(𑁧𑁪) 𑁪. 𑀧𑀼𑀕𑁆𑀕𑀮𑀯𑀕𑁆𑀕𑁄

𑁧. 𑀲𑀁𑀬𑁄𑀚𑀦𑀲𑀼𑀢𑁆𑀢𑀁

𑁧𑁩𑁧. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺, 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺, 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺, 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺, 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺.

‘‘𑀓𑀢𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺? 𑀲𑀓𑀤𑀸𑀕𑀸𑀫𑀺𑀲𑁆𑀲. 𑀇𑀫𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺.

‘‘𑀓𑀢𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺? 𑀉𑀤𑁆𑀥𑀁𑀲𑁄𑀢𑀲𑁆𑀲 𑀅𑀓𑀦𑀺𑀝𑁆𑀞𑀕𑀸𑀫𑀺𑀦𑁄. 𑀇𑀫𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺.

‘‘𑀓𑀢𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺? 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲. 𑀇𑀫𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺.

‘‘𑀓𑀢𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺? 𑀅𑀭𑀳𑀢𑁄. 𑀇𑀫𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀧𑀞𑀫𑀁.

𑁨. 𑀧𑀝𑀺𑀪𑀸𑀦𑀲𑀼𑀢𑁆𑀢𑀁

𑁧𑁩𑁨. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀬𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄, 𑀦𑁄 𑀫𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄; 𑀫𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄, 𑀦𑁄 𑀬𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄; 𑀬𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄 𑀘 𑀫𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄 𑀘; 𑀦𑁂𑀯 𑀬𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄 𑀦 𑀫𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺 [𑀧𑀼. 𑀧. 𑁧𑁫𑁨 𑀆𑀤𑀬𑁄]. 𑀤𑀼𑀢𑀺𑀬𑀁.

𑁩. 𑀉𑀕𑁆𑀖𑀝𑀺𑀢𑀜𑁆𑀜𑀽𑀲𑀼𑀢𑁆𑀢𑀁

𑁧𑁩𑁩. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀯𑀺𑀧𑀜𑁆𑀘𑀺𑀢𑀜𑁆𑀜𑀽, 𑀦𑁂𑀬𑁆𑀬𑁄, 𑀧𑀤𑀧𑀭𑀫𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺 [𑀧𑀼. 𑀧. 𑁧𑁫𑁨 𑀆𑀤𑀬𑁄]. 𑀢𑀢𑀺𑀬𑀁.

𑁪. 𑀉𑀝𑁆𑀞𑀸𑀦𑀨𑀮𑀲𑀼𑀢𑁆𑀢𑀁

𑁧𑁩𑁪. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀻 𑀦 𑀓𑀫𑁆𑀫𑀨𑀮𑀽𑀧𑀚𑀻𑀯𑀻, 𑀓𑀫𑁆𑀫𑀨𑀮𑀽𑀧𑀚𑀻𑀯𑀻 𑀦 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀻, 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀻 𑀘𑁂𑀯 𑀓𑀫𑁆𑀫𑀨𑀮𑀽𑀧𑀚𑀻𑀯𑀻 𑀘, 𑀦𑁂𑀯 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀻 𑀦 𑀓𑀫𑁆𑀫𑀨𑀮𑀽𑀧𑀚𑀻𑀯𑀻 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺 [𑀧𑀼. 𑀧. 𑁧𑁬𑁭]. 𑀘𑀢𑀼𑀢𑁆𑀣𑀁.

