𑁧. 𑀲𑀦𑁆𑀥𑀺𑀓𑀧𑁆𑀧

𑀧𑀞𑀫𑀓𑀡𑁆𑀟

(𑀓)

𑀲𑁂𑀝𑁆𑀞𑀁 𑀢𑀺𑀮𑁄𑀓𑀫𑀳𑀺𑀢𑀁 𑀅𑀪𑀺𑀯𑀦𑁆𑀤𑀺𑀬𑀕𑁆𑀕𑀁,

𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀫𑀫𑀮𑀁 𑀕𑀡𑀫𑀼𑀢𑁆𑀢𑀫𑀜𑁆𑀘;

𑀲𑀢𑁆𑀣𑀼𑀲𑁆𑀲 𑀢𑀲𑁆𑀲 𑀯𑀘𑀦𑀢𑁆𑀣𑀯𑀭𑀁 𑀲𑀼𑀩𑀼𑀤𑁆𑀥𑀼𑀁,

𑀯𑀓𑁆𑀔𑀸𑀫𑀺 𑀲𑀼𑀢𑁆𑀢𑀳𑀺𑀢𑀫𑁂𑀢𑁆𑀣 𑀲𑀼𑀲𑀦𑁆𑀥𑀺𑀓𑀧𑁆𑀧𑀁.

(𑀔)

𑀲𑁂𑀬𑁆𑀬𑀁 𑀚𑀺𑀦𑁂𑀭𑀺𑀢𑀦𑀬𑁂𑀦 𑀩𑀼𑀥𑀸 𑀮𑀪𑀦𑁆𑀢𑀺,

𑀢𑀜𑁆𑀘𑀸𑀧𑀺 𑀢𑀲𑁆𑀲 𑀯𑀘𑀦𑀢𑁆𑀣𑀲𑀼𑀩𑁄𑀥𑀦𑁂𑀦;

𑀅𑀢𑁆𑀣𑀜𑁆𑀘 𑀅𑀓𑁆𑀔𑀭𑀧𑀤𑁂𑀲𑀼 𑀅𑀫𑁄𑀳𑀪𑀸𑀯𑀸,

𑀲𑁂𑀬𑁆𑀬𑀢𑁆𑀣𑀺𑀓𑁄 𑀧𑀤𑀫𑀢𑁄 𑀯𑀺𑀯𑀺𑀥𑀁 𑀲𑀼𑀡𑁂𑀬𑁆𑀬𑀁.

𑁧. , 𑁧. 𑀅𑀢𑁆𑀣𑁄 𑀅𑀓𑁆𑀔𑀭𑀲𑀜𑁆𑀜𑀸𑀢𑁄.

𑀲𑀩𑁆𑀩𑀯𑀘𑀦𑀸𑀦𑀫𑀢𑁆𑀣𑁄 𑀅𑀓𑁆𑀔𑀭𑁂𑀳𑁂𑀯 𑀲𑀜𑁆𑀜𑀸𑀬𑀢𑁂. 𑀅𑀓𑁆𑀔𑀭𑀯𑀺𑀧𑀢𑁆𑀢𑀺𑀬𑀁 𑀳𑀺 𑀅𑀢𑁆𑀣𑀲𑁆𑀲 𑀤𑀼𑀦𑁆𑀦𑀬𑀣𑀸 𑀳𑁄𑀢𑀺, 𑀢𑀲𑁆𑀫𑀸 𑀅𑀓𑁆𑀔𑀭𑀓𑁄𑀲𑀮𑁆𑀮𑀁 𑀩𑀳𑀽𑀧𑀓𑀸𑀭𑀁 𑀲𑀼𑀢𑁆𑀢𑀦𑁆𑀢𑁂𑀲𑀼.

𑁨. , 𑁨. 𑀅𑀓𑁆𑀔𑀭𑀸𑀧𑀸𑀤𑀬𑁄 𑀏𑀓𑀘𑀢𑁆𑀢𑀸𑀮𑀻𑀲𑀁.

𑀢𑁂 𑀘 𑀔𑁄 𑀅𑀓𑁆𑀔𑀭𑀸 𑀅𑀧𑀺 𑀅𑀓𑀸𑀭𑀸𑀤𑀬𑁄 𑀏𑀓𑀘𑀢𑁆𑀢𑀸 𑀮𑀻𑀲 𑀲𑀼𑀢𑁆𑀢𑀦𑁆𑀢𑁂𑀲𑀼 𑀲𑁄𑀧𑀓𑀸𑀭𑀸.

𑀢𑀁 𑀬𑀣𑀸? 𑀅 𑀆 𑀇 𑀈 𑀉 𑀊 𑀏 𑀑, 𑀓 𑀔 𑀕 𑀖 𑀗, 𑀘 𑀙 𑀚 𑀛 𑀜, 𑀝 𑀞 𑀟 𑀠 𑀡, 𑀢 𑀣 𑀤 𑀥 𑀦, 𑀧 𑀨 𑀩 𑀪 𑀫, 𑀬 𑀭 𑀮 𑀯 𑀲 𑀳 𑀴 𑀅𑀁, 𑀇𑀢𑀺 𑀅𑀓𑁆𑀔𑀭𑀸 𑀦𑀸𑀫.

𑀢𑁂𑀦 𑀓𑁆𑀯𑀢𑁆𑀣𑁄? 𑀅𑀢𑁆𑀣𑁄 𑀅𑀓𑁆𑀔𑀭𑀲𑀜𑁆𑀜𑀸𑀢𑁄.

𑁩. , 𑁩. 𑀢𑀢𑁆𑀣𑁄𑀤𑀦𑁆𑀢𑀸 𑀲𑀭𑀸 𑀅𑀝𑁆𑀞.

