(𑁨𑁦) 𑁫. 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄

𑁧. 𑀲𑁄𑀡𑀲𑀼𑀢𑁆𑀢𑀁

𑁧𑁯𑁧. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑁄𑀭𑀸𑀡𑀸 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀸 𑀏𑀢𑀭𑀳𑀺 𑀲𑀼𑀦𑀔𑁂𑀲𑀼 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑁄 𑀩𑁆𑀭𑀸𑀳𑁆𑀫𑀡𑁂𑀲𑀼. 𑀓𑀢𑀫𑁂 𑀧𑀜𑁆𑀘? 𑀧𑀼𑀩𑁆𑀩𑁂 𑀲𑀼𑀤𑀁 [𑀧𑀼𑀩𑁆𑀩𑀲𑁆𑀲𑀼𑀤𑀁 (𑀓.)], 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀺𑀁𑀬𑁂𑀯 𑀕𑀘𑁆𑀙𑀦𑁆𑀢𑀺, 𑀦𑁄 𑀅𑀩𑁆𑀭𑀸𑀳𑁆𑀫𑀡𑀺𑀁. 𑀏𑀢𑀭𑀳𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀺𑀫𑁆𑀧𑀺 𑀕𑀘𑁆𑀙𑀦𑁆𑀢𑀺, 𑀅𑀩𑁆𑀭𑀸𑀳𑁆𑀫𑀡𑀺𑀫𑁆𑀧𑀺 𑀕𑀘𑁆𑀙𑀦𑁆𑀢𑀺. 𑀏𑀢𑀭𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀦𑀔𑀸 𑀲𑀼𑀦𑀔𑀺𑀁𑀬𑁂𑀯 𑀕𑀘𑁆𑀙𑀦𑁆𑀢𑀺, 𑀦𑁄 𑀅𑀲𑀼𑀦𑀔𑀺𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀧𑁄𑀭𑀸𑀡𑁄 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁄 𑀏𑀢𑀭𑀳𑀺 𑀲𑀼𑀦𑀔𑁂𑀲𑀼 𑀲𑀦𑁆𑀤𑀺𑀲𑁆𑀲𑀢𑀺, 𑀦𑁄 𑀩𑁆𑀭𑀸𑀳𑁆𑀫𑀡𑁂𑀲𑀼.

‘‘𑀧𑀼𑀩𑁆𑀩𑁂 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀺𑀁 𑀉𑀢𑀼𑀦𑀺𑀁𑀬𑁂𑀯 𑀕𑀘𑁆𑀙𑀦𑁆𑀢𑀺, 𑀦𑁄 𑀅𑀦𑀼𑀢𑀼𑀦𑀺𑀁. 𑀏𑀢𑀭𑀳𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀺𑀁 𑀉𑀢𑀼𑀦𑀺𑀫𑁆𑀧𑀺 𑀕𑀘𑁆𑀙𑀦𑁆𑀢𑀺, 𑀅𑀦𑀼𑀢𑀼𑀦𑀺𑀫𑁆𑀧𑀺 𑀕𑀘𑁆𑀙𑀦𑁆𑀢𑀺. 𑀏𑀢𑀭𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀦𑀔𑀸 𑀲𑀼𑀦𑀔𑀺𑀁 𑀉𑀢𑀼𑀦𑀺𑀁𑀬𑁂𑀯 𑀕𑀘𑁆𑀙𑀦𑁆𑀢𑀺, 𑀦𑁄 𑀅𑀦𑀼𑀢𑀼𑀦𑀺𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀧𑁄𑀭𑀸𑀡𑁄 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁄 𑀏𑀢𑀭𑀳𑀺 𑀲𑀼𑀦𑀔𑁂𑀲𑀼 𑀲𑀦𑁆𑀤𑀺𑀲𑁆𑀲𑀢𑀺, 𑀦𑁄 𑀩𑁆𑀭𑀸𑀳𑁆𑀫𑀡𑁂𑀲𑀼.

‘‘𑀧𑀼𑀩𑁆𑀩𑁂 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀺𑀁 𑀦𑁂𑀯 𑀓𑀺𑀡𑀦𑁆𑀢𑀺 𑀦𑁄 𑀯𑀺𑀓𑁆𑀓𑀺𑀡𑀦𑁆𑀢𑀺, 𑀲𑀫𑁆𑀧𑀺𑀬𑁂𑀦𑁂𑀯 𑀲𑀁𑀯𑀸𑀲𑀁 𑀲𑀁𑀩𑀦𑁆𑀥𑀸𑀬 [𑀲𑀁𑀲𑀕𑁆𑀕𑀢𑁆𑀣𑀸𑀬 (𑀲𑀻. 𑀧𑀻.)] 𑀲𑀁𑀧𑀯𑀢𑁆𑀢𑁂𑀦𑁆𑀢𑀺. 𑀏𑀢𑀭𑀳𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀺𑀁 𑀓𑀺𑀡𑀦𑁆𑀢𑀺𑀧𑀺 𑀯𑀺𑀓𑁆𑀓𑀺𑀡𑀦𑁆𑀢𑀺𑀧𑀺, 𑀲𑀫𑁆𑀧𑀺𑀬𑁂𑀦𑀧𑀺 𑀲𑀁𑀯𑀸𑀲𑀁 𑀲𑀁𑀩𑀦𑁆𑀥𑀸𑀬 𑀲𑀁𑀧𑀯𑀢𑁆𑀢𑁂𑀦𑁆𑀢𑀺. 𑀏𑀢𑀭𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀦𑀔𑀸 𑀲𑀼𑀦𑀔𑀺𑀁 𑀦𑁂𑀯 𑀓𑀺𑀡𑀦𑁆𑀢𑀺 𑀦𑁄 𑀯𑀺𑀓𑁆𑀓𑀺𑀡𑀦𑁆𑀢𑀺, 𑀲𑀫𑁆𑀧𑀺𑀬𑁂𑀦𑁂𑀯 𑀲𑀁𑀯𑀸𑀲𑀁 𑀲𑀁𑀩𑀦𑁆𑀥𑀸𑀬 𑀲𑀁𑀧𑀯𑀢𑁆𑀢𑁂𑀦𑁆𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀧𑁄𑀭𑀸𑀡𑁄 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁄 𑀏𑀢𑀭𑀳𑀺 𑀲𑀼𑀦𑀔𑁂𑀲𑀼 𑀲𑀦𑁆𑀤𑀺𑀲𑁆𑀲𑀢𑀺, 𑀦𑁄 𑀩𑁆𑀭𑀸𑀳𑁆𑀫𑀡𑁂𑀲𑀼.

‘‘𑀧𑀼𑀩𑁆𑀩𑁂 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀸 𑀦 𑀲𑀦𑁆𑀦𑀺𑀥𑀺𑀁 𑀓𑀭𑁄𑀦𑁆𑀢𑀺 𑀥𑀦𑀲𑁆𑀲𑀧𑀺 𑀥𑀜𑁆𑀜𑀲𑁆𑀲𑀧𑀺 𑀭𑀚𑀢𑀲𑁆𑀲𑀧𑀺 𑀚𑀸𑀢𑀭𑀽𑀧𑀲𑁆𑀲𑀧𑀺. 𑀏𑀢𑀭𑀳𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀸 𑀲𑀦𑁆𑀦𑀺𑀥𑀺𑀁 𑀓𑀭𑁄𑀦𑁆𑀢𑀺 𑀥𑀦𑀲𑁆𑀲𑀧𑀺 𑀥𑀜𑁆𑀜𑀲𑁆𑀲𑀧𑀺 𑀭𑀚𑀢𑀲𑁆𑀲𑀧𑀺 𑀚𑀸𑀢𑀭𑀽𑀧𑀲𑁆𑀲𑀧𑀺. 𑀏𑀢𑀭𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀦𑀔𑀸 𑀦 𑀲𑀦𑁆𑀦𑀺𑀥𑀺𑀁 𑀓𑀭𑁄𑀦𑁆𑀢𑀺 𑀥𑀦𑀲𑁆𑀲𑀧𑀺 𑀥𑀜𑁆𑀜𑀲𑁆𑀲𑀧𑀺 𑀭𑀚𑀢𑀲𑁆𑀲𑀧𑀺 𑀚𑀸𑀢𑀭𑀽𑀧𑀲𑁆𑀲𑀧𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀧𑁄𑀭𑀸𑀡𑁄 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁄 𑀏𑀢𑀭𑀳𑀺 𑀲𑀼𑀦𑀔𑁂𑀲𑀼 𑀲𑀦𑁆𑀤𑀺𑀲𑁆𑀲𑀢𑀺, 𑀦𑁄 𑀩𑁆𑀭𑀸𑀳𑁆𑀫𑀡𑁂𑀲𑀼.

‘‘𑀧𑀼𑀩𑁆𑀩𑁂 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀸 𑀲𑀸𑀬𑀁 𑀲𑀸𑀬𑀫𑀸𑀲𑀸𑀬 𑀧𑀸𑀢𑁄 𑀧𑀸𑀢𑀭𑀸𑀲𑀸𑀬 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀏𑀢𑀭𑀳𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀸 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀯𑀲𑁂𑀲𑀁 𑀆𑀤𑀸𑀬 𑀧𑀓𑁆𑀓𑀫𑀦𑁆𑀢𑀺. 𑀏𑀢𑀭𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀦𑀔𑀸 𑀲𑀸𑀬𑀁 𑀲𑀸𑀬𑀫𑀸𑀲𑀸𑀬 𑀧𑀸𑀢𑁄 𑀧𑀸𑀢𑀭𑀸𑀲𑀸𑀬 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑁄 𑀧𑁄𑀭𑀸𑀡𑁄 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁄 𑀏𑀢𑀭𑀳𑀺 𑀲𑀼𑀦𑀔𑁂𑀲𑀼 𑀲𑀦𑁆𑀤𑀺𑀲𑁆𑀲𑀢𑀺, 𑀦𑁄 𑀩𑁆𑀭𑀸𑀳𑁆𑀫𑀡𑁂𑀲𑀼. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀧𑁄𑀭𑀸𑀡𑀸 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀸 𑀏𑀢𑀭𑀳𑀺 𑀲𑀼𑀦𑀔𑁂𑀲𑀼 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑁄 𑀩𑁆𑀭𑀸𑀳𑁆𑀫𑀡𑁂𑀲𑀽’’𑀢𑀺. 𑀧𑀞𑀫𑀁.

𑁨. 𑀤𑁄𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁧𑁯𑁨. 𑀅𑀣 𑀔𑁄 𑀤𑁄𑀡𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀤𑁄𑀡𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀕𑁄𑀢𑀫 𑁋 ‘𑀦 𑀲𑀫𑀡𑁄 𑀕𑁄𑀢𑀫𑁄 𑀩𑁆𑀭𑀸𑀳𑁆𑀫𑀡𑁂 𑀚𑀺𑀡𑁆𑀡𑁂 𑀯𑀼𑀟𑁆𑀠𑁂 𑀫𑀳𑀮𑁆𑀮𑀓𑁂 𑀅𑀤𑁆𑀥𑀕𑀢𑁂 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀻’𑀢𑀺. 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀢𑀣𑁂𑀯. 𑀦 𑀳𑀺 𑀪𑀯𑀁 𑀕𑁄𑀢𑀫𑁄 𑀩𑁆𑀭𑀸𑀳𑁆𑀫𑀡𑁂 𑀚𑀺𑀡𑁆𑀡𑁂 𑀯𑀼𑀟𑁆𑀠𑁂 𑀫𑀳𑀮𑁆𑀮𑀓𑁂 𑀅𑀤𑁆𑀥𑀕𑀢𑁂 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀺. 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀦 𑀲𑀫𑁆𑀧𑀦𑁆𑀦𑀫𑁂𑀯𑀸’’𑀢𑀺. ‘‘𑀢𑁆𑀯𑀫𑁆𑀧𑀺 𑀦𑁄, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀚𑀸𑀦𑀸𑀲𑀻’’𑀢𑀺? ‘‘𑀬𑀜𑁆𑀳𑀺 𑀢𑀁, 𑀪𑁄 𑀕𑁄𑀢𑀫, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑁋 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁, 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄’𑀢𑀺, 𑀫𑀫𑁂𑀯 𑀢𑀁, 𑀪𑁄 𑀕𑁄𑀢𑀫, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬. 𑀅𑀳𑀜𑁆𑀳𑀺, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑁋 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁, 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄’’𑀢𑀺.

‘‘𑀬𑁂 𑀔𑁄, 𑀢𑁂 𑀤𑁄𑀡, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀫𑀦𑁆𑀢𑀸𑀦𑀁 𑀓𑀢𑁆𑀢𑀸𑀭𑁄 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀸𑀭𑁄, 𑀬𑁂𑀲𑀫𑀺𑀤𑀁 𑀏𑀢𑀭𑀳𑀺 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀫𑀦𑁆𑀢𑀧𑀤𑀁 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀺𑀳𑀺𑀢𑀁 𑀢𑀤𑀦𑀼𑀕𑀸𑀬𑀦𑁆𑀢𑀺 𑀢𑀤𑀦𑀼𑀪𑀸𑀲𑀦𑁆𑀢𑀺 𑀪𑀸𑀲𑀺𑀢𑀫𑀦𑀼𑀪𑀸𑀲𑀦𑁆𑀢𑀺 𑀲𑀚𑁆𑀛𑀸𑀬𑀺𑀢𑀫𑀦𑀼𑀲𑀚𑁆𑀛𑀸𑀬𑀦𑁆𑀢𑀺 𑀯𑀸𑀘𑀺𑀢𑀫𑀦𑀼𑀯𑀸𑀘𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑁄, 𑀯𑀸𑀫𑀓𑁄, 𑀯𑀸𑀫𑀤𑁂𑀯𑁄, 𑀯𑁂𑀲𑁆𑀲𑀸𑀫𑀺𑀢𑁆𑀢𑁄, 𑀬𑀫𑀤𑀕𑁆𑀕𑀺 [𑀬𑀫𑀢𑀕𑁆𑀕𑀺 (𑀲𑀻.) 𑀤𑀻. 𑀦𑀺. 𑁧.𑁨𑁮𑁪, 𑁫𑁨𑁬, 𑁫𑁩𑁬; 𑀫. 𑀦𑀺. 𑁨.𑁪𑁨𑁭; 𑀫𑀳𑀸𑀯. 𑁩𑁦𑁦; 𑀅. 𑀦𑀺. 𑁫.𑁧𑁯𑁨 𑀧𑀲𑁆𑀲𑀺𑀢𑀩𑁆𑀩𑀁], 𑀅𑀗𑁆𑀕𑀻𑀭𑀲𑁄, 𑀪𑀸𑀭𑀤𑁆𑀯𑀸𑀚𑁄, 𑀯𑀸𑀲𑁂𑀝𑁆𑀞𑁄, 𑀓𑀲𑁆𑀲𑀧𑁄, 𑀪𑀕𑀼; 𑀢𑁆𑀬𑀸𑀲𑁆𑀲𑀼’𑀫𑁂 𑀧𑀜𑁆𑀘 𑀩𑁆𑀭𑀸𑀳𑁆𑀫𑀡𑁂 𑀧𑀜𑁆𑀜𑀸𑀧𑁂𑀦𑁆𑀢𑀺 𑁋 𑀩𑁆𑀭𑀳𑁆𑀫𑀲𑀫𑀁, 𑀤𑁂𑀯𑀲𑀫𑀁, 𑀫𑀭𑀺𑀬𑀸𑀤𑀁, 𑀲𑀫𑁆𑀪𑀺𑀦𑁆𑀦𑀫𑀭𑀺𑀬𑀸𑀤𑀁, 𑀩𑁆𑀭𑀸𑀳𑁆𑀫𑀡𑀘𑀡𑁆𑀟𑀸𑀮𑀁𑀬𑁂𑀯 𑀧𑀜𑁆𑀘𑀫𑀁. 𑀢𑁂𑀲𑀁 𑀢𑁆𑀯𑀁 𑀤𑁄𑀡, 𑀓𑀢𑀫𑁄’’𑀢𑀺?

