𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀚𑀺𑀦𑀸𑀮𑀗𑁆𑀓𑀸𑀭

𑀧𑀡𑀸𑀫𑀤𑀻𑀧𑀦𑀻𑀕𑀸𑀣𑀸

𑁧. 𑀬𑁄 𑀮𑁄𑀓𑀢𑁆𑀣𑀸𑀬 𑀩𑀼𑀤𑁆𑀥𑁄 𑀥𑀦𑀲𑀼𑀢𑀪𑀭𑀺𑀬𑀸𑀅𑀗𑁆𑀕𑀚𑀻𑀯𑁂 𑀘𑀚𑀺𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀆𑀭𑀫𑀺𑀬𑁄 𑀢𑀺𑀤𑀲𑀫𑀦𑀼𑀧𑀫𑁂 𑀩𑁄𑀥𑀺𑀧𑀓𑁆𑀔𑀻𑀬𑀥𑀫𑁆𑀫𑁂,

𑀧𑀢𑁆𑀯𑀸 𑀩𑁄𑀥𑀺𑀁 𑀯𑀺𑀲𑀼𑀤𑁆𑀥𑀁 𑀲𑀓𑀮𑀕𑀼𑀡𑀤𑀤𑀁 𑀲𑁂𑀝𑁆𑀞𑀪𑀽𑀢𑁄 𑀢𑀺𑀮𑁄𑀓𑁂,

𑀓𑀢𑁆𑀯𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀓𑀢𑀲𑀼𑀪𑀚𑀦𑀢𑀁 𑀤𑀼𑀓𑁆𑀔𑀢𑁄 𑀫𑁄𑀘𑀬𑀺𑀢𑁆𑀣.

𑁨. 𑀦𑀢𑁆𑀯𑀸𑀦𑀸𑀳𑀁 𑀚𑀺𑀦𑀦𑁆𑀢𑀁 𑀲𑀫𑀼𑀧𑀘𑀺𑀢𑀲𑀼𑀪𑀁 𑀲𑀩𑁆𑀩𑀮𑁄𑀓𑁂𑀓𑀩𑀦𑁆𑀥𑀼𑀁,

𑀦𑀸𑀳𑀼 𑀬𑁂𑀦𑀧𑀺 𑀢𑀼𑀮𑁆𑀬𑁄 𑀓𑀼𑀲𑀮𑀫𑀳𑀺𑀫𑀢𑁄 𑀉𑀢𑁆𑀢𑀫𑁄 𑀪𑀽𑀢𑀮𑁄𑀓𑁂 𑀢𑀲𑁆𑀲𑁂𑀯𑀸𑀬𑀁 𑀉𑀯𑀺𑀫𑁆𑀳𑀁 𑀲𑀼𑀯𑀺𑀧𑀼𑀮𑀫𑀫𑀮𑀁 𑀩𑁄𑀥𑀺𑀲𑀫𑁆𑀪𑀸𑀭𑀪𑀽𑀢𑀁,

𑀳𑁂𑀢𑀼𑀁 𑀳𑁂𑀢𑁆𑀯𑀸𑀦𑀼𑀭𑀽𑀧𑀁 𑀲𑀼𑀕𑀢𑀕𑀢𑀨𑀮𑀁 𑀪𑀸𑀲𑀢𑁄 𑀫𑁂 𑀲𑀼𑀡𑀸𑀣.

𑀬𑁄𑀕𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀤𑀻𑀧𑀦𑀻𑀕𑀸𑀣𑀸

𑁩. 𑀚𑀸𑀢𑁄 𑀬𑁄 𑀦𑀯𑀫𑁂 𑀔𑀡𑁂 𑀲𑀼𑀢𑀥𑀭𑁄 𑀲𑀻𑀮𑁂𑀦 𑀲𑀼𑀤𑁆𑀥𑀺𑀦𑁆𑀤𑁆𑀭𑀺𑀬𑁄 𑀲𑀁𑀲𑀸𑀭𑀁 𑀅𑀬𑀢𑁄 𑀪𑀯𑀓𑁆𑀓𑀬𑀓𑀭𑀁 𑀤𑀺𑀲𑁆𑀯𑀸 𑀲𑀺𑀯𑀁 𑀔𑁂𑀫𑀢𑁄,

𑀢𑀁 𑀲𑀫𑁆𑀧𑀸𑀧𑀓𑀫𑀕𑁆𑀕𑀤𑁂𑀲𑀓𑀫𑀼𑀦𑀺𑀁 𑀲𑀫𑁆𑀧𑀽𑀚𑀬𑀦𑁆𑀢𑁄 𑀢𑀢𑁄 𑀉𑀤𑁆𑀥𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀸𑀤𑀺𑀓𑀫𑀢𑁄 𑀲𑀫𑁆𑀧𑀸𑀤𑀬𑁂 𑀢𑀁 𑀲𑀺𑀯𑀁.

