𑁪. |𑀑𑁦.𑁦𑁦𑁩𑁩| 𑀧𑀓𑀺𑀡𑁆𑀡𑀓𑀓𑀣𑀸

𑀢𑀢𑁆𑀭 𑀞𑀢𑁆𑀯𑀸 𑀭𑀜𑁂𑀜𑁄 𑀉𑀧𑁆𑀧𑀢𑁆𑀢𑀺 𑀓𑀣𑁂𑀢𑀩𑁆𑀩𑀸. (𑀲𑁄 𑀧𑀦) 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼𑀦𑁄 𑀩𑁄𑀥𑀺𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀫𑀳𑀸𑀫𑀮𑀬 𑀭𑀝𑁆𑀞𑁂 𑀯𑀦𑀘𑀭𑀓𑀁 𑀧𑀝𑀺𑀘𑁆𑀘 𑀢𑀲𑁆𑀲 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀦𑀯𑀟𑁆𑀠𑀫𑀸𑀲𑀸𑀯𑀲𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀫𑁂𑀦 𑀯𑀟𑁆𑀠𑀦𑁆𑀢𑁄 𑀯𑀺𑀜𑁆𑀜𑀼𑀪𑀸𑀯𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀧𑀺𑀢𑀸 𑀏𑀓𑀁 𑀤𑀸𑀭𑀺𑀓𑀁 𑀆𑀦𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀕𑁂𑀳𑁂 𑀅𑀓𑀸𑀲𑀺. 𑀅𑀧𑀭𑀪𑀸𑀕𑁂 𑀢𑀲𑁆𑀲 𑀧𑀺𑀢𑀸 𑀓𑀸𑀮𑀫𑀓𑀸𑀲𑀺. 𑀓𑀼𑀫𑀸𑀭𑁄’𑀘𑀭𑀓𑁄’𑀢𑀺 𑀧𑀜𑁆𑀜𑀸𑀬𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀉𑀧𑀝𑁆𑀞𑀳𑀺. 𑀘𑀭𑀓𑁄 𑀅𑀢𑁆𑀢𑀦𑁄 𑀦𑀺𑀯𑀸𑀲𑀯𑀢𑁆𑀣𑀼𑀲𑁆𑀫𑀺𑀁 𑀓𑀤𑀮𑀺𑀧𑀦𑀲𑀸𑀤𑀻𑀦𑀺 𑀭𑁄𑀧𑁂𑀢𑁆𑀯𑀸 𑀨𑀮𑀸𑀭𑀸𑀫𑀁 𑀅𑀓𑀸𑀲𑀺. 𑀢𑀢𑁄 𑀅𑀧𑀭𑀪𑀸𑀕𑁂 𑀢𑁂𑀦 𑀭𑁄𑀧𑀺𑀢𑀧𑀦𑀲𑀭𑀼𑀓𑁆𑀔𑁄 𑀫𑀳𑀦𑁆𑀢𑀁 𑀘𑀸𑀝𑀺𑀧𑁆𑀧𑀫𑀸𑀡𑀁 𑀧𑀦𑀲𑀨𑀮𑀁 𑀕𑀡𑁆𑀳𑀺. 𑀘𑀭𑀓𑁄 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀲𑀸𑀔𑀸𑀬 𑀲𑀼𑀧𑀓𑁆𑀓𑀁 𑀧𑀦𑀲𑀨𑀮𑀁 𑀧𑀲𑁆𑀲𑀺𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀆𑀳𑀭𑀺𑀢𑁆𑀯𑀸 𑀅𑀧𑀲𑁆𑀲𑀸𑀬𑀁 𑀮𑀼𑀜𑁆𑀘𑀺𑀢𑁆𑀯𑀸 𑀉𑀧𑀥𑀸𑀭𑁂𑀲𑀺. 𑀢𑀢𑁄 𑀲𑀫𑀦𑁆𑀢𑀸 𑀘𑀢𑀼𑀫𑀥𑀼𑀭𑀁 𑀯𑀺𑀬 𑀬𑀽𑀲𑀁 𑀑𑀢𑀭𑀺𑀢𑁆𑀯𑀸 𑀅𑀧𑀲𑁆𑀲𑀬𑀁 𑀅𑀧𑀦𑀻𑀢 𑀆𑀯𑀸𑀝𑀁 𑀧𑀽𑀭𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀢𑁄 𑀘𑀭𑀓𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀇𑀫𑀁 𑀧𑀦𑀲𑀨𑀮𑀁 𑀅𑀫𑁆𑀳𑀸𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀯𑀺𑀦𑀸 𑀅𑀜𑁆𑀜𑁂𑀲𑀁 𑀦𑀸𑀦𑀼𑀘𑁆𑀙𑀯𑀺𑀓𑀦𑁆𑀢𑀺. 𑀧𑀝𑀺𑀲𑀸𑀫𑁂𑀢𑁆𑀯𑀸 𑀞𑀧𑁂𑀲𑀺.

𑀧𑀼𑀦𑀤𑀺𑀯𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀮𑁂𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀲𑀼𑀭𑀢𑁆𑀢𑀧𑀮𑁆𑀮𑀯𑀲𑀤𑀺𑀲𑀁 𑀅𑀦𑁆𑀢𑀭𑀯𑀸𑀲𑀓𑀁 𑀧𑀭𑀺𑀫𑀡𑁆𑀟𑀮𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀩𑀳𑀮𑀧𑀯𑀭𑀫𑀳𑀸𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀻𑀮𑀪𑀫𑀭𑀯𑀡𑁆𑀡𑀁 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀓𑀼𑀝𑀺𑀤𑁆𑀯𑀸𑀭𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀘𑀭𑀓𑁄 𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀞𑀧𑀺𑀢𑀝𑁆𑀞𑀸𑀦𑀢𑁄 𑀧𑀦𑀲𑀨𑀮𑀁 𑀕𑀳𑁂𑀢𑁆𑀯𑀸 𑀬𑀽𑀲𑀁 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑀸𑀧𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 |𑀑𑁦.𑁦𑁦𑁩𑁪| 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀆𑀓𑀸𑀲𑀢𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀅𑀣𑁂𑀓𑀤𑀺𑀯𑀲𑀁 𑀘𑀭𑀓𑁄 𑀧𑀭𑀤𑁂𑀲𑀸 𑀕𑀘𑁆𑀙𑀦𑁆𑀢𑁄 𑀪𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸;’ 𑀅𑀫𑁆𑀫, 𑀅𑀬𑁆𑀬𑀲𑁆𑀲 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀤𑀸𑀦𑀁 𑀤𑁂𑀳𑀻’𑀢𑀺 𑀲𑀩𑁆𑀩𑀽𑀧𑀓𑀭𑀡𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀭𑀤𑁂𑀲𑀁 𑀕𑀢𑁄. 𑀧𑀼𑀦𑀤𑀺𑀯𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀮𑁂𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀫𑀸𑀤𑀸𑀬 𑀆𑀓𑀸𑀲𑀢𑁄 𑀆𑀕𑀦𑁆𑀢𑁆𑀯𑀸 𑀓𑀼𑀝𑀺𑀤𑁆𑀯𑀸𑀭𑁂 𑀑𑀢𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀘𑀭𑀓𑀲𑁆𑀲 𑀪𑀭𑀺𑀬𑀸 𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀢𑁆𑀢𑀁 𑀅𑀤𑀸𑀲𑀺.

