𑁮. 𑀅𑀮𑀩𑁆𑀪𑀦𑀻𑀬𑀞𑀸𑀦𑀲𑀼𑀢𑁆𑀢𑀁

𑁪𑁮. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀮𑀩𑁆𑀪𑀦𑀻𑀬𑀸𑀦𑀺 𑀞𑀸𑀦𑀸𑀦𑀺 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑀸𑀦𑀺 𑀧𑀜𑁆𑀘? ‘𑀚𑀭𑀸𑀥𑀫𑁆𑀫𑀁 𑀫𑀸 𑀚𑀻𑀭𑀻’𑀢𑀺 𑀅𑀮𑀩𑁆𑀪𑀦𑀻𑀬𑀁 𑀞𑀸𑀦𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁. ‘𑀩𑁆𑀬𑀸𑀥𑀺𑀥𑀫𑁆𑀫𑀁 𑀫𑀸 𑀩𑁆𑀬𑀸𑀥𑀻𑀬𑀻’𑀢𑀺 [𑀯𑁆𑀬𑀸𑀥𑀺𑀥𑀫𑁆𑀫𑀁 ‘‘𑀫𑀸 𑀯𑁆𑀬𑀸𑀥𑀻𑀬𑀻’’𑀢𑀺 (𑀲𑀻. 𑀧𑀻.)] …𑀧𑁂… ‘𑀫𑀭𑀡𑀥𑀫𑁆𑀫𑀁 𑀫𑀸 𑀫𑀻𑀬𑀻’𑀢𑀺… ‘𑀔𑀬𑀥𑀫𑁆𑀫𑀁 𑀫𑀸 𑀔𑀻𑀬𑀻’𑀢𑀺… ‘𑀦𑀲𑁆𑀲𑀦𑀥𑀫𑁆𑀫𑀁 𑀫𑀸 𑀦𑀲𑁆𑀲𑀻’𑀢𑀺 𑀅𑀮𑀩𑁆𑀪𑀦𑀻𑀬𑀁 𑀞𑀸𑀦𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁.

