𑁧. 𑀯𑁂𑀭𑀜𑁆𑀚𑀲𑀼𑀢𑁆𑀢𑀁

𑁧𑁧. [𑀧𑀸𑀭𑀸. 𑁧 𑀆𑀤𑀬𑁄] 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂. 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 [𑀲𑀸𑀭𑀸𑀡𑀻𑀬𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀕𑁄𑀢𑀫 𑁋 ‘𑀦 𑀲𑀫𑀡𑁄 𑀕𑁄𑀢𑀫𑁄 𑀩𑁆𑀭𑀸𑀳𑁆𑀫𑀡𑁂 𑀚𑀺𑀡𑁆𑀡𑁂 𑀯𑀼𑀟𑁆𑀠𑁂 𑀫𑀳𑀮𑁆𑀮𑀓𑁂 𑀅𑀤𑁆𑀥𑀕𑀢𑁂 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀻’𑀢𑀺. 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀢𑀣𑁂𑀯. 𑀦 𑀳𑀺 𑀪𑀯𑀁 𑀕𑁄𑀢𑀫𑁄 𑀩𑁆𑀭𑀸𑀳𑁆𑀫𑀡𑁂 𑀚𑀺𑀡𑁆𑀡𑁂 𑀯𑀼𑀟𑁆𑀠𑁂 𑀫𑀳𑀮𑁆𑀮𑀓𑁂 𑀅𑀤𑁆𑀥𑀕𑀢𑁂 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀺. 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀦 𑀲𑀫𑁆𑀧𑀦𑁆𑀦𑀫𑁂𑀯𑀸’’𑀢𑀺. ‘‘𑀦𑀸𑀳𑀁 𑀢𑀁, 𑀩𑁆𑀭𑀸𑀳𑁆𑀫𑀡, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀬𑀫𑀳𑀁 𑀅𑀪𑀺𑀯𑀸𑀤𑁂𑀬𑁆𑀬𑀁 𑀯𑀸 𑀧𑀘𑁆𑀘𑀼𑀝𑁆𑀞𑁂𑀬𑁆𑀬𑀁 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬𑀁. 𑀬𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄 𑀅𑀪𑀺𑀯𑀸𑀤𑁂𑀬𑁆𑀬 𑀯𑀸 𑀧𑀘𑁆𑀘𑀼𑀝𑁆𑀞𑁂𑀬𑁆𑀬 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’’𑀢𑀺.

‘‘𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄’’𑀢𑀺! ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀭𑀲𑀭𑀽𑀧𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀬𑁂 𑀢𑁂, 𑀩𑁆𑀭𑀸𑀳𑁆𑀫𑀡, 𑀭𑀽𑀧𑀭𑀲𑀸 𑀲𑀤𑁆𑀤𑀭𑀲𑀸 𑀕𑀦𑁆𑀥𑀭𑀲𑀸 𑀭𑀲𑀭𑀲𑀸 𑀨𑁄𑀝𑁆𑀞𑀩𑁆𑀩𑀭𑀲𑀸, 𑀢𑁂 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 [𑀅𑀦𑀪𑀸𑀯𑀓𑀢𑀸 (𑀲𑀻. 𑀧𑀻.)] 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀭𑀲𑀭𑀽𑀧𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺 [𑀯𑀤𑁂𑀲𑀺 (𑀲𑀻. 𑀓.)].

‘‘𑀦𑀺𑀩𑁆𑀪𑁄𑀕𑁄 𑀪𑀯𑀁 𑀕𑁄𑀢𑀫𑁄’’𑀢𑀺! ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀦𑀺𑀩𑁆𑀪𑁄𑀕𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀬𑁂 𑀢𑁂, 𑀩𑁆𑀭𑀸𑀳𑁆𑀫𑀡, 𑀭𑀽𑀧𑀪𑁄𑀕𑀸 𑀲𑀤𑁆𑀤𑀪𑁄𑀕𑀸 𑀕𑀦𑁆𑀥𑀪𑁄𑀕𑀸 𑀭𑀲𑀪𑁄𑀕𑀸 𑀨𑁄𑀝𑁆𑀞𑀩𑁆𑀩𑀪𑁄𑀕𑀸, 𑀢𑁂 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀦𑀺𑀩𑁆𑀪𑁄𑀕𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

