𑁩. 𑀕𑀳𑀧𑀢𑀺𑀯𑀕𑁆𑀕𑁄

𑁧. 𑀧𑀞𑀫𑀉𑀕𑁆𑀕𑀲𑀼𑀢𑁆𑀢𑀁

𑁨𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 [𑀅𑀩𑁆𑀪𑀼𑀢𑀥𑀫𑁆𑀫𑁂𑀳𑀺 (𑀲𑁆𑀬𑀸. 𑀓.)] 𑀲𑀫𑀦𑁆𑀦𑀸𑀕𑀢𑀁 𑀉𑀕𑁆𑀕𑀁 𑀕𑀳𑀧𑀢𑀺𑀁 𑀯𑁂𑀲𑀸𑀮𑀺𑀓𑀁 𑀥𑀸𑀭𑁂𑀣𑀸’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀉𑀕𑁆𑀕𑀲𑁆𑀲 𑀕𑀳𑀧𑀢𑀺𑀦𑁄 𑀯𑁂𑀲𑀸𑀮𑀺𑀓𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀉𑀕𑁆𑀕𑁄 𑀕𑀳𑀧𑀢𑀺 𑀯𑁂𑀲𑀸𑀮𑀺𑀓𑁄 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀉𑀕𑁆𑀕𑀁 𑀕𑀳𑀧𑀢𑀺𑀁 𑀯𑁂𑀲𑀸𑀮𑀺𑀓𑀁 𑀲𑁄 𑀪𑀺𑀓𑁆𑀔𑀼 𑀏𑀢𑀤𑀯𑁄𑀘 𑁋

‘‘𑀅𑀝𑁆𑀞𑀳𑀺 𑀔𑁄 𑀢𑁆𑀯𑀁, 𑀕𑀳𑀧𑀢𑀺, 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄. 𑀓𑀢𑀫𑁂 𑀢𑁂, 𑀕𑀳𑀧𑀢𑀺, 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀬𑁂𑀳𑀺 𑀢𑁆𑀯𑀁 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄’’𑀢𑀺? ‘‘𑀦 𑀔𑁄 𑀅𑀳𑀁, 𑀪𑀦𑁆𑀢𑁂, 𑀚𑀸𑀦𑀸𑀫𑀺 𑁋 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄𑀢𑀺. 𑀅𑀧𑀺 𑀘, 𑀪𑀦𑁆𑀢𑁂, 𑀬𑁂 𑀫𑁂 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀲𑀼𑀡𑁄𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀕𑀳𑀧𑀢𑀻’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀉𑀕𑁆𑀕𑀲𑁆𑀲 𑀕𑀳𑀧𑀢𑀺𑀦𑁄 𑀯𑁂𑀲𑀸𑀮𑀺𑀓𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀉𑀕𑁆𑀕𑁄 𑀕𑀳𑀧𑀢𑀺 𑀯𑁂𑀲𑀸𑀮𑀺𑀓𑁄 𑀏𑀢𑀤𑀯𑁄𑀘 𑁋 ‘‘𑀬𑀤𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀧𑀞𑀫𑀁 𑀤𑀽𑀭𑀢𑁄𑀯 𑀅𑀤𑁆𑀤𑀲𑀁; 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀫𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀺. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀧𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺’’.

‘‘𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀧𑀲𑀦𑁆𑀦𑀘𑀺𑀢𑁆𑀢𑁄 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀺𑀁. 𑀢𑀲𑁆𑀲 𑀫𑁂 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁; 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀫𑀁 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀮𑁆𑀮𑀘𑀺𑀢𑁆𑀢𑀁 𑀫𑀼𑀤𑀼𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁 𑀉𑀤𑀕𑁆𑀕𑀘𑀺𑀢𑁆𑀢𑀁 𑀧𑀲𑀦𑁆𑀦𑀘𑀺𑀢𑁆𑀢𑀁, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁, 𑀲𑀫𑀼𑀤𑀬𑀁, 𑀦𑀺𑀭𑁄𑀥𑀁, 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄 𑀫𑁂 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀢𑀢𑁆𑀣𑁂𑀯 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀅𑀕𑀫𑀸𑀲𑀺𑀁, 𑀩𑁆𑀭𑀳𑁆𑀫𑀘𑀭𑀺𑀬𑀧𑀜𑁆𑀘𑀫𑀸𑀦𑀺 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑀺𑀁. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀤𑀼𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀘𑀢𑀲𑁆𑀲𑁄 𑀓𑁄𑀫𑀸𑀭𑀺𑀬𑁄 𑀧𑀚𑀸𑀧𑀢𑀺𑀬𑁄 𑀅𑀳𑁂𑀲𑀼𑀁. 𑀅𑀣 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀬𑁂𑀦 𑀢𑀸 𑀧𑀚𑀸𑀧𑀢𑀺𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸 𑀧𑀚𑀸𑀧𑀢𑀺𑀬𑁄 𑀏𑀢𑀤𑀯𑀘𑀁 𑁋 ‘𑀫𑀬𑀸 𑀔𑁄, 𑀪𑀕𑀺𑀦𑀺𑀬𑁄, 𑀩𑁆𑀭𑀳𑁆𑀫𑀘𑀭𑀺𑀬𑀧𑀜𑁆𑀘𑀫𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 [𑀲𑀫𑀸𑀤𑀺𑀡𑁆𑀡𑀸𑀦𑀺 (𑀲𑀻. 𑀓.)]. 𑀬𑀸 𑀇𑀘𑁆𑀙𑀢𑀺 𑀲𑀸 𑀇𑀥𑁂𑀯 𑀪𑁄𑀕𑁂 𑀘 𑀪𑀼𑀜𑁆𑀚𑀢𑀼 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁄𑀢𑀼, 𑀲𑀓𑀸𑀦𑀺 𑀯𑀸 𑀜𑀸𑀢𑀺𑀓𑀼𑀮𑀸𑀦𑀺 𑀕𑀘𑁆𑀙𑀢𑀼. 𑀳𑁄𑀢𑀺 𑀯𑀸 𑀧𑀦 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑁄, 𑀓𑀲𑁆𑀲 𑀯𑁄 𑀤𑀫𑁆𑀫𑀻’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀲𑀸, 𑀪𑀦𑁆𑀢𑁂, 𑀚𑁂𑀝𑁆𑀞𑀸 𑀧𑀚𑀸𑀧𑀢𑀺 𑀫𑀁 𑀏𑀢𑀤𑀯𑁄𑀘 𑁋 ‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀫𑀁, 𑀅𑀬𑁆𑀬𑀧𑀼𑀢𑁆𑀢, 𑀧𑀼𑀭𑀺𑀲𑀲𑁆𑀲 𑀤𑁂𑀳𑀻’𑀢𑀺. 𑀅𑀣 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑀁 𑀧𑀼𑀭𑀺𑀲𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀧𑀚𑀸𑀧𑀢𑀺𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀪𑀺𑀗𑁆𑀕𑀸𑀭𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀑𑀡𑁄𑀚𑁂𑀲𑀺𑀁. 𑀓𑁄𑀫𑀸𑀭𑀺𑀁 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀤𑀸𑀭𑀁 𑀧𑀭𑀺𑀘𑁆𑀘𑀚𑀦𑁆𑀢𑁄 𑀦𑀸𑀪𑀺𑀚𑀸𑀦𑀸𑀫𑀺 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀢𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀲𑀁𑀯𑀺𑀚𑁆𑀚𑀦𑁆𑀢𑀺 𑀔𑁄 𑀧𑀦 𑀫𑁂, 𑀪𑀦𑁆𑀢𑁂, 𑀓𑀼𑀮𑁂 𑀪𑁄𑀕𑀸. 𑀢𑁂 𑀘 𑀔𑁄 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀸 𑀲𑀻𑀮𑀯𑀦𑁆𑀢𑁂𑀳𑀺 𑀓𑀮𑁆𑀬𑀸𑀡𑀥𑀫𑁆𑀫𑁂𑀳𑀺. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀘𑀢𑀼𑀢𑁆𑀣𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀬𑀁 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀁 𑀧𑀬𑀺𑀭𑀼𑀧𑀸𑀲𑀸𑀫𑀺; 𑀲𑀓𑁆𑀓𑀘𑁆𑀘𑀁𑀬𑁂𑀯 𑀧𑀬𑀺𑀭𑀼𑀧𑀸𑀲𑀸𑀫𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀧𑀜𑁆𑀘𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀲𑁄 𑀘𑁂, 𑀪𑀦𑁆𑀢𑁂, 𑀫𑁂 𑀆𑀬𑀲𑁆𑀫𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺; 𑀲𑀓𑁆𑀓𑀘𑁆𑀘𑀁𑀬𑁂𑀯 𑀲𑀼𑀡𑁄𑀫𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁. 𑀦𑁄 𑀘𑁂 𑀫𑁂 𑀲𑁄 𑀆𑀬𑀲𑁆𑀫𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀅𑀳𑀫𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂 𑀙𑀝𑁆𑀞𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦 𑀫𑀁, 𑀪𑀦𑁆𑀢𑁂, 𑀤𑁂𑀯𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺 𑁋 ‘𑀲𑁆𑀯𑀸𑀓𑁆𑀔𑀸𑀢𑁄, 𑀕𑀳𑀧𑀢𑀺, 𑀪𑀕𑀯𑀢𑀸 𑀥𑀫𑁆𑀫𑁄’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁, 𑀪𑀦𑁆𑀢𑁂, 𑀢𑀸 𑀤𑁂𑀯𑀢𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀯𑀤𑁂𑀬𑁆𑀬𑀸𑀣 𑀯𑀸 𑀏𑀯𑀁 𑀔𑁄 𑀢𑀼𑀫𑁆𑀳𑁂 𑀤𑁂𑀯𑀢𑀸 𑀦𑁄 𑀯𑀸 𑀯𑀤𑁂𑀬𑁆𑀬𑀸𑀣, 𑀅𑀣 𑀔𑁄 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄’𑀢𑀺. 𑀦 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀅𑀪𑀺𑀚𑀸𑀦𑀸𑀫𑀺 𑀢𑀢𑁄𑀦𑀺𑀤𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀦𑁆𑀦𑀢𑀺𑀁 [𑀉𑀡𑁆𑀡𑀢𑀺𑀁 (𑀓.) 𑀥. 𑀲. 𑁧𑁧𑁨𑁧; 𑀯𑀺𑀪. 𑁮𑁪𑁩, 𑁮𑁪𑁫 𑀧𑀲𑁆𑀲𑀺𑀢𑀩𑁆𑀩𑀁] 𑁋 ‘𑀫𑀁 𑀯𑀸 𑀤𑁂𑀯𑀢𑀸 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀅𑀳𑀁 𑀯𑀸 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀮𑁆𑀮𑀧𑀸𑀫𑀻’𑀢𑀺. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀲𑀢𑁆𑀢𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀬𑀸𑀦𑀺𑀫𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑀸 𑀤𑁂𑀲𑀺𑀢𑀸𑀦𑀺 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺, 𑀦𑀸𑀳𑀁 𑀢𑁂𑀲𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑀺 𑀅𑀧𑁆𑀧𑀳𑀻𑀦𑀁 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀅𑀝𑁆𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺. 𑀇𑀫𑁂 𑀔𑁄 𑀫𑁂, 𑀪𑀦𑁆𑀢𑁂, 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀦 𑀘 𑀔𑁄 𑀅𑀳𑀁 𑀚𑀸𑀦𑀸𑀫𑀺 𑁋 𑀓𑀢𑀫𑁂𑀳𑀺 𑀘𑀸𑀳𑀁 [𑀓𑀢𑀫𑁂𑀳𑀺𑀧𑀳𑀁 (𑀲𑀻.), 𑀓𑀢𑀫𑁂𑀳𑀺𑀧𑀸𑀳𑀁 (𑀧𑀻. 𑀓.)] 𑀅𑀝𑁆𑀞𑀳𑀺 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄’’𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀉𑀕𑁆𑀕𑀲𑁆𑀲 𑀕𑀳𑀧𑀢𑀺𑀦𑁄 𑀯𑁂𑀲𑀸𑀮𑀺𑀓𑀲𑁆𑀲 𑀦𑀺𑀯𑁂𑀲𑀦𑁂 𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀬𑀸𑀯𑀢𑀓𑁄 𑀅𑀳𑁄𑀲𑀺 𑀉𑀕𑁆𑀕𑁂𑀦 𑀕𑀳𑀧𑀢𑀺𑀦𑀸 𑀯𑁂𑀲𑀸𑀮𑀺𑀓𑁂𑀦 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄, 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺.

