𑁧𑁦. 𑀦𑀸𑀭𑀤𑀲𑀼𑀢𑁆𑀢𑀁

𑁫𑁦. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀦𑀸𑀭𑀤𑁄 𑀧𑀸𑀝𑀮𑀺𑀧𑀼𑀢𑁆𑀢𑁂 𑀯𑀺𑀳𑀭𑀢𑀺 𑀓𑀼𑀓𑁆𑀓𑀼𑀝𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀼𑀡𑁆𑀟𑀲𑁆𑀲 𑀭𑀜𑁆𑀜𑁄 𑀪𑀤𑁆𑀤𑀸 𑀤𑁂𑀯𑀻 𑀓𑀸𑀮𑀗𑁆𑀓𑀢𑀸 𑀳𑁄𑀢𑀺 𑀧𑀺𑀬𑀸 𑀫𑀦𑀸𑀧𑀸. 𑀲𑁄 𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀓𑀸𑀮𑀗𑁆𑀓𑀢𑀸𑀬 𑀧𑀺𑀬𑀸𑀬 𑀫𑀦𑀸𑀧𑀸𑀬 𑀦𑁂𑀯 𑀦𑁆𑀳𑀸𑀬𑀢𑀺 [𑀦𑀳𑀸𑀬𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦 𑀯𑀺𑀮𑀺𑀫𑁆𑀧𑀢𑀺 𑀦 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺 𑀦 𑀓𑀫𑁆𑀫𑀦𑁆𑀢𑀁 𑀧𑀬𑁄𑀚𑁂𑀢𑀺 𑁋 𑀭𑀢𑁆𑀢𑀺𑀦𑁆𑀤𑀺𑀯𑀁 [𑀭𑀢𑁆𑀢𑀺𑀤𑀺𑀯𑀁 (𑀓.)] 𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀲𑀭𑀻𑀭𑁂 𑀅𑀚𑁆𑀛𑁄𑀫𑀼𑀘𑁆𑀙𑀺𑀢𑁄. 𑀅𑀣 𑀔𑁄 𑀫𑀼𑀡𑁆𑀟𑁄 𑀭𑀸𑀚𑀸 𑀧𑀺𑀬𑀓𑀁 𑀓𑁄𑀲𑀸𑀭𑀓𑁆𑀔𑀁 [𑀲𑁄𑀓𑀸𑀭𑀓𑁆𑀔𑀁 (𑀲𑁆𑀬𑀸.)] 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀲𑀫𑁆𑀫 𑀧𑀺𑀬𑀓, 𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀲𑀭𑀻𑀭𑀁 𑀆𑀬𑀲𑀸𑀬 𑀢𑁂𑀮𑀤𑁄𑀡𑀺𑀬𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀺𑀲𑁆𑀲𑀸 𑀆𑀬𑀲𑀸𑀬 𑀤𑁄𑀡𑀺𑀬𑀸 𑀧𑀝𑀺𑀓𑀼𑀚𑁆𑀚𑀣, 𑀬𑀣𑀸 𑀫𑀬𑀁 𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀲𑀭𑀻𑀭𑀁 𑀘𑀺𑀭𑀢𑀭𑀁 𑀧𑀲𑁆𑀲𑁂𑀬𑁆𑀬𑀸𑀫𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀧𑀺𑀬𑀓𑁄 𑀓𑁄𑀲𑀸𑀭𑀓𑁆𑀔𑁄 𑀫𑀼𑀡𑁆𑀟𑀲𑁆𑀲 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀲𑀭𑀻𑀭𑀁 𑀆𑀬𑀲𑀸𑀬 𑀢𑁂𑀮𑀤𑁄𑀡𑀺𑀬𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀺𑀲𑁆𑀲𑀸 𑀆𑀬𑀲𑀸𑀬 𑀤𑁄𑀡𑀺𑀬𑀸 𑀧𑀝𑀺𑀓𑀼𑀚𑁆𑀚𑀺.