𑀯𑀢𑁆𑀣𑀼𑀯𑀺𑀲𑁄𑀥𑀦𑀻𑀕𑀸𑀣𑀸

𑁪. 𑀩𑀼𑀤𑁆𑀥𑁄𑀢𑀺 𑀓𑁄 𑀩𑀼𑀤𑁆𑀥𑀕𑀼𑀡𑁄 𑀢𑀺 𑀓𑁄 𑀲𑁄,

𑀅𑀘𑀺𑀦𑁆𑀢𑀬𑀸𑀤𑀺𑀢𑁆𑀢𑀫𑀼𑀧𑀸𑀕𑀢𑁄 𑀬𑁄;

𑀅𑀦𑀜𑁆𑀜𑀲𑀸𑀥𑀸𑀭𑀡𑀪𑀽𑀢𑀫𑀢𑁆𑀣𑀁,

𑀅𑀓𑀸𑀲𑀺 𑀓𑀺𑀁 𑀲𑁄 𑀓𑀺𑀫𑀯𑁄𑀘 𑀩𑀼𑀤𑁆𑀥𑁄.

𑁫. 𑀯𑀺𑀲𑀼𑀤𑁆𑀥𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄𑀢𑀺 𑀦𑀺𑀬𑀫𑁄 𑀓𑀢𑁄,

𑀔𑀦𑁆𑀥𑀲𑀦𑁆𑀢𑀸𑀦𑀲𑀼𑀤𑁆𑀥𑀻 𑀢𑀼 𑀕𑀼𑀡𑁄𑀢𑀺 𑀦𑀺𑀬𑀫𑁄 𑀓𑀢𑁄.

𑁬. 𑀅𑀓𑀸𑀲𑀺 𑀓𑀺𑀘𑁆𑀘𑀸𑀦𑀺 𑀤𑀺𑀦𑁂𑀲𑀼 𑀧𑀜𑁆𑀘,

𑀧𑀲𑀸𑀤𑀬𑀜𑁆𑀘𑀺𑀤𑁆𑀥𑀺𑀩𑀮𑁂𑀦 𑀲𑁂𑀦;

𑀚𑀦𑀸𑀦𑀲𑁂𑀲𑀁 𑀘𑀭𑀺𑀬𑀸𑀦𑀼𑀓𑀽𑀮𑀁,

𑀜𑀢𑁆𑀯𑀸𑀦𑀯𑁄𑀘𑀸𑀦𑀼𑀲𑀬𑀧𑁆𑀧𑀳𑀸𑀦𑀁.

𑀅𑀦𑀜𑁆𑀜𑀲𑀸𑀥𑀸𑀭𑀡𑀤𑀻𑀧𑀦𑀻𑀕𑀸𑀣𑀸

𑁭. 𑀅𑀩𑁆𑀪𑀼𑀕𑁆𑀕𑀢𑀸 𑀬𑀲𑁆𑀲 𑀕𑀼𑀡𑀸 𑀅𑀦𑀦𑁆𑀢𑀸,

𑀢𑀺𑀩𑀼𑀤𑁆𑀥𑀔𑁂𑀢𑁆𑀢𑁂𑀓𑀤𑀺𑀯𑀸𑀓𑀭𑁄𑀢𑀺;

𑀚𑀸𑀦𑀸𑀢𑀺 𑀲𑁄 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘,

𑀲𑀘𑁂𑀢𑀦𑀜𑁆𑀘𑁂𑀯 𑀅𑀘𑁂𑀢𑀦𑀜𑁆𑀘;

𑀲𑀓𑀲𑁆𑀲 𑀲𑀦𑁆𑀢𑀸𑀦𑀕𑀢𑀁 𑀧𑀭𑁂𑀲𑀁,

𑀩𑁆𑀬𑀢𑀻𑀢𑀫𑀧𑁆𑀧𑀢𑁆𑀢𑀓𑀫𑀢𑁆𑀭𑀪𑀽𑀢𑀁.

𑁮. 𑀅𑀦𑀦𑁆𑀢𑀲𑀢𑁆𑀢𑁂𑀲𑀼 𑀘 𑀮𑁄𑀓𑀥𑀸𑀢𑀼𑀲𑀼,

𑀏𑀓𑁄𑀯 𑀲𑀩𑁆𑀩𑁂𑀧𑀺 𑀲𑀫𑀸 𑀦 𑀢𑁂𑀦;

𑀤𑀺𑀲𑀸𑀲𑀼 𑀧𑀼𑀩𑁆𑀩𑀸𑀤𑀺𑀲𑀼 𑀘𑀓𑁆𑀓𑀯𑀸𑀴𑀸,

𑀲𑀳𑀲𑁆𑀲𑀲𑀗𑁆𑀔𑀸𑀬𑀧𑀺 𑀅𑀧𑁆𑀧𑀫𑁂𑀬𑁆𑀬𑀸;

𑀬𑁂 𑀢𑁂𑀲𑀼 𑀤𑁂𑀯𑀸 𑀫𑀦𑀼𑀚𑀸 𑀘 𑀩𑁆𑀭𑀳𑁆𑀫𑀸,

𑀏𑀓𑀢𑁆𑀣 𑀲𑀗𑁆𑀕𑀫𑁆𑀫 𑀳𑀺 𑀫𑀦𑁆𑀢𑀬𑀦𑁆𑀢𑀸.