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀼! 𑀬𑀣𑀸 𑀢𑀁 𑀉𑀕𑁆𑀕𑁄 𑀕𑀳𑀧𑀢𑀺 𑀯𑁂𑀲𑀸𑀮𑀺𑀓𑁄 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬, 𑀇𑀫𑁂𑀳𑁂𑀯 𑀔𑁄, 𑀪𑀺𑀓𑁆𑀔𑀼, 𑀅𑀝𑁆𑀞𑀳𑀺 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀕𑁆𑀕𑁄 𑀕𑀳𑀧𑀢𑀺 𑀯𑁂𑀲𑀸𑀮𑀺𑀓𑁄 𑀫𑀬𑀸 𑀩𑁆𑀬𑀸𑀓𑀢𑁄. 𑀇𑀫𑁂𑀳𑀺 𑀘 𑀧𑀦, 𑀪𑀺𑀓𑁆𑀔𑀼, 𑀅𑀝𑁆𑀞𑀳𑀺 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀉𑀕𑁆𑀕𑀁 𑀕𑀳𑀧𑀢𑀺𑀁 𑀯𑁂𑀲𑀸𑀮𑀺𑀓𑀁 𑀥𑀸𑀭𑁂𑀳𑀻’’𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀉𑀕𑁆𑀕𑀲𑀼𑀢𑁆𑀢𑀁

𑁨𑁨. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑀚𑁆𑀚𑀻𑀲𑀼 𑀯𑀺𑀳𑀭𑀢𑀺 𑀳𑀢𑁆𑀣𑀺𑀕𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀉𑀕𑁆𑀕𑀁 𑀕𑀳𑀧𑀢𑀺𑀁 𑀳𑀢𑁆𑀣𑀺𑀕𑀸𑀫𑀓𑀁 𑀥𑀸𑀭𑁂𑀣𑀸’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀉𑀕𑁆𑀕𑀲𑁆𑀲 𑀕𑀳𑀧𑀢𑀺𑀦𑁄 𑀳𑀢𑁆𑀣𑀺𑀕𑀸𑀫𑀓𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀉𑀕𑁆𑀕𑁄 𑀕𑀳𑀧𑀢𑀺 𑀳𑀢𑁆𑀣𑀺𑀕𑀸𑀫𑀓𑁄 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀉𑀕𑁆𑀕𑀁 𑀕𑀳𑀧𑀢𑀺𑀁 𑀳𑀢𑁆𑀣𑀺𑀕𑀸𑀫𑀓𑀁 𑀲𑁄 𑀪𑀺𑀓𑁆𑀔𑀼 𑀏𑀢𑀤𑀯𑁄𑀘 𑁋 ‘‘𑀅𑀝𑁆𑀞𑀳𑀺 𑀔𑁄 𑀢𑁆𑀯𑀁, 𑀕𑀳𑀧𑀢𑀺, 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄. 𑀓𑀢𑀫𑁂 𑀢𑁂, 𑀕𑀳𑀧𑀢𑀺, 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀬𑁂𑀳𑀺 𑀢𑁆𑀯𑀁 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄’’𑀢𑀺?

‘‘𑀦 𑀔𑁄 𑀅𑀳𑀁, 𑀪𑀦𑁆𑀢𑁂, 𑀚𑀸𑀦𑀸𑀫𑀺 𑁋 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄𑀢𑀺. 𑀅𑀧𑀺 𑀘, 𑀪𑀦𑁆𑀢𑁂, 𑀬𑁂 𑀫𑁂 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀕𑀳𑀧𑀢𑀻’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀉𑀕𑁆𑀕𑀲𑁆𑀲 𑀕𑀳𑀧𑀢𑀺𑀦𑁄 𑀳𑀢𑁆𑀣𑀺𑀕𑀸𑀫𑀓𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀉𑀕𑁆𑀕𑁄 𑀕𑀳𑀧𑀢𑀺 𑀳𑀢𑁆𑀣𑀺𑀕𑀸𑀫𑀓𑁄 𑀏𑀢𑀤𑀯𑁄𑀘 𑁋 ‘‘𑀬𑀤𑀸𑀳𑀁, 𑀪𑀦𑁆𑀢𑁂, 𑀦𑀸𑀕𑀯𑀦𑁂 𑀧𑀭𑀺𑀘𑀭𑀦𑁆𑀢𑁄 𑀪𑀕𑀯𑀦𑁆𑀢𑀁 𑀧𑀞𑀫𑀁 𑀤𑀽𑀭𑀢𑁄𑀯 𑀅𑀤𑁆𑀤𑀲𑀁; 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀫𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀺, 𑀲𑀼𑀭𑀸𑀫𑀤𑁄 𑀘 𑀧𑀳𑀻𑀬𑀺. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀧𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀧𑀲𑀦𑁆𑀦𑀘𑀺𑀢𑁆𑀢𑁄 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀺𑀁. 𑀢𑀲𑁆𑀲 𑀫𑁂 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁; 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀫𑀁 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀮𑁆𑀮𑀘𑀺𑀢𑁆𑀢𑀁 𑀫𑀼𑀤𑀼𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁 𑀉𑀤𑀕𑁆𑀕𑀘𑀺𑀢𑁆𑀢𑀁 𑀧𑀲𑀦𑁆𑀦𑀘𑀺𑀢𑁆𑀢𑀁, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁, 𑀲𑀫𑀼𑀤𑀬𑀁, 𑀦𑀺𑀭𑁄𑀥𑀁, 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄 𑀫𑁂 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀢𑀢𑁆𑀣𑁂𑀯 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀅𑀕𑀫𑀸𑀲𑀺𑀁, 𑀩𑁆𑀭𑀳𑁆𑀫𑀘𑀭𑀺𑀬𑀧𑀜𑁆𑀘𑀫𑀸𑀦𑀺 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑀺𑀁. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀤𑀼𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀘𑀢𑀲𑁆𑀲𑁄 𑀓𑁄𑀫𑀸𑀭𑀺𑀬𑁄 𑀧𑀚𑀸𑀧𑀢𑀺𑀬𑁄 𑀅𑀳𑁂𑀲𑀼𑀁. 𑀅𑀣 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀬𑁂𑀦 𑀢𑀸 𑀧𑀚𑀸𑀧𑀢𑀺𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸 𑀧𑀚𑀸𑀧𑀢𑀺𑀬𑁄 𑀏𑀢𑀤𑀯𑀘𑀁 𑁋 ‘𑀫𑀬𑀸 𑀔𑁄, 𑀪𑀕𑀺𑀦𑀺𑀬𑁄, 𑀩𑁆𑀭𑀳𑁆𑀫𑀘𑀭𑀺𑀬𑀧𑀜𑁆𑀘𑀫𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺. 𑀬𑀸 𑀇𑀘𑁆𑀙𑀢𑀺 𑀲𑀸 𑀇𑀥𑁂𑀯 𑀪𑁄𑀕𑁂 𑀘 𑀪𑀼𑀜𑁆𑀚𑀢𑀼 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁄𑀢𑀼, 𑀲𑀓𑀸𑀦𑀺 𑀯𑀸 𑀜𑀸𑀢𑀺𑀓𑀼𑀮𑀸𑀦𑀺 𑀕𑀘𑁆𑀙𑀢𑀼. 𑀳𑁄𑀢𑀺 𑀯𑀸 𑀧𑀦 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑁄, 𑀓𑀲𑁆𑀲 𑀯𑁄 𑀤𑀫𑁆𑀫𑀻’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀲𑀸, 𑀪𑀦𑁆𑀢𑁂, 𑀚𑁂𑀝𑁆𑀞𑀸 𑀧𑀚𑀸𑀧𑀢𑀺 𑀫𑀁 𑀏𑀢𑀤𑀯𑁄𑀘 𑁋 ‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀫𑀁, 𑀅𑀬𑁆𑀬𑀧𑀼𑀢𑁆𑀢, 𑀧𑀼𑀭𑀺𑀲𑀲𑁆𑀲 𑀤𑁂𑀳𑀻’𑀢𑀺. 𑀅𑀣 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑀁 𑀧𑀼𑀭𑀺𑀲𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀧𑀚𑀸𑀧𑀢𑀺𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀪𑀺𑀗𑁆𑀕𑀸𑀭𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀑𑀡𑁄𑀚𑁂𑀲𑀺𑀁. 𑀓𑁄𑀫𑀸𑀭𑀺𑀁 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀤𑀸𑀭𑀁 𑀧𑀭𑀺𑀘𑁆𑀘𑀚𑀦𑁆𑀢𑁄 𑀦𑀸𑀪𑀺𑀚𑀸𑀦𑀸𑀫𑀺 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀢𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀲𑀁𑀯𑀺𑀚𑁆𑀚𑀦𑁆𑀢𑀺 𑀔𑁄 𑀧𑀦 𑀫𑁂, 𑀪𑀦𑁆𑀢𑁂, 𑀓𑀼𑀮𑁂 𑀪𑁄𑀕𑀸. 𑀢𑁂 𑀘 𑀔𑁄 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀸 𑀲𑀻𑀮𑀯𑀦𑁆𑀢𑁂𑀳𑀺 𑀓𑀮𑁆𑀬𑀸𑀡𑀥𑀫𑁆𑀫𑁂𑀳𑀺. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀘𑀢𑀼𑀢𑁆𑀣𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀬𑀁 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀁 𑀧𑀬𑀺𑀭𑀼𑀧𑀸𑀲𑀸𑀫𑀺; 𑀲𑀓𑁆𑀓𑀘𑁆𑀘𑀁𑀬𑁂𑀯 𑀧𑀬𑀺𑀭𑀼𑀧𑀸𑀲𑀸𑀫𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁. 𑀲𑁄 𑀘𑁂 𑀫𑁂 𑀆𑀬𑀲𑁆𑀫𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺; 𑀲𑀓𑁆𑀓𑀘𑁆𑀘𑀁𑀬𑁂𑀯 𑀲𑀼𑀡𑁄𑀫𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁. 𑀦𑁄 𑀘𑁂 𑀫𑁂 𑀲𑁄 𑀆𑀬𑀲𑁆𑀫𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀅𑀳𑀫𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀧𑀜𑁆𑀘𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦, 𑀪𑀦𑁆𑀢𑁂, 𑀲𑀗𑁆𑀖𑁂 𑀦𑀺𑀫𑀦𑁆𑀢𑀺𑀢𑁂 𑀤𑁂𑀯𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺 𑁋 ‘𑀅𑀲𑀼𑀓𑁄, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀅𑀲𑀼𑀓𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀅𑀲𑀼𑀓𑁄 𑀓𑀸𑀬𑀲𑀓𑁆𑀔𑀻 𑀅𑀲𑀼𑀓𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 [𑀤𑀺𑀝𑁆𑀞𑀧𑁆𑀧𑀢𑁆𑀢𑁄 (𑀓.)] 𑀅𑀲𑀼𑀓𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀅𑀲𑀼𑀓𑁄 𑀥𑀫𑁆𑀫𑀸𑀦𑀼𑀲𑀸𑀭𑀻 𑀅𑀲𑀼𑀓𑁄 𑀲𑀤𑁆𑀥𑀸𑀦𑀼𑀲𑀸𑀭𑀻 𑀅𑀲𑀼𑀓𑁄 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀅𑀲𑀼𑀓𑁄 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄’𑀢𑀺. 𑀲𑀗𑁆𑀖𑀁 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀧𑀭𑀺𑀯𑀺𑀲𑀦𑁆𑀢𑁄 𑀦𑀸𑀪𑀺𑀚𑀸𑀦𑀸𑀫𑀺 𑀏𑀯𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑁋 ‘𑀇𑀫𑀲𑁆𑀲 𑀯𑀸 𑀣𑁄𑀓𑀁 𑀤𑁂𑀫𑀺 𑀇𑀫𑀲𑁆𑀲 𑀯𑀸 𑀩𑀳𑀼𑀓’𑀦𑁆𑀢𑀺. 𑀅𑀣 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀲𑀫𑀘𑀺𑀢𑁆𑀢𑁄𑀯 𑀤𑁂𑀫𑀺. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀙𑀝𑁆𑀞𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦 𑀫𑀁, 𑀪𑀦𑁆𑀢𑁂, 𑀤𑁂𑀯𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺 𑁋 ‘𑀲𑁆𑀯𑀸𑀓𑁆𑀔𑀸𑀢𑁄, 𑀕𑀳𑀧𑀢𑀺, 𑀪𑀕𑀯𑀢𑀸 𑀥𑀫𑁆𑀫𑁄’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁, 𑀪𑀦𑁆𑀢𑁂, 𑀢𑀸 𑀤𑁂𑀯𑀢𑀸 𑀏𑀯𑀁 𑀯𑀤𑁂𑀫𑀺 𑁋 ‘𑀯𑀤𑁂𑀬𑁆𑀬𑀸𑀣 𑀯𑀸 𑀏𑀯𑀁 𑀔𑁄 𑀢𑀼𑀫𑁆𑀳𑁂 𑀤𑁂𑀯𑀢𑀸 𑀦𑁄 𑀯𑀸 𑀯𑀤𑁂𑀬𑁆𑀬𑀸𑀣, 𑀅𑀣 𑀔𑁄 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄’𑀢𑀺. 𑀦 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀅𑀪𑀺𑀚𑀸𑀦𑀸𑀫𑀺 𑀢𑀢𑁄𑀦𑀺𑀤𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀦𑁆𑀦𑀢𑀺𑀁 𑁋 ‘𑀫𑀁 𑀢𑀸 𑀤𑁂𑀯𑀢𑀸 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀅𑀳𑀁 𑀯𑀸 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑀮𑁆𑀮𑀧𑀸𑀫𑀻’𑀢𑀺. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀲𑀢𑁆𑀢𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺.

