𑀩𑀸𑀯𑀻𑀲𑀢𑀺𑀫 𑀧𑀭𑀺𑀘𑁆𑀙𑁂𑀤

𑀕𑀸𑀫𑀡𑀺𑀓𑀼𑀫𑀸𑀭 𑀲𑀼𑀢𑀺

𑁧. 𑀏𑀴𑀸𑀭𑀁 𑀖𑀸𑀢𑀬𑀺𑀢𑁆𑀯𑀸𑀦, 𑀭𑀸𑀚𑀸’𑀳𑀼 𑀤𑀼𑀝𑁆𑀞𑀕𑀸𑀫𑀡𑀺;

𑀢𑀤𑀢𑁆𑀣 𑀤𑀻𑀧𑀦𑀢𑁆𑀣𑀸𑀬, 𑀅𑀦𑀼𑀧𑀼𑀩𑁆𑀩𑀓𑀣𑀸 𑀅𑀬𑀁.

𑁨. 𑀤𑁂𑀯𑀸𑀦𑀁 𑀧𑀺𑀬𑀢𑀺𑀲𑁆𑀲𑀲𑁆𑀲, 𑀭𑀜𑁆𑀜𑁄 𑀤𑀼𑀢𑀺𑀬𑀪𑀸𑀢𑀺𑀓𑁄;

𑀉𑀧𑀭𑀸𑀚𑀸 𑀫𑀳𑀸𑀦𑀸𑀕𑁄, 𑀦𑀸𑀫𑀸𑀦𑀼 𑀪𑀸𑀢𑀼𑀦𑁄 𑀧𑀺𑀬𑁄.

𑁩. 𑀭𑀜𑁆𑀜𑁄 𑀤𑁂𑀯𑀻 𑀲𑀧𑀼𑀢𑁆𑀢𑀲𑁆𑀲, 𑀩𑀸𑀮𑀸 𑀭𑀚𑁆𑀚𑀸𑀪𑀺𑀓𑀸𑀫𑀺𑀦𑀺;

𑀉𑀧𑀭𑀸𑀚𑀯𑀥𑀢𑁆𑀣𑀸𑀬, 𑀚𑀸𑀢𑀘𑀺𑀢𑁆𑀢𑀸 𑀦𑀺𑀭𑀦𑁆𑀢𑀭𑀁.

𑁪. 𑀯𑀸𑀧𑀺𑀁 𑀢𑀭𑀘𑁆𑀙𑀦𑀸𑀫𑀁 𑀲𑀸, 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀧𑀸𑀳𑀺𑀡𑀺;

𑀅𑀫𑁆𑀩𑀁 𑀯𑀺𑀲𑁂𑀦 𑀬𑁄𑀚𑁂𑀢𑁆𑀯𑀸, 𑀞𑀧𑁂𑀢𑁆𑀯𑀸 𑀅𑀫𑁆𑀩𑀫𑀢𑁆𑀣𑀓𑁂.

𑁫. 𑀢𑀲𑁆𑀲𑀸 𑀧𑀼𑀢𑁆𑀢𑁄 𑀲𑀳𑀕𑀢𑁄, 𑀉𑀧𑀭𑀸𑀚𑁂𑀦 𑀩𑀸𑀮𑀓𑁄;

𑀪𑀸𑀚𑀦𑁂 𑀯𑀺𑀯𑀝𑁂𑀬𑁂𑀯, 𑀢𑀁 𑀅𑀫𑁆𑀩𑀁 𑀔𑀸𑀤𑀺𑀬𑀸’𑀫𑀭𑀺.

𑁬. 𑀉𑀧𑀭𑀸𑀚𑀸 𑀢𑀢𑁄𑀬𑁂𑀯, 𑀲𑀤𑀸𑀭 𑀩𑀮 𑀯𑀸𑀳𑀦𑁄;

𑀭𑀓𑁆𑀔𑀺𑀳𑀼𑀁 𑀲𑀓𑀫𑀢𑁆𑀢𑀸𑀦𑀁, 𑀭𑁄𑀳𑀡𑀸’𑀪𑀺𑀫𑀼𑀔𑁄 𑀅𑀕𑀸.

𑁭. 𑀬𑀝𑁆𑀞𑀸𑀮𑀬 𑀯𑀺𑀳𑀸𑀭𑀲𑁆𑀫𑀺𑀁, 𑀫𑀳𑁂𑀲𑀻 𑀢𑀲𑁆𑀲 𑀕𑀩𑁆𑀪𑀺𑀦𑀻;

𑀧𑀼𑀢𑁆𑀢𑀁 𑀚𑀦𑁂𑀲𑀺 𑀲𑁄 𑀢𑀲𑁆𑀲, 𑀪𑀸𑀢𑀼 𑀦𑀸𑀫 𑀫𑀓𑀸𑀭𑀬𑀺.

𑁮. 𑀢𑀢𑁄 𑀕𑀦𑁆𑀢𑁆𑀯𑀸 𑀭𑁄𑀳𑀡𑀁 𑀲𑁄,

𑀇𑀲𑁆𑀲𑀭𑁄 𑀭𑁄𑀳𑀡𑁂’𑀔𑀺𑀮𑁄;

𑀫𑀳𑀸 𑀪𑀸𑀕𑁄 𑀫𑀳𑀸 𑀕𑀸𑀫𑁂,

𑀭𑀚𑁆𑀚𑀁 𑀓𑀸𑀭𑁂𑀲𑀺 𑀔𑀢𑁆𑀢𑀺𑀬𑁄.

𑁯. 𑀓𑀸𑀭𑁂𑀲𑀺 𑀲𑁄 𑀦𑀸𑀕𑀫𑀳𑀸-𑀯𑀺𑀳𑀸𑀭𑀁 𑀲𑀓𑀦𑀸𑀫𑀓𑀁;

𑀉𑀤𑁆𑀥𑀓𑀦𑁆𑀤𑀭𑀓𑀸𑀤𑀻 𑀘, 𑀧𑀺𑀳𑀸𑀭𑁂 𑀓𑀸𑀭𑀬𑀻 𑀩𑀳𑀽.

