𑁮. 𑀤𑀼𑀢𑀺𑀬𑀇𑀤𑁆𑀥𑀺𑀧𑀸𑀤𑀲𑀼𑀢𑁆𑀢𑀁

𑁬𑁮. ‘‘𑀧𑀼𑀩𑁆𑀩𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄 𑀩𑁄𑀥𑀺𑀲𑀢𑁆𑀢𑁄𑀯 𑀲𑀫𑀸𑀦𑁄 𑀧𑀜𑁆𑀘 𑀥𑀫𑁆𑀫𑁂 𑀪𑀸𑀯𑁂𑀲𑀺𑀁, 𑀧𑀜𑁆𑀘 𑀥𑀫𑁆𑀫𑁂 𑀩𑀳𑀼𑀮𑀻𑀓𑀸𑀲𑀺𑀁 [𑀩𑀳𑀼𑀮𑀺𑀫𑀓𑀸𑀲𑀺𑀁 (𑀓.), 𑀩𑀳𑀼𑀮𑀫𑀓𑀸𑀲𑀺𑀁 (𑀓.)]. 𑀓𑀢𑀫𑁂 𑀧𑀜𑁆𑀘? 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀲𑀺𑀁, 𑀯𑀻𑀭𑀺𑀬𑀲𑀫𑀸𑀥𑀺… 𑀘𑀺𑀢𑁆𑀢𑀲𑀫𑀸𑀥𑀺… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀲𑀺𑀁, 𑀉𑀲𑁆𑀲𑁄𑀴𑁆𑀳𑀺𑀜𑁆𑀜𑁂𑀯 𑀧𑀜𑁆𑀘𑀫𑀺𑀁. 𑀲𑁄 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀉𑀲𑁆𑀲𑁄𑀴𑁆𑀳𑀺𑀧𑀜𑁆𑀘𑀫𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀬𑀲𑁆𑀲 𑀬𑀲𑁆𑀲 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲 𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀺𑀁 𑀲𑀢𑀺 𑀲𑀢𑀺 𑀆𑀬𑀢𑀦𑁂.

‘‘𑀲𑁄 𑀲𑀘𑁂 𑀆𑀓𑀗𑁆𑀔𑀺𑀁 𑁋 ‘𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑀯𑁂𑀬𑁆𑀬𑀁…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀬𑁆𑀬’𑀦𑁆𑀢𑀺, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀺𑀁 𑀲𑀢𑀺 𑀲𑀢𑀺 𑀆𑀬𑀢𑀦𑁂.

‘‘𑀲𑁄 𑀲𑀘𑁂 𑀆𑀓𑀗𑁆𑀔𑀺𑀁…𑀧𑁂… ‘𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀺𑀁 𑀲𑀢𑀺 𑀲𑀢𑀺 𑀆𑀬𑀢𑀦𑁂’’𑀢𑀺. 𑀅𑀝𑁆𑀞𑀫𑀁.