𑁫. 𑀫𑀸𑀢𑀸𑀧𑀼𑀢𑁆𑀢𑀲𑀼𑀢𑁆𑀢𑀁

𑁫𑁫. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀉𑀪𑁄 𑀫𑀸𑀢𑀸𑀧𑀼𑀢𑁆𑀢𑀸 𑀯𑀲𑁆𑀲𑀸𑀯𑀸𑀲𑀁 𑀉𑀧𑀕𑀫𑀺𑀁𑀲𑀼 [𑀉𑀧𑀲𑀗𑁆𑀓𑀫𑀺𑀁𑀲𑀼 (𑀓.)] 𑁋 𑀪𑀺𑀓𑁆𑀔𑀼 𑀘 𑀪𑀺𑀓𑁆𑀔𑀼𑀦𑀻 𑀘. 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀪𑀺𑀡𑁆𑀳𑀁 𑀤𑀲𑁆𑀲𑀦𑀓𑀸𑀫𑀸 𑀅𑀳𑁂𑀲𑀼𑀁. 𑀫𑀸𑀢𑀸𑀧𑀺 𑀧𑀼𑀢𑁆𑀢𑀲𑁆𑀲 𑀅𑀪𑀺𑀡𑁆𑀳𑀁 𑀤𑀲𑁆𑀲𑀦𑀓𑀸𑀫𑀸 𑀅𑀳𑁄𑀲𑀺; 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀁 𑀅𑀪𑀺𑀡𑁆𑀳𑀁 𑀤𑀲𑁆𑀲𑀦𑀓𑀸𑀫𑁄 𑀅𑀳𑁄𑀲𑀺. 𑀢𑁂𑀲𑀁 𑀅𑀪𑀺𑀡𑁆𑀳𑀁 𑀤𑀲𑁆𑀲𑀦𑀸 𑀲𑀁𑀲𑀕𑁆𑀕𑁄 𑀅𑀳𑁄𑀲𑀺. 𑀲𑀁𑀲𑀕𑁆𑀕𑁂 𑀲𑀢𑀺 𑀯𑀺𑀲𑁆𑀲𑀸𑀲𑁄 𑀅𑀳𑁄𑀲𑀺. 𑀯𑀺𑀲𑁆𑀲𑀸𑀲𑁂 𑀲𑀢𑀺 𑀑𑀢𑀸𑀭𑁄 𑀅𑀳𑁄𑀲𑀺. 𑀢𑁂 𑀑𑀢𑀺𑀡𑁆𑀡𑀘𑀺𑀢𑁆𑀢𑀸 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀁𑀲𑀼.

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀬𑀁 𑀉𑀪𑁄 𑀫𑀸𑀢𑀸𑀧𑀼𑀢𑁆𑀢𑀸 𑀯𑀲𑁆𑀲𑀸𑀯𑀸𑀲𑀁 𑀉𑀧𑀕𑀫𑀺𑀁𑀲𑀼 𑁋 𑀪𑀺𑀓𑁆𑀔𑀼 𑀘 𑀪𑀺𑀓𑁆𑀔𑀼𑀦𑀻 𑀘, 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀪𑀺𑀡𑁆𑀳𑀁 𑀤𑀲𑁆𑀲𑀦𑀓𑀸𑀫𑀸 𑀅𑀳𑁂𑀲𑀼𑀁, 𑀫𑀸𑀢𑀸𑀧𑀺 𑀧𑀼𑀢𑁆𑀢𑀲𑁆𑀲 𑀅𑀪𑀺𑀡𑁆𑀳𑀁 𑀤𑀲𑁆𑀲𑀦𑀓𑀸𑀫𑀸 𑀅𑀳𑁄𑀲𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀁 𑀅𑀪𑀺𑀡𑁆𑀳𑀁 𑀤𑀲𑁆𑀲𑀦𑀓𑀸𑀫𑁄 𑀅𑀳𑁄𑀲𑀺. 𑀢𑁂𑀲𑀁 𑀅𑀪𑀺𑀡𑁆𑀳𑀁 𑀤𑀲𑁆𑀲𑀦𑀸 𑀲𑀁𑀲𑀕𑁆𑀕𑁄 𑀅𑀳𑁄𑀲𑀺, 𑀲𑀁𑀲𑀕𑁆𑀕𑁂 𑀲𑀢𑀺 𑀯𑀺𑀲𑁆𑀲𑀸𑀲𑁄 𑀅𑀳𑁄𑀲𑀺, 𑀯𑀺𑀲𑁆𑀲𑀸𑀲𑁂 𑀲𑀢𑀺 𑀑𑀢𑀸𑀭𑁄 𑀅𑀳𑁄𑀲𑀺, 𑀢𑁂 𑀑𑀢𑀺𑀡𑁆𑀡𑀘𑀺𑀢𑁆𑀢𑀸 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀁𑀲𑀽’’𑀢𑀺.