𑀢𑀢𑁆𑀣 𑀅𑀓𑁆𑀔𑀭𑁂𑀲𑀼 𑀅𑀓𑀸𑀭𑀸𑀤𑀻𑀲𑀼 𑀑𑀤𑀦𑁆𑀢𑀸 𑀅𑀝𑁆𑀞 𑀅𑀓𑁆𑀔𑀭𑀸 𑀲𑀭𑀸 𑀦𑀸𑀫 𑀳𑁄𑀦𑁆𑀢𑀺.

𑀢𑀁 𑀬𑀣𑀸? 𑀅 𑀆 𑀇 𑀈 𑀉 𑀊 𑀏 𑀑, 𑀇𑀢𑀺 𑀲𑀭𑀸 𑀦𑀸𑀫.

𑀢𑁂𑀦 𑀓𑁆𑀯𑀢𑁆𑀣𑁄? 𑀲𑀭𑀸 𑀲𑀭𑁂 𑀮𑁄𑀧𑀁.

𑁪. , 𑁪. 𑀮𑀳𑀼𑀫𑀢𑁆𑀢𑀸 𑀢𑀬𑁄 𑀭𑀲𑁆𑀲𑀸.

𑀢𑀢𑁆𑀣 𑀅𑀝𑁆𑀞𑀲𑀼 𑀲𑀭𑁂𑀲𑀼 𑀮𑀳𑀼𑀫𑀢𑁆𑀢𑀸 𑀢𑀬𑁄 𑀲𑀭𑀸 𑀭𑀲𑁆𑀲𑀸 𑀦𑀸𑀫 𑀳𑁄𑀦𑁆𑀢𑀺.

𑀢𑀁 𑀬𑀣𑀸? 𑀅 𑀇 𑀉, 𑀇𑀢𑀺 𑀭𑀲𑁆𑀲𑀸 𑀦𑀸𑀫.

𑀢𑁂𑀦 𑀓𑁆𑀯𑀢𑁆𑀣𑁄? 𑀭𑀲𑁆𑀲𑀁.

𑁫. , 𑁫. 𑀅𑀜𑁆𑀜𑁂 𑀤𑀻𑀖𑀸.

𑀢𑀢𑁆𑀣 𑀅𑀝𑁆𑀞𑀲𑀼 𑀲𑀭𑁂𑀲𑀼 𑀭𑀲𑁆𑀲𑁂𑀳𑀺 𑀅𑀜𑁆𑀜𑁂 𑀧𑀜𑁆𑀘 𑀲𑀭𑀸 𑀤𑀻𑀖𑀸 𑀦𑀸𑀫 𑀳𑁄𑀦𑁆𑀢𑀺.

𑀢𑀁 𑀬𑀣𑀸? 𑀆 𑀈 𑀊 𑀏 𑀑, 𑀇𑀢𑀺 𑀤𑀻𑀖𑀸 𑀦𑀸𑀫.

𑀢𑁂𑀦 𑀓𑁆𑀯𑀢𑁆𑀣𑁄? 𑀤𑀻𑀖𑀁.

𑁬. , 𑁮. 𑀲𑁂𑀲𑀸 𑀩𑁆𑀬𑀜𑁆𑀚𑀦𑀸.

𑀞𑀧𑁂𑀢𑁆𑀯𑀸 𑀅𑀝𑁆𑀞 𑀲𑀭𑁂 𑀲𑁂𑀲𑀸 𑀅𑀓𑁆𑀔𑀭𑀸 𑀓𑀓𑀸𑀭𑀸𑀤𑀬𑁄 𑀦𑀺𑀕𑁆𑀕𑀳𑀺𑀢𑀦𑁆𑀢𑀸 𑀩𑁆𑀬𑀜𑁆𑀚𑀦𑀸 𑀦𑀸𑀫 𑀳𑁄𑀦𑁆𑀢𑀺.

𑀢𑀁 𑀬𑀣𑀸? 𑀓 𑀔 𑀕 𑀖 𑀗, 𑀘 𑀙 𑀚 𑀛 𑀜, 𑀝 𑀞 𑀟 𑀠 𑀡, 𑀢 𑀣 𑀤 𑀥 𑀦, 𑀧 𑀨 𑀩 𑀪 𑀫, 𑀬 𑀭 𑀮 𑀯 𑀲 𑀳 𑀴 𑀅𑀁, 𑀇𑀢𑀺 𑀩𑁆𑀬𑀜𑁆𑀚𑀦𑀸 𑀦𑀸𑀫.

𑀢𑁂𑀦 𑀓𑁆𑀯𑀢𑁆𑀣𑁄? 𑀲𑀭𑀸 𑀧𑀓𑀢𑀺 𑀩𑁆𑀬𑀜𑁆𑀚𑀦𑁂.

𑁭. , 𑁯. 𑀯𑀕𑁆𑀕𑀸 𑀧𑀜𑁆𑀘𑀧𑀜𑁆𑀘𑀲𑁄 𑀫𑀦𑁆𑀢𑀸.

𑀢𑁂𑀲𑀁 𑀔𑁄 𑀩𑁆𑀬𑀜𑁆𑀚𑀦𑀸𑀦𑀁 𑀓𑀓𑀸𑀭𑀸𑀤𑀬𑁄 𑀫𑀓𑀸𑀭𑀦𑁆𑀢𑀸 𑀧𑀜𑁆𑀘𑀧𑀜𑁆𑀘𑀲𑁄 𑀅𑀓𑁆𑀔𑀭𑀯𑀦𑁆𑀢𑁄 𑀯𑀕𑁆𑀕𑀸 𑀦𑀸𑀫 𑀳𑁄𑀦𑁆𑀢𑀺.

𑀢𑀁 𑀬𑀣𑀸? 𑀓 𑀔 𑀕 𑀖 𑀗, 𑀘 𑀙 𑀚 𑀛 𑀜, 𑀝 𑀞 𑀟 𑀠 𑀡, 𑀢 𑀣 𑀤 𑀥 𑀦, 𑀧 𑀨 𑀩 𑀪 𑀫, 𑀇𑀢𑀺 𑀯𑀕𑁆𑀕𑀸 𑀦𑀸𑀫.

