𑁯. 𑀧𑀞𑀫𑀇𑀥𑀮𑁄𑀓𑀺𑀓𑀲𑀼𑀢𑁆𑀢𑀁

𑁪𑁯. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂…. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀘𑀢𑀽𑀳𑀺 𑀔𑁄, 𑀯𑀺𑀲𑀸𑀔𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀇𑀥𑀮𑁄𑀓𑀯𑀺𑀚𑀬𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀬𑀁𑀲 𑀮𑁄𑀓𑁄 𑀆𑀭𑀤𑁆𑀥𑁄 𑀳𑁄𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑁄 𑀳𑁄𑀢𑀺, 𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑁄, 𑀪𑀢𑁆𑀢𑀼 𑀫𑀦𑀸𑀧𑀁 𑀘𑀭𑀢𑀺, 𑀲𑀫𑁆𑀪𑀢𑀁 𑀅𑀦𑀼𑀭𑀓𑁆𑀔𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑁄 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀬𑁂 𑀢𑁂 𑀪𑀢𑁆𑀢𑀼 𑀅𑀩𑁆𑀪𑀦𑁆𑀢𑀭𑀸 𑀓𑀫𑁆𑀫𑀦𑁆𑀢𑀸 𑁋 𑀉𑀡𑁆𑀡𑀸𑀢𑀺 𑀯𑀸 𑀓𑀧𑁆𑀧𑀸𑀲𑀸𑀢𑀺 𑀯𑀸 𑁋 𑀢𑀢𑁆𑀣 𑀤𑀓𑁆𑀔𑀸 𑀳𑁄𑀢𑀺 𑀅𑀦𑀮𑀲𑀸 𑀢𑀢𑁆𑀭𑀼𑀧𑀸𑀬𑀸𑀬 𑀯𑀻𑀫𑀁𑀲𑀸𑀬 𑀲𑀫𑀦𑁆𑀦𑀸𑀕𑀢𑀸 𑀅𑀮𑀁 𑀓𑀸𑀢𑀼𑀁 𑀅𑀮𑀁 𑀲𑀁𑀯𑀺𑀥𑀸𑀢𑀼𑀁. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑁄 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀬𑁄 𑀲𑁄 𑀪𑀢𑁆𑀢𑀼 𑀅𑀩𑁆𑀪𑀦𑁆𑀢𑀭𑁄 𑀅𑀦𑁆𑀢𑁄𑀚𑀦𑁄 𑁋 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀯𑀸 𑁋 𑀢𑁂𑀲𑀁 𑀓𑀢𑀜𑁆𑀘 𑀓𑀢𑀢𑁄 𑀚𑀸𑀦𑀸𑀢𑀺 𑀅𑀓𑀢𑀜𑁆𑀘 𑀅𑀓𑀢𑀢𑁄 𑀚𑀸𑀦𑀸𑀢𑀺, 𑀕𑀺𑀮𑀸𑀦𑀓𑀸𑀦𑀜𑁆𑀘 𑀩𑀮𑀸𑀩𑀮𑀁 𑀚𑀸𑀦𑀸𑀢𑀺 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀜𑁆𑀘𑀲𑁆𑀲 𑀧𑀘𑁆𑀘𑀁𑀲𑁂𑀦 𑀲𑀁𑀯𑀺𑀪𑀚𑀢𑀺. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀪𑀢𑁆𑀢𑀼 𑀫𑀦𑀸𑀧𑀁 𑀘𑀭𑀢𑀺? 𑀇𑀥, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀬𑀁 𑀪𑀢𑁆𑀢𑀼 𑀅𑀫𑀦𑀸𑀧𑀲𑀗𑁆𑀔𑀸𑀢𑀁 𑀢𑀁 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦 𑀅𑀚𑁆𑀛𑀸𑀘𑀭𑀢𑀺. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀪𑀢𑁆𑀢𑀼 𑀫𑀦𑀸𑀧𑀁 𑀘𑀭𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀫𑁆𑀪𑀢𑀁 𑀅𑀦𑀼𑀭𑀓𑁆𑀔𑀢𑀺? 𑀇𑀥, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀬𑀁 𑀪𑀢𑁆𑀢𑀸 𑀆𑀳𑀭𑀢𑀺 𑀥𑀦𑀁 𑀯𑀸 𑀥𑀜𑁆𑀜𑀁 𑀯𑀸 𑀭𑀚𑀢𑀁 𑀯𑀸 𑀚𑀸𑀢𑀭𑀽𑀧𑀁 𑀯𑀸 𑀢𑀁 𑀆𑀭𑀓𑁆𑀔𑁂𑀦 𑀕𑀼𑀢𑁆𑀢𑀺𑀬𑀸 𑀲𑀫𑁆𑀧𑀸𑀤𑁂𑀢𑀺, 𑀢𑀢𑁆𑀣 𑀘 𑀳𑁄𑀢𑀺 𑀅𑀥𑀼𑀢𑁆𑀢𑀻 𑀅𑀣𑁂𑀦𑀻 𑀅𑀲𑁄𑀡𑁆𑀟𑀻 𑀅𑀯𑀺𑀦𑀸𑀲𑀺𑀓𑀸. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀫𑁆𑀪𑀢𑀁 𑀅𑀦𑀼𑀭𑀓𑁆𑀔𑀢𑀺. 𑀇𑀫𑁂𑀳𑀺 𑀔𑁄, 𑀯𑀺𑀲𑀸𑀔𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀇𑀥𑀮𑁄𑀓𑀯𑀺𑀚𑀬𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀬𑀁𑀲 𑀮𑁄𑀓𑁄 𑀆𑀭𑀤𑁆𑀥𑁄 𑀳𑁄𑀢𑀺.

