𑁯. 𑀲𑀢𑁆𑀣𑀼𑀲𑀸𑀲𑀦𑀲𑀼𑀢𑁆𑀢𑀁

𑁮𑁩. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. ‘‘𑀬𑁂 𑀔𑁄 𑀢𑁆𑀯𑀁, 𑀉𑀧𑀸𑀮𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺 𑁋 ‘𑀇𑀫𑁂 𑀥𑀫𑁆𑀫𑀸 𑀦 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺; 𑀏𑀓𑀁𑀲𑁂𑀦, 𑀉𑀧𑀸𑀮𑀺, 𑀥𑀸𑀭𑁂𑀬𑁆𑀬𑀸𑀲𑀺 𑁋 ‘𑀦𑁂𑀲𑁄 𑀥𑀫𑁆𑀫𑁄 𑀦𑁂𑀲𑁄 𑀯𑀺𑀦𑀬𑁄 𑀦𑁂𑀢𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀬𑁂 𑀘 𑀔𑁄 𑀢𑁆𑀯𑀁, 𑀉𑀧𑀸𑀮𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺 𑁋 ‘𑀇𑀫𑁂 𑀥𑀫𑁆𑀫𑀸 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺; 𑀏𑀓𑀁𑀲𑁂𑀦, 𑀉𑀧𑀸𑀮𑀺, 𑀥𑀸𑀭𑁂𑀬𑁆𑀬𑀸𑀲𑀺 𑁋 ‘𑀏𑀲𑁄 𑀥𑀫𑁆𑀫𑁄 𑀏𑀲𑁄 𑀯𑀺𑀦𑀬𑁄 𑀏𑀢𑀁 𑀲𑀢𑁆𑀣𑀼𑀲𑀸𑀲𑀦’’’𑀦𑁆𑀢𑀺. 𑀦𑀯𑀫𑀁.