‘‘𑀅𑀓𑀺𑀭𑀺𑀬𑀯𑀸𑀤𑁄 𑀪𑀯𑀁 𑀕𑁄𑀢𑀫𑁄’’𑀢𑀺! ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀅𑀓𑀺𑀭𑀺𑀬𑀁 𑀯𑀤𑀸𑀫𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑁆𑀲 𑀫𑀦𑁄𑀤𑀼𑀘𑁆𑀘𑀭𑀺𑀢𑀲𑁆𑀲; 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀓𑀺𑀭𑀺𑀬𑀁 𑀯𑀤𑀸𑀫𑀺. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

‘‘𑀉𑀘𑁆𑀙𑁂𑀤𑀯𑀸𑀤𑁄 𑀪𑀯𑀁 𑀕𑁄𑀢𑀫𑁄’’𑀢𑀺! ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀉𑀘𑁆𑀙𑁂𑀤𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀉𑀘𑁆𑀙𑁂𑀤𑀁 𑀯𑀤𑀸𑀫𑀺 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲; 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀘𑁆𑀙𑁂𑀤𑀁 𑀯𑀤𑀸𑀫𑀺. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀉𑀘𑁆𑀙𑁂𑀤𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

‘‘𑀚𑁂𑀕𑀼𑀘𑁆𑀙𑀻 𑀪𑀯𑀁 𑀕𑁄𑀢𑀫𑁄’’𑀢𑀺! ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀚𑁂𑀕𑀼𑀘𑁆𑀙𑀻 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀚𑀺𑀕𑀼𑀘𑁆𑀙𑀸𑀫𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦; 𑀚𑀺𑀕𑀼𑀘𑁆𑀙𑀸𑀫𑀺 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀚𑁂𑀕𑀼𑀘𑁆𑀙𑀻 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

‘‘𑀯𑁂𑀦𑀬𑀺𑀓𑁄 𑀪𑀯𑀁 𑀕𑁄𑀢𑀫𑁄’’𑀢𑀺! ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀯𑁂𑀦𑀬𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲; 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀯𑁂𑀦𑀬𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

‘‘𑀢𑀧𑀲𑁆𑀲𑀻 𑀪𑀯𑀁 𑀕𑁄𑀢𑀫𑁄’’𑀢𑀺! ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀢𑀧𑀲𑁆𑀲𑀻 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀢𑀧𑀦𑀻𑀬𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀯𑀤𑀸𑀫𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁. 𑀬𑀲𑁆𑀲 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀧𑀦𑀻𑀬𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀢𑀫𑀳𑀁 ‘𑀢𑀧𑀲𑁆𑀲𑀻’𑀢𑀺 𑀯𑀤𑀸𑀫𑀺. 𑀢𑀣𑀸𑀕𑀢𑀲𑁆𑀲 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀧𑀦𑀻𑀬𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀢𑀧𑀲𑁆𑀲𑀻 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