𑁧𑁦. 𑀬𑀝𑁆𑀞𑀸𑀮𑀬 𑀓𑀢𑀺𑀲𑁆𑀲𑁄 𑀲𑁄, 𑀢𑀲𑁆𑀲 𑀧𑀼𑀢𑁆𑀢𑁄 𑀢𑀤𑀘𑁆𑀘𑀬𑁂;

𑀳𑀢𑁆𑀣𑁂𑀯 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀲𑁆𑀲 𑀧𑀼𑀢𑁆𑀢𑁄’𑀪𑀬𑁄 𑀢𑀣𑀸.

𑁧𑁧. 𑀕𑁄𑀝𑁆𑀞𑀸𑀪𑀬𑀲𑀼𑀢𑁄 𑀓𑀸𑀓-𑀯𑀡𑁆𑀡𑀢𑀺𑀲𑁆𑀲𑁄𑀢𑀺 𑀯𑀺𑀲𑁆𑀲𑀼𑀳𑁄;

𑀢𑀤𑀘𑁆𑀘𑀬𑁂 𑀢𑀢𑁆𑀣 𑀭𑀚𑁆𑀚𑀁, 𑀲𑁄 𑀅𑀓𑀸𑀭𑁂𑀲𑀺 𑀔𑀢𑁆𑀢𑀺𑀬𑁄.

𑁧𑁨. 𑀯𑀺𑀳𑀸𑀭𑀤𑁂𑀯𑀺 𑀦𑀸𑀫𑀸’𑀲𑀺, 𑀫𑀳𑁂𑀲𑀻 𑀢𑀲𑁆𑀲 𑀭𑀸𑀚𑀺𑀦𑁄;

𑀲𑀤𑁆𑀥𑀲𑁆𑀲 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸, 𑀥𑀻𑀢𑀸 𑀓𑀮𑁆𑀬𑀸𑀡𑀺 𑀭𑀸𑀚𑀺𑀦𑁄.

𑁧𑁩. 𑀓𑀮𑁆𑀬𑀸𑀡𑀺𑀬𑀁 𑀦𑀭𑀺𑀦𑁆𑀤𑁄 𑀳𑀺, 𑀢𑀺𑀲𑁆𑀲𑁄 𑀦𑀸𑀫𑀸𑀲𑀺 𑀔𑀢𑁆𑀢𑀺𑀬𑁄;

𑀤𑁂𑀯𑀺𑀲𑀜𑁆𑀜𑁄𑀕𑀚𑀦𑀺𑀢-𑀓𑁄 𑀧𑁄𑀢𑀲𑁆𑀲 𑀓𑀦𑀺𑀝𑁆𑀞𑀓𑁄.

𑁧𑁪. 𑀪𑀻𑀢𑁄 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸, 𑀅𑀬𑁆𑀬𑀉𑀢𑁆𑀢𑀺𑀬 𑀦𑀸𑀫𑀓𑁄;

𑀅𑀜𑁆𑀜𑀢𑁆𑀣 𑀯𑀲𑀺 𑀲𑁄 𑀤𑁂𑀲𑁄, 𑀢𑁂𑀦 𑀢𑀁 𑀦𑀸𑀫𑀓𑁄 𑀅𑀳𑀼.

𑁧𑁫. 𑀤𑀢𑁆𑀯𑀸 𑀭𑀳𑀲𑁆𑀲𑀮𑁂𑀔𑀁 𑀲𑁄, 𑀪𑀺𑀓𑁆𑀔𑀼𑀯𑁂𑀲𑀥𑀭𑀁 𑀦𑀭𑀁;

𑀧𑀸𑀳𑁂𑀲𑀺 𑀤𑁂𑀯𑀺𑀬𑀸 𑀕𑀦𑁆𑀢𑁆𑀯𑀸, 𑀭𑀸𑀚𑀤𑁆𑀯𑀸𑀭𑁂 𑀞𑀺𑀢𑁄 𑀢𑀼𑀲𑁄.

𑁧𑁬. 𑀭𑀸𑀚 𑀕𑁂𑀳𑁂 𑀅𑀭𑀳𑀢𑀸, 𑀪𑀼𑀜𑁆𑀚𑀫𑀸𑀦𑁂𑀦 𑀲𑀩𑁆𑀩𑀤𑀸;

𑀅𑀜𑁆𑀜𑀸𑀬𑀫𑀸𑀦𑁄 𑀣𑁂𑀭𑁂𑀦, 𑀭𑀜𑁆𑀜𑁄 𑀖𑀭𑀫𑀼𑀧𑀸𑀕𑀫𑀺.

𑁧𑁭. 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀭𑀜𑁆𑀜𑁄 𑀲𑀳 𑀯𑀺𑀦𑀺𑀕𑁆𑀕𑀫𑁂;

𑀧𑀸𑀢𑁂𑀲𑀺 𑀪𑀽𑀫𑀺𑀬𑀁 𑀮𑁂𑀔𑀁, 𑀧𑁂𑀓𑁆𑀔𑀫𑀸𑀦𑀸𑀬 𑀤𑁂𑀯𑀺𑀬𑀸.

𑁧𑁮. 𑀲𑀤𑁆𑀤𑁂𑀦 𑀢𑁂𑀦 𑀭𑀸𑀚𑀸𑀦𑀁, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀺𑀮𑁄𑀓𑀬𑀁;

𑀜𑀢𑁆𑀯𑀸𑀦 𑀮𑁂𑀔𑀲𑀦𑁆𑀤𑁂𑀲𑀁, 𑀓𑀼𑀤𑁆𑀥𑁄 𑀣𑁂𑀭𑀲𑁆𑀲 𑀤𑀼𑀫𑁆𑀫𑀢𑀺.

