑀦 𑀪𑀸𑀢𑀭𑀁.

𑁫𑁭. 𑀢𑀢𑁆𑀣𑁂𑀯 𑀲𑀗𑁆𑀖𑀫𑀚𑁆𑀛𑀫𑁆𑀳𑀺, 𑀦𑀺𑀲𑀺𑀦𑁆𑀦𑁄 𑀪𑀸𑀢𑀭𑀸 𑀲𑀳;

𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀢𑁄𑀬𑁂𑀯, 𑀪𑀺𑀓𑁆𑀔𑀼 𑀲𑀗𑁆𑀖𑀁 𑀯𑀺𑀲𑀚𑁆𑀚𑀬𑀺.

𑁫𑁮. 𑀲𑀲𑁆𑀲𑀓𑀫𑁆𑀫𑀸𑀦𑀺 𑀓𑀸𑀭𑁂𑀢𑀼𑀁, 𑀢𑀺𑀲𑁆𑀲𑀁 𑀢𑀢𑁆𑀣𑁂𑀯 𑀧𑀸𑀳𑀺𑀡𑀺;

𑀲𑀬𑀫𑁆𑀧𑀺 𑀪𑁂𑀭𑀺𑀁 𑀘𑀸𑀭𑁂𑀢𑁆𑀯𑀸, 𑀲𑀲𑁆𑀲𑀓𑀫𑁆𑀫𑀸𑀦𑀺 𑀓𑀸𑀭𑀬𑀺.

𑁫𑁯. 𑀇𑀢𑀺 𑀯𑁂𑀭𑀫𑀦𑁂𑀓𑀯𑀺𑀓𑀧𑁆𑀧𑀘𑀺𑀢𑀁,

𑀲𑀫𑀬𑀦𑁆𑀢𑀺 𑀩𑀳𑀼𑀁 𑀅𑀧𑀺 𑀲𑀧𑁆𑀧𑀼𑀭𑀺𑀲𑀁;

𑀇𑀢𑀺 𑀘𑀺𑀦𑁆𑀢𑀺𑀬 𑀓𑁄𑀳𑀺 𑀦𑀭𑁄 𑀫𑀢𑀺𑀫𑀸,

𑀦 𑀪𑀯𑁂𑀬𑁆𑀬 𑀧𑀭𑁂𑀲𑀼 𑀲𑀼𑀲𑀦𑁆𑀢 𑀫𑀦𑁄𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀤𑁆𑀯𑁂𑀪𑀸𑀢𑀺𑀓𑀬𑀼𑀤𑁆𑀥𑀁 𑀦𑀸𑀫

𑀘𑀢𑀼𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.