𑁯. 𑀅𑀦𑀸𑀤𑀺𑀓𑀸𑀮𑀸𑀕𑀢𑀦𑀸𑀫𑀭𑀽𑀧𑀺𑀦𑀁,

𑀬𑀣𑀸𑀲𑀓𑀁 𑀳𑁂𑀢𑀼𑀨𑀮𑀢𑁆𑀢𑀯𑀼𑀢𑁆𑀢𑀺𑀦𑀁;

𑀢𑀩𑁆𑀪𑀸𑀯𑀪𑀸𑀯𑀺𑀢𑁆𑀢𑀫𑀲𑀫𑁆𑀪𑀼𑀡𑀦𑁆𑀢𑀸,

𑀦𑀸𑀦𑀸𑀯𑀺𑀧𑀮𑁆𑀮𑀸𑀲𑀫𑀦𑀼𑀧𑀯𑀺𑀝𑁆𑀞𑀸.

𑁧𑁦. 𑀓𑀫𑁆𑀫𑀧𑁆𑀧𑀯𑀢𑁆𑀢𑀺𑀜𑁆𑀘 𑀨𑀮𑀧𑁆𑀧𑀯𑀢𑁆𑀢𑀺𑀁,

𑀏𑀓𑀢𑁆𑀢𑀦𑀸𑀦𑀢𑁆𑀢𑀦𑀺𑀭𑀻𑀳𑀥𑀫𑁆𑀫𑀢𑀁;

𑀯𑀺𑀜𑁆𑀜𑀢𑁆𑀢𑀺𑀲𑀦𑁆𑀢𑀸𑀦𑀖𑀦𑁂𑀦 𑀙𑀦𑁆𑀦𑀢𑁄,

𑀲𑀺𑀯𑀜𑁆𑀚𑀲𑀁 𑀦𑁄 𑀪𑀡𑀺𑀢𑀼𑀁 𑀲𑀫𑀢𑁆𑀣𑀸.

𑁧𑁧. 𑀏𑀓𑁄 𑀯 𑀲𑁄 𑀲𑀦𑁆𑀢𑀺𑀓𑀭𑁄 𑀧𑀪𑀗𑁆𑀓𑀭𑁄,

𑀲𑀗𑁆𑀔𑀸𑀬 𑀜𑁂𑀬𑁆𑀬𑀸𑀦𑀺 𑀅𑀲𑁂𑀲𑀺𑀢𑀸𑀦𑀺;

𑀢𑁂𑀲𑀜𑁆𑀳𑀺 𑀫𑀚𑁆𑀛𑁂 𑀧𑀭𑀫𑀸𑀲𑀫𑁆𑀪𑀻𑀯𑀤𑀁,

𑀲𑀺𑀯𑀜𑁆𑀚𑀲𑀁 𑀤𑀻𑀧𑀬𑀺𑀢𑀼𑀁 𑀲𑀫𑀢𑁆𑀣𑁄.

𑁧𑁨. 𑀲𑁄 𑀕𑁄𑀢𑀫𑁄 𑀲𑀓𑁆𑀬𑀲𑀼𑀢𑁄 𑀫𑀼𑀦𑀺𑀦𑁆𑀤𑁄,

𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲 𑀧𑀤𑀻𑀧𑀪𑀽𑀢𑁄;

𑀅𑀦𑀦𑁆𑀢𑀲𑀢𑁆𑀢𑁂 𑀪𑀯𑀩𑀦𑁆𑀥𑀦𑀫𑁆𑀳𑀸,

𑀫𑁄𑀘𑁂𑀲𑀺 𑀓𑀸𑀭𑀼𑀜𑁆𑀜𑀨𑀮𑀸𑀦𑀼𑀧𑁂𑀓𑁆𑀔𑀻.