𑀢𑁂𑀦 𑀓𑁆𑀯𑀢𑁆𑀣𑁄? 𑀯𑀕𑁆𑀕𑀦𑁆𑀢𑀁 𑀯𑀸 𑀯𑀕𑁆𑀕𑁂.

𑁮. , 𑁧𑁦. 𑀅𑀁 𑀇𑀢𑀺 𑀦𑀺𑀕𑁆𑀕𑀳𑀺𑀢𑀁.

𑀅𑀁 𑀇𑀢𑀺 𑀦𑀺𑀕𑁆𑀕𑀳𑀺𑀢𑀁 𑀦𑀸𑀫 𑀳𑁄𑀢𑀺.

𑀢𑁂𑀦 𑀓𑁆𑀯𑀢𑁆𑀣𑁄? 𑀅𑀁 𑀩𑁆𑀬𑀜𑁆𑀚𑀦𑁂 𑀦𑀺𑀕𑁆𑀕𑀳𑀺𑀢𑀁.

𑁯. , 𑁧𑁧. 𑀧𑀭𑀲𑀫𑀜𑁆𑀜𑀸 𑀧𑀬𑁄𑀕𑁂.

𑀬𑀸 𑀘 𑀧𑀦 𑀧𑀭𑁂𑀲𑀼 𑀲𑀓𑁆𑀓𑀢𑀕𑀦𑁆𑀣𑁂𑀲𑀼 𑀲𑀫𑀜𑁆𑀜𑀸 𑀖𑁄𑀲𑀸𑀢𑀺 𑀯𑀸 𑀅𑀖𑁄𑀲𑀸𑀢𑀺 𑀯𑀸, 𑀢𑀸 𑀧𑀬𑁄𑀕𑁂 𑀲𑀢𑀺 𑀏𑀢𑁆𑀣𑀸𑀧𑀺 𑀬𑀼𑀚𑁆𑀚𑀦𑁆𑀢𑁂.

𑀢𑀢𑁆𑀣 𑀖𑁄𑀲𑀸 𑀦𑀸𑀫-𑀕 𑀖 𑀗, 𑀚 𑀛 𑀜, 𑀟 𑀠 𑀡, 𑀤 𑀥 𑀦, 𑀩 𑀪 𑀫, 𑀬 𑀭 𑀮 𑀯 𑀳 𑀴, 𑀇𑀢𑀺 𑀖𑁄𑀲𑀸 𑀦𑀸𑀫. 𑀅𑀖𑁄𑀲𑀸 𑀦𑀸𑀫-𑀓 𑀔, 𑀘 𑀙, 𑀝 𑀞, 𑀢 𑀣, 𑀧 𑀨, 𑀲, 𑀇𑀢𑀺 𑀅𑀖𑁄𑀲𑀸 𑀦𑀸𑀫.

𑀢𑁂𑀦 𑀓𑁆𑀯𑀢𑁆𑀣𑁄? 𑀯𑀕𑁆𑀕𑁂 𑀖𑁄𑀲𑀸𑀖𑁄𑀲𑀸𑀦𑀁 𑀢𑀢𑀺𑀬𑀧𑀞𑀫𑀸.

𑁧𑁦. , 𑁧𑁨. 𑀧𑀼𑀩𑁆𑀩𑀫𑀥𑁄𑀞𑀺𑀢 𑀫𑀲𑁆𑀲𑀭𑀁 𑀲𑀭𑁂𑀦 𑀯𑀺𑀬𑁄𑀚𑀬𑁂.

𑀢𑀢𑁆𑀣 𑀲𑀦𑁆𑀥𑀺𑀁 𑀓𑀢𑁆𑀢𑀼𑀓𑀸𑀫𑁄 𑀧𑀼𑀩𑁆𑀩𑀩𑁆𑀬𑀜𑁆𑀚𑀦𑀁 𑀅𑀥𑁄𑀞𑀺𑀢𑀁 𑀅𑀲𑁆𑀲𑀭𑀁 𑀓𑀢𑁆𑀯𑀸 𑀲𑀭𑀜𑁆𑀘 𑀉𑀧𑀭𑀺 𑀓𑀢𑁆𑀯𑀸 𑀲𑀭𑁂𑀦 𑀯𑀺𑀬𑁄𑀚𑀬𑁂.

𑀢𑀢𑁆𑀭𑀸𑀬𑀫𑀸𑀤𑀺.

𑁧𑁧. , 𑁧𑁪. 𑀦𑀬𑁂 𑀧𑀭𑀁 𑀬𑀼𑀢𑁆𑀢𑁂.

𑀅𑀲𑁆𑀲𑀭𑀁 𑀔𑁄 𑀩𑁆𑀬𑀜𑁆𑀚𑀦𑀁 𑀅𑀥𑁄𑀞𑀢𑀁 𑀧𑀭𑀓𑁆𑀔𑀭𑀁 𑀦𑀬𑁂 𑀬𑀼𑀢𑁆𑀢𑁂. 𑀢𑀢𑁆𑀭𑀸𑀪𑀺𑀭𑀢𑀺𑀫𑀺𑀘𑁆𑀙𑁂𑀬𑁆𑀬.

𑀬𑀼𑀢𑁆𑀢𑁂𑀢𑀺𑀓𑀲𑁆𑀫𑀸? 𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂. 𑀏𑀢𑁆𑀣 𑀧𑀦 𑀬𑀼𑀢𑁆𑀢𑀁 𑀦 𑀳𑁄𑀢𑀺.

𑀇𑀢𑀺 𑀲𑀦𑁆𑀥𑀺𑀓𑀧𑁆𑀧𑁂 𑀧𑀞𑀫𑁄 𑀓𑀡𑁆𑀟𑁄.

