𑁭. 𑀤𑀼𑀢𑀺𑀬𑀯𑀺𑀲𑀸𑀔𑀸𑀲𑀼𑀢𑁆𑀢𑀁

𑁪𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀅𑀝𑁆𑀞𑀳𑀺 𑀔𑁄, 𑀯𑀺𑀲𑀸𑀔𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀦𑀸𑀧𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀇𑀥, 𑀯𑀺𑀲𑀸𑀔𑁂, 𑀫𑀸𑀢𑀼𑀕𑀸𑀫𑁄 𑀬𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀪𑀢𑁆𑀢𑀼𑀦𑁄 𑀤𑁂𑀦𑁆𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑁂𑀲𑀺𑀦𑁄 𑀅𑀦𑀼𑀓𑀫𑁆𑀧𑀓𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀢𑀲𑁆𑀲 𑀳𑁄𑀢𑀺 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀻 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀻 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀻 𑀫𑀦𑀸𑀧𑀘𑀸𑀭𑀺𑀦𑀻 𑀧𑀺𑀬𑀯𑀸𑀤𑀺𑀦𑀻…𑀧𑁂….

‘‘𑀘𑀸𑀕𑀯𑀢𑀻 𑀔𑁄 𑀧𑀦 𑀳𑁄𑀢𑀺. 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑀸 𑀧𑀬𑀢𑀧𑀸𑀡𑀺𑀦𑀻 𑀯𑁄𑀲𑁆𑀲𑀕𑁆𑀕𑀭𑀢𑀸 𑀬𑀸𑀘𑀬𑁄𑀕𑀸 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑀸. 𑀇𑀫𑁂𑀳𑀺 𑀔𑁄, 𑀯𑀺𑀲𑀸𑀔𑁂, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀦𑀸𑀧𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺.

‘‘𑀬𑁄 𑀦𑀁 𑀪𑀭𑀢𑀺 𑀲𑀩𑁆𑀩𑀤𑀸, 𑀦𑀺𑀘𑁆𑀘𑀁 𑀆𑀢𑀸𑀧𑀺 𑀉𑀲𑁆𑀲𑀼𑀓𑁄;

𑀢𑀁 𑀲𑀩𑁆𑀩𑀓𑀸𑀫𑀤𑀁 𑀧𑁄𑀲𑀁, 𑀪𑀢𑁆𑀢𑀸𑀭𑀁 𑀦𑀸𑀢𑀺𑀫𑀜𑁆𑀜𑀢𑀺.

‘‘𑀦 𑀘𑀸𑀧𑀺 𑀲𑁄𑀢𑁆𑀣𑀺 𑀪𑀢𑁆𑀢𑀸𑀭𑀁, 𑀇𑀲𑁆𑀲𑀸𑀯𑀸𑀤𑁂𑀦 𑀭𑁄𑀲𑀬𑁂;

𑀪𑀢𑁆𑀢𑀼 𑀘 𑀕𑀭𑀼𑀦𑁄 𑀲𑀩𑁆𑀩𑁂, 𑀧𑀝𑀺𑀧𑀽𑀚𑁂𑀢𑀺 𑀧𑀡𑁆𑀟𑀺𑀢𑀸.

‘‘𑀉𑀝𑁆𑀞𑀸𑀳𑀺𑀓𑀸 𑀅𑀦𑀮𑀲𑀸, 𑀲𑀗𑁆𑀕𑀳𑀺𑀢𑀧𑀭𑀺𑀚𑁆𑀚𑀦𑀸;

𑀪𑀢𑁆𑀢𑀼 𑀫𑀦𑀸𑀧𑀁 𑀘𑀭𑀢𑀺, 𑀲𑀫𑁆𑀪𑀢𑀁 𑀅𑀦𑀼𑀭𑀓𑁆𑀔𑀢𑀺.

‘‘𑀬𑀸 𑀏𑀯𑀁 𑀯𑀢𑁆𑀢𑀢𑀺 𑀦𑀸𑀭𑀻, 𑀪𑀢𑁆𑀢𑀼 𑀙𑀦𑁆𑀤𑀯𑀲𑀸𑀦𑀼𑀕𑀸;

𑀫𑀦𑀸𑀧𑀸 𑀦𑀸𑀫 𑀢𑁂 [𑀫𑀦𑀸𑀧𑀓𑀸𑀬𑀺𑀓𑀸 (𑀲𑀻. 𑀓.)] 𑀤𑁂𑀯𑀸, 𑀬𑀢𑁆𑀣 𑀲𑀸 𑀉𑀧𑀧𑀚𑁆𑀚𑀢𑀻’’𑀢𑀺. 𑀲𑀢𑁆𑀢𑀫𑀁;