‘‘𑀲𑀘𑁂 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀧𑀞𑀫𑀢𑀭𑀁 𑀓𑀸𑀮𑀁 𑀓𑀭𑁂𑀬𑁆𑀬𑀁, 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁 𑀬𑀁 𑀫𑀁 𑀪𑀕𑀯𑀸 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀦𑀢𑁆𑀣𑀺 𑀢𑀁 𑀲𑀁𑀬𑁄𑀚𑀦𑀁 𑀬𑁂𑀦 𑀲𑀁𑀬𑀼𑀢𑁆𑀢𑁄 𑀉𑀕𑁆𑀕𑁄 𑀕𑀳𑀧𑀢𑀺 𑀳𑀢𑁆𑀣𑀺𑀕𑀸𑀫𑀓𑁄 𑀧𑀼𑀦 𑀇𑀫𑀁 𑀮𑁄𑀓𑀁 𑀆𑀕𑀘𑁆𑀙𑁂𑀬𑁆𑀬𑀸’𑀢𑀺. 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀅𑀝𑁆𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀁𑀯𑀺𑀚𑁆𑀚𑀢𑀺. 𑀇𑀫𑁂 𑀔𑁄 𑀫𑁂, 𑀪𑀦𑁆𑀢𑁂, 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀦 𑀘 𑀔𑁄 𑀅𑀳𑀁 𑀚𑀸𑀦𑀸𑀫𑀺 𑁋 𑀓𑀢𑀫𑁂𑀳𑀺 𑀘𑀸𑀳𑀁 𑀅𑀝𑁆𑀞𑀳𑀺 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄’’𑀢𑀺.

‘‘𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀉𑀕𑁆𑀕𑀲𑁆𑀲 𑀕𑀳𑀧𑀢𑀺𑀦𑁄 𑀳𑀢𑁆𑀣𑀺𑀕𑀸𑀫𑀓𑀲𑁆𑀲 𑀦𑀺𑀯𑁂𑀲𑀦𑁂 𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀬𑀸𑀯𑀢𑀓𑁄 𑀅𑀳𑁄𑀲𑀺 𑀉𑀕𑁆𑀕𑁂𑀦 𑀕𑀳𑀧𑀢𑀺𑀦𑀸 𑀳𑀢𑁆𑀣𑀺𑀕𑀸𑀫𑀓𑁂𑀦 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄, 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺.

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀼! 𑀬𑀣𑀸 𑀢𑀁 𑀉𑀕𑁆𑀕𑁄 𑀕𑀳𑀧𑀢𑀺 𑀳𑀢𑁆𑀣𑀺𑀕𑀸𑀫𑀓𑁄 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬, 𑀇𑀫𑁂𑀳𑁂𑀯 𑀔𑁄 𑀪𑀺𑀓𑁆𑀔𑀼, 𑀅𑀝𑁆𑀞𑀳𑀺 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀕𑁆𑀕𑁄 𑀕𑀳𑀧𑀢𑀺 𑀳𑀢𑁆𑀣𑀺𑀕𑀸𑀫𑀓𑁄 𑀫𑀬𑀸 𑀩𑁆𑀬𑀸𑀓𑀢𑁄. 𑀇𑀫𑁂𑀳𑀺 𑀘 𑀧𑀦, 𑀪𑀺𑀓𑁆𑀔𑀼, 𑀅𑀝𑁆𑀞𑀳𑀺 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀉𑀕𑁆𑀕𑀁 𑀕𑀳𑀧𑀢𑀺𑀁 𑀳𑀢𑁆𑀣𑀺𑀕𑀸𑀫𑀓𑀁 𑀥𑀸𑀭𑁂𑀳𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀧𑀞𑀫𑀳𑀢𑁆𑀣𑀓𑀲𑀼𑀢𑁆𑀢𑀁

𑁨𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀢𑀳𑀺, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀳𑀢𑁆𑀣𑀓𑀁 𑀆𑀴𑀯𑀓𑀁 𑀥𑀸𑀭𑁂𑀣. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀲𑀤𑁆𑀥𑁄 𑀳𑀺, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄; 𑀲𑀻𑀮𑀯𑀸, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄; 𑀳𑀺𑀭𑀻𑀫𑀸, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄; 𑀑𑀢𑁆𑀢𑀧𑁆𑀧𑀻, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄; 𑀩𑀳𑀼𑀲𑁆𑀲𑀼𑀢𑁄, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄; 𑀘𑀸𑀕𑀯𑀸, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄; 𑀧𑀜𑁆𑀜𑀯𑀸, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀳𑀺 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀳𑀢𑁆𑀣𑀓𑀁 𑀆𑀴𑀯𑀓𑀁 𑀥𑀸𑀭𑁂𑀣𑀸’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀳𑀢𑁆𑀣𑀓𑀲𑁆𑀲 𑀆𑀴𑀯𑀓𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀳𑀢𑁆𑀣𑀓𑁄 𑀆𑀴𑀯𑀓𑁄 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀳𑀢𑁆𑀣𑀓𑀁 𑀆𑀴𑀯𑀓𑀁 𑀲𑁄 𑀪𑀺𑀓𑁆𑀔𑀼 𑀏𑀢𑀤𑀯𑁄𑀘 𑁋

‘‘𑀲𑀢𑁆𑀢𑀳𑀺 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? ‘𑀲𑀤𑁆𑀥𑁄, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄; 𑀲𑀻𑀮𑀯𑀸…𑀧𑁂… 𑀳𑀺𑀭𑀺𑀫𑀸… 𑀑𑀢𑁆𑀢𑀧𑁆𑀧𑀻… 𑀩𑀳𑀼𑀲𑁆𑀲𑀼𑀢𑁄… 𑀘𑀸𑀕𑀯𑀸… 𑀧𑀜𑁆𑀜𑀯𑀸, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄’𑀢𑀺. 𑀇𑀫𑁂𑀳𑀺 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀲𑀢𑁆𑀢𑀳𑀺 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄’’𑀢𑀺. ‘‘𑀓𑀘𑁆𑀘𑀺𑀢𑁆𑀣, 𑀪𑀦𑁆𑀢𑁂, 𑀦 𑀓𑁄𑀘𑀺 𑀕𑀺𑀳𑀻 𑀅𑀳𑁄𑀲𑀺 𑀑𑀤𑀸𑀢𑀯𑀲𑀦𑁄’’𑀢𑀺? ‘‘𑀦 𑀳𑁂𑀢𑁆𑀣, 𑀆𑀯𑀼𑀲𑁄, 𑀓𑁄𑀘𑀺 𑀕𑀺𑀳𑀻 𑀅𑀳𑁄𑀲𑀺 𑀑𑀤𑀸𑀢𑀯𑀲𑀦𑁄’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂, 𑀬𑀤𑁂𑀢𑁆𑀣 𑀦 𑀓𑁄𑀘𑀺 𑀕𑀺𑀳𑀻 𑀅𑀳𑁄𑀲𑀺 𑀑𑀤𑀸𑀢𑀯𑀲𑀦𑁄’’𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀳𑀢𑁆𑀣𑀓𑀲𑁆𑀲 𑀆𑀴𑀯𑀓𑀲𑁆𑀲 𑀦𑀺𑀯𑁂𑀲𑀦𑁂 𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀳𑀢𑁆𑀣𑀓𑀲𑁆𑀲 𑀆𑀴𑀯𑀓𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀁. 𑀅𑀣 𑀔𑁄, 𑀪𑀦𑁆𑀢𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀳𑀢𑁆𑀣𑀓𑀁 𑀆𑀴𑀯𑀓𑀁 𑀏𑀢𑀤𑀯𑀘𑀁 𑁋 ‘𑀲𑀢𑁆𑀢𑀳𑀺 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀲𑀤𑁆𑀥𑁄, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄; 𑀲𑀻𑀮𑀯𑀸…𑀧𑁂… 𑀳𑀺𑀭𑀺𑀫𑀸… 𑀑𑀢𑁆𑀢𑀧𑁆𑀧𑀻… 𑀩𑀳𑀼𑀲𑁆𑀲𑀼𑀢𑁄… 𑀘𑀸𑀕𑀯𑀸… 𑀧𑀜𑁆𑀜𑀯𑀸, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄𑀢𑀺. 𑀇𑀫𑁂𑀳𑀺 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀲𑀢𑁆𑀢𑀳𑀺 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄’𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀳𑀢𑁆𑀣𑀓𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀓𑀘𑁆𑀘𑀺𑀢𑁆𑀣, 𑀪𑀦𑁆𑀢𑁂, 𑀦 𑀓𑁄𑀘𑀺 𑀕𑀺𑀳𑀻 𑀅𑀳𑁄𑀲𑀺 𑀑𑀤𑀸𑀢𑀯𑀲𑀦𑁄’𑀢𑀺? ‘𑀦 𑀳𑁂𑀢𑁆𑀣, 𑀆𑀯𑀼𑀲𑁄, 𑀓𑁄𑀘𑀺 𑀕𑀺𑀳𑀻 𑀅𑀳𑁄𑀲𑀺 𑀑𑀤𑀸𑀢𑀯𑀲𑀦𑁄’𑀢𑀺. ‘𑀲𑀸𑀥𑀼, 𑀪𑀦𑁆𑀢𑁂, 𑀬𑀤𑁂𑀢𑁆𑀣 𑀦 𑀓𑁄𑀘𑀺 𑀕𑀺𑀳𑀻 𑀅𑀳𑁄𑀲𑀺 𑀑𑀤𑀸𑀢𑀯𑀲𑀦𑁄’’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀼! 𑀅𑀧𑁆𑀧𑀺𑀘𑁆𑀙𑁄 𑀲𑁄, 𑀪𑀺𑀓𑁆𑀔𑀼, 𑀓𑀼𑀮𑀧𑀼𑀢𑁆𑀢𑁄. 𑀲𑀦𑁆𑀢𑁂𑀬𑁂𑀯 𑀅𑀢𑁆𑀢𑀦𑀺 𑀓𑀼𑀲𑀮𑀥𑀫𑁆𑀫𑁂 𑀦 𑀇𑀘𑁆𑀙𑀢𑀺 𑀧𑀭𑁂𑀳𑀺 𑀜𑀸𑀬𑀫𑀸𑀦𑁂 [𑀧𑀜𑁆𑀜𑀸𑀧𑀬𑀫𑀸𑀦𑁂 (𑀓.)]. 𑀢𑁂𑀦 𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀇𑀫𑀺𑀦𑀸𑀧𑀺 𑀅𑀝𑁆𑀞𑀫𑁂𑀦 𑀅𑀘𑁆𑀙𑀭𑀺𑀬𑁂𑀦 𑀅𑀩𑁆𑀪𑀼𑀢𑁂𑀦 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀁 𑀳𑀢𑁆𑀣𑀓𑀁 𑀆𑀴𑀯𑀓𑀁 𑀥𑀸𑀭𑁂𑀳𑀺, 𑀬𑀤𑀺𑀤𑀁 𑀅𑀧𑁆𑀧𑀺𑀘𑁆𑀙𑀢𑀸𑀬𑀸’’𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀳𑀢𑁆𑀣𑀓𑀲𑀼𑀢𑁆𑀢𑀁

