𑁩. 𑀅𑀲𑁆𑀲𑀸𑀚𑀸𑀦𑀻𑀬𑀲𑀼𑀢𑁆𑀢𑀁

𑁨𑁦𑁩. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 [𑀪𑀤𑁆𑀤𑁄 (𑀧𑀻.)] 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀚𑁆𑀚𑀯𑁂𑀦, 𑀚𑀯𑁂𑀦, 𑀫𑀤𑁆𑀤𑀯𑁂𑀦, 𑀔𑀦𑁆𑀢𑀺𑀬𑀸, 𑀲𑁄𑀭𑀘𑁆𑀘𑁂𑀦 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. ‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀚𑁆𑀚𑀯𑁂𑀦, 𑀚𑀯𑁂𑀦, 𑀫𑀤𑁆𑀤𑀯𑁂𑀦, 𑀔𑀦𑁆𑀢𑀺𑀬𑀸, 𑀲𑁄𑀭𑀘𑁆𑀘𑁂𑀦 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀢𑀢𑀺𑀬𑀁.