‘‘𑀦 𑀔𑁄 𑀫𑀬𑀁, 𑀪𑁄 𑀕𑁄𑀢𑀫, 𑀧𑀜𑁆𑀘 𑀩𑁆𑀭𑀸𑀳𑁆𑀫𑀡𑁂 𑀚𑀸𑀦𑀸𑀫, 𑀅𑀣 𑀔𑁄 𑀫𑀬𑀁 𑀩𑁆𑀭𑀸𑀳𑁆𑀫𑀡𑀸𑀢𑁆𑀯𑁂𑀯 𑀚𑀸𑀦𑀸𑀫. 𑀲𑀸𑀥𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼 𑀬𑀣𑀸 𑀅𑀳𑀁 𑀇𑀫𑁂 𑀧𑀜𑁆𑀘 𑀩𑁆𑀭𑀸𑀳𑁆𑀫𑀡𑁂 𑀚𑀸𑀦𑁂𑀬𑁆𑀬’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑁄𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁 𑀪𑁄’’𑀢𑀺 𑀔𑁄 𑀤𑁄𑀡𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀣𑀜𑁆𑀘, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀲𑀫𑁄 𑀳𑁄𑀢𑀺? 𑀇𑀥, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑁋 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀲𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 [𑀓𑁄𑀥𑀸𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 (𑀲𑁆𑀬𑀸. 𑀓.)] 𑀘𑀭𑀢𑀺 𑀫𑀦𑁆𑀢𑁂 𑀅𑀥𑀻𑀬𑀫𑀸𑀦𑁄. 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀫𑀦𑁆𑀢𑁂 𑀅𑀥𑀻𑀬𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀥𑀦𑀁 𑀧𑀭𑀺𑀬𑁂𑀲𑀢𑀺 𑀥𑀫𑁆𑀫𑁂𑀦𑁂𑀯, 𑀦𑁄 𑀅𑀥𑀫𑁆𑀫𑁂𑀦.

‘‘𑀢𑀢𑁆𑀣 𑀘, 𑀤𑁄𑀡, 𑀓𑁄 𑀥𑀫𑁆𑀫𑁄? 𑀦𑁂𑀯 𑀓𑀲𑀺𑀬𑀸 𑀦 𑀯𑀡𑀺𑀚𑁆𑀚𑀸𑀬 𑀦 𑀕𑁄𑀭𑀓𑁆𑀔𑁂𑀦 𑀦 𑀇𑀲𑁆𑀲𑀢𑁆𑀣𑁂𑀦 [𑀦 𑀇𑀲𑁆𑀲𑀢𑁆𑀢𑁂𑀦 (𑀓.)] 𑀦 𑀭𑀸𑀚𑀧𑁄𑀭𑀺𑀲𑁂𑀦 𑀦 𑀲𑀺𑀧𑁆𑀧𑀜𑁆𑀜𑀢𑀭𑁂𑀦, 𑀓𑁂𑀯𑀮𑀁 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀓𑀧𑀸𑀮𑀁 𑀅𑀦𑀢𑀺𑀫𑀜𑁆𑀜𑀫𑀸𑀦𑁄. 𑀲𑁄 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀥𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 [𑀦𑀻𑀬𑁆𑀬𑀸𑀤𑁂𑀢𑁆𑀯𑀸 (𑀲𑀻.), 𑀦𑀻𑀬𑀸𑀤𑁂𑀢𑁆𑀯𑀸 (𑀧𑀻.), 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 (𑀓𑀢𑁆𑀣𑀘𑀺)] 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁 [𑀘𑀢𑀼𑀢𑁆𑀣𑀺𑀁 (𑀲𑀻.)], 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 [𑀅𑀩𑁆𑀬𑀸𑀧𑀚𑁆𑀛𑁂𑀦 (𑀓.) 𑀅𑀩𑁆𑀬𑀸𑀩𑀚𑁆𑀛𑁂𑀦 (?)] 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀓𑀭𑀼𑀡𑀸…𑀧𑁂… 𑀫𑀼𑀤𑀺𑀢𑀸… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁, 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑁄 𑀇𑀫𑁂 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀲𑀫𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑀲𑀫𑁄 𑀳𑁄𑀢𑀺? 𑀇𑀥, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑁋 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀲𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑀫𑀦𑁆𑀢𑁂 𑀅𑀥𑀻𑀬𑀫𑀸𑀦𑁄. 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀫𑀦𑁆𑀢𑁂 𑀅𑀥𑀻𑀬𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀥𑀦𑀁 𑀧𑀭𑀺𑀬𑁂𑀲𑀢𑀺 𑀥𑀫𑁆𑀫𑁂𑀦𑁂𑀯, 𑀦𑁄 𑀅𑀥𑀫𑁆𑀫𑁂𑀦. 𑀢𑀢𑁆𑀣 𑀘, 𑀤𑁄𑀡, 𑀓𑁄 𑀥𑀫𑁆𑀫𑁄? 𑀦𑁂𑀯 𑀓𑀲𑀺𑀬𑀸 𑀦 𑀯𑀡𑀺𑀚𑁆𑀚𑀸𑀬 𑀦 𑀕𑁄𑀭𑀓𑁆𑀔𑁂𑀦 𑀦 𑀇𑀲𑁆𑀲𑀢𑁆𑀣𑁂𑀦 𑀦 𑀭𑀸𑀚𑀧𑁄𑀭𑀺𑀲𑁂𑀦 𑀦 𑀲𑀺𑀧𑁆𑀧𑀜𑁆𑀜𑀢𑀭𑁂𑀦, 𑀓𑁂𑀯𑀮𑀁 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀓𑀧𑀸𑀮𑀁 𑀅𑀦𑀢𑀺𑀫𑀜𑁆𑀜𑀫𑀸𑀦𑁄. 𑀲𑁄 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀥𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀤𑀸𑀭𑀁 𑀧𑀭𑀺𑀬𑁂𑀲𑀢𑀺 𑀥𑀫𑁆𑀫𑁂𑀦𑁂𑀯, 𑀦𑁄 𑀅𑀥𑀫𑁆𑀫𑁂𑀦.

‘‘𑀢𑀢𑁆𑀣 𑀘, 𑀤𑁄𑀡, 𑀓𑁄 𑀥𑀫𑁆𑀫𑁄? 𑀦𑁂𑀯 𑀓𑀬𑁂𑀦 𑀦 𑀯𑀺𑀓𑁆𑀓𑀬𑁂𑀦, 𑀩𑁆𑀭𑀸𑀳𑁆𑀫𑀡𑀺𑀁𑀬𑁂𑀯 𑀉𑀤𑀓𑀽𑀧𑀲𑁆𑀲𑀝𑁆𑀞𑀁. 𑀲𑁄 𑀩𑁆𑀭𑀸𑀳𑁆𑀫𑀡𑀺𑀁𑀬𑁂𑀯 𑀕𑀘𑁆𑀙𑀢𑀺, 𑀦 𑀔𑀢𑁆𑀢𑀺𑀬𑀺𑀁 𑀦 𑀯𑁂𑀲𑁆𑀲𑀺𑀁 𑀦 𑀲𑀼𑀤𑁆𑀤𑀺𑀁 𑀦 𑀘𑀡𑁆𑀟𑀸𑀮𑀺𑀁 𑀦 𑀦𑁂𑀲𑀸𑀤𑀺𑀁 𑀦 𑀯𑁂𑀦𑀺𑀁 [𑀦 𑀯𑁂𑀡𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦 𑀭𑀣𑀓𑀸𑀭𑀺𑀁 𑀦 𑀧𑀼𑀓𑁆𑀓𑀼𑀲𑀺𑀁 𑀕𑀘𑁆𑀙𑀢𑀺, 𑀦 𑀕𑀩𑁆𑀪𑀺𑀦𑀺𑀁 𑀕𑀘𑁆𑀙𑀢𑀺, 𑀦 𑀧𑀸𑀬𑀫𑀸𑀦𑀁 𑀕𑀘𑁆𑀙𑀢𑀺, 𑀦 𑀅𑀦𑀼𑀢𑀼𑀦𑀺𑀁 𑀕𑀘𑁆𑀙𑀢𑀺. 𑀓𑀲𑁆𑀫𑀸 𑀘, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀦 𑀕𑀩𑁆𑀪𑀺𑀦𑀺𑀁 𑀕𑀘𑁆𑀙𑀢𑀺? 𑀲𑀘𑁂, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀕𑀩𑁆𑀪𑀺𑀦𑀺𑀁 𑀕𑀘𑁆𑀙𑀢𑀺, 𑀅𑀢𑀺𑀫𑀻𑀴𑁆𑀳𑀚𑁄 𑀦𑀸𑀫 𑀲𑁄 𑀳𑁄𑀢𑀺 𑀫𑀸𑀡𑀯𑀓𑁄 𑀯𑀸 𑀫𑀸𑀡𑀯𑀺𑀓𑀸 [𑀫𑀸𑀡𑀯𑀓𑀻 (𑀓.)] 𑀯𑀸. 𑀢𑀲𑁆𑀫𑀸, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀦 𑀕𑀩𑁆𑀪𑀺𑀦𑀺𑀁 𑀕𑀘𑁆𑀙𑀢𑀺. 𑀓𑀲𑁆𑀫𑀸 𑀘, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀦 𑀧𑀸𑀬𑀫𑀸𑀦𑀁 𑀕𑀘𑁆𑀙𑀢𑀺? 𑀲𑀘𑁂, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀧𑀸𑀬𑀫𑀸𑀦𑀁 𑀕𑀘𑁆𑀙𑀢𑀺, 𑀅𑀲𑀼𑀘𑀺𑀧𑀝𑀺𑀧𑀻𑀴𑀺𑀢𑁄 𑀦𑀸𑀫 𑀲𑁄 𑀳𑁄𑀢𑀺 𑀫𑀸𑀡𑀯𑀓𑁄 𑀯𑀸 𑀫𑀸𑀡𑀯𑀺𑀓𑀸 𑀯𑀸. 𑀢𑀲𑁆𑀫𑀸, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀦 𑀧𑀸𑀬𑀫𑀸𑀦𑀁 𑀕𑀘𑁆𑀙𑀢𑀺. 𑀢𑀲𑁆𑀲 𑀲𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑀻 𑀦𑁂𑀯 𑀓𑀸𑀫𑀢𑁆𑀣𑀸 𑀦 𑀤𑀯𑀢𑁆𑀣𑀸 𑀦 𑀭𑀢𑀢𑁆𑀣𑀸, 𑀧𑀚𑀢𑁆𑀣𑀸𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀳𑁄𑀢𑀺. 𑀲𑁄 𑀫𑁂𑀣𑀼𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀇𑀫𑁂 𑀘𑀢𑁆𑀢𑀸𑀭𑁄 𑀛𑀸𑀦𑁂 𑀪𑀸𑀯𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑀲𑀫𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀫𑀭𑀺𑀬𑀸𑀤𑁄 𑀳𑁄𑀢𑀺? 𑀇𑀥, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑁋 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀲𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑀫𑀦𑁆𑀢𑁂 𑀅𑀥𑀻𑀬𑀫𑀸𑀦𑁄. 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀫𑀦𑁆𑀢𑁂 𑀅𑀥𑀻𑀬𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀥𑀦𑀁 𑀧𑀭𑀺𑀬𑁂𑀲𑀢𑀺 𑀥𑀫𑁆𑀫𑁂𑀦𑁂𑀯, 𑀦𑁄 𑀅𑀥𑀫𑁆𑀫𑁂𑀦. 𑀢𑀢𑁆𑀣 𑀘, 𑀤𑁄𑀡, 𑀓𑁄 𑀥𑀫𑁆𑀫𑁄? 𑀦𑁂𑀯 𑀓𑀲𑀺𑀬𑀸 𑀦 𑀯𑀡𑀺𑀚𑁆𑀚𑀸𑀬 𑀦 𑀕𑁄𑀭𑀓𑁆𑀔𑁂𑀦 𑀦 𑀇𑀲𑁆𑀲𑀢𑁆𑀣𑁂𑀦 𑀦 𑀭𑀸𑀚𑀧𑁄𑀭𑀺𑀲𑁂𑀦 𑀦 𑀲𑀺𑀧𑁆𑀧𑀜𑁆𑀜𑀢𑀭𑁂𑀦, 𑀓𑁂𑀯𑀮𑀁 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀓𑀧𑀸𑀮𑀁 𑀅𑀦𑀢𑀺𑀫𑀜𑁆𑀜𑀫𑀸𑀦𑁄. 𑀲𑁄 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀥𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀤𑀸𑀭𑀁 𑀧𑀭𑀺𑀬𑁂𑀲𑀢𑀺 𑀥𑀫𑁆𑀫𑁂𑀦𑁂𑀯, 𑀦𑁄 𑀅𑀥𑀫𑁆𑀫𑁂𑀦.

