𑁮. 𑀧𑀭𑀺𑀳𑀸𑀦𑀺𑀲𑀼𑀢𑁆𑀢𑀁

𑁧𑁫𑁮. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

‘‘𑀬𑁄 𑀳𑀺 𑀓𑁄𑀘𑀺, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀘𑀢𑁆𑀢𑀸𑀭𑁄 𑀥𑀫𑁆𑀫𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀧𑀭𑀺𑀳𑀸𑀬𑀸𑀫𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺’. 𑀧𑀭𑀺𑀳𑀸𑀦𑀫𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀭𑀸𑀕𑀯𑁂𑀧𑀼𑀮𑁆𑀮𑀢𑁆𑀢𑀁 [𑀭𑀸𑀕𑀯𑁂𑀧𑀼𑀮𑁆𑀮𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀤𑁄𑀲𑀯𑁂𑀧𑀼𑀮𑁆𑀮𑀢𑁆𑀢𑀁, 𑀫𑁄𑀳𑀯𑁂𑀧𑀼𑀮𑁆𑀮𑀢𑁆𑀢𑀁, 𑀕𑀫𑁆𑀪𑀻𑀭𑁂𑀲𑀼 𑀔𑁄 𑀧𑀦𑀲𑁆𑀲 𑀞𑀸𑀦𑀸𑀞𑀸𑀦𑁂𑀲𑀼 𑀧𑀜𑁆𑀜𑀸𑀘𑀓𑁆𑀔𑀼 𑀦 𑀓𑀫𑀢𑀺. 𑀬𑁄 𑀳𑀺 𑀓𑁄𑀘𑀺, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀧𑀭𑀺𑀳𑀸𑀬𑀸𑀫𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺’. 𑀧𑀭𑀺𑀳𑀸𑀦𑀫𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸.

‘‘𑀬𑁄 𑀳𑀺 𑀓𑁄𑀘𑀺, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀘𑀢𑁆𑀢𑀸𑀭𑁄 𑀥𑀫𑁆𑀫𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀦 𑀧𑀭𑀺𑀳𑀸𑀬𑀸𑀫𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺’. 𑀅𑀧𑀭𑀺𑀳𑀸𑀦𑀫𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀭𑀸𑀕𑀢𑀦𑀼𑀢𑁆𑀢𑀁 [𑀭𑀸𑀕𑀢𑀦𑀼𑀢𑁆𑀢𑀦𑀁 (𑀓.)], 𑀤𑁄𑀲𑀢𑀦𑀼𑀢𑁆𑀢𑀁, 𑀫𑁄𑀳𑀢𑀦𑀼𑀢𑁆𑀢𑀁, 𑀕𑀫𑁆𑀪𑀻𑀭𑁂𑀲𑀼 𑀔𑁄 𑀧𑀦𑀲𑁆𑀲 𑀞𑀸𑀦𑀸𑀞𑀸𑀦𑁂𑀲𑀼 𑀧𑀜𑁆𑀜𑀸𑀘𑀓𑁆𑀔𑀼 𑀓𑀫𑀢𑀺. 𑀬𑁄 𑀳𑀺 𑀓𑁄𑀘𑀺, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀦 𑀧𑀭𑀺𑀳𑀸𑀬𑀸𑀫𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺’. 𑀅𑀧𑀭𑀺𑀳𑀸𑀦𑀫𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸’’𑀢𑀺. 𑀅𑀝𑁆𑀞𑀫𑀁.