𑁫. 𑀧𑀞𑀫𑀫𑀺𑀢𑁆𑀢𑀲𑀼𑀢𑁆𑀢𑀁

𑁩𑁬. ‘‘𑀲𑀢𑁆𑀢𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀺𑀢𑁆𑀢𑁄 𑀲𑁂𑀯𑀺𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀤𑀼𑀤𑁆𑀤𑀤𑀁 𑀤𑀤𑀸𑀢𑀺, 𑀤𑀼𑀓𑁆𑀓𑀭𑀁 𑀓𑀭𑁄𑀢𑀺, 𑀤𑀼𑀓𑁆𑀔𑀫𑀁 𑀔𑀫𑀢𑀺, 𑀕𑀼𑀬𑁆𑀳𑀫𑀲𑁆𑀲 [𑀕𑀼𑀬𑁆𑀳𑀲𑁆𑀲 (𑀓.)] 𑀆𑀯𑀺 𑀓𑀭𑁄𑀢𑀺, 𑀕𑀼𑀬𑁆𑀳𑀫𑀲𑁆𑀲 [𑀕𑀼𑀬𑁆𑀳𑀁 𑀅𑀲𑁆𑀲 (𑀲𑀻.), 𑀕𑀼𑀬𑁆𑀳𑀲𑁆𑀲 (𑀓.)] 𑀧𑀭𑀺𑀕𑀼𑀳𑀢𑀺 [𑀧𑀭𑀺𑀕𑀽𑀳𑀢𑀺 (𑀲𑀻. 𑀲𑁆𑀬𑀸.), 𑀧𑀭𑀺𑀕𑀼𑀬𑁆𑀳𑀢𑀺 (𑀓.)], 𑀆𑀧𑀤𑀸𑀲𑀼 𑀦 𑀚𑀳𑀢𑀺, 𑀔𑀻𑀡𑁂𑀦 [𑀔𑀻𑀡𑁂 (𑀓.)] 𑀦𑀸𑀢𑀺𑀫𑀜𑁆𑀜𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀺𑀢𑁆𑀢𑁄 𑀲𑁂𑀯𑀺𑀢𑀩𑁆𑀩𑁄’’𑀢𑀺.

‘‘𑀤𑀼𑀤𑁆𑀤𑀤𑀁 𑀤𑀤𑀸𑀢𑀺 𑀫𑀺𑀢𑁆𑀢𑁄, 𑀤𑀼𑀓𑁆𑀓𑀭𑀜𑁆𑀘𑀸𑀧𑀺 𑀓𑀼𑀩𑁆𑀩𑀢𑀺;

𑀅𑀣𑁄𑀧𑀺𑀲𑁆𑀲 𑀤𑀼𑀭𑀼𑀢𑁆𑀢𑀸𑀦𑀺, 𑀔𑀫𑀢𑀺 𑀤𑀼𑀓𑁆𑀔𑀫𑀸𑀦𑀺 𑀘 [𑀤𑀼𑀓𑁆𑀔𑀫𑀸𑀦𑀺𑀧𑀺 (𑀲𑀻. 𑀲𑁆𑀬𑀸.)].

‘‘𑀕𑀼𑀬𑁆𑀳𑀜𑁆𑀘 𑀢𑀲𑁆𑀲 [𑀕𑀼𑀬𑁆𑀳𑀫𑀲𑁆𑀲 𑀘 (𑀲𑁆𑀬𑀸.)] 𑀅𑀓𑁆𑀔𑀸𑀢𑀺, 𑀕𑀼𑀬𑁆𑀳𑀲𑁆𑀲 𑀧𑀭𑀺𑀕𑀽𑀳𑀢𑀺;

𑀆𑀧𑀤𑀸𑀲𑀼 𑀦 𑀚𑀳𑀸𑀢𑀺, 𑀔𑀻𑀡𑁂𑀦 𑀦𑀸𑀢𑀺𑀫𑀜𑁆𑀜𑀢𑀺.

‘‘𑀬𑀫𑁆𑀳𑀺 𑀏𑀢𑀸𑀦𑀺 𑀞𑀸𑀦𑀸𑀦𑀺, 𑀲𑀁𑀯𑀺𑀚𑁆𑀚𑀦𑁆𑀢𑀻𑀥 [𑀲𑀁𑀯𑀺𑀚𑁆𑀚𑀦𑁆𑀢𑀺 𑀘 (𑀓.)] 𑀧𑀼𑀕𑁆𑀕𑀮𑁂;

𑀲𑁄 𑀫𑀺𑀢𑁆𑀢𑁄 𑀫𑀺𑀢𑁆𑀢𑀓𑀸𑀫𑁂𑀦, 𑀪𑀚𑀺𑀢𑀩𑁆𑀩𑁄 𑀢𑀣𑀸𑀯𑀺𑀥𑁄’’𑀢𑀺. 𑀧𑀜𑁆𑀘𑀫𑀁;