𑁨. 𑀤𑀼𑀢𑀺𑀬𑀤𑀻𑀖𑀘𑀸𑀭𑀺𑀓𑀲𑀼𑀢𑁆𑀢𑀁

𑁨𑁨𑁨. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀢𑁆𑀣𑀘𑀸𑀭𑀺𑀓𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀯𑀺𑀳𑀭𑀢𑁄. 𑀓𑀢𑀫𑁂 𑀧𑀜𑁆𑀘? 𑀅𑀦𑀥𑀺𑀕𑀢𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀅𑀥𑀺𑀕𑀢𑀸 𑀧𑀭𑀺𑀳𑀸𑀬𑀢𑀺, 𑀅𑀥𑀺𑀕𑀢𑁂𑀦𑁂𑀓𑀘𑁆𑀘𑁂𑀦 𑀅𑀯𑀺𑀲𑀸𑀭𑀤𑁄 𑀳𑁄𑀢𑀺, 𑀕𑀸𑀴𑁆𑀳𑀁 𑀭𑁄𑀕𑀸𑀢𑀗𑁆𑀓𑀁 𑀨𑀼𑀲𑀢𑀺, 𑀦 𑀘 𑀫𑀺𑀢𑁆𑀢𑀯𑀸 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀤𑀻𑀦𑀯𑀸 𑀤𑀻𑀖𑀘𑀸𑀭𑀺𑀓𑀁 𑀅𑀦𑀯𑀢𑁆𑀣𑀘𑀸𑀭𑀺𑀓𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀯𑀺𑀳𑀭𑀢𑁄.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀦𑀺𑀲𑀁𑀲𑀸 𑀲𑀫𑀯𑀢𑁆𑀣𑀘𑀸𑀭𑁂. 𑀓𑀢𑀫𑁂 𑀧𑀜𑁆𑀘? 𑀅𑀦𑀥𑀺𑀕𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀅𑀥𑀺𑀕𑀢𑀸 𑀦 𑀧𑀭𑀺𑀳𑀸𑀬𑀢𑀺, 𑀅𑀥𑀺𑀕𑀢𑁂𑀦𑁂𑀓𑀘𑁆𑀘𑁂𑀦 𑀯𑀺𑀲𑀸𑀭𑀤𑁄 𑀳𑁄𑀢𑀺, 𑀦 𑀕𑀸𑀴𑁆𑀳𑀁 𑀭𑁄𑀕𑀸𑀢𑀗𑁆𑀓𑀁 𑀨𑀼𑀲𑀢𑀺, 𑀫𑀺𑀢𑁆𑀢𑀯𑀸 𑀘 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀲𑀫𑀯𑀢𑁆𑀣𑀘𑀸𑀭𑁂’’𑀢𑀺. 𑀤𑀼𑀢𑀺𑀬𑀁.