𑁨𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂. 𑀅𑀣 𑀔𑁄 𑀳𑀢𑁆𑀣𑀓𑁄 𑀆𑀴𑀯𑀓𑁄 𑀧𑀜𑁆𑀘𑀫𑀢𑁆𑀢𑁂𑀳𑀺 𑀉𑀧𑀸𑀲𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀳𑀢𑁆𑀣𑀓𑀁 𑀆𑀴𑀯𑀓𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀫𑀳𑀢𑀻 𑀔𑁄 𑀢𑁆𑀬𑀸𑀬𑀁, 𑀳𑀢𑁆𑀣𑀓, 𑀧𑀭𑀺𑀲𑀸. 𑀓𑀣𑀁 𑀧𑀦 𑀢𑁆𑀯𑀁, 𑀳𑀢𑁆𑀣𑀓, 𑀇𑀫𑀁 𑀫𑀳𑀢𑀺𑀁 𑀧𑀭𑀺𑀲𑀁 𑀲𑀗𑁆𑀕𑀡𑁆𑀳𑀸𑀲𑀻’’𑀢𑀺? ‘‘𑀬𑀸𑀦𑀺𑀫𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑀸 𑀤𑁂𑀲𑀺𑀢𑀸𑀦𑀺 [𑀅. 𑀦𑀺. 𑁪.𑁩𑁨; 𑀤𑀻. 𑀦𑀺. 𑁩.𑁩𑁧𑁩] 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺, 𑀢𑁂𑀳𑀸𑀳𑀁 [𑀢𑁂𑀦𑀸𑀳𑀁 (𑀲𑀻.)] 𑀇𑀫𑀁 𑀫𑀳𑀢𑀺𑀁 𑀧𑀭𑀺𑀲𑀁 𑀲𑀗𑁆𑀕𑀡𑁆𑀳𑀸𑀫𑀺. 𑀅𑀳𑀁, 𑀪𑀦𑁆𑀢𑁂, 𑀬𑀁 𑀚𑀸𑀦𑀸𑀫𑀺 𑁋 ‘𑀅𑀬𑀁 𑀤𑀸𑀦𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑁄’𑀢𑀺, 𑀢𑀁 𑀤𑀸𑀦𑁂𑀦 𑀲𑀗𑁆𑀕𑀡𑁆𑀳𑀸𑀫𑀺; 𑀬𑀁 𑀚𑀸𑀦𑀸𑀫𑀺 𑁋 ‘𑀅𑀬𑀁 𑀧𑁂𑀬𑁆𑀬𑀯𑀚𑁆𑀚𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑁄’𑀢𑀺, 𑀢𑀁 𑀧𑁂𑀬𑁆𑀬𑀯𑀚𑁆𑀚𑁂𑀦 𑀲𑀗𑁆𑀕𑀡𑁆𑀳𑀸𑀫𑀺; 𑀬𑀁 𑀚𑀸𑀦𑀸𑀫𑀺 𑁋 ‘𑀅𑀬𑀁 𑀅𑀢𑁆𑀣𑀘𑀭𑀺𑀬𑀸𑀬 𑀲𑀗𑁆𑀕𑀳𑁂𑀢𑀩𑁆𑀩𑁄’𑀢𑀺, 𑀢𑀁 𑀅𑀢𑁆𑀣𑀘𑀭𑀺𑀬𑀸𑀬 𑀲𑀗𑁆𑀕𑀡𑁆𑀳𑀸𑀫𑀺; 𑀬𑀁 𑀚𑀸𑀦𑀸𑀫𑀺 𑁋 ‘𑀅𑀬𑀁 𑀲𑀫𑀸𑀦𑀢𑁆𑀢𑀢𑀸𑀬 𑀲𑀗𑁆𑀕𑀳𑁂𑀢𑀩𑁆𑀩𑁄’𑀢𑀺, 𑀢𑀁 𑀲𑀫𑀸𑀦𑀢𑁆𑀢𑀢𑀸𑀬 𑀲𑀗𑁆𑀕𑀡𑁆𑀳𑀸𑀫𑀺. 𑀲𑀁𑀯𑀺𑀚𑁆𑀚𑀦𑁆𑀢𑀺 𑀔𑁄 𑀧𑀦 𑀫𑁂, 𑀪𑀦𑁆𑀢𑁂, 𑀓𑀼𑀮𑁂 𑀪𑁄𑀕𑀸. 𑀤𑀮𑀺𑀤𑁆𑀤𑀲𑁆𑀲 𑀔𑁄 𑀦𑁄 𑀢𑀣𑀸 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀳𑀢𑁆𑀣𑀓! 𑀬𑁄𑀦𑀺 𑀔𑁄 𑀢𑁆𑀬𑀸𑀬𑀁, 𑀳𑀢𑁆𑀣𑀓, 𑀫𑀳𑀢𑀺𑀁 𑀧𑀭𑀺𑀲𑀁 𑀲𑀗𑁆𑀕𑀳𑁂𑀢𑀼𑀁. 𑀬𑁂 𑀳𑀺 𑀓𑁂𑀘𑀺, 𑀳𑀢𑁆𑀣𑀓, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀫𑀳𑀢𑀺𑀁 𑀧𑀭𑀺𑀲𑀁 𑀲𑀗𑁆𑀕𑀳𑁂𑀲𑀼𑀁, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀫𑀳𑀢𑀺𑀁 𑀧𑀭𑀺𑀲𑀁 𑀲𑀗𑁆𑀕𑀳𑁂𑀲𑀼𑀁. 𑀬𑁂𑀧𑀺 𑀳𑀺 𑀓𑁂𑀘𑀺, 𑀳𑀢𑁆𑀣𑀓, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀫𑀳𑀢𑀺𑀁 𑀧𑀭𑀺𑀲𑀁 𑀲𑀗𑁆𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀫𑀳𑀢𑀺𑀁 𑀧𑀭𑀺𑀲𑀁 𑀲𑀗𑁆𑀕𑀡𑁆𑀳𑀺𑀲𑁆𑀲𑀦𑁆𑀢𑀺. 𑀬𑁂𑀧𑀺 𑀳𑀺 𑀓𑁂𑀘𑀺, 𑀳𑀢𑁆𑀣𑀓, 𑀏𑀢𑀭𑀳𑀺 𑀫𑀳𑀢𑀺𑀁 𑀧𑀭𑀺𑀲𑀁 𑀲𑀗𑁆𑀕𑀡𑁆𑀳𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀫𑀳𑀢𑀺𑀁 𑀧𑀭𑀺𑀲𑀁 𑀲𑀗𑁆𑀕𑀡𑁆𑀳𑀦𑁆𑀢𑀻’’𑀢𑀺.

𑀅𑀣 𑀔𑁄 𑀳𑀢𑁆𑀣𑀓𑁄 𑀆𑀴𑀯𑀓𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀳𑀢𑁆𑀣𑀓𑁂 𑀆𑀴𑀯𑀓𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀳𑀢𑁆𑀣𑀓𑀁 𑀆𑀴𑀯𑀓𑀁 𑀥𑀸𑀭𑁂𑀣. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀲𑀤𑁆𑀥𑁄, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄; 𑀲𑀻𑀮𑀯𑀸, 𑀪𑀺𑀓𑁆𑀔𑀯𑁂…𑀧𑁂… 𑀳𑀺𑀭𑀻𑀫𑀸… 𑀑𑀢𑁆𑀢𑀧𑁆𑀧𑀻… 𑀩𑀳𑀼𑀲𑁆𑀲𑀼𑀢𑁄… 𑀘𑀸𑀕𑀯𑀸… 𑀧𑀜𑁆𑀜𑀯𑀸, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄; 𑀅𑀧𑁆𑀧𑀺𑀘𑁆𑀙𑁄, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀓𑁄 𑀆𑀴𑀯𑀓𑁄. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀺 𑀅𑀘𑁆𑀙𑀭𑀺𑀬𑁂𑀳𑀺 𑀅𑀩𑁆𑀪𑀼𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀳𑀢𑁆𑀣𑀓𑀁 𑀆𑀴𑀯𑀓𑀁 𑀥𑀸𑀭𑁂𑀣𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀫𑀳𑀸𑀦𑀸𑀫𑀲𑀼𑀢𑁆𑀢𑀁

𑁨𑁫. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀳𑁄𑀢𑀻’’𑀢𑀺? ‘‘𑀬𑀢𑁄 𑀔𑁄, 𑀫𑀳𑀸𑀦𑀸𑀫, 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺; 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀳𑁄𑀢𑀻’’𑀢𑀺.

‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀲𑀻𑀮𑀯𑀸 𑀳𑁄𑀢𑀻’’𑀢𑀺? ‘‘𑀬𑀢𑁄 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺; 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀲𑀻𑀮𑀯𑀸 𑀳𑁄𑀢𑀻’’𑀢𑀺.

‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀳𑀺𑀢𑀸𑀬𑀸’’𑀢𑀺? ‘‘𑀬𑀢𑁄 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀅𑀢𑁆𑀢𑀦𑀸𑀯 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀁 𑀲𑀤𑁆𑀥𑀸𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺 [𑀲𑀫𑀸𑀤𑀸𑀧𑁂𑀢𑀺 (?)]; 𑀅𑀢𑁆𑀢𑀦𑀸𑀯 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀁 𑀲𑀻𑀮𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸𑀯 𑀘𑀸𑀕𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀁 𑀘𑀸𑀕𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸𑀯 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀦𑀓𑀸𑀫𑁄 𑀳𑁄𑀢𑀺, 𑀦𑁄 𑀧𑀭𑀁 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀦𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸𑀯 𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑁄 𑀳𑁄𑀢𑀺, 𑀦𑁄 𑀧𑀭𑀁 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸𑀯 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺, 𑀦𑁄 𑀧𑀭𑀁 𑀥𑀫𑁆𑀫𑀥𑀸𑀭𑀡𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸𑀯 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺, 𑀦𑁄 𑀧𑀭𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸𑀯 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀳𑀺𑀢𑀸𑀬𑀸’’𑀢𑀺.

‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀅𑀢𑁆𑀢𑀳𑀺𑀢𑀸𑀬 𑀘 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀧𑀭𑀳𑀺𑀢𑀸𑀬 𑀘𑀸’’𑀢𑀺? ‘‘𑀬𑀢𑁄 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀅𑀢𑁆𑀢𑀦𑀸 𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀤𑁆𑀥𑀸𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀻𑀮𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀘𑀸𑀕𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀜𑁆𑀘 𑀘𑀸𑀕𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀦𑀓𑀸𑀫𑁄 𑀳𑁄𑀢𑀺, 𑀧𑀭𑀜𑁆𑀘 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀦𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀥𑀫𑁆𑀫𑀥𑀸𑀭𑀡𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺, 𑀧𑀭𑀜𑁆𑀘 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀸𑀬 𑀲𑀫𑀸𑀤𑀧𑁂𑀢𑀺, 𑀅𑀢𑁆𑀢𑀦𑀸 𑀘 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀜𑁆𑀘 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀅𑀢𑁆𑀢𑀳𑀺𑀢𑀸𑀬 𑀘 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀧𑀭𑀳𑀺𑀢𑀸𑀬 𑀘𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀚𑀻𑀯𑀓𑀲𑀼𑀢𑁆𑀢𑀁

𑁨𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀚𑀻𑀯𑀓𑀫𑁆𑀩𑀯𑀦𑁂. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀳𑁄𑀢𑀻’’𑀢𑀺? ‘‘𑀬𑀢𑁄 𑀔𑁄, 𑀚𑀻𑀯𑀓, 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺; 𑀏𑀢𑁆𑀢𑀸𑀯𑀢𑀸 𑀔𑁄 𑀚𑀻𑀯𑀓, 𑀉𑀧𑀸𑀲𑀓𑁄 𑀳𑁄𑀢𑀻’’𑀢𑀺.

‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀲𑀻𑀮𑀯𑀸 𑀳𑁄𑀢𑀻’’𑀢𑀺? ‘‘𑀬𑀢𑁄 𑀔𑁄, 𑀚𑀻𑀯𑀓, 𑀉𑀧𑀸𑀲𑀓𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺; 𑀏𑀢𑁆𑀢𑀸𑀯𑀢𑀸 𑀔𑁄, 𑀚𑀻𑀯𑀓, 𑀉𑀧𑀸𑀲𑀓𑁄 𑀲𑀻𑀮𑀯𑀸 𑀳𑁄𑀢𑀻’’𑀢𑀺.

‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀳𑀺𑀢𑀸𑀬𑀸’’𑀢𑀺? ‘‘𑀬𑀢𑁄 𑀔𑁄, 𑀚𑀻𑀯𑀓, 𑀉𑀧𑀸𑀲𑀓𑁄 𑀅𑀢𑁆𑀢𑀦𑀸𑀯 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀁 𑀲𑀤𑁆𑀥𑀸𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸𑀯 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀚𑀻𑀯𑀓, 𑀉𑀧𑀸𑀲𑀓𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀳𑀺𑀢𑀸𑀬𑀸’’𑀢𑀺.

‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀅𑀢𑁆𑀢𑀳𑀺𑀢𑀸𑀬 𑀘 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀧𑀭𑀳𑀺𑀢𑀸𑀬 𑀘𑀸’’𑀢𑀺? ‘‘𑀬𑀢𑁄 𑀔𑁄, 𑀚𑀻𑀯𑀓, 𑀉𑀧𑀸𑀲𑀓𑁄 𑀅𑀢𑁆𑀢𑀦𑀸 𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀤𑁆𑀥𑀸𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀻𑀮𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀘𑀸𑀕𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀜𑁆𑀘 𑀘𑀸𑀕𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀦𑀓𑀸𑀫𑁄 𑀳𑁄𑀢𑀺, 𑀧𑀭𑀜𑁆𑀘 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀦𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀥𑀸𑀭𑀡𑀚𑀸𑀢𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀥𑀫𑁆𑀫𑀥𑀸𑀭𑀡𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺, 𑀧𑀭𑀜𑁆𑀘 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀜𑁆𑀘 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀚𑀻𑀯𑀓, 𑀉𑀧𑀸𑀲𑀓𑁄 𑀅𑀢𑁆𑀢𑀳𑀺𑀢𑀸𑀬 𑀘 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀧𑀭𑀳𑀺𑀢𑀸𑀬 𑀘𑀸’’𑀢𑀺. 𑀙𑀝𑁆𑀞𑀁.

𑁭. 𑀧𑀞𑀫𑀩𑀮𑀲𑀼𑀢𑁆𑀢𑀁

𑁨𑁭. ‘‘𑀅𑀝𑁆𑀞𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀮𑀸𑀦𑀺. 𑀓𑀢𑀫𑀸𑀦𑀺 𑀅𑀝𑁆𑀞? 𑀭𑀼𑀡𑁆𑀡𑀩𑀮𑀸, 𑀪𑀺𑀓𑁆𑀔𑀯𑁂, 𑀤𑀸𑀭𑀓𑀸, 𑀓𑁄𑀥𑀩𑀮𑀸 𑀫𑀸𑀢𑀼𑀕𑀸𑀫𑀸, 𑀆𑀯𑀼𑀥𑀩𑀮𑀸 𑀘𑁄𑀭𑀸, 𑀇𑀲𑁆𑀲𑀭𑀺𑀬𑀩𑀮𑀸 𑀭𑀸𑀚𑀸𑀦𑁄, 𑀉𑀚𑁆𑀛𑀢𑁆𑀢𑀺𑀩𑀮𑀸 𑀩𑀸𑀮𑀸, 𑀦𑀺𑀚𑁆𑀛𑀢𑁆𑀢𑀺𑀩𑀮𑀸 𑀧𑀡𑁆𑀟𑀺𑀢𑀸, 𑀧𑀝𑀺𑀲𑀗𑁆𑀔𑀸𑀦𑀩𑀮𑀸 𑀩𑀳𑀼𑀲𑁆𑀲𑀼𑀢𑀸, 𑀔𑀦𑁆𑀢𑀺𑀩𑀮𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀩𑀮𑀸𑀦𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀩𑀮𑀲𑀼𑀢𑁆𑀢𑀁

𑁨𑁮. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀢𑀺 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀮𑀸𑀦𑀺, 𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀁 𑀧𑀝𑀺𑀚𑀸𑀦𑀸𑀢𑀺 𑁋 ‘𑀔𑀻𑀡𑀸 𑀫𑁂 𑀆𑀲𑀯𑀸’’’𑀢𑀺? ‘‘𑀅𑀝𑁆𑀞, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀮𑀸𑀦𑀺, 𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀁 𑀧𑀝𑀺𑀚𑀸𑀦𑀸𑀢𑀺 𑁋 ‘𑀔𑀻𑀡𑀸 𑀫𑁂 𑀆𑀲𑀯𑀸’’’𑀢𑀺.

‘‘𑀓𑀢𑀫𑀸𑀦𑀺 𑀅𑀝𑁆𑀞? [𑀅. 𑀦𑀺. 𑁧𑁦.𑁯𑁦; 𑀧𑀝𑀺. 𑀫. 𑁨.𑁪𑁪] 𑀇𑀥, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀺𑀘𑁆𑀘𑀢𑁄 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀺𑀘𑁆𑀘𑀢𑁄 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀇𑀤𑀫𑁆𑀧𑀺, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀁 𑀧𑀝𑀺𑀚𑀸𑀦𑀸𑀢𑀺 𑁋 ‘𑀔𑀻𑀡𑀸 𑀫𑁂 𑀆𑀲𑀯𑀸’’’𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀬𑀫𑁆𑀧𑀺, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀇𑀤𑀫𑁆𑀧𑀺, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀁 𑀧𑀝𑀺𑀚𑀸𑀦𑀸𑀢𑀺 𑁋 ‘𑀔𑀻𑀡𑀸 𑀫𑁂 𑀆𑀲𑀯𑀸’’’𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀯𑁂𑀓𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺 𑀯𑀺𑀯𑁂𑀓𑀧𑁄𑀡𑀁 𑀯𑀺𑀯𑁂𑀓𑀧𑀩𑁆𑀪𑀸𑀭𑀁 𑀯𑀺𑀯𑁂𑀓𑀝𑁆𑀞𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀁 𑀩𑁆𑀬𑀦𑁆𑀢𑀺𑀪𑀽𑀢𑀁 𑀲𑀩𑁆𑀩𑀲𑁄 𑀆𑀲𑀯𑀝𑁆𑀞𑀸𑀦𑀺𑀬𑁂𑀳𑀺 𑀥𑀫𑁆𑀫𑁂𑀳𑀺. 𑀬𑀫𑁆𑀧𑀺, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀯𑁂𑀓𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺 𑀯𑀺𑀯𑁂𑀓𑀧𑁄𑀡𑀁 𑀯𑀺𑀯𑁂𑀓𑀧𑀩𑁆𑀪𑀸𑀭𑀁 𑀯𑀺𑀯𑁂𑀓𑀝𑁆𑀞𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀁 𑀩𑁆𑀬𑀦𑁆𑀢𑀺𑀪𑀽𑀢𑀁 𑀲𑀩𑁆𑀩𑀲𑁄 𑀆𑀲𑀯𑀝𑁆𑀞𑀸𑀦𑀺𑀬𑁂𑀳𑀺 𑀥𑀫𑁆𑀫𑁂𑀳𑀺, 𑀇𑀤𑀫𑁆𑀧𑀺, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀁 𑀧𑀝𑀺𑀚𑀸𑀦𑀸𑀢𑀺 𑁋 ‘𑀔𑀻𑀡𑀸 𑀫𑁂 𑀆𑀲𑀯𑀸’’’𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸 𑀳𑁄𑀦𑁆𑀢𑀺 𑀲𑀼𑀪𑀸𑀯𑀺𑀢𑀸. 𑀬𑀫𑁆𑀧𑀺, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸 𑀳𑁄𑀦𑁆𑀢𑀺 𑀲𑀼𑀪𑀸𑀯𑀺𑀢𑀸, 𑀇𑀤𑀫𑁆𑀧𑀺, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀁 𑀧𑀝𑀺𑀚𑀸𑀦𑀸𑀢𑀺 𑁋 ‘𑀔𑀻𑀡𑀸 𑀫𑁂 𑀆𑀲𑀯𑀸’’’𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀳𑁄𑀦𑁆𑀢𑀺 𑀲𑀼𑀪𑀸𑀯𑀺𑀢𑀸…𑀧𑁂… 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀪𑀸𑀯𑀺𑀢𑀸𑀦𑀺…𑀧𑁂… 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸 𑀳𑁄𑀦𑁆𑀢𑀺 𑀲𑀼𑀪𑀸𑀯𑀺𑀢𑀸…𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀺𑀢𑁄 𑀳𑁄𑀢𑀺 𑀲𑀼𑀪𑀸𑀯𑀺𑀢𑁄. 𑀬𑀫𑁆𑀧𑀺, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀺𑀢𑁄 𑀳𑁄𑀢𑀺 𑀲𑀼𑀪𑀸𑀯𑀺𑀢𑁄, 𑀇𑀤𑀫𑁆𑀧𑀺, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀁 𑀧𑀝𑀺𑀚𑀸𑀦𑀸𑀢𑀺 𑁋 ‘𑀔𑀻𑀡𑀸 𑀫𑁂 𑀆𑀲𑀯𑀸’’’𑀢𑀺.

‘‘𑀇𑀫𑀸𑀦𑀺 𑀔𑁄, 𑀪𑀦𑁆𑀢𑁂, 𑀅𑀝𑁆𑀞 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀮𑀸𑀦𑀺, 𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀁 𑀧𑀝𑀺𑀚𑀸𑀦𑀸𑀢𑀺 𑁋 ‘𑀔𑀻𑀡𑀸 𑀫𑁂 𑀆𑀲𑀯𑀸’’’𑀢𑀺. 𑀅𑀝𑁆𑀞𑀫𑀁.

