(𑁮) 𑁩. 𑀬𑁄𑀥𑀸𑀚𑀻𑀯𑀯𑀕𑁆𑀕𑁄

𑁧. 𑀧𑀞𑀫𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀲𑀼𑀢𑁆𑀢𑀁

𑁭𑁧. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀦𑁆𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀦𑁆𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘.

‘‘𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑀼𑀪𑀸𑀦𑀼𑀧𑀲𑁆𑀲𑀻 𑀓𑀸𑀬𑁂 𑀯𑀺𑀳𑀭𑀢𑀺, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 [𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀻, 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻, 𑀫𑀭𑀡𑀲𑀜𑁆𑀜𑀸 𑀔𑁄 𑀧𑀦𑀲𑁆𑀲 𑀅𑀚𑁆𑀛𑀢𑁆𑀢𑀁 𑀲𑀽𑀧𑀝𑁆𑀞𑀺𑀢𑀸 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀦𑁆𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀦𑁆𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑁂𑀢𑁄𑀯𑀺𑀫𑀼𑀢𑁆𑀢𑁄 𑀘 𑀳𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀘 𑀳𑁄𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀇𑀢𑀺𑀧𑀺, 𑀲𑀁𑀓𑀺𑀡𑁆𑀡𑀧𑀭𑀺𑀔𑁄 [𑀲𑀁𑀓𑀺𑀡𑁆𑀡𑀧𑀭𑀺𑀓𑁆𑀔𑁄 (𑀲𑁆𑀬𑀸. 𑀓𑀁.)] 𑀇𑀢𑀺𑀧𑀺, 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀇𑀢𑀺𑀧𑀺, 𑀦𑀺𑀭𑀕𑁆𑀕𑀴𑁄 𑀇𑀢𑀺𑀧𑀺, 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀁𑀬𑀼𑀢𑁆𑀢𑁄 𑀇𑀢𑀺𑀧𑀺’’’.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀯𑀺𑀚𑁆𑀚𑀸 𑀧𑀳𑀻𑀦𑀸 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀁𑀓𑀺𑀡𑁆𑀡𑀧𑀭𑀺𑀔𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑁄𑀦𑁄𑀪𑀯𑀺𑀓𑁄 [𑀧𑁄𑀦𑁄𑀩𑁆𑀪𑀯𑀺𑀓𑁄 (𑀲𑁆𑀬𑀸. 𑀓.)] 𑀚𑀸𑀢𑀺𑀲𑀁𑀲𑀸𑀭𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀁𑀓𑀺𑀡𑁆𑀡𑀧𑀭𑀺𑀔𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀧𑀳𑀻𑀦𑀸 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀭𑀕𑁆𑀕𑀴𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸𑀦𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀦𑀺 𑀅𑀦𑀪𑀸𑀯𑀁𑀓𑀢𑀸𑀦𑀺 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀦𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀭𑀕𑁆𑀕𑀴𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀁𑀬𑀼𑀢𑁆𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀲𑁆𑀫𑀺𑀫𑀸𑀦𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀁𑀬𑀼𑀢𑁆𑀢𑁄 𑀳𑁄𑀢𑀻’’𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀲𑀼𑀢𑁆𑀢𑀁

𑁭𑁨. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀦𑁆𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀦𑁆𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘. 𑀓𑀢𑀫𑁂 𑀧𑀜𑁆𑀘? 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸, 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸, 𑀧𑀳𑀸𑀦𑀲𑀜𑁆𑀜𑀸, 𑀯𑀺𑀭𑀸𑀕𑀲𑀜𑁆𑀜𑀸 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀦𑁆𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀦𑁆𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑁂𑀢𑁄𑀯𑀺𑀫𑀼𑀢𑁆𑀢𑁄 𑀘 𑀳𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀘 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀇𑀢𑀺𑀧𑀺, 𑀲𑀁𑀓𑀺𑀡𑁆𑀡𑀧𑀭𑀺𑀔𑁄 𑀇𑀢𑀺𑀧𑀺, 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀇𑀢𑀺𑀧𑀺, 𑀦𑀺𑀭𑀕𑁆𑀕𑀴𑁄 𑀇𑀢𑀺𑀧𑀺, 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀁𑀬𑀼𑀢𑁆𑀢𑁄 𑀇𑀢𑀺𑀧𑀺’’’.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀯𑀺𑀚𑁆𑀚𑀸 𑀧𑀳𑀻𑀦𑀸 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀁𑀓𑀺𑀡𑁆𑀡𑀧𑀭𑀺𑀔𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑁄𑀦𑁄𑀪𑀯𑀺𑀓𑁄 𑀚𑀸𑀢𑀺𑀲𑀁𑀲𑀸𑀭𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀁𑀓𑀺𑀡𑁆𑀡𑀧𑀭𑀺𑀔𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀧𑀳𑀻𑀦𑀸 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀭𑀕𑁆𑀕𑀴𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸𑀦𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀦𑀺 𑀅𑀦𑀪𑀸𑀯𑀁𑀓𑀢𑀸𑀦𑀺 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀦𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀭𑀕𑁆𑀕𑀴𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀁𑀬𑀼𑀢𑁆𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀲𑁆𑀫𑀺𑀫𑀸𑀦𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀁𑀬𑀼𑀢𑁆𑀢𑁄 𑀳𑁄𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀧𑀞𑀫𑀥𑀫𑁆𑀫𑀯𑀺𑀳𑀸𑀭𑀻𑀲𑀼𑀢𑁆𑀢𑀁

𑁭𑁩. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀥𑀫𑁆𑀫𑀯𑀺𑀳𑀸𑀭𑀻, 𑀥𑀫𑁆𑀫𑀯𑀺𑀳𑀸𑀭𑀻’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀯𑀺𑀳𑀸𑀭𑀻 𑀳𑁄𑀢𑀻’’𑀢𑀺?

‘‘𑀇𑀥, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀲𑁄 𑀢𑀸𑀬 𑀥𑀫𑁆𑀫𑀧𑀭𑀺𑀬𑀢𑁆𑀢𑀺𑀬𑀸 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀺, 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀦𑀸𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀼 𑁋 ‘𑀪𑀺𑀓𑁆𑀔𑀼 𑀧𑀭𑀺𑀬𑀢𑁆𑀢𑀺𑀩𑀳𑀼𑀮𑁄, 𑀦𑁄 𑀥𑀫𑁆𑀫𑀯𑀺𑀳𑀸𑀭𑀻’’’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑁂𑀲𑀁 𑀤𑁂𑀲𑁂𑀢𑀺. 𑀲𑁄 𑀢𑀸𑀬 𑀥𑀫𑁆𑀫𑀧𑀜𑁆𑀜𑀢𑁆𑀢𑀺𑀬𑀸 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀺, 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀦𑀸𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀼 𑁋 ‘𑀪𑀺𑀓𑁆𑀔𑀼 𑀧𑀜𑁆𑀜𑀢𑁆𑀢𑀺𑀩𑀳𑀼𑀮𑁄, 𑀦𑁄 𑀥𑀫𑁆𑀫𑀯𑀺𑀳𑀸𑀭𑀻’’’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀢𑀺. 𑀲𑁄 𑀢𑁂𑀦 𑀲𑀚𑁆𑀛𑀸𑀬𑁂𑀦 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀺, 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀦𑀸𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀼 𑁋 ‘𑀪𑀺𑀓𑁆𑀔𑀼 𑀲𑀚𑁆𑀛𑀸𑀬𑀩𑀳𑀼𑀮𑁄, 𑀦𑁄 𑀥𑀫𑁆𑀫𑀯𑀺𑀳𑀸𑀭𑀻’’’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑁂𑀢𑀺 𑀅𑀦𑀼𑀯𑀺𑀘𑀸𑀭𑁂𑀢𑀺 𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑀺. 𑀲𑁄 𑀢𑁂𑀳𑀺 𑀥𑀫𑁆𑀫𑀯𑀺𑀢𑀓𑁆𑀓𑁂𑀳𑀺 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀺, 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀦𑀸𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀼 𑁋 ‘𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀩𑀳𑀼𑀮𑁄, 𑀦𑁄 𑀥𑀫𑁆𑀫𑀯𑀺𑀳𑀸𑀭𑀻’’’.

‘‘𑀇𑀥, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀲𑁄 𑀢𑀸𑀬 𑀥𑀫𑁆𑀫𑀧𑀭𑀺𑀬𑀢𑁆𑀢𑀺𑀬𑀸 𑀦 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀺, 𑀦𑀸𑀧𑀺 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀅𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀥𑀫𑁆𑀫𑀯𑀺𑀳𑀸𑀭𑀻 𑀳𑁄𑀢𑀺.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀼, 𑀤𑁂𑀲𑀺𑀢𑁄 𑀫𑀬𑀸 𑀧𑀭𑀺𑀬𑀢𑁆𑀢𑀺𑀩𑀳𑀼𑀮𑁄, 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑀺𑀩𑀳𑀼𑀮𑁄, 𑀤𑁂𑀲𑀺𑀢𑁄 𑀲𑀚𑁆𑀛𑀸𑀬𑀩𑀳𑀼𑀮𑁄, 𑀤𑁂𑀲𑀺𑀢𑁄 𑀯𑀺𑀢𑀓𑁆𑀓𑀩𑀳𑀼𑀮𑁄, 𑀤𑁂𑀲𑀺𑀢𑁄 𑀥𑀫𑁆𑀫𑀯𑀺𑀳𑀸𑀭𑀻. 𑀬𑀁 𑀔𑁄, 𑀪𑀺𑀓𑁆𑀔𑀼 [𑀬𑀁 𑀪𑀺𑀓𑁆𑀔𑀼 (𑀲𑁆𑀬𑀸. 𑀓𑀁. 𑀧𑀻.)], 𑀲𑀢𑁆𑀣𑀸𑀭𑀸 𑀓𑀭𑀡𑀻𑀬𑀁 𑀲𑀸𑀯𑀓𑀸𑀦𑀁 𑀳𑀺𑀢𑁂𑀲𑀺𑀦𑀸 𑀅𑀦𑀼𑀓𑀫𑁆𑀧𑀓𑁂𑀦 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀓𑀢𑀁 𑀯𑁄 𑀢𑀁 𑀫𑀬𑀸. 𑀏𑀢𑀸𑀦𑀺, 𑀪𑀺𑀓𑁆𑀔𑀼, 𑀭𑀼𑀓𑁆𑀔𑀫𑀽𑀮𑀸𑀦𑀺, 𑀏𑀢𑀸𑀦𑀺 𑀲𑀼𑀜𑁆𑀜𑀸𑀕𑀸𑀭𑀸𑀦𑀺. 𑀛𑀸𑀬𑀣, 𑀪𑀺𑀓𑁆𑀔𑀼, 𑀫𑀸 𑀧𑀫𑀸𑀤𑀢𑁆𑀣, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻’’𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀥𑀫𑁆𑀫𑀯𑀺𑀳𑀸𑀭𑀻𑀲𑀼𑀢𑁆𑀢𑀁

𑁭𑁪. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀥𑀫𑁆𑀫𑀯𑀺𑀳𑀸𑀭𑀻 𑀥𑀫𑁆𑀫𑀯𑀺𑀳𑀸𑀭𑀻’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀯𑀺𑀳𑀸𑀭𑀻 𑀳𑁄𑀢𑀻’’𑀢𑀺?

