𑁩. 𑀤𑀸𑀦𑀯𑀢𑁆𑀣𑀼𑀲𑀼𑀢𑁆𑀢𑀁

𑁩𑁩. ‘‘𑀅𑀝𑁆𑀞𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑀸𑀦𑀯𑀢𑁆𑀣𑀽𑀦𑀺. 𑀓𑀢𑀫𑀸𑀦𑀺 𑀅𑀝𑁆𑀞? 𑀙𑀦𑁆𑀤𑀸 𑀤𑀸𑀦𑀁 𑀤𑁂𑀢𑀺, 𑀤𑁄𑀲𑀸 𑀤𑀸𑀦𑀁 𑀤𑁂𑀢𑀺, 𑀫𑁄𑀳𑀸 𑀤𑀸𑀦𑀁 𑀤𑁂𑀢𑀺, 𑀪𑀬𑀸 𑀤𑀸𑀦𑀁 𑀤𑁂𑀢𑀺, ‘𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀧𑀺𑀢𑀼𑀧𑀺𑀢𑀸𑀫𑀳𑁂𑀳𑀺, 𑀦𑀸𑀭𑀳𑀸𑀫𑀺 𑀧𑁄𑀭𑀸𑀡𑀁 𑀓𑀼𑀮𑀯𑀁𑀲𑀁 𑀳𑀸𑀧𑁂𑀢𑀼’𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺, ‘𑀇𑀫𑀸𑀳𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀸𑀫𑀻’𑀢𑀺 𑀤𑀸𑀦𑀁 𑀤𑁂𑀢𑀺, ‘𑀇𑀫𑀁 𑀫𑁂 𑀤𑀸𑀦𑀁 𑀤𑀤𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀅𑀢𑁆𑀢𑀫𑀦𑀢𑀸 𑀲𑁄𑀫𑀦𑀲𑁆𑀲𑀁 𑀉𑀧𑀚𑀸𑀬𑀢𑀻’𑀢𑀺 𑀤𑀸𑀦𑀁 𑀤𑁂𑀢𑀺, 𑀘𑀺𑀢𑁆𑀢𑀸𑀮𑀗𑁆𑀓𑀸𑀭𑀘𑀺𑀢𑁆𑀢𑀧𑀭𑀺𑀓𑁆𑀔𑀸𑀭𑀢𑁆𑀣𑀁 𑀤𑀸𑀦𑀁 𑀤𑁂𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀤𑀸𑀦𑀯𑀢𑁆𑀣𑀽𑀦𑀻’’𑀢𑀺. 𑀢𑀢𑀺𑀬𑀁.