𑁬. 𑀓𑀧𑁆𑀧𑀲𑀼𑀢𑁆𑀢𑀁

𑁧𑁫𑁬. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀬𑀤𑀸, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑁄 𑀲𑀁𑀯𑀝𑁆𑀝𑀢𑀺, 𑀢𑀁 𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼𑀁 𑁋 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀯𑀸.

‘‘𑀬𑀤𑀸, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑁄 𑀲𑀁𑀯𑀝𑁆𑀝𑁄 𑀢𑀺𑀝𑁆𑀞𑀢𑀺, 𑀢𑀁 𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼𑀁 𑁋 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀯𑀸.

‘‘𑀬𑀤𑀸, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑁄 𑀯𑀺𑀯𑀝𑁆𑀝𑀢𑀺, 𑀢𑀁 𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼𑀁 𑁋 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀯𑀸.

‘‘𑀬𑀤𑀸, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑁄 𑀯𑀺𑀯𑀝𑁆𑀝𑁄 𑀢𑀺𑀝𑁆𑀞𑀢𑀺, 𑀢𑀁 𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼𑀁 𑁋 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀯𑀸. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻’’𑀢𑀺. 𑀙𑀝𑁆𑀞𑀁.