‘‘𑀅𑀧𑀕𑀩𑁆𑀪𑁄 𑀪𑀯𑀁 𑀕𑁄𑀢𑀫𑁄’’𑀢𑀺! ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀧𑀕𑀩𑁆𑀪𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀬𑀲𑁆𑀲 𑀔𑁄, 𑀩𑁆𑀭𑀸𑀳𑁆𑀫𑀡, 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀢𑀫𑀳𑀁 ‘𑀅𑀧𑀕𑀩𑁆𑀪𑁄’𑀢𑀺 𑀯𑀤𑀸𑀫𑀺. 𑀢𑀣𑀸𑀕𑀢𑀲𑁆𑀲 𑀔𑁄, 𑀩𑁆𑀭𑀸𑀳𑁆𑀫𑀡, 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀧𑀕𑀩𑁆𑀪𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀅𑀝𑁆𑀞 𑀯𑀸 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸. 𑀢𑀸𑀦𑀸𑀲𑁆𑀲𑀼 𑀓𑀼𑀓𑁆𑀓𑀼𑀝𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀺 𑀲𑀫𑁆𑀫𑀸 𑀧𑀭𑀺𑀲𑁂𑀤𑀺𑀢𑀸𑀦𑀺 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀺. 𑀬𑁄 𑀦𑀼 𑀔𑁄 𑀢𑁂𑀲𑀁 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀸𑀦𑀁 𑀧𑀞𑀫𑀢𑀭𑀁 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑁂𑀬𑁆𑀬, 𑀓𑀺𑀦𑁆𑀢𑀺 𑀲𑁆𑀯𑀸𑀲𑁆𑀲 𑀯𑀘𑀦𑀻𑀬𑁄 𑁋 ‘𑀚𑁂𑀝𑁆𑀞𑁄 𑀯𑀸 𑀓𑀦𑀺𑀝𑁆𑀞𑁄 𑀯𑀸’’’𑀢𑀺? ‘‘𑀚𑁂𑀝𑁆𑀞𑁄 𑀢𑀺𑀲𑁆𑀲, 𑀪𑁄 𑀕𑁄𑀢𑀫, 𑀯𑀘𑀦𑀻𑀬𑁄. 𑀲𑁄 𑀳𑀺 𑀦𑁂𑀲𑀁, 𑀪𑁄 𑀕𑁄𑀢𑀫, 𑀚𑁂𑀝𑁆𑀞𑁄 𑀳𑁄𑀢𑀻’’𑀢𑀺.

‘‘𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀅𑀯𑀺𑀚𑁆𑀚𑀸𑀕𑀢𑀸𑀬 𑀧𑀚𑀸𑀬 𑀅𑀡𑁆𑀟𑀪𑀽𑀢𑀸𑀬 𑀧𑀭𑀺𑀬𑁄𑀦𑀤𑁆𑀥𑀸𑀬 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀏𑀓𑁄𑀯 𑀮𑁄𑀓𑁂 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀚𑁂𑀝𑁆𑀞𑁄 𑀲𑁂𑀝𑁆𑀞𑁄 𑀮𑁄𑀓𑀲𑁆𑀲. 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀩𑁆𑀭𑀸𑀳𑁆𑀫𑀡, 𑀯𑀻𑀭𑀺𑀬𑀁 𑀅𑀳𑁄𑀲𑀺 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸, 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁.

‘‘𑀲𑁄 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺; 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺; 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀸𑀫𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀫𑀺 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺; 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄. 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄. 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺.

‘‘𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀭𑀢𑁆𑀢𑀺𑀬𑀸 𑀧𑀞𑀫𑁂 𑀬𑀸𑀫𑁂 𑀧𑀞𑀫𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸; 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀢𑀫𑁄 𑀯𑀺𑀳𑀢𑁄 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀧𑀞𑀫𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀅𑀳𑁄𑀲𑀺 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀅𑀡𑁆𑀟𑀓𑁄𑀲𑀫𑁆𑀳𑀸.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸𑀢𑀺. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀺.

‘‘𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀤𑀼𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸; 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀢𑀫𑁄 𑀯𑀺𑀳𑀢𑁄 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀤𑀼𑀢𑀺𑀬𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀅𑀳𑁄𑀲𑀺 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀅𑀡𑁆𑀟𑀓𑁄𑀲𑀫𑁆𑀳𑀸.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁. 𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁; ‘𑀇𑀫𑁂 𑀆𑀲𑀯𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀢𑀲𑁆𑀲 𑀫𑁂 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀅𑀳𑁄𑀲𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁.

‘‘𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀢𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸; 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀢𑀫𑁄 𑀯𑀺𑀳𑀢𑁄 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀢𑀢𑀺𑀬𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀅𑀳𑁄𑀲𑀺 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀅𑀡𑁆𑀟𑀓𑁄𑀲𑀫𑁆𑀳𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀚𑁂𑀝𑁆𑀞𑁄 𑀪𑀯𑀁 𑀕𑁄𑀢𑀫𑁄, 𑀲𑁂𑀝𑁆𑀞𑁄 𑀪𑀯𑀁 𑀕𑁄𑀢𑀫𑁄. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 [𑀦𑀺𑀓𑀼𑀚𑁆𑀚𑀺𑀢𑀁 (𑀓.)] 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺; 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀧𑀞𑀫𑀁.