𑀤𑀼𑀢𑀺𑀬𑀓𑀡𑁆𑀟

𑁧𑁨. , 𑁧𑁩. 𑀲𑀭𑀸 𑀲𑀭𑁂 𑀮𑁄𑀧𑀁.

𑀲𑀭𑀸 𑀔𑁄 𑀲𑀭𑁂 𑀧𑀭𑁂 𑀮𑁄𑀧𑀁 𑀧𑀧𑁆𑀧𑁄𑀦𑁆𑀢𑀺.

𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀣𑀗𑁆𑀕𑀢𑀸𑀦𑀺. 𑀦𑁄 𑀳𑁂𑀢𑀁 𑀪𑀦𑁆𑀢𑁂 𑀲𑀫𑁂𑀢𑀸𑀬𑀲𑁆𑀫𑀸 𑀲𑀗𑁆𑀖𑁂𑀦.

𑁧𑁩. , 𑁧𑁫. 𑀯𑀸 𑀧𑀭𑁄 𑀅𑀲𑀭𑀽𑀧𑀸.

𑀲𑀭𑀫𑁆𑀳𑀸 𑀅𑀲𑀭𑀽𑀧𑀸 𑀧𑀭𑁄 𑀲𑀭𑁄 𑀮𑁄𑀧𑀁 𑀧𑀧𑁆𑀧𑁄𑀢𑀺 𑀯𑀸.

𑀘𑀢𑁆𑀢𑀸𑀭𑁄’𑀫𑁂 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸, 𑀓𑀺𑀦𑁆𑀦𑀼’ 𑀫𑀸𑀯𑀲𑀫𑀡𑀺𑀬𑁄. 𑀯𑀸𑀢𑀺 𑀓𑀲𑁆𑀫𑀸? 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑀬𑀲𑁆𑀲𑀼 𑀥𑀫𑁆𑀫𑀸 𑀚𑀳𑀺𑀢𑀸 𑀪𑀯𑀦𑁆𑀢𑀺.

𑁧𑁪. , 𑁧𑁬. 𑀓𑁆𑀯𑀘𑀸𑀲𑀘𑀡𑁆𑀡𑀁 𑀮𑀼𑀢𑁆𑀢𑁂.

𑀲𑀭𑁄 𑀔𑁄 𑀧𑀭𑁄 𑀧𑀼𑀩𑁆𑀩𑀲𑀭𑁂 𑀮𑀼𑀢𑁆𑀢𑁂 𑀓𑁆𑀯𑀘𑀺 𑀅𑀲𑀯𑀡𑁆𑀡𑀁 𑀧𑀧𑁆𑀧𑁄𑀢𑀺.

𑀲𑀗𑁆𑀔𑁆𑀬𑀁 𑀦𑁄𑀧𑁂𑀢𑀺 𑀯𑁂𑀤𑀕𑀽, 𑀩𑀦𑁆𑀥𑀼𑀲𑁆𑀲𑁂𑀯 𑀲𑀫𑀸𑀕𑀫𑁄.

𑀓𑁆𑀯𑀘𑀻𑀢𑀺 𑀓𑀲𑁆𑀫𑀸? 𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑀣𑀽𑀧𑀫𑀁 𑀥𑀫𑁆𑀫𑀯𑀭𑀁 𑀅𑀤𑁂𑀲𑀬𑀺.

𑁧𑁫. , 𑁧𑁭. 𑀤𑀻𑀖𑀁.

𑀲𑀭𑁄 𑀔𑁄 𑀧𑀭𑁄 𑀧𑀼𑀩𑁆𑀩𑀲𑀭𑁂 𑀮𑀼𑀢𑁆𑀢𑁂 𑀓𑁆𑀯𑀘𑀺 𑀤𑀻𑀖𑀁 𑀧𑀧𑁆𑀧𑁄𑀢𑀺. 𑀲𑀤𑁆𑀥𑀻𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁, 𑀅𑀦𑀸𑀕𑀸𑀭𑁂𑀳𑀺 𑀘𑀽𑀪𑀬𑀁.

𑀓𑁆𑀯𑀘𑀻𑀢𑀺 𑀓𑀲𑁆𑀫𑀸? 𑀧𑀜𑁆𑀘𑀳𑀼𑀧𑀸𑀮𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀺.

𑁧𑁬. , 𑁧𑁮. 𑀧𑀼𑀩𑁆𑀩𑁄 𑀘.

𑀧𑀼𑀩𑁆𑀩𑁄 𑀘 𑀲𑀭𑁄 𑀧𑀭𑀲𑀭𑀮𑁄𑀧𑁂 𑀓𑀢𑁂 𑀓𑁆𑀯𑀘𑀺 𑀤𑀻𑀖𑀁 𑀧𑀧𑁆𑀧𑁄𑀢𑀺.

𑀓𑀺𑀁𑀲𑀽𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁, 𑀲𑀸𑀥𑀽𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸, 𑀓𑁆𑀯𑀘𑀻𑀢𑀺 𑀓𑀲𑁆𑀫𑀸? 𑀇𑀢𑀺𑀲𑁆𑀲 𑀫𑀼𑀳𑀼𑀢𑁆𑀢𑀫𑁆𑀧𑀺.

𑁧𑁭. , 𑁧𑁯. 𑀬𑀫𑁂𑀤𑀦𑁆𑀢𑀲𑁆𑀲𑀸𑀤𑁂𑀲𑁄.

𑀏𑀓𑀸𑀭𑀲𑁆𑀲 𑀅𑀦𑁆𑀢𑀪𑀽𑀢𑀲𑁆𑀲 𑀲𑀭𑁂 𑀧𑀭𑁂 𑀓𑁆𑀯𑀘𑀺 𑀬𑀓𑀸𑀭𑀸𑀤𑁂𑀲𑁄 𑀳𑁄𑀢𑀺.

𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄, 𑀢𑁆𑀬𑀸𑀳𑀁 𑀏𑀯𑀁 𑀯𑀤𑁂𑀬𑁆𑀬𑀁, 𑀢𑁆𑀬𑀸𑀲𑁆𑀲 𑀧𑀳𑀻𑀦𑀸 𑀳𑁄𑀦𑁆𑀢𑀺.

𑀓𑁆𑀯𑀘𑀻𑀢𑀺 𑀓𑀲𑁆𑀫𑀸? 𑀦𑁂’𑀦𑀸𑀕𑀢𑀸, 𑀇𑀢𑀺 𑀦𑁂𑀢𑁆𑀣.

𑁧𑁮. , 𑁨𑁦. 𑀯𑀫𑁄𑀤𑀼𑀤𑀦𑁆𑀢𑀸𑀦𑀁.

𑀑𑀓𑀸𑀭𑀼𑀓𑀸𑀭𑀸𑀦𑀁 𑀅𑀦𑁆𑀢𑀪𑀽𑀢𑀸𑀦𑀁 𑀲𑀭𑁂 𑀧𑀭𑁂 𑀓𑁆𑀯𑀘𑀺 𑀯𑀓𑀸𑀭𑀸𑀤𑁂𑀲𑁄 𑀳𑁄𑀢𑀺.

𑀅𑀣 𑀔𑁆𑀯𑀲𑁆𑀲, 𑀲𑁆𑀯𑀲𑁆𑀲 𑀳𑁄𑀢𑀺, 𑀩𑀳𑁆𑀯𑀸𑀩𑀸𑀥𑁄, 𑀯𑀢𑁆𑀣𑁆𑀯𑁂𑀢𑁆𑀣 𑀯𑀺𑀳𑀺𑀢𑀁 𑀦𑀺𑀘𑁆𑀘𑀁 𑀘𑀓𑁆𑀔𑀸𑀧𑀸𑀣𑀫𑀸𑀕𑀘𑁆𑀙𑀢𑀺.

𑀓𑁆𑀯𑀘𑀻𑀢𑀺𑀓𑀲𑁆𑀫𑀸? 𑀘𑀢𑁆𑀢𑀸𑀭𑁄’𑀫𑁂 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸, 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄.

𑁧𑁯. , 𑁨𑁨. 𑀲𑀩𑁆𑀩𑁄 𑀘𑀁𑀢𑀺.

𑀲𑀩𑁆𑀩𑁄 𑀇𑀘𑁆𑀘𑁂𑀲𑁄 𑀢𑀺𑀲𑀤𑁆𑀤𑁄 𑀩𑁆𑀬𑀜𑁆𑀚𑀦𑁄 𑀲𑀭𑁂 𑀧𑀭𑁂 𑀓𑁆𑀯𑀘𑀺 𑀘𑀓𑀸𑀭𑀁 𑀧𑀧𑁆𑀧𑁄𑀢𑀺.

𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁, 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸, 𑀧𑀘𑁆𑀘𑀸𑀳𑀭𑀢𑀺.

𑀓𑁆𑀯𑀘𑀻𑀢𑀺 𑀓𑀲𑁆𑀫𑀸? 𑀇𑀢𑀺𑀲𑁆𑀲 𑀫𑀼𑀳𑀼𑀢𑁆𑀢𑀫𑁆𑀧𑀺.

𑁨𑁦. , 𑁨𑁭. 𑀤𑁄 𑀥𑀲𑁆𑀲 𑀘.

𑀥𑀇𑀘𑁆𑀘𑁂𑀢𑀲𑁆𑀲 𑀲𑀭𑁂 𑀧𑀭𑁂 𑀓𑁆𑀯𑀘𑀺 𑀤𑀓𑀸𑀭𑀸𑀤𑁂𑀲𑁄 𑀳𑁄𑀢𑀺.

𑀏𑀓𑀫𑀺𑀤𑀸𑀳𑀁 𑀪𑀺𑀓𑁆𑀔𑀯𑁂 𑀲𑀫𑀬𑀁.

𑀓𑁆𑀯𑀘𑀻𑀢𑀺 𑀓𑀲𑁆𑀫𑀸? 𑀇𑀥𑁂𑀯 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺.

𑀯𑀕𑁆𑀕𑀳𑀡𑁂𑀦 𑀥𑀓𑀸𑀭𑀲𑁆𑀲 𑀳𑀓𑀸𑀭𑀸𑀤𑁂𑀲𑁄 𑀳𑁄𑀢𑀺 𑀲𑀸𑀳𑀼 𑀤𑀲𑁆𑀲𑀦 𑀫𑀭𑀺𑀬𑀸𑀦𑀁.

𑀲𑀼𑀢𑁆𑀢𑀯𑀺𑀪𑀸𑀕𑁂𑀦 𑀩𑀳𑀼𑀥𑀸 𑀲𑀺𑀬𑀸-

𑀢𑁄 𑀤𑀲𑁆𑀲, 𑀬𑀣𑀸? 𑀲𑀼𑀕𑀢𑁄.

𑀝𑁄 𑀢𑀲𑁆𑀲, 𑀬𑀣𑀸? 𑀤𑀼𑀓𑁆𑀓𑀝𑀁.

𑀥𑁄 𑀢𑀲𑁆𑀲, 𑀬𑀣𑀸? 𑀕𑀦𑁆𑀥𑀩𑁆𑀩𑁄.

𑀢𑁆𑀭𑁄 𑀢𑁆𑀢𑀲𑁆𑀲, 𑀬𑀣𑀸? 𑀅𑀢𑁆𑀭𑀚𑁄.

𑀓𑁄 𑀕𑀲𑁆𑀲, 𑀬𑀣𑀸? 𑀓𑀼𑀮𑀽𑀧𑀓𑁄.

𑀮𑁄 𑀭𑀲𑁆𑀲, 𑀬𑀣𑀸? 𑀫𑀳𑀸𑀲𑀸𑀮𑁄.

𑀚𑁄 𑀬𑀲𑁆𑀲, 𑀬𑀣𑀸? 𑀕𑀯𑀚𑁄.