𑁧𑁯. 𑀣𑁂𑀭𑀁 𑀢𑀁 𑀧𑀼𑀭𑀺𑀲𑀁 𑀢𑀜𑁆𑀘, 𑀫𑀸𑀭𑀸𑀧𑁂𑀢𑁆𑀯𑀸𑀦 𑀓𑁄𑀥𑀲𑀸;

𑀲𑀫𑀼𑀤𑁆𑀤𑀲𑁆𑀫𑀺𑀁 𑀔𑀺𑀧𑀸𑀧𑁂𑀲𑀺, 𑀓𑀼𑀚𑁆𑀛𑀺𑀢𑁆𑀯𑀸 𑀢𑁂𑀦 𑀤𑁂𑀯𑀢𑀸.

𑁨𑁦. 𑀲𑀫𑀼𑀤𑁆𑀤𑁂𑀦𑁄’𑀢𑁆𑀣𑀭𑀸 𑀧𑁂𑀲𑀼𑀁, 𑀢𑀁 𑀤𑁂𑀲𑀁 𑀲𑁄𑀢𑀼𑀪𑀽𑀧𑀢𑀺;

𑀅𑀢𑁆𑀢𑀦𑁄 𑀥𑀻𑀢𑀭𑀁 𑀬𑀼𑀤𑁆𑀥𑀁, 𑀤𑁂𑀯𑀺𑀁 𑀦𑀸𑀫 𑀲𑀼𑀭𑀼𑀧𑀺𑀦𑀺𑀁.

𑁨𑁧. 𑀮𑀺𑀔𑀺𑀢𑁆𑀯𑀸 𑀭𑀸𑀚𑀥𑀻𑀢𑀸𑀢𑀺, 𑀲𑁄𑀯𑀡𑁆𑀡𑀓𑁆𑀔𑀮𑀺𑀬𑀸 𑀮𑀳𑀼𑀁;

𑀦𑀺𑀲𑀻𑀤𑀸𑀧𑀺𑀬 𑀢𑀢𑁆𑀣𑁂𑀯, 𑀲𑀫𑀼𑀤𑁆𑀤𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑀬𑀺.

𑁨𑁨. 𑀑𑀓𑁆𑀓𑀦𑁆𑀢𑀁 𑀢𑀁 𑀢𑀢𑁄 𑀮𑀁𑀓𑁂-𑀓𑀸𑀓𑀯𑀡𑁆𑀡𑁄 𑀫𑀳𑀻𑀧𑀢𑀺;

𑀅𑀪𑀺𑀲𑁂𑀘𑀬𑀺 𑀢𑁂𑀦𑀸’𑀲𑀺, 𑀯𑀺𑀳𑀸𑀭𑁄𑀧𑀧𑀤𑀯𑁆𑀳𑀬𑀸.

𑁨𑁩. 𑀢𑀺𑀲𑁆𑀲 𑀫𑀳𑀸𑀯𑀺𑀳𑀸𑀭𑀜𑁆𑀘, 𑀢𑀣𑀸 𑀘𑀺𑀢𑁆𑀢𑀮𑀧𑀩𑁆𑀩𑀢𑀁;

𑀕𑀫𑀺𑀢𑁆𑀣𑀯𑀸𑀮𑀺𑀁 𑀓𑀼𑀝𑀸𑀮𑀺𑀁, 𑀯𑀺𑀳𑀸𑀭𑁂 𑀏𑀯𑀫𑀸𑀤𑀺𑀓𑁂.

𑁨𑁪. 𑀓𑀸𑀭𑁂𑀢𑁆𑀯𑀸 𑀲𑀼𑀧𑀲𑀦𑁆𑀦𑁂𑀦, 𑀫𑀦𑀲𑀸𑀭𑀢𑀦𑀢𑁆𑀢𑀬𑁂;

𑀉𑀧𑀝𑁆𑀞𑀳𑀺 𑀢𑀤𑀸 𑀲𑀗𑁆𑀖𑀁, 𑀧𑀘𑁆𑀘𑀬𑁂𑀳𑀺 𑀘𑀢𑀽𑀳𑀺 𑀲𑁄.

𑁨𑁫. 𑀓𑁄𑀝𑀺𑀧𑀩𑁆𑀩𑀢 𑀦𑀸𑀫𑀫𑁆𑀳𑀺, 𑀯𑀺𑀳𑀸𑀭𑁂 𑀲𑀻𑀮𑀯𑀢𑁆𑀢𑀺𑀫𑀸;

𑀢𑀤𑀸 𑀅𑀳𑀼 𑀲𑀸𑀫𑀡𑁂𑀭𑁄, 𑀦𑀸𑀦𑀸𑀧𑀼𑀜𑁆𑀜𑀓𑀭𑁄 𑀲𑀤𑀸.

𑁨𑁬. 𑀲𑀼𑀔𑁂𑀦𑀸𑀭𑁄𑀳𑀡𑀢𑁆𑀣𑀸𑀬, 𑀅𑀓𑀸𑀲 𑀘𑁂𑀢𑀺𑀬𑀗𑁆𑀕𑀡𑁂;

𑀞𑀧𑁂𑀲𑀺 𑀢𑀻𑀡𑀺 𑀧𑀸𑀲𑀸𑀡𑁂, 𑀧𑀸𑀲𑀸𑀡 𑀨𑀮𑀓𑀸𑀦𑀺 𑀲𑁄.

𑁨𑁭. 𑀅𑀤𑀸 𑀧𑀸𑀦𑀻𑀬 𑀤𑀸𑀦𑀜𑁆𑀘, 𑀯𑀢𑁆𑀢𑀁 𑀲𑀗𑁆𑀖𑀲𑁆𑀲 𑀘𑀸’𑀓𑀭𑀺;

𑀲𑀤𑀸 𑀓𑀺𑀮𑀦𑁆𑀢𑀓𑀸𑀬𑀲𑁆𑀲, 𑀢𑀲𑁆𑀲𑀸’𑀩𑁄𑀥𑁄 𑀫𑀳𑀸 𑀅𑀳𑀼.