𑁯. 𑀅𑀓𑁆𑀔𑀡𑀲𑀼𑀢𑁆𑀢𑀁

𑁨𑁯. ‘‘‘𑀔𑀡𑀓𑀺𑀘𑁆𑀘𑁄 𑀮𑁄𑀓𑁄, 𑀔𑀡𑀓𑀺𑀘𑁆𑀘𑁄 𑀮𑁄𑀓𑁄’𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺, 𑀦𑁄 𑀘 𑀔𑁄 𑀲𑁄 𑀚𑀸𑀦𑀸𑀢𑀺 𑀔𑀡𑀁 𑀯𑀸 𑀅𑀓𑁆𑀔𑀡𑀁 𑀯𑀸. 𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀓𑁆𑀔𑀡𑀸 𑀅𑀲𑀫𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬. 𑀓𑀢𑀫𑁂 𑀅𑀝𑁆𑀞? 𑀇𑀥, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀘 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸, 𑀥𑀫𑁆𑀫𑁄 𑀘 𑀤𑁂𑀲𑀺𑀬𑀢𑀺 𑀑𑀧𑀲𑀫𑀺𑀓𑁄 𑀧𑀭𑀺𑀦𑀺𑀩𑁆𑀩𑀸𑀦𑀺𑀓𑁄 𑀲𑀫𑁆𑀩𑁄𑀥𑀕𑀸𑀫𑀻 𑀲𑀼𑀕𑀢𑀧𑁆𑀧𑀯𑁂𑀤𑀺𑀢𑁄; 𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀦𑀺𑀭𑀬𑀁 𑀉𑀧𑀧𑀦𑁆𑀦𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀅𑀓𑁆𑀔𑀡𑁄 𑀅𑀲𑀫𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀘 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸, 𑀥𑀫𑁆𑀫𑁄 𑀘 𑀤𑁂𑀲𑀺𑀬𑀢𑀺 𑀑𑀧𑀲𑀫𑀺𑀓𑁄 𑀧𑀭𑀺𑀦𑀺𑀩𑁆𑀩𑀸𑀦𑀺𑀓𑁄 𑀲𑀫𑁆𑀩𑁄𑀥𑀕𑀸𑀫𑀻 𑀲𑀼𑀕𑀢𑀧𑁆𑀧𑀯𑁂𑀤𑀺𑀢𑁄; 𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀉𑀧𑀧𑀦𑁆𑀦𑁄 𑀳𑁄𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂…𑀧𑁂… 𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀧𑁂𑀢𑁆𑀢𑀺𑀯𑀺𑀲𑀬𑀁 𑀉𑀧𑀧𑀦𑁆𑀦𑁄 𑀳𑁄𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂…𑀧𑁂… 𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀅𑀜𑁆𑀜𑀢𑀭𑀁 𑀤𑀻𑀖𑀸𑀬𑀼𑀓𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀦𑁆𑀦𑁄 𑀳𑁄𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂…𑀧𑁂… 𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺, 𑀲𑁄 𑀘 𑀳𑁄𑀢𑀺 𑀅𑀯𑀺𑀜𑁆𑀜𑀸𑀢𑀸𑀭𑁂𑀲𑀼 𑀫𑀺𑀮𑀓𑁆𑀔𑁂𑀲𑀼 [𑀫𑀺𑀮𑀓𑁆𑀔𑀽𑀲𑀼 (𑀲𑁆𑀬𑀸. 𑀓.) 𑀤𑀻. 𑀦𑀺. 𑁩.𑁩𑁫𑁮], 𑀬𑀢𑁆𑀣 𑀦𑀢𑁆𑀣𑀺 𑀕𑀢𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁…𑀧𑁂… 𑀧𑀜𑁆𑀘𑀫𑁄 𑀅𑀓𑁆𑀔𑀡𑁄 𑀅𑀲𑀫𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂…𑀧𑁂… 𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺, 𑀲𑁄 𑀘 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁, 𑀦𑀢𑁆𑀣𑀺 𑀳𑀼𑀢𑀁, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂…𑀧𑁂… 𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺, 𑀲𑁄 𑀘 𑀳𑁄𑀢𑀺 𑀤𑀼𑀧𑁆𑀧𑀜𑁆𑀜𑁄 𑀚𑀴𑁄 𑀏𑀴𑀫𑀽𑀕𑁄 𑀅𑀧𑁆𑀧𑀝𑀺𑀩𑀮𑁄 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀫𑀜𑁆𑀜𑀸𑀢𑀼𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀫𑁄 𑀅𑀓𑁆𑀔𑀡𑁄 𑀅𑀲𑀫𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀘 𑀮𑁄𑀓𑁂 𑀅𑀦𑀼𑀧𑁆𑀧𑀦𑁆𑀦𑁄 𑀳𑁄𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀥𑀫𑁆𑀫𑁄 𑀘 𑀦 𑀤𑁂𑀲𑀺𑀬𑀢𑀺 𑀑𑀧𑀲𑀫𑀺𑀓𑁄 𑀧𑀭𑀺𑀦𑀺𑀩𑁆𑀩𑀸𑀦𑀺𑀓𑁄 𑀲𑀫𑁆𑀩𑁄𑀥𑀕𑀸𑀫𑀻 𑀲𑀼𑀕𑀢𑀧𑁆𑀧𑀯𑁂𑀤𑀺𑀢𑁄. 𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺, 𑀲𑁄 𑀘 𑀳𑁄𑀢𑀺 𑀧𑀜𑁆𑀜𑀯𑀸 𑀅𑀚𑀴𑁄 𑀅𑀦𑁂𑀴𑀫𑀽𑀕𑁄 𑀧𑀝𑀺𑀩𑀮𑁄 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀫𑀜𑁆𑀜𑀸𑀢𑀼𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀫𑁄 𑀅𑀓𑁆𑀔𑀡𑁄 𑀅𑀲𑀫𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬. ‘𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀅𑀓𑁆𑀔𑀡𑀸 𑀅𑀲𑀫𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬’’’.

‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬. 𑀓𑀢𑀫𑁄 𑀏𑀓𑁄? 𑀇𑀥, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀘 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀥𑀫𑁆𑀫𑁄 𑀘 𑀤𑁂𑀲𑀺𑀬𑀢𑀺 𑀑𑀧𑀲𑀫𑀺𑀓𑁄 𑀧𑀭𑀺𑀦𑀺𑀩𑁆𑀩𑀸𑀦𑀺𑀓𑁄 𑀲𑀫𑁆𑀩𑁄𑀥𑀕𑀸𑀫𑀻 𑀲𑀼𑀕𑀢𑀧𑁆𑀧𑀯𑁂𑀤𑀺𑀢𑁄. 𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺, 𑀲𑁄 𑀘 𑀳𑁄𑀢𑀺 𑀧𑀜𑁆𑀜𑀯𑀸 𑀅𑀚𑀴𑁄 𑀅𑀦𑁂𑀴𑀫𑀽𑀕𑁄 𑀧𑀝𑀺𑀩𑀮𑁄 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀫𑀜𑁆𑀜𑀸𑀢𑀼𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀏𑀓𑁄𑀯 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺.

‘‘𑀫𑀦𑀼𑀲𑁆𑀲𑀮𑀸𑀪𑀁 [𑀫𑀦𑀼𑀲𑁆𑀲𑀮𑁄𑀓𑀁 (𑀲𑁆𑀬𑀸.)] 𑀮𑀤𑁆𑀥𑀸𑀦, 𑀲𑀤𑁆𑀥𑀫𑁆𑀫𑁂 𑀲𑀼𑀧𑁆𑀧𑀯𑁂𑀤𑀺𑀢𑁂;

𑀬𑁂 𑀔𑀡𑀁 𑀦𑀸𑀥𑀺𑀕𑀘𑁆𑀙𑀦𑁆𑀢𑀺, 𑀅𑀢𑀺𑀦𑀸𑀫𑁂𑀦𑁆𑀢𑀺 𑀢𑁂 𑀔𑀡𑀁.

‘‘𑀩𑀳𑀽 𑀳𑀺 𑀅𑀓𑁆𑀔𑀡𑀸 𑀯𑀼𑀢𑁆𑀢𑀸, 𑀫𑀕𑁆𑀕𑀲𑁆𑀲 𑀅𑀦𑁆𑀢𑀭𑀸𑀬𑀺𑀓𑀸;

𑀓𑀤𑀸𑀘𑀺 𑀓𑀭𑀳𑀘𑀺 𑀮𑁄𑀓𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀣𑀸𑀕𑀢𑀸.

‘‘𑀢𑀬𑀺𑀤𑀁 [𑀢𑀲𑁆𑀲𑀺𑀤𑀁 (𑀓.)] 𑀲𑀫𑁆𑀫𑀼𑀔𑀻𑀪𑀽𑀢𑀁, 𑀬𑀁 𑀮𑁄𑀓𑀲𑁆𑀫𑀺𑀁 𑀲𑀼𑀤𑀼𑀮𑁆𑀮𑀪𑀁;

𑀫𑀦𑀼𑀲𑁆𑀲𑀧𑀝𑀺𑀮𑀸𑀪𑁄 𑀘, 𑀲𑀤𑁆𑀥𑀫𑁆𑀫𑀲𑁆𑀲 𑀘 𑀤𑁂𑀲𑀦𑀸;

𑀅𑀮𑀁 𑀯𑀸𑀬𑀫𑀺𑀢𑀼𑀁 𑀢𑀢𑁆𑀣, 𑀅𑀢𑁆𑀢𑀓𑀸𑀫𑁂𑀦 [𑀅𑀢𑁆𑀣𑀓𑀸𑀫𑁂𑀦 (𑀲𑀻. 𑀲𑁆𑀬𑀸. 𑀓.)] 𑀚𑀦𑁆𑀢𑀼𑀦𑀸.

‘‘𑀓𑀣𑀁 𑀯𑀺𑀚𑀜𑁆𑀜𑀸 𑀲𑀤𑁆𑀥𑀫𑁆𑀫𑀁, 𑀔𑀡𑁄 𑀯𑁂 [𑀯𑁄 (𑀲𑁆𑀬𑀸.)] 𑀫𑀸 𑀉𑀧𑀘𑁆𑀘𑀕𑀸;

𑀔𑀡𑀸𑀢𑀻𑀢𑀸 𑀳𑀺 𑀲𑁄𑀘𑀦𑁆𑀢𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑀸.

‘‘𑀇𑀥 𑀘𑁂 𑀦𑀁 𑀯𑀺𑀭𑀸𑀥𑁂𑀢𑀺, 𑀲𑀤𑁆𑀥𑀫𑁆𑀫𑀲𑁆𑀲 𑀦𑀺𑀬𑀸𑀫𑀢𑀁 [𑀦𑀺𑀬𑀸𑀫𑀺𑀢𑀁 (𑀲𑁆𑀬𑀸.)];

𑀯𑀸𑀡𑀺𑀚𑁄𑀯 𑀅𑀢𑀻𑀢𑀢𑁆𑀣𑁄, 𑀘𑀺𑀭𑀢𑁆𑀢𑀁 [𑀘𑀺𑀭𑀦𑁆𑀢𑀁 (𑀓.)] 𑀅𑀦𑀼𑀢𑀧𑀺𑀲𑁆𑀲𑀢𑀺.

‘‘𑀅𑀯𑀺𑀚𑁆𑀚𑀸𑀦𑀺𑀯𑀼𑀢𑁄 𑀧𑁄𑀲𑁄, 𑀲𑀤𑁆𑀥𑀫𑁆𑀫𑀁 𑀅𑀧𑀭𑀸𑀥𑀺𑀓𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑀁, 𑀘𑀺𑀭𑀁 𑀧𑀘𑁆𑀘𑀦𑀼𑀪𑁄𑀲𑁆𑀲𑀢𑀺.

‘‘𑀬𑁂 𑀘 𑀮𑀤𑁆𑀥𑀸 𑀫𑀦𑀼𑀲𑁆𑀲𑀢𑁆𑀢𑀁, 𑀲𑀤𑁆𑀥𑀫𑁆𑀫𑁂 𑀲𑀼𑀧𑁆𑀧𑀯𑁂𑀤𑀺𑀢𑁂;

𑀅𑀓𑀁𑀲𑀼 𑀲𑀢𑁆𑀣𑀼 𑀯𑀘𑀦𑀁, 𑀓𑀭𑀺𑀲𑁆𑀲𑀦𑁆𑀢𑀺 𑀓𑀭𑁄𑀦𑁆𑀢𑀺 𑀯𑀸.

