𑁪. 𑀩𑀳𑀼𑀪𑀸𑀡𑀺𑀲𑀼𑀢𑁆𑀢𑀁

𑁨𑁧𑁪. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀩𑀳𑀼𑀪𑀸𑀡𑀺𑀲𑁆𑀫𑀺𑀁 𑀧𑀼𑀕𑁆𑀕𑀮𑁂. 𑀓𑀢𑀫𑁂 𑀧𑀜𑁆𑀘? 𑀫𑀼𑀲𑀸 𑀪𑀡𑀢𑀺, 𑀧𑀺𑀲𑀼𑀡𑀁 𑀪𑀡𑀢𑀺, 𑀨𑀭𑀼𑀲𑀁 𑀪𑀡𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀁 𑀪𑀡𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀤𑀻𑀦𑀯𑀸 𑀩𑀳𑀼𑀪𑀸𑀡𑀺𑀲𑁆𑀫𑀺𑀁 𑀧𑀼𑀕𑁆𑀕𑀮𑁂.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀦𑀺𑀲𑀁𑀲𑀸 𑀫𑀦𑁆𑀢𑀪𑀸𑀡𑀺𑀲𑁆𑀫𑀺𑀁 𑀧𑀼𑀕𑁆𑀕𑀮𑁂. 𑀓𑀢𑀫𑁂 𑀧𑀜𑁆𑀘? 𑀦 𑀫𑀼𑀲𑀸 𑀪𑀡𑀢𑀺, 𑀦 𑀧𑀺𑀲𑀼𑀡𑀁 𑀪𑀡𑀢𑀺, 𑀦 𑀨𑀭𑀼𑀲𑀁 𑀪𑀡𑀢𑀺, 𑀦 𑀲𑀫𑁆𑀨𑀧𑁆𑀧𑀮𑀸𑀧𑀁 𑀪𑀡𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀫𑀦𑁆𑀢𑀪𑀸𑀡𑀺𑀲𑁆𑀫𑀺𑀁 𑀧𑀼𑀕𑁆𑀕𑀮𑁂’’𑀢𑀺. 𑀘𑀢𑀼𑀢𑁆𑀣𑀁.