‘‘𑀢𑀢𑁆𑀣 𑀘, 𑀤𑁄𑀡, 𑀓𑁄 𑀥𑀫𑁆𑀫𑁄? 𑀦𑁂𑀯 𑀓𑀬𑁂𑀦 𑀦 𑀯𑀺𑀓𑁆𑀓𑀬𑁂𑀦, 𑀩𑁆𑀭𑀸𑀳𑁆𑀫𑀡𑀺𑀁𑀬𑁂𑀯 𑀉𑀤𑀓𑀽𑀧𑀲𑁆𑀲𑀝𑁆𑀞𑀁. 𑀲𑁄 𑀩𑁆𑀭𑀸𑀳𑁆𑀫𑀡𑀺𑀁𑀬𑁂𑀯 𑀕𑀘𑁆𑀙𑀢𑀺, 𑀦 𑀔𑀢𑁆𑀢𑀺𑀬𑀺𑀁 𑀦 𑀯𑁂𑀲𑁆𑀲𑀺𑀁 𑀦 𑀲𑀼𑀤𑁆𑀤𑀺𑀁 𑀦 𑀘𑀡𑁆𑀟𑀸𑀮𑀺𑀁 𑀦 𑀦𑁂𑀲𑀸𑀤𑀺𑀁 𑀦 𑀯𑁂𑀦𑀺𑀁 𑀦 𑀭𑀣𑀓𑀸𑀭𑀺𑀁 𑀦 𑀧𑀼𑀓𑁆𑀓𑀼𑀲𑀺𑀁 𑀕𑀘𑁆𑀙𑀢𑀺, 𑀦 𑀕𑀩𑁆𑀪𑀺𑀦𑀺𑀁 𑀕𑀘𑁆𑀙𑀢𑀺, 𑀦 𑀧𑀸𑀬𑀫𑀸𑀦𑀁 𑀕𑀘𑁆𑀙𑀢𑀺, 𑀦 𑀅𑀦𑀼𑀢𑀼𑀦𑀺𑀁 𑀕𑀘𑁆𑀙𑀢𑀺. 𑀓𑀲𑁆𑀫𑀸 𑀘, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀦 𑀕𑀩𑁆𑀪𑀺𑀦𑀺𑀁 𑀕𑀘𑁆𑀙𑀢𑀺? 𑀲𑀘𑁂, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀕𑀩𑁆𑀪𑀺𑀦𑀺𑀁 𑀕𑀘𑁆𑀙𑀢𑀺, 𑀅𑀢𑀺𑀫𑀻𑀴𑁆𑀳𑀚𑁄 𑀦𑀸𑀫 𑀲𑁄 𑀳𑁄𑀢𑀺 𑀫𑀸𑀡𑀯𑀓𑁄 𑀯𑀸 𑀫𑀸𑀡𑀯𑀺𑀓𑀸 𑀯𑀸. 𑀢𑀲𑁆𑀫𑀸, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀦 𑀕𑀩𑁆𑀪𑀺𑀦𑀺𑀁 𑀕𑀘𑁆𑀙𑀢𑀺. 𑀓𑀲𑁆𑀫𑀸 𑀘, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀦 𑀧𑀸𑀬𑀫𑀸𑀦𑀁 𑀕𑀘𑁆𑀙𑀢𑀺? 𑀲𑀘𑁂, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀧𑀸𑀬𑀫𑀸𑀦𑀁 𑀕𑀘𑁆𑀙𑀢𑀺, 𑀅𑀲𑀼𑀘𑀺𑀧𑀝𑀺𑀧𑀻𑀴𑀺𑀢𑁄 𑀦𑀸𑀫 𑀲𑁄 𑀳𑁄𑀢𑀺 𑀫𑀸𑀡𑀯𑀓𑁄 𑀯𑀸 𑀫𑀸𑀡𑀯𑀺𑀓𑀸 𑀯𑀸. 𑀢𑀲𑁆𑀫𑀸, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀦 𑀧𑀸𑀬𑀫𑀸𑀦𑀁 𑀕𑀘𑁆𑀙𑀢𑀺. 𑀢𑀲𑁆𑀲 𑀲𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑀻 𑀦𑁂𑀯 𑀓𑀸𑀫𑀢𑁆𑀣𑀸 𑀦 𑀤𑀯𑀢𑁆𑀣𑀸 𑀦 𑀭𑀢𑀢𑁆𑀣𑀸, 𑀧𑀚𑀢𑁆𑀣𑀸𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀳𑁄𑀢𑀺. 𑀲𑁄 𑀫𑁂𑀣𑀼𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀫𑁂𑀯 𑀧𑀼𑀢𑁆𑀢𑀲𑁆𑀲𑀸𑀤𑀁 𑀦𑀺𑀓𑀸𑀫𑀬𑀫𑀸𑀦𑁄 𑀓𑀼𑀝𑀼𑀫𑁆𑀩𑀁 𑀅𑀚𑁆𑀛𑀸𑀯𑀲𑀢𑀺, 𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀬𑀸𑀯 𑀧𑁄𑀭𑀸𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀭𑀺𑀬𑀸𑀤𑁄 𑀢𑀢𑁆𑀣 𑀢𑀺𑀝𑁆𑀞𑀢𑀺, 𑀢𑀁 𑀦 𑀯𑀻𑀢𑀺𑀓𑁆𑀓𑀫𑀢𑀺. ‘𑀬𑀸𑀯 𑀧𑁄𑀭𑀸𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀭𑀺𑀬𑀸𑀤𑁄 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑁄 𑀞𑀺𑀢𑁄 𑀢𑀁 𑀦 𑀯𑀻𑀢𑀺𑀓𑁆𑀓𑀫𑀢𑀻’𑀢𑀺, 𑀔𑁄, 𑀤𑁄𑀡, 𑀢𑀲𑁆𑀫𑀸 𑀩𑁆𑀭𑀸𑀳𑁆𑀫𑀡𑁄 𑀫𑀭𑀺𑀬𑀸𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀫𑀭𑀺𑀬𑀸𑀤𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀲𑀫𑁆𑀪𑀺𑀦𑁆𑀦𑀫𑀭𑀺𑀬𑀸𑀤𑁄 𑀳𑁄𑀢𑀺? 𑀇𑀥, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑁋 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀲𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑀫𑀦𑁆𑀢𑁂 𑀅𑀥𑀻𑀬𑀫𑀸𑀦𑁄. 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀫𑀦𑁆𑀢𑁂 𑀅𑀥𑀻𑀬𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀥𑀦𑀁 𑀧𑀭𑀺𑀬𑁂𑀲𑀢𑀺 𑀥𑀫𑁆𑀫𑁂𑀦𑁂𑀯, 𑀦𑁄 𑀅𑀥𑀫𑁆𑀫𑁂𑀦.

‘‘𑀢𑀢𑁆𑀣 𑀘, 𑀤𑁄𑀡, 𑀓𑁄 𑀥𑀫𑁆𑀫𑁄? 𑀦𑁂𑀯 𑀓𑀲𑀺𑀬𑀸 𑀦 𑀯𑀡𑀺𑀚𑁆𑀚𑀸𑀬 𑀦 𑀕𑁄𑀭𑀓𑁆𑀔𑁂𑀦 𑀦 𑀇𑀲𑁆𑀲𑀢𑁆𑀣𑁂𑀦 𑀦 𑀭𑀸𑀚𑀧𑁄𑀭𑀺𑀲𑁂𑀦 𑀦 𑀲𑀺𑀧𑁆𑀧𑀜𑁆𑀜𑀢𑀭𑁂𑀦, 𑀓𑁂𑀯𑀮𑀁 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀓𑀧𑀸𑀮𑀁 𑀅𑀦𑀢𑀺𑀫𑀜𑁆𑀜𑀫𑀸𑀦𑁄. 𑀲𑁄 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀥𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀤𑀸𑀭𑀁 𑀧𑀭𑀺𑀬𑁂𑀲𑀢𑀺 𑀥𑀫𑁆𑀫𑁂𑀦𑀧𑀺 𑀅𑀥𑀫𑁆𑀫𑁂𑀦𑀧𑀺 𑀓𑀬𑁂𑀦𑀧𑀺 𑀯𑀺𑀓𑁆𑀓𑀬𑁂𑀦𑀧𑀺 𑀩𑁆𑀭𑀸𑀳𑁆𑀫𑀡𑀺𑀫𑁆𑀧𑀺 𑀉𑀤𑀓𑀽𑀧𑀲𑁆𑀲𑀝𑁆𑀞𑀁. 𑀲𑁄 𑀩𑁆𑀭𑀸𑀳𑁆𑀫𑀡𑀺𑀫𑁆𑀧𑀺 𑀕𑀘𑁆𑀙𑀢𑀺 𑀔𑀢𑁆𑀢𑀺𑀬𑀺𑀫𑁆𑀧𑀺 𑀕𑀘𑁆𑀙𑀢𑀺 𑀯𑁂𑀲𑁆𑀲𑀺𑀫𑁆𑀧𑀺 𑀕𑀘𑁆𑀙𑀢𑀺 𑀲𑀼𑀤𑁆𑀤𑀺𑀫𑁆𑀧𑀺 𑀕𑀘𑁆𑀙𑀢𑀺 𑀘𑀡𑁆𑀟𑀸𑀮𑀺𑀫𑁆𑀧𑀺 𑀕𑀘𑁆𑀙𑀢𑀺 𑀦𑁂𑀲𑀸𑀤𑀺𑀫𑁆𑀧𑀺 𑀕𑀘𑁆𑀙𑀢𑀺 𑀯𑁂𑀦𑀺𑀫𑁆𑀧𑀺 𑀕𑀘𑁆𑀙𑀢𑀺 𑀭𑀣𑀓𑀸𑀭𑀺𑀫𑁆𑀧𑀺 𑀕𑀘𑁆𑀙𑀢𑀺 𑀧𑀼𑀓𑁆𑀓𑀼𑀲𑀺𑀫𑁆𑀧𑀺 𑀕𑀘𑁆𑀙𑀢𑀺 𑀕𑀩𑁆𑀪𑀺𑀦𑀺𑀫𑁆𑀧𑀺 𑀕𑀘𑁆𑀙𑀢𑀺 𑀧𑀸𑀬𑀫𑀸𑀦𑀫𑁆𑀧𑀺 𑀕𑀘𑁆𑀙𑀢𑀺 𑀉𑀢𑀼𑀦𑀺𑀫𑁆𑀧𑀺 𑀕𑀘𑁆𑀙𑀢𑀺 𑀅𑀦𑀼𑀢𑀼𑀦𑀺𑀫𑁆𑀧𑀺 𑀕𑀘𑁆𑀙𑀢𑀺. 𑀢𑀲𑁆𑀲 𑀲𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑀻 𑀓𑀸𑀫𑀢𑁆𑀣𑀸𑀧𑀺 𑀤𑀯𑀢𑁆𑀣𑀸𑀧𑀺 𑀭𑀢𑀢𑁆𑀣𑀸𑀧𑀺 𑀧𑀚𑀢𑁆𑀣𑀸𑀧𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀳𑁄𑀢𑀺. 𑀬𑀸𑀯 𑀧𑁄𑀭𑀸𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀭𑀺𑀬𑀸𑀤𑁄 𑀢𑀢𑁆𑀣 𑀦 𑀢𑀺𑀝𑁆𑀞𑀢𑀺, 𑀢𑀁 𑀯𑀻𑀢𑀺𑀓𑁆𑀓𑀫𑀢𑀺. ‘𑀬𑀸𑀯 𑀧𑁄𑀭𑀸𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀭𑀺𑀬𑀸𑀤𑁄 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑁄 𑀦 𑀞𑀺𑀢𑁄 𑀢𑀁 𑀯𑀻𑀢𑀺𑀓𑁆𑀓𑀫𑀢𑀻’𑀢𑀺 𑀔𑁄, 𑀤𑁄𑀡, 𑀢𑀲𑁆𑀫𑀸 𑀩𑁆𑀭𑀸𑀳𑁆𑀫𑀡𑁄 𑀲𑀫𑁆𑀪𑀺𑀦𑁆𑀦𑀫𑀭𑀺𑀬𑀸𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀲𑀫𑁆𑀪𑀺𑀦𑁆𑀦𑀫𑀭𑀺𑀬𑀸𑀤𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀘𑀡𑁆𑀟𑀸𑀮𑁄 𑀳𑁄𑀢𑀺? 𑀇𑀥, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑁋 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀲𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑀫𑀦𑁆𑀢𑁂 𑀅𑀥𑀻𑀬𑀫𑀸𑀦𑁄. 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀫𑀦𑁆𑀢𑁂 𑀅𑀥𑀻𑀬𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀥𑀦𑀁 𑀧𑀭𑀺𑀬𑁂𑀲𑀢𑀺 𑀥𑀫𑁆𑀫𑁂𑀦𑀧𑀺 𑀅𑀥𑀫𑁆𑀫𑁂𑀦𑀧𑀺 𑀓𑀲𑀺𑀬𑀸𑀧𑀺 𑀯𑀡𑀺𑀚𑁆𑀚𑀸𑀬𑀧𑀺 𑀕𑁄𑀭𑀓𑁆𑀔𑁂𑀦𑀧𑀺 𑀇𑀲𑁆𑀲𑀢𑁆𑀣𑁂𑀦𑀧𑀺 𑀭𑀸𑀚𑀧𑁄𑀭𑀺𑀲𑁂𑀦𑀧𑀺 𑀲𑀺𑀧𑁆𑀧𑀜𑁆𑀜𑀢𑀭𑁂𑀦𑀧𑀺, 𑀓𑁂𑀯𑀮𑀫𑁆𑀧𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀬, 𑀓𑀧𑀸𑀮𑀁 𑀅𑀦𑀢𑀺𑀫𑀜𑁆𑀜𑀫𑀸𑀦𑁄.