𑀅𑀣 𑀔𑁄 𑀧𑀺𑀬𑀓𑀲𑁆𑀲 𑀓𑁄𑀲𑀸𑀭𑀓𑁆𑀔𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀲𑁆𑀲 𑀔𑁄 𑀫𑀼𑀡𑁆𑀟𑀲𑁆𑀲 𑀭𑀜𑁆𑀜𑁄 𑀪𑀤𑁆𑀤𑀸 𑀤𑁂𑀯𑀻 𑀓𑀸𑀮𑀗𑁆𑀓𑀢𑀸 𑀧𑀺𑀬𑀸 𑀫𑀦𑀸𑀧𑀸. 𑀲𑁄 𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀓𑀸𑀮𑀗𑁆𑀓𑀢𑀸𑀬 𑀧𑀺𑀬𑀸𑀬 𑀫𑀦𑀸𑀧𑀸𑀬 𑀦𑁂𑀯 𑀦𑁆𑀳𑀸𑀬𑀢𑀺 𑀦 𑀯𑀺𑀮𑀺𑀫𑁆𑀧𑀢𑀺 𑀦 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺 𑀦 𑀓𑀫𑁆𑀫𑀦𑁆𑀢𑀁 𑀧𑀬𑁄𑀚𑁂𑀢𑀺 𑁋 𑀭𑀢𑁆𑀢𑀺𑀦𑁆𑀤𑀺𑀯𑀁 𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀲𑀭𑀻𑀭𑁂 𑀅𑀚𑁆𑀛𑁄𑀫𑀼𑀘𑁆𑀙𑀺𑀢𑁄. 𑀓𑀁 [𑀓𑀺𑀁 (𑀓.)] 𑀦𑀼 𑀔𑁄 𑀫𑀼𑀡𑁆𑀟𑁄 𑀭𑀸𑀚𑀸 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀬𑀺𑀭𑀼𑀧𑀸𑀲𑁂𑀬𑁆𑀬, 𑀬𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀓𑀲𑀮𑁆𑀮𑀁 𑀧𑀚𑀳𑁂𑀬𑁆𑀬𑀸’’𑀢𑀺!

𑀅𑀣 𑀔𑁄 𑀧𑀺𑀬𑀓𑀲𑁆𑀲 𑀓𑁄𑀲𑀸𑀭𑀓𑁆𑀔𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀦𑀸𑀭𑀤𑁄 𑀧𑀸𑀝𑀮𑀺𑀧𑀼𑀢𑁆𑀢𑁂 𑀯𑀺𑀳𑀭𑀢𑀺 𑀓𑀼𑀓𑁆𑀓𑀼𑀝𑀸𑀭𑀸𑀫𑁂. 𑀢𑀁 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 [𑀯𑁆𑀬𑀢𑁆𑀢𑁄 (𑀲𑀻. 𑀧𑀻.), 𑀩𑁆𑀬𑀢𑁆𑀢𑁄 (𑀲𑁆𑀬𑀸. 𑀓𑀁., 𑀤𑀻. 𑀦𑀺. 𑁨.𑁪𑁦𑁭)] 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀢𑀓𑀣𑀻 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑁄 𑀯𑀼𑀤𑁆𑀥𑁄 𑀘𑁂𑀯 [𑀩𑀼𑀤𑁆𑀥𑁄 𑀘𑁂𑀯 (𑀓.)] 𑀅𑀭𑀳𑀸 𑀘’ [𑀅𑀭𑀳𑀸 𑀘𑀸’𑀢𑀺 (?)]. 𑀬𑀁𑀦𑀽𑀦 𑀫𑀼𑀡𑁆𑀟𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀧𑀬𑀺𑀭𑀼𑀧𑀸𑀲𑁂𑀬𑁆𑀬, 𑀅𑀧𑁆𑀧𑁂𑀯 𑀦𑀸𑀫 𑀫𑀼𑀡𑁆𑀟𑁄 𑀭𑀸𑀚𑀸 𑀆𑀬𑀲𑁆𑀫𑀢𑁄 𑀦𑀸𑀭𑀤𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀓𑀲𑀮𑁆𑀮𑀁 𑀧𑀚𑀳𑁂𑀬𑁆𑀬𑀸’’𑀢𑀺.