𑀅𑀪𑀺𑀦𑀻𑀳𑀸𑀭𑀤𑀻𑀧𑀦𑀻𑀕𑀸𑀣𑀸

𑁧𑁩. 𑀯𑀤𑁂𑀣 𑀢𑀲𑁆𑀲𑀻𑀥 𑀅𑀦𑀧𑁆𑀧𑀓𑀁 𑀕𑀼𑀡𑀁,

𑀦 𑀢𑁂𑀦 𑀢𑀼𑀮𑁆𑀬𑁄 𑀧𑀭𑀫𑁄 𑀘 𑀯𑀺𑀚𑁆𑀚𑀢𑀺;

𑀓𑀺𑀁 𑀢𑀁 𑀕𑀼𑀡𑀁 𑀢𑀁 𑀲𑀤𑀺𑀲𑁂𑀦 𑀤𑀺𑀦𑁆𑀦𑀁,

𑀲𑀬𑀁𑀓𑀢𑀁 𑀓𑀺𑀦𑁆𑀦𑀼 𑀅𑀥𑀺𑀘𑁆𑀘𑀮𑀤𑁆𑀥𑀁.

𑁧𑁪. 𑀦𑀸𑀥𑀺𑀘𑁆𑀘𑀮𑀤𑁆𑀥𑀁 𑀦 𑀘 𑀧𑀼𑀩𑁆𑀩𑀩𑀼𑀤𑁆𑀥𑀸,

𑀩𑁆𑀭𑀳𑁆𑀫𑀸𑀤𑀺𑀦𑀁 𑀲𑀫𑁆𑀫𑀼𑀢𑀺𑀬𑀸 𑀩𑀳𑀽𑀦𑀁;

𑀲𑀬𑀁𑀓𑀢𑁂𑀦𑁂𑀯 𑀅𑀦𑁄𑀧𑀫𑁂𑀦,

𑀤𑀸𑀦𑀸𑀤𑀺𑀦𑀸 𑀮𑀤𑁆𑀥𑀫𑀺𑀤𑀁 𑀯𑀺𑀧𑀸𑀓𑀁.

𑁧𑁫. 𑀇𑀢𑁄 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑀺𑀬𑀸𑀦𑀁,

𑀲𑀢𑀁𑀲𑀳𑀲𑁆𑀲𑀸𑀦𑀥𑀺𑀓𑀸𑀦𑀫𑀢𑁆𑀣𑀓𑁂;

𑀓𑀧𑁆𑀧𑁂 𑀅𑀢𑀻𑀢𑀫𑁆𑀳𑀺 𑀲𑀼𑀫𑁂𑀥𑀢𑀸𑀧𑀲𑁄,

𑀯𑁂𑀳𑀸𑀬𑀲𑀁 𑀕𑀘𑁆𑀙𑀢𑀺 𑀇𑀤𑁆𑀥𑀺𑀬𑀸 𑀢𑀤𑀸.

𑁧𑁬. 𑀤𑀺𑀧𑀗𑁆𑀓𑀭𑁄 𑀦𑀸𑀫 𑀚𑀺𑀦𑁄 𑀲𑀲𑀗𑁆𑀖𑁄,

𑀭𑀫𑁆𑀫𑀁 𑀧𑀼𑀭𑀁 𑀬𑀸𑀢𑀺 𑀯𑀺𑀭𑁄𑀘𑀫𑀸𑀦𑁄;

𑀫𑀦𑀼𑀲𑁆𑀲𑀤𑁂𑀯𑁂𑀳𑀺𑀪𑀺𑀧𑀽𑀚𑀺𑀬𑀦𑁆𑀢𑁄,

𑀲𑀳𑀲𑁆𑀲𑀭𑀁𑀲𑀺 𑀯𑀺𑀬 𑀪𑀸𑀡𑀼𑀫𑀸 𑀦𑀪𑁂.

𑁧𑁭. 𑀢𑀲𑁆𑀲𑀜𑁆𑀚𑀲𑀁 𑀓𑀸𑀢𑀼𑀩𑀳𑀼𑀲𑁆𑀲𑀳𑀸𑀦𑀁,

𑀩𑀼𑀤𑁆𑀥𑁄𑀢𑀺 𑀲𑀼𑀢𑁆𑀯𑀸 𑀲𑀼𑀫𑀦𑁄 𑀧𑀢𑀻𑀢𑁄;

𑀫𑀫𑀚𑁆𑀚 𑀤𑁂𑀳𑀁 𑀧𑀦𑀺𑀫𑀲𑁆𑀲 𑀤𑀢𑁆𑀯𑀸,

𑀩𑀼𑀤𑁆𑀥𑁄 𑀅𑀳𑀁 𑀳𑁂𑀲𑁆𑀲𑀫𑀦𑀸𑀕𑀢𑁂𑀤𑀺𑀲𑁄.