𑀢𑁂𑀦 𑀪𑀢𑁆𑀢𑀓𑀺𑀘𑁆𑀘𑁂 𑀧𑀭𑀺𑀦𑀺𑀝𑁆𑀞𑀺𑀢𑁂 𑀲𑀸 𑀢𑀭𑀼𑀡𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀲𑁆𑀲𑀺𑀢𑁆𑀯𑀸 𑀓𑀺𑀮𑁂𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀓𑀣𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀚𑀺𑀕𑀼𑀘𑁆𑀙𑀫𑀸𑀦𑁄 𑀉𑀧𑁆𑀧𑀢𑀺𑀢𑁆𑀯𑀸 𑀆𑀓𑀸𑀲𑀢𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀕𑀢𑀓𑀸𑀮𑁂 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀪𑀡𑁆𑀟𑀦𑀓𑀸 𑀯𑀺𑀬 𑀦𑀺𑀢𑁆𑀣𑀼𑀦𑀫𑀸𑀦𑀸 𑀫𑀜𑁆𑀘𑁂 𑀦𑀺𑀧𑀚𑁆𑀚𑀺. 𑀘𑀭𑀓𑁄 𑀧𑀭𑀤𑁂𑀲𑀢𑁄 𑀆𑀕𑀦𑁆𑀢𑁆𑀯𑀸 𑀪𑀭𑀺𑀬𑀁 𑀦𑀺𑀧𑀚𑁆𑀚𑀫𑀸𑀦𑀁 𑀏𑀯𑀫𑀸𑀳?’𑀪𑀤𑁆𑀤𑁂, 𑀓𑀺𑀁 𑀅𑀬𑁆𑀬𑀲𑁆𑀲 𑀪𑀺𑀓𑁆𑀔𑀁 𑀅𑀤𑀸𑀲𑀻’𑀢𑀺. 𑀲𑀸 𑀦𑀺𑀢𑁆𑀣𑀼𑀦𑀫𑀸𑀦𑀸 𑀆𑀳? 𑀫𑀸 𑀧𑀼𑀘𑁆𑀙 𑀢𑀯 𑀅𑀬𑁆𑀬𑀲𑁆𑀲 𑀓𑀫𑁆𑀫𑀦𑁆𑀢𑀺. 𑀓𑀣𑁂𑀳𑀺 𑀪𑀤𑁆𑀤𑁂, 𑀓𑀺𑀁 𑀢𑁂𑀦 𑀓𑀫𑁆𑀫𑀁 𑀓𑀢𑀦𑁆𑀢𑀺. 𑀲𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀓𑀺𑀮𑁂𑀲𑀯𑀲𑁆𑀦𑁂 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑀼𑀁 𑀯𑀸𑀬𑀫𑀺𑀢𑁆𑀯𑀸 𑀫𑀬𑀸 𑀅𑀬𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑁂 𑀫𑀫 𑀓𑁂𑀲𑁂 𑀕𑀳𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑁂𑀳𑀺 𑀆𑀓𑁄𑀝𑁂𑀢𑁆𑀯𑀸 𑀲𑀭𑀻𑀭𑀁 𑀦𑀔𑁂𑀦 𑀑𑀢𑁆𑀣𑀭𑀺𑀢𑁆𑀯𑀸 𑀲𑀻𑀲𑁂 𑀧𑀳𑀭𑀺𑀢𑁆𑀯𑀸 𑀕𑀢𑁄’𑀢𑀺 𑀯𑀼𑀢𑁆𑀢𑁂 𑀘𑀭𑀓𑁄 𑀢𑀁 𑀲𑀼𑀢𑁆𑀯𑀸 𑀅𑀲𑀳𑀦𑁆𑀢𑁄 (𑀏𑀲𑁄 𑀫𑀬𑀸) 𑀏𑀯𑀭𑀽𑀧𑀲𑁆𑀲 𑀅𑀲𑁆𑀲𑀫𑀡𑀓𑀫𑁆𑀫𑀲𑁆𑀲 𑀧𑁄𑀲𑀺𑀢𑁄’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀲𑁄𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀥𑀦𑀼𑀁 𑀆𑀤𑀸𑀬 𑀢𑀺𑀓𑁆𑀔𑀲𑀭𑀁 𑀕𑀳𑁂𑀢𑁆𑀯𑀸 𑀏𑀢𑀁 𑀫𑀸𑀭𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀸𑀲𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀳𑀸𑀦𑀢𑁆𑀣𑀸𑀬 𑀕𑀢𑁄. 𑀕𑀦𑁆𑀢𑁆𑀯𑀸 𑀘 𑀧𑀦 𑀓𑀸𑀬𑀩𑀦𑁆𑀥𑀦𑀁 𑀆𑀓𑀸𑀲𑁂 𑀘𑀻𑀯𑀭𑀯𑀁𑀲𑀁 𑀯𑀺𑀬 𑀓𑀢𑁆𑀯𑀸 𑀦𑀺𑀯𑀸𑀲𑀦𑀧𑀸𑀧𑀼𑀭𑀡𑀁 𑀢𑀲𑁆𑀫𑀺𑀁 𑀞𑀧𑁂𑀢𑁆𑀯𑀸 𑀚𑀮𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀉𑀤𑀓𑀫𑀢𑁆𑀣𑀓𑀸 𑀆𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀳𑀸𑀬𑀺𑀢𑀼𑀁 𑀆𑀭𑀪𑀺. 𑀘𑀭𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀕𑀭𑀼𑀕𑀸𑀭𑀯𑀓𑀸𑀭𑀡𑀁 𑀧𑀲𑁆𑀲𑀦𑁆𑀢𑁄 𑀕𑀼𑀫𑁆𑀩𑀦𑁆𑀢𑀭𑁂 𑀦𑀺𑀮𑀻𑀦𑁄 |𑀑𑁦.𑁦𑁦𑁩𑁫| 𑀅𑀝𑁆𑀞𑀸𑀲𑀺. 𑀞𑀢𑁆𑀯𑀸 𑀘 𑀧𑀦 𑀏𑀯𑀭𑀽𑀧𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺? 𑀅𑀬𑀜𑁆𑀘 𑀏𑀯𑀭𑀽𑀧𑀁 𑀦 𑀓𑀭𑁄𑀢𑀺, 𑀅𑀤𑁆𑀥𑀸 𑀏𑀲𑀸 𑀫𑀼𑀲𑀸𑀯𑀸𑀤𑀸’𑀢𑀺. 𑀅𑀳𑀁 𑀏𑀢𑀺𑀲𑁆𑀲𑀸 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀏𑀯𑀭𑀽𑀧𑀲𑁆𑀲 𑀲𑀫𑀡𑀲𑁆𑀲 𑀅𑀓𑀸𑀭𑀡𑁂 𑀅𑀧𑀭𑀸𑀥𑀁 𑀓𑀢𑀁. 𑀏𑀲𑁄 𑀢𑀸𑀤𑀺𑀲𑀁 𑀦 𑀓𑀭𑁄𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀦𑀳𑀢𑁆𑀯𑀸 𑀞𑀻𑀢𑀓𑀸𑀮𑁂 𑀕𑀦𑁆𑀢𑁆𑀯𑀸 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸?’𑀫𑀬𑁆𑀳𑀁 𑀔𑀫𑀣 𑀅𑀬𑁆𑀬𑀸’𑀢𑀺 𑀆𑀳. 𑀧𑀘𑁆𑀘𑁂𑀓 𑀩𑀼𑀤𑁆𑀥𑁄? 𑀓𑀺𑀁 𑀓𑀣𑁂𑀲𑀺 𑀉𑀧𑀸𑀲𑀓𑀸’𑀢𑀺. 𑀲𑁄 𑀅𑀢𑁆𑀢𑀦𑁄 𑀫𑀸𑀢𑀼𑀕𑀸𑀫𑀲𑁆𑀲 𑀓𑀣𑀺𑀢𑀁 𑀆𑀘𑀺𑀓𑁆𑀔𑀺. 𑀏𑀯𑀜𑁆𑀳𑀺 𑀲𑀢𑀺 𑀉𑀧𑀸𑀲𑀓 𑀢𑀼𑀫𑁆𑀳𑀸𑀓𑀁 𑀆𑀕𑀢𑀓𑀫𑁆𑀫𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀆𑀳. 𑀫𑀸 𑀏𑀯𑀁 𑀓𑀣𑁂𑀣 𑀲𑀸𑀫𑀺, 𑀅𑀳𑀁 𑀅𑀜𑁆𑀜𑀸𑀡𑀪𑀸𑀯𑁂𑀦 𑀢𑀲𑁆𑀲𑀸 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀅𑀓𑀸𑀭𑀡𑁂 𑀤𑀼𑀩𑁆𑀪𑀺𑀢𑀼𑀁 𑀆𑀕𑀢𑁄𑀫𑁆𑀳𑀺’𑀢𑀺 𑀲𑀩𑁆𑀩𑀁 𑀅𑀢𑁆𑀢𑀦𑀸 𑀘𑀺𑀦𑁆𑀢𑀺𑀢𑀁 𑀆𑀘𑀺𑀓𑁆𑀔𑀺.

𑀧𑀘𑁆𑀘𑁂𑀓𑀩𑀼𑀤𑁆𑀥𑁄? 𑀆𑀫 𑀉𑀧𑀸𑀲𑀓, 𑀲𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀅𑀲𑀤𑁆𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀁 𑀓𑀣𑁂𑀲𑀻’𑀢𑀺 𑀆𑀳. 𑀲𑁄 𑀢𑀲𑁆𑀲𑀸 𑀓𑀼𑀚𑁆𑀛𑀺𑀢𑁆𑀯𑀸 𑀅𑀳𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀇𑀫𑀲𑁆𑀲 𑀅𑀧𑀭𑀚𑁆𑀛𑀸𑀫𑀺. 𑀕𑀦𑁆𑀢𑁆𑀯𑀸 𑀢𑀁 𑀫𑀸𑀭𑁂𑀲𑁆𑀲𑀸𑀫𑀻’𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀫𑀸𑀢𑀼𑀕𑀸𑀫𑀁 𑀫𑀸 𑀫𑀸𑀭𑁂𑀳𑀻’𑀢𑀺 𑀅𑀦𑁂𑀓𑀯𑀺𑀥𑀸𑀦𑀺 𑀓𑀸𑀭𑀡𑀸𑀦𑀺 𑀓𑀣𑁂𑀢𑁆𑀯𑀸 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳?

𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺,

𑀲𑀼𑀤𑁆𑀥𑀲𑁆𑀲 𑀧𑁄𑀲𑀲𑁆𑀲 𑀅𑀦𑀗𑁆𑀕𑀡𑀲𑁆𑀲;

𑀢𑀫𑁂𑀯 𑀩𑀸𑀮𑀁 𑀧𑀘𑁆𑀘𑁂𑀢𑀺 𑀧𑀸𑀧𑀁,

𑀲𑀼𑀔𑀼𑀫𑁄 𑀭𑀚𑁄 𑀧𑀝𑀺𑀯𑀸𑀢𑀁𑀯 𑀔𑀺𑀢𑁆𑀢𑁄’𑀢𑀺;

𑀘𑀭𑀓𑁄 𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀤𑀬𑁄 𑀧𑀭𑀺𑀓𑁆𑀔𑀸𑀭𑁂 𑀘 𑀤𑀢𑁆𑀯𑀸 𑀧𑀝𑀺𑀚𑀕𑁆𑀕𑀺. 𑀲𑁄 𑀢𑀲𑁆𑀫𑀺𑀁𑀬𑁂𑀯 𑀮𑁂𑀦𑁂 𑀯𑀲𑀦𑁆𑀢𑁄 𑀅𑀧𑀭𑀪𑀸𑀕𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀲𑀬𑀫𑁆𑀪𑀼𑀜𑀸𑀡𑁂𑀦 |𑀑𑁦.𑁦𑁦𑁩𑁬| 𑀯𑀺𑀕𑀬𑁆𑀳 𑀥𑀫𑁆𑀫𑀁,

𑀤𑀼𑀓𑁆𑀔𑀁 𑀅𑀦𑀦𑁆𑀢𑀁 𑀲𑀓𑀮𑀁 𑀧𑀳𑀸𑀬;

𑀲𑀫𑀸𑀥𑀺𑀛𑀸𑀦𑀸𑀪𑀺𑀭𑀢𑁄 𑀬𑀲𑀲𑁆𑀲𑀺,

𑀕𑀢𑁄 𑀯𑀺𑀦𑀸𑀲𑀁 𑀧𑀯𑀭𑁄 𑀬𑀲𑀲𑁆𑀲𑀺.