𑀩𑁆𑀩𑁄 𑀯𑀲𑁆𑀲, 𑀬𑀣𑀸? 𑀓𑀼𑀩𑁆𑀩𑀢𑁄.

𑀓𑁄 𑀬𑀲𑁆𑀲, 𑀬𑀣𑀸? 𑀲𑀓𑁂.

𑀬𑁄 𑀚𑀲𑁆𑀲, 𑀬𑀣𑀸? 𑀦𑀺𑀬𑀁𑀧𑀼𑀢𑁆𑀢𑀁.

𑀓𑁄 𑀢𑀲𑁆𑀲, 𑀬𑀣𑀸? 𑀦𑀺𑀬𑀓𑁄.

𑀘𑁆𑀘𑁄 𑀢𑁆𑀢𑀲𑁆𑀲, 𑀬𑀣𑀸 𑀪𑀘𑁆𑀘𑁄.

𑀨𑁄 𑀧𑀲𑁆𑀲, 𑀬𑀣𑀸? 𑀦𑀺𑀧𑁆𑀨𑀢𑁆𑀢𑀺.

𑀔𑁄 𑀓𑀲𑁆𑀲, 𑀬𑀣𑀸? 𑀦𑀺𑀓𑁆𑀔𑀫𑀢𑀺. 𑀇𑀘𑁆𑀘𑁂𑀯𑀫𑀸𑀤𑀻 𑀬𑁄𑀚𑁂𑀢𑀩𑁆𑀩𑀸.

𑁨𑁧. , 𑁨𑁧. 𑀇𑀯𑀡𑁆𑀡𑁄 𑀬𑀁 𑀦𑀯𑀸.

𑀧𑀼𑀩𑁆𑀩𑁄 𑀇𑀯𑀡𑁆𑀡𑁄 𑀲𑀭𑁂 𑀧𑀭𑁂 𑀬𑀓𑀸𑀭𑀁 𑀧𑀧𑁆𑀧𑁄𑀢𑀺 𑀦𑀯𑀸. 𑀧𑀝𑀺𑀲𑀼𑀦𑁆𑀣𑀸𑀭𑀯𑀼𑀢𑁆𑀬𑀲𑁆𑀲, 𑀲𑀩𑁆𑀩𑀸 𑀯𑀺𑀢𑁆𑀬𑀸𑀦𑀼𑀪𑀽𑀬𑀢𑁂.

𑀦𑀯𑀸𑀢𑀺 𑀓𑀲𑁆𑀫𑀸? 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀫𑀼𑀢𑁆𑀢𑀘𑀸𑀕𑀻 𑀅𑀦𑀼𑀤𑁆𑀥𑀢𑁄.

𑁨𑁨. , 𑁨𑁮. 𑀏𑀯𑀸𑀤𑀺𑀲𑁆𑀲 𑀭𑀺 𑀧𑀼𑀩𑁆𑀩𑁄 𑀘 𑀭𑀲𑁆𑀲𑁄.

𑀲𑀭𑀫𑁆𑀳𑀸 𑀧𑀭𑀲𑁆𑀲 𑀏𑀯𑀲𑁆𑀲 𑀏𑀓𑀸𑀭𑀲𑁆𑀲 𑀆𑀤𑀺𑀲𑁆𑀲 𑀭𑀺𑀓𑀸𑀭𑁄 𑀳𑁄𑀢𑀺, 𑀧𑀼𑀩𑁆𑀩𑁄 𑀘 𑀲𑀭𑁄 𑀭𑀲𑁆𑀲𑁄 𑀳𑁄𑀢𑀺 𑀦𑀯𑀸.

𑀬𑀣𑀭𑀺𑀯 𑀯𑀲𑀼𑀥𑀸𑀢𑀮𑀜𑁆𑀘 𑀲𑀩𑁆𑀩𑀁, 𑀢𑀣𑀭𑀺𑀯 𑀕𑀼𑀡𑀯𑀸 𑀲𑀼𑀧𑀽𑀚𑀦𑀺𑀬𑁄.

𑀦𑀯𑀸𑀢𑀺 𑀓𑀲𑁆𑀫𑀸? 𑀬𑀣𑀸 𑀏𑀯, 𑀢𑀣𑀸 𑀏𑀯.

𑀇𑀢𑀺 𑀲𑀦𑁆𑀥𑀺𑀓𑀧𑁆𑀧𑁂 𑀤𑀼𑀢𑀺𑀬𑁄 𑀓𑀡𑁆𑀟𑁄.

𑀢𑀢𑀺𑀬𑀓𑀡𑁆𑀟

𑁨𑁩. , 𑁨𑁬. 𑀲𑀭𑀸 𑀧𑀓𑀢𑀺 𑀩𑁆𑀬𑀜𑁆𑀚𑀦𑁂.

𑀲𑀭𑀸 𑀔𑁄 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀧𑀓𑀢𑀺𑀭𑀽𑀧𑀸𑀦𑀺 𑀳𑁄𑀦𑁆𑀢𑀺.

𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁, 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀅𑀳𑀼.

𑁨𑁪. , 𑁩𑁫. 𑀲𑀭𑁂 𑀓𑁆𑀯𑀘𑀺.

𑀲𑀭𑀸 𑀔𑁄 𑀲𑀭𑁂 𑀧𑀭𑁂 𑀓𑁆𑀯𑀘𑀺 𑀧𑀓𑀢𑀺𑀭𑀽𑀧𑀸𑀦𑀺 𑀳𑁄𑀦𑁆𑀢𑀺.

𑀓𑁄 𑀇𑀫𑀁 𑀧𑀣𑀯𑀺𑀁 𑀯𑀺𑀘𑁂𑀲𑁆𑀲𑀢𑀺.