‘‘𑀇𑀥, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁; 𑀉𑀢𑁆𑀢𑀭𑀺 [𑀉𑀢𑁆𑀢𑀭𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀘𑀲𑁆𑀲 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀼 𑁋 ‘𑀪𑀺𑀓𑁆𑀔𑀼 𑀧𑀭𑀺𑀬𑀢𑁆𑀢𑀺𑀩𑀳𑀼𑀮𑁄, 𑀦𑁄 𑀥𑀫𑁆𑀫𑀯𑀺𑀳𑀸𑀭𑀻’’’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑁂𑀲𑀁 𑀤𑁂𑀲𑁂𑀢𑀺, 𑀉𑀢𑁆𑀢𑀭𑀺 𑀘𑀲𑁆𑀲 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀼 𑁋 ‘𑀪𑀺𑀓𑁆𑀔𑀼 𑀧𑀜𑁆𑀜𑀢𑁆𑀢𑀺𑀩𑀳𑀼𑀮𑁄, 𑀦𑁄 𑀥𑀫𑁆𑀫𑀯𑀺𑀳𑀸𑀭𑀻’’’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀢𑀺, 𑀉𑀢𑁆𑀢𑀭𑀺 𑀘𑀲𑁆𑀲 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀼 𑁋 ‘𑀪𑀺𑀓𑁆𑀔𑀼 𑀲𑀚𑁆𑀛𑀸𑀬𑀩𑀳𑀼𑀮𑁄, 𑀦𑁄 𑀥𑀫𑁆𑀫𑀯𑀺𑀳𑀸𑀭𑀻’’’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑁂𑀢𑀺 𑀅𑀦𑀼𑀯𑀺𑀘𑀸𑀭𑁂𑀢𑀺 𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑀺, 𑀉𑀢𑁆𑀢𑀭𑀺 𑀘𑀲𑁆𑀲 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀼 𑁋 ‘𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀩𑀳𑀼𑀮𑁄, 𑀦𑁄 𑀥𑀫𑁆𑀫𑀯𑀺𑀳𑀸𑀭𑀻’’’.

‘‘𑀇𑀥, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁; 𑀉𑀢𑁆𑀢𑀭𑀺 𑀘𑀲𑁆𑀲 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀥𑀫𑁆𑀫𑀯𑀺𑀳𑀸𑀭𑀻 𑀳𑁄𑀢𑀺.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀼, 𑀤𑁂𑀲𑀺𑀢𑁄 𑀫𑀬𑀸 𑀧𑀭𑀺𑀬𑀢𑁆𑀢𑀺𑀩𑀳𑀼𑀮𑁄, 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑀺𑀩𑀳𑀼𑀮𑁄, 𑀤𑁂𑀲𑀺𑀢𑁄 𑀲𑀚𑁆𑀛𑀸𑀬𑀩𑀳𑀼𑀮𑁄, 𑀤𑁂𑀲𑀺𑀢𑁄 𑀯𑀺𑀢𑀓𑁆𑀓𑀩𑀳𑀼𑀮𑁄, 𑀤𑁂𑀲𑀺𑀢𑁄 𑀥𑀫𑁆𑀫𑀯𑀺𑀳𑀸𑀭𑀻. 𑀬𑀁 𑀔𑁄, 𑀪𑀺𑀓𑁆𑀔𑀼, 𑀲𑀢𑁆𑀣𑀸𑀭𑀸 𑀓𑀭𑀡𑀻𑀬𑀁 𑀲𑀸𑀯𑀓𑀸𑀦𑀁 𑀳𑀺𑀢𑁂𑀲𑀺𑀦𑀸 𑀅𑀦𑀼𑀓𑀫𑁆𑀧𑀓𑁂𑀦 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀓𑀢𑀁 𑀯𑁄 𑀢𑀁 𑀫𑀬𑀸. 𑀏𑀢𑀸𑀦𑀺, 𑀪𑀺𑀓𑁆𑀔𑀼, 𑀭𑀼𑀓𑁆𑀔𑀫𑀽𑀮𑀸𑀦𑀺, 𑀏𑀢𑀸𑀦𑀺 𑀲𑀼𑀜𑁆𑀜𑀸𑀕𑀸𑀭𑀸𑀦𑀺. 𑀛𑀸𑀬𑀣 𑀪𑀺𑀓𑁆𑀔𑀼, 𑀫𑀸 𑀧𑀫𑀸𑀤𑀢𑁆𑀣, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀁

𑁭𑁫. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀭𑀚𑀕𑁆𑀕𑀜𑁆𑀜𑁂𑀯 𑀤𑀺𑀲𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺 𑀦 𑀲𑀦𑁆𑀣𑀫𑁆𑀪𑀢𑀺 𑀦 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀭𑀽𑀧𑁄𑀧𑀺 [𑀏𑀯𑀭𑀽𑀧𑁄 (𑀲𑀻.) 𑀧𑀼. 𑀧. 𑁧𑁯𑁩], 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 [𑀏𑀓𑀘𑁆𑀘𑁄 (𑀲𑀻.)] 𑀬𑁄𑀥𑀸𑀚𑀻𑀯𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀬𑁄𑀥𑀸𑀚𑀻𑀯𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀲𑀳𑀢𑀺 𑀭𑀚𑀕𑁆𑀕𑀁; 𑀅𑀧𑀺 𑀘 𑀔𑁄 𑀥𑀚𑀕𑁆𑀕𑀜𑁆𑀜𑁂𑀯 𑀤𑀺𑀲𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺, 𑀦 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀬𑁄𑀥𑀸𑀚𑀻𑀯𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀲𑀳𑀢𑀺 𑀭𑀚𑀕𑁆𑀕𑀁 𑀲𑀳𑀢𑀺 𑀥𑀚𑀕𑁆𑀕𑀁; 𑀅𑀧𑀺 𑀘 𑀔𑁄 𑀉𑀲𑁆𑀲𑀸𑀭𑀡𑀜𑁆𑀜𑁂𑀯 [𑀉𑀲𑁆𑀲𑀸𑀤𑀦𑀁𑀬𑁂𑀯 (𑀲𑀻. 𑀧𑀻.)] 𑀲𑀼𑀢𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺, 𑀦 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀬𑁄𑀥𑀸𑀚𑀻𑀯𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀲𑀳𑀢𑀺 𑀭𑀚𑀕𑁆𑀕𑀁, 𑀲𑀳𑀢𑀺 𑀥𑀚𑀕𑁆𑀕𑀁, 𑀲𑀳𑀢𑀺 𑀉𑀲𑁆𑀲𑀸𑀭𑀡𑀁; 𑀅𑀧𑀺 𑀘 𑀔𑁄 𑀲𑀫𑁆𑀧𑀳𑀸𑀭𑁂 𑀳𑀜𑁆𑀜𑀢𑀺 [𑀆𑀳𑀜𑁆𑀜𑀢𑀺 (𑀲𑀻.)] 𑀩𑁆𑀬𑀸𑀧𑀚𑁆𑀚𑀢𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀬𑁄𑀥𑀸𑀚𑀻𑀯𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀲𑀳𑀢𑀺 𑀭𑀚𑀕𑁆𑀕𑀁, 𑀲𑀳𑀢𑀺 𑀥𑀚𑀕𑁆𑀕𑀁, 𑀲𑀳𑀢𑀺 𑀉𑀲𑁆𑀲𑀸𑀭𑀡𑀁, 𑀲𑀳𑀢𑀺 𑀲𑀫𑁆𑀧𑀳𑀸𑀭𑀁. 𑀲𑁄 𑀢𑀁 𑀲𑀗𑁆𑀕𑀸𑀫𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑁄 𑀢𑀫𑁂𑀯 𑀲𑀗𑁆𑀕𑀸𑀫𑀲𑀻𑀲𑀁 𑀅𑀚𑁆𑀛𑀸𑀯𑀲𑀢𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑁄 𑀬𑁄𑀥𑀸𑀚𑀻𑀯𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀬𑁄𑀥𑀸𑀚𑀻𑀯𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀺𑀫𑁂 𑀬𑁄𑀥𑀸𑀚𑀻𑀯𑀽𑀧𑀫𑀸 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀪𑀺𑀓𑁆𑀔𑀽𑀲𑀼. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀚𑀕𑁆𑀕𑀜𑁆𑀜𑁂𑀯 𑀤𑀺𑀲𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺, 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁 [𑀲𑀦𑁆𑀢𑀸𑀦𑁂𑀢𑀼𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀓𑀺𑀫𑀲𑁆𑀲 𑀭𑀚𑀕𑁆𑀕𑀲𑁆𑀫𑀺𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 𑁋 ‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀯𑀸 𑀓𑀼𑀫𑀸𑀭𑀻 𑀯𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸’𑀢𑀺. 𑀲𑁄 𑀢𑀁 𑀲𑀼𑀢𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺, 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁. 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀇𑀤𑀫𑀲𑁆𑀲 𑀭𑀚𑀕𑁆𑀕𑀲𑁆𑀫𑀺𑀁.

‘‘𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑁄 𑀭𑀚𑀕𑁆𑀕𑀜𑁆𑀜𑁂𑀯 𑀤𑀺𑀲𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺, 𑀦 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀬𑁄𑀥𑀸𑀚𑀻𑀯𑀽𑀧𑀫𑁄 𑀧𑀼𑀕𑁆𑀕𑀮𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀽𑀲𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀳𑀢𑀺 𑀭𑀚𑀕𑁆𑀕𑀁; 𑀅𑀧𑀺 𑀘 𑀔𑁄 𑀥𑀚𑀕𑁆𑀕𑀜𑁆𑀜𑁂𑀯 𑀤𑀺𑀲𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺, 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁. 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀓𑀺𑀫𑀲𑁆𑀲 𑀥𑀚𑀕𑁆𑀕𑀲𑁆𑀫𑀺𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀲𑀼𑀡𑀸𑀢𑀺 𑁋 ‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀯𑀸 𑀓𑀼𑀫𑀸𑀭𑀻 𑀯𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸’𑀢𑀺; 𑀅𑀧𑀺 𑀘 𑀔𑁄 𑀲𑀸𑀫𑀁 𑀧𑀲𑁆𑀲𑀢𑀺 𑀇𑀢𑁆𑀣𑀺𑀁 𑀯𑀸 𑀓𑀼𑀫𑀸𑀭𑀺𑀁 𑀯𑀸 𑀅𑀪𑀺𑀭𑀽𑀧𑀁 𑀤𑀲𑁆𑀲𑀦𑀻𑀬𑀁 𑀧𑀸𑀲𑀸𑀤𑀺𑀓𑀁 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀁. 𑀲𑁄 𑀢𑀁 𑀤𑀺𑀲𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺, 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁. 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀇𑀤𑀫𑀲𑁆𑀲 𑀥𑀚𑀕𑁆𑀕𑀲𑁆𑀫𑀺𑀁.

‘‘𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑁄 𑀲𑀳𑀢𑀺 𑀭𑀚𑀕𑁆𑀕𑀁; 𑀅𑀧𑀺 𑀘 𑀔𑁄 𑀥𑀚𑀕𑁆𑀕𑀜𑁆𑀜𑁂𑀯 𑀤𑀺𑀲𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺, 𑀦 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀬𑁄𑀥𑀸𑀚𑀻𑀯𑀽𑀧𑀫𑁄 𑀧𑀼𑀕𑁆𑀕𑀮𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀽𑀲𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀳𑀢𑀺 𑀭𑀚𑀕𑁆𑀕𑀁, 𑀲𑀳𑀢𑀺 𑀥𑀚𑀕𑁆𑀕𑀁; 𑀅𑀧𑀺 𑀘 𑀔𑁄 𑀉𑀲𑁆𑀲𑀸𑀭𑀡𑀜𑁆𑀜𑁂𑀯 𑀲𑀼𑀢𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺, 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁. 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀓𑀺𑀫𑀲𑁆𑀲 𑀉𑀲𑁆𑀲𑀸𑀭𑀡𑀸𑀬? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀅𑀭𑀜𑁆𑀜𑀕𑀢𑀁 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑀁 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑀁 𑀯𑀸 𑀫𑀸𑀢𑀼𑀕𑀸𑀫𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀊𑀳𑀲𑀢𑀺 [𑀉𑀳𑀲𑀢𑀺 (𑀓.), 𑀑𑀳𑀲𑀢𑀺 (𑀲𑁆𑀬𑀸. 𑀓𑀁.) 𑀧𑀼. 𑀧. 𑁧𑁯𑁬] 𑀉𑀮𑁆𑀮𑀧𑀢𑀺 𑀉𑀚𑁆𑀚𑀕𑁆𑀖𑀢𑀺 𑀉𑀧𑁆𑀧𑀡𑁆𑀟𑁂𑀢𑀺. 𑀲𑁄 𑀫𑀸𑀢𑀼𑀕𑀸𑀫𑁂𑀦 𑀊𑀳𑀲𑀺𑀬𑀫𑀸𑀦𑁄 𑀉𑀮𑁆𑀮𑀧𑀺𑀬𑀫𑀸𑀦𑁄 𑀉𑀚𑁆𑀚𑀕𑁆𑀖𑀺𑀬𑀫𑀸𑀦𑁄 𑀉𑀧𑁆𑀧𑀡𑁆𑀟𑀺𑀬𑀫𑀸𑀦𑁄 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺, 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁. 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀇𑀤𑀫𑀲𑁆𑀲 𑀉𑀲𑁆𑀲𑀸𑀭𑀡𑀸𑀬.