‘‘𑀲𑁄 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀥𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀤𑀸𑀭𑀁 𑀧𑀭𑀺𑀬𑁂𑀲𑀢𑀺 𑀥𑀫𑁆𑀫𑁂𑀦𑀧𑀺 𑀅𑀥𑀫𑁆𑀫𑁂𑀦𑀧𑀺 𑀓𑀬𑁂𑀦𑀧𑀺 𑀯𑀺𑀓𑁆𑀓𑀬𑁂𑀦𑀧𑀺 𑀩𑁆𑀭𑀸𑀳𑁆𑀫𑀡𑀺𑀫𑁆𑀧𑀺 𑀉𑀤𑀓𑀽𑀧𑀲𑁆𑀲𑀝𑁆𑀞𑀁. 𑀲𑁄 𑀩𑁆𑀭𑀸𑀳𑁆𑀫𑀡𑀺𑀫𑁆𑀧𑀺 𑀕𑀘𑁆𑀙𑀢𑀺 𑀔𑀢𑁆𑀢𑀺𑀬𑀺𑀫𑁆𑀧𑀺 𑀕𑀘𑁆𑀙𑀢𑀺 𑀯𑁂𑀲𑁆𑀲𑀺𑀫𑁆𑀧𑀺 𑀕𑀘𑁆𑀙𑀢𑀺 𑀲𑀼𑀤𑁆𑀤𑀺𑀫𑁆𑀧𑀺 𑀕𑀘𑁆𑀙𑀢𑀺 𑀘𑀡𑁆𑀟𑀸𑀮𑀺𑀫𑁆𑀧𑀺 𑀕𑀘𑁆𑀙𑀢𑀺 𑀦𑁂𑀲𑀸𑀤𑀺𑀫𑁆𑀧𑀺 𑀕𑀘𑁆𑀙𑀢𑀺 𑀯𑁂𑀦𑀺𑀫𑁆𑀧𑀺 𑀕𑀘𑁆𑀙𑀢𑀺 𑀭𑀣𑀓𑀸𑀭𑀺𑀫𑁆𑀧𑀺 𑀕𑀘𑁆𑀙𑀢𑀺 𑀧𑀼𑀓𑁆𑀓𑀼𑀲𑀺𑀫𑁆𑀧𑀺 𑀕𑀘𑁆𑀙𑀢𑀺 𑀕𑀩𑁆𑀪𑀺𑀦𑀺𑀫𑁆𑀧𑀺 𑀕𑀘𑁆𑀙𑀢𑀺 𑀧𑀸𑀬𑀫𑀸𑀦𑀫𑁆𑀧𑀺 𑀕𑀘𑁆𑀙𑀢𑀺 𑀉𑀢𑀼𑀦𑀺𑀫𑁆𑀧𑀺 𑀕𑀘𑁆𑀙𑀢𑀺 𑀅𑀦𑀼𑀢𑀼𑀦𑀺𑀫𑁆𑀧𑀺 𑀕𑀘𑁆𑀙𑀢𑀺. 𑀢𑀲𑁆𑀲 𑀲𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑀻 𑀓𑀸𑀫𑀢𑁆𑀣𑀸𑀧𑀺 𑀤𑀯𑀢𑁆𑀣𑀸𑀧𑀺 𑀭𑀢𑀢𑁆𑀣𑀸𑀧𑀺 𑀧𑀚𑀢𑁆𑀣𑀸𑀧𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀳𑁄𑀢𑀺. 𑀲𑁄 𑀲𑀩𑁆𑀩𑀓𑀫𑁆𑀫𑁂𑀳𑀺 𑀚𑀻𑀯𑀺𑀓𑀁 [𑀚𑀻𑀯𑀺𑀢𑀁 (𑀓.)] 𑀓𑀧𑁆𑀧𑁂𑀢𑀺. 𑀢𑀫𑁂𑀦𑀁 𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘𑀓𑀲𑁆𑀫𑀸 𑀪𑀯𑀁 𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀚𑀸𑀦𑀫𑀸𑀦𑁄 𑀲𑀩𑁆𑀩𑀓𑀫𑁆𑀫𑁂𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀻’𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀅𑀕𑁆𑀕𑀺 𑀲𑀼𑀘𑀺𑀫𑁆𑀧𑀺 𑀟𑀳𑀢𑀺 𑀅𑀲𑀼𑀘𑀺𑀫𑁆𑀧𑀺 𑀟𑀳𑀢𑀺, 𑀦 𑀘 𑀢𑁂𑀦 𑀅𑀕𑁆𑀕𑀺 𑀉𑀧𑀮𑀺𑀧𑁆𑀧𑀢𑀺 [𑀉𑀧𑀮𑀺𑀫𑁆𑀧𑀢𑀺 (𑀓.)]; 𑀏𑀯𑀫𑁂𑀯𑀁 𑀔𑁄, 𑀪𑁄, 𑀲𑀩𑁆𑀩𑀓𑀫𑁆𑀫𑁂𑀳𑀺 𑀘𑁂𑀧𑀺 𑀩𑁆𑀭𑀸𑀳𑁆𑀫𑀡𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀦 𑀘 𑀢𑁂𑀦 𑀩𑁆𑀭𑀸𑀳𑁆𑀫𑀡𑁄 𑀉𑀧𑀮𑀺𑀧𑁆𑀧𑀢𑀺’. ‘𑀲𑀩𑁆𑀩𑀓𑀫𑁆𑀫𑁂𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀻’𑀢𑀺 𑀔𑁄, 𑀤𑁄𑀡, 𑀢𑀲𑁆𑀫𑀸 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀘𑀡𑁆𑀟𑀸𑀮𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀘𑀡𑁆𑀟𑀸𑀮𑁄 𑀳𑁄𑀢𑀺.

‘‘𑀬𑁂 𑀔𑁄 𑀢𑁂, 𑀤𑁄𑀡, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀫𑀦𑁆𑀢𑀸𑀦𑀁 𑀓𑀢𑁆𑀢𑀸𑀭𑁄 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀸𑀭𑁄 𑀬𑁂𑀲𑀫𑀺𑀤𑀁 𑀏𑀢𑀭𑀳𑀺 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀫𑀦𑁆𑀢𑀧𑀤𑀁 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀻𑀳𑀺𑀢𑀁 𑀢𑀤𑀦𑀼𑀕𑀸𑀬𑀦𑁆𑀢𑀺 𑀢𑀤𑀦𑀼𑀪𑀸𑀲𑀦𑁆𑀢𑀺 𑀪𑀸𑀲𑀺𑀢𑀫𑀦𑀼𑀪𑀸𑀲𑀦𑁆𑀢𑀺 𑀲𑀚𑁆𑀛𑀸𑀬𑀺𑀢𑀫𑀦𑀼𑀲𑀚𑁆𑀛𑀸𑀬𑀦𑁆𑀢𑀺 𑀯𑀸𑀘𑀺𑀫𑀦𑀼𑀯𑀸𑀘𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑁄, 𑀯𑀸𑀫𑀓𑁄, 𑀯𑀸𑀫𑀤𑁂𑀯𑁄, 𑀯𑁂𑀲𑁆𑀲𑀸𑀫𑀺𑀢𑁆𑀢𑁄, 𑀬𑀫𑀤𑀕𑁆𑀕𑀺, 𑀅𑀗𑁆𑀕𑀻𑀭𑀲𑁄, 𑀪𑀸𑀭𑀤𑁆𑀯𑀸𑀚𑁄, 𑀯𑀸𑀲𑁂𑀝𑁆𑀞𑁄, 𑀓𑀲𑁆𑀲𑀧𑁄, 𑀪𑀕𑀼; 𑀢𑁆𑀬𑀸𑀲𑁆𑀲𑀼𑀫𑁂 𑀧𑀜𑁆𑀘 𑀩𑁆𑀭𑀸𑀳𑁆𑀫𑀡𑁂 𑀧𑀜𑁆𑀜𑀸𑀧𑁂𑀦𑁆𑀢𑀺 𑁋 𑀩𑁆𑀭𑀳𑁆𑀫𑀲𑀫𑀁, 𑀤𑁂𑀯𑀲𑀫𑀁, 𑀫𑀭𑀺𑀬𑀸𑀤𑀁, 𑀲𑀫𑁆𑀪𑀺𑀦𑁆𑀦𑀫𑀭𑀺𑀬𑀸𑀤𑀁, 𑀩𑁆𑀭𑀸𑀳𑁆𑀫𑀡𑀘𑀡𑁆𑀟𑀸𑀮𑀁𑀬𑁂𑀯 𑀧𑀜𑁆𑀘𑀫𑀁. 𑀢𑁂𑀲𑀁 𑀢𑁆𑀯𑀁, 𑀤𑁄𑀡, 𑀓𑀢𑀫𑁄’’𑀢𑀺?

‘‘𑀏𑀯𑀁 𑀲𑀦𑁆𑀢𑁂 𑀫𑀬𑀁, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀘𑀡𑁆𑀟𑀸𑀮𑀫𑁆𑀧𑀺 𑀦 𑀧𑀽𑀭𑁂𑀫. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀁

𑁧𑁯𑁩. 𑀅𑀣 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀓𑀤𑀸𑀘𑀺 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸? 𑀓𑁄 𑀧𑀦, 𑀪𑁄 𑀕𑁄𑀢𑀫, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀓𑀤𑀸𑀘𑀺 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸’’𑀢𑀺?

‘‘𑀬𑀲𑁆𑀫𑀺𑀁, 𑀩𑁆𑀭𑀸𑀳𑁆𑀫𑀡, 𑀲𑀫𑀬𑁂 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀓𑀸𑀫𑀭𑀸𑀕𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀲𑀁𑀲𑀝𑁆𑀞𑁄 𑀮𑀸𑀔𑀸𑀬 𑀯𑀸 𑀳𑀮𑀺𑀤𑁆𑀤𑀺𑀬𑀸 𑀯𑀸 𑀦𑀻𑀮𑀺𑀬𑀸 𑀯𑀸 𑀫𑀜𑁆𑀚𑀺𑀝𑁆𑀞𑀸𑀬 𑀯𑀸. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀓𑀸𑀫𑀭𑀸𑀕𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀩𑁆𑀬𑀸𑀧𑀸𑀤𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀩𑁆𑀬𑀸𑀧𑀸𑀤𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀅𑀕𑁆𑀕𑀺𑀦𑀸 𑀲𑀦𑁆𑀢𑀢𑁆𑀢𑁄 𑀉𑀓𑁆𑀓𑀼𑀥𑀺𑀢𑁄 [𑀉𑀓𑁆𑀓𑀝𑁆𑀞𑀺𑀢𑁄 (𑀲𑀻. 𑀧𑀻.), 𑀉𑀓𑁆𑀓𑀼𑀝𑁆𑀞𑀺𑀢𑁄 (𑀲𑁆𑀬𑀸. 𑀓𑀁.)] 𑀉𑀲𑁆𑀲𑀤𑀓𑀚𑀸𑀢𑁄 [𑀉𑀲𑀼𑀫𑀓𑀚𑀸𑀢𑁄 (𑀓𑀢𑁆𑀣𑀘𑀺), 𑀉𑀲𑁆𑀲𑀼𑀭𑀓𑀚𑀸𑀢𑁄 (𑀓.), 𑀉𑀲𑁆𑀫𑀼𑀤𑀓𑀚𑀸𑀢𑁄 (𑀫. 𑀦𑀺. 𑁩 𑀫𑀚𑁆𑀛𑀺𑀫𑀦𑀺𑀓𑀸𑀬𑁂)]. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀩𑁆𑀬𑀸𑀧𑀸𑀤𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀩𑁆𑀬𑀸𑀧𑀸𑀤𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀣𑀺𑀦𑀫𑀺𑀤𑁆𑀥𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀲𑁂𑀯𑀸𑀮𑀧𑀡𑀓𑀧𑀭𑀺𑀬𑁄𑀦𑀤𑁆𑀥𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀣𑀺𑀦𑀫𑀺𑀤𑁆𑀥𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀯𑀸𑀢𑁂𑀭𑀺𑀢𑁄 𑀘𑀮𑀺𑀢𑁄 𑀪𑀦𑁆𑀢𑁄 𑀊𑀫𑀺𑀚𑀸𑀢𑁄 [𑀉𑀫𑁆𑀫𑀺𑀚𑀸𑀢𑁄 (𑀧𑀻.)]. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀸𑀬 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀆𑀯𑀺𑀮𑁄 𑀮𑀼𑀴𑀺𑀢𑁄 𑀓𑀮𑀮𑀻𑀪𑀽𑀢𑁄 𑀅𑀦𑁆𑀥𑀓𑀸𑀭𑁂 𑀦𑀺𑀓𑁆𑀔𑀺𑀢𑁆𑀢𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀸𑀬 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀫𑀬𑁂 𑀦 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀓𑀸𑀫𑀭𑀸𑀕𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀮𑀸𑀔𑀸𑀬 𑀯𑀸 𑀳𑀮𑀺𑀤𑁆𑀤𑀺𑀬𑀸 𑀯𑀸 𑀦𑀻𑀮𑀺𑀬𑀸 𑀯𑀸 𑀫𑀜𑁆𑀚𑀺𑀝𑁆𑀞𑀸𑀬 𑀯𑀸. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑁂𑀬𑁆𑀬 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺…𑀧𑁂… 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀅𑀕𑁆𑀕𑀺𑀦𑀸 𑀅𑀲𑀦𑁆𑀢𑀢𑁆𑀢𑁄 𑀅𑀦𑀼𑀓𑁆𑀓𑀼𑀥𑀺𑀢𑁄 𑀅𑀦𑀼𑀲𑁆𑀲𑀤𑀓𑀚𑀸𑀢𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑁂𑀬𑁆𑀬 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺…𑀧𑁂… 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀦 𑀲𑁂𑀯𑀸𑀮𑀧𑀡𑀓𑀧𑀭𑀺𑀬𑁄𑀦𑀤𑁆𑀥𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑁂𑀬𑁆𑀬 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺…𑀧𑁂… 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀦 𑀯𑀸𑀢𑁂𑀭𑀺𑀢𑁄 𑀦 𑀘𑀮𑀺𑀢𑁄 𑀦 𑀪𑀦𑁆𑀢𑁄 𑀦 𑀊𑀫𑀺𑀚𑀸𑀢𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑁂𑀬𑁆𑀬 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 …𑀧𑁂….

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀸𑀬 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀆𑀮𑁄𑀓𑁂 𑀦𑀺𑀓𑁆𑀔𑀺𑀢𑁆𑀢𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑁂𑀬𑁆𑀬 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀸𑀬 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸.