‘‘𑀔𑀡𑀁 𑀧𑀘𑁆𑀘𑀯𑀺𑀤𑀼𑀁 𑀮𑁄𑀓𑁂, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀦𑀼𑀢𑁆𑀢𑀭𑀁;

𑀬𑁂 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼, 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁.

‘‘𑀬𑁂 𑀲𑀁𑀯𑀭𑀸 𑀘𑀓𑁆𑀔𑀼𑀫𑀢𑀸, 𑀤𑁂𑀲𑀺𑀢𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀢𑁂𑀲𑀼 [𑀢𑁂𑀲𑀁 (𑀓.)] 𑀕𑀼𑀢𑁆𑀢𑁄 𑀲𑀤𑀸 𑀲𑀢𑁄, 𑀯𑀺𑀳𑀭𑁂 𑀅𑀦𑀯𑀲𑁆𑀲𑀼𑀢𑁄.

‘‘𑀲𑀩𑁆𑀩𑁂 𑀅𑀦𑀼𑀲𑀬𑁂 𑀙𑁂𑀢𑁆𑀯𑀸, 𑀫𑀸𑀭𑀥𑁂𑀬𑁆𑀬𑀧𑀭𑀸𑀦𑀼𑀕𑁂;

𑀢𑁂 𑀯𑁂 𑀧𑀸𑀭𑀗𑁆𑀕𑀢𑀸 [𑀧𑀸𑀭𑀕𑀢𑀸 (𑀲𑀻. 𑀲𑁆𑀬𑀸. 𑀧𑀻.)] 𑀮𑁄𑀓𑁂, 𑀬𑁂 𑀧𑀢𑁆𑀢𑀸 𑀆𑀲𑀯𑀓𑁆𑀔𑀬’’𑀦𑁆𑀢𑀺. 𑀦𑀯𑀫𑀁;

𑁧𑁦. 𑀅𑀦𑀼𑀭𑀼𑀤𑁆𑀥𑀫𑀳𑀸𑀯𑀺𑀢𑀓𑁆𑀓𑀲𑀼𑀢𑁆𑀢𑀁

𑁩𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀪𑀕𑁆𑀕𑁂𑀲𑀼 𑀯𑀺𑀳𑀭𑀢𑀺 𑀲𑀼𑀁𑀲𑀼𑀫𑀸𑀭𑀕𑀺𑀭𑁂 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀘𑁂𑀢𑀻𑀲𑀼 𑀯𑀺𑀳𑀭𑀢𑀺 𑀧𑀸𑀘𑀻𑀦𑀯𑀁𑀲𑀤𑀸𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀳𑀺𑀘𑁆𑀙𑀲𑁆𑀲; 𑀲𑀦𑁆𑀢𑀼𑀝𑁆𑀞𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀲𑀦𑁆𑀢𑀼𑀝𑁆𑀞𑀲𑁆𑀲; 𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀲𑁆𑀲; 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀓𑀼𑀲𑀻𑀢𑀲𑁆𑀲; 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑁆𑀲𑀸𑀬𑀁 [𑀉𑀧𑀝𑁆𑀞𑀺𑀢𑀲𑀢𑀺𑀲𑁆𑀲𑀸𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 [𑀫𑀼𑀝𑁆𑀞𑀲𑀢𑀺𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)]; 𑀲𑀫𑀸𑀳𑀺𑀢𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀲𑀫𑀸𑀳𑀺𑀢𑀲𑁆𑀲; 𑀧𑀜𑁆𑀜𑀯𑀢𑁄 𑀅𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀤𑀼𑀧𑁆𑀧𑀜𑁆𑀜𑀲𑁆𑀲𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬; 𑀏𑀯𑀫𑁂𑀯𑀁 𑁋 𑀪𑀕𑁆𑀕𑁂𑀲𑀼 𑀲𑀼𑀁𑀲𑀼𑀫𑀸𑀭𑀕𑀺𑀭𑁂 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂 𑀅𑀦𑁆𑀢𑀭𑀳𑀺𑀢𑁄 𑀘𑁂𑀢𑀻𑀲𑀼 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀆𑀬𑀲𑁆𑀫𑀸𑀧𑀺 𑀔𑁄 𑀅𑀦𑀼𑀭𑀼𑀤𑁆𑀥𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁

𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥! 𑀲𑀸𑀥𑀼 𑀔𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, (𑀬𑀁 𑀢𑀁 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀁) [𑀲𑀢𑁆𑀢 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 (𑀲𑀻. 𑀧𑀻.) 𑀤𑀻. 𑀦𑀺. 𑁩.𑁩𑁫𑁮] 𑀯𑀺𑀢𑀓𑁆𑀓𑁂𑀲𑀺 𑁋 ‘𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀳𑀺𑀘𑁆𑀙𑀲𑁆𑀲; 𑀲𑀦𑁆𑀢𑀼𑀝𑁆𑀞𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀲𑀦𑁆𑀢𑀼𑀝𑁆𑀞𑀲𑁆𑀲; 𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀲𑁆𑀲; 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀓𑀼𑀲𑀻𑀢𑀲𑁆𑀲; 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲; 𑀲𑀫𑀸𑀳𑀺𑀢𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀲𑀫𑀸𑀳𑀺𑀢𑀲𑁆𑀲; 𑀧𑀜𑁆𑀜𑀯𑀢𑁄 𑀅𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀤𑀼𑀧𑁆𑀧𑀜𑁆𑀜𑀲𑁆𑀲𑀸’𑀢𑀺. 𑀢𑁂𑀦 𑀳𑀺 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀇𑀫𑀫𑁆𑀧𑀺 𑀅𑀝𑁆𑀞𑀫𑀁 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀳𑀺 𑁋 ‘𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑀲𑁆𑀲𑀸𑀬𑀁 𑀥𑀫𑁆𑀫𑁄 𑀦𑀺𑀧𑁆𑀧𑀧𑀜𑁆𑀘𑀭𑀢𑀺𑀦𑁄, 𑀦𑀸𑀬𑀁 𑀥𑀫𑁆𑀫𑁄 𑀧𑀧𑀜𑁆𑀘𑀸𑀭𑀸𑀫𑀲𑁆𑀲 𑀧𑀧𑀜𑁆𑀘𑀭𑀢𑀺𑀦𑁄’’’𑀢𑀺.

‘‘𑀬𑀢𑁄 𑀔𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀇𑀫𑁂 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀲𑁆𑀲𑀲𑀺, 𑀢𑀢𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀬𑀸𑀯𑀤𑁂𑀯 [𑀬𑀸𑀯𑀤𑁂 (𑀲𑀁. 𑀦𑀺. 𑁨.𑁧𑁫𑁨)] 𑀆𑀓𑀗𑁆𑀔𑀺𑀲𑁆𑀲𑀲𑀺, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀲𑀺.

‘‘𑀬𑀢𑁄 𑀔𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀇𑀫𑁂 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀲𑁆𑀲𑀲𑀺, 𑀢𑀢𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀺𑀲𑁆𑀲𑀲𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀲𑀺.

‘‘𑀬𑀢𑁄 𑀔𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀇𑀫𑁂 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀲𑁆𑀲𑀲𑀺, 𑀢𑀢𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀺𑀲𑁆𑀲𑀲𑀺, 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀺𑀲𑁆𑀲𑀲𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀲𑀺 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀲𑀺.

‘‘𑀬𑀢𑁄 𑀔𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀇𑀫𑁂 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀲𑁆𑀲𑀲𑀺, 𑀢𑀢𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀺𑀲𑁆𑀲𑀲𑀺, 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀲𑀺.

‘‘𑀬𑀢𑁄 𑀔𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀇𑀫𑁂 𑀘 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀲𑁆𑀲𑀲𑀺, 𑀇𑀫𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀲𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀢𑀢𑁄 𑀢𑀼𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀦𑀸𑀦𑀸𑀭𑀢𑁆𑀢𑀸𑀦𑀁 𑀤𑀼𑀲𑁆𑀲𑀸𑀦𑀁 𑀤𑀼𑀲𑁆𑀲𑀓𑀭𑀡𑁆𑀟𑀓𑁄 𑀧𑀽𑀭𑁄; 𑀏𑀯𑀫𑁂𑀯𑀁 𑀢𑁂 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀔𑀸𑀬𑀺𑀲𑁆𑀲𑀢𑀺 𑀲𑀦𑁆𑀢𑀼𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀑𑀓𑁆𑀓𑀫𑀦𑀸𑀬 𑀦𑀺𑀩𑁆𑀩𑀸𑀦𑀲𑁆𑀲.

‘‘𑀬𑀢𑁄 𑀔𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀇𑀫𑁂 𑀘 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀲𑁆𑀲𑀲𑀺, 𑀇𑀫𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀲𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀢𑀢𑁄 𑀢𑀼𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀲𑀸𑀮𑀻𑀦𑀁 𑀑𑀤𑀦𑁄 𑀯𑀺𑀘𑀺𑀢𑀓𑀸𑀴𑀓𑁄 𑀅𑀦𑁂𑀓𑀲𑀽𑀧𑁄 𑀅𑀦𑁂𑀓𑀩𑁆𑀬𑀜𑁆𑀚𑀦𑁄; 𑀏𑀯𑀫𑁂𑀯𑀁 𑀢𑁂 𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀔𑀸𑀬𑀺𑀲𑁆𑀲𑀢𑀺 𑀲𑀦𑁆𑀢𑀼𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀑𑀓𑁆𑀓𑀫𑀦𑀸𑀬 𑀦𑀺𑀩𑁆𑀩𑀸𑀦𑀲𑁆𑀲.

‘‘𑀬𑀢𑁄 𑀔𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀇𑀫𑁂 𑀘 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀲𑁆𑀲𑀲𑀺, 𑀇𑀫𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀲𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀢𑀢𑁄 𑀢𑀼𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀓𑀽𑀝𑀸𑀕𑀸𑀭𑀁 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀦𑀺𑀯𑀸𑀢𑀁 𑀨𑀼𑀲𑀺𑀢𑀕𑁆𑀕𑀴𑀁 𑀧𑀺𑀳𑀺𑀢𑀯𑀸𑀢𑀧𑀸𑀦𑀁; 𑀏𑀯𑀫𑁂𑀯𑀁 𑀢𑁂 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀔𑀸𑀬𑀺𑀲𑁆𑀲𑀢𑀺 𑀲𑀦𑁆𑀢𑀼𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀑𑀓𑁆𑀓𑀫𑀦𑀸𑀬 𑀦𑀺𑀩𑁆𑀩𑀸𑀦𑀲𑁆𑀲.

‘‘𑀬𑀢𑁄 𑀔𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀇𑀫𑁂 𑀘 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀲𑁆𑀲𑀲𑀺, 𑀇𑀫𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀲𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀢𑀢𑁄 𑀢𑀼𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀧𑀮𑁆𑀮𑀗𑁆𑀓𑁄 𑀕𑁄𑀦𑀓𑀢𑁆𑀣𑀢𑁄 𑀧𑀝𑀺𑀓𑀢𑁆𑀣𑀢𑁄 𑀧𑀝𑀮𑀺𑀓𑀢𑁆𑀣𑀢𑁄 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑁄 [𑀓𑀸𑀤𑀮𑀺… 𑀧𑀘𑁆𑀘𑀢𑁆𑀣𑀭𑀡𑁄 (𑀲𑀻.)] 𑀲𑀉𑀢𑁆𑀢𑀭𑀘𑁆𑀙𑀤𑁄 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑁄; 𑀏𑀯𑀫𑁂𑀯𑀁 𑀢𑁂 𑀢𑀺𑀡𑀲𑀦𑁆𑀣𑀸𑀭𑀓𑀲𑀬𑀦𑀸𑀲𑀦𑀁 𑀔𑀸𑀬𑀺𑀲𑁆𑀲𑀢𑀺 𑀲𑀦𑁆𑀢𑀼𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀑𑀓𑁆𑀓𑀫𑀦𑀸𑀬 𑀦𑀺𑀩𑁆𑀩𑀸𑀦𑀲𑁆𑀲.

