𑁭. 𑀪𑁄𑀕𑀲𑀼𑀢𑁆𑀢𑀁

𑁨𑁨𑁭. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀪𑁄𑀕𑁂𑀲𑀼. 𑀓𑀢𑀫𑁂 𑀧𑀜𑁆𑀘? 𑀅𑀕𑁆𑀕𑀺𑀲𑀸𑀥𑀸𑀭𑀡𑀸 𑀪𑁄𑀕𑀸, 𑀉𑀤𑀓𑀲𑀸𑀥𑀸𑀭𑀡𑀸 𑀪𑁄𑀕𑀸, 𑀭𑀸𑀚𑀲𑀸𑀥𑀸𑀭𑀡𑀸 𑀪𑁄𑀕𑀸, 𑀘𑁄𑀭𑀲𑀸𑀥𑀸𑀭𑀡𑀸 𑀪𑁄𑀕𑀸, 𑀅𑀧𑁆𑀧𑀺𑀬𑁂𑀳𑀺 𑀤𑀸𑀬𑀸𑀤𑁂𑀳𑀺 𑀲𑀸𑀥𑀸𑀭𑀡𑀸 𑀪𑁄𑀕𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀤𑀻𑀦𑀯𑀸 𑀪𑁄𑀕𑁂𑀲𑀼.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀦𑀺𑀲𑀁𑀲𑀸 𑀪𑁄𑀕𑁂𑀲𑀼. 𑀓𑀢𑀫𑁂 𑀧𑀜𑁆𑀘? 𑀪𑁄𑀕𑁂 𑀦𑀺𑀲𑁆𑀲𑀸𑀬 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀭𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀭𑀢𑀺, 𑀧𑀼𑀢𑁆𑀢𑀤𑀸𑀭𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀭𑀢𑀺, 𑀫𑀺𑀢𑁆𑀢𑀸𑀫𑀘𑁆𑀘𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀭𑀢𑀺, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀉𑀤𑁆𑀥𑀕𑁆𑀕𑀺𑀓𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀢𑀺 𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀪𑁄𑀕𑁂𑀲𑀽’’𑀢𑀺. 𑀲𑀢𑁆𑀢𑀫𑀁.