‘‘𑀓𑀺𑀁 𑀦𑀼 𑀲𑁄, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑁄 𑀫𑀜𑁆𑀜𑀢𑀺 𑁋 ‘𑀦 𑀫𑀸𑀢𑀸 𑀧𑀼𑀢𑁆𑀢𑁂 𑀲𑀸𑀭𑀚𑁆𑀚𑀢𑀺, 𑀧𑀼𑀢𑁆𑀢𑁄 𑀯𑀸 𑀧𑀦 𑀫𑀸𑀢𑀭𑀻’𑀢𑀺? 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀭𑀽𑀧𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 [𑀬𑀁 𑀏𑀯𑀁 (𑀲𑀻.)] 𑀭𑀚𑀦𑀻𑀬𑀁 𑀏𑀯𑀁 𑀓𑀫𑀦𑀻𑀬𑀁 𑀏𑀯𑀁 𑀫𑀤𑀦𑀻𑀬𑀁 𑀏𑀯𑀁 𑀩𑀦𑁆𑀥𑀦𑀻𑀬𑀁 𑀏𑀯𑀁 𑀫𑀼𑀘𑁆𑀙𑀦𑀻𑀬𑀁 𑀏𑀯𑀁 𑀅𑀦𑁆𑀢𑀭𑀸𑀬𑀓𑀭𑀁 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀭𑀽𑀧𑀁. 𑀇𑀢𑁆𑀣𑀺𑀭𑀽𑀧𑁂, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀣𑀺𑀢𑀸 [𑀕𑀥𑀺𑀢𑀸 (𑀲𑁆𑀬𑀸. 𑀧𑀻. 𑀓.)] 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 [𑀅𑀚𑁆𑀛𑁄𑀧𑀦𑁆𑀦𑀸 (𑀩𑀳𑀽𑀲𑀼)]. 𑀢𑁂 𑀤𑀻𑀖𑀭𑀢𑁆𑀢𑀁 𑀲𑁄𑀘𑀦𑁆𑀢𑀺 𑀇𑀢𑁆𑀣𑀺𑀭𑀽𑀧𑀯𑀲𑀸𑀦𑀼𑀕𑀸.

‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀲𑀤𑁆𑀤𑀫𑁆𑀧𑀺…𑀧𑁂… 𑀏𑀓𑀕𑀦𑁆𑀥𑀫𑁆𑀧𑀺… 𑀏𑀓𑀭𑀲𑀫𑁆𑀧𑀺… 𑀏𑀓𑀨𑁄𑀝𑁆𑀞𑀩𑁆𑀩𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 𑀭𑀚𑀦𑀻𑀬𑀁 𑀏𑀯𑀁 𑀓𑀫𑀦𑀻𑀬𑀁 𑀏𑀯𑀁 𑀫𑀤𑀦𑀻𑀬𑀁 𑀏𑀯𑀁 𑀩𑀦𑁆𑀥𑀦𑀻𑀬𑀁 𑀏𑀯𑀁 𑀫𑀼𑀘𑁆𑀙𑀦𑀻𑀬𑀁 𑀏𑀯𑀁 𑀅𑀦𑁆𑀢𑀭𑀸𑀬𑀓𑀭𑀁 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀨𑁄𑀝𑁆𑀞𑀩𑁆𑀩𑀁. 𑀇𑀢𑁆𑀣𑀺𑀨𑁄𑀝𑁆𑀞𑀩𑁆𑀩𑁂, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀣𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸. 𑀢𑁂 𑀤𑀻𑀖𑀭𑀢𑁆𑀢𑀁 𑀲𑁄𑀘𑀦𑁆𑀢𑀺 𑀇𑀢𑁆𑀣𑀺𑀨𑁄𑀝𑁆𑀞𑀩𑁆𑀩𑀯𑀲𑀸𑀦𑀼𑀕𑀸.

‘‘𑀇𑀢𑁆𑀣𑀻, 𑀪𑀺𑀓𑁆𑀔𑀯𑁂, 𑀕𑀘𑁆𑀙𑀦𑁆𑀢𑀻𑀧𑀺 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺; 𑀞𑀺𑀢𑀸𑀧𑀺…𑀧𑁂… 𑀦𑀺𑀲𑀺𑀦𑁆𑀦𑀸𑀧𑀺… 𑀲𑀬𑀸𑀦𑀸𑀧𑀺… 𑀳𑀲𑀦𑁆𑀢𑀻𑀧𑀺… 𑀪𑀡𑀦𑁆𑀢𑀻𑀧𑀺… 𑀕𑀸𑀬𑀦𑁆𑀢𑀻𑀧𑀺… 𑀭𑁄𑀤𑀦𑁆𑀢𑀻𑀧𑀺… 𑀉𑀕𑁆𑀖𑀸𑀢𑀺𑀢𑀸𑀧𑀺 [𑀉𑀕𑁆𑀖𑀸𑀦𑀺𑀢𑀸𑀧𑀺 (𑀲𑀻.)] … 𑀫𑀢𑀸𑀧𑀺 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺. 𑀬𑀜𑁆𑀳𑀺 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀲𑀫𑀦𑁆𑀢𑀧𑀸𑀲𑁄 𑀫𑀸𑀭𑀲𑁆𑀲𑀸’𑀢𑀺 𑀫𑀸𑀢𑀼𑀕𑀸𑀫𑀁𑀬𑁂𑀯 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀲𑀫𑀦𑁆𑀢𑀧𑀸𑀲𑁄 𑀫𑀸𑀭𑀲𑁆𑀲𑀸’’’𑀢𑀺.