𑁨𑁮. 𑀲𑀺𑀯𑀺𑀓𑀸𑀬 𑀓𑀫𑀸𑀦𑁂𑀢𑁆𑀯𑀸, 𑀪𑀺𑀓𑁆𑀔𑀯𑁄 𑀓𑀢𑀯𑁂𑀤𑀺𑀦𑁄;

𑀲𑀺𑀮𑀸𑀧𑀲𑁆𑀲𑀬 𑀧𑀭𑀺𑀯𑁂𑀡𑁂, 𑀢𑀺𑀲𑁆𑀲𑀸𑀭𑀸𑀫𑁂 𑀉𑀧𑀝𑁆𑀞𑀳𑀼𑀁.

𑁨𑁯. 𑀲𑀤𑀸 𑀯𑀺𑀳𑀸𑀭𑀤𑁂𑀯𑀻𑀲𑀸, 𑀭𑀸𑀚𑀕𑁂𑀳𑁂 𑀲𑀼𑀲𑀗𑁆𑀔𑀢𑁂;

𑀧𑀼𑀭𑁂𑀪𑀢𑁆𑀢𑀁 𑀫𑀳𑀸𑀤𑀸𑀦𑀁, 𑀤𑀢𑁆𑀯𑀸 𑀲𑀗𑁆𑀖𑀲𑁆𑀲 𑀲𑀜𑁆𑀜𑀢𑀸.

𑁩𑁦. 𑀧𑀘𑁆𑀙𑀸𑀪𑀢𑁆𑀢𑀁 𑀕𑀦𑁆𑀥𑀫𑀸𑀮𑀁, 𑀪𑁂𑀲𑀚𑁆𑀚𑀯𑀲𑀦𑀸𑀦𑀺 𑀘;

𑀕𑀸𑀳𑀬𑀺𑀢𑁆𑀯𑀸 𑀕𑀢𑀸’𑀭𑀸𑀫𑀁, 𑀲𑀓𑁆𑀓𑀭𑁄𑀢𑀺 𑀬𑀣𑀸𑀭𑀳𑀁.

𑁩𑁧. 𑀢𑀤𑀸 𑀢𑀣𑁂𑀯 𑀓𑀢𑁆𑀯𑀸 𑀲𑀸, 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂;

𑀦𑀺𑀲𑀻𑀤𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, 𑀣𑁂𑀭𑁄 𑀢𑀁 𑀇𑀥 𑀫𑀩𑁆𑀭𑀯𑀺.

𑁩𑁨. ‘‘𑀫𑀳𑀸𑀲𑀫𑁆𑀧𑀢𑁆𑀢𑀺 𑀢𑀼𑀫𑁆𑀳𑁂𑀳𑀺, 𑀮𑀤𑁆𑀥𑀸’𑀬𑀁 𑀧𑀼𑀜𑁆𑀜𑀓𑀫𑁆𑀫𑀼𑀦𑀸;

𑀅𑀧𑁆𑀧𑀫𑀸𑀤𑁄’𑀯 𑀓𑀸𑀢𑀩𑁆𑀩𑁄, 𑀧𑀼𑀜𑁆𑀜𑀓𑀫𑁆𑀫𑁂 𑀇𑀤𑀸𑀦𑀺𑀧𑀺’’.

𑁩𑁩. 𑀏𑀯𑀁 𑀯𑀼𑀢𑁆𑀢𑁂 𑀢𑀼 𑀲𑀸 𑀆𑀳, ‘‘𑀓𑀺𑀁 𑀲𑀫𑁆𑀧𑀢𑁆𑀢𑀺 𑀅𑀬𑀁 𑀇𑀥;

𑀬𑁂𑀲𑀁 𑀦𑁄 𑀤𑀸𑀭𑀓𑀸 𑀦𑀢𑁆𑀣𑀺, 𑀯𑀜𑁆𑀛𑀸𑀲𑀫𑁆𑀧𑀢𑁆𑀢𑀺 𑀢𑁂𑀦 𑀦𑁄’’.

𑁩𑁪. 𑀙𑀴𑀪𑀺𑀜𑁆𑀜𑁄 𑀫𑀳𑀸𑀣𑁂𑀭𑁄, 𑀧𑀼𑀢𑁆𑀢𑀮𑀸𑀪𑀫𑀯𑁂𑀓𑁆𑀔𑀺𑀬;

‘‘𑀕𑀺𑀮𑀸𑀦𑀁 𑀲𑀸𑀫𑀡𑁂𑀭𑀁 𑀢𑀁, 𑀧𑀲𑁆𑀲𑀤𑁂𑀯𑀻’’𑀢𑀺 𑀅𑀩𑁆𑀭𑀯𑀺.

𑁩𑁫. 𑀲𑀸 𑀕𑀦𑁆𑀢𑁆𑀯𑀸’𑀲𑀦𑁆𑀦 𑀫𑀭𑀡𑀁, 𑀲𑀸𑀫𑀡𑁂𑀭𑀫𑀯𑁄𑀘 𑀢𑀁;

‘‘𑀧𑀢𑁆𑀣𑁂𑀳𑀺 𑀫𑀫 𑀧𑀼𑀢𑁆𑀢𑀢𑁆𑀢𑀁, 𑀲𑀫𑁆𑀧𑀢𑁆𑀢𑀻 𑀫𑀳𑀢𑀻 𑀳𑀺 𑀦𑁄’’.

𑁩𑁬. 𑀦 𑀇𑀘𑁆𑀙𑀢𑀻𑀢𑀺 𑀜𑀢𑁆𑀯𑀸𑀦, 𑀢𑀤𑀢𑁆𑀣𑀁 𑀫𑀳𑀢𑀺𑀁 𑀲𑀼𑀪𑀁;

𑀧𑀼𑀧𑁆𑀨𑀧𑀽𑀚𑀁 𑀓𑀸𑀭𑀬𑀺𑀢𑁆𑀯𑀸, 𑀧𑀼𑀦 𑀬𑀸𑀘𑀺 𑀲𑀼𑀫𑁂𑀥𑀲𑀸.