𑁫. 𑀲𑀸𑀯𑀚𑁆𑀚𑀲𑀼𑀢𑁆𑀢𑀁

𑁧𑁩𑁫. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 [𑀧𑀼. 𑀧. 𑁧𑁪𑁪 𑀆𑀤𑀬𑁄] 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀸𑀯𑀚𑁆𑀚𑁄, 𑀯𑀚𑁆𑀚𑀩𑀳𑀼𑀮𑁄, 𑀅𑀧𑁆𑀧𑀯𑀚𑁆𑀚𑁄, 𑀅𑀦𑀯𑀚𑁆𑀚𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀸𑀯𑀚𑁆𑀚𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀸𑀯𑀚𑁆𑀚𑁂𑀦 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀲𑀸𑀯𑀚𑁆𑀚𑁂𑀦 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀲𑀸𑀯𑀚𑁆𑀚𑁂𑀦 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀸𑀯𑀚𑁆𑀚𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀯𑀚𑁆𑀚𑀩𑀳𑀼𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀸𑀯𑀚𑁆𑀚𑁂𑀦 𑀩𑀳𑀼𑀮𑀁 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀧𑁆𑀧𑀁 𑀅𑀦𑀯𑀚𑁆𑀚𑁂𑀦; 𑀲𑀸𑀯𑀚𑁆𑀚𑁂𑀦 𑀩𑀳𑀼𑀮𑀁 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀧𑁆𑀧𑀁 𑀅𑀦𑀯𑀚𑁆𑀚𑁂𑀦; 𑀲𑀸𑀯𑀚𑁆𑀚𑁂𑀦 𑀩𑀳𑀼𑀮𑀁 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀧𑁆𑀧𑀁 𑀅𑀦𑀯𑀚𑁆𑀚𑁂𑀦. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀯𑀚𑁆𑀚𑀩𑀳𑀼𑀮𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀧𑁆𑀧𑀯𑀚𑁆𑀚𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀦𑀯𑀚𑁆𑀚𑁂𑀦 𑀩𑀳𑀼𑀮𑀁 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀧𑁆𑀧𑀁 𑀲𑀸𑀯𑀚𑁆𑀚𑁂𑀦; 𑀅𑀦𑀯𑀚𑁆𑀚𑁂𑀦 𑀩𑀳𑀼𑀮𑀁 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀧𑁆𑀧𑀁 𑀲𑀸𑀯𑀚𑁆𑀚𑁂𑀦; 𑀅𑀦𑀯𑀚𑁆𑀚𑁂𑀦 𑀩𑀳𑀼𑀮𑀁 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀧𑁆𑀧𑀁 𑀲𑀸𑀯𑀚𑁆𑀚𑁂𑀦. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀧𑁆𑀧𑀯𑀚𑁆𑀚𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀦𑀯𑀚𑁆𑀚𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀦𑀯𑀚𑁆𑀚𑁂𑀦 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀦𑀯𑀚𑁆𑀚𑁂𑀦 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀦𑀯𑀚𑁆𑀚𑁂𑀦 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀦𑀯𑀚𑁆𑀚𑁄 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀧𑀞𑀫𑀲𑀻𑀮𑀲𑀼𑀢𑁆𑀢𑀁

𑁧𑁩𑁬. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑁂𑀲𑀼 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀧𑀜𑁆𑀜𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀧𑀜𑁆𑀜𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀻, 𑀧𑀜𑁆𑀜𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀻, 𑀧𑀜𑁆𑀜𑀸𑀬 𑀧𑀭𑀺𑀧𑀽𑀭𑀓𑀸𑀭𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀙𑀝𑁆𑀞𑀁.