𑀅𑀣 𑀔𑁄 𑀧𑀺𑀬𑀓𑁄 𑀓𑁄𑀲𑀸𑀭𑀓𑁆𑀔𑁄 𑀬𑁂𑀦 𑀫𑀼𑀡𑁆𑀟𑁄 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀼𑀡𑁆𑀟𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁 𑀔𑁄, 𑀤𑁂𑀯, 𑀆𑀬𑀲𑁆𑀫𑀸 𑀦𑀸𑀭𑀤𑁄 𑀧𑀸𑀝𑀮𑀺𑀧𑀼𑀢𑁆𑀢𑁂 𑀯𑀺𑀳𑀭𑀢𑀺 𑀓𑀼𑀓𑁆𑀓𑀼𑀝𑀸𑀭𑀸𑀫𑁂. 𑀢𑀁 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀢𑀓𑀣𑀻 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑁄 𑀯𑀼𑀤𑁆𑀥𑁄 𑀘𑁂𑀯 𑀅𑀭𑀳𑀸 𑀘’ [𑀅𑀭𑀳𑀸 𑀘𑀸’𑀢𑀺 (?)]. 𑀬𑀤𑀺 𑀧𑀦 𑀤𑁂𑀯𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀧𑀬𑀺𑀭𑀼𑀧𑀸𑀲𑁂𑀬𑁆𑀬, 𑀅𑀧𑁆𑀧𑁂𑀯 𑀦𑀸𑀫 𑀤𑁂𑀯𑁄 𑀆𑀬𑀲𑁆𑀫𑀢𑁄 𑀦𑀸𑀭𑀤𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀓𑀲𑀮𑁆𑀮𑀁 𑀧𑀚𑀳𑁂𑀬𑁆𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀲𑀫𑁆𑀫 𑀧𑀺𑀬𑀓, 𑀆𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀧𑀝𑀺𑀯𑁂𑀤𑁂𑀳𑀺. 𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀯𑀺𑀚𑀺𑀢𑁂 𑀯𑀲𑀦𑁆𑀢𑀁 𑀧𑀼𑀩𑁆𑀩𑁂 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑁄 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺! ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀧𑀺𑀬𑀓𑁄 𑀓𑁄𑀲𑀸𑀭𑀓𑁆𑀔𑁄 𑀫𑀼𑀡𑁆𑀟𑀲𑁆𑀲 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀦𑀸𑀭𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀧𑀺𑀬𑀓𑁄 𑀓𑁄𑀲𑀸𑀭𑀓𑁆𑀔𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀏𑀢𑀤𑀯𑁄𑀘 𑁋

‘‘𑀇𑀫𑀲𑁆𑀲, 𑀪𑀦𑁆𑀢𑁂, 𑀫𑀼𑀡𑁆𑀟𑀲𑁆𑀲 𑀭𑀜𑁆𑀜𑁄 𑀪𑀤𑁆𑀤𑀸 𑀤𑁂𑀯𑀻 𑀓𑀸𑀮𑀗𑁆𑀓𑀢𑀸 𑀧𑀺𑀬𑀸 𑀫𑀦𑀸𑀧𑀸. 𑀲𑁄 𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀓𑀸𑀮𑀗𑁆𑀓𑀢𑀸𑀬 𑀧𑀺𑀬𑀸𑀬 𑀫𑀦𑀸𑀧𑀸𑀬 𑀦𑁂𑀯 𑀦𑁆𑀳𑀸𑀬𑀢𑀺 𑀦 𑀯𑀺𑀮𑀺𑀫𑁆𑀧𑀢𑀺 𑀦 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺 𑀦 𑀓𑀫𑁆𑀫𑀦𑁆𑀢𑀁 𑀧𑀬𑁄𑀚𑁂𑀢𑀺 𑁋 𑀭𑀢𑁆𑀢𑀺𑀦𑁆𑀤𑀺𑀯𑀁 𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀲𑀭𑀻𑀭𑁂 𑀅𑀚𑁆𑀛𑁄𑀫𑀼𑀘𑁆𑀙𑀺𑀢𑁄. 𑀲𑀸𑀥𑀼, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀦𑀸𑀭𑀤𑁄 𑀫𑀼𑀡𑁆𑀟𑀲𑁆𑀲 𑀭𑀜𑁆𑀜𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼 𑀬𑀣𑀸 𑀫𑀼𑀡𑁆𑀟𑁄 𑀭𑀸𑀚𑀸 𑀆𑀬𑀲𑁆𑀫𑀢𑁄 𑀦𑀸𑀭𑀤𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀓𑀲𑀮𑁆𑀮𑀁 𑀧𑀚𑀳𑁂𑀬𑁆𑀬𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺, 𑀧𑀺𑀬𑀓, 𑀫𑀼𑀡𑁆𑀟𑁄 𑀭𑀸𑀚𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑀅𑀣 𑀔𑁄 𑀧𑀺𑀬𑀓𑁄 𑀓𑁄𑀲𑀸𑀭𑀓𑁆𑀔𑁄 𑀉𑀝𑁆𑀞𑀸𑀬𑀸𑀲𑀦𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀫𑀼𑀡𑁆𑀟𑁄 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀼𑀡𑁆𑀟𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀸𑀯𑀓𑀸𑀲𑁄 𑀔𑁄, 𑀤𑁂𑀯, 𑀆𑀬𑀲𑁆𑀫𑀢𑀸 𑀦𑀸𑀭𑀤𑁂𑀦. 𑀬𑀲𑁆𑀲𑀤𑀸𑀦𑀺 𑀤𑁂𑀯𑁄 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀲𑀫𑁆𑀫 𑀧𑀺𑀬𑀓, 𑀪𑀤𑁆𑀭𑀸𑀦𑀺 𑀪𑀤𑁆𑀭𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑀸𑀧𑁂𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀧𑀺𑀬𑀓𑁄 𑀓𑁄𑀲𑀸𑀭𑀓𑁆𑀔𑁄 𑀫𑀼𑀡𑁆𑀟𑀲𑁆𑀲 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀤𑁆𑀭𑀸𑀦𑀺 𑀪𑀤𑁆𑀭𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀫𑀼𑀡𑁆𑀟𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀬𑀼𑀢𑁆𑀢𑀸𑀦𑀺 𑀔𑁄 𑀢𑁂, 𑀤𑁂𑀯, 𑀪𑀤𑁆𑀭𑀸𑀦𑀺 𑀪𑀤𑁆𑀭𑀸𑀦𑀺 𑀬𑀸𑀦𑀸𑀦𑀺. 𑀬𑀲𑁆𑀲𑀤𑀸𑀦𑀺 𑀤𑁂𑀯𑁄 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑀅𑀣 𑀔𑁄 𑀫𑀼𑀡𑁆𑀟𑁄 𑀭𑀸𑀚𑀸 𑀪𑀤𑁆𑀭𑀁 𑀬𑀸𑀦𑀁 [𑀪𑀤𑁆𑀭𑀁 𑀪𑀤𑁆𑀭𑀁 𑀬𑀸𑀦𑀁 (𑀲𑁆𑀬𑀸. 𑀓𑀁. 𑀓.), 𑀪𑀤𑁆𑀤𑀁 𑀬𑀸𑀦𑀁 (𑀧𑀻.)] 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀭𑁂𑀳𑀺 𑀪𑀤𑁆𑀭𑁂𑀳𑀺 𑀬𑀸𑀦𑁂𑀳𑀺 𑀬𑁂𑀦 𑀓𑀼𑀓𑁆𑀓𑀼𑀝𑀸𑀭𑀸𑀫𑁄 𑀢𑁂𑀦 𑀧𑀸𑀬𑀸𑀲𑀺 𑀫𑀳𑀘𑁆𑀘𑀸 [𑀫𑀳𑀘𑁆𑀘 (𑀩𑀳𑀽𑀲𑀼)] 𑀭𑀸𑀚𑀸𑀦𑀼𑀪𑀸𑀯𑁂𑀦 𑀆𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀤𑀲𑁆𑀲𑀦𑀸𑀬. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸, 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀆𑀭𑀸𑀫𑀁 𑀧𑀸𑀯𑀺𑀲𑀺. 𑀅𑀣 𑀔𑁄 𑀫𑀼𑀡𑁆𑀟𑁄 𑀭𑀸𑀚𑀸 𑀬𑁂𑀦 𑀆𑀬𑀲𑁆𑀫𑀸 𑀦𑀸𑀭𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀫𑀼𑀡𑁆𑀟𑀁 𑀭𑀸𑀚𑀸𑀦𑀁 𑀆𑀬𑀲𑁆𑀫𑀸 𑀦𑀸𑀭𑀤𑁄 𑀏𑀢𑀤𑀯𑁄𑀘 𑁋