𑁩𑁭. 𑀏𑀯𑀫𑁆𑀧’𑀦𑀺𑀘𑁆𑀙𑀫𑀸𑀦𑀲𑁆𑀲, 𑀅𑀢𑁆𑀣𑀸𑀬𑀼’𑀧𑀸𑀬𑀓𑁄𑀯𑀺𑀤𑀸;

𑀦𑀸𑀦𑀸 𑀪𑁂𑀲𑀚𑁆𑀚 𑀯𑀢𑁆𑀣𑀸𑀦𑀺, 𑀲𑀗𑁆𑀖𑁂 𑀤𑀢𑁆𑀯𑀸’𑀣 𑀬𑀸𑀘𑀺𑀢𑀁.

𑁩𑁮. 𑀧𑀢𑁆𑀣𑁂𑀲𑀺 𑀲𑁄 𑀭𑀸𑀚𑀓𑀼𑀮𑀁, 𑀲𑀸 𑀢𑀁 𑀞𑀸𑀦𑀁 𑀅𑀦𑁂𑀓𑀥𑀸;

𑀅𑀮𑀗𑁆𑀓𑀭𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, 𑀬𑀸𑀦𑀫𑀸𑀭𑀼𑀬𑁆𑀳 𑀧𑀓𑁆𑀓𑀫𑀺.

𑁩𑁯. 𑀢𑀢𑁄 𑀘𑀼𑀢𑁄 𑀲𑀸𑀫𑀡𑁂𑀭𑁄, 𑀕𑀘𑁆𑀙𑀫𑀸𑀦𑀸𑀬 𑀤𑁂𑀯𑀺𑀬𑀸;

𑀢𑀲𑁆𑀲𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺, 𑀢𑀁 𑀚𑀸𑀦𑀺𑀬 𑀦𑀺𑀯𑀢𑁆𑀢𑀺𑀲𑀸.

𑁪𑁦. 𑀭𑀜𑁆𑀜𑁄 𑀢𑀁 𑀲𑀸𑀲𑀦𑀁 𑀤𑀢𑁆𑀯𑀸, 𑀭𑀜𑁆𑀜𑀸 𑀲𑀳 𑀧𑀼𑀦𑀸’𑀕𑀫𑀸;

𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸, 𑀲𑀸𑀫𑀡𑁂𑀭𑀲𑁆𑀲𑀼’𑀪𑁄𑀧𑀺𑀢𑁂.

𑁪𑁧. 𑀢𑀲𑁆𑀫𑀺𑀁𑀬𑁂𑀯 𑀧𑀭𑀺𑀯𑁂𑀡𑁂, 𑀯𑀲𑀦𑁆𑀢𑀸 𑀲𑀦𑁆𑀢𑀫𑀸𑀦𑀲𑀸;

𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀼𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀩𑁆𑀩𑀤𑀸.

𑁪𑁨. 𑀢𑀲𑁆𑀲𑁂’𑀯𑀁 𑀤𑁄𑀳𑀴𑁄 𑀆𑀳𑀺, 𑀫𑀳𑀸 𑀧𑀼𑀜𑁆𑀜𑀸𑀬 𑀫𑀸𑀢𑀼𑀬𑀸;

‘‘𑀉𑀲𑀪𑀫𑀢𑁆𑀢𑀁 𑀫𑀥𑀼𑀕𑀡𑁆𑀟𑀁, 𑀓𑀢𑁆𑀯𑀸 𑀉𑀲𑁆𑀲𑀻𑀲𑀓𑁂 𑀲𑀬𑀁.

𑁪𑁩. 𑀯𑀸𑀫𑁂𑀢𑀭𑁂𑀦 𑀧𑀲𑁆𑀲𑁂𑀦, 𑀦𑀺𑀧𑀦𑁆𑀦𑀸𑀲𑀬𑀦𑁂 𑀲𑀼𑀪𑁂;

𑀤𑁆𑀯𑀸𑀤𑀲𑀦𑁆𑀦𑀁 𑀲𑀳𑀲𑁆𑀲𑀸𑀦𑀁, 𑀪𑀺𑀓𑁆𑀔𑀽𑀦𑀁 𑀤𑀺𑀦𑁆𑀦𑀲𑁂𑀲𑀓𑀁.

𑁪𑁪. 𑀫𑀥𑀼𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑀸’𑀲𑀺, 𑀅𑀣 𑀏𑀴𑀸𑀭 𑀭𑀸𑀚𑀺𑀦𑁄;

𑀬𑁄𑀥𑀸𑀦 𑀫𑀕𑁆𑀕𑀬𑁄𑀥𑀲𑁆𑀲, 𑀲𑀻𑀲𑀘𑁆𑀙𑀺𑀦𑁆𑀦𑀸𑀲𑀺𑀤𑁂𑀯𑀦𑀁.

𑁪𑁫. 𑀢𑀲𑁆𑀲𑁂𑀯 𑀲𑀻𑀲𑁂 𑀞𑀢𑁆𑀯𑀸𑀦, 𑀧𑀸𑀢𑀼𑀜𑁆𑀘𑁂𑀯 𑀅𑀓𑀸𑀫𑀬𑀺;

𑀅𑀦𑀼𑀭𑀸𑀥 𑀧𑀼𑀭𑀲𑁆𑀲𑁂𑀯, 𑀉𑀧𑁆𑀧𑀮𑀓𑁆𑀔𑁂𑀢𑁆𑀢𑀢𑁄 𑀧𑀦.

𑁪𑁬. 𑀆𑀦𑀻𑀢𑀼𑀧𑁆𑀧𑀮𑀫𑀸𑀮𑀜𑁆𑀘, 𑀅𑀫𑀺𑀮𑀸 𑀢𑀁 𑀧𑀺𑀮𑀦𑁆𑀥𑀺𑀢𑀼𑀁;

𑀢𑀁 𑀤𑁂𑀯𑀻 𑀭𑀸𑀚𑀺𑀦𑁄 𑀆𑀳, 𑀦𑁂𑀫𑀺𑀢𑁆𑀢𑁂 𑀧𑀼𑀘𑁆𑀙𑀺 𑀪𑀽𑀧𑀢𑀺.