‘‘𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀓𑀤𑀸𑀘𑀺 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸. 𑀅𑀬𑀁 𑀧𑀦, 𑀩𑁆𑀭𑀸𑀳𑁆𑀫𑀡, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀓𑀤𑀸𑀘𑀺 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸’’𑀢𑀺.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀓𑀸𑀭𑀡𑀧𑀸𑀮𑀻𑀲𑀼𑀢𑁆𑀢𑀁

𑁧𑁯𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀸𑀭𑀡𑀧𑀸𑀮𑀻 [𑀓𑀭𑀡𑀧𑀸𑀮𑀻 (𑀓.)] 𑀩𑁆𑀭𑀸𑀳𑁆𑀫𑀡𑁄 𑀮𑀺𑀘𑁆𑀙𑀯𑀻𑀦𑀁 𑀓𑀫𑁆𑀫𑀦𑁆𑀢𑀁 𑀓𑀸𑀭𑁂𑀢𑀺. 𑀅𑀤𑁆𑀤𑀲𑀸 𑀔𑁄 𑀓𑀸𑀭𑀡𑀧𑀸𑀮𑀻 𑀩𑁆𑀭𑀸𑀳𑁆𑀫𑀡𑁄 𑀧𑀺𑀗𑁆𑀕𑀺𑀬𑀸𑀦𑀺𑀁 𑀩𑁆𑀭𑀸𑀳𑁆𑀫𑀡𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁; 𑀤𑀺𑀲𑁆𑀯𑀸 𑀧𑀺𑀗𑁆𑀕𑀺𑀬𑀸𑀦𑀺𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋

‘‘𑀳𑀦𑁆𑀤, 𑀓𑀼𑀢𑁄 𑀦𑀼 𑀪𑀯𑀁 𑀧𑀺𑀗𑁆𑀕𑀺𑀬𑀸𑀦𑀻 𑀆𑀕𑀘𑁆𑀙𑀢𑀺 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺? ‘‘𑀇𑀢𑁄𑀳𑀁 [𑀇𑀥𑀸𑀳𑀁 (𑀲𑁆𑀬𑀸. 𑀓𑀁.), 𑀇𑀢𑁄 𑀳𑀺 𑀔𑁄 𑀅𑀳𑀁 (𑀫. 𑀦𑀺. 𑁧.𑁨𑁮𑁮)], 𑀪𑁄, 𑀆𑀕𑀘𑁆𑀙𑀸𑀫𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀸’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀢𑀺 𑀪𑀯𑀁, 𑀧𑀺𑀗𑁆𑀕𑀺𑀬𑀸𑀦𑀻, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁? 𑀧𑀡𑁆𑀟𑀺𑀢𑁄 𑀫𑀜𑁆𑀜𑁂’’𑀢𑀺? ‘‘𑀓𑁄 𑀘𑀸𑀳𑀁, 𑀪𑁄, 𑀓𑁄 𑀘 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀚𑀸𑀦𑀺𑀲𑁆𑀲𑀸𑀫𑀺! 𑀲𑁄𑀧𑀺 𑀦𑀽𑀦𑀲𑁆𑀲 𑀢𑀸𑀤𑀺𑀲𑁄𑀯 𑀬𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀚𑀸𑀦𑁂𑀬𑁆𑀬𑀸’’𑀢𑀺! ‘‘𑀉𑀴𑀸𑀭𑀸𑀬 𑀔𑀮𑀼 𑀪𑀯𑀁, 𑀧𑀺𑀗𑁆𑀕𑀺𑀬𑀸𑀦𑀻, 𑀲𑀫𑀡𑀁 𑀕𑁄𑀢𑀫𑀁 𑀧𑀲𑀁𑀲𑀸𑀬 𑀧𑀲𑀁𑀲𑀢𑀻’’𑀢𑀺. ‘‘𑀓𑁄 𑀘𑀸𑀳𑀁, 𑀪𑁄, 𑀓𑁄 𑀘 𑀲𑀫𑀡𑀁 𑀕𑁄𑀢𑀫𑀁 𑀧𑀲𑀁𑀲𑀺𑀲𑁆𑀲𑀸𑀫𑀺! 𑀧𑀲𑀢𑁆𑀣𑀧𑁆𑀧𑀲𑀢𑁆𑀣𑁄𑀯 [𑀧𑀲𑀝𑁆𑀞𑀧𑀲𑀝𑁆𑀞𑁄 𑀘 (𑀲𑁆𑀬𑀸. 𑀓𑀁. 𑀓.)] 𑀲𑁄 𑀪𑀯𑀁 𑀕𑁄𑀢𑀫𑁄 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺. ‘‘𑀓𑀺𑀁 𑀧𑀦 𑀪𑀯𑀁, 𑀧𑀺𑀗𑁆𑀕𑀺𑀬𑀸𑀦𑀻, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀲𑀫𑀡𑁂 𑀕𑁄𑀢𑀫𑁂 𑀏𑀯𑀁 𑀅𑀪𑀺𑀧𑁆𑀧𑀲𑀦𑁆𑀦𑁄’’𑀢𑀺?

‘‘𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀧𑀼𑀭𑀺𑀲𑁄 𑀅𑀕𑁆𑀕𑀭𑀲𑀧𑀭𑀺𑀢𑀺𑀢𑁆𑀢𑁄 𑀦 𑀅𑀜𑁆𑀜𑁂𑀲𑀁 𑀳𑀻𑀦𑀸𑀦𑀁 𑀭𑀲𑀸𑀦𑀁 𑀧𑀺𑀳𑁂𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑁄, 𑀬𑀢𑁄 𑀬𑀢𑁄 𑀢𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀁 𑀲𑀼𑀡𑀸𑀢𑀺 𑁋 𑀬𑀤𑀺 𑀲𑀼𑀢𑁆𑀢𑀲𑁄, 𑀬𑀤𑀺 𑀕𑁂𑀬𑁆𑀬𑀲𑁄, 𑀬𑀤𑀺 𑀯𑁂𑀬𑁆𑀬𑀸𑀓𑀭𑀡𑀲𑁄, 𑀬𑀤𑀺 𑀅𑀩𑁆𑀪𑀼𑀢𑀥𑀫𑁆𑀫𑀲𑁄 𑁋 𑀢𑀢𑁄 𑀢𑀢𑁄 𑀦 𑀅𑀜𑁆𑀜𑁂𑀲𑀁 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑁆𑀧𑀯𑀸𑀤𑀸𑀦𑀁 𑀧𑀺𑀳𑁂𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀧𑀼𑀭𑀺𑀲𑁄 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀧𑀭𑁂𑀢𑁄 𑀫𑀥𑀼𑀧𑀺𑀡𑁆𑀟𑀺𑀓𑀁 𑀅𑀥𑀺𑀕𑀘𑁆𑀙𑁂𑀬𑁆𑀬. 𑀲𑁄 𑀬𑀢𑁄 𑀬𑀢𑁄 𑀲𑀸𑀬𑁂𑀣, 𑀮𑀪𑀢𑁂𑀯 [𑀲𑀸𑀬𑁂𑀬𑁆𑀬, 𑀮𑀪𑁂𑀣𑁂𑀯 (𑀫. 𑀦𑀺. 𑁧.𑁨𑁦𑁫)] 𑀲𑀸𑀤𑀼𑀭𑀲𑀁 𑀅𑀲𑁂𑀘𑀦𑀓𑀁; 𑀏𑀯𑀫𑁂𑀯𑀁 𑀔𑁄, 𑀪𑁄, 𑀬𑀢𑁄 𑀬𑀢𑁄 𑀢𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀁 𑀲𑀼𑀡𑀸𑀢𑀺 𑁋 𑀬𑀤𑀺 𑀲𑀼𑀢𑁆𑀢𑀲𑁄, 𑀬𑀤𑀺 𑀕𑁂𑀬𑁆𑀬𑀲𑁄, 𑀬𑀤𑀺 𑀯𑁂𑀬𑁆𑀬𑀸𑀓𑀭𑀡𑀲𑁄, 𑀬𑀤𑀺 𑀅𑀩𑁆𑀪𑀼𑀢𑀥𑀫𑁆𑀫𑀲𑁄 𑁋 𑀢𑀢𑁄 𑀢𑀢𑁄 𑀮𑀪𑀢𑁂𑀯 𑀅𑀢𑁆𑀢𑀫𑀦𑀢𑀁, 𑀮𑀪𑀢𑀺 𑀘𑁂𑀢𑀲𑁄 𑀧𑀲𑀸𑀤𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀧𑀼𑀭𑀺𑀲𑁄 𑀘𑀦𑁆𑀤𑀦𑀖𑀝𑀺𑀓𑀁 𑀅𑀥𑀺𑀕𑀘𑁆𑀙𑁂𑀬𑁆𑀬 𑁋 𑀳𑀭𑀺𑀘𑀦𑁆𑀤𑀦𑀲𑁆𑀲 𑀯𑀸 𑀮𑁄𑀳𑀺𑀢𑀘𑀦𑁆𑀤𑀦𑀲𑁆𑀲 𑀯𑀸. 𑀲𑁄 𑀬𑀢𑁄 𑀬𑀢𑁄 𑀖𑀸𑀬𑁂𑀣 𑁋 𑀬𑀤𑀺 𑀫𑀽𑀮𑀢𑁄, 𑀬𑀤𑀺 𑀫𑀚𑁆𑀛𑀢𑁄, 𑀬𑀤𑀺 𑀅𑀕𑁆𑀕𑀢𑁄 𑁋 𑀅𑀥𑀺𑀕𑀘𑁆𑀙𑀢𑁂𑀯 [𑀅𑀥𑀺𑀕𑀘𑁆𑀙𑁂𑀣𑁂𑀯 (?)] 𑀲𑀼𑀭𑀪𑀺𑀕𑀦𑁆𑀥𑀁 𑀅𑀲𑁂𑀘𑀦𑀓𑀁; 𑀏𑀯𑀫𑁂𑀯𑀁 𑀔𑁄, 𑀪𑁄, 𑀬𑀢𑁄 𑀬𑀢𑁄 𑀢𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀁 𑀲𑀼𑀡𑀸𑀢𑀺 𑁋 𑀬𑀤𑀺 𑀲𑀼𑀢𑁆𑀢𑀲𑁄, 𑀬𑀤𑀺 𑀕𑁂𑀬𑁆𑀬𑀲𑁄, 𑀬𑀤𑀺 𑀯𑁂𑀬𑁆𑀬𑀸𑀓𑀭𑀡𑀲𑁄, 𑀬𑀤𑀺 𑀅𑀩𑁆𑀪𑀼𑀢𑀥𑀫𑁆𑀫𑀲𑁄 𑁋 𑀢𑀢𑁄 𑀢𑀢𑁄 𑀅𑀥𑀺𑀕𑀘𑁆𑀙𑀢𑀺 𑀧𑀸𑀫𑁄𑀚𑁆𑀚𑀁 𑀅𑀥𑀺𑀕𑀘𑁆𑀙𑀢𑀺 𑀲𑁄𑀫𑀦𑀲𑁆𑀲𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀧𑀼𑀭𑀺𑀲𑁄 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀢𑀲𑁆𑀲 𑀓𑀼𑀲𑀮𑁄 𑀪𑀺𑀲𑀓𑁆𑀓𑁄 𑀞𑀸𑀦𑀲𑁄 𑀆𑀩𑀸𑀥𑀁 𑀦𑀻𑀳𑀭𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄, 𑀪𑁄, 𑀬𑀢𑁄 𑀬𑀢𑁄 𑀢𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀁 𑀲𑀼𑀡𑀸𑀢𑀺 𑁋 𑀬𑀤𑀺 𑀲𑀼𑀢𑁆𑀢𑀲𑁄, 𑀬𑀤𑀺 𑀕𑁂𑀬𑁆𑀬𑀲𑁄, 𑀬𑀤𑀺 𑀯𑁂𑀬𑁆𑀬𑀸𑀓𑀭𑀡𑀲𑁄, 𑀬𑀤𑀺 𑀅𑀩𑁆𑀪𑀼𑀢𑀥𑀫𑁆𑀫𑀲𑁄 𑁋 𑀢𑀢𑁄 𑀢𑀢𑁄 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀧𑁄𑀓𑁆𑀔𑀭𑀡𑀻 𑀅𑀘𑁆𑀙𑁄𑀤𑀓𑀸 𑀲𑀸𑀢𑁄𑀤𑀓𑀸 𑀲𑀻𑀢𑁄𑀤𑀓𑀸 𑀲𑁂𑀢𑀓𑀸 𑀲𑀼𑀧𑀢𑀺𑀢𑁆𑀣𑀸 𑀭𑀫𑀡𑀻𑀬𑀸. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀖𑀫𑁆𑀫𑀸𑀪𑀺𑀢𑀢𑁆𑀢𑁄 𑀖𑀫𑁆𑀫𑀧𑀭𑁂𑀢𑁄 𑀓𑀺𑀮𑀦𑁆𑀢𑁄 𑀢𑀲𑀺𑀢𑁄 𑀧𑀺𑀧𑀸𑀲𑀺𑀢𑁄. 𑀲𑁄 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑁂𑀢𑁆𑀯𑀸 𑀦𑁆𑀳𑀸𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀲𑀩𑁆𑀩𑀤𑀭𑀣𑀓𑀺𑀮𑀫𑀣𑀧𑀭𑀺𑀴𑀸𑀳𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀪𑁄, 𑀬𑀢𑁄 𑀬𑀢𑁄 𑀢𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀁 𑀲𑀼𑀡𑀸𑀢𑀺 𑁋 𑀬𑀤𑀺 𑀲𑀼𑀢𑁆𑀢𑀲𑁄, 𑀬𑀤𑀺 𑀕𑁂𑀬𑁆𑀬𑀲𑁄, 𑀬𑀤𑀺 𑀯𑁂𑀬𑁆𑀬𑀸𑀓𑀭𑀡𑀲𑁄, 𑀬𑀤𑀺 𑀅𑀩𑁆𑀪𑀼𑀢𑀥𑀫𑁆𑀫𑀲𑁄 𑁋 𑀢𑀢𑁄 𑀢𑀢𑁄 𑀲𑀩𑁆𑀩𑀤𑀭𑀣𑀓𑀺𑀮𑀫𑀣𑀧𑀭𑀺𑀴𑀸𑀳𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀓𑀸𑀭𑀡𑀧𑀸𑀮𑀻 𑀩𑁆𑀭𑀸𑀳𑁆𑀫𑀡𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀚𑀸𑀡𑀼𑀫𑀡𑁆𑀟𑀮𑀁 𑀧𑀣𑀯𑀺𑀬𑀁 𑀦𑀺𑀳𑀦𑁆𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲;

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲;