‘‘𑀧𑀜𑁆𑀘𑀺𑀫𑀸𑀦𑀺, 𑀫𑀳𑀸𑀭𑀸𑀚, 𑀅𑀮𑀩𑁆𑀪𑀦𑀻𑀬𑀸𑀦𑀺 𑀞𑀸𑀦𑀸𑀦𑀺 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑀸𑀦𑀺 𑀧𑀜𑁆𑀘? ‘𑀚𑀭𑀸𑀥𑀫𑁆𑀫𑀁 𑀫𑀸 𑀚𑀻𑀭𑀻’𑀢𑀺 𑀅𑀮𑀩𑁆𑀪𑀦𑀻𑀬𑀁 𑀞𑀸𑀦𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁. ‘𑀩𑁆𑀬𑀸𑀥𑀺𑀥𑀫𑁆𑀫𑀁 𑀫𑀸 𑀩𑁆𑀬𑀸𑀥𑀻𑀬𑀻’𑀢𑀺…𑀧𑁂… ‘𑀫𑀭𑀡𑀥𑀫𑁆𑀫𑀁 𑀫𑀸 𑀫𑀻𑀬𑀻’𑀢𑀺… ‘𑀔𑀬𑀥𑀫𑁆𑀫𑀁 𑀫𑀸 𑀔𑀻𑀬𑀻’𑀢𑀺… ‘𑀦𑀲𑁆𑀲𑀦𑀥𑀫𑁆𑀫𑀁 𑀫𑀸 𑀦𑀲𑁆𑀲𑀻’𑀢𑀺 𑀅𑀮𑀩𑁆𑀪𑀦𑀻𑀬𑀁 𑀞𑀸𑀦𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁.