𑁪𑁭. 𑀢𑀁 𑀲𑀼𑀢𑁆𑀯𑀸 𑀆𑀳𑀼 𑀦𑁂𑀫𑀺𑀢𑁆𑀢𑀸, ‘‘𑀤𑁂𑀯𑀺𑀧𑀼𑀢𑁆𑀢𑁄 𑀦𑀺𑀖𑀸𑀢𑀺𑀬;

𑀤𑀫𑀺𑀴𑁂 𑀓𑀢𑁆𑀯𑁂’𑀓𑀭𑀚𑁆𑀚𑀁, 𑀲𑀸𑀲𑀦𑀁 𑀚𑁄𑀢𑀬𑀺𑀲𑁆𑀲𑀢𑀺’’.

𑁪𑁮. 𑀏𑀤𑀺𑀲𑀁 𑀫𑀥𑀼𑀕𑀡𑁆𑀟𑀁 𑀲𑁄, 𑀤𑀲𑁆𑀲𑁂𑀢𑀺 𑀢𑀲𑁆𑀲 𑀈𑀤𑀺𑀲𑀺𑀁;

𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺 𑀭𑀸𑀚𑀸’’𑀢𑀺, 𑀖𑁄𑀲𑀸𑀧𑁂𑀲𑀺 𑀫𑀳𑀻𑀧𑀢𑀺.

𑁪𑁯. 𑀕𑁄𑀝𑁆𑀞𑀲𑀫𑀼𑀤𑁆𑀤𑀯𑁂𑀮𑀦𑁆𑀢𑁂, 𑀫𑀥𑀼𑀧𑀼𑀡𑁆𑀡𑀁 𑀦𑀺𑀓𑀼𑀚𑁆𑀚𑀺𑀢𑀁;

𑀦𑀸𑀯𑀁 𑀜𑀢𑁆𑀯𑀸𑀦 𑀆𑀘𑀺𑀓𑁆𑀔𑀺, 𑀭𑀜𑁆𑀜𑁄 𑀚𑀦𑀧𑀤𑁂 𑀦𑀭𑁄.

𑁫𑁦. 𑀭𑀸𑀚𑀸 𑀤𑁂𑀯𑀺𑀁 𑀢𑀳𑀺𑀁 𑀦𑁂𑀢𑁆𑀯𑀸, 𑀫𑀡𑁆𑀟𑀧𑀫𑁆𑀳𑀺 𑀲𑀼𑀲𑀗𑁆𑀔𑀢𑁂;

𑀬𑀣𑀺𑀘𑁆𑀙𑀺𑀣𑀁 𑀢𑀸𑀬 𑀫𑀥𑀼𑀁, 𑀧𑀭𑀺𑀪𑁄𑀕𑀫𑀓𑀸𑀭𑀬𑀺.

𑁫𑁧. 𑀇𑀢𑀭𑁂 𑀤𑁄𑀳𑀴𑁂 𑀢𑀲𑁆𑀲𑀸, 𑀲𑀫𑁆𑀧𑀸𑀤𑁂𑀢𑀼𑀁 𑀫𑀳𑀻𑀧𑀢𑀺;

𑀯𑁂𑀴𑀼𑀲𑀼𑀫𑀦 𑀦𑀸𑀫𑀁 𑀢𑀁, 𑀬𑁄𑀥𑀁 𑀢𑀢𑁆𑀣 𑀦𑀺𑀬𑁄𑀚𑀬𑀺.

𑁫𑁨. 𑀲𑁄’𑀦𑀼𑀭𑀸𑀥𑀧𑀼𑀭𑀁 𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀫𑀗𑁆𑀕𑀮𑀯𑀸𑀚𑀺𑀦𑁄;

𑀕𑁄𑀧𑀓𑁂𑀦 𑀅𑀓𑀸 𑀫𑁂𑀢𑁆𑀢𑀺𑀁, 𑀢𑀲𑁆𑀲 𑀓𑀺𑀘𑁆𑀘𑀜𑁆𑀘 𑀲𑀩𑁆𑀩𑀤𑀸.

𑁫𑁩. 𑀢𑀲𑁆𑀲 𑀯𑀺𑀲𑁆𑀲𑀢𑁆𑀣 𑀢𑀁 𑀜𑀢𑁆𑀯𑀸, 𑀧𑀸𑀢𑁄𑀯 𑀉𑀧𑁆𑀧𑀮𑀸𑀦’𑀲𑀺𑀁;

𑀓𑀤𑀫𑁆𑀩𑀦𑀤𑀺𑀬𑀸 𑀢𑀻𑀭𑁂, 𑀞𑀧𑁂𑀢𑁆𑀯𑀸𑀦 𑀅𑀲𑀗𑁆𑀓𑀺𑀢𑁄.

𑁫𑁪. 𑀅𑀲𑁆𑀲𑀁 𑀦𑁂𑀢𑁆𑀯𑀸 𑀢𑀫𑀸𑀭𑀼𑀬𑁆𑀳, 𑀕𑀡𑁆𑀳𑀺𑀢𑁆𑀯𑀸𑀦 𑀉𑀧𑁆𑀧𑀮𑀸𑀦’𑀲𑀺𑀁;

𑀦𑀺𑀯𑁂𑀤𑀬𑀺𑀢𑁆𑀯𑀸𑀦 𑀅𑀢𑁆𑀢𑀸𑀦𑀁, 𑀅𑀲𑁆𑀲𑀯𑁂𑀕𑁂𑀦 𑀧𑀓𑁆𑀓𑀫𑀺.