𑀓𑁆𑀯𑀘𑀻𑀢𑀺 𑀓𑀲𑁆𑀫𑀸? 𑀅𑀧𑁆𑀧𑀲𑁆𑀲𑀼𑀢𑀸𑀬𑀁 𑀧𑀼𑀭𑀺𑀲𑁄.

𑁨𑁫. , 𑁩𑁭. 𑀤𑀻𑀖𑀁.

𑀲𑀭𑀸 𑀔𑁄 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀓𑁆𑀯𑀘𑀺 𑀤𑀻𑀖𑀁 𑀧𑀧𑁆𑀧𑁄𑀦𑁆𑀢𑀺.

𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄, 𑀏𑀯𑀁 𑀕𑀸𑀫𑁂 𑀫𑀼𑀦𑀻 𑀘𑀭𑁂, 𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸.

𑀓𑁆𑀯𑀘𑀻𑀢𑀺 𑀓𑀲𑁆𑀫𑀸? 𑀇𑀥 𑀫𑁄𑀤𑀢𑀺 𑀧𑁂𑀘𑁆𑀘 𑀫𑁄𑀤𑀢𑀺, 𑀧𑀢𑀺𑀮𑀻𑀬𑀢𑀺, 𑀧𑀝𑀺𑀳𑀜𑁆𑀜𑀢𑀺.

𑁨𑁬. , 𑁩𑁮. 𑀭𑀲𑁆𑀲𑀁.

𑀲𑀭𑀸 𑀔𑁄 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀓𑁆𑀯𑀘𑀺 𑀭𑀲𑁆𑀲𑀁 𑀧𑀧𑁆𑀧𑁄𑀦𑁆𑀢𑀺.

𑀪𑁄𑀯𑀸𑀤𑀺𑀦𑀸𑀫 𑀲𑁄 𑀳𑁄𑀢𑀺, 𑀬𑀣𑀸𑀪𑀸𑀯𑀺 𑀕𑀼𑀡𑁂𑀦 𑀲𑁄.

𑀓𑁆𑀯𑀘𑀻𑀢𑀺 𑀓𑀲𑁆𑀫𑀸? 𑀲𑀫𑁆𑀫𑀸𑀲𑀫𑀸𑀥𑀺, 𑀲𑀸𑀯𑀺𑀢𑁆𑀢𑀻 𑀙𑀦𑁆𑀤𑀲𑁄 𑀫𑀼𑀔𑀁, 𑀉𑀧𑀦𑀻𑀬𑀢𑀺 𑀚𑀻𑀯𑀺𑀢𑀫𑀧𑁆𑀧𑀫𑀸𑀬𑀼.

𑁨𑁭. , 𑁩𑁯. 𑀮𑁄𑀧𑀜𑁆𑀘 𑀢𑀢𑁆𑀭𑀸𑀓𑀸𑀭𑁄.

𑀲𑀭𑀸 𑀔𑁄 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀓𑁆𑀯𑀘𑀺 𑀮𑁄𑀧𑀁 𑀧𑀧𑁆𑀧𑁄𑀦𑁆𑀢𑀺. 𑀢𑀢𑁆𑀭 𑀘 𑀮𑁄𑀧𑁂 𑀓𑀢𑁂 𑀅𑀓𑀸𑀭𑀸𑀕𑀫𑁄 𑀳𑁄𑀢𑀺.

𑀲 𑀲𑀻𑀮𑀯𑀸. 𑀲 𑀧𑀜𑁆𑀜𑀯𑀸 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄, 𑀲 𑀯𑁂 𑀓𑀲𑀸𑀯𑀫𑀭𑀳𑀢𑀺, 𑀲 𑀫𑀸𑀦𑀓𑀸𑀫𑁄𑀧𑀺 𑀪𑀯𑁂𑀬𑁆𑀬, 𑀲 𑀯𑁂 𑀫𑀼𑀦𑀺 𑀚𑀸𑀢𑀺𑀪𑀬𑀁 𑀅𑀤𑀲𑁆𑀲𑀺.

𑀓𑁆𑀯𑀘𑀻𑀢𑀺 𑀓𑀲𑁆𑀫𑀸? 𑀲𑁄 𑀫𑀼𑀦𑀺, 𑀏𑀲𑁄 𑀥𑀫𑁆𑀫𑁄 𑀧𑀤𑀺𑀲𑁆𑀲𑀢𑀺, 𑀦 𑀲𑁄 𑀓𑀸𑀲𑀸𑀯𑀫𑀭𑀳𑀢𑀺.

𑁨𑁮. , 𑁪𑁦. 𑀧𑀭 𑀤𑁆𑀯𑁂𑀪𑀸𑀯𑁄 𑀞𑀸𑀦𑁂.

𑀲𑀭𑀫𑁆𑀳𑀸 𑀧𑀭𑀲𑁆𑀲 𑀩𑁆𑀬𑀜𑁆𑀚𑀦𑀲𑁆𑀲 𑀤𑁆𑀯𑁂𑀪𑀸𑀯𑁄 𑀳𑁄𑀢𑀺 𑀞𑀸𑀦𑁂.

𑀇𑀥𑀧𑁆𑀧𑀫𑀸𑀤𑁄, 𑀧𑀼𑀭𑀺𑀲𑀲𑁆𑀲 𑀚𑀦𑁆𑀢𑀼𑀦𑁄, 𑀧𑀩𑁆𑀩𑀚𑁆𑀚𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀘𑀸𑀢𑀼𑀤𑁆𑀤𑀲𑀺, 𑀧𑀜𑁆𑀘𑀤𑁆𑀤𑀲𑀺, 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘𑀦𑁆𑀤𑁄.

𑀞𑀸𑀦𑁂𑀢𑀺 𑀓𑀲𑁆𑀫𑀸? 𑀇𑀥 𑀫𑁄𑀤𑀢𑀺 𑀧𑁂𑀘𑁆𑀘 𑀫𑁄𑀤𑀢𑀺.