‘‘𑀅𑀲𑁆𑀲𑀼𑀢𑀯𑀢𑁄, 𑀫𑀳𑀸𑀭𑀸𑀚, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀚𑀭𑀸𑀥𑀫𑁆𑀫𑀁 𑀚𑀻𑀭𑀢𑀺. 𑀲𑁄 𑀚𑀭𑀸𑀥𑀫𑁆𑀫𑁂 𑀚𑀺𑀡𑁆𑀡𑁂 𑀦 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀫𑀬𑁆𑀳𑁂𑀯𑁂𑀓𑀲𑁆𑀲 𑀚𑀭𑀸𑀥𑀫𑁆𑀫𑀁 𑀚𑀻𑀭𑀢𑀺, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀚𑀭𑀸𑀥𑀫𑁆𑀫𑀁 𑀚𑀻𑀭𑀢𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀚𑀭𑀸𑀥𑀫𑁆𑀫𑁂 𑀚𑀺𑀡𑁆𑀡𑁂 𑀲𑁄𑀘𑁂𑀬𑁆𑀬𑀁 𑀓𑀺𑀮𑀫𑁂𑀬𑁆𑀬𑀁 𑀧𑀭𑀺𑀤𑁂𑀯𑁂𑀬𑁆𑀬𑀁, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑁂𑀬𑁆𑀬𑀁, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬𑀁, 𑀪𑀢𑁆𑀢𑀫𑁆𑀧𑀺 𑀫𑁂 𑀦𑀘𑁆𑀙𑀸𑀤𑁂𑀬𑁆𑀬, 𑀓𑀸𑀬𑁂𑀧𑀺 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑁂𑀬𑁆𑀬, 𑀓𑀫𑁆𑀫𑀦𑁆𑀢𑀸𑀧𑀺 𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀼𑀁, 𑀅𑀫𑀺𑀢𑁆𑀢𑀸𑀧𑀺 𑀅𑀢𑁆𑀢𑀫𑀦𑀸 𑀅𑀲𑁆𑀲𑀼, 𑀫𑀺𑀢𑁆𑀢𑀸𑀧𑀺 𑀤𑀼𑀫𑁆𑀫𑀦𑀸 𑀅𑀲𑁆𑀲𑀽’𑀢𑀺. 𑀲𑁄 𑀚𑀭𑀸𑀥𑀫𑁆𑀫𑁂 𑀚𑀺𑀡𑁆𑀡𑁂 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀭𑀸𑀚 𑁋 ‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀯𑀺𑀤𑁆𑀥𑁄 𑀲𑀯𑀺𑀲𑁂𑀦 𑀲𑁄𑀓𑀲𑀮𑁆𑀮𑁂𑀦 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀢𑀸𑀧𑁂𑀢𑀺’’’.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀩𑁆𑀬𑀸𑀥𑀺𑀥𑀫𑁆𑀫𑀁 𑀩𑁆𑀬𑀸𑀥𑀻𑀬𑀢𑀺…𑀧𑁂… 𑀫𑀭𑀡𑀥𑀫𑁆𑀫𑀁 𑀫𑀻𑀬𑀢𑀺… 𑀔𑀬𑀥𑀫𑁆𑀫𑀁 𑀔𑀻𑀬𑀢𑀺… 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺. 𑀲𑁄 𑀦𑀲𑁆𑀲𑀦𑀥𑀫𑁆𑀫𑁂 𑀦𑀝𑁆𑀞𑁂 𑀦 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀫𑀬𑁆𑀳𑁂𑀯𑁂𑀓𑀲𑁆𑀲 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀦𑀲𑁆𑀲𑀦𑀥𑀫𑁆𑀫𑁂 𑀦𑀝𑁆𑀞𑁂 𑀲𑁄𑀘𑁂𑀬𑁆𑀬𑀁 𑀓𑀺𑀮𑀫𑁂𑀬𑁆𑀬𑀁 𑀧𑀭𑀺𑀤𑁂𑀯𑁂𑀬𑁆𑀬𑀁, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑁂𑀬𑁆𑀬𑀁, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬𑀁, 𑀪𑀢𑁆𑀢𑀫𑁆𑀧𑀺 𑀫𑁂 𑀦𑀘𑁆𑀙𑀸𑀤𑁂𑀬𑁆𑀬, 𑀓𑀸𑀬𑁂𑀧𑀺 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑁂𑀬𑁆𑀬, 𑀓𑀫𑁆𑀫𑀦𑁆𑀢𑀸𑀧𑀺 𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀼𑀁, 𑀅𑀫𑀺𑀢𑁆𑀢𑀸𑀧𑀺 𑀅𑀢𑁆𑀢𑀫𑀦𑀸 𑀅𑀲𑁆𑀲𑀼, 𑀫𑀺𑀢𑁆𑀢𑀸𑀧𑀺 𑀤𑀼𑀫𑁆𑀫𑀦𑀸 𑀅𑀲𑁆𑀲𑀽’𑀢𑀺. 𑀲𑁄 𑀦𑀲𑁆𑀲𑀦𑀥𑀫𑁆𑀫𑁂 𑀦𑀝𑁆𑀞𑁂 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀭𑀸𑀚 𑁋 ‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀯𑀺𑀤𑁆𑀥𑁄 𑀲𑀯𑀺𑀲𑁂𑀦 𑀲𑁄𑀓𑀲𑀮𑁆𑀮𑁂𑀦 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀢𑀸𑀧𑁂𑀢𑀺’’’.