𑁫𑁫. 𑀲𑀼𑀢𑁆𑀯𑀸 𑀭𑀸𑀚𑀸 𑀕𑀳𑁂𑀢𑀼𑀁 𑀢𑀁, 𑀫𑀳𑀸 𑀬𑁄𑀥𑀸𑀦𑀧𑁂𑀲𑀬𑀺;

𑀤𑀼𑀢𑀺𑀬𑀁 𑀲𑀫𑁆𑀫𑀣𑀁 𑀅𑀲𑁆𑀲𑀁, 𑀆𑀭𑀼𑀬𑁆𑀳 𑀲𑁄𑀦𑀼𑀥𑀸𑀧𑀺𑀢𑀁.

𑁫𑁬. 𑀲𑁄 𑀕𑀼𑀫𑁆𑀩𑀦𑀺𑀲𑁆𑀲𑀺𑀢𑁄 𑀅𑀲𑁆𑀲-𑀧𑀺𑀝𑁆𑀞𑁂𑀬𑁂𑀯 𑀦𑀺𑀲𑀻𑀤𑀺𑀬;

𑀏𑀦𑁆𑀢𑀲𑁆𑀲 𑀧𑀺𑀝𑁆𑀞𑀺𑀢𑁄 𑀢𑀲𑁆𑀲, 𑀉𑀩𑁆𑀩𑀬𑁆𑀳𑀸’𑀲𑀺𑀁 𑀧𑀲𑀸𑀭𑀬𑀺.

𑁫𑁭. 𑀅𑀲𑁆𑀲𑀯𑁂𑀕𑁂𑀦𑀬𑀦𑁆𑀢𑀲𑁆𑀲, 𑀲𑀻𑀲𑀁 𑀙𑀺𑀚𑁆𑀚 𑀉𑀪𑁄𑀳𑀬𑁂;

𑀲𑀻𑀲𑀜𑁆𑀘𑀸’𑀤𑀸𑀬 𑀲𑀸𑀬𑀁 𑀲𑁄, 𑀫𑀳𑀸𑀕𑀸𑀫𑀫𑀼𑀧𑀸𑀕𑀫𑀺.

𑁫𑁮. 𑀤𑁄𑀳𑀴𑁂 𑀢𑁂 𑀘 𑀲𑀸 𑀤𑁂𑀯𑀻, 𑀧𑀭𑀺𑀪𑀼𑀜𑁆𑀚𑀺 𑀬𑀣𑀸𑀭𑀼𑀘𑀺;

𑀭𑀸𑀚𑀸 𑀬𑁄𑀥𑀲𑁆𑀲 𑀲𑀓𑁆𑀓𑀸𑀭𑀁, 𑀓𑀸𑀭𑀸𑀧𑁂𑀲𑀺 𑀬𑀣𑀸𑀭𑀳𑀁.

𑁫𑁯. 𑀲𑀸 𑀤𑁂𑀯𑀻 𑀲𑀫𑀬𑁂 𑀥𑀜𑁆𑀜𑀁, 𑀚𑀦𑀬𑀻 𑀧𑀼𑀢𑁆𑀢𑀫𑀼𑀢𑁆𑀢𑀫𑀁;

𑀫𑀳𑀸𑀭𑀸𑀚𑀓𑀼𑀮𑁂 𑀢𑀲𑁆𑀫𑀺𑀁, 𑀆𑀦𑀦𑁆𑀤𑁄 𑀘 𑀫𑀳𑀸 𑀅𑀳𑀼.

𑁬𑁦. 𑀢𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦, 𑀢𑀤𑀳𑁂𑀯 𑀉𑀧𑀸𑀕𑀫𑀼𑀁;

𑀦𑀸𑀦𑀸𑀭𑀢𑀦𑀲𑀫𑁆𑀧𑀼𑀡𑁆𑀡𑀸, 𑀲𑀢𑁆𑀢𑀦𑀸𑀯𑀸 𑀢𑀢𑁄 𑀢𑀢𑁄.

𑁬𑁧. 𑀢𑀲𑁆𑀲𑁂𑀯 𑀧𑀼𑀜𑁆𑀜𑀢𑁂𑀚𑁂𑀦, 𑀙𑀤𑁆𑀤𑀦𑁆𑀢𑀓𑀼𑀮𑀢𑁄 𑀓𑀭𑀻;

𑀳𑀢𑁆𑀣𑀺𑀘𑁆𑀙𑀸𑀧𑀁 𑀆𑀳𑀭𑀺𑀢𑁆𑀯𑀸, 𑀞𑀧𑁂𑀢𑁆𑀯𑀸 𑀇𑀥 𑀧𑀓𑁆𑀓𑀫𑀺.

𑁬𑁨. 𑀢𑀁 𑀢𑀺𑀢𑁆𑀣𑀲𑀭𑀢𑀻𑀭𑀫𑁆𑀳𑀺, 𑀤𑀺𑀲𑁆𑀯𑀸 𑀕𑀼𑀫𑁆𑀩𑀦𑁆𑀢𑀭𑁂 𑀞𑀺𑀢𑀁;

𑀓𑀡𑁆𑀟𑀼𑀮𑀯𑁆𑀳𑁄 𑀩𑀸𑀮𑀺𑀲𑀺𑀓𑁄, 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺 𑀢𑀸𑀯𑀤𑁂.

𑁬𑁩. 𑀧𑁂𑀲𑁂𑀢𑁆𑀯𑀸’𑀘𑀭𑀺𑀬𑁂 𑀭𑀸𑀚𑀸, 𑀢𑀫𑀸𑀡𑀸𑀧𑀺𑀬 𑀧𑁄𑀲𑀬𑀺;

𑀓𑀡𑁆𑀟𑀼𑀮𑁄 𑀇𑀢𑀺 𑀜𑀸𑀬𑀺𑀢𑁆𑀣, 𑀤𑀺𑀝𑁆𑀞𑀢𑁆𑀢𑀸 𑀓𑀡𑁆𑀟𑀼𑀮𑁂𑀦 𑀲𑁄.