𑀅𑀣 𑀧𑀘𑁆𑀙𑀸 𑀘𑀭𑀓𑁄 𑀓𑀸𑀮𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀘𑀺𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀫𑀮𑀬 𑀭𑀝𑁆𑀞𑁂 𑀅𑀫𑀭𑀼𑀧𑁆𑀧𑀮 𑀮𑁂𑀦𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂 𑀉𑀧𑀘𑀭𑀓𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀦𑀯𑀫𑀸𑀲𑀟𑁆𑀠𑀧𑀭𑀺𑀬𑁄𑀲𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀢𑀲𑁆𑀲 𑀦𑀸𑀫𑀕𑀳𑀡𑀤𑀺𑀯𑀲𑁂 𑀜𑀸𑀢𑀓𑀸 𑀅𑀫𑀭𑀼𑀧𑁆𑀧𑀮 𑀓𑀼𑀫𑀸𑀭𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀧𑀦 𑀅𑀧𑀭𑀪𑀸𑀕𑁂 𑀯𑀟𑁆𑀠𑁂𑀦𑁆𑀢𑁄 𑀤𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀦𑁆𑀢𑁄 𑀧𑀢𑁆𑀢𑀧𑀼𑀝𑁂𑀦 𑀯𑀸𑀮𑀼𑀓𑀪𑀢𑁆𑀢𑀁 𑀧𑀘𑀺𑀢𑁆𑀯𑀸, 𑀤𑀸𑀭𑀓𑀸 𑀇𑀫𑁂 𑀲𑀫𑀡𑀸𑀢𑀺 𑀯𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀸𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀓𑀻𑀴𑀸𑀤𑀸𑀦𑀁 𑀤𑁂𑀢𑀺. 𑀏𑀓𑀤𑀺𑀯𑀲𑀁 𑀅𑀫𑀭𑀼𑀧𑁆𑀧𑀮 𑀓𑀼𑀫𑀸𑀭𑁄 𑀯𑀸𑀮𑀼𑀓𑀣𑀼𑀧𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀯𑀢𑁆𑀣𑀤𑀼𑀲𑁆𑀲𑀁 𑀕𑀳𑁂𑀢𑁆𑀯𑀸 𑀔𑀼𑀤𑁆𑀤𑀓𑀤𑀡𑁆𑀟𑀓𑁂 𑀩𑀦𑁆𑀥𑀺𑀢𑁆𑀯𑀸 𑀧𑀝𑀸𑀓𑀁 𑀓𑀢𑁆𑀯𑀸 𑀧𑀽𑀚𑀦𑀢𑁆𑀣𑀸𑀬 𑀞𑀧𑁂𑀲𑀺. 𑀅𑀫𑀭𑀼𑀧𑁆𑀧𑀮 𑀮𑁂𑀦𑀯𑀸𑀲𑀻 𑀫𑀮𑀺𑀬 𑀤𑁂𑀯𑀢𑁆𑀣𑁂𑀭𑀁 𑀦𑀺𑀲𑁆𑀲𑀸𑀬 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀇𑀫𑀲𑁆𑀫𑀺𑀁𑀬𑁂𑀯 𑀤𑀻𑀧𑁂 𑀫𑀳𑀸𑀕𑀸𑀫𑁂 𑀕𑁄𑀞𑀸𑀪𑀬𑀫𑀳𑀸𑀭𑀸𑀚𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑁄 𑀦𑀯𑀫𑀸𑀲𑀟𑁆𑀠𑀧𑀭𑀺𑀬𑁄𑀲𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀢𑀲𑁆𑀲 𑀦𑀸𑀫𑀕𑀳𑀡 𑀤𑀺𑀯𑀲𑁂’𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑁄’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀟𑁆𑀠𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀅𑀳𑁄𑀲𑀺. 𑀢𑀲𑁆𑀲 𑀙𑀢𑁆𑀢𑁂 𑀉𑀲𑁆𑀲𑀸𑀧𑀺𑀢𑁂𑀬𑁂𑀯 𑀲𑀓𑀮𑀭𑀝𑁆𑀞𑀁 𑀲𑀼𑀪𑀺𑀓𑁆𑀔𑀁 𑀅𑀳𑁄𑀲𑀺. 𑀧𑀜𑁆𑀘 𑀯𑀸 𑀤𑁆𑀯𑀸𑀤𑀲 𑀯𑀸 𑀤𑀺𑀯𑀲𑁂 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑁂𑀯𑁄 𑀲𑀫𑁆𑀫𑀸 𑀯𑀲𑁆𑀲𑀢𑀺. 𑀯𑁂𑀲𑁆𑀲𑀦𑁆𑀢𑀭𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀸𑀦𑀕𑁆𑀕𑁂 𑀬𑀸𑀘𑀓𑀸𑀦𑀁 𑀳𑀢𑁆𑀣𑁂 𑀪𑀺𑀓𑁆𑀔𑀸𑀪𑀸𑀚𑀦𑀁 𑀯𑀺𑀬 𑀢𑀲𑁆𑀫𑀺𑀁 𑀓𑀸𑀮𑁂 𑀯𑀸𑀧𑀻𑀧𑁄𑀓𑁆𑀔𑀭𑀡𑀻-𑀦𑀤𑀻-𑀓𑀦𑁆𑀤𑀭-𑀲𑁄𑀩𑁆𑀪-𑀚𑀸𑀢𑀲𑀭𑀸𑀤𑀬𑁄 𑀯𑀲𑁆𑀲𑁄𑀤𑀓𑁂𑀦 𑀧𑀽𑀭𑀺𑀢𑀸 𑀅𑀳𑁂𑀲𑀼𑀁. 𑀧𑀜𑁆𑀘𑀯𑀺𑀥𑀧𑀤𑀼𑀫𑀲𑀜𑁆𑀙𑀦𑁆𑀦𑀸 𑀅𑀦𑁂𑀓𑀤𑀺𑀚𑀲𑀫𑀸𑀓𑀺𑀡𑁆𑀡𑀸 𑀦𑀸𑀦𑀸𑀭𑀼𑀓𑁆𑀔𑁂𑀳𑀺 𑀯𑀺𑀭𑁄𑀘𑀺𑀢𑀸 𑀅𑀳𑁂𑀲𑀼𑀁. 𑀦𑀸𑀦𑀸 𑀲𑀲𑁆𑀲𑀸𑀦𑀺 𑀲𑀫𑁆𑀧𑀚𑁆𑀚𑀺𑀁𑀲𑀼, 𑀉𑀢𑁆𑀢𑀭𑀓𑀼𑀭𑀼 𑀆𑀮𑀓𑀫𑀦𑁆𑀤𑀸 𑀭𑀸𑀚𑀥𑀸𑀦𑀺𑀲𑀤𑀺𑀲𑀁𑀯 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺 𑀭𑀢𑀦𑀝𑁆𑀞𑀸𑀦𑀁.

𑀲𑁄 |𑀑𑁦.𑁦𑁦𑁩𑁭| 𑀭𑀸𑀚𑀸 𑀲𑀤𑁆𑀥𑀸𑀬 𑀲𑀫𑁆𑀧𑀦𑁆𑀦𑁄 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀅𑀦𑀽𑀦𑀁 𑀓𑀢𑁆𑀯𑀸 𑀤𑀸𑀧𑁂𑀲𑀺. 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀢𑀺𑀧𑀺𑀝𑀓𑀥𑀭𑀸𑀦𑀁 𑀘𑀦𑁆𑀤𑀦𑀤𑁄𑀡𑀺𑀬𑀸 𑀲𑀢𑀧𑀸𑀓𑀢𑁂𑀮𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀬𑀸𑀯𑀧𑀺𑀝𑁆𑀞𑀺𑀧𑀸𑀤𑀁 𑀢𑀸𑀯 𑀑𑀲𑀻𑀤𑀸𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀁 𑀮𑀝𑁆𑀞𑀺𑀫 𑀥𑀼𑀤𑀦𑁆𑀢𑀓𑀝𑁆𑀞𑀁 𑀘𑀢𑀼𑀫𑀥𑀼𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀸𑀧𑁂𑀲𑀺. 𑀉𑀘𑁆𑀙𑀼𑀓𑀡𑁆𑀟-𑀲𑀓𑁆𑀔𑀭𑀸-𑀦𑀸𑀮𑀺𑀓𑁂𑀭-𑀨𑀮𑀫𑀽𑀮𑀔𑀦𑁆𑀥𑀔𑀸𑀤𑀦𑀜𑁆𑀘 𑀦𑀸𑀦𑀸𑀯𑀺𑀥𑀫𑀘𑁆𑀙𑀭𑀲𑁂𑀳𑀺 𑀲𑀼𑀕𑀦𑁆𑀥𑀲𑀸𑀮𑀺𑀢𑀡𑁆𑀟𑀼𑀮𑁂𑀦 𑀲𑀸𑀥𑀺𑀢𑀬𑀸𑀕𑀼𑀪𑀢𑁆𑀢𑀜𑁆𑀘 𑀧𑀸𑀢𑁄𑀯 𑀅𑀤𑀸𑀲𑀺. 𑀅𑀦𑁆𑀢𑀭𑀸𑀪𑀢𑁆𑀢𑁂 𑀅𑀝𑁆𑀞𑀸𑀭𑀲𑀯𑀺𑀥-𑀅𑀦𑁆𑀢𑀭𑀔𑀚𑁆𑀚𑀓𑀜𑁆𑀘 𑀉𑀘𑁆𑀙𑀼𑀓𑀤𑀮𑀺𑀧𑀦𑀲𑀨𑀮𑀸𑀤𑀬𑁄 𑀘 𑀦𑀸𑀦𑀸𑀯𑀺𑀥𑁄𑀢𑁆𑀢𑀭𑀺𑀪𑀗𑁆𑀕𑁂𑀦 𑀲𑀤𑁆𑀥𑀺𑀁 𑀲𑀼𑀕𑀦𑁆𑀥𑀲𑀸𑀮𑀺𑀢𑀡𑁆𑀟𑀼𑀮𑀪𑀢𑁆𑀢𑀁 𑀦𑀸𑀦𑀕𑁆𑀕𑀭𑀲𑀁 𑀤𑀸𑀧𑁂𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀅𑀝𑁆𑀞𑀯𑀺𑀥𑀓𑀧𑁆𑀧𑀻𑀬𑀧𑀸𑀦𑀓𑁂 𑀘 𑀤𑀸𑀧𑁂𑀲𑀺. 𑀅𑀜𑁆𑀜𑁂 𑀲𑀫𑀡𑀧𑀭𑀺𑀓𑁆𑀔𑀸𑀭𑁂 𑀘 𑀤𑀸𑀧𑁂𑀲𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑀺𑀧𑀺𑀝𑀓𑀥𑀭𑀪𑀺𑀓𑁆𑀔𑀽𑀦𑀜𑁆𑀘 𑀦𑀺𑀭𑀦𑁆𑀢𑀭𑀁 𑀫𑀳𑀸 𑀤𑀸𑀦𑀁 𑀤𑀢𑁆𑀯𑀸 𑀯𑀲𑀢𑀺.

𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀓𑀮𑁆𑀬𑀸𑀡𑀺𑀬𑀁 𑀲𑀺𑀯𑁄 𑀦𑀸𑀫 𑀫𑀳𑀸𑀭𑀸𑀚𑀸 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀅𑀪𑀬𑀓𑀼𑀫𑀸𑀭𑀲𑁆𑀲 𑀓𑀸𑀓𑀯𑀡𑁆𑀡𑀢𑀺𑀲𑁆𑀲 𑀭𑀜𑁆𑀜𑁄 𑀪𑀕𑀺𑀦𑀺𑀬𑀸 𑀲𑁄𑀫𑀤𑁂𑀯𑀺𑀬𑀸 𑀦𑀸𑀫 𑀭𑀸𑀚𑀧𑀼𑀢𑁆𑀢𑀺𑀬𑀸 𑀆𑀯𑀸𑀳𑀫𑀗𑁆𑀕𑀮𑀁 𑀓𑀢𑁆𑀯𑀸 𑀆𑀦𑁂𑀢𑁆𑀯𑀸 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀤𑀸𑀧𑁂𑀲𑀺. 𑀤𑀢𑁆𑀯𑀸 𑀘 𑀧𑀦 𑀅𑀪𑀬 𑀓𑀼𑀫𑀸𑀭𑀁 𑀕𑀺𑀭𑀺𑀦𑀕𑀭𑀫𑁆𑀳𑀺 𑀦𑀺𑀲𑀻𑀤𑀸𑀧𑁂𑀲𑀻. 𑀲𑁄 𑀕𑀺𑀭𑀺𑀦𑀕𑀭𑁂 𑀭𑀚𑁆𑀚𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑀺𑀭𑀺𑀅𑀪𑀬𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀫𑀳𑀦𑁆𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀯𑀺𑀳𑀸𑀲𑀺. 𑀢𑀢𑁄 𑀅𑀧𑀭𑀪𑀸𑀕𑁂 𑀓𑀸𑀓𑀯𑀡𑁆𑀡𑀢𑀺𑀲𑁆𑀲 𑀫𑀳𑀸𑀭𑀸𑀚𑀸 𑀫𑀳𑀸𑀕𑀸𑀫𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀕𑀢𑁆𑀢𑁂 𑀫𑀗𑁆𑀓𑀼𑀦𑀸 𑀤𑀝𑁆𑀞𑀝𑁆𑀞𑀸𑀦𑁂 𑀕𑀡𑁆𑀟𑀁 𑀉𑀝𑁆𑀞𑀺𑀢𑀁 𑀤𑀺𑀲𑁆𑀯𑀸 𑀓𑀺𑀫𑁂𑀢𑀁 𑀅𑀬𑁆𑀬𑀸’𑀢𑀺 𑀧𑀼𑀘𑁆𑀙𑀺. 𑀫𑀗𑁆𑀓𑀼𑀦𑀸 𑀤𑀝𑁆𑀞𑀝𑁆𑀞𑀸𑀦𑀁 𑀫𑀳𑀸𑀭𑀸𑀚𑀸𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄, 𑀪𑀦𑁆𑀢𑁂 𑀫𑀗𑁆𑀓𑀼𑀦𑀸 𑀓𑀺𑀲𑁆𑀫𑀺𑀁 𑀦 𑀪𑀯𑀦𑁆𑀢𑀺’𑀢𑀺 𑀧𑀼𑀘𑁆𑀙𑀺. 𑀧𑀝𑁆𑀝𑀲𑀸𑀝𑀓𑁂 𑀦 𑀪𑀯𑀦𑁆𑀢𑀺’𑀢𑀺. 𑀇𑀫𑁂 𑀧𑀦 𑀪𑀤𑁆𑀤𑀦𑁆𑀢𑀸 𑀧𑀝𑁆𑀝𑀲𑀸𑀝𑀓𑁂 𑀓𑀼𑀢𑁄 𑀮𑀪𑀦𑁆𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀢𑁄. 𑀢𑀁 𑀤𑀺𑀯𑀲𑀫𑁂𑀯 𑀧𑀸𑀦𑀻𑀬𑀫𑀸𑀴𑀓𑁂 𑀦𑀺𑀲𑀺𑀦𑁆𑀦𑁄 𑀢𑀺𑀧𑀺𑀝𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀭𑀜𑁆𑀜𑁄 𑀩𑀼𑀤𑁆𑀥𑀲𑀻𑀳𑀦𑀸𑀤𑀲𑀼𑀢𑁆𑀢𑀁 𑀦𑀸𑀫 𑀓𑀣𑁂𑀲𑀺. 𑀲𑁄 𑀣𑁂𑀭𑁂 𑀧𑀲𑀦𑁆𑀦𑁄; 𑀉𑀢𑁆𑀢𑀭𑀸𑀲𑀗𑁆𑀕𑁂 𑀤𑀻𑀬𑀫𑀸𑀦𑁂’𑀏𑀓𑀲𑀸𑀝𑀓𑁄 𑀪𑀯𑀺𑀲𑁆𑀲𑀸𑀫𑀺’ 𑀢𑀲𑁆𑀫𑀸 𑀇𑀫𑀫𑁂𑀯 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀓𑀣𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀓𑀣𑀬𑀫𑀸𑀦𑁄 𑀢𑀢𑁆𑀣 𑀫𑀸𑀴𑀓𑁂𑀬𑁂𑀯 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑁄 𑀓𑀸𑀓𑁄 𑀅𑀫𑁆𑀩𑀲𑀸𑀔𑀦𑁆𑀢𑀭𑁂 𑀦𑀺𑀲𑀻𑀤𑀺𑀢𑁆𑀯𑀸

𑀲𑀤𑁆𑀤𑀁 |𑀑𑁦.𑁦𑁦𑁩𑁮| 𑀓𑀭𑁄𑀦𑁆𑀢𑁄 𑀏𑀯𑀫𑀸𑀘𑀺𑀓𑁆𑀔𑀺. 𑀅𑀬𑁆𑀬 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑀫𑀳𑀸𑀭𑀸𑀚, 𑀢𑀼𑀫𑁆𑀳𑀸𑀓𑀁 𑀓𑀗𑁆𑀔𑀸 𑀦𑀸𑀫 𑀦𑀢𑁆𑀣𑀻, 𑀧𑀲𑀸𑀤𑀓𑁆𑀔𑀡𑁂 𑀥𑀫𑁆𑀫𑀓𑀣𑀺𑀓𑀲𑁆𑀲 𑀉𑀢𑁆𑀢𑀭𑀸𑀲𑀗𑁆𑀕𑀁 𑀤𑁂𑀳𑀻’𑀢𑀺 𑀆𑀳.

(𑀓𑀸𑀓𑁄 𑀲𑁄 𑀓𑀸𑀓𑀯𑀡𑁆𑀡𑀲𑁆𑀲 𑀯𑀤𑁂𑀢𑀺 𑀯𑀘𑀦𑀓𑁆𑀔𑀫𑁄,

𑀧𑀲𑀸𑀤𑀚𑀸𑀢𑁄 𑀣𑁂𑀭𑀲𑁆𑀲 𑀢𑀼𑀯𑀁 𑀲𑀤𑁆𑀥𑀫𑁆𑀫𑀤𑁂𑀲𑀦𑁂;

𑀤𑀤𑀸𑀳𑀺 𑀉𑀢𑁆𑀢𑀭𑀸𑀲𑀗𑁆𑀕𑀁 𑀫𑀳𑀸𑀣𑁂𑀭𑀲𑁆𑀲 𑀪𑀽𑀫𑀺𑀧𑀸’𑀢𑀺.)

𑀫𑀳𑀸𑀭𑀸𑀚, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀧𑀜𑁆𑀘𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄. 𑀯𑀺𑀳𑀸𑀭𑀤𑁂𑀯𑀺 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀇𑀤𑀫𑁂𑀓𑀁 𑀲𑀸𑀲𑀦𑀁. 𑀏𑀓𑀸 𑀓𑀭𑁂𑀡𑀼𑀓𑀸 𑀲𑀼𑀯𑀻𑀭𑀳𑀢𑁆𑀣𑀺𑀧𑁄𑀢𑀓𑀁 𑀢𑀺𑀢𑁆𑀣𑀲𑀭𑁂 𑀯𑀺𑀚𑀸𑀬𑀻. 𑀇𑀤𑀁 𑀤𑀼𑀢𑀺𑀬𑀁 𑀲𑀸𑀲𑀦𑀁. 𑀕𑁄𑀞𑀲𑀫𑀼𑀤𑁆𑀤𑀫𑀚𑁆𑀛𑁂𑀦 𑀲𑀢𑁆𑀢𑀫𑀢𑁆𑀢𑀸 𑀦𑀸𑀯𑀸 𑀧𑀝𑁆𑀝𑀦𑁂 𑀧𑀘𑁆𑀘𑀼𑀝𑁆𑀞𑀺𑀢𑀸, 𑀇𑀤𑀁 𑀢𑀢𑀺𑀬𑀁 𑀲𑀸𑀲𑀦𑀁 𑀉𑀢𑁆𑀢𑀭 𑀯𑀟𑁆𑀠𑀫𑀸𑀦𑀧𑀩𑁆𑀩𑀢𑀧𑀸𑀤𑁂 𑀤𑁆𑀯𑀺𑀓𑀭𑀻𑀲𑀧𑁆𑀧𑀫𑀸𑀡𑁂 𑀔𑁂𑀢𑁆𑀢𑁂 𑀢𑀭𑀼𑀡𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀸 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑀸 𑀉𑀕𑁆𑀕𑀘𑁆𑀙𑀺𑀁𑀲𑀼, 𑀇𑀤𑀁 𑀘𑀢𑀼𑀢𑁆𑀣𑀁 𑀲𑀸𑀲𑀦𑀁. 𑀕𑀺𑀭𑀺𑀧𑀩𑁆𑀩𑀢𑀧𑀸𑀤𑁂 𑀓𑁄𑀝 𑀭𑀝𑁆𑀞𑀓 𑀯𑀺𑀳𑀸𑀭𑁂 𑀓𑁄𑀝𑀭𑀝𑁆𑀞𑀓𑁄 𑀦𑀸𑀫 𑀣𑁂𑀭𑁄 𑀫𑀕𑁆𑀕𑁄𑀧𑀲𑀫𑀁 𑀯𑀢𑁆𑀯𑀸 𑀕𑀺𑀭𑀺𑀧𑀩𑁆𑀩𑀢𑀫𑀢𑁆𑀣𑀓𑁂 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀁 𑀉𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀇𑀤𑀁 𑀧𑀜𑁆𑀘𑀫𑀁 𑀲𑀸𑀲𑀦𑀁.

(𑀧𑀼𑀢𑁆𑀢𑁄 𑀳𑀢𑁆𑀣𑀻 𑀘 𑀦𑀸𑀯𑀸 𑀘 𑀘𑀢𑀼𑀢𑁆𑀣𑀁 𑀳𑁂𑀫𑀔𑀦𑁆𑀥𑀓𑀁;

𑀣𑁂𑀭𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀘𑀫𑀁 𑀲𑀸𑀲𑀦𑀁 𑀇𑀤𑀁.

