𑁫. 𑀅𑀦𑀼𑀕𑁆𑀕𑀳𑀺𑀢𑀲𑀼𑀢𑁆𑀢𑀁

𑁨𑁫. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀻𑀮𑀸𑀦𑀼𑀕𑁆𑀕𑀳𑀺𑀢𑀸 𑀘 𑀳𑁄𑀢𑀺, 𑀲𑀼𑀢𑀸𑀦𑀼𑀕𑁆𑀕𑀳𑀺𑀢𑀸 𑀘 𑀳𑁄𑀢𑀺, 𑀲𑀸𑀓𑀘𑁆𑀙𑀸𑀦𑀼𑀕𑁆𑀕𑀳𑀺𑀢𑀸 𑀘 𑀳𑁄𑀢𑀺, 𑀲𑀫𑀣𑀸𑀦𑀼𑀕𑁆𑀕𑀳𑀺𑀢𑀸 𑀘 𑀳𑁄𑀢𑀺, 𑀯𑀺𑀧𑀲𑁆𑀲𑀦𑀸𑀦𑀼𑀕𑁆𑀕𑀳𑀺𑀢𑀸 𑀘 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸 𑀘 𑀳𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸 𑀘𑀸’’𑀢𑀺. 𑀧𑀜𑁆𑀘𑀫𑀁.