𑁧𑁦. 𑀆𑀖𑀸𑀢𑀧𑀝𑀺𑀯𑀺𑀦𑀬𑀲𑀼𑀢𑁆𑀢𑀁

𑁩𑁦. [𑀤𑀻. 𑀦𑀺. 𑁩.𑁩𑁪𑁦, 𑁩𑁫𑁯] ‘‘𑀦𑀯𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀖𑀸𑀢𑀧𑀝𑀺𑀯𑀺𑀦𑀬𑀸. 𑀓𑀢𑀫𑁂 𑀦𑀯? ‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀺 [𑀅𑀘𑀭𑀻𑀢𑀺 (𑀲𑁆𑀬𑀸.), 𑀏𑀯𑀁 ‘‘𑀘𑀭𑀢𑀺, 𑀘𑀭𑀺𑀲𑁆𑀲𑀢𑀺’’ 𑀧𑀤𑁂𑀲𑀼𑀧𑀺], 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀺; ‘𑀅𑀦𑀢𑁆𑀣𑀁 𑀫𑁂 𑀘𑀭𑀢𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀺; ‘𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀺; 𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀺…𑀧𑁂… 𑀅𑀦𑀢𑁆𑀣𑀁 𑀘𑀭𑀢𑀺…𑀧𑁂… ‘𑀅𑀦𑀢𑁆𑀣𑀁 𑀘𑀭𑀺𑀲𑁆𑀲𑀢𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀺; 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺…𑀧𑁂… 𑀅𑀢𑁆𑀣𑀁 𑀘𑀭𑀢𑀺…𑀧𑁂… ‘𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀦𑀯 𑀆𑀖𑀸𑀢𑀧𑀝𑀺𑀯𑀺𑀦𑀬𑀸’’𑀢𑀺. 𑀤𑀲𑀫𑀁.