𑀇𑀫𑀁 𑀕𑀳𑁂𑀢𑁆𑀯𑀸𑀦 𑀅𑀳𑀁 𑀆𑀕𑀢𑁄 𑀢𑀯 𑀲𑀦𑁆𑀢𑀺𑀓𑀁;

𑀲𑀸𑀲𑀦𑀁 𑀈𑀤𑀺𑀲𑀁 𑀲𑀼𑀢𑁆𑀯𑀸 𑀧𑀼𑀜𑁆𑀜𑀓𑀫𑁆𑀫𑁂 𑀭𑀢𑁄 𑀪𑀯.

𑀯𑀢𑁆𑀣𑀁 𑀲𑀳𑀲𑀸 𑀤𑀸𑀧𑁂𑀳𑀺 𑀓𑀢𑁄 𑀲𑀩𑁆𑀩𑀲𑀫𑀸𑀕𑀫𑁄;

𑀇𑀤𑀁 𑀦𑀺𑀘𑁆𑀘𑀁 𑀚𑀸𑀦𑀦𑁆𑀢𑁄 𑀓𑀺𑀁 𑀮𑀕𑁆𑀕𑁄 𑀉𑀢𑁆𑀢𑀭𑀸𑀲𑀗𑁆𑀕𑁂’𑀢𑀺.)

𑀭𑀸𑀚𑀸 𑀓𑀸𑀓𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀳𑀲𑀺. 𑀣𑁂𑀭𑁄? 𑀓𑀲𑁆𑀫𑀸 𑀫𑀳𑀸𑀭𑀸𑀚 𑀳𑀲𑀻’𑀢𑀺 𑀧𑀼𑀘𑁆𑀙𑀺. 𑀪𑀦𑁆𑀢𑁂, 𑀏𑀢𑀲𑁆𑀫𑀺𑀁 𑀅𑀫𑁆𑀩𑀲𑀸𑀔𑀦𑁆𑀢𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀤𑁆𑀤𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀓𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀳𑀲𑀺𑀦𑁆𑀢𑀺 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀣𑁂𑀭𑁄’𑀧𑀺 𑀭𑀜𑁆𑀜𑀸 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀓𑀢𑀓𑀫𑁆𑀫𑀁 |𑀑𑁦.𑁦𑁦𑁩𑁯| 𑀧𑀲𑁆𑀲𑀺𑀢𑁆𑀯𑀸 𑀳𑀲𑀺. 𑀭𑀸𑀚𑀸 𑀓𑀲𑁆𑀫𑀸 𑀅𑀬𑁆𑀬𑁄 𑀳𑀲𑀻’𑀢𑀺 𑀧𑀼𑀘𑁆𑀙𑀺. 𑀫𑀳𑀸𑀭𑀸𑀚, 𑀢𑀼𑀫𑁆𑀳𑀸𑀓𑀁 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀫𑀮𑀬𑀭𑀝𑁆𑀞𑁂 𑀅𑀫𑀭𑀼𑀧𑁆𑀧𑀮 𑀦𑀸𑀫 𑀓𑀸𑀮𑁂 𑀓𑀢𑀓𑀫𑁆𑀫𑀁 𑀧𑀲𑁆𑀲𑀺𑀢𑁆𑀯𑀸 𑀳𑀲𑀺𑀢𑁆𑀢𑀺. 𑀢𑁂𑀦 𑀧𑀼𑀝𑁆𑀞𑁄 𑀓𑀢𑀓𑀼𑀲𑀮𑀓𑀫𑁆𑀫𑀁 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀦 𑀢𑀲𑁆𑀲 𑀆𑀘𑀺𑀓𑁆𑀔𑀺. 𑀭𑀸𑀚𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀢𑁆𑀢𑀦𑁄 𑀉𑀢𑁆𑀢𑀭𑀸𑀲𑀗𑁆𑀕𑀁 𑀤𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀕𑀢𑁄. 𑀓𑁄𑀝𑀭𑀝𑁆𑀞𑀓𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀲𑀭𑀻𑀭𑀚𑁆𑀛𑀸𑀧𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀥𑀸𑀢𑀼𑀁 𑀆𑀤𑀸𑀬 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀧𑀽𑀚𑀁 𑀓𑀢𑁆𑀯𑀸 𑀫𑀳𑀸𑀕𑀸𑀫𑀁 𑀕𑀢𑁄. 𑀲𑀼𑀯𑀡𑁆𑀡𑀁 𑀆𑀳𑀭𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀞𑀧𑀸𑀧𑁂𑀲𑀺. 𑀕𑁄𑀞𑀲𑀫𑀼𑀤𑁆𑀤𑀓𑀼𑀘𑁆𑀙𑀺𑀬𑀁 𑀧𑀢𑁆𑀢 𑀦𑀸𑀯𑀸𑀢𑁄 𑀯𑀢𑁆𑀣𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀻𑀯𑀭𑀢𑁆𑀣𑀸𑀬 𑀤𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀫𑀳𑀸𑀕𑀸𑀫𑀲𑀫𑀻𑀧𑁂 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀤𑀼𑀝𑁆𑀞𑀕𑀸𑀫𑀡𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸; 𑀢𑀸𑀢, 𑀢𑁆𑀯𑀁 𑀕𑀦𑁆𑀢𑁆𑀯𑀸 𑀕𑀺𑀭𑀺𑀫𑁆𑀳𑀺 𑀦𑀕𑀭𑁂 𑀦𑀺𑀲𑀻𑀤𑀸’𑀢𑀺 𑀯𑀢𑁆𑀯𑀸 𑀅𑀫𑀘𑁆𑀘𑀜𑁆𑀘𑀲𑁆𑀲 𑀧𑀺𑀢𑀼𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀕𑀺𑀭𑀺𑀦𑀕𑀭𑀁 𑀧𑀸𑀳𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀕𑀺𑀭𑀺𑀅𑀪𑀬 𑀓𑀼𑀫𑀸𑀭𑁄 𑀓𑀼𑀫𑀸𑀭𑁂𑀦 𑀲𑀤𑁆𑀥𑀺𑀁 𑀆𑀕𑀢𑀩𑀴𑀲𑁆𑀲 𑀯𑀢𑁆𑀣𑀸𑀳𑀸𑀭𑀸𑀤𑀻𑀦𑀺 𑀤𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀫𑁆𑀫𑀸𑀦𑀁 𑀅𑀓𑀸𑀲𑀺. 𑀭𑀸𑀚𑀓𑀼𑀫𑀸𑀭𑁄 𑀕𑀺𑀭𑀺𑀧𑀩𑁆𑀩𑀢𑀧𑀸𑀤𑁂 𑀯𑀺𑀳𑀸𑀲𑀺.

𑀢𑀢𑁄 𑀅𑀧𑀭𑀪𑀸𑀕𑁂 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀔𑀢𑁆𑀢𑀺𑀬𑀸𑀦𑀁 𑀯𑀺𑀯𑀸𑀤𑁄 𑀅𑀳𑁄𑀲𑀺. 𑀲𑁄 𑀅𑀪𑀬𑀭𑀸𑀚𑀸 𑀓𑀺𑀁 𑀫𑁂𑀯𑀺𑀯𑀸𑀤𑁂𑀦𑀸’𑀢𑀺 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀲𑁄𑀫𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀩𑀮𑀯𑀸𑀳𑀦𑀁 𑀕𑀳𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀕𑀘𑁆𑀙𑀦𑁆𑀢𑁄 𑀲𑁂𑀭𑀼𑀦𑀕𑀭𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀁 𑀅𑀢𑁆𑀢𑀲𑀳𑀸𑀬𑀁 𑀲𑀺𑀯𑀭𑀸𑀚𑀁 𑀲𑀦𑁆𑀥𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀜𑁆𑀚𑀺. 𑀲𑁄’𑀧𑀺 𑀲𑀺𑀯𑀭𑀸𑀚𑀸 𑀕𑀺𑀭𑀺𑀅𑀪𑀬𑀭𑀜𑁆𑀜𑀸 𑀲𑀤𑁆𑀥𑀺𑀁 𑀆𑀕𑀢𑀩𑀴𑀲𑁆𑀲 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀸𑀭𑁂𑀢𑁆𑀯𑀸 𑀅𑀳𑀢𑀯𑀢𑁆𑀣𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀤𑀸𑀧𑁂𑀲𑀺. 𑀓𑀢𑀺𑀧𑀸𑀳𑀘𑁆𑀘𑀬𑁂; 𑀲𑀫𑁆𑀫, 𑀓𑀲𑁆𑀫𑀸 𑀆𑀕𑀢𑁄𑀲𑀺’𑀢𑀺 𑀧𑀼𑀘𑁆𑀙𑀺. 𑀲𑁄 𑀆𑀕𑀢𑀓𑀸𑀭𑀡𑀁 𑀲𑀩𑁆𑀩𑀫𑀲𑁆𑀲 𑀆𑀘𑀺𑀓𑁆𑀔𑀺. 𑀪𑀤𑁆𑀤𑀓𑀁 𑀲𑀫𑁆𑀫, 𑀢𑁂 𑀓𑀢𑀁 𑀆𑀕𑀦𑁆𑀢𑀩𑁆𑀩𑀫𑁂𑀯 𑀆𑀕𑀢𑁄. 𑀅𑀳𑀁 𑀢𑁂 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀺. 𑀢𑁆𑀯𑀁 𑀫𑀸 𑀘𑀺𑀦𑁆𑀢𑀬𑀻’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀯𑀲𑀦𑀢𑁆𑀣𑀸𑀬 𑀦𑀕𑀭𑀪𑀽𑀫𑀺𑀁 𑀕𑀯𑁂𑀲𑀦𑁆𑀢𑁄 𑀲𑀭𑀓𑁄𑀝𑀺𑀬𑀁 𑀅𑀢𑀺𑀭𑀫𑀡𑀻𑀬𑀪𑀽𑀫𑀺𑀁 𑀧𑀲𑁆𑀲𑀺𑀢𑁆𑀯𑀸 𑀢𑀲𑁆𑀫𑀺𑀁 𑀪𑀽𑀫𑀺𑀪𑀸𑀕𑁂 𑀲𑁄 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀤𑁂𑀯𑀺𑀬𑀸 𑀏𑀓𑀲𑀤𑀺𑀲𑀦𑀸𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀲𑁄𑀫𑀦𑀕𑀭𑀦𑁆𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀢𑀁 𑀦𑀕𑀭𑀁 𑀲𑀼𑀲𑀫𑀺𑀤𑁆𑀥𑀁 𑀲𑀫𑁆𑀧𑀦𑁆𑀦𑀥𑀦𑀥𑀜𑁆𑀜𑀸𑀤𑀻𑀳𑀺 𑀉𑀧𑀓𑀭𑀡𑁂𑀳𑀺 𑀤𑁆𑀯𑀸𑀭𑀝𑁆𑀝𑀸𑀮𑀓𑀕𑁄𑀧𑀼𑀭𑀧𑀭𑀺𑀔𑀸𑀧𑁄𑀓𑁆𑀔𑀭-𑀡𑀺𑀬𑀸𑀤𑀻𑀳𑀺 |𑀑𑁦.𑁦𑁦𑁪𑁦| 𑀲𑀳𑀺𑀢𑀁 𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀺𑀆𑀤𑀻𑀳𑀺 𑀲𑀫𑀸𑀓𑀼𑀮𑀁 𑀲𑀗𑁆𑀔𑀧𑀡𑀯𑀪𑁂𑀭𑀺𑀲𑀤𑁆𑀤𑀸𑀤𑀻𑀳𑀺 𑀲𑀫𑀸𑀓𑀺𑀡𑁆𑀡𑀁 𑀦𑀕𑀭𑀁 𑀅𑀳𑁄𑀲𑀺. 𑀲𑁄 𑀅𑀪𑀬𑁄 𑀘𑀺𑀭𑀁 𑀲𑁄𑀫𑀦𑀕𑀭𑁂 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀁 𑀅𑀦𑀼𑀪𑀯𑀦𑁆𑀢𑁄 𑀯𑀺𑀳𑀸𑀲𑀺.