‘‘𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑁄 𑀲𑀳𑀢𑀺 𑀭𑀚𑀕𑁆𑀕𑀁, 𑀲𑀳𑀢𑀺 𑀥𑀚𑀕𑁆𑀕𑀁; 𑀅𑀧𑀺 𑀘 𑀔𑁄 𑀉𑀲𑁆𑀲𑀸𑀭𑀡𑀜𑁆𑀜𑁂𑀯 𑀲𑀼𑀢𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺, 𑀦 𑀲𑀦𑁆𑀣𑀫𑁆𑀪𑀢𑀺, 𑀦 𑀲𑀓𑁆𑀓𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑀼𑀁; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀬𑁄𑀥𑀸𑀚𑀻𑀯𑀽𑀧𑀫𑁄 𑀧𑀼𑀕𑁆𑀕𑀮𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀽𑀲𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀳𑀢𑀺 𑀭𑀚𑀕𑁆𑀕𑀁, 𑀲𑀳𑀢𑀺 𑀥𑀚𑀕𑁆𑀕𑀁, 𑀲𑀳𑀢𑀺 𑀉𑀲𑁆𑀲𑀸𑀭𑀡𑀁; 𑀅𑀧𑀺 𑀘 𑀔𑁄 𑀲𑀫𑁆𑀧𑀳𑀸𑀭𑁂 𑀳𑀜𑁆𑀜𑀢𑀺 𑀩𑁆𑀬𑀸𑀧𑀚𑁆𑀚𑀢𑀺. 𑀓𑀺𑀫𑀲𑁆𑀲 𑀲𑀫𑁆𑀧𑀳𑀸𑀭𑀲𑁆𑀫𑀺𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀅𑀭𑀜𑁆𑀜𑀕𑀢𑀁 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑀁 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑀁 𑀯𑀸 𑀫𑀸𑀢𑀼𑀕𑀸𑀫𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀦𑀺𑀲𑀻𑀤𑀢𑀺 𑀅𑀪𑀺𑀦𑀺𑀧𑀚𑁆𑀚𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀲𑁄 𑀫𑀸𑀢𑀼𑀕𑀸𑀫𑁂𑀦 𑀅𑀪𑀺𑀦𑀺𑀲𑀻𑀤𑀺𑀬𑀫𑀸𑀦𑁄 𑀅𑀪𑀺𑀦𑀺𑀧𑀚𑁆𑀚𑀺𑀬𑀫𑀸𑀦𑁄 𑀅𑀚𑁆𑀛𑁄𑀢𑁆𑀣𑀭𑀺𑀬𑀫𑀸𑀦𑁄 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺. 𑀇𑀤𑀫𑀲𑁆𑀲 𑀲𑀫𑁆𑀧𑀳𑀸𑀭𑀲𑁆𑀫𑀺𑀁.

‘‘𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑁄 𑀲𑀳𑀢𑀺 𑀭𑀚𑀕𑁆𑀕𑀁, 𑀲𑀳𑀢𑀺 𑀥𑀚𑀕𑁆𑀕𑀁, 𑀲𑀳𑀢𑀺 𑀉𑀲𑁆𑀲𑀸𑀭𑀡𑀁, 𑀅𑀧𑀺 𑀘 𑀔𑁄 𑀲𑀫𑁆𑀧𑀳𑀸𑀭𑁂 𑀳𑀜𑁆𑀜𑀢𑀺 𑀩𑁆𑀬𑀸𑀧𑀚𑁆𑀚𑀢𑀺; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀬𑁄𑀥𑀸𑀚𑀻𑀯𑀽𑀧𑀫𑁄 𑀧𑀼𑀕𑁆𑀕𑀮𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀽𑀲𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀳𑀢𑀺 𑀭𑀚𑀕𑁆𑀕𑀁, 𑀲𑀳𑀢𑀺 𑀥𑀚𑀕𑁆𑀕𑀁, 𑀲𑀳𑀢𑀺 𑀉𑀲𑁆𑀲𑀸𑀭𑀡𑀁, 𑀲𑀳𑀢𑀺 𑀲𑀫𑁆𑀧𑀳𑀸𑀭𑀁, 𑀲𑁄 𑀢𑀁 𑀲𑀗𑁆𑀕𑀸𑀫𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑁄 𑀢𑀫𑁂𑀯 𑀲𑀗𑁆𑀕𑀸𑀫𑀲𑀻𑀲𑀁 𑀅𑀚𑁆𑀛𑀸𑀯𑀲𑀢𑀺. 𑀓𑀺𑀫𑀲𑁆𑀲 𑀲𑀗𑁆𑀕𑀸𑀫𑀯𑀺𑀚𑀬𑀲𑁆𑀫𑀺𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑀁 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑀁 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑀁 𑀯𑀸 𑀫𑀸𑀢𑀼𑀕𑀸𑀫𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀦𑀺𑀲𑀻𑀤𑀢𑀺 𑀅𑀪𑀺𑀦𑀺𑀧𑀚𑁆𑀚𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀲𑁄 𑀫𑀸𑀢𑀼𑀕𑀸𑀫𑁂𑀦 𑀅𑀪𑀺𑀦𑀺𑀲𑀻𑀤𑀺𑀬𑀫𑀸𑀦𑁄 𑀅𑀪𑀺𑀦𑀺𑀧𑀚𑁆𑀚𑀺𑀬𑀫𑀸𑀦𑁄 𑀅𑀚𑁆𑀛𑁄𑀢𑁆𑀣𑀭𑀺𑀬𑀫𑀸𑀦𑁄 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀯𑀺𑀦𑀺𑀫𑁄𑀘𑁂𑀢𑁆𑀯𑀸 𑀬𑁂𑀦 𑀓𑀸𑀫𑀁 𑀧𑀓𑁆𑀓𑀫𑀢𑀺. 𑀲𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁.

‘‘𑀲𑁄 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺, 𑀅𑀪𑀺𑀚𑁆𑀛𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀩𑁆𑀬𑀸𑀧𑀸𑀤𑀧𑀤𑁄𑀲𑀁 𑀧𑀳𑀸𑀬 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀯𑀺𑀳𑀭𑀢𑀺, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀩𑁆𑀬𑀸𑀧𑀸𑀤𑀧𑀤𑁄𑀲𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀣𑀺𑀦𑀫𑀺𑀤𑁆𑀥𑀁 𑀧𑀳𑀸𑀬 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀯𑀺𑀳𑀭𑀢𑀺 𑀆𑀮𑁄𑀓𑀲𑀜𑁆𑀜𑀻 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀣𑀺𑀦𑀫𑀺𑀤𑁆𑀥𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀸𑀬 𑀅𑀦𑀼𑀤𑁆𑀥𑀢𑁄 𑀯𑀺𑀳𑀭𑀢𑀺 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀳𑀭𑀢𑀺 𑀅𑀓𑀣𑀁𑀓𑀣𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸, 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀇𑀫𑁂 𑀆𑀲𑀯𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀇𑀤𑀫𑀲𑁆𑀲 𑀲𑀗𑁆𑀕𑀸𑀫𑀯𑀺𑀚𑀬𑀲𑁆𑀫𑀺𑀁.

‘‘𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑁄 𑀲𑀳𑀢𑀺 𑀭𑀚𑀕𑁆𑀕𑀁, 𑀲𑀳𑀢𑀺 𑀥𑀚𑀕𑁆𑀕𑀁, 𑀲𑀳𑀢𑀺 𑀉𑀲𑁆𑀲𑀸𑀭𑀡𑀁, 𑀲𑀳𑀢𑀺 𑀲𑀫𑁆𑀧𑀳𑀸𑀭𑀁, 𑀲𑁄 𑀢𑀁 𑀲𑀗𑁆𑀕𑀸𑀫𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑁄 𑀢𑀫𑁂𑀯 𑀲𑀗𑁆𑀕𑀸𑀫𑀲𑀻𑀲𑀁 𑀅𑀚𑁆𑀛𑀸𑀯𑀲𑀢𑀺; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑁄 𑀬𑁄𑀥𑀸𑀚𑀻𑀯𑀽𑀧𑀫𑁄 𑀧𑀼𑀕𑁆𑀕𑀮𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀽𑀲𑀼. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀬𑁄𑀥𑀸𑀚𑀻𑀯𑀽𑀧𑀫𑀸 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀪𑀺𑀓𑁆𑀔𑀽𑀲𑀽’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀁

𑁭𑁬. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀬𑀽𑀴𑁆𑀳𑀁 𑀲𑀗𑁆𑀕𑀸𑀫𑀁 𑀑𑀢𑀭𑀢𑀺. 𑀲𑁄 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑁂 𑀉𑀲𑁆𑀲𑀳𑀢𑀺 𑀯𑀸𑀬𑀫𑀢𑀺. 𑀢𑀫𑁂𑀦𑀁 𑀉𑀲𑁆𑀲𑀳𑀦𑁆𑀢𑀁 𑀯𑀸𑀬𑀫𑀦𑁆𑀢𑀁 𑀧𑀭𑁂 𑀳𑀦𑀦𑁆𑀢𑀺 𑀧𑀭𑀺𑀬𑀸𑀧𑀸𑀤𑁂𑀦𑁆𑀢𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀬𑁄𑀥𑀸𑀚𑀻𑀯𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀬𑀽𑀴𑁆𑀳𑀁 𑀲𑀗𑁆𑀕𑀸𑀫𑀁 𑀑𑀢𑀭𑀢𑀺. 𑀲𑁄 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑁂 𑀉𑀲𑁆𑀲𑀳𑀢𑀺 𑀯𑀸𑀬𑀫𑀢𑀺. 𑀢𑀫𑁂𑀦𑀁 𑀉𑀲𑁆𑀲𑀳𑀦𑁆𑀢𑀁 𑀯𑀸𑀬𑀫𑀦𑁆𑀢𑀁 𑀧𑀭𑁂 𑀉𑀧𑀮𑀺𑀓𑁆𑀔𑀦𑁆𑀢𑀺 [𑀉𑀧𑀮𑀺𑀔𑀦𑁆𑀢𑀺 (𑀓.)], 𑀢𑀫𑁂𑀦𑀁 𑀅𑀧𑀦𑁂𑀦𑁆𑀢𑀺; 𑀅𑀧𑀦𑁂𑀢𑁆𑀯𑀸 𑀜𑀸𑀢𑀓𑀸𑀦𑀁 𑀦𑁂𑀦𑁆𑀢𑀺. 𑀲𑁄 𑀜𑀸𑀢𑀓𑁂𑀳𑀺 𑀦𑀻𑀬𑀫𑀸𑀦𑁄 𑀅𑀧𑁆𑀧𑀢𑁆𑀯𑀸𑀯 𑀜𑀸𑀢𑀓𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀸𑀮𑀁 𑀓𑀭𑁄𑀢𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀬𑁄𑀥𑀸𑀚𑀻𑀯𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀬𑀽𑀴𑁆𑀳𑀁 𑀲𑀗𑁆𑀕𑀸𑀫𑀁 𑀑𑀢𑀭𑀢𑀺. 𑀲𑁄 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑁂 𑀉𑀲𑁆𑀲𑀳𑀢𑀺 𑀯𑀸𑀬𑀫𑀢𑀺. 𑀢𑀫𑁂𑀦𑀁 𑀉𑀲𑁆𑀲𑀳𑀦𑁆𑀢𑀁 𑀯𑀸𑀬𑀫𑀦𑁆𑀢𑀁 𑀧𑀭𑁂 𑀉𑀧𑀮𑀺𑀓𑁆𑀔𑀦𑁆𑀢𑀺, 𑀢𑀫𑁂𑀦𑀁 𑀅𑀧𑀦𑁂𑀦𑁆𑀢𑀺; 𑀅𑀧𑀦𑁂𑀢𑁆𑀯𑀸 𑀜𑀸𑀢𑀓𑀸𑀦𑀁 𑀦𑁂𑀦𑁆𑀢𑀺. 𑀢𑀫𑁂𑀦𑀁 𑀜𑀸𑀢𑀓𑀸 𑀉𑀧𑀝𑁆𑀞𑀳𑀦𑁆𑀢𑀺 𑀧𑀭𑀺𑀘𑀭𑀦𑁆𑀢𑀺. 𑀲𑁄 𑀜𑀸𑀢𑀓𑁂𑀳𑀺 𑀉𑀧𑀝𑁆𑀞𑀳𑀺𑀬𑀫𑀸𑀦𑁄 𑀧𑀭𑀺𑀘𑀭𑀺𑀬𑀫𑀸𑀦𑁄 𑀢𑁂𑀦𑁂𑀯 𑀆𑀩𑀸𑀥𑁂𑀦 𑀓𑀸𑀮𑀁 𑀓𑀭𑁄𑀢𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀬𑁄𑀥𑀸𑀚𑀻𑀯𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀬𑀽𑀴𑁆𑀳𑀁 𑀲𑀗𑁆𑀕𑀸𑀫𑀁 𑀑𑀢𑀭𑀢𑀺. 𑀲𑁄 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑁂 𑀉𑀲𑁆𑀲𑀳𑀢𑀺 𑀯𑀸𑀬𑀫𑀢𑀺. 𑀢𑀫𑁂𑀦𑀁 𑀉𑀲𑁆𑀲𑀳𑀦𑁆𑀢𑀁 𑀯𑀸𑀬𑀫𑀦𑁆𑀢𑀁 𑀧𑀭𑁂 𑀉𑀧𑀮𑀺𑀓𑁆𑀔𑀦𑁆𑀢𑀺, 𑀢𑀫𑁂𑀦𑀁 𑀅𑀧𑀦𑁂𑀦𑁆𑀢𑀺; 𑀅𑀧𑀦𑁂𑀢𑁆𑀯𑀸 𑀜𑀸𑀢𑀓𑀸𑀦𑀁 𑀦𑁂𑀦𑁆𑀢𑀺. 𑀢𑀫𑁂𑀦𑀁 𑀜𑀸𑀢𑀓𑀸 𑀉𑀧𑀝𑁆𑀞𑀳𑀦𑁆𑀢𑀺 𑀧𑀭𑀺𑀘𑀭𑀦𑁆𑀢𑀺. 𑀲𑁄 𑀜𑀸𑀢𑀓𑁂𑀳𑀺 𑀉𑀧𑀝𑁆𑀞𑀳𑀺𑀬𑀫𑀸𑀦𑁄 𑀧𑀭𑀺𑀘𑀭𑀺𑀬𑀫𑀸𑀦𑁄 𑀯𑀼𑀝𑁆𑀞𑀸𑀢𑀺 𑀢𑀫𑁆𑀳𑀸 𑀆𑀩𑀸𑀥𑀸. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀬𑁄𑀥𑀸𑀚𑀻𑀯𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀬𑀽𑀴𑁆𑀳𑀁 𑀲𑀗𑁆𑀕𑀸𑀫𑀁 𑀑𑀢𑀭𑀢𑀺. 𑀲𑁄 𑀢𑀁 𑀲𑀗𑁆𑀕𑀸𑀫𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑁄 𑀢𑀫𑁂𑀯 𑀲𑀗𑁆𑀕𑀸𑀫𑀲𑀻𑀲𑀁 𑀅𑀚𑁆𑀛𑀸𑀯𑀲𑀢𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀬𑁄𑀥𑀸𑀚𑀻𑀯𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑁄 𑀬𑁄𑀥𑀸𑀚𑀻𑀯𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀬𑁄𑀥𑀸𑀚𑀻𑀯𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀺𑀫𑁂 𑀬𑁄𑀥𑀸𑀚𑀻𑀯𑀽𑀧𑀫𑀸 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀪𑀺𑀓𑁆𑀔𑀽𑀲𑀼. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀲𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀫𑁂𑀯 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀅𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦 𑀅𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬 𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦 𑀅𑀦𑀼𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀅𑀲𑀁𑀯𑀼𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀲𑁄 𑀢𑀢𑁆𑀣 𑀧𑀲𑁆𑀲𑀢𑀺 𑀫𑀸𑀢𑀼𑀕𑀸𑀫𑀁 𑀤𑀼𑀦𑁆𑀦𑀺𑀯𑀢𑁆𑀣𑀁 𑀯𑀸 𑀤𑀼𑀧𑁆𑀧𑀸𑀭𑀼𑀢𑀁 𑀯𑀸. 𑀢𑀲𑁆𑀲 𑀢𑀁 𑀫𑀸𑀢𑀼𑀕𑀸𑀫𑀁 𑀤𑀺𑀲𑁆𑀯𑀸 𑀤𑀼𑀦𑁆𑀦𑀺𑀯𑀢𑁆𑀣𑀁 𑀯𑀸 𑀤𑀼𑀧𑁆𑀧𑀸𑀭𑀼𑀢𑀁 𑀯𑀸 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀲𑁄 𑀭𑀸𑀕𑀸𑀦𑀼𑀤𑁆𑀥𑀁𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑁄 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀬𑀽𑀴𑁆𑀳𑀁 𑀲𑀗𑁆𑀕𑀸𑀫𑀁 𑀑𑀢𑀭𑀢𑀺, 𑀲𑁄 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑁂 𑀉𑀲𑁆𑀲𑀳𑀢𑀺 𑀯𑀸𑀬𑀫𑀢𑀺, 𑀢𑀫𑁂𑀦𑀁 𑀉𑀲𑁆𑀲𑀳𑀦𑁆𑀢𑀁 𑀯𑀸𑀬𑀫𑀦𑁆𑀢𑀁 𑀧𑀭𑁂 𑀳𑀦𑀦𑁆𑀢𑀺 𑀧𑀭𑀺𑀬𑀸𑀧𑀸𑀤𑁂𑀦𑁆𑀢𑀺; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀬𑁄𑀥𑀸𑀚𑀻𑀯𑀽𑀧𑀫𑁄 𑀧𑀼𑀕𑁆𑀕𑀮𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀽𑀲𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀲𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀫𑁂𑀯 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀅𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦 𑀅𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬 𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦 𑀅𑀦𑀼𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀅𑀲𑀁𑀯𑀼𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀲𑁄 𑀢𑀢𑁆𑀣 𑀧𑀲𑁆𑀲𑀢𑀺 𑀫𑀸𑀢𑀼𑀕𑀸𑀫𑀁 𑀤𑀼𑀦𑁆𑀦𑀺𑀯𑀢𑁆𑀣𑀁 𑀯𑀸 𑀤𑀼𑀧𑁆𑀧𑀸𑀭𑀼𑀢𑀁 𑀯𑀸. 𑀢𑀲𑁆𑀲 𑀢𑀁 𑀫𑀸𑀢𑀼𑀕𑀸𑀫𑀁 𑀤𑀺𑀲𑁆𑀯𑀸 𑀤𑀼𑀦𑁆𑀦𑀺𑀯𑀢𑁆𑀣𑀁 𑀯𑀸 𑀤𑀼𑀧𑁆𑀧𑀸𑀭𑀼𑀢𑀁 𑀯𑀸 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀲𑁄 𑀭𑀸𑀕𑀸𑀦𑀼𑀤𑁆𑀥𑀁𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀟𑀬𑁆𑀳𑀢𑁂𑀯 𑀓𑀸𑀬𑁂𑀦 𑀧𑀭𑀺𑀟𑀬𑁆𑀳𑀢𑀺 𑀘𑁂𑀢𑀲𑀸. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑀁𑀦𑀽𑀦𑀸𑀳𑀁 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀬𑁆𑀬𑀁 𑁋 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄𑀫𑁆𑀳𑀺 [𑀭𑀸𑀕𑀸𑀬𑀺𑀢𑁄𑀫𑁆𑀳𑀺 (𑀲𑀻. 𑀲𑁆𑀬𑀸. 𑀓𑀁)], 𑀆𑀯𑀼𑀲𑁄, 𑀭𑀸𑀕𑀧𑀭𑁂𑀢𑁄, 𑀦 𑀲𑀓𑁆𑀓𑁄𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁; 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀆𑀭𑀸𑀫𑀁 𑀕𑀘𑁆𑀙𑀦𑁆𑀢𑁄 𑀅𑀧𑁆𑀧𑀢𑁆𑀯𑀸𑀯 𑀆𑀭𑀸𑀫𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑁄 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀬𑀽𑀴𑁆𑀳𑀁 𑀲𑀗𑁆𑀕𑀸𑀫𑀁 𑀑𑀢𑀭𑀢𑀺, 𑀲𑁄 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑁂 𑀉𑀲𑁆𑀲𑀳𑀢𑀺 𑀯𑀸𑀬𑀫𑀢𑀺, 𑀢𑀫𑁂𑀦𑀁 𑀉𑀲𑁆𑀲𑀳𑀦𑁆𑀢𑀁 𑀯𑀸𑀬𑀫𑀦𑁆𑀢𑀁 𑀧𑀭𑁂 𑀉𑀧𑀮𑀺𑀓𑁆𑀔𑀦𑁆𑀢𑀺, 𑀢𑀫𑁂𑀦𑀁 𑀅𑀧𑀦𑁂𑀦𑁆𑀢𑀺; 𑀅𑀧𑀦𑁂𑀢𑁆𑀯𑀸 𑀜𑀸𑀢𑀓𑀸𑀦𑀁 𑀦𑁂𑀦𑁆𑀢𑀺. 𑀲𑁄 𑀜𑀸𑀢𑀓𑁂𑀳𑀺 𑀦𑀻𑀬𑀫𑀸𑀦𑁄 𑀅𑀧𑁆𑀧𑀢𑁆𑀯𑀸𑀯 𑀜𑀸𑀢𑀓𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀸𑀮𑀁 𑀓𑀭𑁄𑀢𑀺; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀬𑁄𑀥𑀸𑀚𑀻𑀯𑀽𑀧𑀫𑁄 𑀧𑀼𑀕𑁆𑀕𑀮𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀽𑀲𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀲𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀫𑁂𑀯 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀅𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦 𑀅𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬 𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦 𑀅𑀦𑀼𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀅𑀲𑀁𑀯𑀼𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀲𑁄 𑀢𑀢𑁆𑀣 𑀧𑀲𑁆𑀲𑀢𑀺 𑀫𑀸𑀢𑀼𑀕𑀸𑀫𑀁 𑀤𑀼𑀦𑁆𑀦𑀺𑀯𑀢𑁆𑀣𑀁 𑀯𑀸 𑀤𑀼𑀧𑁆𑀧𑀸𑀭𑀼𑀢𑀁 𑀯𑀸. 𑀢𑀲𑁆𑀲 𑀢𑀁 𑀫𑀸𑀢𑀼𑀕𑀸𑀫𑀁 𑀤𑀺𑀲𑁆𑀯𑀸 𑀤𑀼𑀦𑁆𑀦𑀺𑀯𑀢𑁆𑀣𑀁 𑀯𑀸 𑀤𑀼𑀧𑁆𑀧𑀸𑀭𑀼𑀢𑀁 𑀯𑀸 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀲𑁄 𑀭𑀸𑀕𑀸𑀦𑀼𑀤𑁆𑀥𑀁𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀟𑀬𑁆𑀳𑀢𑁂𑀯 𑀓𑀸𑀬𑁂𑀦 𑀧𑀭𑀺𑀟𑀬𑁆𑀳𑀢𑀺 𑀘𑁂𑀢𑀲𑀸. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑀁𑀦𑀽𑀦𑀸𑀳𑀁 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀬𑁆𑀬𑀁 𑁋 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄𑀫𑁆𑀳𑀺, 𑀆𑀯𑀼𑀲𑁄, 𑀭𑀸𑀕𑀧𑀭𑁂𑀢𑁄, 𑀦 𑀲𑀓𑁆𑀓𑁄𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁; 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀢𑀺 𑁋 ‘𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄𑀫𑁆𑀳𑀺, 𑀆𑀯𑀼𑀲𑁄, 𑀭𑀸𑀕𑀧𑀭𑁂𑀢𑁄, 𑀦 𑀲𑀓𑁆𑀓𑁄𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁; 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’’’𑀢𑀺.