‘‘𑀅𑀲𑁆𑀲𑀼𑀢𑀯𑀢𑁄, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀚𑀭𑀸𑀥𑀫𑁆𑀫𑀁 𑀚𑀻𑀭𑀢𑀺. 𑀲𑁄 𑀚𑀭𑀸𑀥𑀫𑁆𑀫𑁂 𑀚𑀺𑀡𑁆𑀡𑁂 𑀦 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀫𑀬𑁆𑀳𑁂𑀯𑁂𑀓𑀲𑁆𑀲 [𑀫𑀬𑁆𑀳𑀫𑁂𑀯𑁂𑀓𑀲𑁆𑀲 (𑀲𑀻.)] 𑀚𑀭𑀸𑀥𑀫𑁆𑀫𑀁 𑀚𑀻𑀭𑀢𑀺, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀚𑀭𑀸𑀥𑀫𑁆𑀫𑀁 𑀚𑀻𑀭𑀢𑀺. 𑀅𑀳𑀜𑁆𑀘𑁂𑀯 [𑀅𑀳𑀜𑁆𑀘𑁂 (?)] 𑀔𑁄 𑀧𑀦 𑀚𑀭𑀸𑀥𑀫𑁆𑀫𑁂 𑀚𑀺𑀡𑁆𑀡𑁂 𑀲𑁄𑀘𑁂𑀬𑁆𑀬𑀁 𑀓𑀺𑀮𑀫𑁂𑀬𑁆𑀬𑀁 𑀧𑀭𑀺𑀤𑁂𑀯𑁂𑀬𑁆𑀬𑀁, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑁂𑀬𑁆𑀬𑀁, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬𑀁, 𑀪𑀢𑁆𑀢𑀫𑁆𑀧𑀺 𑀫𑁂 𑀦𑀘𑁆𑀙𑀸𑀤𑁂𑀬𑁆𑀬, 𑀓𑀸𑀬𑁂𑀧𑀺 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑁂𑀬𑁆𑀬, 𑀓𑀫𑁆𑀫𑀦𑁆𑀢𑀸𑀧𑀺 𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀼𑀁 [𑀓𑀫𑁆𑀫𑀦𑁆𑀢𑁄𑀧𑀺 𑀦𑀧𑁆𑀧𑀯𑀢𑁆𑀢𑁂𑀬𑁆𑀬 (𑀓.)], 𑀅𑀫𑀺𑀢𑁆𑀢𑀸𑀧𑀺 𑀅𑀢𑁆𑀢𑀫𑀦𑀸 𑀅𑀲𑁆𑀲𑀼, 𑀫𑀺𑀢𑁆𑀢𑀸𑀧𑀺 𑀤𑀼𑀫𑁆𑀫𑀦𑀸 𑀅𑀲𑁆𑀲𑀽’𑀢𑀺. 𑀲𑁄 𑀚𑀭𑀸𑀥𑀫𑁆𑀫𑁂 𑀚𑀺𑀡𑁆𑀡𑁂 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀯𑀺𑀤𑁆𑀥𑁄 𑀲𑀯𑀺𑀲𑁂𑀦 𑀲𑁄𑀓𑀲𑀮𑁆𑀮𑁂𑀦 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀢𑀸𑀧𑁂𑀢𑀺’’’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀩𑁆𑀬𑀸𑀥𑀺𑀥𑀫𑁆𑀫𑀁 𑀩𑁆𑀬𑀸𑀥𑀻𑀬𑀢𑀺…𑀧𑁂… 𑀫𑀭𑀡𑀥𑀫𑁆𑀫𑀁 𑀫𑀻𑀬𑀢𑀺… 𑀔𑀬𑀥𑀫𑁆𑀫𑀁 𑀔𑀻𑀬𑀢𑀺… 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺. 𑀲𑁄 𑀦𑀲𑁆𑀲𑀦𑀥𑀫𑁆𑀫𑁂 𑀦𑀝𑁆𑀞𑁂 𑀦 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀫𑀬𑁆𑀳𑁂𑀯𑁂𑀓𑀲𑁆𑀲 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀦𑀲𑁆𑀲𑀦𑀥𑀫𑁆𑀫𑁂 𑀦𑀝𑁆𑀞𑁂 𑀲𑁄𑀘𑁂𑀬𑁆𑀬𑀁 𑀓𑀺𑀮𑀫𑁂𑀬𑁆𑀬𑀁 𑀧𑀭𑀺𑀤𑁂𑀯𑁂𑀬𑁆𑀬𑀁, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑁂𑀬𑁆𑀬𑀁, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬𑀁, 𑀪𑀢𑁆𑀢𑀫𑁆𑀧𑀺 𑀫𑁂 𑀦𑀘𑁆𑀙𑀸𑀤𑁂𑀬𑁆𑀬, 𑀓𑀸𑀬𑁂𑀧𑀺 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑁂𑀬𑁆𑀬, 𑀓𑀫𑁆𑀫𑀦𑁆𑀢𑀸𑀧𑀺 𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀼𑀁, 𑀅𑀫𑀺𑀢𑁆𑀢𑀸𑀧𑀺 𑀅𑀢𑁆𑀢𑀫𑀦𑀸 𑀅𑀲𑁆𑀲𑀼, 𑀫𑀺𑀢𑁆𑀢𑀸𑀧𑀺 𑀤𑀼𑀫𑁆𑀫𑀦𑀸 𑀅𑀲𑁆𑀲𑀽’𑀢𑀺. 𑀲𑁄 𑀦𑀲𑁆𑀲𑀦𑀥𑀫𑁆𑀫𑁂 𑀦𑀝𑁆𑀞𑁂 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀯𑀺𑀤𑁆𑀥𑁄 𑀲𑀯𑀺𑀲𑁂𑀦 𑀲𑁄𑀓𑀲𑀮𑁆𑀮𑁂𑀦 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀢𑀸𑀧𑁂𑀢𑀺’’’.