‘‘𑀲𑀮𑁆𑀮𑀧𑁂 𑀅𑀲𑀺𑀳𑀢𑁆𑀣𑁂𑀦, 𑀧𑀺𑀲𑀸𑀘𑁂𑀦𑀸𑀧𑀺 𑀲𑀮𑁆𑀮𑀧𑁂;

𑀆𑀲𑀻𑀯𑀺𑀲𑀫𑁆𑀧𑀺 𑀆𑀲𑀻𑀤𑁂 [𑀆𑀲𑀤𑁆𑀤𑁂 (𑀲𑁆𑀬𑀸. 𑀓𑀁.)], 𑀬𑁂𑀦 𑀤𑀝𑁆𑀞𑁄 𑀦 𑀚𑀻𑀯𑀢𑀺.

‘‘𑀦𑀢𑁆𑀯𑁂𑀯 𑀏𑀓𑁄 𑀏𑀓𑀸𑀬, 𑀫𑀸𑀢𑀼𑀕𑀸𑀫𑁂𑀦 𑀲𑀮𑁆𑀮𑀧𑁂;

𑀫𑀼𑀝𑁆𑀞𑀲𑁆𑀲𑀢𑀺𑀁 𑀢𑀸 𑀩𑀦𑁆𑀥𑀦𑁆𑀢𑀺, 𑀧𑁂𑀓𑁆𑀔𑀺𑀢𑁂𑀦 𑀲𑀺𑀢𑁂𑀦 𑀘 [𑀫𑁆𑀳𑀺𑀢𑁂𑀦 𑀘 (𑀲𑁆𑀬𑀸. 𑀓𑀁.)].

‘‘𑀅𑀣𑁄𑀧𑀺 𑀤𑀼𑀦𑁆𑀦𑀺𑀯𑀢𑁆𑀣𑁂𑀦, 𑀫𑀜𑁆𑀚𑀼𑀦𑀸 𑀪𑀡𑀺𑀢𑁂𑀦 𑀘;

𑀦𑁂𑀲𑁄 𑀚𑀦𑁄 𑀲𑁆𑀯𑀸𑀲𑀻𑀲𑀤𑁄, 𑀅𑀧𑀺 𑀉𑀕𑁆𑀖𑀸𑀢𑀺𑀢𑁄 𑀫𑀢𑁄.

‘‘𑀧𑀜𑁆𑀘 𑀓𑀸𑀫𑀕𑀼𑀡𑀸 𑀏𑀢𑁂, 𑀇𑀢𑁆𑀣𑀺𑀭𑀽𑀧𑀲𑁆𑀫𑀺𑀁 𑀤𑀺𑀲𑁆𑀲𑀭𑁂;

𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸.

‘‘𑀢𑁂𑀲𑀁 𑀓𑀸𑀫𑁄𑀖𑀯𑀽𑀴𑁆𑀳𑀸𑀦𑀁, 𑀓𑀸𑀫𑁂 𑀅𑀧𑀭𑀺𑀚𑀸𑀦𑀢𑀁;

𑀓𑀸𑀮𑀁 𑀕𑀢𑀺 [𑀕𑀢𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀯𑀸𑀪𑀯𑀁, 𑀲𑀁𑀲𑀸𑀭𑀲𑁆𑀫𑀺𑀁 𑀧𑀼𑀭𑀓𑁆𑀔𑀢𑀸.

‘‘𑀬𑁂 𑀘 𑀓𑀸𑀫𑁂 𑀧𑀭𑀺𑀜𑁆𑀜𑀸𑀬, 𑀘𑀭𑀦𑁆𑀢𑀺 𑀅𑀓𑀼𑀢𑁄𑀪𑀬𑀸;

𑀢𑁂 𑀯𑁂 𑀧𑀸𑀭𑀗𑁆𑀕𑀢𑀸 𑀮𑁄𑀓𑁂, 𑀬𑁂 𑀧𑀢𑁆𑀢𑀸 𑀆𑀲𑀯𑀓𑁆𑀔𑀬’’𑀦𑁆𑀢𑀺. 𑀧𑀜𑁆𑀘𑀫𑀁;