𑁧𑁮. 𑀢𑀲𑁆𑀫𑀺𑀜𑁆𑀚𑀲𑁂 𑀓𑀦𑁆𑀤𑀭𑀢𑀫𑁆𑀳𑀺 𑀧𑀗𑁆𑀓𑁂,

𑀓𑀢𑁆𑀯𑀸𑀦 𑀲𑁂𑀢𑀼𑀁 𑀲𑀬𑀺 𑀲𑁄 𑀲𑀤𑁂𑀳𑀁;

𑀩𑀼𑀤𑁆𑀥𑁄 𑀅𑀬𑀁 𑀕𑀘𑁆𑀙𑀢𑀼 𑀧𑀺𑀝𑁆𑀞𑀺𑀬𑀸 𑀫𑀫𑀁,

𑀩𑁄𑀥𑀺𑀲𑁆𑀲𑀘𑁂 𑀳𑁂𑀲𑁆𑀲𑀢𑀺 𑀫𑁂 𑀅𑀦𑀸𑀕𑀢𑁂.

𑁧𑁯. 𑀉𑀲𑁆𑀲𑀻𑀲𑀓𑀁 𑀬𑀸𑀢𑀺 𑀚𑀺𑀦𑁄 𑀳𑀺 𑀢𑀲𑁆𑀲,

𑀅𑀚𑁆𑀛𑀸𑀲𑀬𑁄 𑀲𑀺𑀚𑁆𑀛𑀢𑀺𑀫𑀲𑁆𑀲𑀦𑀸𑀕𑀢𑁂;

𑀜𑀢𑁆𑀯𑀸𑀦 𑀩𑁆𑀬𑀸𑀓𑀸𑀲𑀺 𑀅𑀲𑁂𑀲𑀢𑁄 𑀳𑀺,

𑀩𑀼𑀤𑁆𑀥𑁄 𑀅𑀬𑀁 𑀳𑁂𑀲𑁆𑀲𑀢𑀺𑀦𑀸𑀕𑀢𑁂𑀲𑀼.

𑁨𑁦. 𑀲𑀼𑀢𑁆𑀯𑀸𑀦 𑀧𑀢𑁆𑀢𑁄 𑀯 𑀫𑀳𑀸𑀪𑀺𑀲𑁂𑀓𑀁,

𑀮𑀤𑁆𑀥𑀁 𑀯 𑀩𑁄𑀥𑀺𑀁 𑀲𑀫𑀦𑀼𑀲𑁆𑀲𑀭𑀦𑁆𑀢𑁄;

𑀧𑀽𑀚𑁂𑀢𑁆𑀯𑀸 𑀬𑀸𑀢𑁂 𑀫𑀼𑀦𑀺𑀤𑁂𑀯𑀫𑀸𑀦𑀼𑀲𑁂,

𑀉𑀝𑁆𑀞𑀸𑀬 𑀲𑁄 𑀲𑀫𑁆𑀫𑀲𑀺 𑀧𑀸𑀭𑀫𑀻 𑀤𑀲.

𑁨𑁧. 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀲𑀫𑀢𑀺𑀁𑀲𑀧𑀸𑀭𑀫𑀻,

𑀲𑀺𑀓𑁆𑀔𑀢𑁆𑀢𑀬𑀜𑁆𑀘𑀲𑁆𑀲 𑀚𑀺𑀦𑀲𑁆𑀲 𑀲𑀦𑁆𑀢𑀺𑀓𑁂;

𑀓𑀸𑀢𑀼𑀁 𑀲𑀫𑀢𑁆𑀣𑁄 𑀧𑀺 𑀪𑀯𑀲𑁆𑀲 𑀧𑀸𑀭𑀁,

𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀩𑀮𑀸 𑀪𑀯𑀁 𑀕𑀢𑁄.

𑁨𑁨. 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀓𑁂 𑀲𑁄 𑀚𑀺𑀦𑀯𑀭𑀫𑀢𑀼𑀮𑁂 𑀧𑀽𑀚𑀬𑀺𑀢𑁆𑀯𑀸 𑀅𑀲𑁂𑀲𑀁 𑀩𑀼𑀤𑁆𑀥𑁄 𑀏𑀲𑁄 𑀳𑀺 𑀑𑀲𑁄 𑀪𑀯𑀢𑀺 𑀦𑀺𑀬𑀫𑀢𑁄 𑀩𑁆𑀬𑀸𑀓𑀢𑁄 𑀢𑁂𑀳𑀺 𑀢𑁂𑀳𑀺 𑀢𑁂𑀲𑀁 𑀢𑁂𑀲𑀁 𑀚𑀺𑀦𑀸𑀦𑀁 𑀅𑀘𑀦𑀫𑀦𑀼𑀧𑀫𑀁 𑀧𑀽𑀚𑀬𑀺𑀢𑁆𑀯𑀸 𑀲𑀺𑀭𑁂𑀦,

𑀢𑀁 𑀢𑀁 𑀤𑀼𑀓𑁆𑀔𑀁 𑀲𑀳𑀺𑀢𑁆𑀯𑀸 𑀲𑀓𑀮𑀕𑀼𑀡𑀤𑀤𑀁 𑀧𑀸𑀭𑀫𑀻 𑀧𑀽𑀭𑀬𑀺𑀢𑁆𑀣.

