𑁫. 𑀧𑀞𑀫𑀲𑀫𑀚𑀻𑀯𑀻𑀲𑀼𑀢𑁆𑀢𑀁

𑁫𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀪𑀕𑁆𑀕𑁂𑀲𑀼 𑀯𑀺𑀳𑀭𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑁂 [𑀲𑀼𑀁𑀲𑀼𑀫𑀸𑀭𑀕𑀺𑀭𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑁂𑀲𑀓𑀴𑀸𑀯𑀦𑁂 [𑀪𑁂𑀲𑀓𑀮𑀸𑀯𑀦𑁂 (𑀲𑀻. 𑀧𑀻. 𑀓.)] 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀦𑀓𑀼𑀮𑀧𑀺𑀢𑀼𑀦𑁄 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀦𑀓𑀼𑀮𑀧𑀺𑀢𑀸 𑀘 𑀕𑀳𑀧𑀢𑀺 𑀦𑀓𑀼𑀮𑀫𑀸𑀢𑀸 𑀘 𑀕𑀳𑀧𑀢𑀸𑀦𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀦𑀓𑀼𑀮𑀧𑀺𑀢𑀸 𑀕𑀳𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀬𑀢𑁄 𑀫𑁂, 𑀪𑀦𑁆𑀢𑁂, 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀤𑀳𑀭𑀲𑁆𑀲𑁂𑀯 𑀤𑀳𑀭𑀸 𑀆𑀦𑀻𑀢𑀸, 𑀦𑀸𑀪𑀺𑀚𑀸𑀦𑀸𑀫𑀺 𑀦𑀓𑀼𑀮𑀫𑀸𑀢𑀭𑀁 𑀕𑀳𑀧𑀢𑀸𑀦𑀺𑀁 𑀫𑀦𑀲𑀸𑀧𑀺 𑀅𑀢𑀺𑀘𑀭𑀺𑀢𑀸, 𑀓𑀼𑀢𑁄 𑀧𑀦 𑀓𑀸𑀬𑁂𑀦! 𑀇𑀘𑁆𑀙𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀺𑀢𑀼𑀁 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀺𑀢𑀼’’𑀦𑁆𑀢𑀺. 𑀦𑀓𑀼𑀮𑀫𑀸𑀢𑀸𑀧𑀺 𑀔𑁄 𑀕𑀳𑀧𑀢𑀸𑀦𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀢𑁄𑀳𑀁, 𑀪𑀦𑁆𑀢𑁂, 𑀦𑀓𑀼𑀮𑀧𑀺𑀢𑀼𑀦𑁄 𑀕𑀳𑀧𑀢𑀺𑀲𑁆𑀲 𑀤𑀳𑀭𑀲𑁆𑀲𑁂𑀯 𑀤𑀳𑀭𑀸 𑀆𑀦𑀻𑀢𑀸, 𑀦𑀸𑀪𑀺𑀚𑀸𑀦𑀸𑀫𑀺 𑀦𑀓𑀼𑀮𑀧𑀺𑀢𑀭𑀁 𑀕𑀳𑀧𑀢𑀺𑀁 𑀫𑀦𑀲𑀸𑀧𑀺 𑀅𑀢𑀺𑀘𑀭𑀺𑀢𑀸, 𑀓𑀼𑀢𑁄 𑀧𑀦 𑀓𑀸𑀬𑁂𑀦! 𑀇𑀘𑁆𑀙𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀺𑀢𑀼𑀁 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀺𑀢𑀼’’𑀦𑁆𑀢𑀺.

‘‘𑀆𑀓𑀗𑁆𑀔𑁂𑀬𑁆𑀬𑀼𑀁 𑀘𑁂, 𑀕𑀳𑀧𑀢𑀬𑁄, 𑀉𑀪𑁄 𑀚𑀸𑀦𑀺𑀧𑀢𑀬𑁄 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀺𑀢𑀼𑀁 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀺𑀢𑀼𑀁 𑀉𑀪𑁄𑀯 [𑀉𑀪𑁄 𑀘 (𑀲𑀻. 𑀧𑀻.)] 𑀅𑀲𑁆𑀲𑀼 𑀲𑀫𑀲𑀤𑁆𑀥𑀸 𑀲𑀫𑀲𑀻𑀮𑀸 𑀲𑀫𑀘𑀸𑀕𑀸 𑀲𑀫𑀧𑀜𑁆𑀜𑀸, 𑀢𑁂 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀦𑁆𑀢𑀺 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀦𑁆𑀢𑀻’’𑀢𑀺 [𑀧𑀲𑁆𑀲𑀺𑀲𑁆𑀲𑀦𑁆𑀢𑀻𑀢𑀺 (𑀓.)].

‘‘𑀉𑀪𑁄 𑀲𑀤𑁆𑀥𑀸 𑀯𑀤𑀜𑁆𑀜𑀽 𑀘, 𑀲𑀜𑁆𑀜𑀢𑀸 𑀥𑀫𑁆𑀫𑀚𑀻𑀯𑀺𑀦𑁄;

𑀢𑁂 𑀳𑁄𑀦𑁆𑀢𑀺 𑀚𑀸𑀦𑀺𑀧𑀢𑀬𑁄, 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀁𑀯𑀤𑀸.

‘‘𑀅𑀢𑁆𑀣𑀸𑀲𑀁 𑀧𑀘𑀼𑀭𑀸 𑀳𑁄𑀦𑁆𑀢𑀺, 𑀨𑀸𑀲𑀼𑀓𑀁 𑀉𑀧𑀚𑀸𑀬𑀢𑀺;

𑀅𑀫𑀺𑀢𑁆𑀢𑀸 𑀤𑀼𑀫𑁆𑀫𑀦𑀸 𑀳𑁄𑀦𑁆𑀢𑀺, 𑀉𑀪𑀺𑀦𑁆𑀦𑀁 𑀲𑀫𑀲𑀻𑀮𑀺𑀦𑀁.

‘‘𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀲𑀫𑀲𑀻𑀮𑀩𑁆𑀩𑀢𑀸 𑀉𑀪𑁄;

𑀦𑀦𑁆𑀤𑀺𑀦𑁄 𑀤𑁂𑀯𑀮𑁄𑀓𑀲𑁆𑀫𑀺𑀁, 𑀫𑁄𑀤𑀦𑁆𑀢𑀺 𑀓𑀸𑀫𑀓𑀸𑀫𑀺𑀦𑁄’’𑀢𑀺. 𑀧𑀜𑁆𑀘𑀫𑀁;