𑁬𑁪. ‘‘𑀲𑀼𑀯𑀡𑁆𑀡𑀪𑀸𑀚𑀦𑀸𑀤𑀻𑀦𑀁, 𑀧𑀼𑀡𑁆𑀡𑀸 𑀦𑀸𑀯𑀸 𑀇𑀥𑀸𑀕𑀢𑀸’’;

𑀇𑀢𑀺 𑀭𑀜𑁆𑀜𑁄 𑀦𑀺𑀯𑁂𑀤𑀲𑀼𑀁, 𑀭𑀸𑀚𑀸 𑀢𑀸𑀦𑀸’𑀳𑀭𑀸𑀧𑀬𑀺.

𑁬𑁫. 𑀧𑀼𑀢𑁆𑀢𑀲𑁆𑀲 𑀦𑀸𑀫𑀓𑀭𑀡𑁂, 𑀫𑀗𑁆𑀕𑀮𑀫𑁆𑀳𑀺 𑀫𑀳𑀻𑀧𑀢𑀺;

𑀤𑁆𑀯𑀸𑀤𑀲 𑀲𑀳𑀲𑁆𑀲𑀲𑀗𑁆𑀔𑀁, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑀺𑀬.

𑁬𑁬. 𑀏𑀯𑀁 𑀘𑀺𑀦𑁆𑀢𑁂𑀲𑀺 ‘‘𑀬𑀤𑀺𑀫𑁂, 𑀧𑀼𑀢𑁆𑀢𑁄 𑀮𑀁𑀓𑀸𑀢𑀮𑁂’𑀔𑀺𑀮𑁂;

𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥-𑀲𑀸𑀲𑀦𑀁 𑀚𑁄𑀢𑀬𑀺𑀲𑁆𑀲𑀢𑀺.

𑁬𑁭. 𑀅𑀝𑁆𑀞𑀼𑀢𑁆𑀢𑀭𑀲𑀳𑀲𑁆𑀲𑀜𑁆𑀘, 𑀪𑀺𑀓𑁆𑀔𑀯𑁄 𑀧𑀯𑀺𑀲𑀦𑁆𑀢𑀼 𑀘;

𑀲𑀩𑁆𑀩𑁂 𑀢𑁂 𑀉𑀤𑁆𑀥𑀧𑀢𑁆𑀢𑀜𑁆𑀘, 𑀘𑀻𑀯𑀭𑀁 𑀧𑀸𑀭𑀧𑀦𑁆𑀢𑀼 𑀘.

𑁬𑁮. 𑀧𑀞𑀫𑀁 𑀤𑀓𑁆𑀔𑀺𑀡𑀁 𑀧𑀸𑀤𑀁, 𑀉𑀫𑁆𑀫𑀸𑀭𑀦𑁆𑀢𑁄 𑀞𑀧𑁂𑀦𑁆𑀢𑀼 𑀘;

𑀏𑀓𑀘𑁆𑀙𑀢𑁆𑀢𑀬𑀼𑀢𑀁 𑀥𑀫𑁆𑀫-𑀓𑀭𑀡𑀁 𑀦𑀻𑀳𑀭𑀦𑁆𑀢𑀼 𑀘.

𑁬𑁯. 𑀕𑁄𑀢𑀫𑁄 𑀦𑀸𑀫 𑀣𑁂𑀭𑁄 𑀘, 𑀧𑀢𑀺𑀕𑁆𑀕𑀡𑁆𑀳𑀸𑀢𑀼 𑀧𑀼𑀢𑁆𑀢𑀓𑀁;

𑀲𑁄 𑀘 𑀲𑀭𑀡𑀲𑀺𑀓𑁆𑀔𑀸 𑀬𑁄, 𑀤𑁂𑀢𑀼’’ 𑀲𑀩𑁆𑀩𑀁 𑀢𑀣𑀸 𑀅𑀳𑀼.

𑁭𑁦. 𑀲𑀩𑁆𑀩𑀁 𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸𑀦, 𑀢𑀼𑀝𑁆𑀞𑀘𑀺𑀢𑁆𑀢𑁄 𑀫𑀳𑀻𑀧𑀢𑀺;

𑀤𑀢𑁆𑀯𑀸 𑀲𑀗𑁆𑀖𑀲𑁆𑀲 𑀧𑀸𑀬𑀸𑀲𑀁, 𑀦𑀸𑀫𑀁 𑀧𑀼𑀢𑁆𑀢𑀲𑁆𑀲 𑀓𑀸𑀭𑀬𑀺.

𑁭𑁧. 𑀫𑀳𑀸𑀕𑀸𑀫𑁂 𑀦𑀸𑀬𑀓𑀢𑁆𑀢𑀁, 𑀧𑀺𑀢𑀼𑀦𑀸𑀫𑀜𑁆𑀘 𑀏𑀓𑀢𑁄;

𑀉𑀪𑁄 𑀓𑀢𑁆𑀯𑀸𑀦 𑀏𑀓𑀚𑁆𑀛𑀁, 𑀕𑀸𑀫𑀡𑀺𑀅𑀪𑀬𑁄 𑀇𑀢𑀺.

𑁭𑁨. 𑀫𑀳𑀸𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸, 𑀦𑀯𑀫𑁂 𑀤𑀺𑀯𑀲𑁂 𑀢𑀢𑁄;

𑀲𑀗𑁆𑀕𑀫𑀁 𑀤𑁂𑀯𑀺𑀬𑀸 𑀓𑀸𑀲𑀺, 𑀢𑁂𑀦 𑀕𑀩𑁆𑀪𑀫𑀕𑀡𑁆𑀳𑀺 𑀲𑀸.

𑁭𑁩. 𑀓𑀸𑀮𑁂 𑀚𑀸𑀢𑀁 𑀲𑀼𑀢𑀁 𑀭𑀸𑀚𑀸, 𑀢𑀺𑀲𑁆𑀲𑀦𑀸𑀫𑀁 𑀅𑀓𑀸𑀭𑀬𑀺;

𑀫𑀳𑀢𑀸 𑀧𑀭𑀺𑀳𑀸𑀭𑁂𑀦, 𑀉𑀪𑀢𑁄 𑀯𑀟𑁆𑀠𑀺𑀁𑀲𑀼 𑀤𑀸𑀭𑀓𑀸.