‘‘𑀲𑀼𑀢𑀯𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀚𑀭𑀸𑀥𑀫𑁆𑀫𑀁 𑀚𑀻𑀭𑀢𑀺. 𑀲𑁄 𑀚𑀭𑀸𑀥𑀫𑁆𑀫𑁂 𑀚𑀺𑀡𑁆𑀡𑁂 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀫𑀬𑁆𑀳𑁂𑀯𑁂𑀓𑀲𑁆𑀲 𑀚𑀭𑀸𑀥𑀫𑁆𑀫𑀁 𑀚𑀻𑀭𑀢𑀺, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀚𑀭𑀸𑀥𑀫𑁆𑀫𑀁 𑀚𑀻𑀭𑀢𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀚𑀭𑀸𑀥𑀫𑁆𑀫𑁂 𑀚𑀺𑀡𑁆𑀡𑁂 𑀲𑁄𑀘𑁂𑀬𑁆𑀬𑀁 𑀓𑀺𑀮𑀫𑁂𑀬𑁆𑀬𑀁 𑀧𑀭𑀺𑀤𑁂𑀯𑁂𑀬𑁆𑀬𑀁, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑁂𑀬𑁆𑀬𑀁, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬𑀁, 𑀪𑀢𑁆𑀢𑀫𑁆𑀧𑀺 𑀫𑁂 𑀦𑀘𑁆𑀙𑀸𑀤𑁂𑀬𑁆𑀬, 𑀓𑀸𑀬𑁂𑀧𑀺 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑁂𑀬𑁆𑀬, 𑀓𑀫𑁆𑀫𑀦𑁆𑀢𑀸𑀧𑀺 𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀼𑀁, 𑀅𑀫𑀺𑀢𑁆𑀢𑀸𑀧𑀺 𑀅𑀢𑁆𑀢𑀫𑀦𑀸 𑀅𑀲𑁆𑀲𑀼, 𑀫𑀺𑀢𑁆𑀢𑀸𑀧𑀺 𑀤𑀼𑀫𑁆𑀫𑀦𑀸 𑀅𑀲𑁆𑀲𑀽’𑀢𑀺. 𑀲𑁄 𑀚𑀭𑀸𑀥𑀫𑁆𑀫𑁂 𑀚𑀺𑀡𑁆𑀡𑁂 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀅𑀩𑁆𑀩𑀼𑀳𑀺 [𑀅𑀩𑁆𑀩𑀳𑀺 (𑀲𑀻.)] 𑀲𑀯𑀺𑀲𑀁 𑀲𑁄𑀓𑀲𑀮𑁆𑀮𑀁, 𑀬𑁂𑀦 𑀯𑀺𑀤𑁆𑀥𑁄 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀢𑀸𑀧𑁂𑀢𑀺. 𑀅𑀲𑁄𑀓𑁄 𑀯𑀺𑀲𑀮𑁆𑀮𑁄 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀧𑁂𑀢𑀺’’’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀩𑁆𑀬𑀸𑀥𑀺𑀥𑀫𑁆𑀫𑀁 𑀩𑁆𑀬𑀸𑀥𑀻𑀬𑀢𑀺…𑀧𑁂… 𑀫𑀭𑀡𑀥𑀫𑁆𑀫𑀁 𑀫𑀻𑀬𑀢𑀺… 𑀔𑀬𑀥𑀫𑁆𑀫𑀁 𑀔𑀻𑀬𑀢𑀺… 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺. 𑀲𑁄 𑀦𑀲𑁆𑀲𑀦𑀥𑀫𑁆𑀫𑁂 𑀦𑀝𑁆𑀞𑁂 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀫𑀬𑁆𑀳𑁂𑀯𑁂𑀓𑀲𑁆𑀲 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀦𑀲𑁆𑀲𑀦𑀥𑀫𑁆𑀫𑁂 𑀦𑀝𑁆𑀞𑁂 𑀲𑁄𑀘𑁂𑀬𑁆𑀬𑀁 𑀓𑀺𑀮𑀫𑁂𑀬𑁆𑀬𑀁 𑀧𑀭𑀺𑀤𑁂𑀯𑁂𑀬𑁆𑀬𑀁, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑁂𑀬𑁆𑀬𑀁, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬𑀁, 𑀪𑀢𑁆𑀢𑀫𑁆𑀧𑀺 𑀫𑁂 𑀦𑀘𑁆𑀙𑀸𑀤𑁂𑀬𑁆𑀬, 𑀓𑀸𑀬𑁂𑀧𑀺 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑁂𑀬𑁆𑀬, 𑀓𑀫𑁆𑀫𑀦𑁆𑀢𑀸𑀧𑀺 𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀼𑀁, 𑀅𑀫𑀺𑀢𑁆𑀢𑀸𑀧𑀺 𑀅𑀢𑁆𑀢𑀫𑀦𑀸 𑀅𑀲𑁆𑀲𑀼, 𑀫𑀺𑀢𑁆𑀢𑀸𑀧𑀺 𑀤𑀼𑀫𑁆𑀫𑀦𑀸 𑀅𑀲𑁆𑀲𑀽’𑀢𑀺. 𑀲𑁄 𑀦𑀲𑁆𑀲𑀦𑀥𑀫𑁆𑀫𑁂 𑀦𑀝𑁆𑀞𑁂 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀅𑀩𑁆𑀩𑀼𑀳𑀺 𑀲𑀯𑀺𑀲𑀁 𑀲𑁄𑀓𑀲𑀮𑁆𑀮𑀁, 𑀬𑁂𑀦 𑀯𑀺𑀤𑁆𑀥𑁄 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀢𑀸𑀧𑁂𑀢𑀺. 𑀅𑀲𑁄𑀓𑁄 𑀯𑀺𑀲𑀮𑁆𑀮𑁄 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀧𑁂𑀢𑀻’’’𑀢𑀺.

‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀅𑀮𑀩𑁆𑀪𑀦𑀻𑀬𑀸𑀦𑀺 𑀞𑀸𑀦𑀸𑀦𑀺 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺.

[𑀚𑀸. 𑁧.𑁫.𑁯𑁬 𑀚𑀸𑀢𑀓𑁂𑀧𑀺] ‘‘𑀦 𑀲𑁄𑀘𑀦𑀸𑀬 𑀧𑀭𑀺𑀤𑁂𑀯𑀦𑀸𑀬,

𑀅𑀢𑁆𑀣𑁄𑀥 𑀮𑀩𑁆𑀪𑀸 [𑀅𑀢𑁆𑀣𑁄 𑀇𑀥 𑀮𑀩𑁆𑀪𑀢𑀺 (𑀲𑁆𑀬𑀸.), 𑀅𑀢𑁆𑀣𑁄 𑀇𑀥 𑀮𑀩𑁆𑀪𑀸 (𑀧𑀻.)] 𑀅𑀧𑀺 𑀅𑀧𑁆𑀧𑀓𑁄𑀧𑀺;

𑀲𑁄𑀘𑀦𑁆𑀢𑀫𑁂𑀦𑀁 𑀤𑀼𑀔𑀺𑀢𑀁 𑀯𑀺𑀤𑀺𑀢𑁆𑀯𑀸,

𑀧𑀘𑁆𑀘𑀢𑁆𑀣𑀺𑀓𑀸 𑀅𑀢𑁆𑀢𑀫𑀦𑀸 𑀪𑀯𑀦𑁆𑀢𑀺.

‘‘𑀬𑀢𑁄 𑀘 𑀔𑁄 𑀧𑀡𑁆𑀟𑀺𑀢𑁄 𑀆𑀧𑀤𑀸𑀲𑀼,

𑀦 𑀯𑁂𑀥𑀢𑀻 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀜𑁆𑀜𑀽;

𑀧𑀘𑁆𑀘𑀢𑁆𑀣𑀺𑀓𑀸𑀲𑁆𑀲 𑀤𑀼𑀔𑀺𑀢𑀸 𑀪𑀯𑀦𑁆𑀢𑀺,

𑀤𑀺𑀲𑁆𑀯𑀸 𑀫𑀼𑀔𑀁 𑀅𑀯𑀺𑀓𑀸𑀭𑀁 𑀧𑀼𑀭𑀸𑀡𑀁.

‘‘𑀚𑀧𑁆𑀧𑁂𑀦 𑀫𑀦𑁆𑀢𑁂𑀦 𑀲𑀼𑀪𑀸𑀲𑀺𑀢𑁂𑀦,

𑀅𑀦𑀼𑀧𑁆𑀧𑀤𑀸𑀦𑁂𑀦 𑀧𑀯𑁂𑀡𑀺𑀬𑀸 𑀯𑀸;

𑀬𑀣𑀸 𑀬𑀣𑀸 𑀬𑀢𑁆𑀣 [𑀬𑀣𑀸 𑀬𑀣𑀸 𑀬𑀢𑁆𑀣 𑀬𑀢𑁆𑀣 (𑀓.)] 𑀮𑀪𑁂𑀣 𑀅𑀢𑁆𑀣𑀁,

𑀢𑀣𑀸 𑀢𑀣𑀸 𑀢𑀢𑁆𑀣 𑀧𑀭𑀓𑁆𑀓𑀫𑁂𑀬𑁆𑀬.

‘‘𑀲𑀘𑁂 𑀧𑀚𑀸𑀦𑁂𑀬𑁆𑀬 𑀅𑀮𑀩𑁆𑀪𑀦𑁂𑀬𑁆𑀬𑁄,

𑀫𑀬𑀸𑀯 [𑀫𑀬𑀸 𑀯𑀸 (𑀲𑁆𑀬𑀸. 𑀓𑀁. 𑀧𑀻.)] 𑀅𑀜𑁆𑀜𑁂𑀦 𑀯𑀸 𑀏𑀲 𑀅𑀢𑁆𑀣𑁄;

𑀅𑀲𑁄𑀘𑀫𑀸𑀦𑁄 𑀅𑀥𑀺𑀯𑀸𑀲𑀬𑁂𑀬𑁆𑀬,

𑀓𑀫𑁆𑀫𑀁 𑀤𑀴𑁆𑀳𑀁 𑀓𑀺𑀦𑁆𑀢𑀺 𑀓𑀭𑁄𑀫𑀺 𑀤𑀸𑀦𑀻’’𑀢𑀺. 𑀅𑀝𑁆𑀞𑀫𑀁;