𑀅𑀣𑀸𑀧𑀭𑀲𑁆𑀫𑀺𑀁 𑀓𑀸𑀮𑁂 𑀲𑁄𑀫𑀤𑁂𑀯𑀻 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀓𑀣𑁂𑀲𑀺; 𑀅𑀬𑁆𑀬 𑀅𑀫𑁆𑀳𑀸𑀓𑀁 𑀧𑀝𑀺𑀲𑀭𑀡𑀁 𑀘𑁂𑀢𑀺𑀬𑀜𑁆𑀘 𑀯𑀺𑀳𑀸𑀭𑀜𑁆𑀘 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’𑀢𑀺. 𑀪𑀤𑁆𑀤𑀓𑀁 𑀢𑁂 𑀓𑀣𑀺𑀢𑀦𑁆𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀸𑀭𑀪𑀽𑀫𑀺𑀁 𑀕𑀯𑁂𑀲𑀦𑁆𑀢𑁄 𑀦𑀕𑀭𑀢𑁄 𑀦𑀸𑀢𑀺𑀤𑀼𑀭𑁂 𑀦𑀸𑀘𑁆𑀘𑀸𑀲𑀦𑁆𑀦𑁂 𑀫𑀳𑀦𑁆𑀢𑀁 𑀲𑀸𑀮𑀯𑀦𑀁 𑀅𑀢𑁆𑀣𑀺. 𑀢𑀁 𑀧𑀲𑁆𑀲𑀺𑀢𑀼𑀁 𑀕𑀢𑁄. 𑀢𑀤𑀸 𑀢𑀲𑁆𑀫𑀺𑀁 𑀲𑀸𑀮𑀯𑀦𑁂 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀯𑀁𑀲𑁂 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀦𑀸𑀫 𑀏𑀓𑁄 𑀣𑁂𑀭𑁄 𑀅𑀢𑁆𑀣𑀺. 𑀲𑁄 𑀲𑀝𑁆𑀞𑀺𑀫𑀢𑁆𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀁 𑀤𑀺𑀲𑁆𑀯𑀸 𑀇𑀭𑀺𑀬𑀸𑀧𑀣𑁂 𑀧𑀲𑀦𑁆𑀦𑁄 𑀣𑁂𑀭𑀁 𑀏𑀯𑀫𑀸𑀳; ‘𑀅𑀬𑁆𑀬 𑀢𑀼𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀲𑀸𑀮𑀯𑀦𑁂 𑀯𑀺𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀺’𑀢𑀺. 𑀣𑁂𑀭𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻𑀳𑀸𑀯𑁂𑀦 𑀅𑀥𑀺𑀯𑀸𑀲𑁂𑀲𑀺. 𑀭𑀸𑀚𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀕𑀭𑀫𑁂𑀯 𑀕𑀦𑁆𑀢𑁆𑀯𑀸 𑀲𑁄𑀫𑀤𑁂𑀯𑀺𑀁 𑀆𑀫𑀦𑁆𑀢𑁂𑀢𑁆𑀯𑀸; 𑀪𑀤𑁆𑀤𑁂𑀲𑁄𑀫𑀤𑁂𑀯𑀺, 𑀅𑀫𑁆𑀳𑀸𑀓𑀁 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀯𑀺𑀳𑀸𑀭𑀓𑀭𑀡𑀢𑁆𑀣𑀸𑀬 𑀫𑀦𑀸𑀧𑁄 𑀪𑀽𑀫𑀺𑀪𑀸𑀕𑁄 𑀮𑀤𑁆𑀥𑁄. 𑀢𑀢𑁆𑀣 𑀘 𑀫𑀳𑀺𑀦𑁆𑀤𑁄 𑀦𑀸𑀫 𑀣𑁂𑀭𑁄 𑀲𑀫𑀡𑀸𑀦𑀁 𑀲𑀝𑁆𑀞𑀺𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀯𑀺𑀳𑀭𑀡𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄. 𑀢𑀢𑁆𑀣 𑀯𑀺𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀆𑀳. 𑀲𑀸 𑀢𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀲𑀸𑀥𑀽’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀧𑀼𑀦𑀤𑀺𑀯𑀲𑁂 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀣𑁂𑀭𑁄 𑀢𑁂𑀲𑀁 𑀫𑀳𑀸𑀲𑀫𑀬𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀢𑁂 𑀉𑀪𑁄’𑀧𑀺 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀳𑁂𑀲𑀼𑀁. 𑀅𑀣 𑀭𑀸𑀚𑀸 𑀅𑀬𑁆𑀬 𑀥𑀸𑀢𑀼𑀁 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀸’𑀢𑀺 𑀣𑁂𑀭𑀁 𑀧𑀼𑀘𑁆𑀙𑀺. 𑀫𑀸 𑀘𑀺𑀦𑁆𑀢𑀬𑀺 𑀫𑀳𑀸𑀭𑀸𑀚, 𑀥𑀸𑀢𑀼𑀁 𑀅𑀫𑁆𑀳𑁂 𑀚𑀸𑀦𑀺𑀲𑁆𑀲𑀸𑀫𑀸’𑀢𑀺 𑀆𑀘𑀺𑀓𑁆𑀔𑀺.

𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀯𑀺𑀳𑀸𑀭𑀪𑀼𑀫𑀺𑀁 𑀲𑁄𑀥𑀸𑀧𑁂𑀢𑁆𑀯𑀸 𑀔𑀸𑀡𑀼𑀓𑀡𑁆𑀝𑀓𑀸𑀤𑀬𑁄 𑀦𑀻𑀳𑀭𑀺𑀢𑁆𑀯𑀸 𑀪𑁂𑀭𑀺𑀢𑀮𑀫𑀺𑀯 𑀭𑀫𑀡𑀻𑀬𑀁 𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀇𑀝𑁆𑀞𑀓𑀯𑀟𑁆𑀠𑀓𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀇𑀝𑁆𑀞𑀘𑀺𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀓𑀫𑁆𑀫𑀁 𑀧𑀝𑁆𑀞𑀧𑁂𑀲𑀺. 𑀯𑀟𑁆𑀠𑀓𑀻 𑀘𑁂𑀢𑀺𑀬𑀁 𑀘𑀺𑀦𑀦𑁆𑀢𑁄 𑀓𑀢𑀺𑀧𑀸𑀳𑁂𑀦 𑀧𑀼𑀧𑁆𑀨𑀸𑀥𑀸𑀦𑀢𑁆𑀢𑀬𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀥𑀸𑀢𑀼𑀕𑀩𑁆𑀪𑁂 𑀲𑀩𑁆𑀩𑀁 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀭𑀜𑁆𑀜𑁄 𑀧𑀝𑀺𑀯𑁂𑀤𑁂𑀲𑀺. 𑀭𑀸𑀚𑀸, 𑀆𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀺. 𑀦𑀺𑀝𑁆𑀞𑀸𑀧𑀺𑀢𑁄 𑀅𑀬𑁆𑀬 𑀥𑀸𑀢𑀼 𑀕𑀩𑁆𑀪𑁄’𑀢𑀺. 𑀣𑁂𑀭𑁄 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑀸 𑀧𑀭𑀺𑀳𑀭𑀺𑀢𑀁 |𑀑𑁦.𑁦𑁦𑁪𑁧| 𑀢𑀣𑀸𑀕𑀢𑀲𑁆𑀲 𑀤𑀓𑁆𑀔𑀺𑀡𑀤𑀸𑀞𑀸𑀥𑀸𑀢𑀼𑀁 𑀢𑀲𑁆𑀲 𑀅𑀤𑀸𑀲𑀺. 𑀭𑀸𑀚𑀸 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀲𑀼𑀦𑀓𑁆𑀔𑀢𑁆𑀢𑁂𑀦 𑀲𑀼𑀫𑀼𑀳𑀼𑀢𑁆𑀢𑁂𑀦 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀥𑀸𑀢𑀼𑀕𑀩𑁆𑀪𑁂 𑀦𑀺𑀤𑀳𑀺𑀢𑁆𑀯𑀸 𑀅𑀢𑀺𑀫𑀦𑁄𑀭𑀫𑀁 𑀉𑀤𑀓𑀩𑀼𑀩𑁆𑀩𑀼𑀴𑀓𑁂𑀮𑀸𑀲𑀓𑀼𑀝𑀧𑀝𑀺𑀪𑀸𑀕𑀁 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀺.

𑀲𑀤𑁆𑀥𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄 𑀮𑁄𑀓𑀲𑀸𑀲𑀦𑀭𑀓𑁆𑀔𑀓𑁄;

𑀲𑀘𑁂𑀢𑀺𑀬𑀁 𑀫𑀳𑀸𑀭𑀸𑀚𑀸 𑀓𑀸𑀭𑀸𑀧𑁂𑀲𑀺 𑀯𑀺𑀳𑀸𑀭𑀓𑀁.

𑀢𑀢𑁄 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀼𑀦𑀁 𑀅𑀢𑁆𑀣𑀸𑀬 𑀲𑀝𑁆𑀞𑀺𑀫𑀢𑁆𑀢𑀸𑀦𑀺 𑀧𑀭𑀺𑀯𑁂𑀡𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀝𑁆𑀝𑀸𑀮𑀓𑀧𑀸𑀓𑀸𑀭𑁂𑀳𑀺 𑀲𑁄𑀪𑀺𑀢𑀁 𑀯𑀺𑀳𑀸𑀭𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀯𑀺𑀬𑀸 𑀏𑀓𑀦𑀸𑀫𑀁 𑀓𑀢𑁆𑀯𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀥𑀽𑀧𑀥𑀚𑁂𑀳𑀺 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀥𑀸𑀢𑀼𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀼𑀭𑀼𑀫𑀸𑀦𑁄 𑀕𑀺𑀭𑀺𑀅𑀪𑀬𑀭𑀸𑀚𑀸 𑀫𑀳𑀦𑁆𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀲𑁄𑀫𑀦𑀕𑀭𑀁 𑀧𑀝𑀺𑀯𑀲𑀢𑀺.