𑁭. 𑀤𑀼𑀢𑀺𑀬𑀲𑀻𑀮𑀲𑀼𑀢𑁆𑀢𑀁

𑁧𑁩𑁭. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦 𑀲𑀻𑀮𑀕𑀭𑀼 𑀳𑁄𑀢𑀺 𑀦 𑀲𑀻𑀮𑀸𑀥𑀺𑀧𑀢𑁂𑀬𑁆𑀬𑁄, 𑀦 𑀲𑀫𑀸𑀥𑀺𑀕𑀭𑀼 𑀳𑁄𑀢𑀺 𑀦 𑀲𑀫𑀸𑀥𑀸𑀥𑀺𑀧𑀢𑁂𑀬𑁆𑀬𑁄, 𑀦 𑀧𑀜𑁆𑀜𑀸𑀕𑀭𑀼 𑀳𑁄𑀢𑀺 𑀦 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑀕𑀭𑀼 𑀳𑁄𑀢𑀺 𑀲𑀻𑀮𑀸𑀥𑀺𑀧𑀢𑁂𑀬𑁆𑀬𑁄, 𑀦 𑀲𑀫𑀸𑀥𑀺𑀕𑀭𑀼 𑀳𑁄𑀢𑀺 𑀦 𑀲𑀫𑀸𑀥𑀸𑀥𑀺𑀧𑀢𑁂𑀬𑁆𑀬𑁄, 𑀦 𑀧𑀜𑁆𑀜𑀸𑀕𑀭𑀼 𑀳𑁄𑀢𑀺 𑀦 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑀕𑀭𑀼 𑀳𑁄𑀢𑀺 𑀲𑀻𑀮𑀸𑀥𑀺𑀧𑀢𑁂𑀬𑁆𑀬𑁄, 𑀲𑀫𑀸𑀥𑀺𑀕𑀭𑀼 𑀳𑁄𑀢𑀺 𑀲𑀫𑀸𑀥𑀸𑀥𑀺𑀧𑀢𑁂𑀬𑁆𑀬𑁄, 𑀦 𑀧𑀜𑁆𑀜𑀸𑀕𑀭𑀼 𑀳𑁄𑀢𑀺 𑀦 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑀕𑀭𑀼 𑀳𑁄𑀢𑀺 𑀲𑀻𑀮𑀸𑀥𑀺𑀧𑀢𑁂𑀬𑁆𑀬𑁄, 𑀲𑀫𑀸𑀥𑀺𑀕𑀭𑀼 𑀳𑁄𑀢𑀺 𑀲𑀫𑀸𑀥𑀸𑀥𑀺𑀧𑀢𑁂𑀬𑁆𑀬𑁄, 𑀧𑀜𑁆𑀜𑀸𑀕𑀭𑀼 𑀳𑁄𑀢𑀺 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀦𑀺𑀓𑀝𑁆𑀞𑀲𑀼𑀢𑁆𑀢𑀁