‘‘𑀲𑀼𑀢𑀯𑀢𑁄 𑀘 𑀔𑁄, 𑀫𑀳𑀸𑀭𑀸𑀚, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀚𑀭𑀸𑀥𑀫𑁆𑀫𑀁 𑀚𑀻𑀭𑀢𑀺. 𑀲𑁄 𑀚𑀭𑀸𑀥𑀫𑁆𑀫𑁂 𑀚𑀺𑀡𑁆𑀡𑁂 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀫𑀬𑁆𑀳𑁂𑀯𑁂𑀓𑀲𑁆𑀲 𑀚𑀭𑀸𑀥𑀫𑁆𑀫𑀁 𑀚𑀻𑀭𑀢𑀺, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀚𑀭𑀸𑀥𑀫𑁆𑀫𑀁 𑀚𑀻𑀭𑀢𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀚𑀭𑀸𑀥𑀫𑁆𑀫𑁂 𑀚𑀺𑀡𑁆𑀡𑁂 𑀲𑁄𑀘𑁂𑀬𑁆𑀬𑀁 𑀓𑀺𑀮𑀫𑁂𑀬𑁆𑀬𑀁 𑀧𑀭𑀺𑀤𑁂𑀯𑁂𑀬𑁆𑀬𑀁, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑁂𑀬𑁆𑀬𑀁, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬𑀁, 𑀪𑀢𑁆𑀢𑀫𑁆𑀧𑀺 𑀫𑁂 𑀦𑀘𑁆𑀙𑀸𑀤𑁂𑀬𑁆𑀬, 𑀓𑀸𑀬𑁂𑀧𑀺 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑁂𑀬𑁆𑀬, 𑀓𑀫𑁆𑀫𑀦𑁆𑀢𑀸𑀧𑀺 𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀼𑀁, 𑀅𑀫𑀺𑀢𑁆𑀢𑀸𑀧𑀺 𑀅𑀢𑁆𑀢𑀫𑀦𑀸 𑀅𑀲𑁆𑀲𑀼, 𑀫𑀺𑀢𑁆𑀢𑀸𑀧𑀺 𑀤𑀼𑀫𑁆𑀫𑀦𑀸 𑀅𑀲𑁆𑀲𑀽’𑀢𑀺. 𑀲𑁄 𑀚𑀭𑀸𑀥𑀫𑁆𑀫𑁂 𑀚𑀺𑀡𑁆𑀡𑁂 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀭𑀸𑀚 𑁋 ‘𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀅𑀩𑁆𑀩𑀼𑀳𑀺 𑀲𑀯𑀺𑀲𑀁 𑀲𑁄𑀓𑀲𑀮𑁆𑀮𑀁, 𑀬𑁂𑀦 𑀯𑀺𑀤𑁆𑀥𑁄 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀢𑀸𑀧𑁂𑀢𑀺. 𑀅𑀲𑁄𑀓𑁄 𑀯𑀺𑀲𑀮𑁆𑀮𑁄 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀧𑁂𑀢𑀺’’’.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀲𑀼𑀢𑀯𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀩𑁆𑀬𑀸𑀥𑀺𑀥𑀫𑁆𑀫𑀁 𑀩𑁆𑀬𑀸𑀥𑀻𑀬𑀢𑀺…𑀧𑁂… 𑀫𑀭𑀡𑀥𑀫𑁆𑀫𑀁 𑀫𑀻𑀬𑀢𑀺… 𑀔𑀬𑀥𑀫𑁆𑀫𑀁 𑀔𑀻𑀬𑀢𑀺… 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺. 𑀲𑁄 𑀦𑀲𑁆𑀲𑀦𑀥𑀫𑁆𑀫𑁂 𑀦𑀝𑁆𑀞𑁂 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀫𑀬𑁆𑀳𑁂𑀯𑁂𑀓𑀲𑁆𑀲 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀦𑀲𑁆𑀲𑀦𑀥𑀫𑁆𑀫𑁂 𑀦𑀝𑁆𑀞𑁂 𑀲𑁄𑀘𑁂𑀬𑁆𑀬𑀁 𑀓𑀺𑀮𑀫𑁂𑀬𑁆𑀬𑀁 𑀧𑀭𑀺𑀤𑁂𑀯𑁂𑀬𑁆𑀬𑀁, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑁂𑀬𑁆𑀬𑀁, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬𑀁, 𑀪𑀢𑁆𑀢𑀫𑁆𑀧𑀺 𑀫𑁂 𑀦𑀘𑁆𑀙𑀸𑀤𑁂𑀬𑁆𑀬, 𑀓𑀸𑀬𑁂𑀧𑀺 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑁂𑀬𑁆𑀬, 𑀓𑀫𑁆𑀫𑀦𑁆𑀢𑀸𑀧𑀺 𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀼𑀁, 𑀅𑀫𑀺𑀢𑁆𑀢𑀸𑀧𑀺 𑀅𑀢𑁆𑀢𑀫𑀦𑀸 𑀅𑀲𑁆𑀲𑀼, 𑀫𑀺𑀢𑁆𑀢𑀸𑀧𑀺 𑀤𑀼𑀫𑁆𑀫𑀦𑀸 𑀅𑀲𑁆𑀲𑀽’𑀢𑀺. 𑀲𑁄 𑀦𑀲𑁆𑀲𑀦𑀥𑀫𑁆𑀫𑁂 𑀦𑀝𑁆𑀞𑁂 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀭𑀸𑀚 𑁋 ‘𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀅𑀩𑁆𑀩𑀼𑀳𑀺 𑀲𑀯𑀺𑀲𑀁 𑀲𑁄𑀓𑀲𑀮𑁆𑀮𑀁, 𑀬𑁂𑀦 𑀯𑀺𑀤𑁆𑀥𑁄 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀢𑀸𑀧𑁂𑀢𑀺. 𑀅𑀲𑁄𑀓𑁄 𑀯𑀺𑀲𑀮𑁆𑀮𑁄 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀧𑁂𑀢𑀺 ’’’.