(𑀦𑀕𑀭𑁂 𑀲𑁄𑀫𑀦𑀸𑀫𑀫𑁆𑀳𑀺 𑀭𑀫𑀡𑀻𑀬𑁂 𑀫𑀦𑁄𑀭𑀫𑁂;

𑀤𑁂𑀯𑀺𑀬𑀸 𑀲𑀳 𑀫𑁄𑀤𑀦𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀦𑀸𑀬𑀓𑁄.)

𑀢𑀢𑁄 𑀯𑀺𑀳𑀸𑀭𑀤𑁂𑀯𑀺𑀬𑀸 𑀪𑀸𑀢𑀸 𑀘𑀼𑀮𑁆𑀮𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀏𑀓𑀤𑀺𑀯𑀲𑀁 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑀫𑀳𑀸𑀭𑀜𑁆𑀜𑁄 𑀆𑀬𑀼𑀲𑀗𑁆𑀔𑀸𑀭𑀫𑁄𑀮𑁄𑀓𑁂𑀦𑁆𑀢𑁄 𑀦 𑀘𑀺𑀭𑀧𑁆𑀧𑀯𑀢𑁆𑀢𑀦𑀪𑀸𑀯𑀁 𑀜𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑀺. 𑀫𑀳𑀸𑀭𑀸𑀚 𑀢𑀼𑀫𑁆𑀳𑀸𑀓𑀁 𑀦𑀮𑀸𑀝𑀥𑀸𑀢𑀼𑀬𑀸 𑀲𑀢𑁆𑀣𑀸𑀭𑀸 𑀩𑁆𑀬𑀸𑀓𑀭𑀡𑀁 𑀤𑀺𑀦𑁆𑀦𑀁;’𑀫𑀳𑀸𑀯𑀸𑀮𑀼𑀓𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀪𑀸𑀕𑁂 𑀲𑁂𑀭𑀼 𑀦𑀸𑀫 𑀤𑀳𑀲𑁆𑀲 𑀅𑀦𑁆𑀢𑁂 𑀯𑀭𑀸𑀳 𑀦𑀸𑀫 𑀲𑁄𑀡𑁆𑀟𑀺𑀬𑀸 𑀫𑀢𑁆𑀣𑀓𑁂 𑀅𑀦𑀸𑀕𑀢𑁂 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑁄 𑀦𑀸𑀫 𑀫𑀳𑀸𑀭𑀸𑀚𑀸 𑀫𑀬𑁆𑀳𑀁 𑀦𑀮𑀸𑀝𑀥𑀸𑀢𑀼𑀁 𑀧𑀢𑀺𑀝𑁆𑀞𑀧𑁂𑀲𑁆𑀲𑀢𑀻’𑀢𑀺 𑀯𑀢𑁆𑀯𑀸 𑀢𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀕𑀢𑁄. 𑀢𑀲𑁆𑀲 𑀯𑀘𑀦𑀁 𑀫𑀦𑀲𑀺𑀓𑀭𑁄𑀳𑀻’𑀢𑀺 𑀆𑀳. 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀅𑀫𑁆𑀳𑀸𑀓𑀁 𑀓𑀼𑀲𑀮𑀲𑀫𑁆𑀧𑀢𑁆𑀢𑀺𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀅𑀬𑁆𑀬𑀲𑁆𑀲 𑀯𑀘𑀦𑀫𑀼𑀤𑁆𑀤𑀺𑀲𑁆𑀲 𑀘𑁂𑀢𑀺𑀬𑀁 𑀓𑀸𑀭𑀸𑀧𑀦𑀢𑁆𑀣𑀸𑀬 𑀕𑀦𑁆𑀢𑀩𑁆𑀩𑀦𑁆𑀢𑀺 𑀫𑀦𑁆𑀢𑁆𑀯𑀸 𑀪𑀤𑁆𑀤𑀓𑀁 𑀅𑀬𑁆𑀬𑀸’𑀢𑀺 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀤𑀼𑀝𑁆𑀞𑀕𑀸𑀫𑀡𑀺𑀁 𑀕𑀺𑀭𑀺𑀦𑀕𑀭𑀢𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀳𑀸𑀕𑀸𑀫𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺; 𑀅𑀳𑀁 𑀫𑀳𑀸𑀯𑀸𑀮𑀼𑀓𑀸𑀬 𑀕𑀗𑁆𑀕𑀸𑀬 𑀲𑀫𑀻𑀧𑁂 𑀲𑁂𑀭𑀼 𑀦𑀸𑀫 |𑀑𑁦.𑁦𑁦𑁪𑁨| 𑀤𑀳𑀲𑁆𑀲 𑀅𑀦𑁆𑀢𑁂 𑀯𑀭𑀸𑀳 𑀦𑀸𑀫 𑀲𑁄𑀡𑁆𑀟𑀺𑀬𑀸 𑀫𑀢𑁆𑀣𑀓𑁂 𑀘𑁂𑀢𑀺𑀬𑀁 𑀓𑀸𑀭𑀸𑀧𑀦𑀢𑁆𑀣𑀸𑀬 𑀕𑀫𑀺𑀲𑁆𑀲𑀸𑀫𑀺, 𑀲𑀩𑁆𑀩𑀲𑁂𑀦𑀺𑀬𑁄 𑀘 𑀫𑀳𑀸 𑀚𑀦𑁄 𑀘 𑀫𑀬𑀸 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀼’𑀢𑀺 𑀯𑀢𑁆𑀯𑀸 𑀭𑀸𑀚𑀸 𑀘𑀼𑀮𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂 𑀲𑀸𑀕𑀮𑀢𑁆𑀣𑁂𑀭𑀲𑁆𑀲 𑀘 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀧𑀭𑀺𑀯𑀸𑀭𑁂 𑀧𑀜𑁆𑀘𑀲𑀢𑀫𑀢𑁆𑀢𑁂 𑀪𑀺𑀓𑁆𑀔𑀼 𑀕𑀳𑁂𑀢𑁆𑀯𑀸 𑀥𑀸𑀢𑀼𑀁 𑀉𑀧𑀝𑁆𑀞𑀳𑀦𑁆𑀢𑀸 𑀫𑀬𑀸 𑀲𑀤𑁆𑀥𑀺𑀁𑀬𑁂𑀯 𑀆𑀕𑀘𑁆𑀙𑀣𑀸’𑀢𑀺 𑀯𑀢𑁆𑀯𑀸 𑀪𑀤𑁆𑀤𑀫𑀸𑀲𑁂 𑀪𑀤𑁆𑀤𑀤𑀺𑀯𑀲𑁂 𑀲𑀼𑀦𑀓𑁆𑀔𑀢𑁆𑀢𑁂 𑀲𑀼𑀫𑀼𑀳𑀼𑀢𑁆𑀢𑁂 𑀩𑀦𑁆𑀥𑀸𑀯𑀸𑀭𑀁 𑀲𑀚𑁆𑀚𑁂𑀢𑁆𑀯𑀸 𑀥𑀸𑀢𑀼𑀖𑀭𑀢𑁄 𑀥𑀸𑀢𑀼𑀓𑀭𑀡𑁆𑀟𑀓𑀁 𑀦𑀻𑀳𑀭𑀺𑀢𑁆𑀯𑀸 𑀲𑀼𑀲𑀚𑁆𑀚𑀺𑀢𑀭𑀣𑁂 𑀞𑀧𑁂𑀢𑁆𑀯𑀸 𑀉𑀧𑀭𑀺 𑀲𑁂𑀢𑀘𑁆𑀙𑀢𑁆𑀢𑀜𑁆𑀘 𑀓𑀢𑁆𑀯𑀸 𑀧𑀼𑀭𑀢𑁄 𑀧𑀼𑀭𑀢𑁄 𑀭𑀢𑀦𑀫𑀡𑀟𑀧𑁂 𑀓𑀸𑀭𑀸𑀧𑁂𑀢𑁆𑀯𑀸 𑀧𑀼𑀭𑁂𑀢𑀭𑀫𑀓𑀸𑀲𑀺.