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀧𑀺𑀗𑁆𑀕𑀺𑀬𑀸𑀦𑀺, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀧𑀺𑀗𑁆𑀕𑀺𑀬𑀸𑀦𑀺! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀧𑀺𑀗𑁆𑀕𑀺𑀬𑀸𑀦𑀺, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 [𑀦𑀺𑀓𑀼𑀚𑁆𑀚𑀺𑀢𑀁 (𑀓.)] 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺; 𑀏𑀯𑀫𑁂𑀯𑀁 𑀪𑁄𑀢𑀸 𑀧𑀺𑀗𑁆𑀕𑀺𑀬𑀸𑀦𑀺𑀦𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑁄 𑀧𑀺𑀗𑁆𑀕𑀺𑀬𑀸𑀦𑀺, 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀧𑀺𑀗𑁆𑀕𑀺𑀬𑀸𑀦𑀻 𑀥𑀸𑀭𑁂𑀢𑀼, 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀺𑀗𑁆𑀕𑀺𑀬𑀸𑀦𑀻𑀲𑀼𑀢𑁆𑀢𑀁

𑁧𑁯𑁫. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀜𑁆𑀘𑀫𑀢𑁆𑀢𑀸𑀦𑀺 𑀮𑀺𑀘𑁆𑀙𑀯𑀺𑀲𑀢𑀸𑀦𑀺 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀦𑁆𑀢𑀺. 𑀅𑀧𑁆𑀧𑁂𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀦𑀻𑀮𑀸 𑀳𑁄𑀦𑁆𑀢𑀺 𑀦𑀻𑀮𑀯𑀡𑁆𑀡𑀸 𑀦𑀻𑀮𑀯𑀢𑁆𑀣𑀸 𑀦𑀻𑀮𑀸𑀮𑀗𑁆𑀓𑀸𑀭𑀸, 𑀅𑀧𑁆𑀧𑁂𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀧𑀻𑀢𑀸 𑀳𑁄𑀦𑁆𑀢𑀺 𑀧𑀻𑀢𑀯𑀡𑁆𑀡𑀸 𑀧𑀻𑀢𑀯𑀢𑁆𑀣𑀸 𑀧𑀻𑀢𑀸𑀮𑀗𑁆𑀓𑀸𑀭𑀸, 𑀅𑀧𑁆𑀧𑁂𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀮𑁄𑀳𑀺𑀢𑀓𑀸 𑀳𑁄𑀦𑁆𑀢𑀺 𑀮𑁄𑀳𑀺𑀢𑀓𑀯𑀡𑁆𑀡𑀸 𑀮𑁄𑀳𑀺𑀢𑀓𑀯𑀢𑁆𑀣𑀸 𑀮𑁄𑀳𑀺𑀢𑀓𑀸𑀮𑀗𑁆𑀓𑀸𑀭𑀸, 𑀅𑀧𑁆𑀧𑁂𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀑𑀤𑀸𑀢𑀸 𑀳𑁄𑀦𑁆𑀢𑀺 𑀑𑀤𑀸𑀢𑀯𑀡𑁆𑀡𑀸 𑀑𑀤𑀸𑀢𑀯𑀢𑁆𑀣𑀸 𑀑𑀤𑀸𑀢𑀸𑀮𑀗𑁆𑀓𑀸𑀭𑀸. 𑀢𑁆𑀬𑀲𑁆𑀲𑀼𑀤𑀁 𑀪𑀕𑀯𑀸 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘.

𑀅𑀣 𑀔𑁄 𑀧𑀺𑀗𑁆𑀕𑀺𑀬𑀸𑀦𑀻 𑀩𑁆𑀭𑀸𑀳𑁆𑀫𑀡𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁, 𑀪𑀕𑀯𑀸, 𑀧𑀝𑀺𑀪𑀸𑀢𑀺 𑀫𑀁, 𑀲𑀼𑀕𑀢𑀸’’𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁 𑀧𑀺𑀗𑁆𑀕𑀺𑀬𑀸𑀦𑀻’’𑀢𑀺 𑀪𑀕𑀯𑀸 𑀅𑀯𑁄𑀘. 𑀅𑀣 𑀔𑁄 𑀧𑀺𑀗𑁆𑀕𑀺𑀬𑀸𑀦𑀻 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀬 𑀕𑀸𑀣𑀸𑀬 𑀅𑀪𑀺𑀢𑁆𑀣𑀯𑀺 𑁋

‘‘𑀧𑀤𑁆𑀫𑀁 [𑀧𑀤𑀼𑀫𑀁 (𑀓.) 𑀲𑀁. 𑀦𑀺. 𑁧.𑁧𑁩𑁨] 𑀬𑀣𑀸 𑀓𑁄𑀓𑀦𑀤𑀁 [𑀓𑁄𑀓𑀦𑀼𑀤𑀁 (𑀲𑁆𑀬𑀸. 𑀓𑀁.)] 𑀲𑀼𑀕𑀦𑁆𑀥𑀁,

𑀧𑀸𑀢𑁄 𑀲𑀺𑀬𑀸 𑀨𑀼𑀮𑁆𑀮𑀫𑀯𑀻𑀢𑀕𑀦𑁆𑀥𑀁;

𑀅𑀗𑁆𑀕𑀻𑀭𑀲𑀁 𑀧𑀲𑁆𑀲 𑀯𑀺𑀭𑁄𑀘𑀫𑀸𑀦𑀁,

𑀢𑀧𑀦𑁆𑀢𑀫𑀸𑀤𑀺𑀘𑁆𑀘𑀫𑀺𑀯𑀦𑁆𑀢𑀮𑀺𑀓𑁆𑀔𑁂’’𑀢𑀺.

𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀧𑀜𑁆𑀘𑀳𑀺 𑀉𑀢𑁆𑀢𑀭𑀸𑀲𑀗𑁆𑀕𑀲𑀢𑁂𑀳𑀺 𑀧𑀺𑀗𑁆𑀕𑀺𑀬𑀸𑀦𑀺𑀁 𑀩𑁆𑀭𑀸𑀳𑁆𑀫𑀡𑀁 𑀅𑀘𑁆𑀙𑀸𑀤𑁂𑀲𑀼𑀁. 𑀅𑀣 𑀔𑁄 𑀧𑀺𑀗𑁆𑀕𑀺𑀬𑀸𑀦𑀻 𑀩𑁆𑀭𑀸𑀳𑁆𑀫𑀡𑁄 𑀢𑁂𑀳𑀺 𑀧𑀜𑁆𑀘𑀳𑀺 𑀉𑀢𑁆𑀢𑀭𑀸𑀲𑀗𑁆𑀕𑀲𑀢𑁂𑀳𑀺 𑀪𑀕𑀯𑀦𑁆𑀢𑀁 𑀅𑀘𑁆𑀙𑀸𑀤𑁂𑀲𑀺.

𑀅𑀣 𑀔𑁄 𑀪𑀕𑀯𑀸 𑀢𑁂 𑀮𑀺𑀘𑁆𑀙𑀯𑀻 𑀏𑀢𑀤𑀯𑁄𑀘 𑁋 ‘‘𑀧𑀜𑁆𑀘𑀦𑁆𑀦𑀁, 𑀮𑀺𑀘𑁆𑀙𑀯𑀻, 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁? 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀲𑁆𑀲 𑀥𑀫𑁆𑀫𑀯𑀺𑀦𑀬𑀲𑁆𑀲 𑀤𑁂𑀲𑁂𑀢𑀸 𑀧𑀼𑀕𑁆𑀕𑀮𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀲𑁆𑀲 𑀥𑀫𑁆𑀫𑀯𑀺𑀦𑀬𑀲𑁆𑀲 𑀤𑁂𑀲𑀺𑀢𑀲𑁆𑀲 𑀯𑀺𑀜𑁆𑀜𑀸𑀢𑀸 𑀧𑀼𑀕𑁆𑀕𑀮𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀲𑁆𑀲 𑀥𑀫𑁆𑀫𑀯𑀺𑀦𑀬𑀲𑁆𑀲 𑀤𑁂𑀲𑀺𑀢𑀲𑁆𑀲 𑀯𑀺𑀜𑁆𑀜𑀸𑀢𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻 𑀧𑀼𑀕𑁆𑀕𑀮𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀇𑀫𑁂𑀲𑀁 𑀔𑁄, 𑀮𑀺𑀘𑁆𑀙𑀯𑀻, 𑀧𑀜𑁆𑀘𑀦𑁆𑀦𑀁 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺’’𑀦𑁆𑀢𑀺 [𑀅. 𑀦𑀺. 𑁫.𑁧𑁪𑁩]. 𑀧𑀜𑁆𑀘𑀫𑀁.

𑁬. 𑀫𑀳𑀸𑀲𑀼𑀧𑀺𑀦𑀲𑀼𑀢𑁆𑀢𑀁

𑁧𑁯𑁬. ‘‘𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑀸 𑀧𑀸𑀢𑀼𑀭𑀳𑁂𑀲𑀼𑀁. 𑀓𑀢𑀫𑁂 𑀧𑀜𑁆𑀘? 𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀅𑀬𑀁 𑀫𑀳𑀸𑀧𑀣𑀯𑀻 𑀫𑀳𑀸𑀲𑀬𑀦𑀁 𑀅𑀳𑁄𑀲𑀺, 𑀳𑀺𑀫𑀯𑀸 𑀧𑀩𑁆𑀩𑀢𑀭𑀸𑀚𑀸 𑀩𑀺𑀩𑁆𑀩𑁄𑀳𑀦𑀁 [𑀩𑀺𑀩𑁆𑀩𑁄𑀳𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀩𑀺𑀫𑁆𑀩 + 𑀑𑀳𑀦𑀁 = 𑀇𑀢𑀺 𑀧𑀤𑀯𑀺𑀪𑀸𑀕𑁄] 𑀅𑀳𑁄𑀲𑀺, 𑀧𑀼𑀭𑀢𑁆𑀣𑀺𑀫𑁂 𑀲𑀫𑀼𑀤𑁆𑀤𑁂 𑀯𑀸𑀫𑁄 𑀳𑀢𑁆𑀣𑁄 𑀑𑀳𑀺𑀢𑁄 𑀅𑀳𑁄𑀲𑀺, 𑀧𑀘𑁆𑀙𑀺𑀫𑁂 𑀲𑀫𑀼𑀤𑁆𑀤𑁂 𑀤𑀓𑁆𑀔𑀺𑀡𑁄 𑀳𑀢𑁆𑀣𑁄 𑀑𑀳𑀺𑀢𑁄 𑀅𑀳𑁄𑀲𑀺, 𑀤𑀓𑁆𑀔𑀺𑀡𑁂 𑀲𑀫𑀼𑀤𑁆𑀤𑁂 𑀉𑀪𑁄 𑀧𑀸𑀤𑀸 𑀑𑀳𑀺𑀢𑀸 𑀅𑀳𑁂𑀲𑀼𑀁. 𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀅𑀬𑀁 𑀧𑀞𑀫𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀢𑀺𑀭𑀺𑀬𑀸 𑀦𑀸𑀫 𑀢𑀺𑀡𑀚𑀸𑀢𑀺 𑀦𑀸𑀪𑀺𑀬𑀸 𑀉𑀕𑁆𑀕𑀦𑁆𑀢𑁆𑀯𑀸 𑀦𑀪𑀁 𑀆𑀳𑀘𑁆𑀘 𑀞𑀺𑀢𑀸 𑀅𑀳𑁄𑀲𑀺. 𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀅𑀬𑀁 𑀤𑀼𑀢𑀺𑀬𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀲𑁂𑀢𑀸 𑀓𑀺𑀫𑀻 𑀓𑀡𑁆𑀳𑀲𑀻𑀲𑀸 𑀧𑀸𑀤𑁂𑀳𑀺 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 ( ) [(𑀅𑀕𑁆𑀕𑀦𑀔𑀢𑁄) 𑀓𑀢𑁆𑀣𑀘𑀺 𑀤𑀺𑀲𑁆𑀲𑀢𑀺] 𑀬𑀸𑀯 𑀚𑀸𑀡𑀼𑀫𑀡𑁆𑀟𑀮𑀸 𑀧𑀝𑀺𑀘𑁆𑀙𑀸𑀤𑁂𑀲𑀼𑀁. 𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀅𑀬𑀁 𑀢𑀢𑀺𑀬𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀘𑀢𑁆𑀢𑀸𑀭𑁄 𑀲𑀓𑀼𑀡𑀸 𑀦𑀸𑀦𑀸𑀯𑀡𑁆𑀡𑀸 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀦𑁆𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸 𑀲𑀩𑁆𑀩𑀲𑁂𑀢𑀸 𑀲𑀫𑁆𑀧𑀚𑁆𑀚𑀺𑀁𑀲𑀼. 𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀅𑀬𑀁 𑀘𑀢𑀼𑀢𑁆𑀣𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄 𑀩𑁄𑀥𑀺𑀲𑀢𑁆𑀢𑁄𑀯 𑀲𑀫𑀸𑀦𑁄 𑀫𑀳𑀢𑁄 𑀫𑀻𑀴𑁆𑀳𑀧𑀩𑁆𑀩𑀢𑀲𑁆𑀲 𑀉𑀧𑀭𑀽𑀧𑀭𑀺 𑀘𑀗𑁆𑀓𑀫𑀢𑀺 𑀅𑀮𑀺𑀧𑁆𑀧𑀫𑀸𑀦𑁄 𑀫𑀻𑀴𑁆𑀳𑁂𑀦. 𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀅𑀬𑀁 𑀧𑀜𑁆𑀘𑀫𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀅𑀬𑀁 𑀫𑀳𑀸𑀧𑀣𑀯𑀻 𑀫𑀳𑀸𑀲𑀬𑀦𑀁 𑀅𑀳𑁄𑀲𑀺, 𑀳𑀺𑀫𑀯𑀸 𑀧𑀩𑁆𑀩𑀢𑀭𑀸𑀚𑀸 𑀩𑀺𑀩𑁆𑀩𑁄𑀳𑀦𑀁 𑀅𑀳𑁄𑀲𑀺, 𑀧𑀼𑀭𑀢𑁆𑀣𑀺𑀫𑁂 𑀲𑀫𑀼𑀤𑁆𑀤𑁂 𑀯𑀸𑀫𑁄 𑀳𑀢𑁆𑀣𑁄 𑀑𑀳𑀺𑀢𑁄 𑀅𑀳𑁄𑀲𑀺, 𑀧𑀘𑁆𑀙𑀺𑀫𑁂 𑀲𑀫𑀼𑀤𑁆𑀤𑁂 𑀤𑀓𑁆𑀔𑀺𑀡𑁄 𑀳𑀢𑁆𑀣𑁄 𑀑𑀳𑀺𑀢𑁄 𑀅𑀳𑁄𑀲𑀺, 𑀤𑀓𑁆𑀔𑀺𑀡𑁂 𑀲𑀫𑀼𑀤𑁆𑀤𑁂 𑀉𑀪𑁄 𑀧𑀸𑀤𑀸 𑀑𑀳𑀺𑀢𑀸 𑀅𑀳𑁂𑀲𑀼𑀁; 𑀢𑀣𑀸𑀕𑀢𑁂𑀦, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀦𑀼𑀢𑁆𑀢𑀭𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑀸. 𑀢𑀲𑁆𑀲𑀸 𑀅𑀪𑀺𑀲𑀫𑁆𑀩𑁄𑀥𑀸𑀬 𑀅𑀬𑀁 𑀧𑀞𑀫𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀢𑀺𑀭𑀺𑀬𑀸 𑀦𑀸𑀫 𑀢𑀺𑀡𑀚𑀸𑀢𑀺 𑀦𑀸𑀪𑀺𑀬𑀸 𑀉𑀕𑁆𑀕𑀦𑁆𑀢𑁆𑀯𑀸 𑀦𑀪𑀁 𑀆𑀳𑀘𑁆𑀘 𑀞𑀺𑀢𑀸 𑀅𑀳𑁄𑀲𑀺; 𑀢𑀣𑀸𑀕𑀢𑁂𑀦, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑁄. 𑀢𑀲𑁆𑀲 𑀅𑀪𑀺𑀲𑀫𑁆𑀩𑁄𑀥𑀸𑀬 𑀅𑀬𑀁 𑀤𑀼𑀢𑀺𑀬𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀲𑁂𑀢𑀸 𑀓𑀺𑀫𑀻 𑀓𑀡𑁆𑀳𑀲𑀻𑀲𑀸 𑀧𑀸𑀤𑁂𑀳𑀺 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀬𑀸𑀯 𑀚𑀸𑀡𑀼𑀫𑀡𑁆𑀟𑀮𑀸 𑀧𑀝𑀺𑀘𑁆𑀙𑀸𑀤𑁂𑀲𑀼𑀁; 𑀩𑀳𑀽, 𑀪𑀺𑀓𑁆𑀔𑀯𑁂, 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀢𑀣𑀸𑀕𑀢𑀁 𑀧𑀸𑀡𑀼𑀧𑁂𑀢𑀸 [𑀧𑀸𑀡𑀼𑀧𑁂𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀭𑀡𑀁 𑀕𑀢𑀸. 𑀢𑀲𑁆𑀲 𑀅𑀪𑀺𑀲𑀫𑁆𑀩𑁄𑀥𑀸𑀬 𑀅𑀬𑀁 𑀢𑀢𑀺𑀬𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀘𑀢𑁆𑀢𑀸𑀭𑁄 𑀲𑀓𑀼𑀡𑀸 𑀦𑀸𑀦𑀸𑀯𑀡𑁆𑀡𑀸 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀦𑁆𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸 𑀲𑀩𑁆𑀩𑀲𑁂𑀢𑀸 𑀲𑀫𑁆𑀧𑀚𑁆𑀚𑀺𑀁𑀲𑀼; 𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀯𑀡𑁆𑀡𑀸 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸 𑀲𑀼𑀤𑁆𑀤𑀸 𑀢𑁂 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀯𑀺𑀫𑀼𑀢𑁆𑀢𑀺𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺. 𑀢𑀲𑁆𑀲 𑀅𑀪𑀺𑀲𑀫𑁆𑀩𑁄𑀥𑀸𑀬 𑀅𑀬𑀁 𑀘𑀢𑀼𑀢𑁆𑀣𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄 𑀩𑁄𑀥𑀺𑀲𑀢𑁆𑀢𑁄𑀯 𑀲𑀫𑀸𑀦𑁄 𑀫𑀳𑀢𑁄 𑀫𑀻𑀴𑁆𑀳𑀧𑀩𑁆𑀩𑀢𑀲𑁆𑀲 𑀉𑀧𑀭𑀽𑀧𑀭𑀺 𑀘𑀗𑁆𑀓𑀫𑀢𑀺 𑀅𑀮𑀺𑀧𑁆𑀧𑀫𑀸𑀦𑁄 𑀫𑀻𑀴𑁆𑀳𑁂𑀦; 𑀮𑀸𑀪𑀻, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁, 𑀢𑀁 [𑀢𑀢𑁆𑀣 𑀘 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀢𑀣𑀸𑀕𑀢𑁄 𑀅𑀕𑀣𑀺𑀢𑁄 [𑀅𑀕𑀥𑀺𑀢𑁄 (𑀲𑁆𑀬𑀸. 𑀧𑀻. 𑀓.)] 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑁄𑀲𑀦𑁆𑀦𑁄 [𑀅𑀦𑀚𑁆𑀛𑀸𑀧𑀦𑁆𑀦𑁄 (𑀓.) 𑀅𑀦𑀚𑁆𑀛𑁄𑀧𑀦𑁆𑀦𑁄 (𑀲𑀻. 𑀲𑁆𑀬𑀸.)] 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺. 𑀢𑀲𑁆𑀲 𑀅𑀪𑀺𑀲𑀫𑁆𑀩𑁄𑀥𑀸𑀬 𑀅𑀬𑀁 𑀧𑀜𑁆𑀘𑀫𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