‘‘𑀇𑀫𑀸𑀦𑀺 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀘 𑀅𑀮𑀩𑁆𑀪𑀦𑀻𑀬𑀸𑀦𑀺 𑀞𑀸𑀦𑀸𑀦𑀺 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺.

‘‘𑀦 𑀲𑁄𑀘𑀦𑀸𑀬 𑀧𑀭𑀺𑀤𑁂𑀯𑀦𑀸𑀬,

𑀅𑀢𑁆𑀣𑁄𑀥 𑀮𑀩𑁆𑀪𑀸 𑀅𑀧𑀺 𑀅𑀧𑁆𑀧𑀓𑁄𑀧𑀺;

𑀲𑁄𑀘𑀦𑁆𑀢𑀫𑁂𑀦𑀁 𑀤𑀼𑀔𑀺𑀢𑀁 𑀯𑀺𑀤𑀺𑀢𑁆𑀯𑀸,

𑀧𑀘𑁆𑀘𑀢𑁆𑀣𑀺𑀓𑀸 𑀅𑀢𑁆𑀢𑀫𑀦𑀸 𑀪𑀯𑀦𑁆𑀢𑀺.

‘‘𑀬𑀢𑁄 𑀘 𑀔𑁄 𑀧𑀡𑁆𑀟𑀺𑀢𑁄 𑀆𑀧𑀤𑀸𑀲𑀼,

𑀦 𑀯𑁂𑀥𑀢𑀻 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀜𑁆𑀜𑀽;

𑀧𑀘𑁆𑀘𑀢𑁆𑀣𑀺𑀓𑀸𑀲𑁆𑀲 𑀤𑀼𑀔𑀺𑀢𑀸 𑀪𑀯𑀦𑁆𑀢𑀺,

𑀤𑀺𑀲𑁆𑀯𑀸 𑀫𑀼𑀔𑀁 𑀅𑀯𑀺𑀓𑀸𑀭𑀁 𑀧𑀼𑀭𑀸𑀡𑀁.

‘‘𑀚𑀧𑁆𑀧𑁂𑀦 𑀫𑀦𑁆𑀢𑁂𑀦 𑀲𑀼𑀪𑀸𑀲𑀺𑀢𑁂𑀦,

𑀅𑀦𑀼𑀧𑁆𑀧𑀤𑀸𑀦𑁂𑀦 𑀧𑀯𑁂𑀡𑀺𑀬𑀸 𑀯𑀸;

𑀬𑀣𑀸 𑀬𑀣𑀸 𑀬𑀢𑁆𑀣 𑀮𑀪𑁂𑀣 𑀅𑀢𑁆𑀣𑀁,

𑀢𑀣𑀸 𑀢𑀣𑀸 𑀢𑀢𑁆𑀣 𑀧𑀭𑀓𑁆𑀓𑀫𑁂𑀬𑁆𑀬.

