𑁫. 𑀧𑀜𑁆𑀜𑀸𑀲𑀼𑀢𑁆𑀢𑀁

𑁨𑁫. ‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀺, 𑀢𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’’’𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀺? ‘𑀯𑀻𑀢𑀭𑀸𑀕𑀁 𑀫𑁂 𑀘𑀺𑀢𑁆𑀢’𑀦𑁆𑀢𑀺 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀺; ‘𑀯𑀻𑀢𑀤𑁄𑀲𑀁 𑀫𑁂 𑀘𑀺𑀢𑁆𑀢’𑀦𑁆𑀢𑀺 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀺; ‘𑀯𑀻𑀢𑀫𑁄𑀳𑀁 𑀫𑁂 𑀘𑀺𑀢𑁆𑀢’𑀦𑁆𑀢𑀺 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀺; ‘𑀅𑀲𑀭𑀸𑀕𑀥𑀫𑁆𑀫𑀁 𑀫𑁂 𑀘𑀺𑀢𑁆𑀢’𑀦𑁆𑀢𑀺 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀺; ‘𑀅𑀲𑀤𑁄𑀲𑀥𑀫𑁆𑀫𑀁 𑀫𑁂 𑀘𑀺𑀢𑁆𑀢’𑀦𑁆𑀢𑀺 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀺; ‘𑀅𑀲𑀫𑁄𑀳𑀥𑀫𑁆𑀫𑀁 𑀫𑁂 𑀘𑀺𑀢𑁆𑀢’𑀦𑁆𑀢𑀺 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀺; ‘𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀁 𑀫𑁂 𑀘𑀺𑀢𑁆𑀢𑀁 𑀓𑀸𑀫𑀪𑀯𑀸𑀬𑀸’𑀢𑀺 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀺; ‘𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀁 𑀫𑁂 𑀘𑀺𑀢𑁆𑀢𑀁 𑀭𑀽𑀧𑀪𑀯𑀸𑀬𑀸’𑀢𑀺 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀺; ‘𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀁 𑀫𑁂 𑀘𑀺𑀢𑁆𑀢𑀁 𑀅𑀭𑀽𑀧𑀪𑀯𑀸𑀬𑀸’𑀢𑀺 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀺. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀜𑀸𑀬 𑀘𑀺𑀢𑁆𑀢𑀁 𑀲𑀼𑀧𑀭𑀺𑀘𑀺𑀢𑀁 𑀳𑁄𑀢𑀺, 𑀢𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’’’𑀢𑀺. 𑀧𑀜𑁆𑀘𑀫𑀁.