𑀩𑁄𑀥𑀺𑀲𑀫𑁆𑀪𑀸𑀭𑀤𑀻𑀧𑀦𑀻𑀕𑀸𑀣𑀸

𑁨𑁩. 𑀲𑁄 𑀤𑀼𑀓𑁆𑀔𑀔𑀺𑀦𑁆𑀦𑀚𑀦𑀤𑀲𑁆𑀲𑀦𑀤𑀼𑀓𑁆𑀔𑀔𑀺𑀦𑁆𑀦𑁄,

𑀓𑀸𑀭𑀼𑀜𑁆𑀜𑀫𑁂𑀯 𑀚𑀦𑀢𑀸𑀬 𑀅𑀓𑀸𑀲𑀺 𑀦𑀺𑀘𑁆𑀘𑀁;

𑀢𑁂𑀲𑀁 𑀳𑀺 𑀫𑁄𑀘𑀦𑀫𑀼𑀧𑀸𑀬𑀫𑀺𑀤𑀦𑁆𑀢𑀺 𑀜𑀢𑁆𑀯𑀸,

𑀢𑀸𑀤𑀻𑀧𑀭𑀸𑀥𑀫𑀧𑀺 𑀅𑀢𑁆𑀢𑀦𑀺 𑀭𑁄𑀧𑀬𑀻 𑀲𑁄.

𑁨𑁪. 𑀤𑀸𑀦𑀸𑀤𑀺𑀦𑁂𑀓𑀯𑀭𑀧𑀸𑀭𑀫𑀺𑀲𑀸𑀕𑀭𑁂𑀲𑀼,

𑀑𑀕𑀸𑀴𑁆𑀳𑀢𑀸𑀬𑀧𑀺 𑀧𑀤𑀼𑀝𑁆𑀞𑀚𑀦𑁂𑀦 𑀤𑀺𑀦𑁆𑀦𑀁;

𑀤𑀼𑀓𑁆𑀔𑀁 𑀢𑀣𑀸 𑀅𑀢𑀺𑀫𑀳𑀦𑁆𑀢𑀢𑀭𑀫𑁆𑀧𑀺 𑀓𑀺𑀜𑁆𑀘𑀺,

𑀦𑀸𑀜𑁆𑀜𑀸𑀲𑀺 𑀲𑀢𑁆𑀢𑀳𑀺𑀢𑀫𑁂𑀯𑁂𑀅 𑀕𑀯𑁂𑀲𑀬𑀦𑁆𑀢𑁄.

𑁨𑁫. 𑀙𑁂𑀢𑁆𑀯𑀸𑀦 𑀲𑀻𑀲𑀁 𑀳𑀺 𑀲𑀓𑀁 𑀤𑀤𑀦𑁆𑀢𑁄,

𑀫𑀁𑀲𑀁 𑀧𑀘𑀺𑀢𑁆𑀯𑀸𑀦 𑀲𑀓𑀁 𑀤𑀤𑀦𑁆𑀢𑁄;

𑀲𑁄 𑀘𑀢𑁆𑀢𑀕𑀢𑁆𑀢𑁄 𑀧𑀡𑀺𑀥𑀸𑀦𑀓𑀸𑀮𑁂,

𑀤𑀼𑀝𑁆𑀞𑀲𑁆𑀲 𑀓𑀺𑀁 𑀤𑀼𑀲𑁆𑀲𑀢𑀺 𑀙𑁂𑀤𑀦𑁂𑀦.

𑁨𑁬. 𑀏𑀯𑀁 𑀅𑀦𑀦𑁆𑀢𑀫𑀧𑀺 𑀚𑀸𑀢𑀺𑀲𑀢𑁂𑀲𑀼 𑀤𑀼𑀓𑁆𑀔𑀁,

𑀧𑀢𑁆𑀯𑀸𑀦 𑀲𑀢𑁆𑀢𑀳𑀺𑀢𑀫𑁂𑀯 𑀕𑀯𑁂𑀲𑀬𑀦𑁆𑀢𑁄;

𑀤𑀻𑀧𑀗𑁆𑀓𑀭𑁂 𑀕𑀳𑀺𑀢𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀁,

𑀧𑀸𑀮𑁂𑀲𑀺 𑀬𑀸𑀯 𑀲𑀓𑀩𑁄𑀥𑀺𑀢𑀮𑁂 𑀲𑀼𑀦𑀺𑀝𑁆𑀞𑁄.