‘‘𑀬𑀢𑁄 𑀔𑁄 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀇𑀫𑁂 𑀘 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀲𑁆𑀲𑀲𑀺, 𑀇𑀫𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀲𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀢𑀢𑁄 𑀢𑀼𑀬𑁆𑀳𑀁, 𑀅𑀦𑀼𑀭𑀼𑀤𑁆𑀥, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀦𑀸𑀦𑀸𑀪𑁂𑀲𑀚𑁆𑀚𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀁; 𑀏𑀯𑀫𑁂𑀯𑀁 𑀢𑁂 𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚𑀁 𑀔𑀸𑀬𑀺𑀲𑁆𑀲𑀢𑀺 𑀲𑀦𑁆𑀢𑀼𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀭𑀢𑀺𑀬𑀸 𑀅𑀧𑀭𑀺𑀢𑀲𑁆𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬 𑀑𑀓𑁆𑀓𑀫𑀦𑀸𑀬 𑀦𑀺𑀩𑁆𑀩𑀸𑀦𑀲𑁆𑀲. 𑀢𑁂𑀦 𑀳𑀺 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀆𑀬𑀢𑀺𑀓𑀫𑁆𑀧𑀺 𑀯𑀲𑁆𑀲𑀸𑀯𑀸𑀲𑀁 𑀇𑀥𑁂𑀯 𑀘𑁂𑀢𑀻𑀲𑀼 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀯𑀺𑀳𑀭𑁂𑀬𑁆𑀬𑀸𑀲𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯𑀁 𑁋 𑀘𑁂𑀢𑀻𑀲𑀼 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀅𑀦𑁆𑀢𑀭𑀳𑀺𑀢𑁄 𑀪𑀕𑁆𑀕𑁂𑀲𑀼 𑀲𑀼𑀁𑀲𑀼𑀫𑀸𑀭𑀕𑀺𑀭𑁂 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂 𑀧𑀸𑀢𑀼𑀭𑀳𑁄𑀲𑀻𑀢𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀝𑁆𑀞 𑀔𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀸? 𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀳𑀺𑀘𑁆𑀙𑀲𑁆𑀲; 𑀲𑀦𑁆𑀢𑀼𑀝𑁆𑀞𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀲𑀦𑁆𑀢𑀼𑀝𑁆𑀞𑀲𑁆𑀲; 𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀲𑁆𑀲; 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀓𑀼𑀲𑀻𑀢𑀲𑁆𑀲; 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲; 𑀲𑀫𑀸𑀳𑀺𑀢𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀲𑀫𑀸𑀳𑀺𑀢𑀲𑁆𑀲; 𑀧𑀜𑁆𑀜𑀯𑀢𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀤𑀼𑀧𑁆𑀧𑀜𑁆𑀜𑀲𑁆𑀲; 𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄 𑀦𑀺𑀧𑁆𑀧𑀧𑀜𑁆𑀘𑀭𑀢𑀺𑀦𑁄, 𑀦𑀸𑀬𑀁 𑀥𑀫𑁆𑀫𑁄 𑀧𑀧𑀜𑁆𑀘𑀸𑀭𑀸𑀫𑀲𑁆𑀲 𑀧𑀧𑀜𑁆𑀘𑀭𑀢𑀺𑀦𑁄’’.

‘‘‘𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀳𑀺𑀘𑁆𑀙𑀲𑁆𑀲𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀧𑁆𑀧𑀺𑀘𑁆𑀙𑁄 𑀲𑀫𑀸𑀦𑁄 ‘𑀅𑀧𑁆𑀧𑀺𑀘𑁆𑀙𑁄𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀦 𑀇𑀘𑁆𑀙𑀢𑀺, 𑀲𑀦𑁆𑀢𑀼𑀝𑁆𑀞𑁄 𑀲𑀫𑀸𑀦𑁄 ‘𑀲𑀦𑁆𑀢𑀼𑀝𑁆𑀞𑁄𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀦 𑀇𑀘𑁆𑀙𑀢𑀺, 𑀧𑀯𑀺𑀯𑀺𑀢𑁆𑀢𑁄 𑀲𑀫𑀸𑀦𑁄 ‘𑀧𑀯𑀺𑀯𑀺𑀢𑁆𑀢𑁄𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀦 𑀇𑀘𑁆𑀙𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀲𑀫𑀸𑀦𑁄 ‘𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀦 𑀇𑀘𑁆𑀙𑀢𑀺, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀲𑀫𑀸𑀦𑁄 ‘𑀉𑀧𑀝𑁆𑀞𑀺𑀢𑀲𑁆𑀲𑀢𑀻𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀦 𑀇𑀘𑁆𑀙𑀢𑀺, 𑀲𑀫𑀸𑀳𑀺𑀢𑁄 𑀲𑀫𑀸𑀦𑁄 ‘𑀲𑀫𑀸𑀳𑀺𑀢𑁄𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀦 𑀇𑀘𑁆𑀙𑀢𑀺, 𑀧𑀜𑁆𑀜𑀯𑀸 𑀲𑀫𑀸𑀦𑁄 ‘𑀧𑀜𑁆𑀜𑀯𑀸𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀦 𑀇𑀘𑁆𑀙𑀢𑀺, 𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑁄 𑀲𑀫𑀸𑀦𑁄 ‘𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑁄𑀢𑀺 𑀫𑀁 𑀚𑀸𑀦𑁂𑀬𑁆𑀬𑀼’𑀦𑁆𑀢𑀺 𑀦 𑀇𑀘𑁆𑀙𑀢𑀺. ‘𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀳𑀺𑀘𑁆𑀙𑀲𑁆𑀲𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀲𑀦𑁆𑀢𑀼𑀝𑁆𑀞𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀲𑀦𑁆𑀢𑀼𑀝𑁆𑀞𑀲𑁆𑀲𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦. ‘𑀲𑀦𑁆𑀢𑀼𑀝𑁆𑀞𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀲𑀦𑁆𑀢𑀼𑀝𑁆𑀞𑀲𑁆𑀲𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀲𑁆𑀲𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀪𑀯𑀦𑁆𑀢𑀺 𑀉𑀧𑀲𑀗𑁆𑀓𑀫𑀺𑀢𑀸𑀭𑁄 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀭𑀸𑀚𑀸𑀦𑁄 𑀭𑀸𑀚𑀫𑀳𑀸𑀫𑀢𑁆𑀢𑀸 𑀢𑀺𑀢𑁆𑀣𑀺𑀬𑀸 𑀢𑀺𑀢𑁆𑀣𑀺𑀬𑀲𑀸𑀯𑀓𑀸. 𑀢𑀢𑁆𑀭 𑀪𑀺𑀓𑁆𑀔𑀼 𑀯𑀺𑀯𑁂𑀓𑀦𑀺𑀦𑁆𑀦𑁂𑀦 𑀘𑀺𑀢𑁆𑀢𑁂𑀦 𑀯𑀺𑀯𑁂𑀓𑀧𑁄𑀡𑁂𑀦 𑀯𑀺𑀯𑁂𑀓𑀧𑀩𑁆𑀪𑀸𑀭𑁂𑀦 𑀯𑀺𑀯𑁂𑀓𑀝𑁆𑀞𑁂𑀦 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑁂𑀦 𑀅𑀜𑁆𑀜𑀤𑀢𑁆𑀣𑀼 𑀉𑀬𑁆𑀬𑁄𑀚𑀦𑀺𑀓𑀧𑀝𑀺𑀲𑀁𑀬𑀼𑀢𑁆𑀢𑀁𑀬𑁂𑀯 𑀓𑀣𑀁 𑀓𑀢𑁆𑀢𑀸 [𑀧𑀯𑀢𑁆𑀢𑀸 (𑀓.)] 𑀳𑁄𑀢𑀺. ‘𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀲𑁆𑀲𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀓𑀼𑀲𑀻𑀢𑀲𑁆𑀲𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. ‘𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀓𑀼𑀲𑀻𑀢𑀲𑁆𑀲𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑀺𑀫𑀸 𑀳𑁄𑀢𑀺 𑀧𑀭𑀫𑁂𑀦 𑀲𑀢𑀺𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀘𑀺𑀭𑀓𑀢𑀫𑁆𑀧𑀺 𑀘𑀺𑀭𑀪𑀸𑀲𑀺𑀢𑀫𑁆𑀧𑀺 𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸. ‘𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄, 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀲𑀫𑀸𑀳𑀺𑀢𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀲𑀫𑀸𑀳𑀺𑀢𑀲𑁆𑀲𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. ‘𑀲𑀫𑀸𑀳𑀺𑀢𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀅𑀲𑀫𑀸𑀳𑀺𑀢𑀲𑁆𑀲𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀧𑀜𑁆𑀜𑀯𑀢𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀤𑀼𑀧𑁆𑀧𑀜𑁆𑀜𑀲𑁆𑀲𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. ‘𑀧𑀜𑁆𑀜𑀯𑀢𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀤𑀼𑀧𑁆𑀧𑀜𑁆𑀜𑀲𑁆𑀲𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄 𑀦𑀺𑀧𑁆𑀧𑀧𑀜𑁆𑀘𑀭𑀢𑀺𑀦𑁄, 𑀦𑀸𑀬𑀁 𑀥𑀫𑁆𑀫𑁄 𑀧𑀧𑀜𑁆𑀘𑀸𑀭𑀸𑀫𑀲𑁆𑀲 𑀧𑀧𑀜𑁆𑀘𑀭𑀢𑀺𑀦𑁄’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀧𑀜𑁆𑀘𑀦𑀺𑀭𑁄𑀥𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀯𑀺𑀫𑀼𑀘𑁆𑀘𑀢𑀺. ‘𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑀲𑁆𑀲𑀸𑀬𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄, 𑀦𑀺𑀧𑁆𑀧𑀧𑀜𑁆𑀘𑀭𑀢𑀺𑀦𑁄, 𑀦𑀸𑀬𑀁 𑀥𑀫𑁆𑀫𑁄 𑀧𑀧𑀜𑁆𑀘𑀸𑀭𑀸𑀫𑀲𑁆𑀲 𑀧𑀧𑀜𑁆𑀘𑀭𑀢𑀺𑀦𑁄’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀆𑀬𑀢𑀺𑀓𑀫𑁆𑀧𑀺 𑀯𑀲𑁆𑀲𑀸𑀯𑀸𑀲𑀁 𑀢𑀢𑁆𑀣𑁂𑀯 𑀘𑁂𑀢𑀻𑀲𑀼 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀯𑀺𑀳𑀸𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

[𑀣𑁂𑀭𑀕𑀸. 𑁯𑁦𑁧-𑁯𑁦𑁩] ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀫𑀦𑁄𑀫𑀬𑁂𑀦 𑀓𑀸𑀬𑁂𑀦, 𑀇𑀤𑁆𑀥𑀺𑀬𑀸 𑀉𑀧𑀲𑀗𑁆𑀓𑀫𑀺.

‘‘𑀬𑀣𑀸 𑀫𑁂 𑀅𑀳𑀼 𑀲𑀗𑁆𑀓𑀧𑁆𑀧𑁄, 𑀢𑀢𑁄 𑀉𑀢𑁆𑀢𑀭𑀺 𑀤𑁂𑀲𑀬𑀺;

𑀦𑀺𑀧𑁆𑀧𑀧𑀜𑁆𑀘𑀭𑀢𑁄 𑀩𑀼𑀤𑁆𑀥𑁄, 𑀦𑀺𑀧𑁆𑀧𑀧𑀜𑁆𑀘𑀁 𑀅𑀤𑁂𑀲𑀬𑀺.

‘‘𑀢𑀲𑁆𑀲𑀸𑀳𑀁 𑀥𑀫𑁆𑀫𑀫𑀜𑁆𑀜𑀸𑀬, 𑀯𑀺𑀳𑀸𑀲𑀺𑀁 𑀲𑀸𑀲𑀦𑁂 𑀭𑀢𑁄;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. 𑀤𑀲𑀫𑀁;

𑀕𑀳𑀧𑀢𑀺𑀯𑀕𑁆𑀕𑁄 𑀢𑀢𑀺𑀬𑁄.