𑁧𑁩𑁮. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀦𑀺𑀓𑀝𑁆𑀞𑀓𑀸𑀬𑁄 𑀅𑀦𑀺𑀓𑀝𑁆𑀞𑀘𑀺𑀢𑁆𑀢𑁄, 𑀅𑀦𑀺𑀓𑀝𑁆𑀞𑀓𑀸𑀬𑁄 𑀦𑀺𑀓𑀝𑁆𑀞𑀘𑀺𑀢𑁆𑀢𑁄, 𑀅𑀦𑀺𑀓𑀝𑁆𑀞𑀓𑀸𑀬𑁄 𑀘 𑀅𑀦𑀺𑀓𑀝𑁆𑀞𑀘𑀺𑀢𑁆𑀢𑁄 𑀘, 𑀦𑀺𑀓𑀝𑁆𑀞𑀓𑀸𑀬𑁄 𑀘 𑀦𑀺𑀓𑀝𑁆𑀞𑀘𑀺𑀢𑁆𑀢𑁄 𑀘.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀦𑀺𑀓𑀝𑁆𑀞𑀓𑀸𑀬𑁄 𑀳𑁄𑀢𑀺 𑀅𑀦𑀺𑀓𑀝𑁆𑀞𑀘𑀺𑀢𑁆𑀢𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 [𑀅𑀭𑀜𑁆𑀜𑁂 𑀯𑀦𑀧𑀢𑁆𑀣𑀸𑀦𑀺 (𑀲𑀻. 𑀧𑀻.)] 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺. 𑀲𑁄 𑀢𑀢𑁆𑀣 𑀓𑀸𑀫𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀢𑀓𑁆𑀓𑁂𑀢𑀺 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀢𑀓𑁆𑀓𑁂𑀢𑀺 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀢𑀓𑁆𑀓𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀦𑀺𑀓𑀝𑁆𑀞𑀓𑀸𑀬𑁄 𑀳𑁄𑀢𑀺 𑀅𑀦𑀺𑀓𑀝𑁆𑀞𑀘𑀺𑀢𑁆𑀢𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀦𑀺𑀓𑀝𑁆𑀞𑀓𑀸𑀬𑁄 𑀳𑁄𑀢𑀺 𑀦𑀺𑀓𑀝𑁆𑀞𑀘𑀺𑀢𑁆𑀢𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑀳𑁂𑀯 𑀔𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺. 𑀲𑁄 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀢𑀓𑁆𑀓𑁂𑀢𑀺 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀢𑀓𑁆𑀓𑁂𑀢𑀺 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀢𑀓𑁆𑀓𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀦𑀺𑀓𑀝𑁆𑀞𑀓𑀸𑀬𑁄 𑀳𑁄𑀢𑀺 𑀦𑀺𑀓𑀝𑁆𑀞𑀘𑀺𑀢𑁆𑀢𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀦𑀺𑀓𑀝𑁆𑀞𑀓𑀸𑀬𑁄 𑀘 𑀳𑁄𑀢𑀺 𑀅𑀦𑀺𑀓𑀝𑁆𑀞𑀘𑀺𑀢𑁆𑀢𑁄 𑀘? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑀳𑁂𑀯 𑀔𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺. 𑀲𑁄 𑀢𑀢𑁆𑀣 𑀓𑀸𑀫𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀢𑀓𑁆𑀓𑁂𑀢𑀺 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀢𑀓𑁆𑀓𑁂𑀢𑀺 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀢𑀓𑁆𑀓𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀦𑀺𑀓𑀝𑁆𑀞𑀓𑀸𑀬𑁄 𑀘 𑀳𑁄𑀢𑀺 𑀅𑀦𑀺𑀓𑀝𑁆𑀞𑀘𑀺𑀢𑁆𑀢𑁄 𑀘.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀦𑀺𑀓𑀝𑁆𑀞𑀓𑀸𑀬𑁄 𑀘 𑀳𑁄𑀢𑀺 𑀦𑀺𑀓𑀝𑁆𑀞𑀘𑀺𑀢𑁆𑀢𑁄 𑀘? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺. 𑀲𑁄 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀢𑀓𑁆𑀓𑁂𑀢𑀺 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀢𑀓𑁆𑀓𑁂𑀢𑀺 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀢𑀓𑁆𑀓𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀦𑀺𑀓𑀝𑁆𑀞𑀓𑀸𑀬𑁄 𑀘 𑀳𑁄𑀢𑀺 𑀦𑀺𑀓𑀝𑁆𑀞𑀘𑀺𑀢𑁆𑀢𑁄 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀁

𑁧𑁩𑁯. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀓𑀣𑀺𑀓𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀥𑀫𑁆𑀫𑀓𑀣𑀺𑀓𑁄 𑀅𑀧𑁆𑀧𑀜𑁆𑀘 𑀪𑀸𑀲𑀢𑀺 𑀅𑀲𑀳𑀺𑀢𑀜𑁆𑀘; 𑀧𑀭𑀺𑀲𑀸 𑀘𑀲𑁆𑀲 [𑀧𑀭𑀺𑀲𑀸 𑀘 (𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀧𑀼. 𑀧. 𑁧𑁫𑁬] 𑀦 𑀓𑀼𑀲𑀮𑀸 𑀳𑁄𑀢𑀺 𑀲𑀳𑀺𑀢𑀸𑀲𑀳𑀺𑀢𑀲𑁆𑀲. 𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀓𑀣𑀺𑀓𑁄 𑀏𑀯𑀭𑀽𑀧𑀸𑀬 𑀧𑀭𑀺𑀲𑀸𑀬 𑀥𑀫𑁆𑀫𑀓𑀣𑀺𑀓𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀥𑀫𑁆𑀫𑀓𑀣𑀺𑀓𑁄 𑀅𑀧𑁆𑀧𑀜𑁆𑀘 𑀪𑀸𑀲𑀢𑀺 𑀲𑀳𑀺𑀢𑀜𑁆𑀘; 𑀧𑀭𑀺𑀲𑀸 𑀘𑀲𑁆𑀲 𑀓𑀼𑀲𑀮𑀸 𑀳𑁄𑀢𑀺 𑀲𑀳𑀺𑀢𑀸𑀲𑀳𑀺𑀢𑀲𑁆𑀲. 𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀓𑀣𑀺𑀓𑁄 𑀏𑀯𑀭𑀽𑀧𑀸𑀬 𑀧𑀭𑀺𑀲𑀸𑀬 𑀥𑀫𑁆𑀫𑀓𑀣𑀺𑀓𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀥𑀫𑁆𑀫𑀓𑀣𑀺𑀓𑁄 𑀩𑀳𑀼𑀜𑁆𑀘 𑀪𑀸𑀲𑀢𑀺 𑀅𑀲𑀳𑀺𑀢𑀜𑁆𑀘; 𑀧𑀭𑀺𑀲𑀸 𑀘𑀲𑁆𑀲 𑀦 𑀓𑀼𑀲𑀮𑀸 𑀳𑁄𑀢𑀺 𑀲𑀳𑀺𑀢𑀸𑀲𑀳𑀺𑀢𑀲𑁆𑀲. 𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀓𑀣𑀺𑀓𑁄 𑀏𑀯𑀭𑀽𑀧𑀸𑀬 𑀧𑀭𑀺𑀲𑀸𑀬 𑀥𑀫𑁆𑀫𑀓𑀣𑀺𑀓𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀥𑀫𑁆𑀫𑀓𑀣𑀺𑀓𑁄 𑀩𑀳𑀼𑀜𑁆𑀘 𑀪𑀸𑀲𑀢𑀺 𑀲𑀳𑀺𑀢𑀜𑁆𑀘; 𑀧𑀭𑀺𑀲𑀸 𑀘𑀲𑁆𑀲 𑀓𑀼𑀲𑀮𑀸 𑀳𑁄𑀢𑀺 𑀲𑀳𑀺𑀢𑀸𑀲𑀳𑀺𑀢𑀲𑁆𑀲. 𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀓𑀣𑀺𑀓𑁄 𑀏𑀯𑀭𑀽𑀧𑀸𑀬 𑀧𑀭𑀺𑀲𑀸𑀬 𑀥𑀫𑁆𑀫𑀓𑀣𑀺𑀓𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀥𑀫𑁆𑀫𑀓𑀣𑀺𑀓𑀸’’𑀢𑀺. 𑀦𑀯𑀫𑀁.

𑁧𑁦. 𑀯𑀸𑀤𑀻𑀲𑀼𑀢𑁆𑀢𑀁

𑁧𑁪𑁦. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀯𑀸𑀤𑀻. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀯𑀸𑀤𑀻 𑀅𑀢𑁆𑀣𑀢𑁄 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀦𑁄 𑀩𑁆𑀬𑀜𑁆𑀚𑀦𑀢𑁄; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀯𑀸𑀤𑀻 𑀩𑁆𑀬𑀜𑁆𑀚𑀦𑀢𑁄 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀦𑁄 𑀅𑀢𑁆𑀣𑀢𑁄; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀯𑀸𑀤𑀻 𑀅𑀢𑁆𑀣𑀢𑁄 𑀘 𑀩𑁆𑀬𑀜𑁆𑀚𑀦𑀢𑁄 𑀘 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀯𑀸𑀤𑀻 𑀦𑁂𑀯𑀢𑁆𑀣𑀢𑁄 𑀦𑁄 𑀩𑁆𑀬𑀜𑁆𑀚𑀦𑀢𑁄 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀯𑀸𑀤𑀻. 𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄 𑀬𑀁 𑀘𑀢𑀽𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀲𑀫𑀦𑁆𑀦𑀸𑀕𑀢𑁄 [𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 (𑀲𑀻. 𑀲𑁆𑀬𑀸. 𑀓𑀁.)] 𑀅𑀢𑁆𑀣𑀢𑁄 𑀯𑀸 𑀩𑁆𑀬𑀜𑁆𑀚𑀦𑀢𑁄 𑀯𑀸 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀤𑀲𑀫𑀁.

𑀧𑀼𑀕𑁆𑀕𑀮𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.