‘‘𑀘𑀢𑀽𑀳𑀺 𑀔𑁄, 𑀯𑀺𑀲𑀸𑀔𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀧𑀭𑀮𑁄𑀓𑀯𑀺𑀚𑀬𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀮𑁄𑀓𑁄 𑀆𑀭𑀤𑁆𑀥𑁄 𑀳𑁄𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀘𑀸𑀕𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀤𑁆𑀥𑁄 𑀳𑁄𑀢𑀺, 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀘𑀸𑀕𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑀸 𑀧𑀬𑀢𑀧𑀸𑀡𑀺𑀦𑀻 𑀯𑁄𑀲𑁆𑀲𑀕𑁆𑀕𑀭𑀢𑀸 𑀬𑀸𑀘𑀬𑁄𑀕𑀸 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑀸. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀘𑀸𑀕𑀲𑀫𑁆𑀧𑀦𑁆𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀧𑀜𑁆𑀜𑀯𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀯𑀺𑀲𑀸𑀔𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀧𑀭𑀮𑁄𑀓𑀯𑀺𑀚𑀬𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀮𑁄𑀓𑁄 𑀆𑀭𑀤𑁆𑀥𑁄 𑀳𑁄𑀢𑀻’’𑀢𑀺.

‘‘𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀸, 𑀲𑀗𑁆𑀕𑀳𑀺𑀢𑀧𑀭𑀺𑀚𑁆𑀚𑀦𑀸;

𑀪𑀢𑁆𑀢𑀼 𑀫𑀦𑀸𑀧𑀁 𑀘𑀭𑀢𑀺, 𑀲𑀫𑁆𑀪𑀢𑀁 𑀅𑀦𑀼𑀭𑀓𑁆𑀔𑀢𑀺.

‘‘𑀲𑀤𑁆𑀥𑀸 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸;

𑀦𑀺𑀘𑁆𑀘𑀁 𑀫𑀕𑁆𑀕𑀁 𑀯𑀺𑀲𑁄𑀥𑁂𑀢𑀺, 𑀲𑁄𑀢𑁆𑀣𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀁.

‘‘𑀇𑀘𑁆𑀘𑁂𑀢𑁂 𑀅𑀝𑁆𑀞 𑀥𑀫𑁆𑀫𑀸 𑀘, 𑀬𑀲𑁆𑀲𑀸 𑀯𑀺𑀚𑁆𑀚𑀦𑁆𑀢𑀺 𑀦𑀸𑀭𑀺𑀬𑀸;

𑀢𑀫𑁆𑀧𑀺 𑀲𑀻𑀮𑀯𑀢𑀺𑀁 𑀆𑀳𑀼, 𑀥𑀫𑁆𑀫𑀝𑁆𑀞𑀁 𑀲𑀘𑁆𑀘𑀯𑀸𑀤𑀺𑀦𑀺𑀁.

‘‘𑀲𑁄𑀴𑀲𑀸𑀓𑀸𑀭𑀲𑀫𑁆𑀧𑀦𑁆𑀦𑀸, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀸;

𑀢𑀸𑀤𑀺𑀲𑀻 𑀲𑀻𑀮𑀯𑀢𑀻 𑀉𑀧𑀸𑀲𑀺𑀓𑀸;

𑀉𑀧𑀧𑀚𑁆𑀚𑀢𑀺 𑀤𑁂𑀯𑀮𑁄𑀓𑀁 𑀫𑀦𑀸𑀧’’𑀦𑁆𑀢𑀺. 𑀦𑀯𑀫𑀁;