𑁨𑁭. 𑀬𑀤𑀸𑀪𑀺𑀦𑀻𑀳𑀸𑀭𑀫𑀓𑀸 𑀲𑀼𑀫𑁂𑀥𑁄,

𑀬𑀤𑀸 𑀘 𑀫𑀤𑁆𑀤𑀺𑀁 𑀅𑀤𑀤𑀸 𑀲𑀺𑀯𑀺𑀦𑁆𑀤𑁄;

𑀏𑀢𑁆𑀣𑀦𑁆𑀢𑀭𑁂 𑀚𑀸𑀢𑀺𑀲𑀼 𑀓𑀺𑀜𑁆𑀘𑀺𑀧𑁂𑀓𑀁,

𑀦𑀺𑀭𑀢𑁆𑀣𑀓𑀁 𑀦𑁄 𑀅𑀕𑀫𑀸𑀲𑀺 𑀢𑀲𑁆𑀲.

𑁨𑁮. 𑀫𑀳𑀸𑀲𑀫𑀼𑀤𑁆𑀤𑁂 𑀚𑀮𑀩𑀺𑀦𑁆𑀤𑀼𑀢𑁄𑀧𑀺,

𑀢𑀤𑀦𑁆𑀢𑁆𑀭𑁂 𑀚𑀸𑀢𑀺 𑀅𑀦𑀧𑁆𑀧𑀓𑀸 𑀯;

𑀦𑀺𑀭𑀦𑁆𑀢𑀭𑀁 𑀧𑀽𑀭𑀺𑀢𑀧𑀸𑀭𑀫𑀻𑀦𑀁,

𑀓𑀣𑀁 𑀧𑀫𑀸𑀡𑀁 𑀉𑀧𑀫𑀸 𑀓𑀼𑀳𑀺𑀁 𑀯𑀸.

𑁨𑁯. 𑀬𑁄 𑀫𑀕𑁆𑀕𑀧𑀲𑁆𑀲𑁂 𑀫𑀥𑀼𑀭𑀫𑁆𑀩𑀩𑀻𑀚𑀁,

𑀙𑀸𑀬𑀸𑀨𑀮𑀢𑁆𑀣𑀸𑀬 𑀫𑀳𑀸𑀚𑀦𑀸𑀦𑀁;

𑀭𑁄𑀧𑁂𑀲𑀺 𑀢𑀲𑁆𑀫𑀺𑀁 𑀳𑀺 𑀔𑀡𑁂𑀯 𑀢𑁂𑀦,

𑀙𑀸𑀬𑀸𑀨𑀮𑁂 𑀧𑀼𑀜𑁆𑀜𑀫𑀮𑀤𑁆𑀥𑀫𑀼𑀤𑁆𑀥𑀁.

𑁩𑁦. 𑀢𑀣𑁂𑀯 𑀲𑀁𑀲𑀸𑀭𑀧𑀣𑁂 𑀚𑀦𑀸𑀦𑀁,

𑀳𑀺𑀢𑀸𑀬 𑀅𑀢𑁆𑀢𑀦𑀫𑀪𑀺𑀭𑁄𑀧𑀺𑀢𑀓𑁆𑀔𑀡𑁂;

𑀲𑀺𑀤𑁆𑀥𑀁 𑀯 𑀧𑀼𑀜𑁆𑀜𑀽𑀧𑀭𑀺 𑀢𑀲𑁆𑀲 𑀢𑀲𑁆𑀫𑀺𑀁,

𑀥𑀦𑀗𑁆𑀕𑀚𑀻𑀯𑀁 𑀧𑀺 𑀳𑀭𑀦𑁆𑀢𑀺 𑀬𑁂 𑀬𑁂.

𑁩𑁧. 𑀲𑁄 𑀲𑀸𑀕𑀭𑁂 𑀚𑀮𑀥𑀺𑀓𑀁 𑀭𑀼𑀳𑀺𑀭𑀁 𑀅𑀤𑀸𑀲𑀺,

𑀪𑀽𑀫𑀸𑀧𑀭𑀸𑀚𑀺𑀬 𑀲𑀫𑀁𑀲𑀫𑀤𑀸𑀲𑀺 𑀤𑀸𑀦𑀁;

𑀫𑁂𑀭𑀼𑀧𑁆𑀧𑀫𑀸𑀡𑀫𑀥𑀺𑀓𑀜𑁆𑀘 𑀲𑀫𑁄𑀴𑀺𑀲𑀻𑀲𑀁,

𑀔𑁂 𑀢𑀸𑀭𑀓𑀸𑀥𑀺𑀓𑀢𑀭𑀁 𑀦𑀬𑀦𑀁 𑀅𑀤𑀸𑀲𑀺.

𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀤𑀻𑀧𑀦𑀻𑀕𑀸𑀣𑀸

𑁩𑁨. 𑀕𑀫𑁆𑀪𑀻𑀭𑀧𑀸𑀦𑀤𑀸𑀦𑀸𑀤𑀺𑀲𑀸𑀕𑀭𑁂𑀲𑀼 𑀳𑀺 𑀣𑀸𑀫𑀲𑀸;

𑀢𑀭𑀦𑁆𑀢𑁄 𑀫𑀤𑁆𑀤𑀺𑀤𑀸𑀦𑁂𑀦 𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀦 𑀧𑀸𑀭𑀫𑀻.