‘‘𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀇𑀫𑁂 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑀸 𑀧𑀸𑀢𑀼𑀭𑀳𑁂𑀲𑀼’’𑀦𑁆𑀢𑀺. 𑀙𑀝𑁆𑀞𑀁.

𑁭. 𑀯𑀲𑁆𑀲𑀲𑀼𑀢𑁆𑀢𑀁

𑁧𑁯𑁭. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀲𑁆𑀲 𑀅𑀦𑁆𑀢𑀭𑀸𑀬𑀸, 𑀬𑀁 𑀦𑁂𑀫𑀺𑀢𑁆𑀢𑀸 [𑀦𑁂𑀫𑀺𑀢𑁆𑀢𑀓𑀸 (𑀓𑀢𑁆𑀣𑀘𑀺)] 𑀦 𑀚𑀸𑀦𑀦𑁆𑀢𑀺, 𑀬𑀢𑁆𑀣 𑀦𑁂𑀫𑀺𑀢𑁆𑀢𑀸𑀦𑀁 𑀘𑀓𑁆𑀔𑀼 𑀦 𑀓𑀫𑀢𑀺. 𑀓𑀢𑀫𑁂 𑀧𑀜𑁆𑀘? 𑀉𑀧𑀭𑀺, 𑀪𑀺𑀓𑁆𑀔𑀯𑁂, 𑀆𑀓𑀸𑀲𑁂 𑀢𑁂𑀚𑁄𑀥𑀸𑀢𑀼 𑀧𑀓𑀼𑀧𑁆𑀧𑀢𑀺. 𑀢𑁂𑀦 𑀉𑀧𑁆𑀧𑀦𑁆𑀦𑀸 𑀫𑁂𑀖𑀸 𑀧𑀝𑀺𑀯𑀺𑀕𑀘𑁆𑀙𑀦𑁆𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀯𑀲𑁆𑀲𑀲𑁆𑀲 𑀅𑀦𑁆𑀢𑀭𑀸𑀬𑁄, 𑀬𑀁 𑀦𑁂𑀫𑀺𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺, 𑀬𑀢𑁆𑀣 𑀦𑁂𑀫𑀺𑀢𑁆𑀢𑀸𑀦𑀁 𑀘𑀓𑁆𑀔𑀼 𑀦 𑀓𑀫𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀉𑀧𑀭𑀺 𑀆𑀓𑀸𑀲𑁂 𑀯𑀸𑀬𑁄𑀥𑀸𑀢𑀼 𑀧𑀓𑀼𑀧𑁆𑀧𑀢𑀺. 𑀢𑁂𑀦 𑀉𑀧𑁆𑀧𑀦𑁆𑀦𑀸 𑀫𑁂𑀖𑀸 𑀧𑀝𑀺𑀯𑀺𑀕𑀘𑁆𑀙𑀦𑁆𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀯𑀲𑁆𑀲𑀲𑁆𑀲 𑀅𑀦𑁆𑀢𑀭𑀸𑀬𑁄, 𑀬𑀁 𑀦𑁂𑀫𑀺𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺, 𑀬𑀢𑁆𑀣 𑀦𑁂𑀫𑀺𑀢𑁆𑀢𑀸𑀦𑀁 𑀘𑀓𑁆𑀔𑀼 𑀦 𑀓𑀫𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄 𑀧𑀸𑀡𑀺𑀦𑀸 𑀉𑀤𑀓𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑁂 𑀙𑀟𑁆𑀟𑁂𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀯𑀲𑁆𑀲𑀲𑁆𑀲 𑀅𑀦𑁆𑀢𑀭𑀸𑀬𑁄, 𑀬𑀁 𑀦𑁂𑀫𑀺𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺, 𑀬𑀢𑁆𑀣 𑀦𑁂𑀫𑀺𑀢𑁆𑀢𑀸𑀦𑀁 𑀘𑀓𑁆𑀔𑀼 𑀦 𑀓𑀫𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀯𑀮𑀸𑀳𑀓𑀸 𑀤𑁂𑀯𑀸 𑀧𑀫𑀢𑁆𑀢𑀸 𑀳𑁄𑀦𑁆𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀯𑀲𑁆𑀲𑀲𑁆𑀲 𑀅𑀦𑁆𑀢𑀭𑀸𑀬𑁄, 𑀬𑀁 𑀦𑁂𑀫𑀺𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺, 𑀬𑀢𑁆𑀣 𑀦𑁂𑀫𑀺𑀢𑁆𑀢𑀸𑀦𑀁 𑀘𑀓𑁆𑀔𑀼 𑀦 𑀓𑀫𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑁄 𑀯𑀲𑁆𑀲𑀲𑁆𑀲 𑀅𑀦𑁆𑀢𑀭𑀸𑀬𑁄, 𑀬𑀁 𑀦𑁂𑀫𑀺𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺, 𑀬𑀢𑁆𑀣 𑀦𑁂𑀫𑀺𑀢𑁆𑀢𑀸𑀦𑀁 𑀘𑀓𑁆𑀔𑀼 𑀦 𑀓𑀫𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀯𑀲𑁆𑀲𑀲𑁆𑀲 𑀅𑀦𑁆𑀢𑀭𑀸𑀬𑀸, 𑀬𑀁 𑀦𑁂𑀫𑀺𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺, 𑀬𑀢𑁆𑀣 𑀦𑁂𑀫𑀺𑀢𑁆𑀢𑀸𑀦𑀁 𑀘𑀓𑁆𑀔𑀼 𑀦 𑀓𑀫𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀯𑀸𑀘𑀸𑀲𑀼𑀢𑁆𑀢𑀁

𑁧𑁯𑁮. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸 𑀳𑁄𑀢𑀺, 𑀦𑁄 𑀤𑀼𑀩𑁆𑀪𑀸𑀲𑀺𑀢𑀸, 𑀅𑀦𑀯𑀚𑁆𑀚𑀸 𑀘 𑀅𑀦𑀦𑀼𑀯𑀚𑁆𑀚𑀸 𑀘 𑀯𑀺𑀜𑁆𑀜𑀽𑀦𑀁 [𑀅𑀦𑀦𑀼𑀯𑀚𑁆𑀚𑀸 𑀯𑀺𑀜𑁆𑀜𑀽𑀦𑀁 (𑀲𑁆𑀬𑀸. 𑀓𑀁.)]. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀓𑀸𑀮𑁂𑀦 𑀘 𑀪𑀸𑀲𑀺𑀢𑀸 𑀳𑁄𑀢𑀺, 𑀲𑀘𑁆𑀘𑀸 𑀘 𑀪𑀸𑀲𑀺𑀢𑀸 𑀳𑁄𑀢𑀺, 𑀲𑀡𑁆𑀳𑀸 𑀘 𑀪𑀸𑀲𑀺𑀢𑀸 𑀳𑁄𑀢𑀺, 𑀅𑀢𑁆𑀣𑀲𑀁𑀳𑀺𑀢𑀸 𑀘 𑀪𑀸𑀲𑀺𑀢𑀸 𑀳𑁄𑀢𑀺, 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀘 𑀪𑀸𑀲𑀺𑀢𑀸 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸 𑀳𑁄𑀢𑀺, 𑀦𑁄 𑀤𑀼𑀩𑁆𑀪𑀸𑀲𑀺𑀢𑀸, 𑀅𑀦𑀯𑀚𑁆𑀚𑀸 𑀘 𑀅𑀦𑀦𑀼𑀯𑀚𑁆𑀚𑀸 𑀘 𑀯𑀺𑀜𑁆𑀜𑀽𑀦’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀓𑀼𑀮𑀲𑀼𑀢𑁆𑀢𑀁