𑀢𑀢𑁄 𑀭𑀸𑀚𑀸 𑀧𑀼𑀢𑁆𑀢𑀁 𑀤𑀼𑀝𑁆𑀞𑀕𑀸𑀫𑀡𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀦𑀼𑀲𑀸𑀲𑀺𑀢𑁆𑀯𑀸 𑀧𑀼𑀢𑁆𑀢𑀁 𑀲𑀤𑁆𑀥𑀸𑀢𑀺𑀲𑁆𑀲𑀓𑀼𑀫𑀸𑀭𑀜𑁆𑀘 𑀯𑀺𑀳𑀸𑀭𑀤𑁂𑀯𑀺𑀜𑁆𑀘 𑀕𑀳𑁂𑀢𑁆𑀯𑀸 𑀲𑀻𑀖𑀁 𑀦𑀺𑀓𑁆𑀔𑀫𑀺. 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑁄 𑀘 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀧𑀜𑁆𑀘𑀲𑀢𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀥𑀸𑀢𑀼𑀁 𑀉𑀧𑀝𑁆𑀞𑀳𑀦𑁆𑀢𑁄 𑀧𑀘𑁆𑀙𑀢𑁄 𑀆𑀕𑀜𑁆𑀙𑀺. 𑀲𑀩𑁆𑀩𑀲𑁂𑀦𑀺𑀬𑁄 𑀘 𑀭𑀸𑀚𑀸 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀤𑀻𑀖𑀯𑀸𑀧𑀺𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀲𑁆𑀫𑀺𑀁 𑀲𑀤𑁆𑀥𑀸𑀢𑀺𑀲𑁆𑀲𑀓𑀼𑀫𑀸𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀆𑀕𑀦𑁆𑀢𑁆𑀯𑀸 𑀲𑀼𑀫𑀦𑀫𑀸𑀮𑀸𑀧𑀺𑀝𑁆𑀞𑀺𑀬𑀁 𑀔𑀦𑁆𑀥𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀓𑀲𑁆𑀫𑀸 𑀧𑀦 𑀢𑀁 𑀞𑀸𑀦𑀁 𑀏𑀯𑀁 𑀦𑀸𑀫𑀓𑀁 𑀚𑀸𑀢𑀦𑁆𑀢𑀺. 𑀲𑀼𑀫𑀦𑀦𑀸𑀕𑀭𑀸𑀚𑀸 𑀲𑀢𑁆𑀢𑀤𑀺𑀯𑀲𑀸𑀦𑀺 𑀦𑀸𑀕𑀲𑀫𑁆𑀧𑀢𑁆𑀢𑀺𑀁 𑀅𑀪𑀺𑀭𑀫𑀫𑀸𑀦𑁄 (𑀦𑀮𑀸𑀝𑀥𑀸𑀢𑀼𑀁 𑀯𑀺𑀲𑁆𑀲𑀭𑀺.) 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀦𑀮𑀸𑀝𑀥𑀸𑀢𑀼𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀧𑀘𑁆𑀙𑀸 𑀆𑀯𑀚𑁆𑀚𑀫𑀸𑀦𑁄 𑀭𑀜𑁆𑀜𑁄 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀫𑀳𑀦𑁆𑀢𑀁 𑀲𑁄𑀫𑀦𑀲𑁆𑀲𑀁 𑀧𑀢𑁆𑀢𑁄 𑀫𑀳𑀦𑁆𑀢𑀚𑁆𑀛𑀸𑀲𑀬𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀙𑀓𑁄𑀝𑀺𑀫𑀢𑁆𑀢𑁂 𑀦𑀸𑀕𑁂 𑀕𑀳𑁂𑀢𑁆𑀯𑀸 𑀥𑀸𑀢𑀼𑀧𑀝𑀺𑀧𑀣𑀁 𑀕𑀦𑁆𑀢𑁆𑀯𑀸 𑀥𑀸𑀢𑀼𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑁂𑀯 𑀧𑀣𑀯𑀺𑀬𑀁 𑀦𑀸𑀪𑀺𑀧𑁆𑀧𑀫𑀸𑀡𑀢𑁄 𑀲𑀼𑀫𑀦𑀫𑀸𑀮𑀸𑀯𑀲𑁆𑀲𑀁 𑀯𑀲𑁆𑀲𑁂𑀲𑀺. 𑀢𑀲𑁆𑀫𑀸 𑀢𑀁 𑀞𑀸𑀦𑀁 𑀲𑀼𑀫𑀦𑀫𑀸𑀮𑀸𑀧𑀺𑀝𑁆𑀞𑀺𑀢𑀺 𑀚𑀸𑀢𑀁. 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀯𑀭𑀸𑀳 |𑀑𑁦.𑁦𑁦𑁪𑁩| 𑀦𑀸𑀫 𑀲𑁄𑀡𑁆𑀟𑀺𑀁 𑀧𑀸𑀧𑀼𑀡𑀺. 𑀲𑀫𑁆𑀧𑀢𑁆𑀢𑀸𑀬 𑀥𑀸𑀢𑀼𑀬𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀼𑀫𑀦𑀦𑀸𑀕𑀭𑀸𑀚𑀸 𑀭𑀣𑀘𑀓𑁆𑀓𑁂 𑀬𑀸𑀯 𑀦𑀸𑀪𑀺𑀁 𑀢𑀸𑀯 𑀑𑀲𑀻𑀤𑀸𑀧𑁂𑀢𑁆𑀯𑀸 𑀅𑀧𑀭𑀺𑀯𑀢𑁆𑀢𑀦𑀁 𑀅𑀓𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀣𑁂𑀭𑀁 𑀧𑀼𑀘𑁆𑀙𑀺. 𑀫𑀸 𑀪𑀸𑀬𑀺 𑀫𑀳𑀸𑀭𑀸𑀚, 𑀥𑀸𑀢𑀼 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁 𑀆𑀕𑀢𑁄. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻’𑀢𑀺 𑀆𑀳.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀥𑀸𑀢𑀼𑀧𑀢𑀺𑀝𑁆𑀞𑀸𑀦 𑀪𑀽𑀫𑀺𑀪𑀸𑀕𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯 𑀲𑁂𑀦𑀁𑀦𑀺𑀯𑁂𑀲𑁂𑀢𑁆𑀯𑀸 𑀇𑀤𑀁 𑀞𑀸𑀦𑀁 𑀲𑀫𑀦𑁆𑀢𑀢𑁄 𑀲𑀓𑀡𑁆𑀝𑀓𑀁 𑀯𑀦𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀪𑀽𑀫𑀺𑀪𑀸𑀕𑀁 𑀅𑀢𑀺𑀭𑀫𑀡𑀻𑀬𑀁 𑀪𑁂𑀭𑀺𑀢𑀮𑀫𑀺𑀯 𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑁂𑀦𑀺𑀬𑀧𑀸𑀫𑁄𑀓𑁆𑀔𑀁 𑀆𑀫𑀦𑁆𑀢𑁂𑀢𑁆𑀯𑀸 𑀢𑀼𑀫𑁆𑀳𑁂 𑀥𑀸𑀢𑀼𑀁 𑀞𑀧𑀦𑀢𑁆𑀣𑀸𑀬 𑀧𑀞𑀫𑀁 𑀥𑀸𑀢𑀼𑀖𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀥𑀸𑀢𑀼 𑀕𑀩𑁆𑀪𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀯𑁂𑀤𑁂𑀲𑀺. 𑀭𑀸𑀚𑀸 𑀅𑀦𑁆𑀢𑁄 𑀥𑀸𑀢𑀼𑀖𑀭𑁂 𑀢𑀲𑁆𑀫𑀺𑀁 𑀥𑀸𑀢𑀼𑀕𑀩𑁆𑀪𑁂 𑀥𑀸𑀢𑀼𑀓𑀭𑀡𑁆𑀟𑀓𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀩𑀳𑀺 𑀆𑀭𑀓𑁆𑀔𑀁 𑀲𑀁𑀯𑀺𑀥𑀸𑀬 𑀢𑀢𑁆𑀣 𑀫𑀳𑀦𑁆𑀢𑀁 𑀧𑀽𑀚𑀸𑀯𑀺𑀥𑀸𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀥𑀸𑀢𑀼𑀖𑀭𑀁 𑀘𑀢𑀼𑀚𑀸𑀢𑀺𑀬𑀕𑀦𑁆𑀥𑁂𑀦 𑀯𑀺𑀮𑀺𑀫𑁆𑀧𑀸𑀧𑁂𑀲𑀺. 𑀢𑀤𑀼𑀧𑀸𑀤𑀸𑀬 𑀢𑀁 𑀕𑁂𑀳𑀁 𑀕𑀦𑁆𑀥𑀫𑀽𑀮𑀁 𑀦𑀸𑀫 𑀚𑀸𑀢𑀁. 𑀢𑀲𑁆𑀫𑀺𑀁 𑀞𑀸𑀦𑁂 𑀩𑀳𑀽 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀢𑁆𑀣 𑀫𑀳𑀺𑀦𑁆𑀤𑁄 𑀦𑀸𑀫 𑀣𑁂𑀭𑁄 𑀆𑀕𑀦𑁆𑀢𑀼𑀓 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀅𑀓𑀸𑀲𑀺. 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀼𑀔𑁂𑀦 𑀯𑀲𑀺𑀢𑁆𑀣 𑀅𑀬𑁆𑀬𑀸’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑁂 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑁂𑀢𑁆𑀯𑀸 𑀭𑀸𑀚𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀁 𑀲𑀓𑁆𑀓𑀘𑁆𑀘𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀪𑀢𑁆𑀢𑀁 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀣𑁂𑀭𑁄 𑀑𑀯𑀤𑀦𑁆𑀢𑁄 𑀫𑀳𑀸𑀭𑀸𑀚, 𑀧𑀫𑀸𑀤𑁂𑀦 𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀚𑀻𑀯𑀺𑀢𑀁 𑀦𑀸𑀫 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁, 𑀥𑀸𑀢𑀼𑀧𑀢𑀺𑀝𑁆𑀞𑀸𑀧𑀦𑀁 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀓𑀸𑀭𑁂𑀳𑀻’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳?

𑀬𑀲𑁆𑀫𑀸 𑀳𑀺 𑀚𑀻𑀯𑀺𑀢𑀁 𑀦𑀸𑀫 𑀅𑀧𑁆𑀧𑀁 𑀩𑀼𑀩𑁆𑀩𑀼𑀮𑀓𑀼𑀧𑀫𑀁;

𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄 𑀓𑀭𑁂𑀬𑁆𑀬 𑀓𑀼𑀲𑀮𑀁 𑀲𑀤𑀸’𑀢𑀺.

𑀇𑀫𑀺𑀦𑀸 |𑀑𑁦.𑁦𑁦𑁪𑁪| 𑀦𑀬𑁂𑀦 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲 𑀢𑁆𑀣𑁂𑀭𑁄 𑀘 𑀲𑀸𑀕𑀮𑀢𑁆𑀣𑁂𑀭𑁄 𑀘 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀘𑀸’𑀢𑀺 𑀢𑀬𑁄 𑀣𑁂𑀭𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀥𑀸𑀢𑀼 𑀧𑀭𑀺𑀳𑀭𑀡𑀢𑁆𑀣𑀸𑀬 𑀆𑀕𑀘𑁆𑀙𑀺𑀁𑀲𑀼.

𑀯𑀺𑀧𑀼𑀮𑀬𑀲𑁄 𑀧𑀭𑀳𑀺𑀢𑀸𑀯𑀳𑀦𑁆𑀢𑁄,

𑀲𑀼𑀚𑀦𑀳𑀺𑀢𑁄 𑀥𑀺𑀢𑀺𑀫𑀸 𑀅𑀯𑀻𑀢𑀲𑀤𑁆𑀥𑁄;

𑀲𑀼𑀧𑀭𑀺𑀯𑀼𑀢𑁄 𑀫𑀳𑀢𑀺𑀬𑀸 𑀳𑀺 𑀧𑀭𑀺𑀲𑀸,

𑀭𑀸𑀚𑀲𑁂𑀝𑁆𑀞𑁄 𑀧𑀯𑀭𑀣𑀽𑀧𑀫𑀸𑀭𑀪𑀻’𑀢𑀺.

𑀇𑀢𑀺 𑀅𑀭𑀺𑀬𑀚𑀦𑀧𑁆𑀧𑀲𑀸𑀤𑀦𑀢𑁆𑀣𑀸𑀬 𑀓𑀢𑁂 𑀥𑀸𑀢𑀼𑀯𑀁𑀲𑁂

𑀧𑀓𑀺𑀡𑁆𑀡𑀓𑁄 𑀦𑀸𑀫

𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.