‘‘𑀢𑀫𑁂𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀑𑀯𑀤𑀦𑁆𑀢𑀺 𑀅𑀦𑀼𑀲𑀸𑀲𑀦𑁆𑀢𑀺 𑁋 ‘𑀅𑀧𑁆𑀧𑀲𑁆𑀲𑀸𑀤𑀸, 𑀆𑀯𑀼𑀲𑁄, 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸 [𑀩𑀳𑀽𑀧𑀸𑀬𑀸𑀲𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀧𑀸𑀘𑀺. 𑁪𑁧𑁭; 𑀘𑀽𑀴𑀯. 𑁬𑁫; 𑀫. 𑀦𑀺. 𑁧.𑁨𑁩𑁪], 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀪𑀺𑀭𑀫𑀢𑀸𑀬𑀲𑁆𑀫𑀸 𑀩𑁆𑀭𑀳𑁆𑀫𑀘𑀭𑀺𑀬𑁂; 𑀫𑀸𑀬𑀲𑁆𑀫𑀸 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀻’’’𑀢𑀺.

‘‘𑀲𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀏𑀯𑀁 𑀑𑀯𑀤𑀺𑀬𑀫𑀸𑀦𑁄 𑀏𑀯𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑁄 𑀏𑀯𑀫𑀸𑀳 𑁋 ‘𑀓𑀺𑀜𑁆𑀘𑀸𑀧𑀺, 𑀆𑀯𑀼𑀲𑁄, 𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄; 𑀅𑀣 𑀔𑁄 𑀦𑁂𑀯𑀸𑀳𑀁 𑀲𑀓𑁆𑀓𑁄𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’’’𑀢𑀺. 𑀲𑁄 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑁄 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀬𑀽𑀴𑁆𑀳𑀁 𑀲𑀗𑁆𑀕𑀸𑀫𑀁 𑀑𑀢𑀭𑀢𑀺, 𑀲𑁄 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑁂 𑀉𑀲𑁆𑀲𑀳𑀢𑀺 𑀯𑀸𑀬𑀫𑀢𑀺, 𑀢𑀫𑁂𑀦𑀁 𑀉𑀲𑁆𑀲𑀳𑀦𑁆𑀢𑀁 𑀯𑀸𑀬𑀫𑀦𑁆𑀢𑀁 𑀧𑀭𑁂 𑀉𑀧𑀮𑀺𑀓𑁆𑀔𑀦𑁆𑀢𑀺, 𑀢𑀫𑁂𑀦𑀁 𑀅𑀧𑀦𑁂𑀦𑁆𑀢𑀺; 𑀅𑀧𑀦𑁂𑀢𑁆𑀯𑀸 𑀜𑀸𑀢𑀓𑀸𑀦𑀁 𑀦𑁂𑀦𑁆𑀢𑀺, 𑀢𑀫𑁂𑀦𑀁 𑀜𑀸𑀢𑀓𑀸 𑀉𑀧𑀝𑁆𑀞𑀳𑀦𑁆𑀢𑀺 𑀧𑀭𑀺𑀘𑀭𑀦𑁆𑀢𑀺. 𑀲𑁄 𑀜𑀸𑀢𑀓𑁂𑀳𑀺 𑀉𑀧𑀝𑁆𑀞𑀳𑀺𑀬𑀫𑀸𑀦𑁄 𑀧𑀭𑀺𑀘𑀭𑀺𑀬𑀫𑀸𑀦𑁄 𑀢𑁂𑀦𑁂𑀯 𑀆𑀩𑀸𑀥𑁂𑀦 𑀓𑀸𑀮𑀁 𑀓𑀭𑁄𑀢𑀺; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀬𑁄𑀥𑀸𑀚𑀻𑀯𑀽𑀧𑀫𑁄 𑀧𑀼𑀕𑁆𑀕𑀮𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀽𑀲𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀲𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀫𑁂𑀯 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀅𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦 𑀅𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬 𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦 𑀅𑀦𑀼𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀅𑀲𑀁𑀯𑀼𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀲𑁄 𑀢𑀢𑁆𑀣 𑀧𑀲𑁆𑀲𑀢𑀺 𑀫𑀸𑀢𑀼𑀕𑀸𑀫𑀁 𑀤𑀼𑀦𑁆𑀦𑀺𑀯𑀢𑁆𑀣𑀁 𑀯𑀸 𑀤𑀼𑀧𑁆𑀧𑀸𑀭𑀼𑀢𑀁 𑀯𑀸. 𑀢𑀲𑁆𑀲 𑀢𑀁 𑀫𑀸𑀢𑀼𑀕𑀸𑀫𑀁 𑀤𑀺𑀲𑁆𑀯𑀸 𑀤𑀼𑀦𑁆𑀦𑀺𑀯𑀢𑁆𑀣𑀁 𑀯𑀸 𑀤𑀼𑀧𑁆𑀧𑀸𑀭𑀼𑀢𑀁 𑀯𑀸 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀲𑁄 𑀭𑀸𑀕𑀸𑀦𑀼𑀤𑁆𑀥𑀁𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀟𑀬𑁆𑀳𑀢𑁂𑀯 𑀓𑀸𑀬𑁂𑀦 𑀧𑀭𑀺𑀟𑀬𑁆𑀳𑀢𑀺 𑀘𑁂𑀢𑀲𑀸. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑀁𑀦𑀽𑀦𑀸𑀳𑀁 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀬𑁆𑀬𑀁 𑁋 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄𑀫𑁆𑀳𑀺, 𑀆𑀯𑀼𑀲𑁄, 𑀭𑀸𑀕𑀧𑀭𑁂𑀢𑁄, 𑀦 𑀲𑀓𑁆𑀓𑁄𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁; 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀢𑀺 𑁋 ‘𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄𑀫𑁆𑀳𑀺, 𑀆𑀯𑀼𑀲𑁄, 𑀭𑀸𑀕𑀧𑀭𑁂𑀢𑁄, 𑀦 𑀲𑀓𑁆𑀓𑁄𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁; 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’’’𑀢𑀺.

‘‘𑀢𑀫𑁂𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀑𑀯𑀤𑀦𑁆𑀢𑀺 𑀅𑀦𑀼𑀲𑀸𑀲𑀦𑁆𑀢𑀺 𑁋 ‘𑀅𑀧𑁆𑀧𑀲𑁆𑀲𑀸𑀤𑀸, 𑀆𑀯𑀼𑀲𑁄, 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸…𑀧𑁂… 𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀪𑀺𑀭𑀫𑀢𑀸𑀬𑀲𑁆𑀫𑀸 𑀩𑁆𑀭𑀳𑁆𑀫𑀘𑀭𑀺𑀬𑁂; 𑀫𑀸𑀬𑀲𑁆𑀫𑀸 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀻’’’𑀢𑀺.

‘‘𑀲𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀏𑀯𑀁 𑀑𑀯𑀤𑀺𑀬𑀫𑀸𑀦𑁄 𑀏𑀯𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑁄 𑀏𑀯𑀫𑀸𑀳 𑁋 ‘𑀉𑀲𑁆𑀲𑀳𑀺𑀲𑁆𑀲𑀸𑀫𑀺, 𑀆𑀯𑀼𑀲𑁄, 𑀯𑀸𑀬𑀫𑀺𑀲𑁆𑀲𑀸𑀫𑀺, 𑀆𑀯𑀼𑀲𑁄, 𑀅𑀪𑀺𑀭𑀫𑀺𑀲𑁆𑀲𑀸𑀫𑀺, 𑀆𑀯𑀼𑀲𑁄! 𑀦 𑀤𑀸𑀦𑀸𑀳𑀁, 𑀆𑀯𑀼𑀲𑁄, 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑁄 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀬𑀽𑀴𑁆𑀳𑀁 𑀲𑀗𑁆𑀕𑀸𑀫𑀁 𑀑𑀢𑀭𑀢𑀺, 𑀲𑁄 𑀢𑀲𑁆𑀫𑀺𑀁 𑀲𑀗𑁆𑀕𑀸𑀫𑁂 𑀉𑀲𑁆𑀲𑀳𑀢𑀺 𑀯𑀸𑀬𑀫𑀢𑀺, 𑀢𑀫𑁂𑀦𑀁 𑀉𑀲𑁆𑀲𑀳𑀦𑁆𑀢𑀁 𑀯𑀸𑀬𑀫𑀦𑁆𑀢𑀁 𑀧𑀭𑁂 𑀉𑀧𑀮𑀺𑀓𑁆𑀔𑀦𑁆𑀢𑀺, 𑀢𑀫𑁂𑀦𑀁 𑀅𑀧𑀦𑁂𑀦𑁆𑀢𑀺; 𑀅𑀧𑀦𑁂𑀢𑁆𑀯𑀸 𑀜𑀸𑀢𑀓𑀸𑀦𑀁 𑀦𑁂𑀦𑁆𑀢𑀺, 𑀢𑀫𑁂𑀦𑀁 𑀜𑀸𑀢𑀓𑀸 𑀉𑀧𑀝𑁆𑀞𑀳𑀦𑁆𑀢𑀺 𑀧𑀭𑀺𑀘𑀭𑀦𑁆𑀢𑀺. 𑀲𑁄 𑀜𑀸𑀢𑀓𑁂𑀳𑀺 𑀉𑀧𑀝𑁆𑀞𑀳𑀺𑀬𑀫𑀸𑀦𑁄 𑀧𑀭𑀺𑀘𑀭𑀺𑀬𑀫𑀸𑀦𑁄 𑀯𑀼𑀝𑁆𑀞𑀸𑀢𑀺 𑀢𑀫𑁆𑀳𑀸 𑀆𑀩𑀸𑀥𑀸; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀬𑁄𑀥𑀸𑀚𑀻𑀯𑀽𑀧𑀫𑁄 𑀧𑀼𑀕𑁆𑀕𑀮𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀽𑀲𑀼.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀲𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀫𑁂𑀯 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦 𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬 𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀲𑀁𑀯𑀼𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺; 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁; 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 … 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺; 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁; 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀲𑁄 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬…𑀧𑁂… 𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺’’.

‘‘𑀲𑁂𑀬𑁆𑀬𑀣𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑁄 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀯𑀺𑀬𑀽𑀴𑁆𑀳𑀁 𑀲𑀗𑁆𑀕𑀸𑀫𑀁 𑀑𑀢𑀭𑀢𑀺, 𑀲𑁄 𑀢𑀁 𑀲𑀗𑁆𑀕𑀸𑀫𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑁄 𑀢𑀫𑁂𑀯 𑀲𑀗𑁆𑀕𑀸𑀫𑀲𑀻𑀲𑀁 𑀅𑀚𑁆𑀛𑀸𑀯𑀲𑀢𑀺; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀭𑀽𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑁄 𑀬𑁄𑀥𑀸𑀚𑀻𑀯𑀽𑀧𑀫𑁄 𑀧𑀼𑀕𑁆𑀕𑀮𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀽𑀲𑀼. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀬𑁄𑀥𑀸𑀚𑀻𑀯𑀽𑀧𑀫𑀸 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀪𑀺𑀓𑁆𑀔𑀽𑀲𑀽’’𑀢𑀺. 𑀙𑀝𑁆𑀞𑀁.