‘‘𑀲𑀘𑁂 𑀧𑀚𑀸𑀦𑁂𑀬𑁆𑀬 𑀅𑀮𑀩𑁆𑀪𑀦𑁂𑀬𑁆𑀬𑁄,

𑀫𑀬𑀸𑀯 𑀅𑀜𑁆𑀜𑁂𑀦 𑀯𑀸 𑀏𑀲 𑀅𑀢𑁆𑀣𑁄;

𑀅𑀲𑁄𑀘𑀫𑀸𑀦𑁄 𑀅𑀥𑀺𑀯𑀸𑀲𑀬𑁂𑀬𑁆𑀬,

𑀓𑀫𑁆𑀫𑀁 𑀤𑀴𑁆𑀳𑀁 𑀓𑀺𑀦𑁆𑀢𑀺 𑀓𑀭𑁄𑀫𑀺 𑀤𑀸𑀦𑀻’’𑀢𑀺 [𑀚𑀸. 𑁧 𑀚𑀸𑀢𑀓𑁂𑀧𑀺].

𑀏𑀯𑀁 𑀯𑀼𑀢𑁆𑀢𑁂 𑀫𑀼𑀡𑁆𑀟𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀸𑀫𑁄 [𑀓𑁄 𑀦𑀼 𑀔𑁄 (𑀲𑀻. 𑀧𑀻.)] 𑀅𑀬𑀁, 𑀪𑀦𑁆𑀢𑁂, 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺? ‘‘𑀲𑁄𑀓𑀲𑀮𑁆𑀮𑀳𑀭𑀡𑁄 𑀦𑀸𑀫 𑀅𑀬𑀁, 𑀫𑀳𑀸𑀭𑀸𑀚, 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺. ‘‘𑀢𑀕𑁆𑀖, 𑀪𑀦𑁆𑀢𑁂, 𑀲𑁄𑀓𑀲𑀮𑁆𑀮𑀳𑀭𑀡𑁄 [𑀢𑀕𑁆𑀖 𑀪𑀦𑁆𑀢𑁂 𑀲𑁄𑀓𑀲𑀮𑁆𑀮𑀳𑀭𑀡𑁄, 𑀢𑀕𑁆𑀖 𑀪𑀦𑁆𑀢𑁂 𑀲𑁄𑀓𑀲𑀮𑁆𑀮𑀳𑀭𑀡𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]! 𑀇𑀫𑀜𑁆𑀳𑀺 𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀧𑀭𑀺𑀬𑀸𑀬𑀁 𑀲𑀼𑀢𑁆𑀯𑀸 𑀲𑁄𑀓𑀲𑀮𑁆𑀮𑀁 𑀧𑀳𑀻𑀦’’𑀦𑁆𑀢𑀺.

𑀅𑀣 𑀔𑁄 𑀫𑀼𑀡𑁆𑀟𑁄 𑀭𑀸𑀚𑀸 𑀧𑀺𑀬𑀓𑀁 𑀓𑁄𑀲𑀸𑀭𑀓𑁆𑀔𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀲𑀫𑁆𑀫 𑀧𑀺𑀬𑀓, 𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀲𑀭𑀻𑀭𑀁 𑀛𑀸𑀧𑁂𑀣; 𑀣𑀽𑀧𑀜𑁆𑀘𑀲𑁆𑀲𑀸 𑀓𑀭𑁄𑀣. 𑀅𑀚𑁆𑀚𑀢𑀕𑁆𑀕𑁂 𑀤𑀸𑀦𑀺 𑀫𑀬𑀁 𑀦𑁆𑀳𑀸𑀬𑀺𑀲𑁆𑀲𑀸𑀫 𑀘𑁂𑀯 𑀯𑀺𑀮𑀺𑀫𑁆𑀧𑀺𑀲𑁆𑀲𑀸𑀫 𑀪𑀢𑁆𑀢𑀜𑁆𑀘 𑀪𑀼𑀜𑁆𑀚𑀺𑀲𑁆𑀲𑀸𑀫 𑀓𑀫𑁆𑀫𑀦𑁆𑀢𑁂 𑀘 𑀧𑀬𑁄𑀚𑁂𑀲𑁆𑀲𑀸𑀫𑀸’’𑀢𑀺. 𑀤𑀲𑀫𑀁.

𑀫𑀼𑀡𑁆𑀟𑀭𑀸𑀚𑀯𑀕𑁆𑀕𑁄 𑀧𑀜𑁆𑀘𑀫𑁄.