𑁨𑁯. , 𑁪𑁨. 𑀯𑀕𑁆𑀕𑁂 𑀖𑁄𑀲𑀸𑀖𑁄𑀲𑀸𑀦𑀁 𑀢𑀢𑀺𑀬𑀧𑀞𑀫𑀸.

𑀯𑀕𑁆𑀕𑁂 𑀔𑁄 𑀧𑀼𑀩𑁆𑀩𑁂𑀲𑀁 𑀩𑁆𑀬𑀜𑁆𑀚𑀦𑀸𑀦𑀁 𑀖𑁄𑀲𑀸𑀖𑁄𑀲𑀪𑀽𑀢𑀸𑀦𑀁 𑀲𑀭𑀫𑁆𑀳𑀸 𑀬𑀣𑀸𑀲𑀗𑁆𑀔𑁆𑀬𑀁 𑀢𑀢𑀺𑀬𑀧𑀞𑀫𑀓𑁆𑀔𑀭𑀸 𑀤𑁆𑀯𑁂𑀪𑀸𑀯𑀁 𑀕𑀘𑁆𑀙𑀦𑁆𑀢𑀺 𑀞𑀸𑀦𑁂.

𑀏𑀲𑁂𑀯 𑀘𑀚𑁆𑀛𑀸𑀦𑀧𑁆𑀨𑀮𑁄, 𑀬𑀢𑁆𑀭𑀝𑁆𑀞𑀺𑀢𑀁 𑀦𑀧𑁆𑀧𑀲𑀳𑁂𑀬𑁆𑀬 𑀫𑀘𑁆𑀘𑀼, 𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄, 𑀘𑀢𑁆𑀢𑀸𑀭𑀺𑀝𑁆𑀞𑀸𑀦𑀸𑀦𑀺 𑀦𑀭𑁄 𑀧𑀫𑀢𑁆𑀢𑁄.

𑀞𑀸𑀦𑁂𑀢𑀺 𑀓𑀲𑁆𑀫𑀸? 𑀇𑀥 𑀘𑁂𑀢𑀲𑁄 𑀤𑀴𑁆𑀳𑀁 𑀕𑀡𑁆𑀳𑀸𑀢𑀺 𑀣𑀸𑀫𑀲𑀸.

𑀇𑀢𑀺 𑀲𑀦𑁆𑀥𑀺𑀓𑀧𑁆𑀧𑁂 𑀢𑀢𑀺𑀬𑁄 𑀓𑀡𑁆𑀟𑁄.

𑀘𑀢𑀼𑀢𑁆𑀣𑀓𑀡𑁆𑀟

𑁩𑁦. , 𑁫𑁮. 𑀅𑀁 𑀩𑁆𑀬𑀜𑁆𑀚𑀦𑁂 𑀦𑀺𑀕𑁆𑀕𑀳𑀺𑀢𑀁.

𑀦𑀺𑀕𑁆𑀕𑀳𑀺𑀢𑀁 𑀔𑁄 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀅𑀁 𑀇𑀢𑀺 𑀳𑁄𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀢𑀁 𑀲𑀸𑀥𑀽𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸.

𑁩𑁧. , 𑁪𑁯. 𑀯𑀕𑁆𑀕𑀦𑁆𑀢𑀁 𑀯𑀸 𑀯𑀕𑁆𑀕𑁂.

𑀯𑀕𑁆𑀕𑀪𑀽𑀢𑁂 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀦𑀺𑀕𑁆𑀕𑀳𑀺𑀢𑀁 𑀔𑁄 𑀯𑀕𑁆𑀕𑀦𑁆𑀢𑀁 𑀯𑀸 𑀧𑀧𑁆𑀧𑁄𑀢𑀺.

𑀢𑀦𑁆𑀦𑀺𑀘𑁆𑀘𑀼𑀢𑀁, 𑀥𑀫𑁆𑀫𑀜𑁆𑀘𑀭𑁂 𑀲𑀼𑀘𑀭𑀺𑀢𑀁, 𑀘𑀺𑀭𑀧𑁆𑀧𑀯𑀸𑀲𑀺𑀁 𑀧𑀼𑀭𑀺𑀲𑀁. 𑀲𑀦𑁆𑀢𑀦𑁆𑀢𑀲𑁆𑀲 𑀫𑀦𑀁 𑀳𑁄𑀢𑀺, 𑀢𑀗𑁆𑀓𑀸𑀭𑀼𑀡𑀺𑀓𑀁, 𑀏𑀯𑀗𑁆𑀔𑁄 𑀪𑀺𑀓𑁆𑀔𑀯𑁂 𑀲𑀺𑀓𑁆𑀔𑀺𑀢𑀩𑁆𑀩𑀁.

𑀯𑀸𑀕𑁆𑀕𑀳𑀡𑁂𑀦𑀦𑀺𑀕𑁆𑀕𑀳𑀺𑀢𑀁 𑀔𑁄 𑀮𑀓𑀸𑀭𑀸𑀤𑁂𑀲𑁄 𑀳𑁄𑀢𑀺. 𑀧𑀼𑀕𑁆𑀕𑀮𑀁.

𑀯𑀸𑀢𑀺 𑀓𑀲𑁆𑀫𑀸? 𑀦 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼.

𑁩𑁨. , 𑁫𑁦. 𑀏𑀳𑁂 𑀉𑀁.

𑀏𑀓𑀸𑀭𑀳𑀓𑀸𑀭𑁂 𑀧𑀭𑁂 𑀦𑀺𑀕𑁆𑀕𑀳𑀺𑀢𑀁 𑀔𑁄 𑀜𑀓𑀸𑀭𑀁 𑀧𑀧𑁆𑀧𑁄𑀢𑀺 𑀯𑀸.

𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀏𑀯𑀜𑁆𑀳𑀺 𑀯𑁄 𑀪𑀺𑀓𑁆𑀔𑀯𑁂 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀢𑀲𑁆𑀲 𑀫𑀼𑀲𑀸 𑀳𑁄𑀢𑀺.