𑁭. 𑀧𑀞𑀫𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀁

𑁭𑁭. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀪𑀬𑀸𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀆𑀭𑀜𑁆𑀜𑀺𑀓𑁂𑀦 [𑀆𑀭𑀜𑁆𑀜𑀓𑁂𑀦 (𑀲𑀩𑁆𑀩𑀢𑁆𑀣 𑀅. 𑀦𑀺. 𑁫.𑁧𑁮𑁧; 𑀧𑀭𑀺. 𑁪𑁪𑁩)] 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

‘‘𑀓𑀢𑀫𑀸𑀦𑀺 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀺𑀓𑁄 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀅𑀳𑀁 𑀔𑁄 𑀏𑀢𑀭𑀳𑀺 𑀏𑀓𑀓𑁄 𑀅𑀭𑀜𑁆𑀜𑁂 𑀯𑀺𑀳𑀭𑀸𑀫𑀺. 𑀏𑀓𑀓𑀁 𑀔𑁄 𑀧𑀦 𑀫𑀁 [𑀏𑀓𑀓𑀁 𑀔𑁄 𑀧𑀦 (𑀲𑁆𑀬𑀸. 𑀓𑀁.)] 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑀁 𑀅𑀳𑀺 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀯𑀺𑀘𑁆𑀙𑀺𑀓𑁄 [𑀯𑀺𑀘𑁆𑀙𑀺𑀓𑀸 (𑀲𑁆𑀬𑀸.)] 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀲𑀢𑀧𑀤𑀻 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄; 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀆𑀭𑀜𑁆𑀜𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀺𑀓𑁄 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀅𑀳𑀁 𑀔𑁄 𑀏𑀢𑀭𑀳𑀺 𑀏𑀓𑀓𑁄 𑀅𑀭𑀜𑁆𑀜𑁂 𑀯𑀺𑀳𑀭𑀸𑀫𑀺. 𑀏𑀓𑀓𑁄 𑀔𑁄 𑀧𑀦𑀸𑀳𑀁 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀉𑀧𑀓𑁆𑀔𑀮𑀺𑀢𑁆𑀯𑀸 𑀯𑀸 𑀧𑀧𑀢𑁂𑀬𑁆𑀬𑀁, 𑀪𑀢𑁆𑀢𑀁 𑀯𑀸 𑀪𑀼𑀢𑁆𑀢𑀁 𑀫𑁂 𑀩𑁆𑀬𑀸𑀧𑀚𑁆𑀚𑁂𑀬𑁆𑀬, 𑀧𑀺𑀢𑁆𑀢𑀁 𑀯𑀸 𑀫𑁂 𑀓𑀼𑀧𑁆𑀧𑁂𑀬𑁆𑀬, 𑀲𑁂𑀫𑁆𑀳𑀁 𑀯𑀸 𑀫𑁂 𑀓𑀼𑀧𑁆𑀧𑁂𑀬𑁆𑀬, 𑀲𑀢𑁆𑀣𑀓𑀸 𑀯𑀸 𑀫𑁂 𑀯𑀸𑀢𑀸 𑀓𑀼𑀧𑁆𑀧𑁂𑀬𑁆𑀬𑀼𑀁, 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄; 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀆𑀭𑀜𑁆𑀜𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀺𑀓𑁄 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀅𑀳𑀁 𑀔𑁄 𑀏𑀢𑀭𑀳𑀺 𑀏𑀓𑀓𑁄 𑀅𑀭𑀜𑁆𑀜𑁂 𑀯𑀺𑀳𑀭𑀸𑀫𑀺. 𑀏𑀓𑀓𑁄 𑀔𑁄 𑀧𑀦𑀸𑀳𑀁 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀯𑀸𑀴𑁂𑀳𑀺 𑀲𑀫𑀸𑀕𑀘𑁆𑀙𑁂𑀬𑁆𑀬𑀁, 𑀲𑀻𑀳𑁂𑀦 𑀯𑀸 𑀩𑁆𑀬𑀕𑁆𑀖𑁂𑀦 𑀯𑀸 𑀤𑀻𑀧𑀺𑀦𑀸 𑀯𑀸 𑀅𑀘𑁆𑀙𑁂𑀦 𑀯𑀸 𑀢𑀭𑀘𑁆𑀙𑁂𑀦 𑀯𑀸, 𑀢𑁂 𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀼𑀁, 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄; 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀆𑀭𑀜𑁆𑀜𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀺𑀓𑁄 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀅𑀳𑀁 𑀔𑁄 𑀏𑀢𑀭𑀳𑀺 𑀏𑀓𑀓𑁄 𑀅𑀭𑀜𑁆𑀜𑁂 𑀯𑀺𑀳𑀭𑀸𑀫𑀺. 𑀏𑀓𑀓𑁄 𑀔𑁄 𑀧𑀦𑀸𑀳𑀁 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀫𑀸𑀡𑀯𑁂𑀳𑀺 𑀲𑀫𑀸𑀕𑀘𑁆𑀙𑁂𑀬𑁆𑀬𑀁 𑀓𑀢𑀓𑀫𑁆𑀫𑁂𑀳𑀺 𑀯𑀸 𑀅𑀓𑀢𑀓𑀫𑁆𑀫𑁂𑀳𑀺 𑀯𑀸, 𑀢𑁂 𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀼𑀁, 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄; 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀆𑀭𑀜𑁆𑀜𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀺𑀓𑁄 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀅𑀳𑀁 𑀔𑁄 𑀏𑀢𑀭𑀳𑀺 𑀏𑀓𑀓𑁄 𑀅𑀭𑀜𑁆𑀜𑁂 𑀯𑀺𑀳𑀭𑀸𑀫𑀺. 𑀲𑀦𑁆𑀢𑀺 𑀔𑁄 𑀧𑀦𑀸𑀭𑀜𑁆𑀜𑁂 𑀯𑀸𑀴𑀸 𑀅𑀫𑀦𑀼𑀲𑁆𑀲𑀸, 𑀢𑁂 𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀼𑀁, 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄; 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑀁 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀆𑀭𑀜𑁆𑀜𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀅𑀦𑀸𑀕𑀢𑀪𑀬𑀸𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀆𑀭𑀜𑁆𑀜𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀁

𑁭𑁮. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀪𑀬𑀸𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀓𑀢𑀫𑀸𑀦𑀺 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀅𑀳𑀁 𑀔𑁄 𑀏𑀢𑀭𑀳𑀺 𑀤𑀳𑀭𑁄 𑀬𑀼𑀯𑀸 𑀲𑀼𑀲𑀼𑀓𑀸𑀴𑀓𑁂𑀲𑁄 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀞𑀫𑁂𑀦 𑀯𑀬𑀲𑀸. 𑀳𑁄𑀢𑀺 𑀔𑁄 𑀧𑀦 𑀲𑁄 𑀲𑀫𑀬𑁄 𑀬𑀁 𑀇𑀫𑀁 𑀓𑀸𑀬𑀁 𑀚𑀭𑀸 𑀨𑀼𑀲𑀢𑀺. 𑀚𑀺𑀡𑁆𑀡𑁂𑀦 𑀔𑁄 𑀧𑀦 𑀚𑀭𑀸𑀬 𑀅𑀪𑀺𑀪𑀽𑀢𑁂𑀦 𑀦 𑀲𑀼𑀓𑀭𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁, 𑀦 𑀲𑀼𑀓𑀭𑀸𑀦𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀺𑀢𑀼𑀁. 𑀧𑀼𑀭𑀸 𑀫𑀁 𑀲𑁄 𑀥𑀫𑁆𑀫𑁄 𑀆𑀕𑀘𑁆𑀙𑀢𑀺 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀫𑀦𑀸𑀧𑁄; 𑀳𑀦𑁆𑀤𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 [𑀧𑀝𑀺𑀕𑀘𑁆𑀘𑁂𑀯 (𑀲𑀻.)] 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀬𑁂𑀦𑀸𑀳𑀁 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀚𑀺𑀡𑁆𑀡𑀓𑁄𑀧𑀺 𑀨𑀸𑀲𑀼𑀁 [𑀨𑀸𑀲𑀼 (𑀧𑀻. 𑀓.)] 𑀯𑀺𑀳𑀭𑀺𑀲𑁆𑀲𑀸𑀫𑀻’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀅𑀳𑀁 𑀔𑁄 𑀏𑀢𑀭𑀳𑀺 𑀅𑀧𑁆𑀧𑀸𑀩𑀸𑀥𑁄 𑀅𑀧𑁆𑀧𑀸𑀢𑀗𑁆𑀓𑁄 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀦𑀸𑀢𑀺𑀲𑀻𑀢𑀸𑀬 𑀦𑀸𑀘𑁆𑀘𑀼𑀡𑁆𑀳𑀸𑀬 𑀫𑀚𑁆𑀛𑀺𑀫𑀸𑀬 𑀧𑀥𑀸𑀦𑀓𑁆𑀔𑀫𑀸𑀬. 𑀳𑁄𑀢𑀺 𑀔𑁄 𑀧𑀦 𑀲𑁄 𑀲𑀫𑀬𑁄 𑀬𑀁 𑀇𑀫𑀁 𑀓𑀸𑀬𑀁 𑀩𑁆𑀬𑀸𑀥𑀺 𑀨𑀼𑀲𑀢𑀺. 𑀩𑁆𑀬𑀸𑀥𑀺𑀢𑁂𑀦 𑀔𑁄 𑀧𑀦 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑁂𑀦 [𑀩𑁆𑀬𑀸𑀥𑀸𑀪𑀺𑀪𑀽𑀢𑁂𑀦 (𑀲𑀻. 𑀧𑀻. 𑀓.)] 𑀦 𑀲𑀼𑀓𑀭𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁, 𑀦 𑀲𑀼𑀓𑀭𑀸𑀦𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀺𑀢𑀼𑀁. 𑀧𑀼𑀭𑀸 𑀫𑀁 𑀲𑁄 𑀥𑀫𑁆𑀫𑁄 𑀆𑀕𑀘𑁆𑀙𑀢𑀺 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀫𑀦𑀸𑀧𑁄; 𑀳𑀦𑁆𑀤𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀬𑁂𑀦𑀸𑀳𑀁 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀩𑁆𑀬𑀸𑀥𑀺𑀢𑁄𑀧𑀺 𑀨𑀸𑀲𑀼𑀁 𑀯𑀺𑀳𑀭𑀺𑀲𑁆𑀲𑀸𑀫𑀻’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀏𑀢𑀭𑀳𑀺 𑀔𑁄 𑀲𑀼𑀪𑀺𑀓𑁆𑀔𑀁 𑀲𑀼𑀲𑀲𑁆𑀲𑀁 𑀲𑀼𑀮𑀪𑀧𑀺𑀡𑁆𑀟𑀁, 𑀲𑀼𑀓𑀭𑀁 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀁. 𑀳𑁄𑀢𑀺 𑀔𑁄 𑀧𑀦 𑀲𑁄 𑀲𑀫𑀬𑁄 𑀬𑀁 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺 𑀤𑀼𑀲𑁆𑀲𑀲𑁆𑀲𑀁 𑀤𑀼𑀮𑁆𑀮𑀪𑀧𑀺𑀡𑁆𑀟𑀁, 𑀦 𑀲𑀼𑀓𑀭𑀁 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀁. 𑀤𑀼𑀩𑁆𑀪𑀺𑀓𑁆𑀔𑁂 𑀔𑁄 𑀧𑀦 𑀫𑀦𑀼𑀲𑁆𑀲𑀸 𑀬𑁂𑀦 𑀲𑀼𑀪𑀺𑀓𑁆𑀔𑀁 𑀢𑁂𑀦 𑀲𑀗𑁆𑀓𑀫𑀦𑁆𑀢𑀺 [𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑀺 (𑀓.)]. 𑀢𑀢𑁆𑀣 𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑁄 𑀳𑁄𑀢𑀺 𑀆𑀓𑀺𑀡𑁆𑀡𑀯𑀺𑀳𑀸𑀭𑁄. 𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑁂 𑀔𑁄 𑀧𑀦 𑀲𑀢𑀺 𑀆𑀓𑀺𑀡𑁆𑀡𑀯𑀺𑀳𑀸𑀭𑁂 𑀦 𑀲𑀼𑀓𑀭𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁, 𑀦 𑀲𑀼𑀓𑀭𑀸𑀦𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀺𑀢𑀼𑀁. 𑀧𑀼𑀭𑀸 𑀫𑀁 𑀲𑁄 𑀥𑀫𑁆𑀫𑁄 𑀆𑀕𑀘𑁆𑀙𑀢𑀺 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀫𑀦𑀸𑀧𑁄; 𑀳𑀦𑁆𑀤𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀬𑁂𑀦𑀸𑀳𑀁 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀤𑀼𑀩𑁆𑀪𑀺𑀓𑁆𑀔𑁂𑀧𑀺 𑀨𑀸𑀲𑀼 𑀯𑀺𑀳𑀭𑀺𑀲𑁆𑀲𑀸𑀫𑀻’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀏𑀢𑀭𑀳𑀺 𑀔𑁄 𑀫𑀦𑀼𑀲𑁆𑀲𑀸 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀳𑁄𑀢𑀺 𑀔𑁄 𑀧𑀦 𑀲𑁄 𑀲𑀫𑀬𑁄 𑀬𑀁 𑀪𑀬𑀁 𑀳𑁄𑀢𑀺 𑀅𑀝𑀯𑀺𑀲𑀗𑁆𑀓𑁄𑀧𑁄, 𑀘𑀓𑁆𑀓𑀲𑀫𑀸𑀭𑀽𑀴𑁆𑀳𑀸 𑀚𑀸𑀦𑀧𑀤𑀸 𑀧𑀭𑀺𑀬𑀸𑀬𑀦𑁆𑀢𑀺. 𑀪𑀬𑁂 𑀔𑁄 𑀧𑀦 𑀲𑀢𑀺 𑀫𑀦𑀼𑀲𑁆𑀲𑀸 𑀬𑁂𑀦 𑀔𑁂𑀫𑀁 𑀢𑁂𑀦 𑀲𑀗𑁆𑀓𑀫𑀦𑁆𑀢𑀺. 𑀢𑀢𑁆𑀣 𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑁄 𑀳𑁄𑀢𑀺 𑀆𑀓𑀺𑀡𑁆𑀡𑀯𑀺𑀳𑀸𑀭𑁄. 𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑁂 𑀔𑁄 𑀧𑀦 𑀲𑀢𑀺 𑀆𑀓𑀺𑀡𑁆𑀡𑀯𑀺𑀳𑀸𑀭𑁂 𑀦 𑀲𑀼𑀓𑀭𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁, 𑀦 𑀲𑀼𑀓𑀭𑀸𑀦𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀺𑀢𑀼𑀁. 𑀧𑀼𑀭𑀸 𑀫𑀁 𑀲𑁄 𑀥𑀫𑁆𑀫𑁄 𑀆𑀕𑀘𑁆𑀙𑀢𑀺 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀫𑀦𑀸𑀧𑁄; 𑀳𑀦𑁆𑀤𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀬𑁂𑀦𑀸𑀳𑀁 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀬𑁂𑀧𑀺 𑀨𑀸𑀲𑀼𑀁 𑀯𑀺𑀳𑀭𑀺𑀲𑁆𑀲𑀸𑀫𑀻’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀏𑀢𑀭𑀳𑀺 𑀔𑁄 𑀲𑀗𑁆𑀖𑁄 𑀲𑀫𑀕𑁆𑀕𑁄 𑀲𑀫𑁆𑀫𑁄𑀤𑀫𑀸𑀦𑁄 𑀅𑀯𑀺𑀯𑀤𑀫𑀸𑀦𑁄 𑀏𑀓𑀼𑀤𑁆𑀤𑁂𑀲𑁄 𑀨𑀸𑀲𑀼 𑀯𑀺𑀳𑀭𑀢𑀺. 𑀳𑁄𑀢𑀺 𑀔𑁄 𑀧𑀦 𑀲𑁄 𑀲𑀫𑀬𑁄 𑀬𑀁 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀲𑀗𑁆𑀖𑁂 𑀔𑁄 𑀧𑀦 𑀪𑀺𑀦𑁆𑀦𑁂 𑀦 𑀲𑀼𑀓𑀭𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁, 𑀦 𑀲𑀼𑀓𑀭𑀸𑀦𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀺𑀢𑀼𑀁. 𑀧𑀼𑀭𑀸 𑀫𑀁 𑀲𑁄 𑀥𑀫𑁆𑀫𑁄 𑀆𑀕𑀘𑁆𑀙𑀢𑀺 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀫𑀦𑀸𑀧𑁄; 𑀳𑀦𑁆𑀤𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀬𑁂𑀦𑀸𑀳𑀁 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀺𑀦𑁆𑀦𑁂𑀧𑀺 𑀲𑀗𑁆𑀖𑁂 𑀨𑀸𑀲𑀼𑀁 𑀯𑀺𑀳𑀭𑀺𑀲𑁆𑀲𑀸𑀫𑀻’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑀁 𑀅𑀦𑀸𑀕𑀢𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀅𑀦𑀸𑀕𑀢𑀪𑀬𑀸𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀅𑀮𑀫𑁂𑀯 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀢𑁆𑀢𑁂𑀦 𑀆𑀢𑀸𑀧𑀺𑀦𑀸 𑀧𑀳𑀺𑀢𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀢𑀢𑀺𑀬𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀁

𑁭𑁯. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀪𑀬𑀸𑀦𑀺 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀸𑀦𑀺 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀢𑀸𑀦𑀺 𑀯𑁄 [𑀔𑁄 (𑀓𑀢𑁆𑀣𑀘𑀺)] 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀸𑀦𑀺; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑁂𑀲𑀁 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁.

‘‘𑀓𑀢𑀫𑀸𑀦𑀺 𑀧𑀜𑁆𑀘? 𑀪𑀯𑀺𑀲𑁆𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸. 𑀢𑁂 𑀅𑀪𑀸𑀯𑀺𑀢𑀓𑀸𑀬𑀸 𑀲𑀫𑀸𑀦𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸 𑀅𑀜𑁆𑀜𑁂 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀦𑁆𑀢𑀺. 𑀢𑁂𑀧𑀺 [𑀢𑁂 (𑀲𑀻.)] 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀯𑀺𑀦𑁂𑀢𑀼𑀁 𑀅𑀥𑀺𑀲𑀻𑀮𑁂 𑀅𑀥𑀺𑀘𑀺𑀢𑁆𑀢𑁂 𑀅𑀥𑀺𑀧𑀜𑁆𑀜𑀸𑀬. 𑀢𑁂𑀧𑀺 𑀪𑀯𑀺𑀲𑁆𑀲𑀦𑁆𑀢𑀺 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸. 𑀢𑁂 𑀅𑀪𑀸𑀯𑀺𑀢𑀓𑀸𑀬𑀸 𑀲𑀫𑀸𑀦𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸 𑀅𑀜𑁆𑀜𑁂 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀦𑁆𑀢𑀺. 𑀢𑁂𑀧𑀺 [𑀢𑁂 (?)] 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀯𑀺𑀦𑁂𑀢𑀼𑀁 𑀅𑀥𑀺𑀲𑀻𑀮𑁂 𑀅𑀥𑀺𑀘𑀺𑀢𑁆𑀢𑁂 𑀅𑀥𑀺𑀧𑀜𑁆𑀜𑀸𑀬. 𑀢𑁂𑀧𑀺 𑀪𑀯𑀺𑀲𑁆𑀲𑀦𑁆𑀢𑀺 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀦𑁆𑀤𑁄𑀲𑀸 𑀯𑀺𑀦𑀬𑀲𑀦𑁆𑀤𑁄𑀲𑁄; 𑀯𑀺𑀦𑀬𑀲𑀦𑁆𑀤𑁄𑀲𑀸 𑀥𑀫𑁆𑀫𑀲𑀦𑁆𑀤𑁄𑀲𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀅𑀦𑀸𑀕𑀢𑀪𑀬𑀁 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀁 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀁 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀪𑀺𑀓𑁆𑀔𑀽 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸. 𑀢𑁂 𑀅𑀪𑀸𑀯𑀺𑀢𑀓𑀸𑀬𑀸 𑀲𑀫𑀸𑀦𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸 𑀅𑀜𑁆𑀜𑁂𑀲𑀁 𑀦𑀺𑀲𑁆𑀲𑀬𑀁 𑀤𑀲𑁆𑀲𑀦𑁆𑀢𑀺. 𑀢𑁂𑀧𑀺 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀯𑀺𑀦𑁂𑀢𑀼𑀁 𑀅𑀥𑀺𑀲𑀻𑀮𑁂 𑀅𑀥𑀺𑀘𑀺𑀢𑁆𑀢𑁂 𑀅𑀥𑀺𑀧𑀜𑁆𑀜𑀸𑀬. 𑀢𑁂𑀧𑀺 𑀪𑀯𑀺𑀲𑁆𑀲𑀦𑁆𑀢𑀺 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸. 𑀢𑁂 𑀅𑀪𑀸𑀯𑀺𑀢𑀓𑀸𑀬𑀸 𑀲𑀫𑀸𑀦𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸 𑀅𑀜𑁆𑀜𑁂𑀲𑀁 𑀦𑀺𑀲𑁆𑀲𑀬𑀁 𑀤𑀲𑁆𑀲𑀦𑁆𑀢𑀺. 𑀢𑁂𑀧𑀺 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀯𑀺𑀦𑁂𑀢𑀼𑀁 𑀅𑀥𑀺𑀲𑀻𑀮𑁂 𑀅𑀥𑀺𑀘𑀺𑀢𑁆𑀢𑁂 𑀅𑀥𑀺𑀧𑀜𑁆𑀜𑀸𑀬. 𑀢𑁂𑀧𑀺 𑀪𑀯𑀺𑀲𑁆𑀲𑀦𑁆𑀢𑀺 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀦𑁆𑀤𑁄𑀲𑀸 𑀯𑀺𑀦𑀬𑀲𑀦𑁆𑀤𑁄𑀲𑁄; 𑀯𑀺𑀦𑀬𑀲𑀦𑁆𑀤𑁄𑀲𑀸 𑀥𑀫𑁆𑀫𑀲𑀦𑁆𑀤𑁄𑀲𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀅𑀦𑀸𑀕𑀢𑀪𑀬𑀁 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀁 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀁 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀪𑀺𑀓𑁆𑀔𑀽 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸. 𑀢𑁂 𑀅𑀪𑀸𑀯𑀺𑀢𑀓𑀸𑀬𑀸 𑀲𑀫𑀸𑀦𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸 𑀅𑀪𑀺𑀥𑀫𑁆𑀫𑀓𑀣𑀁 𑀯𑁂𑀤𑀮𑁆𑀮𑀓𑀣𑀁 𑀓𑀣𑁂𑀦𑁆𑀢𑀸 𑀓𑀡𑁆𑀳𑀥𑀫𑁆𑀫𑀁 𑀑𑀓𑁆𑀓𑀫𑀫𑀸𑀦𑀸 𑀦 𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀦𑁆𑀤𑁄𑀲𑀸 𑀯𑀺𑀦𑀬𑀲𑀦𑁆𑀤𑁄𑀲𑁄; 𑀯𑀺𑀦𑀬𑀲𑀦𑁆𑀤𑁄𑀲𑀸 𑀥𑀫𑁆𑀫𑀲𑀦𑁆𑀤𑁄𑀲𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀅𑀦𑀸𑀕𑀢𑀪𑀬𑀁 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀁 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀁 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀪𑀺𑀓𑁆𑀔𑀽 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸. 𑀢𑁂 𑀅𑀪𑀸𑀯𑀺𑀢𑀓𑀸𑀬𑀸 𑀲𑀫𑀸𑀦𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸 𑀬𑁂 𑀢𑁂 𑀲𑀼𑀢𑁆𑀢𑀦𑁆𑀢𑀸 𑀢𑀣𑀸𑀕𑀢𑀪𑀸𑀲𑀺𑀢𑀸 𑀕𑀫𑁆𑀪𑀻𑀭𑀸 𑀕𑀫𑁆𑀪𑀻𑀭𑀢𑁆𑀣𑀸 𑀮𑁄𑀓𑀼𑀢𑁆𑀢𑀭𑀸 𑀲𑀼𑀜𑁆𑀜𑀢𑀸𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸, 𑀢𑁂𑀲𑀼 𑀪𑀜𑁆𑀜𑀫𑀸𑀦𑁂𑀲𑀼 𑀦 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀺𑀲𑁆𑀲𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺, 𑀦 𑀘 𑀢𑁂 𑀥𑀫𑁆𑀫𑁂 𑀉𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺. 𑀬𑁂 𑀧𑀦 𑀢𑁂 𑀲𑀼𑀢𑁆𑀢𑀦𑁆𑀢𑀸 𑀓𑀯𑀺𑀢𑀸 [𑀓𑀯𑀺𑀓𑀢𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻., 𑀲𑀁. 𑀦𑀺. 𑁨.𑁨𑁨𑁯) 𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀓𑀸𑀯𑁂𑀬𑁆𑀬𑀸 𑀘𑀺𑀢𑁆𑀢𑀓𑁆𑀔𑀭𑀸 𑀘𑀺𑀢𑁆𑀢𑀩𑁆𑀬𑀜𑁆𑀚𑀦𑀸 𑀩𑀸𑀳𑀺𑀭𑀓𑀸 𑀲𑀸𑀯𑀓𑀪𑀸𑀲𑀺𑀢𑀸, 𑀢𑁂𑀲𑀼 𑀪𑀜𑁆𑀜𑀫𑀸𑀦𑁂𑀲𑀼 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺, 𑀢𑁂 𑀘 𑀥𑀫𑁆𑀫𑁂 𑀉𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀦𑁆𑀤𑁄𑀲𑀸 𑀯𑀺𑀦𑀬𑀲𑀦𑁆𑀤𑁄𑀲𑁄; 𑀯𑀺𑀦𑀬𑀲𑀦𑁆𑀤𑁄𑀲𑀸 𑀥𑀫𑁆𑀫𑀲𑀦𑁆𑀤𑁄𑀲𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀅𑀦𑀸𑀕𑀢𑀪𑀬𑀁 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀁 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀁 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀪𑀺𑀓𑁆𑀔𑀽 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸. 𑀢𑁂 𑀅𑀪𑀸𑀯𑀺𑀢𑀓𑀸𑀬𑀸 𑀲𑀫𑀸𑀦𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀩𑀸𑀳𑀼𑀮𑀺𑀓𑀸 [𑀩𑀸𑀳𑀼𑀮𑁆𑀮𑀺𑀓𑀸 (𑀲𑁆𑀬𑀸. 𑀓𑀁.) 𑀅. 𑀦𑀺. 𑁨.𑁪𑁯; 𑁩.𑁯𑁬] 𑀪𑀯𑀺𑀲𑁆𑀲𑀦𑁆𑀢𑀺 𑀲𑀸𑀣𑀮𑀺𑀓𑀸 𑀑𑀓𑁆𑀓𑀫𑀦𑁂 𑀧𑀼𑀩𑁆𑀩𑀗𑁆𑀕𑀫𑀸 𑀧𑀯𑀺𑀯𑁂𑀓𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸, 𑀦 𑀯𑀻𑀭𑀺𑀬𑀁 𑀆𑀭𑀪𑀺𑀲𑁆𑀲𑀦𑁆𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀢𑁂𑀲𑀁 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀺𑀲𑁆𑀲𑀢𑀺. 𑀲𑀸𑀧𑀺 𑀪𑀯𑀺𑀲𑁆𑀲𑀢𑀺 𑀩𑀸𑀳𑀼𑀮𑀺𑀓𑀸 𑀲𑀸𑀣𑀮𑀺𑀓𑀸 𑀑𑀓𑁆𑀓𑀫𑀦𑁂 𑀧𑀼𑀩𑁆𑀩𑀗𑁆𑀕𑀫𑀸 𑀧𑀯𑀺𑀯𑁂𑀓𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸, 𑀦 𑀯𑀻𑀭𑀺𑀬𑀁 𑀆𑀭𑀪𑀺𑀲𑁆𑀲𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀦𑁆𑀤𑁄𑀲𑀸 𑀯𑀺𑀦𑀬𑀲𑀦𑁆𑀤𑁄𑀲𑁄; 𑀯𑀺𑀦𑀬𑀲𑀦𑁆𑀤𑁄𑀲𑀸 𑀥𑀫𑁆𑀫𑀲𑀦𑁆𑀤𑁄𑀲𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑀁 𑀅𑀦𑀸𑀕𑀢𑀪𑀬𑀁 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀁 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀁 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁. ‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀅𑀦𑀸𑀕𑀢𑀪𑀬𑀸𑀦𑀺 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀸𑀦𑀺 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀢𑀸𑀦𑀺 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀸𑀦𑀺; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑁂𑀲𑀁 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀘𑀢𑀼𑀢𑁆𑀣𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀁

𑁮𑁦. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀪𑀬𑀸𑀦𑀺 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀸𑀦𑀺 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀢𑀸𑀦𑀺 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀸𑀦𑀺; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑁂𑀲𑀁 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁.

‘‘𑀓𑀢𑀫𑀸𑀦𑀺 𑀧𑀜𑁆𑀘? 𑀪𑀯𑀺𑀲𑁆𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀘𑀻𑀯𑀭𑁂 𑀓𑀮𑁆𑀬𑀸𑀡𑀓𑀸𑀫𑀸. 𑀢𑁂 𑀘𑀻𑀯𑀭𑁂 𑀓𑀮𑁆𑀬𑀸𑀡𑀓𑀸𑀫𑀸 𑀲𑀫𑀸𑀦𑀸 𑀭𑀺𑀜𑁆𑀘𑀺𑀲𑁆𑀲𑀦𑁆𑀢𑀺 𑀧𑀁𑀲𑀼𑀓𑀽𑀮𑀺𑀓𑀢𑁆𑀢𑀁, 𑀭𑀺𑀜𑁆𑀘𑀺𑀲𑁆𑀲𑀦𑁆𑀢𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺; 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀑𑀲𑀭𑀺𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑁆𑀲𑀦𑁆𑀢𑀺, 𑀘𑀻𑀯𑀭𑀳𑁂𑀢𑀼 𑀘 𑀅𑀦𑁂𑀓𑀯𑀺𑀳𑀺𑀢𑀁 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀅𑀦𑀸𑀕𑀢𑀪𑀬𑀁 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀁 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀁 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀪𑀺𑀓𑁆𑀔𑀽 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀧𑀺𑀡𑁆𑀟𑀧𑀸𑀢𑁂 𑀓𑀮𑁆𑀬𑀸𑀡𑀓𑀸𑀫𑀸. 𑀢𑁂 𑀧𑀺𑀡𑁆𑀟𑀧𑀸𑀢𑁂 𑀓𑀮𑁆𑀬𑀸𑀡𑀓𑀸𑀫𑀸 𑀲𑀫𑀸𑀦𑀸 𑀭𑀺𑀜𑁆𑀘𑀺𑀲𑁆𑀲𑀦𑁆𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀢𑀁, 𑀭𑀺𑀜𑁆𑀘𑀺𑀲𑁆𑀲𑀦𑁆𑀢𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺; 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀑𑀲𑀭𑀺𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑁆𑀲𑀦𑁆𑀢𑀺 𑀚𑀺𑀯𑁆𑀳𑀕𑁆𑀕𑁂𑀦 𑀭𑀲𑀕𑁆𑀕𑀸𑀦𑀺 𑀧𑀭𑀺𑀬𑁂𑀲𑀫𑀸𑀦𑀸, 𑀧𑀺𑀡𑁆𑀟𑀧𑀸𑀢𑀳𑁂𑀢𑀼 𑀘 𑀅𑀦𑁂𑀓𑀯𑀺𑀳𑀺𑀢𑀁 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀅𑀦𑀸𑀕𑀢𑀪𑀬𑀁 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀁 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀁 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀪𑀺𑀓𑁆𑀔𑀽 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑁂𑀦𑀸𑀲𑀦𑁂 𑀓𑀮𑁆𑀬𑀸𑀡𑀓𑀸𑀫𑀸. 𑀢𑁂 𑀲𑁂𑀦𑀸𑀲𑀦𑁂 𑀓𑀮𑁆𑀬𑀸𑀡𑀓𑀸𑀫𑀸 𑀲𑀫𑀸𑀦𑀸 𑀭𑀺𑀜𑁆𑀘𑀺𑀲𑁆𑀲𑀦𑁆𑀢𑀺 𑀭𑀼𑀓𑁆𑀔𑀫𑀽𑀮𑀺𑀓𑀢𑁆𑀢𑀁 [𑀆𑀭𑀜𑁆𑀜𑀓𑀢𑁆𑀢𑀁 (𑀲𑁆𑀬𑀸. 𑀓𑀁.)], 𑀭𑀺𑀜𑁆𑀘𑀺𑀲𑁆𑀲𑀦𑁆𑀢𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺; 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀑𑀲𑀭𑀺𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑁆𑀲𑀦𑁆𑀢𑀺, 𑀲𑁂𑀦𑀸𑀲𑀦𑀳𑁂𑀢𑀼 𑀘 𑀅𑀦𑁂𑀓𑀯𑀺𑀳𑀺𑀢𑀁 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀅𑀦𑀸𑀕𑀢𑀪𑀬𑀁 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀁 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀁 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀪𑀺𑀓𑁆𑀔𑀽 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔𑀫𑀸𑀦𑀸𑀲𑀫𑀡𑀼𑀤𑁆𑀤𑁂𑀲𑁂𑀳𑀺 𑀲𑀁𑀲𑀝𑁆𑀞𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔𑀫𑀸𑀦𑀸𑀲𑀫𑀡𑀼𑀤𑁆𑀤𑁂𑀲𑁂𑀳𑀺 𑀲𑀁𑀲𑀕𑁆𑀕𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀢𑀺 𑀏𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 ‘𑀅𑀦𑀪𑀺𑀭𑀢𑀸 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑀢𑀭𑀁 𑀯𑀸 𑀲𑀁𑀓𑀺𑀮𑀺𑀝𑁆𑀞𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀺𑀓𑁆𑀔𑀁 𑀯𑀸 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀦𑁆𑀢𑀺’. 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀅𑀦𑀸𑀕𑀢𑀪𑀬𑀁 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀁 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀁 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀪𑀺𑀓𑁆𑀔𑀽 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀆𑀭𑀸𑀫𑀺𑀓𑀲𑀫𑀡𑀼𑀤𑁆𑀤𑁂𑀲𑁂𑀳𑀺 𑀲𑀁𑀲𑀝𑁆𑀞𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀆𑀭𑀸𑀫𑀺𑀓𑀲𑀫𑀡𑀼𑀤𑁆𑀤𑁂𑀲𑁂𑀳𑀺 𑀲𑀁𑀲𑀕𑁆𑀕𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀢𑀺 𑀏𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 ‘𑀅𑀦𑁂𑀓𑀯𑀺𑀳𑀺𑀢𑀁 𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀑𑀴𑀸𑀭𑀺𑀓𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀧𑀣𑀯𑀺𑀬𑀸𑀧𑀺 𑀳𑀭𑀺𑀢𑀕𑁆𑀕𑁂𑀧𑀺’. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑀁 𑀅𑀦𑀸𑀕𑀢𑀪𑀬𑀁 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀁 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀁 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩𑀁.

‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀅𑀦𑀸𑀕𑀢𑀪𑀬𑀸𑀦𑀺 𑀏𑀢𑀭𑀳𑀺 𑀅𑀲𑀫𑀼𑀧𑁆𑀧𑀦𑁆𑀦𑀸𑀦𑀺 𑀆𑀬𑀢𑀺𑀁 𑀲𑀫𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀢𑀸𑀦𑀺 𑀯𑁄 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀸𑀦𑀺; 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀘 𑀢𑁂𑀲𑀁 𑀧𑀳𑀸𑀦𑀸𑀬 𑀯𑀸𑀬𑀫𑀺𑀢𑀩𑁆𑀩’’𑀦𑁆𑀢𑀺. 𑀤𑀲𑀫𑀁.

𑀬𑁄𑀥𑀸𑀚𑀻𑀯𑀯𑀕𑁆𑀕𑁄 𑀢𑀢𑀺𑀬𑁄.