𑁧𑁯𑁯. ‘‘𑀬𑀁, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀦𑁆𑀢𑁄 𑀧𑀩𑁆𑀩𑀚𑀺𑀢𑀸 𑀓𑀼𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀲𑀻𑀮𑀯𑀦𑁆𑀢𑁂 𑀧𑀩𑁆𑀩𑀚𑀺𑀢𑁂 𑀓𑀼𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀘𑀺𑀢𑁆𑀢𑀸𑀦𑀺 𑀧𑀲𑀸𑀤𑁂𑀦𑁆𑀢𑀺 [𑀧𑀲𑀻𑀤𑀦𑁆𑀢𑀺 (𑀲𑁆𑀬𑀸. 𑀓𑀁. 𑀓.)], 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑀁 𑀓𑀼𑀮𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀁 𑀳𑁄𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀲𑀻𑀮𑀯𑀦𑁆𑀢𑁂 𑀧𑀩𑁆𑀩𑀚𑀺𑀢𑁂 𑀓𑀼𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀫𑀦𑀼𑀲𑁆𑀲𑀸 𑀧𑀘𑁆𑀘𑀼𑀝𑁆𑀞𑁂𑀦𑁆𑀢𑀺 𑀅𑀪𑀺𑀯𑀸𑀤𑁂𑀦𑁆𑀢𑀺 𑀆𑀲𑀦𑀁 𑀤𑁂𑀦𑁆𑀢𑀺, 𑀉𑀘𑁆𑀘𑀸𑀓𑀼𑀮𑀻𑀦𑀲𑀁𑀯𑀢𑁆𑀢𑀦𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑀁 𑀓𑀼𑀮𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀁 𑀳𑁄𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀲𑀻𑀮𑀯𑀦𑁆𑀢𑁂 𑀧𑀩𑁆𑀩𑀚𑀺𑀢𑁂 𑀓𑀼𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀫𑀦𑀼𑀲𑁆𑀲𑀸 𑀫𑀘𑁆𑀙𑁂𑀭𑀫𑀮𑀁 𑀧𑀝𑀺𑀯𑀺𑀦𑁂𑀦𑁆𑀢𑀺 [𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺 (𑀲𑀻. 𑀧𑀻.)], 𑀫𑀳𑁂𑀲𑀓𑁆𑀔𑀲𑀁𑀯𑀢𑁆𑀢𑀦𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑀁 𑀓𑀼𑀮𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀁 𑀳𑁄𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀲𑀻𑀮𑀯𑀦𑁆𑀢𑁂 𑀧𑀩𑁆𑀩𑀚𑀺𑀢𑁂 𑀓𑀼𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀫𑀦𑀼𑀲𑁆𑀲𑀸 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀲𑀁𑀯𑀺𑀪𑀚𑀦𑁆𑀢𑀺, 𑀫𑀳𑀸𑀪𑁄𑀕𑀲𑀁𑀯𑀢𑁆𑀢𑀦𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑀁 𑀓𑀼𑀮𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀁 𑀳𑁄𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀲𑀻𑀮𑀯𑀦𑁆𑀢𑁂 𑀧𑀩𑁆𑀩𑀚𑀺𑀢𑁂 𑀓𑀼𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀫𑀦𑀼𑀲𑁆𑀲𑀸 𑀧𑀭𑀺𑀧𑀼𑀘𑁆𑀙𑀦𑁆𑀢𑀺 𑀧𑀭𑀺𑀧𑀜𑁆𑀳𑀦𑁆𑀢𑀺 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺, 𑀫𑀳𑀸𑀧𑀜𑁆𑀜𑀸𑀲𑀁𑀯𑀢𑁆𑀢𑀦𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑀁 𑀓𑀼𑀮𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀁 𑀳𑁄𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀦𑁆𑀢𑁄 𑀧𑀩𑁆𑀩𑀚𑀺𑀢𑀸 𑀓𑀼𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀦𑀺𑀲𑁆𑀲𑀸𑀭𑀡𑀻𑀬𑀲𑀼𑀢𑁆𑀢𑀁

𑁨𑁦𑁦. ‘‘𑀧𑀜𑁆𑀘𑀺𑀫𑀸, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀸𑀭𑀡𑀻𑀬𑀸 [𑀦𑀺𑀲𑁆𑀲𑀭𑀡𑀻𑀬𑀸 (𑀧𑀻.), 𑀦𑀺𑀲𑁆𑀲𑀭𑀡𑀺𑀬𑀸 (𑀤𑀻. 𑀦𑀺. 𑁩.𑁩𑁨𑁧)] 𑀥𑀸𑀢𑀼𑀬𑁄. 𑀓𑀢𑀫𑀸 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀓𑀸𑀫𑀁 [𑀓𑀸𑀫𑁂 (𑀲𑁆𑀬𑀸. 𑀓𑀁.) 𑀤𑀻. 𑀦𑀺. 𑁩.𑁩𑁨𑁧] 𑀫𑀦𑀲𑀺𑀓𑀭𑁄𑀢𑁄 𑀓𑀸𑀫𑁂𑀲𑀼 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦 𑀯𑀺𑀫𑀼𑀘𑁆𑀘𑀢𑀺. 𑀦𑁂𑀓𑁆𑀔𑀫𑁆𑀫𑀁 𑀔𑁄 𑀧𑀦𑀲𑁆𑀲 𑀫𑀦𑀲𑀺𑀓𑀭𑁄𑀢𑁄 𑀦𑁂𑀓𑁆𑀔𑀫𑁆𑀫𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀯𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀲𑀼𑀕𑀢𑀁 [𑀲𑀼𑀓𑀢𑀁 (𑀧𑀻. 𑀓.)] 𑀲𑀼𑀪𑀸𑀯𑀺𑀢𑀁 𑀲𑀼𑀯𑀼𑀝𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀲𑀁𑀬𑀼𑀢𑁆𑀢𑀁 [𑀯𑀺𑀲𑀁𑀬𑀼𑀢𑁆𑀢𑀁 (𑀓𑀢𑁆𑀣𑀘𑀺, 𑀤𑀻. 𑀦𑀺. 𑁩.𑁩𑁨𑁧)] 𑀓𑀸𑀫𑁂𑀳𑀺; 𑀬𑁂 𑀘 𑀓𑀸𑀫𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀫𑀼𑀢𑁆𑀢𑁄 𑀲𑁄 𑀢𑁂𑀳𑀺, 𑀦 𑀲𑁄 𑀢𑀁 𑀯𑁂𑀤𑀦𑀁 𑀯𑁂𑀤𑀺𑀬𑀢𑀺. 𑀇𑀤𑀫𑀓𑁆𑀔𑀸𑀢𑀁 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀩𑁆𑀬𑀸𑀧𑀸𑀤𑀁 𑀫𑀦𑀲𑀺𑀓𑀭𑁄𑀢𑁄 𑀩𑁆𑀬𑀸𑀧𑀸𑀤𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦 𑀯𑀺𑀫𑀼𑀘𑁆𑀘𑀢𑀺. 𑀅𑀩𑁆𑀬𑀸𑀧𑀸𑀤𑀁 𑀔𑁄 𑀧𑀦𑀲𑁆𑀲 𑀫𑀦𑀲𑀺𑀓𑀭𑁄𑀢𑁄 𑀅𑀩𑁆𑀬𑀸𑀧𑀸𑀤𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀯𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀲𑀼𑀕𑀢𑀁 𑀲𑀼𑀪𑀸𑀯𑀺𑀢𑀁 𑀲𑀼𑀯𑀼𑀝𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀲𑀁𑀬𑀼𑀢𑁆𑀢𑀁 𑀩𑁆𑀬𑀸𑀧𑀸𑀤𑁂𑀦; 𑀬𑁂 𑀘 𑀩𑁆𑀬𑀸𑀧𑀸𑀤𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀫𑀼𑀢𑁆𑀢𑁄 𑀲𑁄 𑀢𑁂𑀳𑀺, 𑀦 𑀲𑁄 𑀢𑀁 𑀯𑁂𑀤𑀦𑀁 𑀯𑁂𑀤𑀺𑀬𑀢𑀺. 𑀇𑀤𑀫𑀓𑁆𑀔𑀸𑀢𑀁 𑀩𑁆𑀬𑀸𑀧𑀸𑀤𑀲𑁆𑀲 𑀦𑀺𑀲𑁆𑀲𑀭𑀡𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀯𑀺𑀳𑁂𑀲𑀁 𑀫𑀦𑀲𑀺𑀓𑀭𑁄𑀢𑁄 𑀯𑀺𑀳𑁂𑀲𑀸𑀬 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦 𑀯𑀺𑀫𑀼𑀘𑁆𑀘𑀢𑀺. 𑀅𑀯𑀺𑀳𑁂𑀲𑀁 𑀔𑁄 𑀧𑀦𑀲𑁆𑀲 𑀫𑀦𑀲𑀺𑀓𑀭𑁄𑀢𑁄 𑀅𑀯𑀺𑀳𑁂𑀲𑀸𑀬 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀯𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀲𑀼𑀕𑀢𑀁 𑀲𑀼𑀪𑀸𑀯𑀺𑀢𑀁 𑀲𑀼𑀯𑀼𑀝𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀲𑀁𑀬𑀼𑀢𑁆𑀢𑀁 𑀯𑀺𑀳𑁂𑀲𑀸𑀬; 𑀬𑁂 𑀘 𑀯𑀺𑀳𑁂𑀲𑀸𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀫𑀼𑀢𑁆𑀢𑁄 𑀲𑁄 𑀢𑁂𑀳𑀺, 𑀦 𑀲𑁄 𑀢𑀁 𑀯𑁂𑀤𑀦𑀁 𑀯𑁂𑀤𑀺𑀬𑀢𑀺. 𑀇𑀤𑀫𑀓𑁆𑀔𑀸𑀢𑀁 𑀯𑀺𑀳𑁂𑀲𑀸𑀬 𑀦𑀺𑀲𑁆𑀲𑀭𑀡𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀭𑀽𑀧𑀁 𑀫𑀦𑀲𑀺𑀓𑀭𑁄𑀢𑁄 𑀭𑀽𑀧𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦 𑀯𑀺𑀫𑀼𑀘𑁆𑀘𑀢𑀺. 𑀅𑀭𑀽𑀧𑀁 𑀔𑁄 𑀧𑀦𑀲𑁆𑀲 𑀫𑀦𑀲𑀺𑀓𑀭𑁄𑀢𑁄 𑀅𑀭𑀽𑀧𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀯𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀲𑀼𑀕𑀢𑀁 𑀲𑀼𑀪𑀸𑀯𑀺𑀢𑀁 𑀲𑀼𑀯𑀼𑀝𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀲𑀁𑀬𑀼𑀢𑁆𑀢𑀁 𑀭𑀽𑀧𑁂𑀳𑀺; 𑀬𑁂 𑀘 𑀭𑀽𑀧𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀫𑀼𑀢𑁆𑀢𑁄 𑀲𑁄 𑀢𑁂𑀳𑀺, 𑀦 𑀲𑁄 𑀢𑀁 𑀯𑁂𑀤𑀦𑀁 𑀯𑁂𑀤𑀺𑀬𑀢𑀺. 𑀇𑀤𑀫𑀓𑁆𑀔𑀸𑀢𑀁 𑀭𑀽𑀧𑀸𑀦𑀁 𑀦𑀺𑀲𑁆𑀲𑀭𑀡𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑀓𑁆𑀓𑀸𑀬𑀁 𑀫𑀦𑀲𑀺𑀓𑀭𑁄𑀢𑁄 𑀲𑀓𑁆𑀓𑀸𑀬𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦 𑀯𑀺𑀫𑀼𑀘𑁆𑀘𑀢𑀺. 𑀲𑀓𑁆𑀓𑀸𑀬𑀦𑀺𑀭𑁄𑀥𑀁 𑀔𑁄 𑀧𑀦𑀲𑁆𑀲 𑀫𑀦𑀲𑀺𑀓𑀭𑁄𑀢𑁄 𑀲𑀓𑁆𑀓𑀸𑀬𑀦𑀺𑀭𑁄𑀥𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀯𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀲𑀼𑀕𑀢𑀁 𑀲𑀼𑀪𑀸𑀯𑀺𑀢𑀁 𑀲𑀼𑀯𑀼𑀝𑁆𑀞𑀺𑀢𑀁 𑀲𑀼𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀲𑀁𑀬𑀼𑀢𑁆𑀢𑀁 𑀲𑀓𑁆𑀓𑀸𑀬𑁂𑀦; 𑀬𑁂 𑀘 𑀲𑀓𑁆𑀓𑀸𑀬𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀫𑀼𑀢𑁆𑀢𑁄 𑀲𑁄 𑀢𑁂𑀳𑀺, 𑀦 𑀲𑁄 𑀢𑀁 𑀯𑁂𑀤𑀦𑀁 𑀯𑁂𑀤𑀺𑀬𑀢𑀺. 𑀇𑀤𑀫𑀓𑁆𑀔𑀸𑀢𑀁 𑀲𑀓𑁆𑀓𑀸𑀬𑀲𑁆𑀲 𑀦𑀺𑀲𑁆𑀲𑀭𑀡𑀁.

‘‘𑀢𑀲𑁆𑀲 𑀓𑀸𑀫𑀦𑀦𑁆𑀤𑀻𑀧𑀺 𑀦𑀸𑀦𑀼𑀲𑁂𑀢𑀺, 𑀩𑁆𑀬𑀸𑀧𑀸𑀤𑀦𑀦𑁆𑀤𑀻𑀧𑀺 𑀦𑀸𑀦𑀼𑀲𑁂𑀢𑀺, 𑀯𑀺𑀳𑁂𑀲𑀸𑀦𑀦𑁆𑀤𑀻𑀧𑀺 𑀦𑀸𑀦𑀼𑀲𑁂𑀢𑀺, 𑀭𑀽𑀧𑀦𑀦𑁆𑀤𑀻𑀧𑀺 𑀦𑀸𑀦𑀼𑀲𑁂𑀢𑀺, 𑀲𑀓𑁆𑀓𑀸𑀬𑀦𑀦𑁆𑀤𑀻𑀧𑀺 𑀦𑀸𑀦𑀼𑀲𑁂𑀢𑀺 (𑀲𑁄) [( ) 𑀓𑀢𑁆𑀣𑀘𑀺 𑀦𑀢𑁆𑀣𑀺] 𑀓𑀸𑀫𑀦𑀦𑁆𑀤𑀺𑀬𑀸𑀧𑀺 𑀅𑀦𑀦𑀼𑀲𑀬𑀸, 𑀩𑁆𑀬𑀸𑀧𑀸𑀤𑀦𑀦𑁆𑀤𑀺𑀬𑀸𑀧𑀺 𑀅𑀦𑀦𑀼𑀲𑀬𑀸, 𑀯𑀺𑀳𑁂𑀲𑀸𑀦𑀦𑁆𑀤𑀺𑀬𑀸𑀧𑀺 𑀅𑀦𑀦𑀼𑀲𑀬𑀸, 𑀭𑀽𑀧𑀦𑀦𑁆𑀤𑀺𑀬𑀸𑀧𑀺 𑀅𑀦𑀦𑀼𑀲𑀬𑀸, 𑀲𑀓𑁆𑀓𑀸𑀬𑀦𑀦𑁆𑀤𑀺𑀬𑀸𑀧𑀺 𑀅𑀦𑀦𑀼𑀲𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀭𑀦𑀼𑀲𑀬𑁄, 𑀅𑀘𑁆𑀙𑁂𑀘𑁆𑀙𑀺 [𑀅𑀘𑁆𑀙𑁂𑀚𑁆𑀚𑀺 (𑀲𑁆𑀬𑀸. 𑀓𑀁. 𑀓.)] 𑀢𑀡𑁆𑀳𑀁, 𑀯𑀺𑀯𑀢𑁆𑀢𑀬𑀺 [𑀯𑀸𑀯𑀢𑁆𑀢𑀬𑀺 (𑀲𑀻.)] 𑀲𑀁𑀬𑁄𑀚𑀦𑀁, 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄’’𑀢𑀺. 𑀤𑀲𑀫𑀁.

𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄 𑀧𑀜𑁆𑀘𑀫𑁄.