𑁩𑁩. 𑀯𑀲𑀦𑁆𑀢𑁄 𑀢𑀼𑀲𑀻𑀢𑁂 𑀓𑀸𑀬𑁂 𑀩𑁄𑀥𑀺𑀧𑀭𑀺𑀧𑀸𑀓𑀫𑀸𑀕𑀫𑁆𑀫;

𑀆𑀬𑀸𑀘𑀦𑀸𑀬 𑀘 𑀤𑁂𑀯𑀸𑀦𑀁 𑀫𑀸𑀢𑀼𑀕𑀩𑁆𑀪𑀫𑀼𑀧𑀸𑀕𑀫𑀺.

𑁩𑁪. 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀘 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀑𑀓𑁆𑀓𑀫𑀺;

𑀢𑀲𑁆𑀲 𑀑𑀓𑁆𑀓𑀦𑁆𑀢𑀺𑀬𑀁 𑀲𑀩𑁆𑀩𑀸 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀺𑀢𑁆𑀣.

𑁩𑁫. 𑀢𑀢𑁄 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑁆𑀯𑀢𑁆𑀢𑀺𑀁𑀲𑀸𑀦𑀺 𑀢𑀤𑀸 𑀲𑀺𑀬𑀼𑀁;

𑀢𑀼𑀝𑁆𑀞𑀳𑀝𑁆𑀞𑀸 𑀯 𑀲𑀸 𑀫𑀸𑀢𑀸 𑀧𑀼𑀢𑁆𑀢𑀁 𑀧𑀲𑁆𑀲𑀢𑀺 𑀓𑀼𑀘𑁆𑀙𑀺𑀬𑀁.

𑀯𑀺𑀚𑀸𑀬𑀦𑀫𑀗𑁆𑀕𑀮𑀤𑀻𑀧𑀦𑀻𑀕𑀸𑀣𑀸

𑁩𑁬. 𑀲𑀸 𑀧𑀼𑀡𑁆𑀡𑀕𑀩𑁆𑀪𑀸 𑀤𑀲𑀫𑀸𑀲𑀢𑁄 𑀧𑀭𑀁,

𑀕𑀦𑁆𑀢𑁆𑀯𑀸𑀦 𑀨𑀼𑀮𑁆𑀮𑀁 𑀯𑀭𑀮𑀼𑀫𑁆𑀩𑀺𑀦𑀻𑀯𑀦𑀁;

𑀞𑀺𑀢𑀸 𑀕𑀳𑁂𑀢𑁆𑀯𑀸 𑀯𑀭𑀲𑀸𑀮𑀲𑀸𑀔𑀁,

𑀯𑀺𑀚𑀸𑀬𑀺 𑀢𑀁 𑀧𑀼𑀢𑁆𑀢𑀯𑀭𑀁 𑀲𑀼𑀔𑁂𑀦.

𑁩𑁭. 𑀢𑀤𑀸 𑀲𑀳𑀲𑁆𑀲𑀻𑀤𑀲𑀮𑁄𑀓𑀥𑀸𑀢𑀼𑀲𑀼,

𑀤𑁂𑀯𑀸 𑀘 𑀦𑀸𑀕𑀸 𑀅𑀲𑀼𑀭𑀸 𑀘 𑀬𑀓𑁆𑀔𑀸;

𑀦𑀸𑀦𑀸𑀤𑀺𑀲𑀸 𑀫𑀗𑁆𑀕𑀮𑀘𑀓𑁆𑀓𑀯𑀸𑀴𑀁,

𑀲𑀼𑀫𑀗𑁆𑀕𑀮𑀁 𑀫𑀗𑁆𑀕𑀮𑀫𑀸𑀕𑀫𑀺𑀁𑀲𑀼.

𑁩𑁮. 𑀅𑀦𑁂𑀓𑀲𑀸𑀔𑀜𑁆𑀘 𑀲𑀳𑀲𑁆𑀲𑀫𑀡𑁆𑀟𑀮𑀁,

𑀙𑀢𑁆𑀢𑀁 𑀫𑀭𑀽 𑀥𑀸𑀭𑀬𑀼𑀫𑀦𑁆𑀢𑀮𑀺𑀓𑁆𑀔𑁂;

𑀲𑀼𑀯𑀡𑁆𑀡𑀤𑀡𑁆𑀟𑀸 𑀯𑀺𑀧𑀢𑀦𑁆𑀢𑀺 𑀘𑀸𑀫𑀭𑀸,

𑀔𑀚𑁆𑀚𑀺𑀁𑀲𑀼 𑀪𑁂𑀭𑀻 𑀘 𑀦𑀤𑀺𑀁𑀲𑀼 𑀲𑀗𑁆𑀔𑀸.